Search
پنجابی
پنجابی
کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔

خطبے

مضمون 3: پانی تے رُوح دی خوشخبری

[3-9 باب] آؤ اسیں ایمان نال پیو دی مرضی پوری کرئیے <متی۷: ۲۱ ۔ ۲۳ >

آؤ اسیں ایمان نال پیو دی مرضی پوری کرئیے
>متی۷: ۲۱ ۔ ۲۳ >
” جیہڑے مینوں یاخُداوندا!یاخُداوندا! آکھدے نیں اوہناں وچوں کوئی وی اَسمان دی بادشاہی وچ نئیں جاوےگا پر اوہو ای جیہڑا میرے اَسمانی پیو دی مرضی اُتے چل دااے ۔ اوس دیہاڑے بتھیرے مینوں آکھن گے یاخُداوندا!یاخُداوندا! کیہ اسیں تیرے ناں نال نبُوت نئیں کیتی تے تیرے ناں نال بدروحاں نوں نئیں کڈھیا تے تیرے ناں نال بوہت سارے معجزے نئیں وکھائے ؟ اوس ویلے میَں اوہناں نوں صاف آکھدیاں گاپئی میَں تہانوں کدی نئیں جانیا۔سُنو بدکارو میرے کولوں دُور چلے جاوو۔“
 
 
خورےاک میَں ہوواں ۔۔۔
 
کیہ ہر کوئی جیہڑا یاخُداوندا!یاخُداوندا! آکھدا اے اَسمان دی بادشاہی وچ جاندااے ؟
نئیں ۔صرف اوہو ای جیہڑےخُدا دی مرضی پوری کردے نیں
 
یسوع کہندا اے” جیہڑے مینوں یاخُداوندا!یاخُداوندا! آکھدے نیں اوہناں وچوں ہر کوئی اَسمان دی بادشاہی وچ نئیں جاوےگا پر اوہو ای جیہڑا میرے اَسمانی پیو دی مرضی اُتے چل دااے ۔“ ایہہ الفاظ بوہتے مسیحیاں دے دلاں وچ ڈر پاؤندے نیں ،تے اوہناں لئی خُدا دی مرضی نوں پورا کرن لئی بوہت محنت دا سبب بنے نیں ۔
بوہتے مسیحی سوچدے نیں اَسمان دی بادشاہی وچ جان لئی ،اوہناں نوں کلا کم جیہڑا کرن دی لوڑ اے ۔صرف یسوع اُتے ایمان رکھنا اے ، پر متی ۷: ۲۱ سانوں دَسدااے پئی ہر کوئی جیہڑا اوہنوں ، ’یاخُداوندا!یاخُداوندا! ‘ آکھدااے کدی اَسمان دی بادشاہی وچ نئیں جاوےگا۔
بوہت سارےجیہڑے ایس آیت نوں پڑھدے نیں ،حیران ہو جاندے نیں ، ” خورےاک میَں ہوواں ۔“ اوہ اپنے آپ نوں مناؤن دی کوشش کردے نیں ، ” نئیں!یقینا ً یسوع دا مطلب بے ایمان نیں۔“ پر ایہہ سوچ اوہناں دے دلاں وچ قائم رہندی اے تے ہر ویلے اوہناں دی جھاڑ پونج کردی رہندی اے ۔
ایس لئی ،اوہ ایس آیت  دے اخیری حصے اُتے اعتقاد کردے نیں جیہڑی آکھدی اے، ” پر اوہو ای جیہڑا میرے اَسمانی پیو دی مرضی اُتے چل دااے۔“ اوہ ایناں لفظاں اُتے اعتقاد رکھدے نیں ، ” میرے اَسمانی پیو دی مرضی اُتے چل دااے۔“تے سوچدے نیں پئی اوہ اِنج وفاداری نال دہ یکی دین، صبح سویرے دعاکرن ،منادی کرن تے چنگے کم کرن تے پاپ نہ کرن دے راہیں کر سکدے نیں ۔ ۔۔ تے اوہ بڑی دلوں کوشش کردے نیں ۔ اوہناں نوں اِنج ویکھ کے مینوں بوہت دُکھ ہوندااے ۔
بوہت سارے لوک  غلطیاں کردے نیں کیوں جے اوہ ایس آیت نوں نئیں سمجھدے ۔ ایس لئی میَں ایس آیت نوں صاف طور اُتے کھولنا پسند کراں گا،تاں پئی اسیں سارے خُدا دی مرضی نوں جان سکیےتے اوہدے مطابق جیوندے رہیے۔
پہلاں،سانوں یقیناً جاننا چاہی دااے پئی اوہدے پُتر لئی خُدا دی مرضی ،سارے لوکاں دے پاپاں نوں چُکنا تے اِنج ای سانوں پاپاں توں چھُڈانا اے ۔
اِفسیوں ۱ : ۵ وچ اِنج لکھیا اے ، ”تے اوہنے اپنی مرضی دے نیک ارادے دے موافق سانوں اپنے لئی مُڈھوں مقررکیتا پئی یسوع مسیح دے راہیں اوہدے لَے کے پالے ہوئے پُتر ہوئیے۔“
دوجے اَکھراں وچ ،ساڈے  لئی اوہدا ارادہ کھری خوشخبری نوں جاننا اے پئی یسوع مسیح نے ،ایس طرحاں سانوں نویں سریوں جمن دی اجازت دیندے ہوئے ساڈے سارے پاپ دھو دِتے سن ۔اوہ چاؤہندااے پئی اسیں اپنے سارے پاپاں نوں اوہدے پُتر اُتے سُٹن دے راہیں پانی تے رُوح دے نال نویں سریوں جم پیے ۔ایہہ خُدا دی مرضی اے ۔
 
