Search
پنجابی
پنجابی
کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔

خطبے

مضمون 9: رومیوں (رومیوں دی کتاب اُتے تفسیر)

[3-2 باب] پاپاں توں مُکتی صرف ایمان دے راہیں ہیگی اے <رومیوں ۳:۱ ۔ ۳۱>

>رومیوں ۳:۱ ۔ ۳۱>
”ایس لئی یہودی دی کیہ وڈیائی ہیگی اے تےختنے دا کیہ فائدہ ؟ ہر طرحاں توں بوہت ۔ سب توں ودھ کے ایہہ پئی خُدا دا کلام اوہناں نو ں ملیا ۔ جے کئی بے وفا نکلے تاں کیہ ہویا ؟ کیہ اوہناں دی بے وفائی خُدا دی وفاداری نوں جھوٹا کر سکدی اے؟ کدی نئیں ۔ سگوں خُدا سچا ثابت ہووے تے ہر اک بندہ جھوٹا۔ ایس لئی لکھیا اے پئی توں اپنی گلاں وچ راستباز ثابت ہوویں تے اپنے مقدمہ اُتے فتح پاویں ۔جے ساڈی بدی خُدا دی راستبازی دی چنگیائی وکھاؤندی اے تاں اسیں کیہ آکھیے ؟ کیہ ایہہ پئی خُدا بے انصاف ہیگااے جیہڑا عذاب لیاؤندااے ؟ (میَں ایہہ گل بندیاں وانگر کردا ہاں )۔بالکل نئیں ۔ نئیں تے خُدا کویں جگ دا انصاف کرےگا ؟ جے میرے جھوٹ دے سبب خُدا دی سچیائی اوہدے جلال لئی بوہتی ظاہر ہوئی تاں فیر کیوں پاپی وانگر مینوں حکم دتا جاندا اے ؟ تے اسیں  کیوں بدی نہ کرئیے تاں پئی بھلیائی پیدا ہووے ؟ ایس لئی ساڈے اُتے ایہہ توہمت وی لائی جاندی اے تے کئی آکھدے نیں پئی ایناں دا ایہو ای آکھنا اے ،پر ایہو جیہا ں دا قصور وار ثابت ہونا انصاف ہیگا اے ۔ ایس لئی کیہ ہویا ؟ کیہ اسیں کُجھ وڈیائی رکھدے آں ؟ بالکل نئیں ایس لئی پئی اسیں یہودیاں تے یونانیاں دونواں اُتے پہلوں ای ایہہ توہمت لا چُکے آں پئی اوہ سارے دے سارے پاپ ہیٹھاں ہیگے نیں ۔ ایس لئی لکھیا اے پئی کوئی راستباز نئیں ۔ اک وی نئیں ۔ کوئی سمجھدار نئیں ۔ کوئی خُدا دا طالب نئیں ۔ سارے بھٹکے نیں سارے دے سارے نکمے ہیگے نیں ۔ کوئی بھلیائی کرن والا نئیں ۔ اک وی نئیں ۔ اوہناں دا سنگھ کھلی ہوئی قبر ہیگااے ۔ اوہناں نیں اپنی جیبھاں نال فریب دتا ۔ اوہناں دے بُلا ں وچ سپاں دی وِس ہیگی اے ۔ اوہناں دا مونہہ لعنت تے کوڑ نال بھریا اے ۔ اوہناں دے پیر قتل کرن لئی چھیتی ٹُردے  نیں ۔ اوہناں دیاں راہواں وچ بربادی تے بھیڑے حال ہیگے نیں ۔ تے اوہناں نیں سلامتی دی راہ نوں نہ جانیا ۔ اوہناں دیاں اکھاں وچ خُدا دا ڈر نئیں ہیگااے ۔ ہُن سانوں پتہ لگیا اے پئی شریعت جو کُجھ آکھدی اے اوہناں نوں آکھدی اے جیہڑے  شریعت ہیٹھاں ہیگے نیں تاں پئی ہر کسے دا مونہہ بند ہو جاوے تے سارا جگ خُدا دے اگے سزا پاؤن دے لائق ثابت ہووے ۔ ایس لئی  پئی شریعت دے کماں توں کوئی بندہ اوہدے اگے راستباز نئیں ثابت ہووے گا ۔ ایس لئی پئی شریعت دے راہیں تاں پاپ دی پچھان ای ہوندی اے ۔ پر ہُن شریعت توں اَڈ خُدا دی اک راستبازی ظاہر ہوئی اے جیہدی گواہی شریعت تے نبیاں توں ملدی اے ۔ مطلب اے خُدا دی اوہ راستبازی جیہڑی یسوع مسیح اُتے ایمان لیاؤن نال سارےایمان لیاؤن والیاں نوں ملدی اے ،کیوں جے کوئی فرق نئیں ۔ایس لئی پئی ساریاں نیں پاپ کیتا تے خُدا دے جلال توں سکھنے ہیگے نیں ۔پر اوہدےفضل دے سبب اوس مکتی دے راہیں جیہڑی مسیح یسوع وچ ہیگی اے مفت راستباز ثابت کیتے جاندے آں ۔ اوہنوں خُدا نے اوہدے لہو دے سبب اک ایہو جیہا  فدیہ بنایا جیہڑا ایمان لیاؤن نال فائدہ مند ہووے تاں پئی جیہڑے پاپ پہلوں ہوئے سَن تے جنہاں نوں خُدا نے صبر کرکے ٹال دتا سی اوہناں دے بارے وچ اوہ اپنی راستبازی وکھائے ۔سگوں ایسے ویلے اوہدی راستبازی ظاہر ہووے تاں پئی اوہ آپ وی انصاف کرن والے رہوے تے جیہڑا یسوع اُتے ایمان لیائے اوہنوں وی راستباز بناؤن والا ہووے ۔ ایس لئی فخر کتھے گیا ؟ ایہدی تھاں ای نئیں ۔ کیہڑی شریعت دے سبب توں ؟ کیہ کماں دی شریعت دے سبب توں ؟ نئیں سگوں ایمان دی شریعت توں۔ ایس لئی اسیں ایس نتیجے اُتے پہونچدے آں پئی بند ہ شریعت دے کماں توں اَڈ ایمان دے سبب  راستباز بن دا اے ۔ کیہ خُدا یہودیاں دا ای اے اوپریاں قوماں دا نئیں ؟ بے شک اوپریاں قوماں دا وی ہیگااے ۔ ایس لئی اِکو ای خُدا ہیگااے جیہڑا ختنے والیاں نوں وی ایمان نال تے ختنے توں اَڈ لوکاں نوں وی ایمان دے ای سبب راستباز بناوے گا ۔ ایس لئی کیہ اسیں شریعت نوں ایمان نال جھوٹا کردے آں ؟ بالکل نئیں سگوں شریعت نوں قائم رکھدے آں ۔ “
 
 

لوکاں دی بے وفائی خُدا دی مکتی نوں جھوٹا نئیں  کرسکدی

 
پولُس رسول دسدااے پئی شریعت داکامل ہونا تے خُدا دے فضل دی مکتی سانوں ساڈے کماں دے راہیں نئیں ، سگوں ایمان دے راہیں دتی گئی اے ۔ اسیں خُدا دی مکتی دے راہیں راستباز بنے تے اپنے سارے پاپاں توں مکتی پا چُکے آں ۔” ایس لئی یہودی دی کیہ وڈیائی ہیگی اے تےختنے دا کیہ فائدہ ؟ ہر طرحاں توں بوہت ۔ سب توں ودھ کے ایہہ پئی خُدا دا کلام اوہناں نو ں ملیا ۔ جے کئی بے وفا نکلے تاں کیہ ہویا ؟ کیہ اوہناں دی بے وفائی خُدا دی وفاداری نوں جھوٹا کر  سکدی  اے؟
کدی نئیں! “ (رومیوں ۳:۱ ۔۴)۔
یہودیاں نوں ایہہ وڈیائی ملی اے پئی خُدا دا کلام اوہناں دے حوالے کیتا گیا ۔ اوہ اپنے باپ دادا کولوں اوہدا کلام سُن دے رہے تے جیوندے رہے ۔ کیوں جے خُدا نے اپنا کلام اوہناں دے ای حوالے کیتا تےایہہ اوہناں نوں دتا گیا ، ایس لئی اوہ سوچدے نیں پئی اوہ یونانیوں توں چنگے نیں ۔ جدوں پئی خُدا دا کلام آکھدااے پئی خُدا نے یہودیاں نوں رد کردتا ایس لئی پئی اوہناں نیں یسوع دا جنہے اوہناں نوں اوہناں دے پاپاں توں چھڈایا ، یقین نہ کیتا ۔
پولُس آکھدااے ، ” جے کئی بے وفا نکلے تاں کیہ ہویا ؟ کیہ اوہناں دی بے وفائی خُدا دی وفاداری نوں جھوٹا کر سکدی اے؟ کدی نئیں! “ لوکاں دی بے وفائی خُدا دی مکتی نوں جھوٹا نئیں کر سکدی ۔ ” خُدا دی وفاداری “ دا مطلب ،  ” خُدا دی سچیائی ہیگی اے “ ایہدا مطلب ہیگااے پئی بھاویں یہودی ایہدے اُتے یقین رکھن یاں نہ رکھن تاں وی خُدادی وفاداری تے پاپاں توں مکتی کدی  گئی گواتی نئیں ہوسکدی ۔ خُدا دا کلام وعدہ کردااے پئی بھاویں اوہ ایہدے اُتے یقین رکھن یاں نہ رکھن ،ایہہ مُک نئیں سکدی ۔
جے یہودی ایمان نئیں لیائے تاں اوپریاں قوماں ایمان لیاؤن گئیاں ۔ خُدافرماؤندااے پئی  جیہڑا وی ایمان لیائے پاپاں توں مکتی پاوے گا ۔ ایس لئی ، خُدا نے یہودیاں نوں رد کیتا ایس لئی پئی اوہ سچیائی دے اوس کلام اُتے ایمان نہ لیائے جیہڑا خُدا دے وعدے دے مطابق ٹھیک ٹھیک پورا ہویا ،ایتھوں تیک پئی ایہہ کلام یہودیاں دے حوالے کیتا گیا سی ۔
ہیٹھا ں دتے ہوئے پولُس رسول دے ایس دعوے دے پچھے چلدے آں : خُدا نے مکتی دی نعمت ساری انسانی پیڑھی نوں دتی اے ۔ خُدافرماؤندااے پئی اوہنے پُرانے عہد نامے وچ ایہدا وعدہ کیتا سی تے نویں عہد نامے وچ اپنے اکلے پُتر یسوع مسیح نوں ایس جگ وچ گھل کے ایس وعدے نوں پورا کیتا اے۔ کئی لوک خُدا دی خوشخبری اُتے ایمان رکھدے نیں ، پر کئی نئیں رکھدے ۔ ایس طرحاں جیہڑا وی ایمان  لیاؤندااے اوہ مبارک تے خُدا دا پُتر بن دا اے ، جویں پئی اوہنے وعدہ کیتا سی ۔ تے خُدا دیاں نعمتاں کدی نہ مکن گئیاں بھاویں کنے ای لوک اوہدے اُتے ایمان لیاؤن مُکردے رہن ۔
 
 

