Search
پنجابی
پنجابی
کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔

خطبے

مضمون 10: مُکاشفہ(مُکاشفہ دی کتاب اُتے تفسیر)

[2-7باب] نِیکُلیوں دیاں تعلیماں پچھے چلن والے (مُکاشفہ۲:۱۲- ۱۷)

نِیکُلیوں دیاں تعلیماں پچھے چلن والے
)مُکاشفہ۲:۱۲- ۱۷(
 
بلعام دا راہ
 
ایتھے آکھیا گیا اے پئی آسیہ دیاں ست کلیسیاواں وچوں ، پرگمن دی کلیسیا دے کجھ بندے سن جیہڑے نیِکُلیوں دیاں تعلیماں اُتے چلدے سن ۔ ایہہ لوک صرف اپنے جگ دے پیسے دھیلے تے مشہوری نوں قائم کرن دی آس دے راہیں ورتے گئے سن ،تے اوہناں نیں جاناں بچاؤن وچ کوئی دل نا لایا سی ۔ خاص کر کے خادماں نوں بوہت احتیاط کرنی چاہی دی اے تاں پئی بلعام دیاں ایہناں تعلیماں نوں من دیاں ہویاں مُک نہ جان ۔ بلعام پاک لوکاں نوں جگ دی بھگتی کراؤن لئی تے اوہناں نوں بربادی ول لَے جان دا سبب بنیا ۔
خُدا نے سانوں اپنے وعدے دا کلام دتا پئی فتح پاؤن والیاں نوں ، اوہ لُکیا مَن تے اک چٹا پتھر دیوے گا ۔ دوجے اکھراں وچ دسدے ہوئیاں ، ایہدا ایہہ وی مطلب ہیگا اے پئی جگ دے پچھے چلن والے پادری اپنا مَن گواؤندے ہوئیاں مُک جان گے ۔ ایتھے مَن دا مطلب ہیگا اے ”خُدا دا مہنگا کلام“تے لُکےہوئے مَن نوں گواؤن دا مطلب خُدا دی مرضی نوں گوا لینا اے جیہڑی اوہدے کلام وچ لُکی اے ۔
جدوں خُدا دے نویں سریوں جمن والے خادم جگ پچھے چلدے نیں تاں ، اوہ اوہدے کلام دی سمجھ توں پچھاں رہ جاندے نیں ۔ ایہہ اک ڈراؤنا کم اے ۔ میَں ایہدے ہون توں ڈردا ہاں ، تے تہانوں ، وی ، ایہدے توں ڈرنا چاہی دااے ۔ خُدا سانوں دسدا اے پئی فتح پاؤن والے نوں اوہ لُکیا مَن تے اک چٹا پتھر دیوے گا، پرجیہڑے لوک جگ نال گل بات کر کے ہار جاندے تے ہتھیار سُٹ دیندے نیں تاں ایس جگ دی ظاہری مشہوری یاں دلی خوشی ایس مَن توں نئیں ملے گی ۔
بائبل سانوں دسدی اے ، ” تے اِک چِٹّا پتّھر دیاں گا اوس پتّھر اُتّے اِک نواں ناں لِکھیا ہویا ہوئے گا جِہنُوں اوہدے لین والے دے سِوا کوئی نا جانے گا۔ “خُدادا کلام بوہت کھرا اے ! اوہ لوک جیہڑےبے دین جگ نال محبت کردے نیں اوہو ای نیں جیہڑے یسوع مسیح دے بپتسمے تے سولی اُتے اوہدے لہو اُتے یقین نہ رکھدے ہویاں اپنے پاپاں توں نئیں چھڈا ئے گئے ۔ ایہہ لوک ایس سچیائی نوں نئیں جان دے پئی مسیح نے اپنے بپتسمے نال اوہناں دے سارے پاپاں نوں معاف کردتا ا ے ۔
کُجھ لوکاں دا یسوع اُتے ایمان صرف خیالی ہوائی جہاز اُتے ہوندااے ۔ اوہ سمجھدے نیں پئی یسوع نے اوہناں دے پاپاں نوں مکایا اے ، تے ایہدے سببوں اوہ راستباز بن گئے نیں، پر اوہناں دا ایمان سکھنا اے ایس لئی پئی ا وہناں دےدلاں وچ پاک رُوح نئیں ہیگا۔ ایہہ اک خیال ایمان اے ۔ جے کسے نے سچ مُچ مکتی پائی اے ، تاں اوہنوں جگ دیاں شیواں نال لازمی لڑنا تے فتح پاؤنی چاہی دی اے —جگ دی مشہوری ، عزت ، پیسہ دھیلا ،یاں طاقت ۔جگ اُتے فتح پاؤن دا مطلب اے خُدا دے کلام اُتے ڈٹے رہنا جنہے سانوں نویں سریوں جمن دی اجازت دتی اے ، ایس جگ دے پیسے دھیلے تے عزت پچھے چلن والیاں دے خلاف لڑنا تے پاک رُوح نوں اپنے دلاں وچ وساؤنا اے۔
خُدا سانوں دسدا اے پئی اوہ حیاتی دی کتاب وچ اوہناں لوکاں دے نام لکھے گا جنہاں نیں مکتی پا لئی اے ،تے جنہاں دے دلاں وچ پاک رُوح رہندا اے ۔ جویں پئی بائبل سانوں دسدی اے ،” ایس لئی جے کوئی مسِیح وِچ اے۔ تے اوہ نواں مخلُوق اے پرانیاں شیواں جاندِیاں رہیاں۔ ویکھو اوہ نَوِیاں ہوگِئیاں،۔ “اوہ جیہڑے نویں سریوں جم پئے نیں تے جنہاں دے دلاں وچ پاک رُوح وسدا اے اوہناں نوں پتہ ہیگا اے پئی ہُن اوہ پہلوں وانگر نئیں رہے جویں اوہ پہلوں ہوندے سن ۔ اوہ اپنے آپ محسوس کردے نیں پئی یسوع مسیح دے پانی تےلہو اُتے ایمان رکھ کے اوہناں دیا ں پُرانیاں حیاتیاں ہُن نویں مخلوق بن گئیاں نیں ۔ اوہ اپنے ایمان نال جان دے نیں پئی اوہناں دے نام حیاتی دی کتاب وچ لکھے گئے نیں ۔ ایس طرحاں اوہ خُدا دے لُکے ہوئے مَن نوں ویکھ سکدے نیں ،تے ایس طرحاں خُدا دے خادم تے پاک لوک خُدا دے کلام دی سچیائی ، خُدا دی مہنگی اواز نوں سُن سکدے نیں ۔
مَن اسرائیلیاں نوں دتا گیا جدوں اوہ کنعان وعدہ کیتی ہوئی دھرتی تیک اپڑن توں پہلوں چالی (۴۰)ورہے جنگل وچ پھردے رہے۔ بائبل دی وضاحت مطابق ، مَن چٹادھنیا دے دانے وانگر ،گول تے نکا سی ۔جدوں سرگی ویلے بنی اسرائیلی لوک جاگدے تاں اوہناں دے آل دوالے دی دھرتی مَن نال بھری ہوئی ہوندی سی ، جویں ساری رات برف ورسی ہووے ۔ ایہدے بعدوں اسرائیلی لوک مَن نوں اکٹھیاں کردے تے سرگی ویلے اوہنوں کھاندے ۔ ایہہ اوہناں دی ہر دیہاڑے دی روٹی سی ۔ خورے اوہ ایہنوں بھُن دے ہون ، خورے ایہنوں اُبال دے ہون ، یاں خورے اوہ ایہنوں پکاؤندے ہون ؛ ایس توں ہٹ کے ،جنگل وچ اوہناں دے چالیاں ورہیاں تیک پھرن وچکار ایہہ اسرائیلیاں دی خاص خوراک ہیگی سی ۔
ایس لئی پئی دھنیادےدانے وانگر مَن نکا سی ، ایس لئی صرف اک مَن کھان نال ای کسے دا ٹِہڈ نئیں بھر سکدا سی ۔ پر خُدا نے اوہناں نوں ساری رات بوہت مَن دتا تاں پئی ہر اسرائیلی دی لوڑی اوس دیہاڑے لئی پوری ہو سکے —نا اک دیہاڑے توں گھٹ تے نہ ای بوہتا ، ایس لئی پئی مَن نوں اکٹھیاں نئیں کیتا جا سکداسی ۔ پر چھیویں دیہاڑے ، خُدا نے اوہناں نوں دو دیہاڑیاں لئی مَن دتا ، تاں پئی سبت دے دیہاڑے اسرائیلیاں نوں مَن اکٹھا نہ کرنا پوے ۔
 
 
زِندگی دی روٹی
 
خُدا دا کلام ساڈا مَن، ساڈی حیاتی دی روٹی اے ، خُدا دے کلام وچ ساڈیاں جاناں نوں روٹی ، حیاتی دی روٹی ملدی اے ۔ اِنج نئیں ہیگا پئی کسےخاص حوالے وچ تہانوں اک بوہت وڈی روٹی لبھ پوے گی ،سگوں ایہہ پئی خُدا دی وڈی آس سارے پاک کلام وچ لبھدی اے ، ایتھوں تیک پئی ایہدے نکے توں نکے حصے وچ وی ۔
خُدا دے اوہناں خادماں تے پاک لوکاں نوں جیہڑے جگ نال سمجھوتہ نئیں کردے سن ،خُدا نے حیاتی دی روٹی دتی ۔ تے اوہ سانوں ساریاں نوں ایہہ ہر دیہاڑے دی روٹی دیندا رہندا اے جیہڑی ساڈیاں بدنی تے رُوحانی لوڑاں دونواں نوں پوریاں کردی اے ۔
ایس مَن دے سبب ، اسرائیل دے لوک ۴۰ ورہے تک جنگ وچ پھرن وچکار کدی بھکے نئیں ہوندے سن ، بھاویں جنگل نے اوہناں دے کھان لئی کوئی پیداوار نئیں دتی سی ۔ ایس طرحاں ، اوہناں لوکاں لئی جیہڑے نیِکُلیوں دے کماں نوں ردّ کردے نیں ، خُدا نے وعدہ کیتا اے پئی اوہ اپنا لُکیا ہویا مَن کھان لئی دیوے گا ۔ خُدا دے خادماں نوں جیہڑے جگ دیاں ایہوجیہاں شیوا ں دا جویں پئی پیسے دھیلے تے رُتبیاں داپچھا نئیں کردے ، خُدا اپنا مہنگا کلام ، حیاتی دا کلام دیندااے جیہڑا پانی تے رُوح دی خوشخبری دے راہیں اوہناں نوں نویں سریوں جمن دی اجازت دیندااے ۔
سانوں نیِکُلیوں دے کماں توں نفرت تے اوہناں نوں ردّ کرنا چاہی دااے جیہڑے اج دےمسیحی لوکاں اُتے چھائے ہوئے نیں ۔ سانوں اوہناں لوکاں دے ایمان اُتے نئیں چلنا چاہی دا جیہڑےنویں سریوں نئیں جمے ، سانوں جگ وانگر ہون توں مکرنا چاہی دااے ۔ بھاویں ایہہ خُدا دا قانون ہیگا اے پئی ساڈا بدن بدنی شیواں پچھے چلدا اے تے ساڈی رُوح رُوحانی شیواں پچھے چلدی اے ، پر اِنج ہون دے نال نال سانوں نیِکُلیوں دیاں تعلیماں نوں ردّ کرنا چاہی دا اے ، اوہناں سارے کماں توں نفرت کرنی چاہی دی اے جیہڑے جگ وانگر نیں ، تے ایہدی تھاں اُتے خُدا دے دتے ہوئے سچیائی دے کلام اُتے ایمان رکھ کے خُدا دے مَن نال ودھناپھُلنا چاہی دااے ۔ ایہہ جان دے ہویاں پئی اسیں ہُن راستباز بن گئے آں تے ہن ساڈے دلاں وچ پاک رُوح وسدااے ، سانوں ساریاں نوں لازمی ایمان وچ جیوناچاہی دا اے ۔
نویں سریوں جمن والیاں نوں جگ نال لڑنا چاہی دااے ۔ اوہناں نوں نیِکُلیوں نال مقابلہ کرنا چاہی دا اے ۔ جویں پئی تُسیں آپ چنگی طرحاں جان دے او، اج دے بوہتے پادری اپنے دولت تے مشہوری پچھے چلدے نیں ، اپنے آپ نوں سواردے نیں ، جگ وانگر بن دے نیں ، تے جگ دیاں طریقیاں نال کامیاب ہون دی کوشش کردے نیں ۔ سانوں ایہناں جھوٹیاں نبیاں دا مقابلہ کرنا چاہی دااے ۔
اسیں ، وی ، اپنابدن رکھدے آں تے ایسے طرحاں اسیں وی جگ دے فائدے لین دی آس رکھدے آں ۔ پر جیہڑے اپنے آپ وچ پاک رُوح رکھدے نیں اوہناں نوں ایہہ پتہ ہونا چاہی دا اے پئی اوہ اپنے دلوں جگ پچھے نئیں چل سکدے ، اوہناں نوں لازمی جگ دیاں شیواں دا انکار کرنا چاہی دا اے ، تے اوہناں نوں صرف ایمان دے راہیں ای جیوندے رہنا چاہی دااے ۔ جے تُسیں اوہناں لوکاں نال اکٹھے جے جیہڑے جگ پچھے چلدے نیں ، اوہناں دے عقید ے نوں قبول کردے نیں، مطلب اےجگ پچھے چلدے نیں جویں اوہ جگ دا پچھا کر دے نیں تاں، آپ اپنی ڈاہڈی بربادی ول ودھدیاں ہویاں بلعام دے راہ پچھے چلد ے ہویاں مُک جان گے ۔ ایہہ تہاڈے بدن تے رُوح دونواں دی بربادی دا راہ اے ۔ جدوں تُسیں جگ پچھے چلو گے تاں ، تہاڈا اپنا ایمان گواچ جاوے گا ۔ خُدا نے آکھیا پئی اوہ ایہو جیہے لوکاں نوں اپنے مونہوں اُباک چھڈے گا ؛ ایہہ لوک ہُن ہور مَن نئیں کھاسکن گے ، تے اپنا ایمان سارے دا
سارا مکاؤندے ہوئیاں مُک جان گے ۔
خُدا دا پرگمن دی کلیسیا نوں جھڑکن دا سبب ایہہ ہیگا سی پئی اوہدے لوک بلعام دے عقیدے اُتے چلدے سن ۔ خُدا نے پرگمن دی کلیسیا دے خاد م نوں ڈانٹیا ایس لئی پئی اوہ ، بھاویں اک نویں سریوں جمیاہویا خادم ، جیہدے دل وچ پاک رُوح رہندا سی ، نے جگ کولوں پچھان کراؤن نوں لبھیا تے اپنی کلیسیا دی سیوا ایس طرحاں کیتی جویں اوہ کوئی دُنیادار بندہ ہووے ۔ صرف ایہو ای نئیں ، اوہنے اپنیاں بھیڈاں نوں وی ایہو ای گندہ عقیدہ دسیا تے اوہناں نوں راہوں بھٹکا دتا ۔ ایہو جیہا خادم دُنیادار پادری توں چنگا نئیں جیہڑا نویں سریوں نہ جمیا ہوے ۔ ایس عبارت نال ، خُدانےخُدا دے اوہناں خادماں وانگر اک کُھلی تے ڈاہڈی خبرداری جاری کیتی اے جنہاں دی صرف خاص دلچسپی جگ دے فائدیاں دوالے ہیگی اے تے کلیسیا دے خزانیاں ول دھیان کردی اے : ” تَد تَوبہ کر نئیں تے مَیں تیرے کول چھیتی آ کے اپنے مُنھ دی تلوار نال اوہناں دے نال لڑاں گا ۔“
 