 
صرف ” یاخُداوندا!یاخُداوندا!آکھنا  “
 
جدوں اسیں یسوع اُتے ایمان رکھدے آں سانوں یقیناًکیہ جاننا چاہی دااے ؟
پیود ی مرضی
 
” جیہڑے مینوں یاخُداوندا!یاخُداوندا! آکھدے نیں اوہناں وچوں ہرکوئی اَسمان دی بادشاہی وچ نئیں جاوےگا پر اوہو ای جیہڑا میرے اَسمانی پیو دی مرضی اُتے چل دااے ۔“ (متی۷ : ۲۱)۔
سانوں پیو دی مرضی نوں دو طریقیاں نال سمجھنا چاہی دااے ۔پہلا، سانوں ایہہ جاننا چاہی دااے پئی ایہہ اوہدی مرضی اے پئی اسیں اپنےپاپاں توں معافی پائیے تے پانی تے رُوح دے راہیں نویں سریوں جمیے ۔دوجا، سانوں ایمان دی ایس بنیاد اُتے کم کرنا چاہی دااے ۔
ایہہ اوہدی مرضی اے پئی اوہ دھرتی اُتے سارے لوکاں دے پاپاں نوں مکائے۔ابلیس ، پاپ دے راہیں ساڈے پیو دادا آدم دا اک پاسے سُٹے جانا لیایا ۔پر ساڈے پیو دی مرضی بندیاں دے سارے پاپاں نوں مکاؤنا اے۔ سانوں سمجھنا چاہی دااے پئی ساڈے لئی ساڈے پیو دی مرضی ایہہ نئیں ہیگی پئی اسیں باقاعدگی نال دہ یکی دییےتے صبح سویرے اُٹھ کے دعاواں منگیے ،سگوں سانوں ساریاں نوں پاپ توں بچاؤنا اے ۔ایہہ اوہدی مرضی اے پئی اوہ سانوں ساریاں نوں پاپ دے سمندر وچ ڈُبن توں بچا لوے ۔
پاک کتاب دَسدی اے پئی ہر کوئی جیہڑا ، ’یاخُداوندا،یاخُداوندا ‘  آکھدااے،کدی وی اَسمان دی بادشاہی وچ نئیں جاوے گا۔ ایہدا مطلب اے پئی سانوں یسوع اُتے صرف ایمان ای نئیں رکھنا اے سگوں جانیے پئی ساڈا پیو ساڈے لئی کیہ چاہندا اے ۔ایہہ اوہدی مرضی اے پئی سانوں پاپ تے دوزخ دی اَگ توں بچائے،ایہہ جان دے ہویاں پئی آدم تے حوا دے وارثاں دا مطلب اے پئی اسیں بچ نئیں سکدےسگوں پاپ وچ جیوندے رہندے آں ۔
 
 

خُدا دی مرضی

 
خُدا دی مرضی کیہ اے؟
سانوں پاپ توں چھڈاؤن دے راہیں اپنے پُتر بنایا۔
 
متی ۳ : ۱۵  دَسدا اے ،  ” سانوں اِنج ای ساری راستبازی پوری کرنا چنگا اے “ ایس طرحاں خُدا دا منصوبہ پورا کرنا سی پئی یسوع سانوں ساریاں نوں ایس جگ وچ پاپ توں بچاؤن لئی آیا ۔ خُدا دی مرضی پوری ہوگئی سی جدوں یسوع نے یوحنا اصطباغی کولوں بپتسمہ لیا سی ۔
اوہ سانوں بچاؤنا چاہندا سی تے اپنے پُتر بناؤندااے ۔اِنج کرن دے سلسلے وچ ،اوہدے پُتر نوں ساڈے سارے پاپ چُکنے سن ۔ ایہہ اوہدی مرضی سی پئی  سارے لوک اوہدے پُتربنن ۔ایس لئی اوہنے سارےلوکاں دے پاپاں نوں چُکن لئی اپنے پُتر نوں گھلیا جیہڑے شیطان دےجال وچ پھس گئے سن ۔ایہہ اوہدی مرضی سی پئی سارے لوکاں لئی اپنے کلے پُتر دی جان نوں قربان کرے تاں پئی اوہ اوہدے پُتر بن سکن ۔
جدوں یسوع نے بپتسمہ لیا تے سولی اُتے جان دِتی تے خُدا دی مرضی پوری ہوگئی ۔اوہدی مرضی ایہہ وی ہیگی اے پئی ایسں ایمان لیائیےپئی ساڈے سارے پاپ یسوع اُتے لد دِتے گئے سن جدوں اوہنے بپتسمہ لیا تے ایہہ پئی اوہنے سولی اُتے اپنی موت دے راہیں ساڈی ساریاں بھڑیاں کرتوتاں لئی دُکھ سہے ۔
” کیوں جے خدا نے جگ نال اینی محبت رکھی پئی اوہنے اپنا کلا پُتر دے دِتا “ (یوحنا ۳:۱۶   )۔خُدا نے اپنے لوکاں نوں پاپ توں مکتی دتی ۔ اِنج کرن لئی یسوع نے اپنی زمینی خدمت وچ جیہڑا پہلا کم کیتا ،یوحنا اصطباغی کولوں بپتسمہ لیناسی ۔
 ” یسوع نے جواب وچ اوہنوں آکھیا ہن توں ہون ای دے کیوں جے سانوں اِنج ای ساری راست بازی پوری کرنا چنگا اے۔اِنج اوہنے ہون دتا ۔ “ (متی ۳ :۱۵) ایہہ خُدا دی مرضی سی پئی یسوع ایس جگ وچ آیا ، اپنے بپتسمہ دے راہیں جگ دے سارے پاپاں نوں چُک لیا ،سولی اُتے مرگیا تے جی اُٹھیا ۔
سانوں ایہہ کُھل کھلا کے جان لینا چاہی دااے ۔بوہتے لوک متی ۷ : ۲۱ پڑھدے نیں تے سوچدے نیں پئی ایہہ اوہدی مرضی اے پئی اسیں ، ایتھوں تیک پئی جان دینے تیک ، گرجے  بناؤن  لئی ،
اپنے سارے بھوئیں بھانڈے دین دے راہیں خُداوند دی خدمت کریے ۔
ساتھی مسیحیو!اسیں جیہڑے یسوع اُتے ایمان رکھدے آں ،سانوں پہلے خُدا دی مرضی جاننی چاہی دی اے تے فیر اینوں کرنا چاہی دااے ۔ تہاڈے لئی ایہہ ماڑی گل اے پئی تسیں اوہدی مرضی جانیوں اَڈ اپنے آپ نوں کلیسیا دے نانویں لا دیوو۔
لوک اپنے آپ نوں پُچھدے نیں ،اپنے پرانے خیال دے گرجیاں دے ایمان وچ جیوندے رہن دے علاوہ کیہ ہو سکدا اے ۔ پر میَں آپ پریسبٹیرین کلیسیا وچ کیلون پن دی تعلیم پڑھی تے اک سختی نال سکھاؤن والی ماں دے راہیں میری پال سانبھ ہوئی جیہڑی کسے وڈے تجربہ کار پادری وانگر بوہت مذہبی سی ۔ میَں مشہور ” ٹھیک عقیدے والی کلیسیا  “ وچوں سکھیا۔
پولُس رسول نے آکھیا پئی اوہ وی ایس گل اُتے فخر کر سکدااے پئی اوہ بنیامین دے قبیلے وچوں سی تے گملی ایل دے ہتھیں شریعت نوں پڑھیا ،جیہڑے اوس ویلے دا اک وڈااُستاد سی ۔پولُس نویں سریوں جمن توں پہلاں ،اوہناں نوں پھڑاؤن والی راہ اُتے سی ،جیہڑے یسوع اُتے ایمان رکھدے سن ۔پر اوہنے دمشق دی راہ وچ یسوع اُتے ایمان لیاندا،تے پانی تے رُوح دی نویں جمن دی برکت دے راہیں راستباز بن گیا سی ۔
 
