Search
پنجابی
پنجابی
کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔

خطبے

مضمون 10: مُکاشفہ(مُکاشفہ دی کتاب اُتے تفسیر)

[2-3باب] سمُرنہ دی کلِیسیا دے ناں خط (مُکاشفہ ۲:۸-۱۱)

سمُرنہ دی کلِیسیا دے ناں خط
)مُکاشفہ ۲:۸-۱۱(
”تے سمُرنہ دی کلِیسیا دے فرِشتے نُوں ایہہ لِکھ پئی جیہڑا شُروع تے اخِیر اے تے جیہڑا مر گیا سی تے جِیوپیا۔ اوہ ایہہ آکھدا اے۔پئی مَیں تیری مُصِیبت تے غرِیبی نُوں جاننا آں (پر تُوں دَولتمند ایں) تے جیہڑے اپنے آپ نُوں یہُودی آکھدے نیں تے اوہ ہَین نئیں سگوں شیطان دی جماعت نیں اوہناں دِیاں طعنیاں مہِنیاں نُوں وی جاننا آں۔جیہڑے دُکھ تینُوں جَھلّنے پَین گے۔ اوہناں توں نا ڈر۔ ویکھو ابلیس تُہاڈے وِچوں کُجھ نُوں قید وِچ پان نُوں تیار اے۔ پئی تُسی ازمائے جاؤ تے دَس دِناں تِیکر مُصِیبت پاؤ گے۔ جان دین تِیکر وی وفادار رہو تے مَیں تینُوں زِندگی دا تاج دیاں گا۔جِہدے کنّ ہَین اوہ سُن لَئے پئی رُوح کلِیسیاواں نُوں کِیہ آکھدا اے۔ جیہڑا جتے اوہنوں دُوجی مَوت توں نُقصان نا پہنچے گا۔“
 
 