 

اوہ ایمان جیہڑ ا تہانوں بربادی ول لَے جاندااے

 
جے بندہ خُدا دے خلاف لڑے تاں کیہ ہووے گا ؟ ایتھوں تیک پئی تہانوں تھوڑے چِر لئی وی سوچن دی لوڑ نئیں ہیگی—لازمی طور اُتے ایہہ بربادی دا سب توں چھیتی والا راہ ہووے گا ۔ ”جیہدے کول دومُونہی تیزتلوار اے ، “ایہدا مطلب اے پئی خُداداکلام اک دونواں پاسیوں وڈن والی تیز تلوار اے ۔ ایہدے نال کوئی فرق نئیں پینداپئی تُسیں کون جے ؛ جے تہانوں خُدادےکلام نے نشانہ بنایا اے تاں لازمی تُسیں مرجاووگے ۔ خُداداکلام طاقت والی تلوار اے جیہڑی وڈ سکدی اے ” جان تے رُوح تے جوڑ جوڑ تے مِنّجھ مِنّجھ وَکھو وکھرے کر کے دُسّر لنگھ جاندا اے۔ “(عبرانیوں ۴ : ۱۲)۔ تے ایہہ دل دے خیالا ں تے ارادیاں نوں پرکھن والا اے، تاں پئی لوک مسیح یسوع دی پانی تے لہو نال دتی گئی مکتی دے لیڑے پاسکن ۔
بوہت سارے ایہو جیہے لوک نیں جیہڑے ، یسوع اُتے ایمان رکھدیاں ہویاں ، فیر وی شریعت دے جال وچ پھس جاندے نیں ، تے ایہدے نتیجے وچ شریعت ہتھوں مار کھا کے مردیاں مردیاں مُک جاندے نیں ۔ ایس دُکھی اخیر توں بچن لئی ، سانوں جگ دے عقیدے نال لڑنا تے ایہدے اُتے فتح پاؤنی چاہی دی اے ۔ خُدا دے بندیاں نوں جھوٹیاں تعلیماں اُتے فتح پاؤنی چاہی دی اے ، تے اوہناں نوں ایہہ وی پک ہونا چاہی دا اے پئی اوہناں دیاں بھیڈاں نوں ایس طرحاں دے جھوٹ دے راہیں بھٹکایا نہ جاوے ۔ جیہڑا وی جگ نال پیار کردا اے تے ایہدے جال وچ پھس جاندااے اپنا ایمان مکدیاں ہویاں ویکھے گا ۔
اج کل بوہت ساریاں گرجیاں نوں گرجیاں وانگر نئیں سگوں کاروبار وانگر دسیا جاندااے ۔ ایہہ بوہت دُکھ بھریا سگوں آر پار ہوجان والی گل اے ۔ کاہدے لئی ایس طرحاں دے گرجے کاروبارسمجھےجان دے طور تے مُک جاندے نیں؟ ایس لئی پئی اج کل دے گرجے جگ پچھے چلن تے جگ دیاں چیزاں دی بھگتی تےپچھے چلن والے خاص ہوندیاں ہویاں بوہت مصروف نیں۔ میَں لازمی طور اُتے ، ایہہ نئیں آکھدا پیاں پئی نویں سریوں جمن والے بدنی آس نئیں رکھدے ۔ ایتھوں تیک پئی نویں سریوں جمن والے پاک لوک وی بدنی لالچ رکھدے نیں ، پر اوہناں دے ایمان توں ایس لالچ نوں گھٹ کیتا جاندااے ۔ اوہ بدنی شیواں نوں نئیں لبھدے جویں بےایمان اپنے سچے دلاں نال اپنیاں بدنی آساں پچھے چلدے نیں۔
جیہڑے نویں سریوں نئیں جمے اوہ اپنیاں عزتاں بناؤندے نیں ، تے اپنی حیاتی ایہناں عزتاں دی حد وچ رہندے ہویاں ہرممکن شے توں سواد لیندے ہویاں بسر کردے نیں ۔ بُتا ں دی پوجا تے زنانی بازی اوہناں لئی صرف عادت اے ۔ ایس توں وی بھیڑا ، اوہناں وچوں کئی شیطان دی پوجا کردے نیں ۔ کیہ نویں سریوں جمن والا ایہناں وچوں کوئی کم کر سکدا اے ؟ بالکل نئیں ! اوہ کدی وی ایہو جیہاں حرکتاں نئیں کر سکدے ، ایس لئی پئی نویں سریوں جمن والیاں نوں پتہ اے ، ایہہ حرکتاں بوہت گندیاں تے پلید نیں ۔ ایس لئی پئی اسیں جیہڑے نویں سریوں جمے آں خاص کر کے ایہناں لوکاں توں وکھرے آں جیہڑے جگ وچ عزت تے اپنی ہر بدنی آس دا پچھا کردے نیں ، سانوں اپنیاں حیاتیاں نوں جگ دے فائدے پاؤن دیاں چاواں ہیٹھاں نئیں جیونا چاہی دا اے ، نہ ای اسیں کدی ایس طرحاں جیوندے رہ سکدے آں ۔
اوہ جیہڑے نِیکُلیوں دے کماں پچھے چلدے نیں اوہ لوک نیں جیہڑے صرف ایس جگ دے ما ل دا پچھا کردے نیں ۔ لازمی طور اُتے ، روزی روٹی کماؤن دی کوشش کرن ، تے ایتھوں تیکرپئی دولت مند بنن وچ وی کوئی گھاٹا نئیں اے ۔ پر جدوں تہاڈی حیاتی دا اکلامقصد دولت اکٹھی کرنا ہوجاندااے ، تے جدوں تُسیں بُت پرستی وچ پے جاندے او تے اپنے لالچ وچ پیندے ہوئے مُک جاندے او ،تاں تُہاڈا ایمان سارے داسارا برباد ہوجاوے گا ۔ اوہ جیہڑے پیسیاں لئی سیوا کردے نیں تے جیہڑے جگ دے مال لئی گرجے بناؤندے نیں اوہ سارے نیِکُلیوں دے کماں پچھے چلدے پئے نیں ۔ ایہہ لوک اخیریں جگ توں ہار جان گے ، بھاویں جے اوہ خُدا اُتے ایمان رکھن دادعویٰ کردے نیں، پر اوہناں دے دلاں نوں اجے اوہناں دے سارے پاپاں توں کامل طریقے نال مکتی یافتہ ہونا اے ۔
 
 
دل دی دھرتی دیاں چار قسماں
 
متّی دی انجیل سانوں اک تمثیل دسدی اے جیہدے وچ یسوع نے اک بیج بون والےدے بارے وچ گل کیتی جیہدے بیج چونہہ وکھ وکھ دھرتیاں اُتے کھلردے نیں ۔ پہلی دھرتی جس اُتے بیج کھلرے اوہ راہ دا کنارہ اے ؛دوجی پتھریلی دھرتی اے ، تیجی جھاڑیاں والی دھرتی اے ۔ تے چوتھی ستھری دھرتی اے ۔ آؤ ایہناں وچوں ہر اک اُتے دھیان کرئیے ۔
راہ دے کنارے والے بیج سخت دل دی نشانی اے ۔ ایہہ بندہ خُدا دے کلام نوں سُن دا اے پر ایس لئی پئی اوہ چھیتی نال دل وچ نئیں رکھدا، پنچھیاں نیں اوہنوں چُگ لیا ۔ دوجے اکھراں وچ ، ایس لئی پئی ایہو جیہا بندہ مکتی دے کلام نوں صرف خیال طور اُتے ویکھدا اے جیہڑا ایہنوں پانی تے رُوح دے راہیں نویں سریوں جمن دی اجازت دیندااے،پنچھی (شیطان)اوہنوں چُگ لیندے نیں ، تے اوہدا ایمان ایتھوں تیک پئی ودھنا شروع وی نئیں ہوندااے ۔
فیر پتھریلی دھرتی دا کیہ مطلب اے ؟ ایہدا مطلب اوہ لوک نیں جیہڑے خُوشی نال کلام نوں من لیندے نیں ،پر بوہتے چِر لئی جر نئیں کر سکدے ، ایس لئی پئی اُتلی دھرتی وچ کوئی جڑ نئیں رکھدے ۔ اوہ جیہڑے جھاڑیاں وچکار بیج لیندے نیں ، دوجے پاسے ، اوہ اوہناں لوکاں دا حوالہ دیندااے جیہڑے ایس جگ دے فکر وچ رہندے نیں تے مال دے بھٹکاؤن نے ایس کلام نوں دب لیا جیہڑا اوہنا ں نیں شروع وچ خوشی نال من لیا سی ۔
اخیروچ ، اوہ جیہڑے ستھری دھرتی اُتے بیج لیندے نیں اوہ لوک نیں جیہڑے خُدا دے کلام نوں سچے دلوں من دے ہوئے تے ایہدے اُتے چلدے ہوئے اپنے دلاں وچ پھل لیاؤندے نیں ۔
ایہناں وچوں کیہڑی دھرتی تہاڈے دل بارے دسدی اے ؟ جے تہاڈا دل راہ دے کنارے دی دھرتی وانگر اے جیہڑی کلام دے بیج نوں اگاؤن لئی پوری طریقے نال تیار نئیں اے، تاں ایہہ کِھلرجاوے گا یاں پنچھی ایہنوں چُگ لین گے ، ایس کلام دی برکت نوں تہاڈے لئی بالکل اوپرا بنا دیوے گا ۔ سانوں ایہہ لازمی سمجھنا چاہی دا اے پئی ایس لئی پئی اسیں پاپ دے بیج آں ، جے ایہہ خُدا دے کلام لئی نئیں سی تاں اسیں خُدا لئی اوپرے رہوا ں گے ۔ جے ، دوجے پاسے ، ساڈے دل پتھریلی دھرتی نوں پسند کردے نیں ، فیر کلام دا بیج اپنی جڑ نوں پھڑن دے لائق نئیں ہو سکے گا ، تے برساتاں دے طوفان ، ہنیریاں یاں ہَوا دیاں جھلاں توں نئیں بچ سکے گا ۔ ایہناں لوکاں نوں اپنیاں دھرتیاں نوں بدلن دی لوڑ ہیگی اے ۔ ایس توں نظر ہٹا کے پئی اوہناں نیں شروع وچ بوہت خوشی نال خُدا داکلام سُنیا ہووے ، جے ایہہ ودھ نئیں سکدا تے نکی جیہی تنگی وچ کملا جاندااے تا ں فیر اوہناں دے پہلوں منن دا بالکل کوئی فائدہ نئیں ہووے گا ۔
سانوں جھاڑیاں دی دھرتی والے دلاں اُتے وی فتح پاؤنی چاہی دی اے ۔ سانوں لازمی ایہناں جھاڑیاں دے خلاف لڑنا تے ایہناں نوں وڈ ھ دینا چاہی دا اے جیہڑیاں ساڈیاں حیاتیاں نوں خطرے وچ پاؤندیاں نیں ۔ جے تُسیں اوہناں نوں کلیاں چھڈ دیندے او تاں جھاڑیاں تھوڑ ے ای چِر وچ سانوں کج لین گئیاں تے اُتوں سورج دی لو نوں روک دین گئیاں۔ دُھپ دے ڈکن تے جھاڑیاں تیکر مٹی دی خوراک گواچن نال کلام دا ایہہ رُکھ مر جاندااے ۔
جدوں سانوں اپنیاں حیاتیاں وچ ازمائشاں تے دُکھاں نوں سہنا پیندااے تاں سانوں بہادری نال ایہناں اُتے فتح پاؤنی ہووے گی ۔ سانوں ایہناں جھاڑیاں نال لڑنا چاہی دااے جیہڑیاں ساڈا راہ ڈکدیاں پئیاں نیں تے ساڈے چہریاں نوں اپنی طاقت نال کجدیاں پئیاں نیں ، بھاویں ساڈیاں حیاتیاں ایسے اُتے بھروسہ کردیاں ہون ۔ جدوں ایس جگ دی دولت سانوں پچھاں نوں دھک دی اے یاں جدوں ایہدی مشہوری سانوں خطرے وچ پا دیندی اے تاں سانوں ایہناں ساریاں نال لڑنا تے ایہناں اُتے فتح پاؤنی چاہی دی اے۔ ایس لئی پئی جگ دیاں تنگیاں تے ایہدا لالچ رُوح لئی جان کھون والا اے سانوں لازمی طور اُتے اوہناں اُتے فتح پاؤنی چاہی دی اے ۔ جدوں اسیں فتح دی ایہو جیہی رُوحانی حیاتی بسرکراں گے ، تاں ،
ساڈے بدن تے رُوحاں خوشحال ہون گئیاں ، ایس لئی پئی اوہ خُدا ولوں سورج دی لو تے ودھنا پاؤن گے ۔
نویں سریوں جمن والے پاک لوک تے خُدا دے خادماں نوں ، جگ دے خلاف سدا رُوحانی جنگ لڑنی چاہی دی اے ۔ ایس لئی سانوں نِیکُلیوں پچھے نئیں چلنا چاہی دا ۔ آکھیا جاندااے پئی نِیکُلیوں لوکاں دی سیوا کرن وچ بوہت چوکھاحصہ لیندے نیں ۔ پر جگ وچ لوکاں دی سیوا کرنا کلیسیادا خاص کم نئیں اے ۔ ایہہ سوچنا بوہت وڈی غلطی ہووے گی پئی کلیسیادا خاص مقصدلوکاں دی سیوا اے ۔
 
 
بہادری نال ردّ کرو !
 