 

ایس توں پہلاں پئی اسیں اینوں کر سکیے ،سانوں خُدا دی مرضی جاننی چاہی دی اے

 
یسوع اُتے ایمان لیاؤن توں پہلاں کیہ لوڑی دااے ؟
سانوں یقیناً پہلاں اوہدی مرضی جاننی چاہی دی اے
 
ساڈی پاکیزگی خُدا دی مرضی اے ۔” ایس لئی خُدا دی مرضی  ایہہ ہیگی اے پئی تسیں پاک بنو مطلب اے حرامی کماں توں بچے رہوو۔“ (۱۔تھسلنیکیوں۴ : ۳)۔سانوں پتہ اے پئی ایہہ خُدا دی مرضی ہیگی اے پئی اسیں پانی تے رُوح دے راہیں مکمل طور اُتے پاک ہوئیے تے اپنی ساری حیاتیاں ایمان نال بسر کرئیے ۔
جے کوئی بندہ جیہڑا یسوع اُتے ایمان رکھدا اے تے حالے وی اپنے دل وچ پاپ رکھدااے ،تے اوہ خُدا دی مرضی دے مطابق حیاتی نئیں بسرکرداپیااے۔اوہدی مرضی دے پِچھے چلیاں ایس شے دی لوڑ ہوندی اے پئی اسیں یسوع کولوں ملن والی مکتی دے راہیں پاک ہوئیے ۔ اوہنوں جاننا خُدا دی مرضی نوں پوراکرنااے ۔
جدوں میَں تہانوں پُچھدا ہاں ، ” کیہ تسیں حالے وی اپنے دل وچ پاپ رکھدے او بھانویں تسیں یسوع اُتے وی ایمان رکھدے او؟تے تہاڈا جواب اے ،آہو،فیر تسیں بوہت کُھلے طور اُتے خُدا دی مرضی  نوں نئیں جان دے۔“ ایہہ خُدا دی مرضی ہیگی اے پئی سانوں پاک ہونا چاہی دااے تے پانی تے رُوح اُتے ایمان دے راہیں اپنے سارے پاپاں توں مکتی یافتہ ہونا چاہی دااے ۔
اک واری اک بندہ سی جیہدے آکھامنن والے پُتر سن ۔ اک دن اوہنے وڈے پُتر نوں سَدیا ، جیہڑا بوہتا آکھامنن والاوی سی ،تے آکھیا  ” پُتر کھیتاں توں پرلے پاسے پِنڈ وچ جا۔۔۔ “
 اوہدی گل مکن تو پہلاں ،پُتر نے آکھیا ،” آہو اے ابّا “تے چلا گیا ۔اوہنے ایہہ جانن نوں نہ اڈیکیا پئی اوہنوں کیہ کرن لئی آکھیا گیا سی ۔اوہ صرف چلا گیا سی۔
اوہدے پیو نے اوہنوں پِچھوں سَدیا ، ”  پُتر ایہہ سارا بوہت ای چنگا تے ودھیا اے پئی تُوں ایناں میرا آکھا من داایں ،پر تینوں ایہہ جاننا چاہی دااے ،پئی میَں کیہ چاؤہنداہاں پئی تُوں کریں۔“
 پر پُتر نے آکھیا  ” ابّا جی ایہہ بالکل ٹھیک اے ۔میَں تیرا آکھا مناں گا ۔میرے توں ودھ کے کیہڑا تیرا آکھا من سکدااے ؟  “
پر بے شک اوہ ہتھوں سکھنا واپس آیا ۔ اوہ اپنے پیو دی مرضی نوں جانیوں اَڈ ،اوہنوں پورا نئیں کر سکداسی ،مطلب اے اوہ کیہ سی جیہڑا اوہ چاؤہنداسی ۔اوہنے صرف انھےواہ آکھا مَنیا ۔
اسیں وی اوہدے وانگر ہو سکدے آں جے اسیں یسوع مسیح نوں نئیں جان دے ۔بوہت سارے اپنے آپ نوں رب نانویں لاؤندے نیں،خُدائی خیالاں دے پِچھے ٹُردے نیں ،باقاعدگی نا ل اوہ دہ یکی دیندے نیں ، ساری رات دعاکردے ،روزہ رکھدے نیں ۔۔۔ایہہ سب کُجھ خُدا دی مرضی نوں جانیوں اَڈ کردے نیں ۔
جدوں اوہ اپنے دلاں وچ پاپ رکھدیاں ہویا ں مردے نیں ،اوہ اَسمانی بوہیوں کڈھ  دِتے  جاندے
نیں ۔اوہ خُدا دی مرضی پوری کرن لئی بالکل تیار سن ،پراوہناں نے ایہہ نہ جانیا پئی خُدا کیہ چاؤہنداسی ۔
 