تشریح

 
آیت ۸:”تے سمُرنہ دی کلِیسیا دے فرِشتے نُوں ایہہ لِکھ پئی جیہڑا شُروع تے اخِیر اے تے جیہڑا مر گیا سی تے جِیوپیا۔ اوہ ایہہ آکھدا اے۔“
سمُرنہ دی کلِیسیا دی نیہ رکھی گئی سی جد پولُس اِفسُس دی کلِیسیا وچ سیوا کردا پیا سی ۔ اُتے لکھے ہوئے کلام دے مطابق ، ایس کلیسیا دے لوک غریب سن ، جنہاں دی اوہناں دے ایمان دے سبب ، اوہناں دی برادی دے یہودی مخالفت کردے سن ۔ یہودیاں دے راہیں ایس کلِیسیا اُتے بوہت ظلم کیتا گیا ، کلِیسیا دے فادراں دے دناں وچ اک پادری ، پولی کارپ دی شہادت توں ویکھیا جا سکدا اے ۔ مُڈھلی کلِیسیادے پاک لوکاں نوں یہودی ایمانداراں توں سدا کُٹاں ماراں کھانیاں پیاں جنہاں نیں مسیح نوں اپنا مسیحا منن توں انکار کیتا ۔
سمُرنہ دی کلِیسیا دی نیہ پولُس رسول نے رکھی سی ۔” جیہڑا شُروع تے اخِیر اے تے جیہڑا  مر
گیا سی تے جِیوپیا ،“ اوہدے ولوں ، یوحنا خُدا بارے گل کردا پیا اے ، جنہے سارے جگ نوں بنایا اے ۔ ساڈا خُداوند ، کنواری مریم توں پیدا ہویا ، یوحنا کولوں اپنے بپتسمے دے راہیں جگ دے پاپاں نوں اپنے اُتے چُک لیا تے اوہدے سولی اُتے لہو وگان نال اوہناں پاپاں دی عدالت ہوئی ۔ فیر اوہ تیجے دیہاڑے بعد مویاں وچوں جیوں اُٹھیا تے خُدا دے سجے ہتھ بیٹھا ہویا اے ۔ یسوع خُدا دی کلِیسیا دے فرشتے  نال نا صرف ساڈے مکتی داتا وانگر سگوں اپنی مرضی دے مالک خُدا وانگر وی گل کردا اے ۔
آیت ۹:”پئی مَیں تیری مُصِیبت تے غرِیبی نُوں جاننا آں (پر تُوں دَولتمند ایں) تے جیہڑے اپنے آپ نُوں یہُودی آکھدے نیں تے اوہ ہَین نئیں سگوں شیطان دی جماعت نیں اوہناں دِیاں طعنیاں مہِنیاں نُوں وی جاننا آں۔“
خُداوند نوں اوہناں ساریاں پریشانیاں تے دُکھا ں دا پتہ سی جنہاں نوںسمُرنہ دی کلِیسیا جردی پئی سی ۔ بھاویں پیسے دھیلے ولوں  اک غریب کلِیسیا سی ، سمُرنہ دی کلِیسیا رُوحانی طریقے نال مالدارسی ۔ سمُرنا وچ بوہت سارے یہودی رہندے سن ، جنہاں دا خُدا نے ” جیہڑے اپنے آپ نُوں یہُودی آکھدے نیں تے اوہ ہَین نئیں سگوں شیطان دی جماعت نیں “وانگر ذکر کیتا ۔ اوہناں یہودیاں نیں شیطان دے ارادیاں نوں پوریاں کرن لئی اپنے آپ نوں شیطان دے ہتھیار وانگر اوہدے حوالے کر دتا ، تے ایس طرحاں پانی تے رُو ح دی خوشخبری دی منادی وچ رکاوٹ بن گئے ، مطلب اےخُدا دی کلِیسیا اُتے ظلم کردے ہوئیاں ۔اوہ سمجھدے سن پئی اوہ اکلے ای پکے عقیدے والے یہودی سن ، تے ایہہ پئی صرف اوہو ای ابرہام دے پُتر سن ۔ پر اصل وچ اوہ نا صرف ابرہام والے ایمان اُتے چلن وچ ناکام رہے سگوں ایہدے توں وی بھیڑی گل ایہہ ہیگی اے پئی اوہناں نے اپنے پیو دادے دے خُدا نوں ردّکر دتا ۔ اوہناں نوں یہودیاں نیں بوہت چوکھا کُٹیا ماریا ، سمُرنہ دی کلِیسیا غریب سی ، پر فیر وی ایہہ اک ایہو جیہی کلِیسیا سی جیہڑی اپنے رُوحانیت وچ مالامال سی ۔
آیت ۱۰:”جیہڑے دُکھ تینُوں جَھلّنے پَین گے۔ اوہناں توں نا ڈر۔ ویکھو ابلیس تُہاڈے وِچوں کُجھ نُوں قید وِچ پان نُوں تیار اے۔ پئی تُسی ازمائے جاؤ تے دَس دِناں تِیکر مُصِیبت پاؤ گے۔ جان دین تِیکر وی وفادار رہو تے مَیں تینُوں زِندگی دا تاج دیاں گا۔“