خُداسانوں دسدااے پئی اسیں ایس جگ دے لُون آں ۔ ایہداکیہ مطلب اے؟ جدوں خُدا سانوں دسدا اےپئی اسیں جگ دے لُون آں ، تاں ایہدا مطلب ایہہ ہیگا اے پئی جگ نوں ساڈی لوڑ ہیگی اے ۔ لُون دا کم پاپیاں نوں مسیح دے پانی تے لہو دے کلام دی منادی کرنا اے تاں پئی اوہ اپنے پاپاں توں مکتی پا سکن ، خُدا دے پُتر بن جان ، تے بہشت وچ جان دی اجازت دتی جاوے ۔ جویں سواد بناؤن لئی لُو ن دی لوڑ ہوندی اے ایسے طرحاں جگ نوں وی ایس لُو ن وانگر نویں سریوں جمن والے راستبازلوکاں دی لوڑ اے ۔ نویں سریوں جمن والے راستباز لوکاں نوں ، دوجے اکھراں وچ ، پانی تے رُوح دی کلام دی منادی کرنی چاہی دی اے تے اوہناں لوکاں دی اوہناں دی مکتی تیک اگوائی کرنی چاہی دی اے ۔ سانوں لُون دے ایس کم نوں پورا کرنا چاہی دااے تے لوکاں دی نویں سریوں جمن وچ مدد کرنی چاہی دی اے ۔ سانوں پاپیاں نوں راستباز لوک بناؤنا چاہی دا اے ۔
خُدا دی اصل کلیسیا کیہ اے ؟ خُدا دی اصل کلیسیااوہ تھاں ہیگی اے جتھے لوک اوہدی بھگتی لئی اکٹھے ہوندے نیں ؛تے ایہہ اوہ تھاں اے جتھےاوہ خُدا دی وڈیائی کردے نیں ؛ تے ایہہ اوہ تھاں اے جتھے اوہ اوہدے اگے دعا منگدے نیں ۔ جدوں اڑاؤنی آؤندی اے تاں، خُدا دے خادماں نوں ایہدے نال لڑن دے لائق ہونا چاہی دا اے ۔ پاک لوکاں نوں ، وی ، شیطان ولوں آؤن والیاں جگ دی اڑاؤنیاں نال لڑن دے لائق ہونا چاہی دا اے ۔ شیطان تہانوں ازما سکدا اے ، ”اپنے ایمان نوں بھُل جاوو؛ میَں تہانوں مالدار بناواں گا ! تہانوں نویں سریوں جمن والی کلیسیا وچ جان دی لوڑ نئیں ہیگی ؛میری کلیسیاواں وچوں اک کلیسیا وچ آؤ، تے میَں تہانوں ایتھوں تیک پئی ایلڈر بناواں گا ! “پر ایس لئی پئی شیطان شروع توں راستباز لوکاں نوں بھٹکاؤن تے اپنے جال وچ پھساؤن دی کوشش کردا پیا اے ، ایس لئی سانوں سدا ایہدے نال لڑن تے ایہدے اُتے فتح پاؤن لئی تیار رہنا چاہی دا اے تاں پئی اسیں اخیر تیک ایمان دی راکھی کر سکیے ۔
اوہ جیہڑے جھوٹاایمان رکھدے نیں اوہ بوہتی وار جگ دے لالچاں نال مکتی پاؤن دی کوشش کرن دا فریب دیندے نیں ۔ اوہ پیسے دھیلے تے مشہوری دا لالچ دیندے نیں ۔ شیطان سانوں جگ دیاں قدراں وکھاؤندااے تے سانوں اپنا ایمان تے خُدا نوں چھڈ دین لئی آکھدا اے ۔ سانوں اِنج دیاں ویلیاں اُتے جو کجھ رکھنا چاہی دا اے اوہ خُداوند اُتے ایمان اے پئی اوہ ساڈیاں ساریاں لوڑاں نوں پور ا کرے گا ، تے ایسے ایمان نال اسیں شیطان دیاں اڑاؤنیاں نوں بہادری نال ردّ کرسکدے آں تے ایہناں اُتے فتح پا سکدے آں ۔
برکتاں دی جڑ خُدا وچ ہیگی اے ۔ خُدا ای اوہ اے جیہڑا رُوحانی تے بدنی طور اُتے سانوں برکت دیندااے ۔ ایہہ جان دے ہویاں پئی شیطان اوہ نئیں ہیگا جیہڑا بندیاں نوں برکت دیندا اے ، اسیں ایہدے خلاف لڑ سکدے آں ۔ ایہو جیہے ویلے وی آؤندے نیں جدوں اسیں اپنیاں آساں دے خلاف لڑدے آں ۔ جدوں لالچ تے ہوس اُگن لگ پیندے نیں جویں پئی ساڈے دل ایس اج دے جگ دے راہیں بھٹک جاندے نیں تاں ، سانوں اپنے آپ نال لڑنا پوے گا ۔ ایہہ آکھیوں اڈ سمجھ جانا چاہی دا اے پئی سانوں ایہناں جگ دے لوکاں دے خلاف لڑنا پوے گا جیہڑے ساڈے ایمان نوں خراب کرن دی کوشش کردے نیں ۔ ساڈا لیکھ سارے جگ دیاں طاقتاں دے خلاف رُوحانی لڑائی اے ۔
کیوں؟ ایس لئی پئی جدوں کوئی مسیحی رُوحانی لڑائی وچ کم نئیں کردا اے تاں، ایہدا مطلب صرف ایہہ ہو سکدا اے پئی اوہناں دا ایما ن سارے کرن والے ارادیاں لئی مر گیا اے۔ جدوں تیک ایہہ جگ مک نئیں جاندا تے راستبازاں تے پاپیاں دے انصاف دا دیہاڑا نئیں آجاندا اوس ویلے تیک ساڈے ایمان نوں مکاؤن دےارادے ہوندے رہن گے ۔ ایسے لئی سانوں پکے طور اُتے رُوحانی لڑائیاں وچ حصہ لینا چاہی دا اے ۔ جے اسیں اوہناں لوکاں نوں جردے آں جیہڑے خُدا دے خلاف کھلوندے نیں تے اپنے ایمان نوں مکاؤن دی کوشش کردے آں تاں اسیں اپنیاں حیاتیاں سمیت ہر شے مکاؤندے ہویاں مک جاواں گے ۔ پکے ارادے نال اپنے ایمان توں ہٹ کے کسے ہو ر شے نوں اجازت نہ دیوو پئی اوہ تہاڈے اُتے حکم چلاوے ، اسیں نہ صرف اپنے پیسے دھیلے نوں گوا دیواں گے ، سگوں خُدا وی سانوں ردّ کردیوے گا ۔ سانوں خاص کر کے ایہہ جانن دے لائق ہونا چاہی دا اے پئی ساڈےنال کیہڑا کھلوتا اے تے کیہڑا ساڈے خلاف کھلوتا اے تاں پئی اسیں اپنے ویریاں نال لڑیے تے اوہناں اُتے فتح پا سکیے ۔ جد پئی سانوں اک دوجے نال کُھلے دل نال رہنا چاہی دا اے ، سانوں اپنے ویریاں دے خلاف اپنے ارادے اُتے قائم رہنا چاہی دا اے—ایس گل اُتے جتھے ساڈے ویری ایتھوں تیک پئی سانوں کجھ کرن دی ہمت وی نئیں کر سکدے ۔
نِیکُلیوں ساڈے لئی ویری نیں ۔ اوہ ساڈے ویری نیں ایس لئی پئی اوہ اک ”شیطان دی ٹولی“نیں جنہاں نوں اسیں نہ تاں جر سکدے آں تے نہ ای اوہناں ورگے کم کر سکدے آں ۔اسیں جیہڑے اپنے پاپاں توں معاف ہو گئے آں سانوں نِیکُلیوں نوں جرنا نئیں چاہی دا جیہڑے بتاں دی بھگتی وچ لگے ہوئے نیں تے صرف جگ دے فائدے لین دی تانگ وچ نیں، پر سانوں ایہدی تھاں اُتے خُداوند دی سیوا تے ایس دھرتی اُتے خُدا دی بادشاہی بناؤن دے ایس راستبازکم لئی اپنی حیاتی دے دینی چاہی دی اے ۔
 
 
پہلوں خُدا دی بادشاہی نوں لبھو
 
یسوع نے سانوں دسیا پئی ” پر تُسی پہلاں اوہدی بادشاہی تے سچیائی نُوں لَبّھو، “سانوں اپنے بدنی کماں توں پہلوں خُدا دے کم کرن دی نصیحت کردا اے ۔ اسیں جیہڑے نویں سریوں جمے آں روحانی آساں رکھدے آں ۔ ایہہ بدنی آساں نئیں ہیگیاں سگوں روحانی آساں نیں ۔ ایس طرحا ں اسیں پہلوں خُدا دے کم تے اوہدی بادشاہی دی سیوا کر سکدے آں ۔ اسیں پہلوں خُدا سیوا کردے آں ، پر اسیں بدنی کم وی کردے آں ۔ جویں پئی بائبل سانوں دسدی اے ، ”بندہ نِری روٹی نال ای جِیوندا نئیں رہے گا پر ہر اِک گلّ نال جیہڑی خُدا دے مُنھوں نِکل دی اے۔ “ اسیں دوجے اکھراں وچ ، صرف اپنے بدن دے راہیں نئیں ، سگوں بدن تے رُوح دونواں دے راہیں جیوندے آں ۔ سانوں ایہناں دونواں وچکار برابری قائم کرن دے لائق ہونا چاہی دا اے ۔ جے اسیں نیِکُلیوں دے کماں پچھے چلدیاں ہویاں ایہہ سوچدے آں پئی ایس دھرتی اُتے ای ساڈی ہر خوشی دے معاملے نیں تاں ، اسیں اپنی بربادی نوں سہندے ہویاں مُک جاواں گے ۔ ایہو ای سبب ہیگا اے پئی سانوں پہلوں اپنیاں رُوحانی آساں نوں لبھنا پوے گا ۔
جدوں وی بہشت تے دوزخ دی گل ہوندی اے تا ں کجھ لوک باغی بن جاندے نیں ۔ اوہ پچھدے نیں ، ”کیہ تُسیں دوزخ وچ گئے او ؟کیہ تُسیں اپنیاں اکھیاں نال ویکھیا اے؟ “پر ایہہ سوال شیطانی خیالاں وچوں آؤندے نیں ۔ نہ صرف عام لوک ایہو جیہے نیں ، سگوں ایتھوں تیک پئی بوہتے پادری جنہاں نیں کئی ورہے خُدائی تعلیم سکھدے ہویاں بسر کیتے نیں اوہناں دیاں بھیڈاں نویں سریوں جمن دی تعلیم تے بہشت وچ جان دے بھروسے توں اڈ نیں ۔ایہہ بوہت بے نصیبی تے دکھی گل اے ، ایہو جیہے خادماں لئی جیہڑے ایہہ پکا یقین نئیں رکھدے تے ایتھوں تیک پئی نویں سریوں جم دے وی نئیں اوہ کدی وی اوہناں لوکاں دی اگوائی نئیں کر سکدے جیہڑے نویں سریوں جمن لئی خُدا دے بارے وچ کجھ نئیں جان دے ۔ جدوں بوہت سارے لوک شیطان دے خیالاں تیک ای رہ جاندے نیں تے خُدا دے خلاف کھلوندے نیں تاں ، اوہ ایہناں پادریاں کولوں سدھے طریقے نال کیہ سکھ سکدے نیں جیہڑے نہ تاں بہشت اُتے ایمان رکھدے نیں تے نہ ای اپنی مکتی نوں من دے نیں ؟
” جِتّھے شیطان رہندا اے،“ایہدا مطلب ہیگا اے پئی ہُن شیطان سارے جگ اُتے راج کردا اے ۔ ایہہ اوہ ویلا جیہدے وچ اسیں رہندے آں ، اوس طرحاں دا ویلا جدوں جگ نیِکُلیوں نال بھریا ہویا اے جیہڑے رات دے اسماناں نوں اپنیاں چمکدیاں ہوئیاں صلیباں نال چمکاؤندے نیں تے اپنے گرجیاں نوں چلاؤندے نیں جویں اوہ کوئی کاروبار چلاؤندے پئے نیں ۔ خُدا نے سانوں دسیا اے پئی ایہہ اوہدیاں کلیسیاواں نئیں ہیگیاں ، سگوں ” شیطان دی جماعت“ نیں ۔ اج دا جگ ہُن ایہناں بوہت چوکھیاں لوکاں نال بھریا ہویا اے ، جیہڑے شیطان دے خیالاں وچ پھسے ہوئے نیں تے ایس جگ دا لالچ لبھدے پئے نیں ، خادم ہون دا فریب کردے نیں، کلیسیاوچ آؤندے نیں ، تے خُداوند دا نام پکاردے نیں ؛ پر ، اوہناں دیاں روحاں دا دوبارہ جمنا تے اوہناں دی بہشت دی آس بوہت پہلوں مُک گئی اے ۔ ایہہ اوہ زمانہ اے جیہدے وچ ہُن اسیں رہندے آں تے خُداوند دی سیوا کردے آں ۔
 
 