جیہڑا وی سچیائی اُتے ایمان لیاؤندااے اوہدی وڈی محبت پا سکدااے

 
ایس لئی  ہر کوئی سچیائی دے کلا م نوں سُن کے تے ایمان لیا کے خُدا دی وڈی محبت نوں پا سکدا اے ،پر بے ایماناں دا دعویٰ ہیگااے پئی خدا جھوٹا ہیگااے ۔ پر ایہہ سچ ہیگااے ،پئی خُدا اپنے وعدے نوں پورا کرن لئی بے ایماناں نوں اپنی مکتی توں باہر کڈ ھ دیوےگا ایس لئی پئی اوہناں نیں پاپاں دی معافی تے اوہدے فضل نوں رد کیتا اے ۔
پولُس آکھدا اے ، ” کیہ اوہناں دی بے وفائی خُدا دی وفاداری نوں جھوٹا کر سکدی اے؟ کدی نئیں! “ خُدا نے وعدہ کیتا تے پوری وفاداری نال اِکو ای وار ساریاں لوکاں نوں جلال تے مکتی دی نعمت دتی ۔
بائبل خُدا دی ایس نعمت بارے کیہ آکھدی اے ؟ پاک بائبل آکھدی اے پئی خُدا باپ نے اپنے سوہنے پُتر نوں گھلیا تے اوہناں ساریاں نوں جیہڑے اوہدے اکلے پُتر دے راہیں پاپاں دی معافی اُتے ایمان لیائے نیں اوہناں نوں فضل دے راہیں اپنے پُتر بنن دا حق دتا اے ۔ ایہہ شروع توں ای اوہدا منصوبہ ہیگا سی پئی اوہ ساریاں لوکاں نوں اپنے جلال دے لیڑے پواوے گا تے اپنی راستبازی دے راہیں پاپاں توں مکتی دے کے اپنے پُتر بنن دا  حق دیوے گا ۔ تے اوہنے بوہت وفا داری نال ایہنوں پورا کیتا ۔ ایس لئی ، ایماندار خُدا دے کلام دے مطابق مبارک ہیگے نیں ۔ پر بے ایماناں نوں ایہدے مطابق سزا ملے گی ۔
ایہہ بوہت واجب ہیگااے پئی بے ایمان دوزخ دی اگ وچ سُٹے جان ۔ خُدا نے اک قانون بنایا اے تاں پئی اسیں ایس کلام اُتے ایمان لیا کے مکتی پا سکیے ۔ اوہ ایہہ وی آکھدااے پئی بھاویں لوک ایس کلام اُتے ایمان نہ لیاؤن ،فیروی خُدا دی وفاداری کدی جھوٹی نہ ہووے گی ۔ خُدا دی مکتی دی وفاداری نوں منن نال اسیں اوہدے مبارک لوکاں وچ گنے جاندے آں ۔ خُدافرماؤندااے ،” سگوں خُدا سچا ثابت ہووے تے ہر اک بندہ جھوٹا۔ ایس لئی لکھیا اے پئی توں اپنیاں گلاں وچ راستباز ثابت ہوویں تے اپنے مقدمہ اُتے فتح پاویں ۔ “ (رومیوں ۳:۴)۔
ہر بندہ جھوٹا ہیگااے ۔ خُدا سچا ہیگا اے ۔ کیوں؟ ایس لئی پئی خُداوند آکھدااے ،” ایس لئی لکھیا اے پئی توں اپنیاں گلاں وچ راستباز ثابت ہوویں تے اپنے مقدمہ اُتے فتح پاویں ۔ “ خُدا فرماؤندا اے پئی اوہنے شروع توں ای ایہہ وعدہ کیتا اے پئی جیہدے اُتے لعنت کرن دی لوڑ ہووے گی اوہدے اُتے لعنت کراں گا تے جنہوں برکت دین دی لوڑ ہووے گی اوہنوں برکت دیواں گا ۔ ایہہ خُدا دا انصاف ہیگااے پئی ایمانداراں اُتے برکت تے بے ایماناں اُتے لعنت کرے ۔ خُدا نے فرمایا ، ” سگوں خُدا سچا ثابت ہووے تے ہر اک بندہ جھوٹا۔ “
” توں اپنیاں گلاں وچ راستباز ثابت ہوویں تے اپنے مقدمہ اُتے فتح پاویں “ اوہ فرماؤندا اے پئی اوہ لوکاں نوں اپنے کلام مطابق مکتی دیوے گا ۔ کلام نے بدن لیا ،ساڈے وچکار رہیاتے سانوں مکتی دتی ۔ ایس لئی ، خُداوند اپنے کلام دے راہیں راستباز ثابت ہووے ۔
خُداوند نے شیطان نوں خُدا دے کلام نال ہرایا ۔ خُداوند اپنے ، شیطان تے ساری رُوحانی مخلوق اگے سچا تے راستباز ہیگا اے ۔ ایس لئی پئی اوپنے اپنے وعدے نوں پورا کیتااے ۔پر ،بندہ کھرا نئیں ۔جدوں اوہ ویکھدے نیں پئی اوہناں نوں ایتھے کوئی فائدہ نئیں تاں اوہ چھیتی نال اپنا رویہ بدل لیندے نیں ۔ ایہدے اُلٹ ، خُدااپنے وعدیاں نوں کدی نئیں بھُل دا ۔ایس لئی پولُس رسول فرماؤندااے پئی ساڈے ایمان دی نیہ خُدا دے کلام اُتے ہونی چاہی دی اے ۔
 
 
ساڈی بدی خُدا دی چنگیائی  نوں وکھاؤندی اے
 
 رومیوں ۳:۵دسدااے ، ” جے ساڈی بدی خُدا دی راستبازی دی چنگیائی  وکھاؤندی اے تاں اسیں کیہ آکھیے ؟کیہ ایہہ پئی خُدا بے انصاف ہیگا اے جیہڑا عذاب لیاؤندااے ؟(میَں ایہہ گل بندیاں وانگر کرداہاں)۔“ سارے بندے بدکارنیں ،پر اوہناں دی بدی خُدا دی مکتی دی راست بازی دی چنگیائی وکھاؤندی اے تاں اسیں کیہ آکھیے ؟
خُدا دی راستبازی ساڈے پاپاں تے بدیاں دے سبب توں ہو ر بوہتی ظاہر ہوئی اے ۔ خُدا سچ مُچ راست  ہیگااے ۔ اوہ مکتی دا خُداوند ، مکتی داتا تے سچا خُدا ہیگا اے جنہیں اپنے کلام نال سانوں بچاؤن دا وعدہ کیتا تے اپنے ایس وعدے نوں پورا کیتا اے ۔جے خُدا دی راستبازی دی چنگیائی ساڈیاں کمیاں دے سبب ظاہر ہوئی اے تاں اسیں کیہ آکھیے ؟ ساڈیاں کمیاں خُدا دی راستبازی نوں ہور بوہتا وکھاؤندیاں نیں ۔ ایس لئی پئی اسیں مرن دیہاڑے تیک پاپ کردے آں ۔
سانوں کویں پتہ لگ سکدا اے پئی خُدا محبت دا خُداوند ہیگا اے؟ اسیں اپنیاں کمیاں توں ایہہ جان سکدے آں ۔ خُدا دی محبت ساڈے راہیں ظاہر ہوئی ایس لئی پئی ساڈی  حیاتی دے آخری دن تیک پاپ ساڈے توں ہو جاندااے ۔خُداوند آکھدا اے پئی اوہنے جگ دے پاپ اِکو ای وار تے ہمیش لئی مکا دتے نیں ۔ جے اوہ صرف چنگیاں لوکاں نوں ای جیہڑے پاپ نئیں کردے ، محبت کردا اے تاں فیر خُدا دی محبت کچی ہیگی اے ۔ ایہہ اوہدی ایماندار محبت دی چنگیائی نئیں ہیگی پئی ساڈے پاپیاں نال جیہڑے کدی سچی محبت نئیں کر سکدے کسے وعدے ہیٹھاں سمجھوتا کرے ۔
اسیں بندے بدکار ہیگے آں ، تے خُدا نال بے ایمانی کردے آں ۔ اسیں ایہدے اُتے ایمان نئیں رکھدے تے خُدادے اگے کسے طرحاں وی چنگے نئیں ہیگے ۔ پاپی اوہ ہیگے نیں جیہڑے صرف بدی کردے نیں ،پر یسوع اوہ ہیگااے جنہے سانوں سارے پاپاں تے بدیاں توں مکتی دتی تے سانوں خُدا دی محبت نال بھر دتا اے ۔
خُدا فرماؤندااے پئی جدوں بندے شیطان  دیاں گلاں وچ آکے دوزخ وچ جان لئی تیار سن ،تاں ایہہ اوہدی راستبازی تے محبت دی چنگیائی ہیگی سی پئی اوہنے اپنے اکلے پُتر نوں سانوں شیطان دے ہنیریاں تے لعنتاں توں بچاؤن لئی گھلیا ۔ ایہو ای خُدا دی محبت تے فضل ہیگااے ۔
پولُس آکھدااے ، ” جے ساڈی بدی خُدا دی راستبازی دی چنگیائی  وکھاؤندی اے تاں اسیں کیہ آکھیے ؟ “ ایس عبارت وچ ایمانداراں تے بے ایماناں دے خیالاں نوں ونڈدتا گیا اے ۔ بے ایماناں نوں خُدا دی بادشاہی وچ جان لئی چنگے بنن دی ہمت کرنی چاہی دی اے ،تاں پئی اوہ خُدا دے مبارک لوک بنن ۔پرپولُس ایہدے اُلٹ ثابت کردااے ، ” جے ساڈی بدی خُدا دی راستبازی دی چنگیائی  وکھاؤندی اے تاں اسیں کیہ آکھیے ؟ “ پولُس آکھدااے پئی اسیں بندے خُدا دی راستباز ی نوں پورا نئیں کرسکدے پر صرف اوہد ے اگے پاپ کرسکدے آں تے ساڈی بدی خُدا دی سچی محبت وکھاؤندی اے ۔ آہو ! ایہہ سچ ہیگااے ۔ سارے لوک بھیڑے ہیگے نیں تے راستباز بنن دے لائق نئیں ہو سکدے ،پر خُدا وند نے اوہناں نوں اوہناں دے سارے پاپاں توں چھڈایا اے ۔
 
 
اسیں خُدا دی راستبازی دے راہیں مکتی پائی اے
 
پولُس رسول  آکھدااے پئی بندے کدی وی  اپنے آپ وچ راستباز نئیں بن سکدے ایس لئی پئی اوہ پاپاں دے جال وچ پھسے ہوئے نیں ۔خُداوند نے ایہو جیہے پاپیاں نال محبت کیتی تے اوہناں نوں پاپاں توں مکتی دتی ۔ سانوں اوہدی کامل محبت دی لوڑ ہیگی اے ایس لئی پئی اسیں ہر روز پاپ توں بچ نئیں سکدے ۔ اسیں صرف یسوع دی کھری محبت ،اوہدے مفت فضل تے مکتی دی نعمت نال یسوع مسیح دے راہیں چھڈائے گئے آں ۔
پولُس رسول فرماؤندااے پئی اوہناں دی مکتی خُدا دی راستبازی دی شکرگزار ہیگی اے ۔ ایہہ سب کُجھ خُدا نے اپنی  راستبازی نوں وکھاؤندیاں ہوئیاں کیتا پئی سارے پاپیاں نوں اوہناں دے پاپاں توں بچایا ۔ پولُس آکھدا اے پئی خوشخبری اُتے ایمان لیاؤنا اوہنوں مکتی دیندااے ۔ خُدا دی راست بازی پانی تے رُوح دی خوشخبری وچ نظر آؤندی اے ۔ساڈی مکتی خُدا دے اوس راستباز کم اُتے بھروسہ کردی اے جیہڑا اوہنے ساڈے لئی کیتا ۔ایس لئی ، پاپی اپنے سارے پاپاں توں ایمان دے راہیں چھڈائے جاندے نیں ۔اوہ جیہڑے نویں سریوں نئیں جمے سوچدے نیں پئی اوہ اپنے وکھالے دے نیک کماں  دے راہیں ای خُدا دی  بادشاہی وچ جا سکدے نیں ۔
پولُس دا ایہہ مطلب بالکل نئیں پئی اسیں جان دے ہوئیاں بدی کرئیے ،پر لوک اخیریں دوزخ وچ چلے جاندے نیں ،ایس لئی پئی اوہ خُدا دی راستبازی پاؤن توں اَڈ نیک کم کرن دی ہمت کردے نیں ۔ لازمی ہیگااے پئی اوہ اپنے آپ نوں بدلن لئی سچے دلوں توبہ کرن تے خُدا دی مکتی اُتے جیہڑے اوہنے اوہناں نوں ڈوہنگے ٹوئے توں بچاؤن لئی دتی ایمان لیاؤن ۔
کیہڑا خُدا دے اگے راستباز بن سکدااے ؟ کوئی نئیں ۔فیر کویں اک پاپی اپنے سارے پاپاں توں چھڈایا جاسکدا اے ؟ لازمی ہیگااے پئی اوہ اپنیاں سوچاں بدلے ۔ پولُس رسول آکھدا اے پئی اوہنے ایمان نال مکتی پائی اے ۔ پر لو ک کہہ سوچدے نیں ؟ لوکاں دا خیال ہیگا اے پئی اوہ چنگیاں کماں نال مکتی پاسکدے نیں ،ایس لئی ایہو جیہے لوک چھڈائے نئیں جان گے ۔ اوہ لوک جنہاں نیں یسوع اُتے ایمان لیاؤن دے راہیں اپنے پاپاں توں کامل مکتی پائی اے ، اوہ صرف خُدا دی راستبازی اُتے بھروسہ رکھدے تے ایسے دی منادی کردے نیں ۔
پر اوہ جیہڑے نویں سریوں نئیں جمے،بھاویں اوہ یسوع اُتے ایمان رکھدے نیں ، اوہ سوچدے نیں پئی اپنے چنگے کماں دے سبب اَسمانی بادشاہی وچ جا سکدے نیں ،تے جے اوہ چنگے کم نہ کرن تاں اوہ دوزخ وچ جان گے  ۔اوہناں دا ایمان ٹھیک نئیں ہیگا ۔ پولُس دا ایمان بالکل ایہو جیہا اے جویں پئی نویں سریوں جمن والے ایمانداراں دا ہوندااے ۔ اوہ جیہڑے نویں سریوں نئیں جمے ،بھاویں اوہ یسوع اُتے وکھالے دا ایمان رکھدے نیں ،اوہناں دا ایمان ٹھیک نئیں ہیگااے ،ایس لئی پئی اوہ اپنے ایمان توں ودھ کے اپنے کماں نوں جان دے نیں ۔ سانوں اپنے ایمان وچ اپنے چنگے کماں نوں ملاؤن دے سبب مکتی نئیں ملی اے ، سگوں سانوں خُدا دی راستبازی اُتے ایمان لیاؤن نال مکتی ملی اے : یسوع دے بپتسمے تے صلیبی موت اُتے ایمان لیاؤن نال ۔
 