بھیڑیاں کرتوتاں کردے رہن دا کیہ مطلب اے ؟
پاپیاں وانگر یسوع اُتے ایمان رکھنا جد پئی پانی تے رُوح دی خوشخبری نوں نہ جاننا
 
” اوس دیہاڑے بتھیرے مینوں آکھن گے یاخُداوندا!یاخُداوندا! کیہ اسیں تیرے ناں نال نبُوت نئیں کیتی تے تیرے ناں نال بدروحاں نوں نئیں کڈھیا تے تیرے ناں نال معجزے نئیں وکھائے ؟ اوس ویلے میَں اوہناں نوں صاف آکھدیاں گاپئی میَں تہانوں کدی نئیں جانیا۔سُنو بدکارو میرے کولوں دُور چلے جاوو۔“ (متی ۷ : ۲۲۔ ۲۳)۔
کُجھ شیواں نیں جیہڑیاں خُدا چاؤہندااے پئی اسیں کرئیے تے ایہہ ایمان ہیگااے ،جیہڑا اوہ ساڈے توں چاؤہندااے ۔اوہ چاؤہندااے پئی اسیں ایمان رکھیے پئی یسوع نے ساڈے سارے پاپ چُک لَے سن ۔ بوہت سارے پانی تے رُوح دی خوشخبری نوں جانیوں اَڈ نبُوت کردے ، بدروحاں نوں کڈھدے تے اوہد ےناں نال معجزے کردے نیں ۔
معجزے کرن دا مطلب بوہتے گرجے بناؤنا ،کسے دا اپنے سارے بھوئیں بھانڈے ویچ کے کلیسیا نوں دینا ،خُداوند لئی کسے دا اپنی حیاتی دینا ،اوہناں شیواں وچوں ہیگااے ۔
اوہدے ناں اُتے نبُوت کرن دا مطلب آگُو ہونا اے۔ ایہو جیہے لوک فریسیاں وانگر نیں جیہڑے شریعت دے مطابق حیاتی بسر کرن دا ،مان، رکھدے نیں جد پئی یسوع نال ویر رکھدے نیں ۔ ایہہ رسمی مسیحی ہون اُتے وی لاگُو ہوندااے ۔
بدرُوحاں نوں کڈھنا ہمت دی مشق کرنا اے ۔ اوہ سارے اپنے ایمان وچ جوش نال بھرے نیں پر اخیر وچ خُداوند اوہناں نوں دَسے گاپئی اوہ اوہناں نوں جان دا نئیں ۔اوہ اوہناں نوں پُچھے گا ۔اوہ اوہنوں کویں جان سکدے نیں جدپئی اوہ اوہناں نوں جان دا نئیں ۔
خُداوند آکھدااے ، ” اوس ویلے میَں اوہناں نوں صاف آکھدیاں گاپئی میَں تہانوں کدی نئیں جانیا۔سُنو بدکارو میرے کولوں دُور چلے جاوو۔“ اوس دن لوکاں دی بھیڑ اوہد ے اگے روئے گی ،  ” یاخُداوندا میَں ایمان رکھدا ہاں ، میَں ایمان رکھدا ہاں پئی تُوں میرا مکتی داتا ایں۔ “ اوہ آکھن گے اوہ اوہدے نال محبت کردے نیں پر اوہ اپنے دلاں وچ پاپ رکھدے نیں۔خُداوند اوہناں نوں بھیڑیاں کرتوتاں کرن والے آکھدااے (پاپی جیہڑے چھُڈائے نئیں گئے )تے اوہناں نوں اپنے توں دُور جان لئی آکھے گا ۔
اوس دیہاڑے ،اوہ جیہڑے نویں سریوں جمن دے اَڈ مرگئے سن ،یسوع دے اگے رون گے ۔  ” میَں نبُوت کیتی ،گرجے بنائے تے ۵۰پادریاں نوں تیرے ناں اُتے گھلیا سی۔“
پر یسوع اوہناں پاپیاں دے اگے اعلان کرے گا ،” پئی میَں تہانوں کدی نئیں جانیا۔سُنو بدکارو میرے کولوں دُور چلے جاوو۔“
” تہاڈاکیہ مطلب اے ؟کیہ تہانوں نئیں پتہ پئی میَں تہاڈے ناں نال نبُوت کیتی ؟میَں بڑے ورہیاں تیک کلیسیا وچ خدمت کیتی ۔۔۔میَں دوجیاں نوںسکھایا پئی تہاڈے اُتے ایمان رکھن ۔ تسیں کویں مینوں نئیں جان دے ؟ “
اوہ جواب دیوےگا ، ” میَں کدی تینوں نئیں جانیا۔تسیں جیہڑے مینوں جانن دا دعویٰ کردے او حالے تیک اپنے دل وچ پاپ رکھدے او،میتھوں دُور ہو جاوو! “
اوہدے اُتے اپنے دل وچ پاپ دے ہون دے نال ایمان رکھنا یاں اوہدی مکتی دی شریعت دے مطابق ایمان نہ رکھنا ،خُدا دے اگے بھیڑی کرتوت اے ۔ اوہدی مرضی نوں نہ جاننا بھیڑی کرتوت اے ۔ اوہنوں جانیوں اَڈ اوہدی مرضی پوری کرن دی کوشش کرنا یاں پانی تے رُوح دی نویں سریوں جمن دی برکت نوں نہ جاننا بھیڑی کرتوت اے۔اوہدی مرضی دا آکھا منن دے اَڈ اوہدے پِچھے ٹُرنا کرنا وی بدی اے۔ بدی اک پاپ اے ۔
 
 