جیہڑے نویں سریوں نئیں جمے اوہناں دے خلاف روحانی لڑائی

 
اسیں ایتھے ایس دھرتی اُتے رہندے پئے آں ، جتھے” جِتّھے شیطان رہندا اے،“ جدوں سانوں للکاریا جاندااے تاں سانوں احتیاط کر کے اپنے ایمان دی راکھی کرنی چاہی دی اے تے دلیری نال اپنے ویریاں نال لڑنا چاہی دا اے ۔ ساڈے خُداوند دی واپسی دے دیہاڑے تیک ، سانوں احتیاط نال اپنے ”چٹے پتھر“—اپنے ایمان ، مطلب اے — ایس خوشخبری اُتے ایمان رکھدے ہویاں جنہے سانوں ایہدے پانی تے لہو نال نویں سریوں جمن دے اجازت دتی ، ایہنوں جاری رکھنا تے ایہدی راکھی کرنی چاہی دی اے ۔
سانوں خُدا دا کلام ، مَن کھا کے جیوندے رہنا چاہی دا اے ۔ اِنج کرن لئی ، سانوں نِیکُلیوں دے کماں دے خلاف لڑنا تے ایہناں اُتے فتح پاؤنی ہووے گی ۔ سانوں ایہناں نوں ردّ کرنا چاہی دا اے ۔ سانوں اوہناں لوکاں کول نئیں جانا چاہی دا جیہڑے صرف مال تے جگ کولوں عزت لبھدے نیں ۔ بھاویں اسیں ایہناں دیاں کمیاں نوں جر تے معاف کر سکدے آں ، پر اسیں ایہناں لوکاں نال روٹی نئیں توڑ سکدے جیہڑے سچیائی دے خلاف نیں تے صرف مال دا لالچ رکھدے نیں ، ایس طرحاں دے لوکاں نال خُدا دے کم کرنا بے عزتی اے ۔
پانی تے رُوح دی خوشخبری اُتے ایمان رکھ کے جیہڑے نویں سریوں جمے نیں اوہناں دے نام کتھے لکھے گئے نیں؟ اوہ حیاتی دی کتاب وچ لکھےگئے نیں۔ فیر ، اوس چٹے پتھر اُتے اک نواں نام لکھن دا کیہ مطلب اے ؟ ایہدا مطلب ایہہ ہیگا اے پئی اسیں خُدا دے پُتر بن گئے آں ۔ ایہہ وی لکھیا اے پئی کوئی وی اوس نویں نام نوں نئیں جان دا ” اوہدے لین والے دے سِوا “ ایہدا مطلب ایہہ ہیگا اے پئی کوئی ہو ر نئیں سگوں اوہ جیہڑے پانی تے رُوح دی خوشخبری اُتے ایمان رکھ کے نویں سریوں جمے نیں یسوع دی مکتی نوں جان دے نیں ۔ پاپی نئیں جان دے پئی اوہ کویں راستباز بن سکدے نیں —مطلب اے ، صرف اوہو ای جنہاں نیں یسوع کولوں اپنے نویں نام پائے نیں جان دے نیں پئی کویں اوہناں دے پاپاں نوں مکا دتا گیا۔
سانوں نِیکُلیوں دے خلاف لڑنا چاہی دااے ؛ کسے ہور دے خلاف نئیں ، سگوں نِیکُلیوں دے خلاف ۔ عبارت دا خاص مطلب ایہہ ہیگا اے پئی سانوں لازمی نِیکُلیوں دے خلاف ہتھ پیر مارنے چاہی دےنیں تے اوہناں اُتے فتح پاؤنی چاہی دی اے جیہڑے ، بھاویں اوہ خُدا اُتے ایمان رکھدے نیں تے سچیائی دے کلام نوں جان دے نیں ، فیر وی خُدا دے کلام دی نافرمانی کردے تے مکردے نیں تے صرف پیسے دھیلے ، جگ دے فائدے ، مال ، تے اوہ اپنے آپ دی عزت کراؤنا چاؤہندے نیں ۔
سانوں اپنے خلاف وی کوشش کرنی پوے گی ۔ جے اسیں اپنے آپ نوں اُچیا ں کرن یاں گھمنڈ دے سبب خُدا دے پچھےنئیں چلد سکدے آں تاں ، سانوں ایہو جیہے دلاں نال لڑنا پوے گا ۔ تے سانوں ایہناں لوکاں دے خلاف وی رُوحانی کوشش وچ حصہ لینا چاہی دا اے اوہ جیہڑے یسوع اُتے نویں سریوں جمن توں اڈ ای ایمان رکھن دا دعویٰ کردے نیں۔
ایس سچیائی دے ہوندیاں ہویاں پئی اسیں اوہدے جلال دے اگے بوہت تھوڑے آں ، خُداوند نے سانوں اپنے پانی تے لہو نال بچایا اے ۔ سانوں لازمی ایس کلام اُتے ایمان رکھ کے اپنے ایمان دی راکھی کرنی چاہی دی اے تے خدا دے خادماں وانگر اپنیاں حیاتیاں بسر کرنیاں چاہی دیاں نیں ، ایس کامل مکتی لئی اوہدا شکراداکرو جیہڑی اوہنے سانوں دتی اے ۔ سانوں پہلوں خُدا دی بادشاہی تے اوہدی راستبازی لبھنی چاہی دی اے ۔ آؤ اسیں سارے اوہ لوک بنیے جیہڑے اخیر تیک ایمان وچ لڑدیا ں ہویاں فتح پاؤن ۔
 