 
راستباز ارادہ کردیاں ہویاں پاپ نئیں کرسکدا
 
” جے ساڈی بدی خُدا دی راستبازی دی چنگیائی وکھاؤندی اے تاں اسیں کیہ آکھیے ؟  “ بائبل آکھدی اے پئی ساڈی بدی خُدا دی راستبازی تے اوہدی محبت نوں کھولدی اے ۔ پاک بائبل ایہہ وی فرماؤندی اے ، ” جے میرے جھوٹ دے سبب خُدا دی سچیائی اوہدے جلال لئی بوہتی ظاہر ہوئی تاں فیر کیوں پاپی وانگر مینوں حکم دتا جاندا اے ؟ تے اسیں  کیوں بدی نہ کرئیے تاں پئی بھلیائی پیدا ہووے ؟ ایس لئی ساڈے اُتے ایہہ توہمت وی لائی جاندی اے تے کئی آکھدے نیں پئی ایناں دا ایہو ای آکھنا اے ،پر ایہو جیہا ں دا قصور وار ثابت ہونا انصاف ہیگا اے ۔ “ (رومیوں ۳ : ۷۔ ۸)۔بے ایماناں دے نام سزا دین والی کتاب وچ لکھے گئے نیں تے اوہ اگ دے دریاوچ سُٹے جان گے ۔ ایس لئی لازمی ہیگااے پئی اوہ توبہ کر کے بدل جان تے اوس مکتی اُتے ایمان لیاؤن جیہڑی پانی تے رُوح دے راہیں پوری ہوئی سی ۔
پولُس رسول نے فرمایا ، ” کیہ ایہہ پئی خُدا بے انصاف ہیگااے جیہڑا عذاب لیاؤندااے ؟ (میَں ایہہ گل بندیاں وانگر کردا ہاں ) بالکل نئیں ۔ “ لوک پولُس دی ایس گل نوں اِنج آکھدیاں ہوئیاں  غلط ثابت کردے ، ” کیہ ایہہ بے انصافی نئیں ہیگی پئی خُدا بے ایماناں اُتے صرف ایس لئی عذاب لیاؤندا تے اوہناں نوں دوزخ وچ سُٹ دااے کیوں جے اوہ ایمان نئیں لیائے پئی یسوع نے پہلوں ای اوہناں نوں اوہناں دے پاپاں توں چھڈایا اے ؟ “پر پولُس آکھدااے ، ” کیہ ایہہ پئی خُدا بے انصاف ہیگااے جیہڑا عذاب لیاؤندااے ؟بے ایماناں لئی چنگا ہیگا اے پئی اوہ دوزخ وچ جان ایس لئی اوہناں نیں ایس سچیائی نوں نہ منیا پئی خُدا اک انصاف کرن والا ہیگااے ۔“
رومیوں ۳ : ۷ دسدااے پئی  ” جے میرے جھوٹ دے سبب خُدا دی سچیائی اوہدے جلال لئی بوہتی ظاہر ہوئی تاں فیر کیوں پاپی وانگر مینوں حکم دتا جاندا اے ؟  “ فیر لوک پُچھ سکدے نیں ،  ” کیہ؟ تسیں ایس مقصد لئی پاپ کرو گے پئی تسیں پاپاں توں معافی پا لئی اے ؟ تسیں جھوٹ اُتے جھوٹ آکھدے جاوو ایس لئی پئی تسیں خُدا دی راستبازی دے راہیں مکتی یافتہ بن گئے او ۔ کیہ تسیں ایس مقصد نال بوہتے پاپ کرو گے ؟ “ پر بائبل دسدی اے پئی اوہ اپنے دلاں دی بدی دے سبب ایہو جیہے رستیاں اُتے چلدے نیں ، نہ خُدا دی مکتی نوں جان کے تے نہ ای اوہدی محبت اُتے ایمان لیا کے ۔
ایس لئی، پولُس آکھدا اے پئی ساڈے جھوٹ تے پاپ دے سبب خُدا دی محبت تے اوہدے جلال دے واسطے ہو ر بوہتی ہوئی ۔ پر لوک پولُس دے خیالاں نوں اِنج آکھدیاں ہوئیاں غلط ثابت کردے پئے نیں ، ” جے تسیں ایمان رکھدے او پئی تسیں ایمان دے راہیں نیک کماں دے بغیر مکتی پائی ،ایس لئی تسیں ہور بوہتے پاپ کرسکدے او۔ “ ایہہ سچ نئیں ہیگا پئی لوک صرف اپنی مرضی نال  پاپ کردے نیں ۔ اوہ پاپ نوں ایس لئی نئیں چھڈدے ایس لئی پئی اوہ پاپ وچ جمےسَن ۔سیب دے رُکھ لئی ایہہ قدرتی گل ہیگی اے پئی ایہہ سیب دا پھل ای دیوے ۔ پاک بائبل آکھدی اے پئی بندے لئی ایہہ قدرتی گل ہیگی اے پئی پاپ اوہدے کولوں ہو جاوے ایس لئی اوہ پاپ وچ جمیا اے ۔ خُداوند نے ایہو جیہے پاپیاں نوں اپنی راستبازی دے راہیں مکتی دتی اے ، تے اوہ صرف خُداوند دی مکتی نوں قبول کر کے ای چھڈائے جان گے  ۔
” اسیں  کیوں بدی نہ کرئیے تاں پئی بھلیائی پیدا ہووے ؟ ایس لئی ساڈے اُتے ایہہ توہمت وی لائی جاندی اے۔ تے کئی آکھدے نیں پئی ایناں دا ایہو ای آکھنا اے ،پر ایہو جیہا ں دا قصور وار ثابت ہونا انصاف ہیگا اے “ (رومیوں ۳:۸)۔اوہ جیہڑے جھوٹےاُستاداں دیاں گلاں وچ آئے نیں ،ایتھوں تیک پئی اوہ یسوع اُتے ایمان رکھدے نیں تاں وی اِنج گھمنڈ وچ سوچدے نیں ۔ رومیوں دے نام خط گھٹوگھٹ ۲۰۰۰ ورہے پہلاں پولُس رسول نے لکھیا ۔ بوہتیاں لوکاں نیں اوس ویلے اِنج ای سوچیا جویں پئی اج دے بے ایمان کردے نیں ۔جھوٹے ایماندار بالکل اوسے طرحاں سوچدے نیں ، جویں پئی پولُس دے دناں دے بے ایماناں نے کیتا ،اِنج آکھدیاں ہوئیاں ، کیہ جے تسیں پاپاں دی معافی پا لئی اے ، بے پاپ تے جان دے اوپئی تہاڈے آؤن والے ویلے دے پاپ معاف ہوگئے نیں ،تاں جان بُجھ کے پاپ کرو؟
بے یقیناں دا کم بدن دے بے ایمان خیالاں مطابق کم کردااے ۔ اوہ اپنے جھوٹے بدنی خیالاں دے سبب خُدا دی مکتی دی سچیائی وچ نئیں جا سکدے ۔ بے شک ، راستبازاں کولوں وی پاپاں دی معافی پاؤن دے بعد پاپ ہو جاندااے ،پر اک حد تیک ہیگااے ۔ بائبل دسدی اے پئی پاپی پاپ کردے رہندے نیں ایس لئی پئی اوہ پانی تے رُوح دے راہیں نویں سریوں جمن توں پہلاں ایس گل نوں نہ تاں جان دے نیں تے نہ ای دھیان کردے نیں پئی اوہ پاپ کردے پئے نیں ۔ پر پاک بائبل دسدی اے پئی راستباز جان بُجھ کے پاپ نئیں کرسکدے ایس لئی پئی اوہ خُدا دی حکومت ہیٹھاں ہیگے نیں ۔
کئی لوکاں نیں پولُس رسول نوں دسیا، ” کیوں تسیں  بدی نئیں  کردے  تاں پئی بھلیائی پیدا ہووے ؟ ایس لئی پئی خُدا نے تہانوں تہاڈے سارے پاپاں توں مکتی دتی اے ۔ تہاڈے لئی خُدا دی راست بازی نوں ظاہر کرن لئی ہو ربوہتی بدی کرنی ہووے گی ۔“ پولُس آکھدااے پئی ایہو جیہاں  دا قصور وار بننا انصاف ہیگااے ۔ اوہدا مطلب ہیگااے پئی ایہو جیہاں نوں سزا پاؤنا تے دوزخ وچ جانا ،واجب ہیگااے ۔ کیوں ؟ ایس لئی  پئی اوہناں نیں ایمان اُتے یقین نہ کیتا سگوں اپنیاں کماں اُتے ۔
 
 
خُدا دی راستبازی کدی جھوٹی نئیں ہووے گی
 
پولُس رسول آکھدااے ، ” جے کئی بے وفا نکلے تاں کیہ ہویا ؟ کیہ اوہناں دی بے وفائی خُدا دی وفاداری نو ں جھوٹا کر سکدی اے ؟  “ ایس لئی پئی اوہ خُدا دی مکتی اُتے یقین نئیں رکھدے تاں کیہ اوہنا ں دی بے وفائی خُدا دی وفاداری نوں جھوٹا کر سکدی اے ؟ جے لوک ایمان رکھن تاں اوہ مکتی یافتہ ہیگے نیں ،پرجے اوہ ایمان نہ لیاؤن تاں پاپاں توں معافی دے فضل نوں گوا لیندے نیں ۔ خُدا دی راستبازی پکی ہو کے قائم رہندی اے ۔کیہ تسیں سمجھدے او ؟اوہ جیہڑے ایمان اُتے نئیں چلدے او ہ دوزخ وچ جاندے نیں ایس لئی پئی اوہ دوزخ جان لئی خوش ہیگے نیں ۔خُدا دے کم تے مکتی دا فضل پاپاں توں کدی نئیں مکن گے ۔ اوہ ہمیشہ قائم رہندے نیں۔
خُداوند دی مکتی دا شریعت دے کماں اُتے بھروسہ بندیاں دیا ں ہمتاں نال کوئی تعلق نئیں ہیگااے ۔ ایہدا تعلق صرف ایمانداراں نال ہیگااے ۔ایمانداراں نیں خُدا دی سچیائی مطابق مکتی پائی اے ، پر بے ایمان ایس سچیائی نوں رد کر کے دوزخ وچ جان گے ۔خُدا نے” اک دُکھ تے اک ٹھیڈے دا پتھر “ گھلیا (یسعیاہ ۸:۱۴)۔جیہڑا یسوع اُتے ایمان لیاؤندا اے راستباز بن دا اے تے ہمیش دی حیاتی پاوے گا ، ایس گل توں ہٹ کے پئی اوہ بھاویں کناں ای بھیڑا ہوے ۔ جیہڑا وی یسوع اُتے ایمان نئیں لیاؤندا پاپاں دا پھل پا کے دوزخ وچ سُٹیا جاوے گا ۔  بھاویں  اوہدے کم کنے ای  چنگے  ہون ،جیہڑا پاپاں دی
معافی اُتے یقین نئیں رکھدے اوہناں لئی یسوع اک ٹھیڈے دا پتھر تے اک دُکھ دا وڈا پتھر ہیگااے ۔
 