پاک کتاب وچ خُدادی مرضی

 
خُدا دے پُتر کون نیں ؟
راستباز جیہڑے کوئی پاپ نئیں رکھدے
 
ساڈے لئی ایہہ اوہدی مرضی اے پئی اسیں پانی تے رُوح دی نویں سریوں جمن دی خوشخبری اُتے ایمان رکھیے۔کھری خوشخبری ساڈی دوجی پیدائش دی پالناکردی اے ۔ایہہ وی اوہدی مرضی اے  پئی اسیں اوہدے پُتراں وانگر خوشخبری لئی جیوندے آں ۔سانوں خُدا دی مرضی جاننی چاہی دی اے پر بوہتے لوک پانی تے رُوح دی نویں سریوں جمن دی خوشخبری نوں نئیں جان دے ۔
جدوں میَں لوکاں نوں پُچھدا ہاں ،اوہ کیوں یسوع اُتے ایمان رکھدے نیں ، بوہت سارے لوک آکھدے نیں پئی اوہ اپنے پاپاں توں مکتی پاؤن لئی یسوع اُتے ایمان رکھدے نیں ۔
میَں پُچھدا ہاں ،  ” فیر کیہ تسیں اپنے دل وچ پاپ رکھدے او؟ “
اوہ آکھدے نیں ”بے شک میَں پاپ رکھدا ہاں۔“
 ” فیر کیہ تسیں مکتی یافتہ ہیگے او یاں نئیں۔“
 ” بے شک میَں  ہیگا واں۔“
 ” کیہ اک پاپی جیہڑ ا اپنے دل وچ پاپ  رکھدا اے اَسمان دی بادشاہی وچ جا سکدا اے ؟ “
 ” نئیں ،اوہ جا نئیں سکدا۔“
” فیر ،کیہ تسیں اَسمان دی بادشاہی  وچ جاندے پئے او یاں دوزخ دے اَگ وچ؟ “
 اوہ آکھدے نیں اوہ اَسمان دی بادشاہی وچ جاندے پئے نیں پر کیہ اوہ اِنج کرسکدے نیں ؟اوہ دوزخ وچ جان گے ۔
کئی لوک ایہہ سوچ دے نیں کیوں جے اوہ یسوع اُتے ایمان رکھدے نیں، اوہ اَسمان دی بادشاہی وچ جاسکدے نیں ،بھانویں اوہ اپنے دلاں وچ پاپ وی رکھدے نیں تے اوہناں دا اِنج کرنا ایہہ خُدا دی مرضی اے ۔ پر خُدا اَسمان دی بادشاہی وچ پاپیاں نوں چنگیاں نئیں جان دا۔
خُدا دی مرضی کیہ اے ؟پاک کتاب ایہہ دَسدی اے پئی ساڈے لئی خُدا دی مرضی اوہدے پُتر اُتے ایمان رکھنا ،یسوع دے بپتسمہ تے اوہدے صلیبی لہو دے راہیں چھڈائے جان دی برکت   اُتے   ایمان
رکھنا اے ۔
اوہ جیہڑے پانی تے رُوح دےراہیں  نویں سریوں جمن دی برکت اُتے ایمان رکھدے نیں اوہدے پُتر بن جاندے نیں ۔ اوہدے پُتر بن جان وچ ساڈا جلال ہیگااے ۔ اوہدے پُتر راستباز ہیگے نیں ۔
جدوں خُدا سانوں راستباز  آکھدا اے ،کیہ اوہ اک پاپی مسیحی نوں راستباز وانگر عزت دیندااے ؟خُدا کدی جھوٹ نئیں بول سکدا۔ایس لئی اوہدے اگے ،تسیں بھانویں پاپی یاں اک راستباز بندے جے۔اوتھے کوئی وی ،’ پاپ دے اَڈ ‘ خیال نئیں کیتا جا سکدا ۔اوہ صرف اوہناں نوں بلاؤندااےجیہڑے پاک ہون لئی پانی تے رُوح دی خوشخبری اُتے ایمان رکھدے نیں ۔
 
اسیں کویں خُدا دے پُتر بن سکدے آں ؟
پانی تے رُوح دی خوشخبری نوں قبول کرن دے راہیں
 