 
اوہ جیہڑے فتح پاؤن گے اوہناں نوں مَن دتا جاوے گا
 
ایس جگ دی تاریخ وچ گواچن دا سب توں وڈا معاملہ چُکیاجانا اے جیہڑا ہون والا اے ۔ ایسے دے نال ، یسوع دے دوبارہ آؤن دا ایہو جیہا مسئلہ اے جیہڑا مسیح اُتے ایمان رکھن والے سارے لوکاں ولوں بوہت دل موہن دا سبب بن دا اے۔کجھ لوک سوچدے نیں ، ”بوہت سارے لوک گواچن گے جویں پئی پاک لوکاں دا چُکیاجانا ہووے گا ؛ایس لئی پئی حیاتی دے ہر شعبے نال تعلق رکھن والے بندے غائب ہوجان گے ، جہاز چلاون والیاں توں گڈی دے کنڈکٹراں توں ٹیکسی چلاؤن والے بندیاں تیک ، جگ ہر طرحاں دے حادثیاں تے مصیبتاں وچ پھس جاوے گا، طیارے اسمان توں ڈِگ کے فناہ ہون گے ، ریل گڈیاں پٹڑی اُتوں لہہ جان گئیاں تے سڑکاں ٹریفک حادثیاں نال بے چجیاں ہوجان گئیاں ۔“پُرانے ویلے دی اک کتاب جیہڑی چُکے جان (Rapture ) دے سرنانویں توں ، دیاں کہانیاں ایسے طرحاں دیاں سطراں ورگیاں نیں ،جیہڑی پُرانے ویلیاں وچ اک بوہت وکن والی کتاب ہوندی سی ۔ اوہناں لوکاں دا خیال سی پئی جدوں پاک لوکاں داچُکیا جانا ہووے گا تا ں پاک لوک پتلی ہوا وچ غائب ہوجان گے ۔ ایس طرحاں ، اوہناں نیں نہ صرف توبہ کیتی تے اپنے چُکے جان دے دیہاڑے لئی اپنے ایمان نوں پکا کیتا ، سگوں اوہناں وچوں کئیاں نیں تاں اپنے سکولاں تے نوکریاں وی چھڈ دتیاں ، جیہڑا بوہت ہساؤن والا کرشمہ اے ۔
بوہتا چِر نئیں ہویا ، اک فرقے نے جنہے دُکھ جرن توں پہلوں چُکے جان دے نظریےنوں منیاسی ایہدے لوکاں نیں اپنا پیسہ دھیلا گرجے دے حوالے کر دتا تے صرف چُکے جان دے دیہاڑے نوں اُڈیکیا جیہدی اوہناں دے آگوآں نیں پیشن گوئی کیتی سی ۔ لازمی طور اُتے ،جیہڑے دیہاڑے دی اوہناں نیں پیشین گوئی کیتی سی تے اوس دیہاڑے دی بوہت بےچینی نال ہر دوجے دیہاڑے دے مُکدیاں ہویاں اڈیک کیتی سی — ساری اُڈیک بے فائدہ سی ! ہر اوہ شے جیہدے اُتے اوہناں نیں پکے دل نال یقین کیتا تے جیہدی اُڈیک رکھی اوہ صرف جھوٹ ثابت ہویا ۔
پر اوہناں وچوں کجھ لوکاں نیں ۱۹۹۹ءوچ اک ہور دیہا ڑے نوں بے وس ہوندیاں ہویاں اوہناں دے چُکے جان دا دیہاڑا مقرر کیتا ، تے بوہت اُڈیکیا ۔ پر ، پہلوں وانگر ، ایہہ ثا بت ہویا پئی اوہ سارے جھوٹ دے راہیں دھوکہ کھا چُکے سن ۔ ایہناں دے آگو ، جیہڑے اپنی پوری نہ ہون والی پیشین گوئی ہتھوں شرمندے ہوئے ، اوہناں نیں فیصلہ کیتا پئی مسیح دے واپس آؤن دا ویلا فیر کدی نئیں مقرر کراں گے ۔ اسیں ایہناں واقعیاں وچ ویکھ سکدے آں پئی کویں دُکھ جرن توں پہلوں چُکے جان دیاں تعلیماں خُدا دے کلام مطابق نئیں سن۔
مُکاشفہ دی کتاب دی بوہت خاص گل یسوع دا دوبارہ آؤنا تے پاک لوکاں دا چُکے جانا اے ۔ سارے کھرے مسیحیاں لئی ، جدوں مسیح جگ وچ واپس آوے گا تے اپنے ایمانداراں نوں ہوا وچ چُکے گا ، ایہہ اوہناں دی سب توں وڈی آس تے اڈیک اے ۔ اصل وچ ، مسیحیاں لئی ایہہ جائز اے پئی اوہ اپنے ایمان وچ مسیح دے واپس آؤن دی بے چینی نال اڈیک رکھن ۔ جیہڑے سچ مُچ یسوع اُتے ایمان رکھدے نیں اوہناں نوں وڈی آس تے بے چینی نال یسوع دے دوبارہ واپس آؤن دی اڈیک رکھنی چاہی دی اے ۔
ایس طرحاں دا ایمان رکھنا جیہڑا خُداوند دے دوجی واری آؤن تے چُکے جان دی اڈیک رکھدا
اے اوس بندے توں چنگا اے جیہڑا بالکل ایہدی اڈیک نئیں کردا ۔ اخیری ویلیاں دے الہام دسن والے ٹھیک راہوں ہٹ کے ایہہ پئی کیہ ہیگا اے اوہ اپنے چُکے جان لئی اک خاص دیہاڑا تے ویلا مقرر کردے نیں ۔ اوہناں دے حساب کتاب دی نیہ وانگر ، اوہناں وچوں بوہتیاں لوکاں نیں ستر ہفتیاں دی پیشین گوئی دی غلط وضاحت کیتی جیہڑی دانی ایل ۹ باب وچ نظر آؤندی اے ، تے ایسے طرحاں زکریاہ ،تے اپنی پیشین گوئی دیاں تاریخاں تیک اپڑے ۔
پولوس نے ۱ تِھسلُنیکیوں ۴باب وچ آکھیا اے پئی جدوں مسیح ایس دھرتی اُتے آوے گا، پاک لوکاں نوں اوہدے نال ملن لئی ہوا وچ چُکیا جاوے گا ۔ ایس لئی ایہہ صرف جائز اے پئی جیہڑے یسوع اُتے سچے دلوں ایمان رکھدے نیں اوہ اپنے چُکے جان دے دیہاڑے نوں اڈیکن ۔پر چُکے جان دے اک خاص ویلے دا حساب کتاب لاؤنا تے ایہنوں مقرر کرنا کجھ بوہت ای غلط گل سی ، ایس لئی پئی ایہدے وچ اوہناں دا گھمنڈ نظر آؤندا سی جنہے خُدا دی دانائی نوں ردّ کیتا ۔ بندیاں دے بنائے ہوئے حساب دے فارمولیاں دے راہیں بائبل دیاں پیشین گوئیاں نوں حل کرن تے سمجھن دی کوشش کرنا بوہت وڈی غلطی سی ۔
ہُن ، فیر، اصل وچ چُکیاجانا کدوں ہووے گا ؟ مُکاشفہ ۶باب پاک لوکاں دے چُکے جان دی گل کردااے ؛ ایہدے مطابق ، خُدا دے ستاں زمانیاں دے چوتھے زمانے وچکار مطلب اے،پیلے گھوڑے دےزمانے— پاک لوکاں دی شہادت ہووے گی ، تے ایہدے بعدوں چُکیا جانا پنجویں زمانے وچ ہووے گا ۔ پاک لوکاں دے چُکے جان نوں کھول کے دسیا گیا اے ،تے ویلا آؤن اُتے لازمی طور اُتے ایہہ سچیائی بن جاوے گا۔
خُدا نے لوکاں لئی ستا ں زمانیاں دا ارادہ بنایا اے ، اوہناں وچوں پہلا چٹے گھوڑے دازمانہ اے ۔ ایہہ اوہ زمانہ اے جیہدے وچ پانی تے رُوح دی خوشخبری شروع ہوندی اے تے فتح پاؤندی رہندی اے ۔ دوجا زمانہ لال گھوڑے دا زمانہ اے ۔ ایہہ زمانہ شیطان دے زمانے دا شروع اے ۔ تیجا زمانہ کالے گھوڑے دا زمانہ اے ، جدوں جگ اُتےبدنی تے روحانی کال ہووے گا ۔چوتھا زمانہ پیلے گھوڑے دا زمانہ اے ۔ ایہہ اوہ زمانہ اے جیہدے وچ مخالف ِ مسیح نکلے گا تے پاک لوکاں نوں شہید کیتا جاوے گا ۔ پنجواں زمانہ اے جدوں پا ک لوکاں نوں اوہناں دی شہادت دے بعدوں جیوندے کیتا جاوے گا تے چُکیا جاوے گا ۔ چھیواں زمانہ پہلی مخلوق دی ڈاہڈی بربادی دا جھگڑالو اخیر اے —ایس جگ ، مطلب اے —خُداولوں ، ایہدے بعدوں ستواں زمانہ ہووے گا جیہدے وچ خُداہزار ورہیاں دی بادشاہی تے نویں اسمان تے دھرتی نوں اپنے پاک لوکاں دے رہن لئی ہمیش لئی کھو ل دیوے گا ۔ خُدا نے ایس طرحاں سارے لوکاں لئی ایناں ستاں زمانیاں نوں وکھ وکھ ترتیب دتی اے ۔ ایہہ صرف جائز اے پئی جیہڑے لوک یسوع اُتے ایمان رکھدے نیں اوہ ایہناں ستاں زمانیاں نوں جانن تے ایہناں اُتے ایمان رکھن جیہڑے خُدا نے اوہناں لئی تیار کیتے نیں ۔
صرف کوریا وچ ، اک اندازہ لایا گیا اے پئی پچھلی صدی دے اخیر وچ ، ۰۰۰‚۱۰۰توں بوہتے لوک اک پاسے کھلو گئے تے اپنے تیار کیتے گئے دیہاڑے تے ویلے مطابق مسیح دے دوجی واری آؤن تے اپنے چُکے جان دی اڈیک کرن لگے ۔ آکھیا جاندااے پئی لگ بھگ ۱۲ ملین کورین مسیحی نیں۔ اوہناں وچوں ، لگ بھگ ۰۰۰‚۱۰۰ یسوع دے واپس آؤن تے اوہناں دے چُکے جان دی اُڈیک رکھدے پئے سن ۔ دوجے اکھراں وچ دسدیاں ہویاں ، ایہہ اوہ ڈاہڈے ایماندار نیں جیہڑے خُدا دے کلام اُتے ایمان رکھدے نیں جویں پئی ایہہ لکھیا گیاسی تے خُداوند دی واپسی نوں اڈیکدے پئے سن ۔ ۱۲ ملین وچوں صرف ۰۰۰‚۱۰۰ مطلب اے ا فیصد توں وی گھٹ ۔
پر ،اوہناں دا مسئلہ ایہہ سی پئی خُدا نے اوہناں لئی جیہڑےزمانے تیار کیتے سن اوہناں دے بارے وچ اوہناں نوں ٹھیک سمجھ نئیں سی ۔ پانی تے رُوح دی خوشخبری نوں ٹھیک طریقے نال سمجھیوں اڈ ، کلیسیا دے پہلے مسیحیاں نیں مسیح دے دوبارہ آؤن تے پاک لوکاں دے چُکے جان دے ویلے دے غلط علم اُتے بنائی گئی مسیح دی واپسی دی تاریخ دا حساب لاؤن دی کوشش کرن وچ ایہہ غلطیاں کیتاں ۔ تاں پولُس نے اوہناں نوں خبردار کیتا ، ” پئی جے کِسے رُوح دی گلّ یا کوئی کلام یا اجیہا خط آوے۔ جیہڑا ساڈے خط وانگُوں دسے اوس توں ایہہ سمجھ کے پئی خُداوند دا دِن پُج گیا اے۔ تُسی دِلوں نا ڈولو تے نا تُسی گھابر جاؤ۔ “(۲ ۔ تھسلُنیکیوں ۲ : ۲)۔
پُرانی گل وانگر دسدے ہویاں ، بوہت سارےلوکاں نیں خُدا دے ارادے ولوں انجان ہون دا سلسلہ جاری رکھیا تے بیکار وچ اک دےبعدوں اک کر کے غلط تاریخاں مقرر کردے رہے ۔ میرا یقین اے پئی اوہناں دےغلط ایمان نوں ٹھیک کرن دی لوڑ اے۔ پر مینوں اوہناں نوں بوہت جھڑکن دا کوئی چاء نئیں —میَں صرف اوہناں نوں ٹھیک کرنا چاؤہندا ہاں ۔ کاہدے لئی ؟ ایس لئی پئی اوہناں دی ناکامی ایہناں ستاں زمانیاں توں انجان ہون دا سبب سی جیہڑے خُدا نے سارے لوکاں لئی تیارکیتے نیں ۔ اوہناں نیں یسوع دی دوبارہ آؤن دی تاریخ دا غلط حساب لایا ایس لئی پئی اوہ بائبل وچ ملن والے نمبراں نوں غلط سمجھے تے غلط ورتدں ہویاں ،اوہناں نوں صرف بندیاں وانگر سمجھدے نیں ۔
ایہہ غلطی کوریا دے مسیحی ای نئیں کردے ، سگوں سارے جگ وچ ایہہ مشہور ہوئی اے ۔ ایس دھرتی دے سارے وکھ وکھ حصیاں توں تعلق رکھن والے گرجیاں دے آگُو ، جنہاں وچوں کئی سگوں مشہور نیں ،اوہناں وی ایسے طرحاں دی غلطی کیتی ۔میرے دل دا چاء اے پئی اوہناں ساریاں لوکاں لئی خُدا دے ارادے دی گواہی دیواں جیہڑا ایس طرحاں یسوع اُتے ایمان رکھدے نیں تے اپنی مقرر کیتی ہوئی چُکے جان دی تاریخ نوں اڈیکدے نیں ، تاں پئی اوہ خُدا دے ارادے دی ٹھیک ، غلطی توں اڈ ، سمجھ رکھن۔ میَں ایہو ای آس رکھدا ہاں پئی اوہناں نوں وی ، اصل وچ خُداولوں چُکے جان دی نعمت ملے ۔
خُداولوں اصل چُکیاجانا پیلے گھوڑے دے ویلے دے مکن تے پا ک لوکاں دی شہید ہون دے بعدوں ہووے گا ۔ جدوں پیلے گھوڑے دے ایس زمانے وچ دُکھ جرن دے ستاں ورہیاں دا زمانہ شروع ہووے گا ، مخالفِ مسیح جگ دے بوہت تگڑے آگو ُ وانگر نکلے گا تے ایہدے اُتے راج کرے گا۔
جدوں وڈے دکھ جرنا شروع ہوے گا مخالفِ مسیح پاک لوکاں نوں دکھ دینا شروع کردیوے گا ، وڈے دکھ جرن دے پہلے ادھ حصے وچ بوہتی تیزی آوے گی —مطلب اے ، پہلے ساڈھے تِن ورہے —ست ورہیاں دے زمانےدے ادھ وچ بوہت چوکھےودھن گے۔ ایس ویلے پاک لوک ایمان دی راکھی لئی شہیدہون گے ۔ تے ایہدے بعدوں چھیتی نال چھیویں زمانہ شروع ہووے گا ، جدوں شہید پاک لوکاں نوں جوایا جاوے گا تے اوہناں نوں چُکیاجاوے گا ۔
جیہڑے لوک یسوع اُتے ایمان رکھدے نیں اوہناں نوں زمانیاں نوں چنگی طرحاں جاننا چاہی دا اے ۔ ایس اُتے بھروسہ کردیاں ہویاں پئی کیہ اوہ دکھ جرن توں پہلوں چُکے جان اُتے ایمان رکھدے نیں یاں دکھ جرن دےویلے وچکار چُکے جان اُتے ، اوہناں دیاں ایمان والیاں حیاتیاں نوں بالکل وکھرے طریقے وکھا وے گا ۔ کیہ ایماندار سیانف نال جائز ایمان نال اپنے چُکے جان دی اڈیک رکھن گے ۔ یاں اپنے دلاں نوں اپنی پسند دی اک شغلی تاریخ اُتے لاؤن دی غلطی کرن گے — ایہہ سارا ایس گل نا ل ہوے گا پئی کیہ اوہ خُدا دے کلام اتے اپنے ایمان د ی نیہ رکھدے نیں یاں نئیں ۔
جے تُسیں مُکاشفہ دے کلا م دیاں ایہناں تعلیماں نوں سکون نال سمجھدے او تاں ، تُسیں اصل وچ جان سکدا اے پئی جائز فیصلے کیہ نیں ، تے ایس طرحاں تُسیں اپنے سارے سوالاں نوں ٹھیک طریقے نال حل کرن دے لائق ہووو گے ۔ پر جے تہانوں چُکے جان دے بارے وچ ٹھیک سمجھ نئیں ہیگی تے ایہدی ٹھیک طریقے نال اڈیک رکھن وچ ناکام رہندے او ، تاں تہاڈا ایمان فناہ ہوجاوے گا ۔