 
کوئی پاپاں بھریا بندہ راستباز نئیں ہیگا
 
پولُس  رسول اوہناں دےایمان بارے گل کردااے جیہڑے چنگا بنن دا عویٰ کردے نیں، ایس لئی لوک رومیوں نوں خُدادے ایہوجیہے کلام دی تھاں دیندے نیں  جیہڑا ایمان بارے دسدا اے ۔کئی لوک اوہناں بارے حیران ہیگے نیں جیہڑے اپنے آپ نوں راستباز آکھدے نیں ۔جنہاں دے پاپ یسوع نے معاف کیتے نیں اصل وچ صرف اوہو ای راستباز ہیگے نیں ایس لئی پئی اوہناں دے سارےپاپ مکائے گئے نیں ۔  ” یسوع وفادار ہیگااے “ دا مطلب ہیگااے ، ” اوہنے وفاداری نال پاپیاں نوں اوہناں دے پاپاں توں مکتی دتی اے۔ “ کئی لوگ آکھدے نیں پئی اوہ   ’  چھڈائے گئے ‘ پاپی نیں ،پر خُدا دے اگے ایہو جیہے لوک نئیں ہوسکدے ۔ کویں کوئی بندہ حالے وی پاپی ہوسکدا اے جدپئی اوہ پاپاں توں مکتی پا چُکیااے ؟ جے یسوع نے سانوں مکتی دتی اے تاں اسیں مکتی یافتہ ہیگے آں تے جے یسوع نے سانوں مکتی نئیں دتی تاں اسیں پاپی ہیگے آں ۔مکتی وچ کوئی ”وچکار “شے نئیں  ہیگی اے ۔
کیہ کوئی پاپاں بھریا راستباز ہو سکدااے ؟ کوئی پاپاں بھریا بندہ راستباز نیں ہیگا اے۔ جے کوئی بندہ پاپ رکھدااے تاں اوہ پاپی ہیگااے ، پرجے یسوع اُتے ایمان رکھدااے تاں بےپاپ تے راستباز ہیگااے ۔ کویں اسیں ہر دیہاڑے ہون والے تے آؤن والے ویلے دے پاپاں دے مسئلے نوں حل کرسکدے آں؟ لوک سوچدے نیں پئی اوہ لازمی طور اُتے پاپی ہیگے نیں ایس لئی پئی اوہ ہر دیہاڑے پاپ کردے تے جدوں تیک وہ مرنئیں جاندے کوئی نہ کوئی پاپ اوہ کردے رہن گے ۔ جدپئی ،اسیں او س خوشخبری اُتے ایمان لیا کے راستباز بن دے آں  جیہڑی آکھدی اے کہ یسوع نے یردن دے دریااُتے سارے جگ دے پاپ ، جنہاں وچ آؤن والے ویلے دے پاپ ہیگے نیں اپنے اُتے چُک لَے تے سولی اُتے مرگیا ۔
” ایک راستباز بندہ پاپاں بھریاہووے “ ایہہ اک بے چجی گل لگدی اے ۔ کیہ ایہہ سوچ چنگی ہیگی اے پئی جے اک بندہ بھاویں اوہنے پہلوں ای اپنا قرضہ لاہ دتااے ،تاں وی اوہ حالے تیک قرض ہیٹھاں ہیگا اے ۔ فرض کرو پئی ،اک بندہ سی جیہڑا بوہت امیرہیگاسی،پرجویں ای اوہدا پُتر جوان ہویا اوہ شہر دیاں  ساریاں دکاناں توں اُدھار خریدن دی بھیڑی عادت وچ پھس گیا ۔ پر اوہدا امیر باپ  جیہڑا اپنے پُتر دی حیاتی توں وی بوہتے پیسے ہر اک دکان والے نوں پیشگی دے چُکیا اے ۔ اوہدا پُتر جےاپنی ساری حیاتی کوئی پیسہ دتیوں اَڈجنہاں مرضی ٹوفیاں کھان دے مزے لیندا رہوے ،اوہدے اُتے کدی وی قرضہ نئیں چڑھے گا ۔
خُداوند نے راستبازی نال ساڈے پاپاں نوں اِکو ای واری  ہمیش لئی یردن دے دریا اُتے اپنے اُتے چُک لیا تے سانوں مکتی دتی سی ۔ اوہنے سانوں ساریاں نوں کامل مکتی دتی اے ۔ ایس لئی ، اسیں بھاویں کنے ای ماڑے کیوں نہ ہوئیے اسیں کدی وی دوبارہ پاپی نئیں ہوسکدے ۔ خُدا آکھدااے ، جے اسیں ،جو کُجھ اوہنے ساڈے لئی کیتا ،اوس توں نہ مکرئیے تاں اسیں راستباز بن جانواں گے ۔
 
 
لوک اپنی بدنی سوچاں رکھدے ہوئیاں نہ تاں خوشخبری اُتے ایمان  لیاؤندے تے نہ ای نویں سریوں جم سکدے نیں
 
جیہڑا مسیحی اپنے   ” چھڈائے جان “ دی آپ نشانی دسدااے ،اوہ اپنی انسانی عقل نال ایہہ گل سوچدااے ۔ رُوحانی بنن لئی خُدا دے کلام اُتے ایمان لیاؤنا چاہی دا اے ۔بندے دی سوچ انساناں والی ہیگی اے ۔ ایہہ انسانی دانائی ہیگی اے ۔ بدن پاپ نوں روکن وچ کوئی مدد نئیں کر سکدا ،اسیں یسوع دے  بپتسمے تے سولی اُتے ایمان لیاؤن نال راستباز بن سکدے آں ۔ بائبل آکھدی اے پئی اسیں پاپ نوں روکن دی ہمت کرکے راستباز تے پاک نئیں بن سکدے ۔
کیہ کوئی بندہ جنہے یسوع اُتے ایمان لیاؤن دے بعد کدی پاپ نہ کیتا ہووے پاک بندہ بن  کے اَسمانی بادشاہی وچ جا سکدااے ؟ کیہ پاپی پاپاں توں معافی دے فضل دے راہیں راستباز بنائے جاندے نیں ؟ ایہہ اوکھا کم ہیگااے پئی تسیں اپنی بندیاں والی سوچ نال راستباز بنو ۔ بدن کدی وی راستباز نئیں بن سکدا ۔ بدن جدوں ایہنوں بُکھ لگدی اے ،کُجھ کھان لئی منگدااے ۔
بدن دا پاک بننا اوکھا کم ہیگااے ایس لئی پئی بدن دیاں بوہت ساریاں آساں تے تمناواں ہیگیاں نیں ۔ ایہو ای سبب ہیگااے پئی ،اسیں صرف یسوع دے پانی تے لہو اُتے ایمان لیا کے ای راست باز بن سکدے آں ۔ کیہ اسیں اپنے آپ توں پاپاں توں بچ کے تے اپنے آپ نوں برف وانگر بنا کے اَسمانی بادشاہی وچ جا سکدے آں ؟ ایہہ بندے دی گھمنڈی سوچ ہیگی اے ،جیہڑا بدنی آساں تے کرتُوتاں نال بھریا ہویا اے ،پئی پاپ نوں چھڈ کے پاک بننا اے، ایہہ کدی ہو نئیں سکدا ۔
لوک خوشخبری اُتے ایمان نئیں لیا سکدے تے نہ ای نویں سریوں اوہ جم سکدے نیں ایس لئی پئی اوہ ایمان بارے بندیاں والی عقل نال سوچدے نیں ۔ یسوع نے آکھیا ،  ” جیہڑا بدن نال جمیا اے بدن ہیگااے تے جیہڑا رُوح نال جمیا اے اوہ رُوح ہیگااے۔ “(یوحنا ۳:۶)۔
بدنی عقل نال راستباز بننا ،کدی نئیں ہوسکدا ۔ تسیں ایہہ وی سوچ سکدے او ،ایہہ کدی نئیں ہو سکدا ،ایس لئی پئی تسیں کل فیر پاپ کروگے ، فیرتسیں کویں توبہ تے یسوع اُتے ایمان لیا سکدے او ۔ تسیں سوچدے او پئی ، کویں میَں پاپ کیتیوں اَڈ رہ سکدا ہاں جد پئی حالے تیک میَں پاپ کردا رہندا ہاں ؟ جے تسیں بندیاں والی سوچ رکھدے او جویں پئی بدنی سوچ ہیگی اے ،تاں فیر تہاڈے لئی  راستبازبننا کدی نئیں ہو سکدا ؟ بدن وچ رہندیاں ہوئیاں پاک بننا بوہت اوکھا کم ہیگاا ے۔
 
 
پر ،خُدا سانوں راستباز بنا سکدااے
 
ایتھوں تیک پئی اک بندہ اِنج نئیں کر سکدا تا ں وی خُدا سانوں کامل مکتی دے سکدااے ۔ خُدا ساڈے دلاں نوں پاک کر سکدا تے سانوں ایہہ  اقرار کرن لئی پئی اسیں راستباز ہیگے آں تے ایہہ پئی اوہ ساڈا باپ تے مکتی داتا ہیگااے ایس لائق کر سکدا اے ۔ تہانوں پتہ ہونا چاہی دا اے پئی ایمان سچے کلام اُتے دلوں ایمان لیاؤن نال شروع ہوندااے ۔ ایہہ سچیائی دے کلام توں شروع ہوندااے ۔اسیں سچے دلوں اصل کلام اُتے ایمان لیاؤن نال راستباز بنائے گئے آں ۔اسیں بدنی کماں نال کدی وی راستباز نئیں بن سکدے ۔
پر، جیہڑے نویں سریوں نئیں جمے اپنے دلی خیالاں توں اپنے آپ نوں نئیں چھڈا سکدے ایس لئی پئی اوہ اپنی بدنی سوچا ں وچ قید ہیگے نیں ۔اوہ کدی وی ایہہ نئیں آکھ سکدے پئی اوہ راستباز ہیگے نیں۔ ایس لئی پئی اوہ بدنی عقل نال سوچدے نیں ۔ایس توں ہٹ کے ،اوہ ایمان جیہدے نال اسیں آکھ سکدے آں پئی اسیں راستباز ہیگے آں خُدا دے دی سچیائی نوں جانن نال شروع ہوندا اے ۔جے تسیں سچ مُچ نویں سریوں جمنا چاؤہندے او ، تاں تسیں صرف خُدا دے کلام نوں اک پکے نویں سریوں جمے ہوئے بندے کولوں سچے دلوں سُن کے یقین رکھدیاں ہوئیاں نویں سریوں جم سکدے آں ،ایس لئی پئی نویں سریوں جمن والے پاک بندے نال رَل کے  کام کرن نال رُوح خوش ہوندااے تے اپنے کم وکھاؤندااے ، ” ایس لئی پئی رُوح ساریاں گلاں سگوں خُدا دیاں ڈوہنگیاں گلاں وی جان لیندااے ۔“ (۱ ۔ کرنتھیوں ۲:۱۰)۔لوک راستبازاں دے راہیں کلام سُن کے نویں سریوں جم سکدے نیں ایس لئی پئی رُوح اوہناں راستبازاں وچ جیہڑے نویں سریوں جمے نیں ،رہندااے ۔میَں چاؤہنداہاں پئی تسیں ایہنوں ذہن وچ رکھو ۔ جے تسیں نویں سریوں جمن دے فضل نوں پاؤنا چاؤہندے او تاں تہانوں نویں سریوں جمن والے راستبازاں نال میل جول رکھنا چاہی دا اے ۔
ابرہام وچوں اضحاق تے اسماعیل جمے ۔ اسماعیل اک نوکرانی وچوں جمیا سی ۔ اسماعیل ۱۴ ورہیاں دا سی جدوں اضحاق جمیا سی ۔ اسماعیل نے اضحاق نوں ستایا ،جیہڑا اک آزاد زنانی (گھروالی) وچوں جمیا سی ۔ کیہڑا ساری جائیداد دا اصل مالک بنن دا حقدار ہیگا سی ؟اضحاق جیہڑا آزاد زنانی سارہ وچوں جمیا سی ،اوہو ای حقدار ہیگاسی ۔
اضحاق جائیداد دا حقدار  تے وعدے دا  پُتر سی ،بھاویں اسماعیل وڈا تے بدن وچ اضحاق توں تگڑا سی ۔ کیوں؟ اضحاق خُدا دے وعدے دے کلام دے بعدوں جمیا سی ۔ انسانی سوچ اُتے بنیا ایمان ریت اُتے بنائے گئے مکان وانگر ہیگا اے ۔لوک صرف اوسے ویلے ای نویں سریوں جم سکدے نیں جدوں اوہ خُدا دے کلام چوں سکھن تے ایہدے اُتے ایمان لیاؤن ۔
” ایس لئی کیہ ہویا ؟ کیہ ساڈی کوئی وڈیائی ہیگی اے ؟ بالکل نئیں ایس لئی پئی اسیں یہودیاں تے یونانیاں دونواں اُتے پہلوں ای توہمت لائی اے پئی سارے دے سارے پاپ ہیٹھاں ہیگے نیں ۔ ایس لئی لکھیا اے  پئی کوئی راستباز نئیں ہیگا ۔ اک وی نئیں ہیگا ۔  “(رومیوں ۳: ۹ ۔ ۱۰)۔ایس عبارت دا کیہ مطلب ہیگااے ؟ کیہ ایہہ عبارت انسانی درجے دے نویں سریوں جمن توں پہلاں  یاں نویں سریوں جمن دے بعد ول اشارہ کردی اے ؟ اسیں سارے نویں سریوں جمن توں پہلاں پاپی ہیگے ساں ۔  ” کوئی راستباز نئیں ہیگا “ بندیاں دی ایہہ حالت یسوع دے جگ دے سارے پاپاں نوں مکاؤن توں پہلاں دی ہیگی اے ۔ کوئی وی یسوع اُتے ایمان لیاؤن توں اَڈ پاک نئیں بن سکدا ۔
”ہولی ہولی پاکیزگی “ دے اَکھر بُت پرستاں دے کافر دین وچوں آئے نیں ۔بائبل دسدی اے ، ” کوئی راستباز نئیں ہیگا اک وی نئیں ہیگا ۔“ کویں کوئی اپنی ہمت نال پاک بن سکدااے ؟ اک بندہ اپنے آپ  راستباز نئیں بن سکدا ۔ اک وی نئیں جیہڑا اپنے آپ دے راہیں راستباز بنے ۔ کوئی وی اپنے ہتھ پیر مارکے بے پاپ نئیں بن سکدا ۔ ایہہ صرف خُدا دے کلام اُتے ایمان لیاؤن نال ای ہو سکدااے ۔ بائبل آکھدی اے ۔ ” کوئی سیانا نئیں ۔ کوئی خُدا دی طلب نئیں رکھدا۔“(رومیوں ۳:۱۱)۔
 