کیوں جے خُدا نے جگ دے سارے پاپاں نوں اپنے پُتر اُتے لد دتا ، ایتھوں تیک پئی اوہدے پُتر نے سولی اُتے دکھ جرے ۔ خُدا کدی جھوٹ نئیں بول سکدا ۔ اوہ آکھدااے ، ”پاپ دی دیہاڑی موت اے۔“ (رومیوں ۶ : ۲۳)۔جدوں خُدا دا پُتر مریا تے دھرتی اُتے ۳ گھنٹیاں لئی ہنیرا ہوگیا سی ۔
”تے تیجے پہر دے نیڑے یسوع نے اُچی آواز نال آکھیا، ایلی ایلی ۔لماشبقتنی؟مطلب اے یامیرے خُدایا !یا میرے خُدایا !توں کیوں مینوں چھڈ دتا ؟  “ (متی ۲۷ : ۴۶)۔
یسوع نے ساریاں لوکاں نوں اوہناں دے پاپاں توں بچاؤن لئی اپنے بپتسمہ دے راہیں جگ دے سارے پاپاں نوں چُک لیا ۔اوہنے انسانی پیڑھی دے پاپاں نوں چُک لیا ، ایہہ جان دے ہویاں پئی اوہنے سولی اُتے مرنا سی تے خُدا مطلب اے، اپنے پیو کولوں چھڈائے جاناسی ۔ایس لئی خُدا نے اپنے پُتر نوں پاپاں دی سزا دتی جیہڑے اوہنے یردن اُتے چُکے سن ،مطلب اے ، اپنے پُتر توں ۳ گھنٹیاں لئی اپنا مونہہ پھیر لیا ۔
” پر جنیاں نے اوہنوں قبول کیتا اوہنے اوہناں نوں خُدا دے پُتر بنن دا حق دتا مطلب اے اوہناں نوں جیہڑے اوہدے ناں اُتے ایمان لیاؤندے نیں  “ (یوحنا ۱: ۱۲)۔
کیہ تسیں خُدا دے پُتر ہیگے او؟اسیں نویں سریوں جمے آں کیوں جے اسیں پانی تے رُوح دی راہیں نویں جمن دی خوشخبری  نوں قبول کر چُکے آں ۔ اوہ لوک جیہڑے پانی تے رُوح دےراہیں نویں جمے نیں ،راستباز ہیگے نیں ۔ہن اسیں سارے راستباز بن گئے آں ۔
”جے خُدا ساڈے ول اے تے کیہڑا ساڈا ویری اے ؟ “ (رومیوں ۸ : ۳۱)۔جدوں راستباز بندہ اپنے آپ نوں خُدا دے تے لوکاں دے اگے راستباز آکھدااے ، اوہ جیہڑے مکتی یافتہ نئیں ہیگے اینوں پرکھن ول دھیان رکھدے نیں ۔ایس لئی پولُس رسول آکھدااے ، ” خُدا دے چُنے بندیاں اُتے کیہڑا نالش کرے گا ؟خُدا اوہ ہیگا اے جیہڑا اوہناں نوں راستباز  ٹھہراؤندااے ۔“  (رومیوں۸ : ۳۳)۔ خُدا نے یسوع دے راہیں ساڈے سارے پاپاں نوں مکا دِتا تے سانوں پاک ، راستباز تے اپنے پُتر آکھ کے بلایا۔ اوہنے سانوں خُدا دے جلالی پُتر ہون دا حق دتا ۔
اوہ لوک جیہڑے پانی تے رُوح دی خوشخبری دےراہیں نویں سریوں جمے نیں، اوہدے پُتر نیں ۔اوہ ہمیش تیک اوہدے نال رہن گے ۔اوہ صرف ایس جگ وچ کوئی مخلوقات نئیں ہیگے ،پر خُدا دے پُتر نیں جنہاں دا تعلق اَسمان نال اے ۔
ہُن اوہ خُدا دے راستبازپُتر نیں ،اوہناں دے خلاف کوئی نئیں ہیگااے جیہڑا الزام لا سکے ۔ یاں اوہناں دی نوں سزا دے سکے،یاں اوہناں نوں خُدا توں وکھ کرسکدے ۔
سانوں یسوع اُتے ایمان رکھن دے بارے وچ  پانی تے رُوح دی خوشخبری نوں جاننا اے ۔ سانوں پاک کتاب نوں جاننا اے ۔ اوہدی مرضی دے مطابق اینوں جاری رکھن دے قابل ہون دے سلسلے وچ ایہہ ضروری اے پئی اسیں خُدا دی مرضی نوں جانیے تے ایمان رکھیے ۔
 
 

ایہہ خُدا دی مرضی ہیگی اے پئی پاپی پانی تے رُوح دے راہیں نویں سریوں جمن

 
کیوں خُدا نے اپنے پُتر نوں پاپی انسان وانگر گھلیا ؟
سارے پاپاں نوں اوہدے اُتے لدن لئی
 
ایہہ خُدا دی مرضی اے پئی اسیں چھڈائے جائیے، پانی تے رُوح دے راہیں نویں سریوں جم پیے ۔ ” ایس لئی خُدا دی مرضی ایہہ ہیگی اے پئی تسیں پاک بنو مطلب اے حرامی کماں توں بچے رہوو۔ “ (۱ ۔ تھسلنیکیوں ۴ : ۳)۔
ایہہ خُدا دی مرضی سی پئی اپنے پُتر نوں گھلے تاں پئی سارے پاپ اوہدے اُتے لدے جان  تے اسیں مکتی پاسکیے ۔ ایہہ رُوح دی شریعت اے جیہڑی سانوں پانی تے رُوح دے راہیں نویں سریوں جمن دی
اجازت دیندی اے  ۔ اوہنے سانوں سارے پاپاں توں چھُڈایا ۔
اسیں چھُڈائے گئے آں ۔ہُن کیہ تسیں سارے خُدا دی مرضی نوں پچھان سکدے او؟ ایہہ اوہدی مرضی ہیگی اے پئی سانوں ساریاں نوں چھُڈائے ۔ اوہ ساڈے توں ایہہ نئیں چاؤہنداپئی اسیں جگ نال سودے بازی کرئیے سگوں صرف ایہہ پئی اوہدے کلام اُتے ایمان رکھیے تے صرف اوہدی عبادت کرئیے ۔
خُدا دی مرضی ایہہ وی ہیگی اے پئی اوہ جیہڑے نویں سریوں جمے پئے نیں ،خوشخبری دی گواہی دین تے کلیسیا وچ رہن تے اپنے آپ نوں ،دوجیاں رُوحاں نوں خُدا کول واپس لیاؤن دے کم دے نانویں لاؤن ۔
اسیں پاپ ایس لئی نئیں کردے کیوں جے اسیں اِنج کرنا چاہندے آں سگوں تاں پئی اسیں ماڑے آں ۔ یسوع نے اوہناں پاپاں نوں چُک لیا سی ۔ خُدا نے یوحنااصطباغی دے راہیں جگ دے سارے پاپاں نوں یسوع اُتے لد دِتا ۔ اوہنے اپنے سکّےپُتر نوں ایس کم لئی گھلیا ،اوہنوں یوحنا دے راہیں بپتسمہ دوایا ۔ اسیں ایہدے اُتے ایمان رکھن دے راہیں مکتی یافتہ ہوندے آں۔  ایہہ خُدا دی مرضی اے۔
 
 
ساڈے لئی خُدا دی مرضی ایہہ ہیگی اے پئی اسیں یسوع اُتے ایمان  رکھیے، جنہوں اوہنے گھلیا
 