دُکھ جرن توں پہلوں چُکے جان دے نظریے دی وضاحت سکوفیلڈ ، اک امریکی دینی فلاسفر نے کیتی ، جیہڑا اپنی سکوفیلڈ ریفرنس بائبل وچ ترتیب نال اپنے خیال دی گل نوں قائم کرن والا پہلا بندہ سی ۔ ایس بائبل ریفرنس داسارے جگ وچ بوہت چوکھا ترجمہ ہویاتے ایہنوں ورتیا گیا ۔ سکوفیلڈ دے بائبل ریفرنس دے اثر اں دے سبب ای دُکھ جرن توں پہلوں چکے جان دا نظریہ بوہت چوکھے طریقے نال ودھ گیا ۔ ایس لئی پئی سکوفیلڈ ریفرنس بائبل نوں اک تگڑے ملک دے اک وڈے دینی فلاسفر نے لکھیا سی ، ایس لئی ایس کتاب دا بوہتی وار وکھ وکھ بولیاں وچ ترجمہ ہویا تے بوہت سارے مسیحیاں نیں ایہنوں پڑھیا۔
سکوفیلڈ نوں آپ وی پتہ نئیں سی پئی اوہدا دُکھ جرن توں پہلوں چُکے جان دا دعویٰ سارے جگ وچ کھلرجاوے گا ۔ ایہدا نتیجہ عملی طور اُتے جگ دے سارے مسیحیاں دے راہیں دکھ جرن توں پہلوں چُکے جان دے خیال نوں بوہتا مننا سی ۔ پر سکوفیلڈ دے دکھ جرن توں پہلوں چُکے جان دے نظریےدے ظاہر ہون توں پہلوں ، مسیحی لوکاں وچ جیہڑا عقیدہ ودھیا سی اوہ دکھ جرن دے بعدوں چُکے جان دا نظریہ سی ۔
دُکھ جرن دے بعدوں چُکے جان دے نظریےدا مننا اے پئی مسیح وڈے دُکھ جرن دے ستاں ورہیاں دےویلے دے مکن دے بعدوں واپس آوے گا ، تے ایہہ پئی اوس ویلے پا ک لوکاں دا چُکیا جاناہووے گا ۔ ایس طرحاں بوہت سارے لوک چُکےجان توں پہلوں دُکھ جرن تے خُداوند دے دوبارہ آؤن توں بوہت ڈردے سن ۔ جدوں مناداں نیں اپنے سٹیج اُتوں مسیح دی دوبارہ آؤن بارے منادی کیتی تاں ، لوک توبہ ول بھجے، اپنے پاپاں اُتے روندےتےدکھ جردے ہویاں، توبہ دیاں پکیاں دعاواں نال اپنے آپ نوں فنا ہ کر لیا۔ ایس لئی کیہڑا سب توں بوہتا روندااے ایس نوں مِنن دے ہتھیار وانگر ورتیا جانداسی پئی کیہڑا سب توں بوہتا برکت والا اے ۔ایہو جیہے لوک ، بھاویں اوہ یسوع اُتے ایمان رکھدے سن ، بوہتے ہنجو وگاؤندے نیں۔
پر دُکھ جرن دے بعدوں چُکے جان دے ایس عقید ے نوں ہولی ہولی دکھ جرن توں پہلوں چُکے جان وچ بدلیا گیا ۔ ایہہ کیوں معاملہ سی ؟ لوکاں نوں دکھ جرن دے بعد وں چُکے جان نوں دکھ جرن توں پہلوں چُکے جان وچ بدلن نال بوہت سکوں ملیا ، ایس لئی پئی ایس بدلن دا مطلب سی پئی اوہناں نوں اوہ ساریاں ازمائشاں تے دکھاں نوں جرنا نئیں پوے گا دوجے طریقے نال اوہناں نوں اوہ جرنے پیندے ۔ ایہہ حیرانی والی گل ہیگی اے پئی اوہ اوہناں اُتے وڈے دکھ جرن دے ڈراؤنیاں دکھاں دے آؤن توں پہلوں ای اوہناں دے ہوا وچ چُکے جان نوں چنگیاں سمجھدے نیں۔ ایس طرحاں ، دکھ جرن توں پہلوں چُکے جان دا نظریہ جھاڑی دی اگ وانگر کھلر گیا ، ایس لئی پئی ایہنے اک سکون بھریا ایمان پیش کیتا، ایہہ وڈے دکھاں دے جرن دیاں مصیبتاں وچوں لنگھن دے ڈراؤنے خیال توں بوہت چوکھا ہضم کرن دے لائق سی ۔
جویں لوک سادہ یاں کوڑے نالوں میٹھے نوں ودھیا سمجھدے نیں ، ایسے طرحاں جدوں اوہناں دے ایمان دے گل ہوندی اے تاں لوک سوکھے کم نوں چنگیاں سمجھدے نیں ۔ اوہ دینی استاداں دے بنائے ہوئے وکھ وکھ طریقیاں وچوں جیہڑے اوہناں نوں سوادی لگدا نیں، اوہنوں چُننا تے اوہدے اُتے ایمان رکھنا پسندے کردے نیں۔ ایس طرحاں بوہت سارے لوک دُکھ جرن توں پہلوں چُکے جان دے نظریے اُتے بوہت سوکھا ایمان رکھدے ہویاں مک گئے ۔ دکھ جرن توں پہلوں چُکے جان دے ایس نظریےنوں چنگیاں سمجھن والیاں نیں سوچیا پئی اوہناں نوں چُکے جان لئی اپنے بدناں تے دلاں نوں بے پاپ رکھنا پوے گا۔ تے ایس طرحاں اوہ اپنے ایمان دی حیاتی وچ بوہت جوشیلے سن ۔ پر اک وڈی غلط سوچ نے دکھ جرن توں پہلوں چُکے جان نوں اوہناں دے ایمان نال ملا دتا ۔ جد پئی یسوع اُتے اوہناں دا ایمان تے خُداوند دے واپس پرتن بارے اوہناں دی اڈیک سارے تعریف کرن دے لائق سن ، ایہدے ہوندیاں ہویا ں اوہناں نیں دو خاص تے وڈیاں غلطیا ں کیتیاں ۔
پہلی پانی تے رُوح دی خوشخبری اُتے ایمان نئیں رکھیا ، اوہ خُداوند نوں اڈیکدے رہے جدپئی اوہ حالے تیکر اپنے دلاں وچ پاپ رکھدے سن ۔ اوہ صرف سولی والے لہو د ی گل کردے سن تے ایہدے اُتے بھروسہ رکھدے سن ، پر توبہ دا کوئی وی گھاٹا یاں وادا اوہناں تیکر اوہناں دے پاپاں دی کامل معافی نئیں لیا سکدا سی جیہڑی اوہ ہردیہاڑے لگاتار کردے نیں ۔ فیر وی دنے راتی ، اوہ مسیح دے دوجی وار آؤن دی اڈیک کردے رہے ۔ اوہ اپنے گرجیاں وچ اپنے پاپاں دی توبہ لئی رَل کے اکٹھے ہوئے ، ساری رات دعاواں کرن تے گیت گاؤن لئی اپنے چُکے جان دی اڈیک کردے ہویاں اکٹھے ہوئے ۔ ایس سچیائی وچ کوئی گھاٹا نئیں سی پئی اوہ ایس طرحاں اپنے چُکے جان دی اڈیک کردے رہن۔ پراوہناں نیں سچےایمان توں ہٹ کے اڈیکن دی وڈی غلطی کیتی—مطلب ،اوہ پانی تے رُوح دی خوشخبری اُتے ایمان نئیں رکھدے ، اوہ خاص ایمان جیہڑا سانوں خُدا دے اگے اوہدے پُتراں وانگر کھلون دی اجازت دیندااے ۔
 دوجی غلطی ایہہ سی پئی اوہناں وچوں کئی خُدا دے ارادے دی کسے جائز سمجھ توں اڈ یسوع دے دوبارہ آؤن دی تاریخ دا بے ترتیب اعلان کردے سن ۔ ایہنے نہ صرف بوہتیاں ایمانداراں نوں خُداوند بارے بے فائدہ اڈیک کروائی ، سگوں ایہنے معاشرے وچ ہر طرح دی بربادی پیدا کیتی ۔ جنہے مسیحیت اُتے صرف غلط اثر چھڈے تے غیر ایمان والیاں وچ ایہدے بھروسے نوں خراب کر دتا ۔
ایہناں دوغلطیاں دے سبب ، جدوں چُکیا جاناجیہدی ایہہ لوک بوہت چوکھی اڈیک کردے پئے سن اصل وچ کدی نہ ہویا، تاں ایہنے صرف بوہتیاں لوکاں نوں چُکے جان دے بارے وچ بھیڑا سوچن لئی مجبور کیتا ، تے اوہناں نوں سچیائی توں وی وکھ رکھیا ۔ ہُن جدوں مسیح دےدوبارہ آؤن دی گل کرن داٹھیک ویلا اے تے جدوں اوہدا پرت آؤنا نیڑے آؤندا پیا اے تاں ، خورے ای کوئی ایہدے بارے وچ گل کردااے—ساری مہربانی تھوڑے جیہے بھٹکاؤن والے لوکاں دی شرم بھری ناکامی ا ے ۔ ایہہ عبارت جیہدے اُتے اسیں ایس ویلے گل بات کردے پئے آں ایہہ ہیگی اے جیہڑا خُدا نے پرگمن دی کلیسیا دے فرشتے نوں یوحنا کولوں لکھوایا۔ خُدا نے کلیسیا دے خادم تے پا ک لوکاں دی اوہناں دی شہادت نال اخیر تیک اپنے ایمان دی راکھی کرن بارے تعریف کیتی ۔ پر خُدا ولوں پرگمن دی کلیسیا دی تعریف وی کجھ جھڑکاں نال ہوئی ، ایس لئی پئی کلیسیا دے لوکاں وچ ایہو جیہے لوک وی سن جیہڑے جگ وانگر چلد ے سن ۔ ایہو ای سبب ہیگا اے پئی خُدا نے کلیسیا نوں توبہ کرن لئی آکھیا ،تے اوہنے ایس لئی آکھیا پئی اوہ دوجی صورت وچ چھیتی آ کے ایہنوں سزا دیوے گا ۔
سانوں ایتھے ایس گل اُتے دھیان کرن دی لوڑ ہیگی اے پئی خُدا نے یوحنا دے راہیں آسیہ دیاں ساریاں ستاں کلیسیاواں نوں اکٹھے طریقے نال جیہڑا کجھ آکھیا سی : ”جِہدے کنّ ہَین اوہ سُن لَئے پئی رُوح کلِیسیاواں نُوں کِیہ آکھدا اے۔ “ایہدا مطلب ایہہ ہیگا اے پئی خُدا ایس گل نوں خاص بناؤندااے پئی اوہ اپنی کلیسیاواں تے اپنے خادماں دے راہیں پاک لوکاں تےسارے لوکاں نال سچ بولدااے ۔ خاص کر کے ، خُدا نے پرگمن دی کلیسیانوں دسیا : ” جِہدے کنّ ہَین اوہ سُن لَئے پئی رُوح کلِیسیاواں نُوں کِیہ آکھدا اے۔ جیہڑا جتے مَیں اوہنوں لُکے ہوئے مَن وِچوں دیاں گا۔ تے اِک چِٹّا پتّھر دیاں گا اوس پتّھر اُتّے اِک نواں ناں لِکھیا ہویا ہوئے گا جِہنُوں اوہدے لین والے دے سِوا کوئی نا جانے گا۔ “
میَنوں ایس جملے بارے بولن دیوو، ” جیہڑا جتے مَیں اوہنوں لُکے ہوئے مَن وِچوں دیاں گا۔ “ایہدا مطلب ہیگا اے پئی جیہڑے لوک سچ مُچ خُداوند نوں اڈیکدے نیں اوہناں نوں خُدا دے ویریاں اُتے فتح پاؤنی چاہی دی اے۔ ایہدا مطلب ہیگا اے پئی اوہناں نوں جگ پچھے چلن والیاں دے خلاف لڑنا چاہی دا اے ،تے اوہناں نوں جگ نال ایہناں محبت کرن والیاں کولوں اپنے آپ نوں وکھ کرنا چاہی دااے ۔ بلعام پچھے چلن والے اوہ ای نیں جیہڑے جھوٹیاں پچھے چلدے نیں ۔ خُدا سانوں دسدااے پئی ایہہ لوک صرف پاپ بھرے لالچ وچ جگ دا مال لبھدے نیں، ایہہ اوہناں نوں بلعام دے عقیدے پچھے چلن والے بناؤندااے ۔
ہر کلیسیا خُدا دی کلیسیا نئیں ہیگی ۔ اج دی کلیسیا دے بوہتے آگُو ایہہ من دے نیں پئی یسوع خُدا دا پُتر اے ، پر اوہ ایہہ نئیں من دے پئی اوہ خُدا اے ۔ بوہت سارےایہو جیہے وی نیں جیہڑے ایہہ وی نئیں من دے پئی یسوع مسیح نے ایس جگ نوں بنایا اے ۔
ایس توں ہٹ کے ، بوہت سارے لوک کلیسیا وچ آؤندے نیں تاں پئی اوہناں نوں پیسے دھیلے دی برکت مل سکے ۔ کلیسیا دے بوہت سارے آگُو اپنے لوکاں نوں آکھدے نیں پئی جے اوہ کلیسیا نوں بوہتے بوہتے پیسے دیندے نیں تاں اوہ برکت پاؤن گے ۔ ایہو جیہاں غلط تعلیماں نال بھٹکن دے بعدوں ، بوہت سارے ایمانداراصل وچ ایہہ سوچدے نیں پئی اوہناں نیں کلیسیا نوں کناں چندہ دتا اے ، ایہہ اوہناں داایمان وکھاؤندااے ۔صرف چندے دین تے کلیسیا وچ باقاعدگی نال آؤن نال ، ایہناں وچوں بوہتیاں لوکاں نوں وفادار ایمانداراں وانگر پسند کیتا جاندااے ۔ تے ہور،ایہناں وچوں کئیاں نوں تاں صرف کلیسیا وچ باقاعدگی نال آؤن تے سیوا کرن اُتے ، تے ایہناں دے چندیاں دی بوہت چوکھی جانچ پڑتال کرن لئی ، کلیسیا وچ آگُوآں دے عہدے جویں پئی ڈیکن یاں ایلڈر دارُتبہ دتا جاندا اے ۔ ایہہ سارے بلعام دے طریقے نیں ، ایہو جیہی شے جیہدے توں سانوں ساریاں نوں وکھ ہوجانا چاہی دااے ۔
سانوں لازمی طور اُتےایہو جیہے عقیدے دے خلاف لڑنا چاہی دا اے ۔ جے تُسیں سچ مُچ لُکے ہوئے مَن نال ودھنا پھُلنا چاؤہندے او تاں ، تہانوں پہلوں ایہہ پتہ ہونا چاہی دا اے پئی کیہ تہاڈی کلیسیا اک ایہو جیہی کلیسیا اےیاں نئیں جیہڑی اصل وچ خُدا دے کلام پچھے چلدی اے ۔ جے اِنج نئیں ہیگا تاں، فیر تہانوں لڑنا چاہی دااے تے ایہدے اُتے فتح پاؤنی چاہی دی اے ۔ صرف اِنج کر کے ای تُسیں پانی تے رُوح دی سچیائی ، خُدا دے کھرے کلام توں ودھ پُھل سکدے او ۔
صرف پانی تے رُوح دے کلام ، لُکے ہوئے مَن وچوں کھا کے ، تُسیں نویں سریوں جم سکدے او ، تے صرف نویں سریوں جم کے ای تُسیں خُدا ولوں دتے گئے سچیائی دے کلا م راہیں ودھدے پھلدے رہ سکدے نیں ۔ ایہہ ایسے طرح ہیگا اے پئی نویں سریوں جمن والا ایہدے بارے گل بات کر سکدا اے پئی خُدا دا کلام کیہ اے ، ایہنوں سُن کے ، ویکھ کے تے ایہنوں لوکاں نوں دس کے ودھ پُھل سکدااے ۔
جےتُسیں سچے دلوں خُدا ولوں چُکے جان دی آس رکھدے او ، جے تُسیں اصل وچ سچ مُچ نویں سریوں جمنا چاؤہندے او ،تاں فیر ایہو جیہی کلیسیا وچ جاندے رہنا صرف عقل دے گھاٹے دی گل اے جیہڑی صرف اک نام دی کلیسیا اے ۔ کسے کلیسیاوچ جا کے جیہڑی خُدا ولوں نئیں ہیگی اے ، تُسیں کدی وی حیاتی دے سچیائی دے کلام نا ل ودھن پھلن دے لائق نئیں ہوسکو گے ، سارا بے فائدہ اے پئی تُسیں او س کلیسیا وچ کنے چِر توں جاندے پئے او — مطلب اے اک سو ورہے ، اک ہزار ورہے یاں ایہدے توں وی بوہتا ، کجھ وی تہانوں تہاڈی مکتی ول ٹھیک راہ اُتے نئیں پاوے گا۔