 
سارے راہوں بھٹکے نیں
 
” سارے راہوں بھٹکے ہوئے نیں سارے دے سارے نکمے ہیگے نیں “ (رومیوں۳ :۱۲)۔ کیہ بندہ خُدا دے اگے خاص ہیگا اے ؟ بندیاں  دی خُدا دے اگے کوئی قدر نئیں ہیگی اے ۔ اوہ سارے بندے جیہڑے حالے تیک نویں سریوں نئیں جمے خُدا دے اگے کوئی قدر نئیں رکھدے ۔بھاویں اوہ اوہناں ساریاں دا  بناؤن والا ہیگا اے تاں وی ا وہ اوہدے خلاف بَڑ بَڑ کردے تے اَسمان ول اپنیاں اُنگلاں چُک کے خُدا نال جھگڑا کردے تے بارش نہ کرن توں اوہدے نال غصے ہوندے نیں ۔
خُدا نے آکھیا پئی ” اوہ سارے راہوں بھٹکے ہوئے نیں سارے دے سارے نکمے ہیگے نیں “ کویں اک بندہ جیہڑا اپنے دل وچ پاپ رکھدااے خُدا نوں جلال دے سکدااے ؟ کویں پاپی ، جیہڑے   اپنے پاپ دے مسئلے نوں حل نئیں کرسکدے ،خُداوند دی وڈیائی کر سکدے نیں ؟ کویں اک پاپی خُداوند دی وڈیائی کرسکدااے ؟ پاپی خُدا نوں جلال نئیں دے سکدا ۔
اج کل گیت گاؤن والیاں منسٹریاں ودھیاں ہوئیاں نیں ۔ پاپی مکاشفہ دے کلام دے بول لَے کے خوشخبری دے گیتاں دیاں طرزاں بناؤندے نیں ، ” پئی جیہڑا تخت اُتے بیٹھا اے اوہدی تے میمنے دی تعریف تے عزت تے وڈیائی تے بادشاہی ہمیشہ تیک رہوے ۔ “ (مکاشفہ ۵:  ۱۳)۔ بے شک خُداوند ای تعریف تے عزت دے لائق ہیگااے ، پر صرف راستباز ای رُوح تے سچیائی نال اوہدی عبادت کرسکدے نیں ۔ کیہ تسیں سوچدے او پئی خُدا پاپیاں دی عبادت نوں خوشی نال  قبول کردا  اے ؟ پاپی قائن دی قربانی  وانگر تعریف تے عبادت کردے نیں ۔ بھاویں اوہ سوچدے نیں پئی اوہ خُداوند دی عبادت کردے نیں پر اوہناں دی عبادت اَسمان تیک نئیں اپڑے گی ۔ کیوں ؟ ایس لئی پئی خُدا ایہناں توں خوش نئیں ہیگا ۔خُدا پاپیاں دی دعا کدی نئیں سُن دا (یسعیا ہ ۵۹:۱ ۔ ۲)۔
پاک بائبل دسدی اے پئی  اوہ سارے راہوں بھٹکے ہوئے نیں تے سارے دے سارے نکمے ہیگے نیں ۔ ”  اوہ راہوں بھٹکے نیں “ دے اکھراں دا مطلب ہیگااے پئی اوہنا ں نیں خُدا دے کلام نوں رد کر کے اپنے خیالاں اُتے یقین کیتا اے ۔ خُدا دے کلام دے راہیں ایہو جیہاں دا سچا انصاف ہووے گا ۔صرف خُدا انصاف کر سکدااے ۔ بندہ انصاف نئیں کر سکدا ۔” اوہ راہوں بھٹکے نیں “ دے کلام دا مطلب ہیگا اے پئی اوہ اپنیاں سوچا ں وچ بھٹک گئے نیں ۔ اوہ ہمیشہ شیواں نوں اپنے خیال وچ اِنج آکھدیاں ہوئیاں دسدے نیں ، ” میرا ایہہ خیال ہیگااے تے میَں اِنج ایمان رکھدا ہاں “اوہناں نوں اپنے خیالاں نوں چھڈنا تے اپنے خیالاں نوں مکاؤنا چاہی دااے ،تاں پئی اوہ خُدا دے کلام توں بھٹک نہ جان ۔
جیہڑے نوں سریوں نئیں جمے ،سوچدے نیں پئی اوہ آپ ای اپنا انصاف کرن والے ہیگے نیں ۔خُدا دے کلام وچ لکھیا ہویا اے پئی خُدا اوہنوں نوں کُجھ نئیں جان دا ۔ اوہ اپنے خیالاں وچ پھسے رہندے تے فیصلہ کردے نیں پئی کیہ جھوٹا ہیگا اے تے کیہ سچا ہیگا اے تے اوسے نوں ایہہ آکھدے ہوئیاں اتفاق کردے نیں ۔  ” میرا ایہہ خیال ہیگااے تے میَں اِنج ای ایمان رکھدا ہاں ایہہ بالکل اِنج نئیں جویں پئی میَں سوچ رہیا واں ۔ “ ایہو جیہے لوک کویں سچیائی پا سکدے نیں؟ خُداآکھدااے پئی سارے لوک اپنی سوچاں وچ بھٹک گئے نیں ۔ لازمی ہیگا اےپئی اسیں اپنی سوچاں وچ بھٹک نہ جائیے ۔ ایہدی تھاں اُتے ،لازمی ہیگااے پئی اسیں خُدا وند ول پرت جائیے ۔ اسیں صرف ایسے راہوں مکتی پائی اے ۔ خُدا دے جیوندے تے سچے کلام اگے ساڈا انصاف ہویا اے ۔ فیر راستبازی کیہ اے ؟
 
 
لازمی ہیگا اے پئی اسیں خُدا دے کلا م دے راہیں نویں سریوں جمیے
 
 خُدا داکلا م راستبازی ہیگااے ، جیہڑا پئی سچیائی ہیگااے ۔ خُدا دا کلا م قانون ہیگااے ، جیہڑا اک  ’ تکڑی ‘ دی گل کردااے ۔ لازمی ہیگااے پئی سانوں پتہ لگے پئی خُدا دا کلا م اک تکڑی یاں اک اصول  دی نشانی اے ۔  ” شروع وچ کلام ہیگاسی “ (یوحنا ۱:۱)۔ کیہڑا خُدادے نال ہیگاسی ، باپ تے پاک رُوح ؟ اوہ خُدا دا کلام ہیگا اے تے کلام خُدا ہیگا اے ۔یسوع مسیح ، ساڈا مکتی داتا تے بادشاہواں دا بادشاہ ، خُدا دا کلا م تے ساڈا خُدا ہیگااے ۔
ایہہ لکھیا ہویا اے پئی کلام ای شروع وچ خُدا د ے نال ہیگا سی ۔ کیہڑا خُدا دے نال ہیگا سی ؟ پاک کلام ۔ ایس طرحاں ، یسوع خُدا دا کلا م ساڈا مکتی داتا تے خُدا ہیگااے ۔ مکتی داتا خُدا ہیگااے ۔ کلام اوہدی قدرت بارے ٹھیک ٹھیک نمائندگی کردااے ۔ ایس طرحاں خُدا دا کلا م ساڈے خیالاں توں وکھ ہیگااے ایس لئی پئی کلام خُدا ہیگا اے ۔ اک بندہ اپنی انسانی سوچاں نال خُدا دے کلام نوں سمجھن دی ہمت کرے ، ایہہ اوہدا کم عقلی دا کم ہووےگا ۔
ایس لئی خُدا صرف ایہو جیہے بندے نوں ای ورت سکدا اے جیہڑا اوہدے کلام وچ تے ایمان وچ پکیا ں ہو کے قائم رہندااے ۔ کوئی بندہ جیہڑا خُدا دے کلا م اُتے پکیا ں ہوکے قائم رہندا تے وفادار ہیگااے تے خُدا دے اگے نکما نئیں ہیگا ،خُدا ایہو جیہے بندے نوں ای برکت دیندا اے ۔
کیہ کوئی چنگیاں کر سکدااے ؟ کلام ، جیہڑا خُدا ہیگااے ، فرماؤندااے کوئی راستباز نئیں ،ایک وی نئیں ۔ پر کئی سوچدے نیں پئی ، ’  ایتھے کُجھ چنگے بندے وی ہیگے نیں جیہڑے بھلیائی کردے نیں۔ ‘  اصل وچ لوک خُدا دے اگے ریاکاری کردے نیں ۔ سانوں پتہ ہونا چاہی دااے پئی اسیں نویں سریوں جمیوں اَڈ کسے طریقےوی راستباز نئیں ہو سکدے  ۔
سارے لوک خُدا دے اگے ڈھیٹ ہیگے نیں ۔ اوہ اک دوجے نوں ایتھوں تیک پئی خُدا  نوں وی  اپنے آپ دے پاک ، نیک تے رحیم ہون دا فریب کر دے  ہوئیاں دھوکہ دیندے پئے نیں ۔ اوہناں لئی خُدا دا چیلنج ہیگا اے جیہڑے نیک ہون دا فریب کردے نیں ۔ صرف خُدا ای نیک ہیگا اے ۔ ایہہ خُدا دی مخالفت تے اوہدی سچیائی دے خلاف ڈھیٹ ہیگے نیں پئی نویں سریوں جمیوں اَڈ تے اوہدی محبت تے راستبازی اُتے ایمان لیاؤن دے اَڈ نیک ہون دا دعویٰ کیتا جاوے ۔
کیہ تہانوں ایہدی سمجھ آؤندی اے پئی خُدا صرف بوہت وڈے پاپیاں نوں ای سزا دیوے گا ؟ جیہڑا وی نویں سریوں نہ جمے ، بھاویں اوہ مسیحی ہووے ، تاں وی خُدا دے عذاب توں بچ نئیں سکدا ۔ ایس لئی ، دنیاوی حیاتی دے ریاکاری دے راہواں نوں چھڈ کے خُدا دے کلام نوں سُنو۔ نویں سریوں جمو ں ۔ فیر ای تسیں خُدا دی سزا توں بچ سکدے او۔
کیہ تسیں کدی ایہو جیہے بھیڑے بندے نوں ویکھیا اے جیہڑا نویں سریوں نہ جمن والیاں وچکار چنگا ہون دا جذبہ نئیں رکھدا؟ لوک نیک بنن دے جذبے وچ ڈِگے ہوئے نیں ۔ کیہڑا ایہو جیہی تعلیم سکھاؤندااے؟ شیطان۔ اک بندہ اصل وچ نیکیاں کرن والا نئیں بن سکدا ۔ اک بندہ نیک حیاتی ول اوس ویلے ٹُر سکدااے جدوں اوہ خُدا دے اگے پاپ توں چھڈایا ہویا ہووے ۔ فیر کیہ خُداسانوں ایہہ دسدااے پئی جان بُجھ کے بھیڑے کم کرئیے ؟نئیں ۔ خُدا سانوں پاپاں توں معافی پاؤن بارے دسدااے ایس لئی پئی اسیں جمن توں پہلاں ای پاپ کولوں پھٹر ہوئے ساں  تے دوزخ ساڈا نصیب بن گئی سی ۔خُدا چاؤہندااے پئی اوہدے سچے کلام اُتے عمل کریے تاں پئی اسیں مکتی پا سکیے ۔
 