کیوں یسوع پاپی بندے وانگر آیا؟
انسانی پیڑھی دے سارے پاپاں نوں چُکن لئی
 
پاک کتاب دَسدی اے ،خُدا دی مرضی نوں پورا کرنا ،اوہدے اُتے ایمان رکھنا اے جنہوں اوہنے گھلیا ۔  ” ایس لئی اوہناں نے اوہنوں آکھیا پئی اسیں کیہ کرئیے تاں پئی خُدا دے کم پورے کرئیے ؟یسوع نے جواب وچ اوہناں نوں آکھیا ،خُدا دا کم ایہہ ہیگا اے پئی جنہوں اوہنے گھلیا اے اوہدے اُتے ایمان لیائیے ۔ایس لئی اوہناں نیں اوہنوں آکھیا فیر توں کیہڑا نشان وکھاؤنداایں تاں پئی اسیں ویکھ کے تیرا یقین کرئیے ؟توں کیہڑا کم کرداایں ؟ ساڈے پیو دادے نے جنگل وچ منّ کھاہدا ۔ایس لئی لکھیا اے پئی اوہنے اوہناں نوں کھان لئی اَسمان توں روٹی دِتی ۔ “(یوحنا ۶ : ۲۸ ۔ ۳۱)۔
لوکاں نے یسوع نوں دَسیا پئی خُدا نے موسیٰ نو ں نشان دتا سی ،جدوں اوہ کنعان دے ملک دی راہ اُتے سی ،اِسرائیلیاں اُتے اَسمان توں منّ ورسایا تے نتیجہ دے طور اُتے اوہ خُدااُتے ایمان لیائے (یوحنا ۶ : ۳۲۔ ۳۹)۔لوکاں نے یسوع توں پُچھیا ، ” اسیں کیہ کرئیے تاں پئی خُدا دے کم پورے کرئیے؟ “
یسوع نے جواب دتا پئی اوہناں نوں خُدادے کم کرن  لئی اوہدے اُتے ایمان رکھنا چاہی دااے ۔ جے اسیں خُدا داکم کرنا اے ،سانوں یسوع مسیح دے کماں اُتے ایمان رکھنا اے ۔ساڈے لئی ایہہ خُدا دی مرضی اے پئی اسیں نہ صرف ایمان رکھیے تے خوشخبری دی منادی کرئیے سگوں اوہدے وانگر حیاتی وی بسر کرئیے ۔
خُداسانوں حکم دیندا اے  ” ایس لئی تسیں جاکےساریاں قوماں نوں چیلے بناؤ تے اوہناں نوں پیو تے پُتر تے پاک رُوح دے ناں نال بپتسمہ دیوو۔تے اوہناں نوں ایہہ سکھاؤ پئی اوہناں ساریاں گلاں اُتے عمل کرن جنہاں دا میَں تہانوں حکم دتا  “ (متی ۲۸ : ۱۹ ۔ ۲۰)۔
یسوع بڑا کھول کے سانوں پیو تے پُتر تے پاک رُوح دے ناں نال بپتسمہ لین لئی آکھدااے ۔ہر شےجیہڑی اوہنے پیو تے پاک رُوح لئی کیتی اوہدے بپتسمہ دانتیجہ اے ۔ جدوں اسیں  ایہہ سمجھدے آں ،اسیں خُدا اُتے ایمان رکھ سکدے آں تے ہر شے ویکھدے آں جیہڑی یسوع نے ایس جگ وچ کیتی تے کویں رُوح نے اوہدی گواہی دِتی ۔
یسوع خُدا دے راہیں پانی تے رُوح دی خوشخبری دی گواہی دین لئی گھلیا گیا سی ۔ ایس لئی جدوں اسیں صرف خُدا دے کلام تے اوہدے خادم اُتے ایمان رکھدے آں ،اسیں مکتی یافتہ ہو سکدے آں ۔
 
 

خُدا دا کم کرنا

 
ساڈی حیاتیاں دا کیہ مقصد اے؟
سارے جگ وچ خوشخبری پھیلان دے راہیں خُدا دی مرضی نوں پوریاں کرنا
 
جے اسیں خُدا دا کم کرنا اے ، سانوں یقیناًپہلاں یسوع دے بپتسمہ تے اوہدی صلیبی موت دی خوشخبری اُتے ایمان رکھنا اے ۔اوہدے اُتے ایمان رکھنا جنہے اوہنوں گھلیا،خُدا دا کم اے ۔ یسوع اُتے ایمان رکھنا چاہی دااے پئی اوہنے سانوں پانی تے لہو نال مکتی دتی ۔
خُدا دی مرضی ساڈے وچ پوری ہوندی اے جدوں اسیں یسوع اُتے ایمان رکھدے آں تے خوشخبری دی منادی کردے آں ۔ ایس طرحاں اسیں خُدا دا کم کردے آں ۔اوہنے سانوں دسیا اے پئی صرف اوہ جیہڑے پانی تے رُوح دے راہیں نویں سریوں جمن دی برکت اُتے ایمان رکھدے نیں ،اَسمان دی بادشاہی وچ جا سکدے نیں ۔
آؤ تھلے درج کیتیاں گئیاں سچیائیاں نوں پچھانن دے راہیں اسیں سارے اَسمان دی بادشاہی وچ اپنیاں تھاواں سنبھالیے ۔ خُدا دی سچی مرضی نوں پچھانن ،جانن تے ایمان رکھن دے راہیں پئی یسوع دے بپتسمہ دے نال ساڈے سارے پاپ اوہدے اُتے لددِتے گئے سن ۔اوہدی بادشاہی نوں ودھاؤن لئی جیوندے رہیے۔ اوہدے نتیجے وچ اپنے مرن دیہاڑے تیک خوشخبری دی منادی کریے۔
ساتھی مسیحیو!اوہ جیہڑے پانی تے رُوح دی خوشخبری اُتے ایمان رکھدے نیں،ایہہ اوہ نیں جیہڑے خُدا دا کم کردے نیں ۔اوہدے اُتے ایمان رکھنا ،جنہوں اوہنے گھلیا اے ،ایہہ خُدا دا کم اے ۔ ایہہ ایمان رکھنا ،اوہدی مرضی نوں پوریاں کرنا ایں پئی اوہدے اُتے سارے پاپ لد دِتے گئے سن ،جنہوں خُدا نے گھلیا ،تے ایہہ پئی یسوع مسیح ساڈا مکتی داتااے ۔
بندے نوں پاپ توں چھڈاؤن دا کم اوس ویلے پورا ہویا ،جدوں یسوع نے دریائے یردن وچ بپتسمہ لیا تے ساڈے ساریاں لئی سولی اُتے مرگیا ۔ خُدا دے کم دادوجا حصہ ،اوہد ے اُتے ایمان رکھنا اے ،جنہوں خُدا نے گھلیا مطلب اے ، مکتی داتا اُتے ایمان رکھنا اے ،جنہے سارے  جگ  دے  پاپاں نوں چُک
لیا تے سارے جگ وچ منادی کرنی اے ۔
ہُن اسیں جیہڑے نویں سریوں جم پئے آں ،سانوں جگ دی آخری  نکر تیک خوشخبری دی منادی کرنی چاہی دی اے تے جیوندے رہنا چاہی دااے ۔
 