ایہو جیہے لوک نہ تاں صرف ایمان نال نویں سریوں جم سکدے نیں ، سگوں اوہ ایہدی پہلی شرط نوں پورا کیتیوں اڈ ای اپنے چُکے جان دی اڈیک رکھ کے عقل دے گھاٹے دی غلطی کردیاں ہویاں مُک جاندے نیں ۔ ایس طرحاں دا عقید ہ صرف غلط اے ۔ ایہدے توں کوئی فرق نئیں پیندا پئی تُسیں مسیح دے پر ت آؤن دی اڈیک کنی بے چینی نال کردے او ، بھاویں تُسیں سچ مُچ اپنے دل وچ خُداوند نال پیا رکرو ، بھاویں تُسیں یسوع لئی اپنی جان دین لئی راضی ہووو ، ایہہ سارا بے فائدہ ہووے گا ۔ ایہو جیہے لوک خُداوند نوں نئیں پا سکن گے ۔ خُدا نال ایہناں دی محبت اک بے سبب محبت وانگر مُک جاوے گی ۔
ایس لئی خُدا نے آسیہ دی ستاں کلیسیاواں نوں آکھیا : ” جیہڑا جتے مَیں اوہنوں لُکے ہوئے مَن وِچوں دیاں گا۔ “خُدا سانوں ایہہ نئیں دسدا پئی اسیں بغیر کسے کوشش دے ایس سچیائی دے کلام نوں پا سکدے آں ۔ جے اسیں جھوٹیاں دے خلاف جنگ نئیں کردے تے اوہناں اُتے فتح نئیں پاؤندے تاں ، اسیں کدی وی اوہدا مَن ، حیاتی دا کلام نئیں کھا سکاں گے۔
ایہدے نال کوئی فرق نئیں پیندا پئی تُسیں اپنی کلیسیا وچ کنی ایمانداری نال گئے ہووگے ۔ جے تہانوں سچیائی دا پتہ نئیں ہیگا اے تاں ، ایہدا مطلب ہیگا اے پئی تہانوں حالے تیک جناں پتہ اے اوہ سارا جھوٹ سی ۔ تہانوں سچیائی نوں لبھن لئی ایہناں جھوٹیاں نال لڑن تے ایہناں اُتے فتح پاکے ایہناں جھوٹیاں کولوں بچنا چاہی دا اے ۔ ایہو جیہی کلیسیا نوں لبھن دےراہیں جیہڑی خُدا دے کلام دی گواہی دیندی ہووےتے پانی تے رُوح دی خوشخبری دی منادی کرے صرف اوس ویلےتُسیں اوس سچیائی نوں جانو گے تے رُوح تہانوں حیاتی دا مَن کھان دے لائق کرے گا ۔
ساڈے کول کجھ نئیں جیہڑا سانوں اپنے دلاں وچ پانی تے رُوح دا سچیائی دا کلام قبول کرن توں روکدا اے ۔ پانی تے روح دے ایس کلا م دی منادی کرن والیاں تے سُنن والیاں دے دل اک ہو جاندے نیں ، تے پاک رُوح اوہناں دے دلاں وچ اکو جیہا رہندااے ۔
خُدا نے ساڈے نال وعدہ کیتا اے پئی اوہ فتح پاؤن والیاں نوں اپنا لُکیا ہویا من دیوے گا ؛ ایسے طرحاں ، سانوں شیطان دے خلاف اپنی کوشش وچ فتح پاؤنی چاہی دی اے ، تے جھوٹیاں نال لڑنا تے جتناچاہی دا اے ۔ جے تُسیں ہمیش دی حیاتی چاؤہندے او تاں ، تہانوں اصل وچ نویں سریوں جمنا چاہی دا اے ؛ تے جے تُسیں خُداولوں چُکے جانا چاؤہندے او تاں ، تہانوں ٹھیک ایمان رکھنا چاہی دا اے ۔ تہانوں ایس جگ دے بوہت ساریاں جھوٹیاں دے نال نال مسیحی لوکاں وچ موجود جھوٹیاں دے خلاف وی کوشش کرنی تے ایہناں اُتے فتح پاؤنی چاہی دی اے ۔
تہاڈا عقیدہ دودِلا عقیدہ نئیں ہونا چاہی دا، اوہ جیہڑا اک پاسیوں دوجے پاسے ڈکوڈولے کھاندااے تے ویلے مطابق جیہڑی وی موجودہ حالت ہوندی اے اپنے آپ نوں اوہدے وچ سما لیندا اے ۔ جے تہاڈی کلیسیا اوہو جیہی کلیسیا نئیں ہیگی جیہڑی خُدا دے کلام دی جویں پئی ایہہ ہیگا اے منادی کردی اے ، تاں تہانوں ایہو جیہی کلیسیا وچ جانا چھڈ دینا چاہی دا اے ۔ صرف ایہناں لوکاں نوں جنہاں دے دل سچیائی نوں پسندکردے نیں تے سچیائی پچھے چلدے نیں خُدا اوہناں نوں اپنے مَن دے کلام ، پانی تے رُوح دے سچیائی دے کلام دے راہیں ملن لئی آوے گا ۔
جدوں میَں بائبل سکول وچ پڑھدا ساں تاں میَں بوہت چنگا طالب ِ علم ساں ۔ میَں کدی اک جماعت وی نئیں چھڈی ،تے میرے گریڈ چنگے سن۔ میَں دل لا کے تے ایمانداری نال تعلیم سکھی ۔ تے فیر وی بوہتیاں شیواں سن جنہاں دا مینوں پتہ نئیں سی ۔ ایس لئی پئی میَں یسوع نال ملن تے اوہدے اُتے ایمان رکھن توں پہلوں اپنے سارے خنوادے نال ، اک بُدھ مَت دامنن والا ساں ، اوس ویلے خُداوند دے بارے وچ میری تعلیم بوہت ای تھوڑی سی ۔ میری کلام دے بارے وچ سمجھ ایس توں وی بوہت گھٹ سی ، تے ایس لئی میَں بائبل دے بارے وچ جانن لئی بوہت بے سکون ساں ۔ خُدا دے کلام نوں سکھن دی تریہہ دے سبب ، میَں بائبل سکول وچ بوہتیاں پروفیسراں کولوں سکھن دی کوشش کیتی ،اوہناں کولوں بوہت سارے سوال پچھے تے آس رکھی پئی اوہناں دے جواباں نال بائبل دی میری تریہہ مُک جاوے گی ۔
پر، ایہناں وچوں کسے نے وی ، کدی مینوں ٹھیک جواب نئیں دتا ۔جدوں میَں اپنے سوال ایہناں پروفیسراں کول لیایاجنہاں نوں اوہناں دی بائبل دی تعلیم دے سبب پسند کیتا جاندا سی ، تاں اوہناں نیں میرے سوالاں دے جواب دین دی بجا میری بائبل دے علم دے سبب تعریف کیتی ۔ بائبل سکولاں وچ ، پروفیسر کلام دی منادی نئیں کردے ،سگوں اوہ بائبل اُتے اپنے ای ” نظریے“پڑھاؤندے نیں۔ پر اوہناں دے سارے نظریے ، پُرانے عہد نامے دے خُدائی خیالاں توں لے کے نویں عہد نامے دےخُدائی خیالاں تیک ،خُدائی تعلیم دیاں اصولاں توں لَے کے مسیحیت دی تاریخ تیک ، کیلونزم توں لَے کے آرمینو سیت تیک ، کرسٹو لوجی توں لَے کے روحاں دی تعلیم تیک تے تعارفی پڑھائیاں توں لَے کے کھل کے گل بات تیک ، بندیاں دے دلی خیال ای نیں ۔ اوہ صرف دینی استاداں دے چُنے ہوئے وکھ وکھ نظریے پڑھاؤندے نیں ، جیہڑے تہاڈے اپنے کالج وچ بے دینی دے شعبے وچ وکھ وکھ طریقے دیاں گلاں سکھن دے تجربیاں توں وکھ نئیں ہیگے ۔
میَں اک بندہ ساں جیہڑا بائبل نوں نئیں جان دا ساں ۔ ایہدے نال کوئی فرق نئیں پیندا پئی میرا سکھن دا طریقہ بوہت چوکھا سی ،یاں کنیاں لوکاں نیں بائبل بارے میری چوکھی تعلیم بارے تبصرہ کیتا سی ، یاں ایتھوں تیک پئی میَں اپنے آپ کویں اپنے پیغاماں نوں ایس تعلیم مطابق بنایا سی — جناں میَں بائبل تے خُدائی تعلیم نوں پڑھیا ، میَں اپنے راہ دے بارے اونے ای شک شُبہے رکھدا ساں ۔ اخیریں میَں اپنے آپ وچ سوچیا پئی میَں سارے دا سارا بے تعلیم بندہ ساں ، تے ایہہ پئی مینوں سارا کجھ دوبارہ شروع توں کھروچنا پوے گا ۔ ایس لئی میَں ایہہ سوال کرنے شروع کیتے جیہڑے اوس ویلے میری جماعت وچ بوہت اوّلے سوال سمجھے جاندے سن ۔ ایہناں وچوں اک ایہہ سی : ”یسوع نے بپتسمہ کیوں لیا سی ؟ “میَں ایس سوال دا وضاحت نال جواب کدی نئیں سُنیا ۔ کوئی وی مینوں ٹھیک جواب دین دے لائق نئیں سی ،پئی یسوع نے اپنے بدن اُتے ساڈے سارے پاپاں نوں چُکن لئی یوحنا بپتسمہ دین والے دے راہیں یردن دے دریا وچ بپتسمہ لیا سی ۔
میرے کول اوہناں معجزیاں دے بارے وچ وی سوال سن جیہڑے یسوع نے کیتے ، جویں پئی اوہناں وچوں اک یسوع نے پنج ہزار توں بوہتیاں بندیاں نوں صرف پنج روٹیاں تے دو مچھیاں نال رجایا ۔ تاں میَں پچھیا ، ”جدوں یسوع نے پنج روٹیاں تے دو مچھیاں اُتے برکت پائی ، تاں کیہ اوہ سارے صرف اکو ای ویلے روٹیاں تے مچھیاں دے ڈھیر ول نسے سن ، یاں جدوں ہر کسے نوں کھانا دتا گیا تاں اوہ ودھدا ای گیا سی ؟ “ بوہتی وار ، مینوں ایس طرحاں دے سوال کرن اُتے جھڑکیا تے بدنام کیتا گیا ۔
ایس طرحاں میَں سوچیا ، ”ایہہ اوہ سارا کجھ اےجیہڑا خُدائی تعلیم وچ ہیگا اے ۔اسیں اوہ سکھدے پئے آں جیہڑا فرانسیسی کیلون نے لکھاری دے نظریے تے وضاحتاں وچ ترتیب وکھائی ۔ اسیں بائبل بارے کجھ نئیں جان دے ۔ “ایس لئی میَں اپنے آپ نوں بوہتیاں فرقیاں دیاں کتاباں نوں اکٹھیاں کر کے تے اوہناں دی چوکھی جانچ کر کے اوہناں نوں بائبل نال پرکھن وچ مصروف رکھنا شروع کر دتا ۔ فیر وی، مینوں کجھ نہ لبھیا ۔
اوہ سارے اکو ای نتیجے اُتے اپڑے، جدوں لوک یسوع اُتے ایمان رکھدے نیں تاں ، اوہناں دے پاپ ہولی ہولی مُک جاندے نیں جویں جویں اوہ توبہ دیاں دعاواں کردے نیں اوہ پاک ہو ندے جاندے نیں، تے ایہہ پئی اوہناں دے مرن تیکر اوہ بالکل بے پاپ ہو جاندے نیں تے فیر بہشت وچ چلے جاندے نیں ۔ فرقے واری دیاں اختلافاں نال کوئی فرق نئیں پیندا — ایہناں ساریاں دا اک ای خاص نتیجہ ایہہ سی پئی مسیحی توبہ دیاں دعاواں تے ہولی ہولی پاکیزگی دی تعلیم نوں منن ، جیہدا کلام نال کوئی تعلق نئیں سی ۔ ایہہ سارے دعوے اوہدے توں خلاف نیں جیہڑا خُدادے کلام نے دسیا اے ۔ تاں میَں خُدا دے اگے جھکیا ، اوہدی سچیائی دی منت ہور لبھی ۔
فیر خُدا نے مینوں پانی تے رُوح دی اصل خوشخبری سکھائی ۔ ایس سچیائی نےمینوں بوہت حیران کر دتا ۔ تے جدوں مینوں پتہ لگیا پئی پانی تے رُوح دی سچیائی بائبل دیاں ۶۶ کتاباں وچ ہیگی اے تاں میریاں بند اکھیاں کھل گئیاں تے مینوں بائبل دے اکھر صاف دِسن لگ پئے ۔ میَں ایہہ جانن دے لائق ہوگیا ساں پئی پُرانا عہد نامہ تے نواں عہد نامہ کویں نال نال ٹھیک نیں ، تے جدوں مینوں ایہہ سچیائی لبھ پئی تاں پاک رُوح میرے دل وچ آن وسیا ۔ ایس سچیائی دے کلا م نوں ویکھن تے سمجھن دے بعدوں ، بوہت سارے پاپ جنہاں نیں میرے دل نوں گھیراپایا سی تے میَں ایہناں دے بھار ہیٹھاں نپیا گیا ساں ، خُدا دی محبت تے فضل دے اک حیران کرن والے تے سوہنے کم نال ، سارے دے سارے مُک گئے ۔
جویں اک کھلوتے ہوئے دریاوچ نکا جیہا پتھر سُٹیاں لہراں بن دیا ں نیں ، اک سکو ن بھری خوشی تے لو میرے دل وچ آگئی ۔ لو توں ، میرا مطلب ایہہ ہیگا اے پئی مینوں پتہ لگیا پئی کلام دی سچیائی کیہ سی ۔ پچھانن دے اوسے ویلے ، پاک رُوح میرے دل وچ آیا ، تے پاک رُوح دے سبب میَں بائبل دے اکھراں نوں صاف طریقے نال ویکھن لگ پیا ۔ اوس ویلے توں ، میَں سدا پانی تے رُوح دی خوشخبری دی منادی کیتی اے ۔
اج تیک ، پانی تے رُوح دی خوشخبری نے میرے دل نوں سکون دتا ، مینوں تسلی دتی تے پکیاں کیتا ، تے میرے دل نوں سدا پاک رکھیا ۔ ایس طرحاں میَں خدا دے کلام نال ودھیا پھلیا ۔ جدوں میَں کلام دے مطابق حیاتی بسر کرن لگیا تاں ، ایہدے مطلب نوں سمجھن دے نال ای مینوں سکون بھریاں برکتاں ملیاں جنہاں نیں میرے دل نوں بھردتا ، تے ایہدے نتیجے وچ ،میرا دل ، فضل دے ایس سمندر وچ ترن لگ پیا ۔ جویں میرا دل ایس برکت نال بھر گیا ، جدوں تُسیں اوہدے نویں سریوں جمن والے مکتی دے کلام اُتے ایمان رکھو گے تاںِ خُدا دا کلام تہانوں وی اپنا فضل تے برکت دیوے گا ۔
جدوں میَں بائبل کھولی تے کلام اُتے دھیان کیتا ، تاں میریاں ساریاں پریشانیاں تے بے سکونی دے خیالاں دی تھاں میرا دل خوشی تے سکون نال بھر گیا ۔ جدوں وی بائبل دے بارے وچ سوال کیتا جاندا تاں میَں سدا ایس گل دا جواب دین دے لائق ساں پئی خُدا دے اوس کلام دا سچ مُچ اک خاص مطلب اے ۔ صرف پانی تے رُوح دی خوشخبری نوں جانن تے اوہدے اُتے رکھ کے ای کوئی خُدا دے کلام نال ودھ پھل سکدا اے ، تے صرف خُدا دے کلام نال ودھ پھل کے ای کوئی نویں سریوں جم سکدا اے ۔ ایس لئی پئی نویں سریوں جمن والے ہُن اپنے دلاں وچ کوئی پاپ نئیں رکھدے ، ایس گل توں ہٹ کے پئی کدوں خُداوند ایس دھرتی اُتے آوے ، اوہ سارے اپنے چُکے جان لئی تیار نیں جدوں خُداوند اخیریں اوہناں نوں ہوا وچ چُک لوے گا ۔
 