خُدانے سمُرنہ دی کلِیسیا نوں آکھیا پئی ،” جیہڑے دُکھ تینُوں جَھلّنے پَین گے۔ اوہناں توں نا ڈر۔ “ اوہنے اوہناں نوں ” جان دین تِیکر وی وفادار رہو “ دا وی آکھیا تے وعدہ کیتا پئی اوہ اوہناں نوں ”زِندگی دا تاج “دیوے گا ۔ خُداوند نوں  پہلوں ای پتہ سی پئی شیطان سمُرنہ دی کلِیسیادے کُجھ پاک لوکاں نوں دھمکیاں دیوے گاتے اوہناں دا ایمان توڑن دی کوشش کرے گا ۔ ایس لئی اوہنے وعدہ کیتا سی پئی جے اوہ مرن تیک اوہدے وفادار رہن تاں ، اوہ اوہناں نوں زندگی دا تاج دیوے گا ۔
خُداوند سانوں  ایس حوالے توں جیہڑا کُجھ دسدا پیا اے اوہ ایہہ ہیگا پئی خُدا دے خادم تے اوہدے پاک لوک جیہڑے اخیری دناں وچ رہندے نیں اوہ وی شیطان تے اوہدے چیلیاں دے راہیں ستائے جان گے ۔ پر ساڈے کول مرن ویلے تیک خُدا نال وفادار رہن دی طاقت ہووے گی ،ایس لئی پئی ایہہ طاقت سانوں پانی تے رُوح دی خوشخبری اُتے ساڈے ایمان توں تے نویں اسمان تے دھرتی لئی ساڈی آس توں بوہت چوکھی ملدی اے جیہدا خُدا نے ساڈے نال وعدہ کیتا اے ۔
آیت ۱۱:”جِہدے کنّ ہَین اوہ سُن لَئے پئی رُوح کلِیسیاواں نُوں کِیہ آکھدا اے۔ جیہڑا جتے اوہنوں دُوجی مَوت توں نُقصان نا پہنچے گا۔“
اخیری دناں دے ایماندار مخالف ِ مسیح تے خُدا دے خلاف کھلو ن والیاں دے خلاف لڑائی وچ حصہ لین گے ۔ خُدا سانوں دسدا اے پئی جیہڑیاں لوکاں کول اصل خوشخبری تے اسمانی آس اے اوہ اپنے ایمان دے نال  فتح پاؤن گے۔سانوں اپنا سچیائی دا کلام تے ایمان دے کے ، خُدا نے ہر ایماندار نوں اپنے ویریاں اُتے فتح پاؤن دے لائق بنا دتا اے ۔ صرف اک سوال باقی ہیگا اے پئی کیہ اسیں خُدا تے اوہدے خادماں  ول رہواں گے ۔
رومیوں ۸: ۱۸ سانوں دسدا اے  پئی ،” کیوں جو میری سمجھ وِچ ایس ویلے دے دُکھ دَرد اوس جلال دے اگّے کُجھ وی نئیں جیہڑا ساڈے اُتّے ظاہر ہوئے گا۔“مخالفِ مسیح تے اوہدے چیلیاں دے راہیں ساڈی کُٹ مار صرف کجھ دیہاڑے ای جاری رہوے گی ، خورے صرف ۱۰ دیہاڑے ۔ خُدا اُتے بھروسہ رکھدے ہویاں ، تُسیں دُکھاں دے ایس تھوڑے ویلے دا مقابلہ کر سکدے او ، مخالفِ مسیح اُتے فتح پاسکدے او ، تے خُدا نوں جلال دے سکدے او تے اوہدی ہمیش دی بادشاہی اپنے انعام وانگر لے سکدے او ۔ خُدا نے پاک لوکاں نوں مخالفِ مسیح دے خلاف اوہناں دی لڑائی جتن دی طاقت دتی اے ۔
آؤ اسیں سارے پانی تے رُوح دی خوشخبری اُتے ایمان نال مخالفِ مسیح اُتے فتح پائیے ، تے آؤ اسیں سارے ہزار ورہیاں دی بادشاہی تے نویں اسمان تے دھرتی وچ دوبارہ رل کے سدا لئی اکٹھے زندگی بسر کرئیے ۔ ایتھے پہلی موت دا مطلب ساڈی بدنی موت اے ، جد پئی دوجی موت دا مطلب رُوحانی موت دوزخ دا ہمیشگی والا عذاب اے ۔ پاک لوکاں لئی ، شہادت اے ، اوہناں دی بدنی موے اے ، پر رُوحانی موت نئیں ہیگی ۔
مَیں خُدا دا شکر گزار ہاں پئی اوہنے ایہناں اخیری دناں وچ ، سانوں ، پاک لوکاں نوں شہادت دی عزت تے جلال  دتا ،جویں پئی اوہنے مُڈھلی کلیسیا دے شہیدا ں نوں دتا سی ۔