اوہ لوک کِتھے جاندے نیں جیہڑے خُدا دی مرضی جانیوں اَڈ یسوع اُتے ایمان رکھدے نیں؟
اوہ دوزخ وچ جاندے نیں ۔
 
” اوس دیہاڑے بتھیرے مینوں آکھن گے یاخُداوندا!یاخُداوندا! کیہ اسیں تیرے ناں نال نبُوت نئیں کیتی تے تیرے ناں نال بدروحاں نوں نئیں کڈھیا تے تیرے ناں نال معجزے نئیں وکھائے ؟ اوس ویلے میَں اوہناں نوں صاف آکھدیاں گاپئی میَں تہانوں کدی نئیں جانیا۔سُنو بدکارو میرے کولوں دُور چلے جاوو۔ “ (متی ۷ : ۲۲ ۔ ۲۳)
ایہہ حوالہ سانوں کُھل کھلا کے دَسدااے ،کیہڑے لوک خُدا دے اگے پاپی نیں تے کہیڑے بدکار ہیگے نیں ۔
 بوہت سارے ہیگے نیں جیہڑے نویں سریوں جمے نئیں ہیگے ،اوہناں وچوں جیہڑے آکھدے نیں  ’ یاخُداوندا،یاخُداوندا۔  ‘ اوہ دُکھ وچ نیں کیوں جے اوہ اپنے دلاں وچ حالے تیک پاپ رکھدے نیں ۔ ایس لئی اوہ خُدا دے اَگے اک اَدھی شکایت کرن والیاں دی شکل وچ ،عبادت دیاں بے اثر سچیاں دعاواں وچ ایہہ آکھدیاں ہویاں ،روندے نیں ، ’ یاخُداوندا،یاخُداوندا۔  ‘
اوہ ایمان رکھدے نیں ،اوہناں دے دل پاک ہو جان گے ،جے اوہ دعا وچ روندے نیں ،پر ایہہ بڑا اوکھا اے ،کیوں جے اوہناں دے دلاں وچ پاپ قائم رہندااے ۔اوہ پہاڑاں اُتے دُعا منگ دے نیں ،غصے نال چیخاں ماردے نیں ،جویں خُدابوہت دُور ہیگااے ۔جدوں اسیں پکا ایمان نئیں رکھدے ،اسیں بوہتی وار ، ’ یاخُداوندا،یاخُداوندا  ‘  آکھن وچ رُجھے رہندے آں  ۔
کئی کلیسیاواں وچ جتھے بوہتے لوک نویں سریوں جمے نئیں ہیگے ،اوہ اینے زورشور نال دعا منگدے
نیں پئی پُلپٹ ٹُٹ جاندااے ۔
پر اسیں پاک کتاب وچوں ویکھ سکدے آں پئی اوہ سارے جیہڑے ،’ یاخُداوندا،یاخُداوندا ‘ آکھدے نیں ،اَسمان دی بادشاہی وچ نئیں جان گے ۔ صرف اوہ لوک جیہڑے پانی تے رُوح دی خوشخبری اُتے ایمان لیاؤندے نیں ،ایہو جیہا ایمان رکھدے نیں جیہڑا خُدا دے کم لئی اوہناں دی اَگوائی کردااے ۔
پاک کتاب سانوں دَسدی اے پئی ،کسے دا اپنے دل وچ پاپ دے نال ،اوہدا ناں  لینا ،بدی اے ۔ کیہ تسیں کدی پہاڑاں اُتے دُعا دے جلسیاں وچ گئے او؟ کئی وڈیریاں خدمت کرن والیاں زنانیاں روندیاں تے ہاڑے پاؤندیاں نیں ،اوہدا ناں لیندیاں نیں کیوں جے نہ ای اصل وچ اوہ یسوع نال ملیاں نیں ،نہ اپنے دلاں وچ رُوح نوں قبول کیتا اے ،نہ ای پانی تے رُوح دے راہیں نویں سریوں جمیاں نیں ۔ اوہ اوہدا ناں لیندیاں نیں کیوں جے اوہ اک ڈاہڈے خوف وچ پھسیاں رہندیاں نیں پئی اوہ دوزخ وچ چلیاں جان گئیاں ۔
مثال طورتے اک بندہ جنہے اک مشنری یاں پادری وانگر کلیسیا دی خدمت لئی اپنی حیاتی ایس نانویں لائی سی ،خُدا دے اَگوں بھیڑے طریقے نال کڈھیا گیا ۔ ماپیاں یاں جیون ساتھی توں چھُٹ جانا ،کسے دا دل توڑن لئی بوہتا ہووےگا ،پر خُدا دے راہیں بادشاہواں دے بادشاہ تے ساڈیاں رُوحاں دے انصاف کرن والے توں چھُٹ جانا،اسیں کِتھے جاواں گے ؟
میَں آس رکھدا ہاں پئی ایہہ تہاڈے وچوں کسے دے نال کدی واقع نئیں ہووےگا ۔مہربانی کرکے پانی تے رُوح دی خوشخبری نوں سُنو تے ایمان رکھو۔ ساڈے لئی ایہہ خُدا دی مرضی اے پئی اسیں نویں سریوں جمیےتے پانی تے رُوح دی خوشخبری دے مطابق حیاتی بسرکرئیے ۔
سانوں مسیحیاں نوں سچ مُچ پانی تے رُوح دی خوشخبری اُتے ایمان رکھنا اے تے پاک کتاب دے سچ توں طاقت پاؤنی اے ۔ صرف فیر ای اسیں خُدا دی سزا توں بچ سکدے آں ۔