 
شیطان ہمیشہ بے ایماناں دے راہیں جھوٹ بولدااے
 
” اوہناں دا سنگھ کھلی ہوئی قبر ہیگا اے ۔ اوہناں نیں اپنیا ں جیبھاں نال فریب دتا ۔ اوہناں دے بُلاں وچ سپاں دی وس ہیگی اے ۔اوہناں دا مونہہ لعنت تے کوڑ نال بھریا ہویا اے ۔ اوہناں دے پیر قتل کرن لئی چھیتی چلدے نیں ۔ اوہناں دیاں راہواں وچ بربادی تے بھیڑے حال ہیگے نیں ۔ تے اوہناں نیں سلامتی دی راہ نوں نہ جانیا ۔ اوہناں دیاں اکھاں وچ خُدا دا خوف نئیں ہیگا ۔“ (رومیوں ۳:۱۳ ۔ ۱۸)۔
” اوہناں نیں اپنیا ں جیبھاں نال فریب دتا ۔“ سارے لوک بوہت فریب دیندے نیں ۔ خُدا شیطان بارے آکھدااے ، ” اوہ جھوٹ بولدا اے تاں اپنے ورگی ای آکھدا اے ۔“ (یوحنا۸:  ۴۴)۔اوہ سارے جیہڑے  نویں سریوں نئیں جمے ، اوہ آکھدے نیں ،” میَں بالکل سچ بولدا پیا ہاں ایہو ای سچ ہیگااے ،“ پر اوہ سارے جھوٹ بولدے پئے نیں ۔
جیہڑے زور دے کے اِنج آکھدے نیں پئی اوہناں دا کلام جیہڑے اوہ بولدے پئے نیں سچا ہیگااے ،اوہ جھوٹے ہیگے نیں ۔ کیہ تسیں کدی فریب دین والیاں نوں جدوں اوہ دوجیاں نوں فریب دین دی ہمت کردے نیں ،ایہہ آکھدیاں سُنیا اے ، ” پئی میَں اک جھوٹا تے فریبی ہیگا واں ؟“ اوہ اِنج آکھدے نیں پئی اوہ جویں ہر اک گل سچ آکھدے نیں ۔ اوہ یقین دلاؤن لئی آکھدے نیں ،  ” آؤ میَں تہانوں  کُجھ دسدا ہاں ۔جے تسیں ایہدے وچ پیسے لاوو ، تاں تسیں بوہتے پیسے کما سکدے او ۔جے تسیں اک ملین  ڈالرلاؤندے او ،تاں تسیں بوہت چھیتی پرنسپل بن جاوو گے تے تسیں کُجھ ورہیاں وچ ۱۰ ملین ڈالر کما سکو گے ۔ ایہہ اک بوہت ٹھیک ٹھاک ا نویسٹمنٹ ہیگی اے ۔ کیہ تسیں پیسے لاؤنا چاؤہندے او ؟  “ جیہڑے نویں سریوں نئیں جمے ہمیشہ اپنی جیبھ نال فریب دیندے نیں ۔
 جدوں اوہ جھوٹ بولدا اے تاں اپنے ورگی ای آکھدا اے ۔اک مناد جیہڑے نویں سریوں نئیں جمیا ہمیشہ جھوٹ بولدااے ۔ اوہ دعویٰ کردااے پئی ہر کوئی اپنی وڈی رقم دی دہ یکی دے  کے امیر بن سکدااے ۔ کیہ پاک بائبل دے کسے حوالے وچ انج لکھیا اے پئی جے ایک بندہ ایلڈر بنے تاں امیر بن سکدا اے ؟ کیوں لوک ایلڈر بنن دی ہمت کردے نیں ؟ اوہ ایس لئی ایلڈر بنن دی ہمت کردے نیں ایس لئی پئی اوہناں دا ایمان ہیگااے جے اوہ ایلڈر بنن گے تاں خُدا اوہناں نوں جگ دیاں برکتاں دیوے گا ۔ اوہ راہوں بھٹک گئے نیں ایس لئی پئی اوہناں دا ایمان ہیگا اے پئی جے اوہ  ایلڈر بنن تاں امیر ہون دا
فضل پاؤندے نیں۔ اوہ فریب دے جال وچ پھسے ہوئے نیں ۔
کیہ تسیں ایہو جیہے  ایلڈر بننا چاہوو گے جیہڑے ایس طرحاں دے فریب دے دھوکے وچ پھسے ہوئے نیں ؟ بوہت سارے لوک ایلڈر بنن دے بعد مانگتاں واں حیاتی بسر کردے نیں ۔ میَں اوہناں وچوں بوہتیاں نوں جان دا ہاں جیہڑے میرے آلے دوالے رہندے نیں۔ جھوٹے رسول جیہڑے نویں سریوں نئیں جمے اپنی کلیسیاواں دے امیر بندے نوں ایلڈر بناؤندے نیں ۔ کیوں؟ ایس لئی پئی اوہ چاؤہندے نیں پئی  ایلڈر اپنی کلیسیاواں وچ بوہت وڈی پیسیاں دی مدد کرن ۔ کئی واری اپنے ایلڈر اں نوں  پیسیاں دے بغیر مقرر کردے نیں ایس لئی پئی اوہناں نوں اپنے انھے ایلڈر بناؤنا چاؤہندے نیں ۔
اوہ بوہتی وار آکھدے نیں ، ”پئی جے کوئی ایلڈر بنے تاں اوہنوں دولت دی برکت ملے گی ۔“ ایہہ اک جھوٹ ہیگا ۔ بائبل وچ ایہدا ذکر نئیں ہیگا اے ۔بائبل فرماؤندی اے پئی خُدا دے خادم نوں دولت دا فضل پاؤن دی بجائے لگاتار دکھ سہنے پین گے ۔خُداوند فرماؤندااے ، ” سگوں تسیں پہلوں اوہدی بادشاہی تے اوہدی راستبازی نوں لبھو تاں ایہہ ساریاں شیواں وی تہانوں مل جان گئیاں  “ (متی ۶:۳۳)۔
بائبل دسدی اے پئی ، ” اوہناں دے بُلاں وچ سپاں دی وِس ہیگی اے ۔ “ سچ مُچ بندیاں وچ سپاں دی وِس  ہیگی اے ۔جیہڑے نویں سریوں نئیں جمے راستباز بندے نوں کیہ آکھدے نیں  ؟ اوہ راستباز اُتے لعنت کردے تے سپاں وانگر شوکراں ماردے نیں ۔ پاک بائبل فرماؤندی اے ، ” اوہناں دے پیر قتل کرن لئی چھیتی چلدے نیں ۔ اوہناں دیاں راہواں وچ بربادی تے بھیڑے حال ہیگے نیں ۔ تے اوہناں نیں سلامتی دی راہ نوں نہ جانیا ۔ اوہناں دیاں اکھاں وچ خُدا دا خوف نئیں ہیگا ۔“
 
 
شریعت دا کیہ مقصد ہیگااے ؟
 
ایس عبارت ،  ” ایس لئی لکھیا اے  “ دا مطلب ہیگااے پئی ایہہ پُرانے عہدنامے دے بول ہیگے نیں ۔ پولُس رسول نے پُرانے عہد نامے وچوں کئی واری حوالہ دتا ۔اوہنے آکھیا ، ” اوہناں دے پیر قتل کرن لئی چھیتی چلدے نیں ۔ اوہناں دیاں راہواں وچ بربادی تے بھیڑے حال ہیگے نیں  تے اوہناں نیں سلامتی دی راہ نوں نہ جانیا ۔ اوہناں دیاں اکھاں وچ خُدا دا خوف نئیں ہیگا۔ “ مینوں اوہناں اُتے بوہت ترس آؤندااے جیہڑے نویں سریوں جمن دی خُوشخبری سُنیوں اَڈ دوزخ وچ چلے جاندے نیں ۔
رومیوں ۳:۱۹وچ لکھیا اے،  ” ہُن سانوں پتہ ہیگااے پئی شریعت جو کُجھ آکھدی اے اوہناں نوں آکھدی اے جیہڑے شریعت  دے ہیٹھاں ہیگے نیں تاں پئی ہر کسے دا مونہہ بند ہوجاووے تے سارا جگ خُدا دے اگے سزا دے لائق ثابت ہووے۔ “ خُدا شریعت دے مطابق سزا دیندا اے ۔پولُس ایسے سبب توں آکھدااے ، ” شریعت اوہناں نوں آکھدی اے جیہڑے شریعت  دے ہیٹھاں ہیگے نیں “ ایس لئی خُدا نے اوہناں نوں  شریعت دتی جیہڑے نویں سریوں نئیں جمے،تاں پئی پاپیاں نوں پتہ لگے جیہڑے پاپ نوں نئیں جان دے تے جیہڑے پاپ  نوں پاپ وانگر نئیں من دے ،جیہڑے کدی وی اپنے اصل وجود وچ ، شریعت اُتے قائم نئیں رہ سکدے ۔ خُدا نے سانوں شریعت ایس لئی نئیں دتی پئی ایہدے اُتے چلیے ۔ فیر کیہ خُدا ایہہ آکھدااے پئی اوہ شریعت نوں برباد کرے گا ؟ نئیں ۔اوہنے سانوں موسیٰ دے راہیں شریعت دتی تاں پئی اسیں اپنے پاپاں نوں پچھان سکیے ۔ اوہنے سانوں شریعت ایس لئی نئیں دتی پئی اسیں ایہنوں پورا کرئیے ۔ خُدا دی شریعت اک تعلیم دی کتاب ہیگی اے جیہڑی سانوں دسدی اے پئی اسیں کویں پاپی ہیگے آں ۔
 
 
کوئی وی شریعت دے کماں نال راستباز نئیں بن سکدا
 
رومیوں ۳:۲۰دسدااے ،  ” ایس لئی پئی شریعت دے کماں نال کوئی بندہ اوہدے اگے راستباز نئیں بنے گا ایس لئی پئی شریعت دے راہیں تاں پاپ دی پچھان ای ہوندی اے ۔“ نویں سریوں جمن والے مسیحی  جان دے نئیں پئی کوئی بندہ وی شریعت دے کماں نال راستباز نئیں بنے گا ۔ پولُس رسول تے خُدا دے سارے خادم آکھدے نیں ،  ” کوئی بندہ شریعت دے کماں نال راستباز نئیں بنے گا ۔“ کوئی بندہ نئیں ہیگا جیہڑا شریعت نوں پورا کردا تے جیہڑا آؤن والے ویلے وچ اوہنوں پورا کرے گا ۔ایس لئی ، سانوں اقرار کرناچاہی دااے پئی اسیں شریعت دے کماں نال کدی وی راستباز نئیں بن سکدے ۔ ساڈے کم سانوں کدی وی راستباز نئیں بنا سکدے ۔
پولُس رسول ایہہ جان دا تے ایمان رکھداسی ۔ کیہ اسیں شریعت دے کماں نال راستباز بن سکدے آں ؟ کیہ شریعت سانوں راستباز بنا سکدی اے ؟ جدوں تسیں پاک کتاب نوں پڑھ دے او ،تاں کیہ تسیں ایہہ ٹھیک سوچدے او پئی ،ساڈے بدن یسوع اُتے ایمان لیاؤن تے نیک کم کرن دے سبب خُدا دی بادشاہی وچ جان لئی بدل جان گے ؟ نئیں ،ایہہ سچ نئیں ہیگا ۔ ایہہ جھوٹ ہیگااے ۔ ایہہ سچ پئی کوئی ہولی ہولی پاکیزگی وچ تبدیل ہون دے راہیں خُدا دی بادشاہی وچ جا سکدااے ،ایہہ اک جھوٹ ہیگا اے ۔ اوہ سارے لوک جیہڑے نویں سریوں نئیں جمے شریعت ہیٹھاں ہیگے نیں ایس لئی پئی اوہ سوچدے نیں پئی اوہناں نوں اپنے کماں نال خُدا دے کلام نوں پوریاں کرنا چاہی دااے ۔ ایہہ اوہناں نوں شریعت نوں منن تے ہر دیہاڑے معافی دی دعا دی ہمت وچ لائی رکھدی اے ۔اوہناں دی روز دی مشق اوہناں دے غلط راہ دی پہلی لاہنگ ہیگی اے ۔ شریعت سانوں پاپ دی پچھان کراؤندی اے ۔ پاپی اپنی گھٹ تعلیم تے اپنے خیالاں دے سبب شریعت اُتے عمل کرن دی ہمت کردے نیں ،جیہڑے مکتی دی سچیائی دے خلاف ہیگے نیں تے بدن توں باہر ہیگے نیں ۔ ایہہ اک غلط گیا گواتا ایمان ہیگااے ۔
دینی پاکیزگی دی تعلیم ،جیہڑی آکھدی اے پئی اسیں ہولی ہولی راستبازی تیک اپڑ سکدے آں ،ایہہ جگ دے دوجے دنیاوی دیناں وچ وی پائی جاندی اے ۔بُدھ مت وچ نروانا دی تعلیم بالکل ایہو جیہی اے ،جویں پئی مسیحیت وچ ہولی ہولی پاکیزگی وچ ودھن دی تعلیم ہیگی اے ۔ بوہتے لوک آکھدے نیں پئی اوہناں دے بدن بوہتے بوہتے پاکیزگی وچ ودھ دے پئے نیں تے اوہ لازمی طور اُتے خُدا دی بادشاہی وچ جا سکدے نیں ۔پر سچ ایہہ ہیگااے پئی خُداوند ساڈی جان نوں اِکو ای وار ہمیش لئی پاک بناؤندااے ۔
ایتھوں تیک پئی راستباز وی بدن دےراہیں پاک نئیں بن سکدے ۔ جنہاں کول پاک رُوح نئیں ہیگا اوہ پاک نئیں بن سکدے ۔ جویں جویں اوہ اپنے کماں نوں نیک بناؤن دی ہمت کردے نیں ،اوسے طرحاں اوہ ہور بوہتے پاپی ہوندے رہندے نیں ۔ ایس لئی پئی اوہناں دے دلاں وچ پاپ ہوندا اے ۔ بوہتی بوہتی اوہناں وچوں بدی باہر نکل دی اے تے اوہ اوہناں کولوں غلطیاں کراؤندی اے ،اوہ اپنے آپ نوں بدنی طور اُتے صاف کرن دی ہمت کردے نیں پر ایہہ اوکھا کم ہیگااے ،ایس لئی پئی اوہناں دے دل پاپاں نال بھرے ہوئے نیں ۔ایہہ اک پاپی دا اصلی رُوپ ہیگااے ۔
ایہہ عبارت اوہناں دے خلاف ہیگی اے جنہاں نیں پاپاں توں معافی پائی اے ۔ بھاویں اوہ اپنے بدناں نوں پاپ کرن توں روک نئیں سکدے تاں وی اوہ صاف حیاتی بسرکرسکدے نیں ۔ پاپی جیہڑے پاپ وچ جمے سَن ،اپنی ساری حیاتی پاپ ودھاؤندے نیں ایس لئی پئی ایہہ اوہناں دی مرضی دے خلاف اوہناں وچوں باہر آؤندااے ۔ اوہناں کول ایس توں ہٹ کے کوئی ہور حل نئیں ہیگا پر اوہناں نوں خُدا دی سچی خوشخبری توں اِکو ای وار ہمیش لئی شفا پاؤنی چاہی دی اے ۔ خوشخبری  خُدا دی سچیائی دا اخیر ہیگااے ۔ اوہ اپنے پاپاں توں ،خُدا دے پاپاں توں معافی دے کلام نوں سُن کے چھڈائے جا سکدے نیں ۔ میَں چاؤہنداہاں پئی تسیں نوں سریوں جمن دے کلام نوں سُنو تے پاپاں توں معافی پاوو ۔
کیہڑا کامل طور اُتے شریعت اُتے عمل کر سکدااے ؟ جے اوہ نویں سریوں جمیا اے تاں کیہ اوہ کامل طور اُتے شریعت دے مطابق حیاتی بسر کر سکدااے ؟ نئیں کوئی وی نئیں ۔ رومیوں وچ ایہہ لکھیااے ،” شریعت  دے راہیں تاں پاپاں دی پچھان ای ہوندی اے ۔“ ایہہ بوہت سوکھا ہیگااے ۔ آدم تے حوا نوں شیطان نے اوہناں دے بھول پن دے دناں وچ دھوکہ دتا تے اوہ پاپ دے ہیٹھاں آگئے ۔ تے پاپ اوہناں دی اولاد وچ چلا گیا جیہڑے خُدا دے  کلام نوں جان دے نئیں سَن ۔ بھاویں اوہناں نوں نئیں پتہ سی پئی اوہ پاپ وچ جمے سَن تاں وی پاپ دے مالک سَن ۔
ابرہام تے یعقوب دے ویلے توں بعد ،اسرائیلی اپنیاں  پاپاں بھریاں حیاتیاں تے ایمان بارے بھُل گئے جیہدے راہیں اوہناں دا باپ دادا ابرہام ایمان نال راستباز بنایا گیا سی ۔ ایس لئی خُدا نے اوہناں نوں شریعت دے راہیں پاپ دی پچھان کروائی تےاوہنے چاہیا پئی اوہ اوہدے وعدے اُتے ایمان لیاکے پاپاں توں معافی پاؤن ۔ کیہ تسیں ایہدے اُتے ایمان  رکھدے او ؟
 
