Majugo Mateo kojoa amani le`jo Yesu dri rii ojo `ba cidru oluka vudri dia ri `bati ni, a`dusi Mateo ondre Yesu ni vua ohwe sadini driaru ra ojo Yesu ni Opi opi cidru dri `i. Draa, Kristo `ba vu ndutu dri, rutika endri si idi ofu loso eyidri vua Endri dri ama icale disi ri `bati, ka gbadru olu vico mugati lidri hwe`di ridri rii nyaka si. Ki aini remuka ametro alu ofu loso loku rii icare ga ni adu ku, a`dusi ai cidru ametro lolu.
Disidru, ta `ba Yesu Kristo ni Opi opi cidru dri dia lele endri si rii idejo, bugu dii osiru kendre mugati lidri hwe`di ri ani ausini kohwedru lovu aini ozo endri si risi. Ma`di le`jo di sidi ri kojoa kole `ba cidru lebe aia enzi dri ri esuka ra ri `bati kole kobaki igeni aidri rii Yesu Kristo ni, Opi opi cidru dri ria ru ga, vua kole konyaki le`jo driaru rii kendre mugati lidri hwe`di riidru au aini zojo lidri endri dri si.
Bugu dii ka mugati lidri dri rii hwe anyi cidru engwika `ba Opi dri riidru a`i si ri `bati ni. Ekelezia driaru risi vua tiluza driaru ri `bati si, Rubanga kaci mugati lidri hwe`di dii hweka anyini tro andraga. Tutu Rubanga dri ri kolu anyi cidru rutika di ofu loso eyidri vua Endri dri risi ri `bati tro, a`dusi asiti anyidri rii remure ga ametro alu Yesu Kristo ni `a.