 
پر ہُن شریعت توں اَڈ خُدا دی اک راستبازی ظاہر ہوئی اے
 
رومیوں ۳:۲۱دسدااے ،  ” پر ہُن شریعت توں اَڈ خُدا دی اک راستبازی ظاہر ہوئی اے جیہدی گواہی شریعت تے نبیاں کولوں ہوندی اے ۔“ پولُس رسول فرماؤندااے ، پر ہُن شریعت توں اَڈ خُدا دی اک راستبازی ظاہر ہوئی اے ۔” جیہدی گواہی شریعت تے نبیاں کولوں ہوندی اے ۔“ دا کلام پُرانے عہد نامہ ول اشارہ کردااے ۔ پانی تے رُوح دی خوشخبری خُدا دی خوشخبری ہیگی اے ،جیہڑی قربانی دے طریقے راہیں ظاہر ہوئی سی ۔ خوشخبری راستبازی وکھاؤندی اے جیہڑی پاپ دی اگ والی قربانی دے راہیں پاپاں دی معافی ول لَے جاندی اے ۔
رومیوں ۳: ۲۲وچ لکھیا اے ،  ” مطلب اے خُدا دی اوہ راستبازی جیہڑی  یسوع مسیح  اُتے
ایمان لیاؤن نال سارے ایمان لیاؤن والیاں نوں ملدی اے ایس لئی پئی کُجھ فرق نئیں ہیگا۔“ ساڈے ایمان ساڈے دلاں وچ ہیگے نیں ۔یسوع مسیح ایمان بناؤن والا تے کامل کرن والا ہیگااے ۔ عبرانیوں ۱۲:۲ وچ لکھیا گیااے ، ” ایمان بناؤن والے تے کامل کرن والے یسوع مسیح نوں ویکھدے رہوو۔ “ ایمان بناؤن والا تے کامل کرن والا یسوع ہیگااےتے سانوں سچے کلام اُتے ایمان رکھنا چاہی دااے ، جیہڑا پئی خُدا ہیگا اے ۔ لازمی ہیگااے پئی اسیں اپنے پاپاں توں مکتی پاؤن لئی نویں سریوں جمے ہوئے خادماں دے راہیں خُدا دا سچا تے اصل کلام سُنیے تے ایمان لیائیے تے ایس ایمان دے راہیں جیوندے رہیے ۔
خُدا فرماؤندااے ،  ” مطلب اے خُدا دی او ہ راستبازی جیہڑی یسوع مسیح اُتے ایمان لیاؤن نال سارے ایمان لیاؤن والیاں نوں ملدی اے ۔ایس لئی پئی کُجھ فرق نئیں ہیگا۔“  ایس لئی اسیں اصل کلام اُتے دلوں ایمان لیاؤن نال راستباز بنے تے اپنے مونہوں اقرار کرکے اپنی کامل مکتی دا پک رکھدے آں ۔ اسیں کماں نال نئیں ،سگوں اپنے ایمان نال مکتی پا سکدے آں ۔ اسیں صرف خُدا دا تے خُدا دی کلیسیا دا شکر ادا کردے آں ۔
بھاویں جے تہاڈے سارے پاپ مکائے گئے نیں تاں وی کیہ تسیں حالے تیک اپنے کماں وچ پھسے ہوئے او؟ جے تسیں سچے دلوں خُدا اُتے ایمان رکھدے او تاں فیر تہاڈی بدنی کمزوری کسے کم دی نئیں ہیگی تے تسیں راستباز ہیگے او ۔ پاک رُوح گواہ ہیگا اے پئی خُدا دا کلام جیہڑا تہاڈے دل وچ ہیگااے پکارداپیا اے پئی ، ”تسیں پا ک ہیگے او “ ایس لئی پئی جدوں اسیں کلام سُن دے آں تاں اوہ سانوں سچے کلام دی سمجھ دیندااے ۔کیہ تسیں خُدا دا کلام سُنن دے بعدایہدے اُتے ایمان لیا کے مکتی پائی اے ؟
” مطلب اے خُدا دی اوہ راستبازی  جیہڑی خُدا اُتے ایمان لیاؤن نال سارے ایمان لیاؤن والیاں نوں ملدی اے۔ ایس لئی پئی کُجھ فرق نئیں ہیگا۔“ جیہڑا بندہ خُدا دے کلام اُتے ایمان لیاؤندا تے سکھدااے ،جیہڑا پئی سچیائی ہیگااے ، اپنے سارے پاپاں توں مکتی پا سکدااے ۔
 
 
یسوع نے جگ دے شروع توں لَے کے اخیر تیک دے سارے  پاپاں نوں دھو دتااے
 
رومیوں ۳:۲۳ ۔۲۵ دسدااے ، ” ایس لئی پئی ساریاں نیں پاپ کیتا تے خُدا دےجلال توں سکھنے ہیگے ۔پر اوہدے فضل دے سبب اوہدے راہیں جیہڑا مسیح یسوع وچ ہیگااےبغیر مُل دے راستباز بنائے جاندے آں ۔ اوہنوں خُدا نے اوہدے لہو دے سبب اک ایہو جیہا  فدیہ بنایا جیہڑا ایمان لیاؤن نال فائدہ مند ہووے تاں پئی جیہڑے پاپ پہلوں ہوئے سَن تے جنہاں توں خُدا نے صبر کرکے درگزر کیتا سی اوہناں دے بارے وچ اوہ اپنی راستبازی وکھائے ۔ “
بائبل دسدی اے پئی ساریاں نیں پاپ کیتا تے خُدا دے جلال توں سکھنے ہیگے۔اسیں اوہدی محبت تے مُل دتیوں اَڈ فضل دے سبب نال مُل دتیوں اَڈ راستباز بنائے گئے آں جد پئی پاپی دوزخ وچ جاندے نیں ۔ خُدا دا جلال ساڈے اُتے ظاہر ہویا تے اسیں راستباز بنائے گئے آں ۔ یسوع نوں خُدا نے اوہدے لہو دے سبب اک ایہو جیہا  فدیہ بنایا جیہڑا ایمان لیاؤن نال فائدہ مند ہووے۔
۲۵ تے ۲۶ آیتاں دسدیاں نیں پئی ، ” اوہنوں خُدا نے اوہدے لہو دے سبب اک ایہو جیہا  فدیہ بنایا جیہڑا ایمان لیاؤن نال فائدہ مند ہووے تاں پئی جیہڑے پاپ پہلوں ہوئے سَن تے جنہاں توں خُدا نے صبر کرکے درگزر کیتا سی اوہناں دے بارے وچ اوہ اپنی راستبازی وکھائے ۔سگوں ایسے ویلے اوہدی راستبازی ظاہر ہووے تاں پئی اوہ آپ وی انصاف کرن والے رہوے تے جیہڑا یسوع اُتے ایمان لیائے اوہنوں وی راستباز بناؤن والا ہووے ۔ “ ایتھے ،  ” بنایا “ دا مطلب ہیگااے پئی خُدا نے اپنے پُتر سارے جگ دے پاپاں دی معافی لئی فدیہ بنایا ۔
یسوع نے بپتسمے دے سبب سارے جگ دے پاپاں نوں مکا دتا اے ۔یسوع سارے جگ دے شروع توں لَے کے سارے جگ دے مکن تیک ہیگااے ۔آؤ ایس جگ دے شروع تے مکن بارے دھیان کرئیے ۔ خُدا نے سانوں ایس ایمان دے راہیں مکتی دتی جیہڑی جگ دے شروع توں لَے کے اخیر تیک دے پاپاں نوں دھوندااے ۔ خُدا نے سچیائی اُتے ایمان لیاؤن دے راہیں یسوع نوں اِک ہمیشہ دا فدیہ بنایا ۔ جدوں تیک میَں خوشخبری اُتے ایمان نئیں لیایا ساں ،میَں اوس ویلے تیک ایس کلام نوں سمجھ ای نئیں سکیا ساں ،” جیہڑے پاپ پہلوں ہوئے سَن تے جنہاں نوں خُدا نے صبر کرکے ٹال دتاسی
اوہناں دے بارے وچ اوہ اپنی راستبازی وکھائے ۔ “
جدو ں اسیں اوس کلام اُتے  ایمان رکھدے آں جیہڑا آکھدا اے پئی یسوع نے اپنے بپتسمے تے لہو دے سبب ساڈے سارے پاپ دھو دتے تاں ساڈے پاپ  دُور ہو جاندے نیں ۔اسیں اِکوای واری پاپاں توں مکتی پائی اے ، پر فیر وی ساڈا بدن پاپ کر لیندااے ۔ بدنی پاپ ساڈیاں کمیاں دے سبب ہیگااے ۔ پر پاک بائبل دسدی اے ،” جیہڑے پاپ پہلوں ہوئے سَن تے جنہاں نوں خُدا نے صبر کرکے ٹال دتاسی ۔ “ جیہڑے پاپ بدن دے راہیں ہُن ہوندے پئے نیں یاں آؤن والے ویلے وچ ہون گے ، اوہ ایہو جیہے پاپ ہیگے نیں جیہڑے خُدا دے خیال وچ پہلوں ای ہوگئے سَن ۔
کیوں ؟خُدا نے یسوع دے بپتسمے نوں ساڈی مکتی دا  مُڈھلا  تے ودھیا نقطہ بنایا اے ۔ ایس لئی ،بدن دے حالیہ پاپ ایہو جیہے پاپ ہیگے نیں جیہڑے خُدا دی نظر وچ پہلوں توں ای ہیگے نیں ،ایس لئی پئی پاپاں توں معافی یسوع دے راہیں اِکو ای واری ہمیش لئی ہوگئی سی ۔ حالیہ پاپ ایہو جیہے پاپ ہیگے نیں جیہڑے پہلوں ای مکادتے گئے سَن ۔ ” جیہڑے پاپ پہلوں ہوئے سَن تے جنہاں نوں خُدا نے صبر کرکے ٹال دتا سی ۔ “ دے کلام د ا مطلب ہیگااے پئی ،” اوہ پہلوں توں ای جگ دے پاپاں دا مُل اُتار چُکیا اے  “ جگ دے سارے پاپاں نوں یسوع دے بپتسمے تے صلیبی لہو نال  وکھ کر دتا گیا سی ۔
ایس لئی، خُدا نے پہلوں ای جگ دے مُڈھ توں لَے کے جگ دے اخیر تیک کیتے گئے سارے پاپاں نوں مکا دتا اے ۔ ایس طرحاں خُدا دے نظر وچ سارے پاپ پہلوں ای ہو گئے نیں ۔ ایس جگ دے لوک ایہو جیہے پاپ کردے پئے نیں جیہڑے خُدا دے پُتر نے پہلوں ای مکا دتے سَن ۔ یسوع نے ۲۰۰۰ ورہے پہلاں ای  اوہ پاپ دھودتے سَن جیہڑے ۲۰۲۰ وچ کیتے جانے سَن ۔ کیہ تسیں ایہہ سمجھدے پئے او ؟
خُدا نے پہلوں توں ای ایس جگ دے پاپاں نوں ،جیہدے وچ میرے تے تہاڈے پاپ وی رَلے نیں  مکا دتا اے ۔ کیہ تسیں سمجھدے او پئی ایہدا کیہ مطلب ہیگااے ؟ جدوں تسیں خوش   خبری دی منادی دوجے لوکاں وچ کردے او ،تاں جے تسیں چنگی طرحاں ایہنوں نئیں جان دے تاں فیر تہانوں پریشانی ہوسکدی اے ۔ ” جیہڑے پاپ پہلوں ہوئے سَن تے جنہاں نوں خُدا نے صبر کرکے ٹال دتا سی “ دے کلام دا مطلب ہیگا اے پئی خُدا نے سارے پاپ اپنے اُتے چُک لئے تے گھٹوگھٹ ۲۰۰۰ ورہے پہلوں ای پاپاں نوں مکا چُکیا سی ۔ انسانی پیڑھی دے سارے پاپاں دا پہلوں ای یردن دے دریا اُتے یسوع دے بپتسمے لین تے سولی اُتے لہو روڑھن دے سبب انصاف ہو گیا اے ۔ خُدا نے ساڈے سارے پاپاں نوں مکا دتا اے ایس لئی پئی اوہنے اپنے اکلے پُتر نوں جگ وچ گھلیا تے کامل طور اُتے اِکو ای وار ہمیش لئی سارے بندیاں نوں راستبازبنایا ۔ ایس لئی ، خُدا نے ایس جگ دے پاپاں دے سبب جیہڑے سارے لوکاں تو ں ہو جاندے نیں تے اوہدے راہیں پہلوں ای مکائے گئے سَن ،اوہناں نوں قصوروار نہ بناوے گا ، سگوں اوہناں دی یسوع دے بپتسمے تے صلیبی لہو اُتے بے یقینی دے سبب اوہناں نوں قصور وار بناوے گا ۔
کیہ تہانوں سمجھ آؤندی اے پئی پولُس دا کیہ مطلب ہیگااے ؟ اسیں جیہڑے مکتی یافتہ ہیگے آں اوہناں لئی ایہہ بوہت خاص گل ہیگی اے ۔ اوہ جیہڑے نویں سریوں نئیں جمے ،ایس لئی پئی اوہ ایہدے اُتے دھیان ای  نئیں دیندے  ایس لئی دوزخ وچ جان گے ۔ لازمی ہیگااے پئی اسیں سُنیے تے کلام دی ٹھیک تعلیم نوں جانیے ۔ایہہ تہاڈے ایمان تے تہاڈی دوجیاں نوں خوشخبری دی منادی کرن وچ بوہت مددگار بنے گا ۔
 
 
فیر فخر کتھے گیا ؟
 
پاک بائبل دسدی اے ، ” جیہڑے پاپ پہلوں ہوئے سَن تے جنہاں نوں خُدا نے صبر کرکے ٹال دتا سی اوہناں دے بارے وچ اپنی راستبازی وکھاوے۔ “ خُدا سانوں سکھاؤندااے پئی گزرے ہوئے ویلے دے پاپ پہلوں توں ای مکائے گئے سَن ،ایس لئی پئی خُدا نے یسوع نوں اک ہمیشگی دا فدیہ بنایا اے ۔ ایس لئی اسیں ایمان نال راستباز بنے آں ۔
۲۶ آیت دسدی اے پئی ، ” سگوں ایسے ویلے اوہدی راستبازی ظاہر ہووے تاں پئی اوہ آپ وی انصاف کرن والا رہوے تے جیہڑا یسوع اُتے ایمان لیاوے اوہنوں وی راستباز بناؤن والا ہووے ۔ “ ” ایسے ویلے“ خُدا نے جگ نوں ہمیش دی حیاتی دتی تاں پئی اوہ برباد نہ ہوجاوے ۔ ٹھیک وقت اُتے ، خُدا نے یسوع نوں گھلیا پئی اوہدی راستبازی وکھاوے تے اوہدے وعدے نوں پورا کرے ۔ خُداوند نے اوہدی راستبازی وکھائی ۔ خُدا نے اپنے اکلے پُتر نوں گھلیا تے اوہنوں بپتسمہ تے سولی اُتے مرن دتا تاں پئی ساڈے اُتے اپنی سچی مکتی دے راہیں اپنی محبت سانوں وکھاوے ۔
خُداوند پاپیاں دا مکتی داتا بن کے آیا ۔” سگوں ایسے ویلے اوہدی راستبازی ظاہر ہووے تاں پئی اوہ آپ وی انصاف کرن والا رہوے تے جیہڑا یسوع اُتے ایمان لیاوے اوہنوں وی راستباز بناؤن والا ہووے ۔ “ خُدا راستباز ہیگااے تے ایس جگ دے سارے پاپاں نوں ہمیشہ ہمیشہ لئی مکاچُکیا اے ۔اسیں سچے دلوں یسوع اُتے ایمان رکھدے آں ،ایس لئی کوئی پاپ نئیں رکھدے ۔اوہ جیہڑے سچے دلوں یسوع اُتے ایمان رکھدے نیں اوہ پاپ توں پاک ہیگے نیں ،اوہنے اوہناں دے پاپاں نوں دھو،کے مکا دتا اے  سگوں ایتھوں تیک پئی اوہناں دے آون والے دناں دے پاپاں نوں وی دھو، کے مکتی دے چُکیا اے ۔ یسوع نے جو کُجھ ساڈے لئی کیتا اوہدے اُتے دلوں ایمان لیاؤن دے راہیں سانوں مکتی ملی
اے ۔ اوہدی مکتی دے ایمان وچ ساڈے کماں دی  ٪ ۱․۰  وی  دخل اندازی نئیں ہیگی ۔
رومیوں ۳ : ۲۷ ۔ ۳۱ دسدااے ،  ” ایہدی تھاں ای نئیں ۔ کیہڑی شریعت دے سبب توں ؟ کیہ کماں دی شریعت دے سبب توں ؟ نئیں سگوں ایمان دی شریعت توں۔ ایس لئی اسیں ایس نتیجے اُتے پہونچدے آں پئی بند ہ شریعت دے کماں توں اَڈ ایمان دے سبب  راستباز بن دا اے ۔ کیہ خُدا یہودیاں دا ای اے اوپریاں قوماں دا نئیں ؟ بے شک اوپریاں قوماں دا وی ہیگااے ۔ ایس لئی اِکو ای خُدا ہیگااے جیہڑا ختنے والیاں نوں وی ایمان نال تے ختنے توں اَڈ لوکاں نوں وی ایمان دے ای سبب راستباز بناوے گا ۔ ایس لئی کیہ اسیں شریعت نوں ایمان نال جھوٹا کردے آں ؟ بالکل نئیں سگوں شریعت نوں قائم رکھدے آں ۔  “
” شریعت نوں قائم رکھدے آں ۔  “دے کلام دا مطلب ہیگااے پئی اسیں اپنے کماں دے راہیں چھڈائے نئیں جاسکدے ۔ اسیں بے بنیاد تے ماڑے ہیگے آں تے شریعت وچ رہندیاں پہلاں دوزخ وچ جاندے ساں ۔ پر خُدا دے کلام نے سانوں راستباز تے کامل کیتا اے ایس لئی پئی اسیں اوہدے کلام دے راہیں مکتی پائی اے ۔ خُداوند سانوں دسدااے پئی بھاویں اسیں اپنے  سارے پاپاں توں مکتی پاچُکے آں تاں وی ساڈا بدن حالے تیک ماڑا تے فنا ہون والا اے ، پر اوہنے سانوں ساڈے سارے پاپاں توں مکتی دے دتی اے ۔ اسیں ایہدے اُتے ایمان لیا کے خُدا نوں ویکھاں گے پئی یسوع  نے سانوں مکتی دتی اے ۔
” ایس لئی فخر کتھے گیا ؟ ایہدی تھاں ای نئیں ۔ کیہڑی شریعت دے سبب توں ؟ کیہ کماں دی شریعت دے سبب توں ؟ نئیں سگوں ایمان دی شریعت توں۔“ سانوں خُدا دی قائم کیتی ہوئی شریعت نوں جانن دی لوڑہیگی اے تے ایہو ای شریعت اوہدی بادشاہی وچ ہمیش دی شریعت ہیگی اے ۔ خُدافرماؤندااے ،  ” کیہڑی شریعت دے سبب توں ؟ کیہ کماں دی شریعت دے سبب توں ؟  نئیں سگوں ایمان دی شریعت توں۔ “ کیہ تسیں ایہنوں ٹھیک طرحاں سمجھدے او ؟ خُدا نے سانوں جگ دیاں ساریاں غلطیاں توں مکتی دتی اے ۔ جدوں اسیں سچیائی اُتے رہندیاں ایمان لیاؤندے آں تاں اسیں مکتی پا لیندے آں ۔ سانوں ایہہ یاد رکھن دی لوڑ ہیگی اے پئی سانوں شریعت دے کماں دے سبب مکتی نئیں ملی ہیگی اے ۔
خُدا پولُس رسول دے راہیں ایمان دی شریعت دے بارے وچ  رومیوں ۳ باب وچ گل کردااے ،خُدافرماؤندااے ،  ” کیہ اوہناں دی بے وفائی خُدا دی وفاداری نوں جھوٹا کر سکدی اے ؟  “ (رومیوں ۳:۳)۔ایمان لیاؤن والے سچیائی نوں پکے ہتھاں نال پھڑ لیندے تے ایمان نہ لیاؤن والے ہیٹھاں ڈِگ پیندے نیں ۔اوہ جیہڑے ایہہ سوچدے نیں پئی اوہ یسوع اُتے ایمان رکھدے نیں تے حالے تیک خوشخبری اُتے پکا ایمان نئیں رکھدے تاں اوہ دوزخ وچ جان گے ۔
 
 
خُدا نے سانوں ساریاں نوں ساڈے سارے پاپاں توں کامل مکتی دتی اے
 
خُدا نے اپنی شریعت ایس لئی بنائی پئی جیہڑا وی اپنے خیالاں مطابق ایمان رکھے ،ایمان دی  شریعت توں ٹھیڈا کھاوے گا ۔ خُدا نے سانوں ساریاں نوں ساڈے پاپاں توں کامل مکتی دتی اے ۔ رومیوں ۳ باب ایمان دی شریعت بارے گل کردااے ۔اسیں سچے کلام اُتے ایمان لیاؤن دے راہیں چھڈائے جاندے آں ۔ اسیں اَسمانی بادشاہی دے مالک ہیگے آں تے ایمان دے راہیں خُدا نال میل جول رکھدے آں ۔ بے یقینیاں کول ایہہ تسلی نئیں ہیگی اے ۔ایہدی تھاں اُتے ، اوہ دوزخ وچ جاندے نیں ۔ایہدا سبب کیہ ہیگااے ؟ پہلاں تاں ایہہ پئی خُدا دے کلام دے مطابق اوہناں نوں سزا ملے گی ایس لئی پئی اوہناں نیں خُدا دے کلام نوں قبول نہ کیتا ۔ مکتی خُدا دی محبت توں ملدی اے تے اسیں ایس سچ نوں جان دے تے خُداوند نے جو کُجھ ساڈے لئی کیتا اوہدے اُتے سچے دلوں ایمان لیاؤن دے راہیں مکتی پاؤندے آں ۔کیہ تہانوں سمجھ آؤندی اے ؟
میَں خُدا دا اوہدی زمینی کلیسیا تے اوس ایمان لئی اوہدا شکر ادا کردا ہاں جیہڑا اوہ سانوں دیندااے ۔ میَں خُدا دا شکر ادا کردا ہاں جیہڑا سانوں سچیائی ،ایمان تے کلام دیندااے تے اوسے طرحاں دا ایمان دیندااے جویں پئی پولُس رسول دا ہیگاسی تے جنہے پاپاں توں معافی دے بھیت نوں کلیسیا اُتے کھولیا اے ۔ میَں اپنے دل دی ڈونگھیائیاں نال اوہدے نام دی تعریف کردا ہاں ۔
اسیں خُدا وند دا شکر ادا کردے ہاں ایس لئی پئی اوہنے اپنے بپتسمے تے   صلیبی   موت   دے   راہیں
سانوں مکتی دتی اے ۔ساڈے کول دوزخ توں بچن تے اوہدی کلیسیا وچ رَلن لئی ایہدے توں ہٹ کے ہور کوئی راہ نئیں ہیگااے ۔ اسیں ایہو جیہے پاپی ہیگے ساں ،جیہڑے کدی وی اپنے کماں دے راہیں مکتی نئیں پاسکدے ساں ،پر اسیں راستبازی اُتے ایمان لیاؤن دے سبب توں مکتی پاسکدے آں ۔اسیں جیہڑے راستبازی اُتے سچے دلوں ایمان رکھدے آں اوہدے پُتر ہیگے آں ،ایس لئی پئی راستبازی لئی ایمان لیاؤنا دلوں ہوندااے تے مکتی لئی اقرار مونہوں کیتا جاندا اے (رومیوں ۱۰:۱۰)۔