 
اوہ ایمان جیہڑا سانوں چُکے جان تیک لَے جا سکدا اے
 
پانی تے رُوح دی خوشخبری نوں جان کے تے ایہدے اُتے ایمان رکھد ے ہویاں اسیں اپنی مکتی پاؤن دے بعدوں چُکے جان دی اڈیک رکھدے آں ۔ تے جدوں اڈیکدے آں تاں ،سانوں خُدا دے تیار کیتے گئے ویلیاں نوں کامل دانائی نال اڈیکنا چاہی دا اے ۔ خُدا دے تیار کیتے گئے ویلے ست زمانےنیں ، تے ایہناں وچ شہادت دا زمانہ پیلے گھوڑے دا زمانہ اے ۔ پیلے گھوڑے دا زمانہ خُدا دے تیارکیتے گئے ستاں زمانیاں وچوں چوتھا اے ۔ دوجے پاسے ، اسیں جیہڑے ویلے وچ ہُن رہندے پئے آں ، اوہ تیجا ، کالے گھوڑے دا زمانہ اے ۔
جدوں اسیں کسے اُچے پہاڑ اُتے چڑھدے آں تاں، اسیں نقشے اُتے آگُو وانگر بھروسہ کردے آں ۔ پر ایس نقشے نوں ویکھ کے ٹھیک تے حفاظتی طریقے نال اپنے ٹکانے تیک اپڑن لئی سانوں پہلوں ایہہ پتہ ہونا چاہی دا اے پئی ایہہ کیہڑی تھاں اُتے اے ۔ ایہدے نال کوئی فرق نئیں پیندا پئی تُسیں نقشے نوں پڑھن وچ کنے ٹھیک ہوسکدے او یاں نقشہ اپنے آپ کتنا ٹھیک ہیگااے — جے تہانوں نئیں پتہ پئی تُسیں کتھے ہیگے او تاں ، نقشہ بے فائدہ اے ۔ صرف ایس صورت وچ جدوں تُسیں اپنے تھاں بارے جان دے او تاں ، تُسیں حفاظتی ٹکانے تیک اپڑ سکدے او ۔
ایسے طرحاں ، صرف پانی تے رُوح دی خوشخبری دے راہیں نویں سریوں جم کے ای تہانوں ایہہ پتہ لگ سکدا اے پئی تہاڈا چُکیا جانا کدوں ہووے گا ۔ چُکے جان دابائبل دے مطابق ٹھیک ویلا ، وڈے دکھ جرن دے ست ورہیاں دے ویلے دے وچکارلے ویلے توں تھوڑا جیہا پہلوں اے — مطلب اے، دکھ جرن دے پہلے ساڈھے تِن ورہے لنگھن دے تھوڑا چِر بعدوں ۔ ایہہ خُدا نے یسوع مسیح وچ ارادہ بنایا ایس جگ نوں بناؤن توں پہلوں ۔
یسوع مسیح وچ خُدا دا مکتی دا ارادہ ، جیہدے وچ اوہنے اپنے اکو اکلے پُتر نوں ایس دھرتی اُتے گھلیا، اوہنے بپتسمہ لیا تے سولی اُتے ماریا گیا ، تے اوہنوں مویاں وچوں جیوندا کیتا گیا ، صرف ایہو ای ارادہ نئیں ہیگا ، سگوں اوہنے کائنات لئی زمانے وی تیار کیتے نیں ، ایہدے بناؤن توں لَے کے مکن تیکر ، اپنے ستاں زمانیاں نال ۔ ایتھوں تیک پئی اسیں اپنے گھربناؤن توں پہلوں نقشہ بناؤندے آں تے اپنے کم کار لئی اگانہہ دے ارادے بناؤندے آں —ایہدے توں وی ودھ کے ، ایتھوں تیک پئی اسیں اپنے انتظاماں نوں ترتیب دیندے آں پئی اسیں اپنے سارے دیہاڑے وچ کیہ کراں گے ۔ فیر ،کیہ خُدا نےکائنات نوں ، بندیاں نوں ، تے تہانوں تے مینوں بنا کسے ارادے دے ای ، یسوع مسیح وچ پیدا کیتا اے ؟ بالکل نئیں ! اوہنے سانوں اک ارادے دے مطابق پیدا کیتا!
ایہہ ارادہ وضاحت نال مُکاشفہ دے کلام وچ نظرآیا ۔ جدوں اسیں ایس کلام نوں کھولدے تے ایہدے اُتے دھیان کردے آں تاں ، سانوں بالکل ٹھیک پتہ لگدا اے پئی خُدا دا کیہ ارادہ اے ۔ایہہ کلام سچیائی اے ۔ بھاویں خدادا کلام کئی ہزار ورہیاں پرانا اے ، پر ایہہ ہُن وی نہ ڈولن والا نہ بدلی ہوئی سچیائی اے ، نہ تاں ایہدے وچ کجھ ودھایا گیا اے تے نہ ای ایہدے وچوں گھٹ کیتا گیا اے۔ اوہ لوک جیہڑے ایہنوں نئیں جان دے تے پانی تے رُوح دے راہیں نویں سریوں نئیں جمے حالے وی خُدا دے کلام دے راہیں ساڈے اُتے ظاہر کیتی گئی سچیائی نوں نئیں جان دے ۔ پر جیہڑے لوک کلام اُتے دھیان کردے نیں اوہ بائبل وچ وکھائیاں ساریاں سچیائیاں نوں لبھن تے اوہناں نوں سمجھن دے لائق ہون گے ۔
ایس عبارت جیہدے وچ خُدا نے فتح پاؤن والیاں نوں اپنے مَن وچوں دین دا وعدہ کیتا ، دا مطلب ایہہ ہیگا اے پئی خُدا اپنے کلام وچو ں صرف اوہناں لوکاں اُتے لو پاوے گا جیہڑے جھوٹ نوں سچیائی نال جانچ سکدے تے اوہدے کلام دی سچیائی نوں سمجھ کے جھوٹیاں اُتے فتح پاؤندے نیں ۔ اوہ جیہڑے جھوٹیاں توں بچ گئے تے سچیائی نوں پالیا اوہناں نوں چاہی دا اے پئی اوہ ایس سچیائی دی منادی کر کے ایہناں جھوٹیاں اُتے فتح پاؤن ۔ خُدا نے ساڈے نال وعدی کیتا اے پئی جیہڑے لوک خوشخبری اُتے ایمان رکھدے نیں اوہناں نوں اوہ اپنے مَن وچوں کھا ن دی برکت دیوے گا : ” جیہڑا جتے مَیں اوہنوں لُکے ہوئے مَن وِچوں دیاں گا۔ تے اِک چِٹّا پتّھر دیاں گا اوس پتّھر اُتّے اِک نواں ناں لِکھیا ہویا ہوئے گا جِہنُوں اوہدے لین والے دے سِوا کوئی نا جانے گا۔ “
ایتھے لُکے ہوئے مَن دا مطلب خُدا داکلام اے ۔ دوجے پاسے ، چٹے پتھر دا مطلب ایہہ ہیگا اے پئی ساڈے نام حیاتی دی کتاب وچ لکھے جان گے ۔ جدوں لوک پانی تے رُوح دی خوشخبری اُتے جیہڑی خُدا نے اوہناں نوں دتی اے ایمان رکھدے نیں تاں ، اوہناں دے دل بدل جاندے نیں ۔ پاک رُوح دے کلام دی بھرپوری والے اپنے دلاں نال ، کلام اُتے ایمان رکھ کے اوہناں نوں پتہ لگ جاندا اے پئی ، اوہناں دے دلاں دے سارے پاپ مُک گئے نیں ۔ پانی تے رُوح دے راہیں پاک ہون دے بعدوں ، اوہناں دے نام چٹے پتھر اُتے لکھے گئے نیں ۔
خُداسانوں دسدا اے پئی کوئی وی بندہ ایہہ نواں نام نئیں جان دا ،اوہدے توں ہٹ کے جنہوں اوہ ملدا اے ۔ اوہ جیہڑے اپنے سارے پاپاں توں معاف کیتے گئے نیں اوہناں نوں ایہہ سمجھنا چاہی دا اے پئی اوہ اپنے دلاں وچ ہُن کوئی پاپ باقی نئیں رکھدے ، تے ایہہ پئی اوہناں دے نام حیاتی دی کتاب وچ لکھے گئے نیں ۔ اوہ ،دوجے اکھراں وچ ، جان دے نیں پئی پانی تے رُوح دی خوشخبری نے اوہناں دے دلاں دے سارے پاپاں نوں مکا دتا اے ۔ صرف اوہو ای جیہڑے پانی تے رُوح دے سچے کلام نوں جان کے نویں سریوں جم دے تے اپنی مکتی نوں پاؤندے نیں اوہو ای خُداوند تے سچیائی نوں جانن دے لائق نیں ۔ جیہڑے نویں سریوں جم دے نئیں اوہناں نوں پتہ نئیں لگدا پئی اوہناں دا نویں سریوں جمنا باقی ہیگا اے ۔ پر نویں سریوں جمن والے لوک سوکھے طریقے نال اوہناں لوکاں نوں پچھان سکدے نیں ، پئی اوہناں نیں حالے تیک خُدا دا مَن نئیں کھاہدااے، تے اوہناں دے نام چٹے پتھر اُتے نئیں لکھے گئے ۔
کیہ تُسیں سچ مُچ چُکے جانا چاؤہندے او ؟ جے تُسیں چُکے جانا چاؤہندے او تاں ، تہانوں مَن کھان دے لائق ہونا چاہی دا اے۔ مَن کھان دے لائق ہون توں ، میرا مطلب اے پئی تہانوں پانی تے رُوح نال نویں سریوں جمنا چاہی دا اے ۔ مَن نال ودھن پھلن لئی ، تہانوں اپنے ایمان نال جھوٹیاں نال لڑنا تے اوہناں اُتے فتح پاؤنی چاہی دی اے ۔ جھوٹے استاد پاپیاں نوں مکتی یافتہ نئیں کر سکدے ، سگوں صرف اوہناں دیاں جاناں تے پیسے دھیلے کھوہ لیندے نیں ۔ سانوں اج دی مسیحیت دیاں جھوٹیاں کلیسیاواں ، جھوٹیاں نبیاں تے جھوٹےخادماں دے خلاف جنگ کرنی تے اوہناں اُتے فتح پاؤنی ہووے گی ۔
سانوں بائبل وچ قائم رہندیاں ہویاں ، ایہہ جاننا چاہی دا اے پئی ، بالکل کویں یسوع نے ساڈے سارے پاپاں نوں مکا دتا اے ، تےکیوں اوہنے بپتسمہ لیا، کیوں اوہنے جگ دے پاپاں نوں چُکیا ،کیوں اوہ سولی اُتے مریا تے کیوں اوہ دوبارہ مویاں وچوں جیوں اُٹھیا ۔ سانوں بالکل ایہہ جاننا چاہی دا اے پئی کیوں یسوع بدن وچ ایس دھرتی اُتے آیا سی تے ایہہ سارے کم کیتے ،تے سانوں ایہہ جاننا چاہی دا اے پئی یسوع کون اے ۔ پر جھوٹیاں کلیسیاواں ، ایہہ سچیائی دی تعلیم دین دی تھاں اُتے ، کوئی وی جیہڑا اوہنے وچ رَلے اوہناں نوں اپنی طاقت نال ”اک پاک لوک“آکھدیاں نیں ۔ اوہ صرف پچھدے نیں ، ”کیہ تُسیں یسوع ایمان رکھدے او؟ “جے جواب ایہہ ہیگا اے پئی ، ”آہو، اسیں ایمان رکھدے آں،“تاں ایہہ جھوٹیاں کلیسیاواں چھیتی نال اوہناں نوں پاک لوک آکھ کے بلاؤندیاں نیں ،اوہناں نوں اک ورہے دے ویلے وچ بپتسمہ دیندیاں نیں ، تے فیر اوہناں کولوں ہر طرحاں دے چندے کڈھاؤندیاں رہندیاں نیں ۔ شکر گزار دے چندیاں توں لَے کے خاص چندیاں تیک اوہ ایس چمکیلے ، بالکل نویں گرجے نوں بناؤن لئی چندے دین داوعدہ کراؤندے نیں ۔ایہناں ورگے گرجے ، صرف پیسیاں دے چکر وچ نیں تے اک وڈا ، چمکیلا گرجا بناؤن دے لالچ وچ ، ایہہ ساریاں جھوٹیاں کلیسیاواں نیں ۔
جدوں اسیں مَن وچ ودھدے پھلدے آں تاں ، سانوں ایس طرحاں دے جھوٹے گرجیاں تے جھوٹیاں تعلیماں نوں ودھاؤن والیاں دے خلاف لڑنا چاہی دااے ۔ جے اسیں اپنی لڑائی وچ ہار جاندے آں تاں ، ایہدا مطلب صرف ایہہ ہووے گا پئی اسیں ہُن خُدا دے پاک لوک نئیں ہیگے آں ، سگوں ایہہ وی پئی اسیں اوہدے راہیں چُکے نئیں جاواں گے ۔ خُدا دے پاک لوک نہ بننا وی خُدا دے پُتر نہ بنن دے برابر اے ؛ ایتھوں تیک پئی جے مسیح نوں ۱۰۰ واریں وی واپس آؤنا ہووے تاں وی ، اسیں کدی وی نئیں چُکے جاواں گے ۔
متی ۲۵ باب سانوں دس ووہٹیاں دی مثال دسدااے ، اوہناں وچوں پنج سیاناں تے پنج کملیاں سن ۔ ایہہ سانوں دسدا اے پئی پنج ووہٹیاں کنیاں کملیاں سن جنہاں نیں اپنیاں بتیاں تاں لَے لیاں پر تیل نئیں لیا سی تے لاڑے دے آؤن دے اعلان دے بعدوں ای ایہنوں خریدن لئی نکلیاں سن ۔ سانوں سیانیاں ووہٹیاں بننا چاہی دا اے جنہاں نیں پہلوں ای تیل تیار رکھیا سی ۔ تیل تیار رکھن دے ایمان توں، میرا مطلب ہیگا اے پئی سانوں یسوع دے اگے مَن نال ودھن دے لائق بننا چاہی دا اے ، جھوٹیاں اُتے فتح پاؤنی چاہی دی اے ، تے پانی تے رُوح دے کلام نال نویں سریوں جمنا چاہی دا اے ۔
جدوں اسیں کوئی پیغام سُن دے آں تاں ، سانوں اپنے آپ کولوں ایہہ پچھنا چاہی دا اے پئی پادری خُدا دے کلام دی منادی کردا پیا اے یاں نئیں ۔ سانوں ایہہ وی پچھن دی لوڑ اے پئی کیہ گرجا اپنا پیسہ لاؤندااے ، جتھے پئی خُدا چاؤہندااے — مطلب اے، خُدا دے کماں اُتے ، اپنے آپ اُتے نئیں ۔ سانوں دوجے اکھراں وچ ، خُدا دا اصلی گرجا لبھنا چاہی دا اے ۔اوہناں گرجیاں توں تنگ آجاووجیہڑے خُدا دے کلام تے اوہدیاں تعلیماں دی منادی کرن لئی صرف جیبھ نوں ورتدے نیں ۔
ایہدے توں کوئی فرق نئیں پیندا پئی اوہ اپنی گل بات تے توبہ وچ کنے چنگے نیں، اوہناں دے کم تہانوں دسن گے پئی اوہ اصل وچ کیہدے واسطے کھلوتے نیں — بھاویں اوہ کسے وی شے توں بوہتا گرجے وڈے بناؤن وچ دل رکھدے نیں؛ بھاویں اوہ غریباں دی ویکھ بھال کرن یاں صرف امیراں لئی کھانے بناؤندے ہون ؛تے بھاویں اوہ کسے وی طرحاں لوکاں نوں بچاؤن وچ کوئی شوق وکھاؤندے ہون ۔ خُدا نے تہانوں اکھاں تے کن دتے نیں تاں پئی تُسیں ویکھ سکوتے آپ فیصلہ کرسکو ۔ تے جدوں تُسیں ایس نتیجے اُتے اپڑ جاندے او پئی تہاڈا گرجا ٹھیک گرجا نئیں ہیگا ، تاں فیر چھیتی نال ایہنوں چھڈن بارے کدی نہ جھکو ،ایس لئی پئی ایہو جیہے جھوٹے گرجے وچ جانا دوزخ وچ جان دی کوشش دے برابر اے ۔ تُسیں ایس طرحاں اپنی حیاتی نوں وی گوا سکدے او ۔
کیہ تہانوں پتہ ہیگا اے پئی پانی تے رُوح دی خوشخبری کنی چنگی اے ؟ جدوں تہانوں پتہ اے تے
ایس سچیائی ، پانی تے رُوح دی خوشخبری نوں سچے دلوں قبول کردے او تاں ، تُسیں کامل طریقے نال اک نواں بندہ بن جاندے او ۔ اوہ جیہڑے پہلوں دھرتی دے لوک سن ہُن اسمان نال تعلق رکھدے نیں ، تے جنہاں نوں بدرُوحاں نیں بوہت تنگ کیتا ہویا سی اوہ ہُن چھڈائے گئے نیں ۔
بدرُوحاں آسکدیاں نیں تے اوہناں نوں ڈاہڈے دکھ دے سکدیاں نیں جنہاں دے دلاں وچ پاپ اے تے ایس طرحاں اوہ اپنے پاپاں وچ پھسے ہوئےنیں ۔ پر خُداوند ایس دھرتی اُتے آیا تے پانی تے رُوح دی خوشخبری نال ساڈے سارے پاپاں نوں مکا دتا ۔ ایس لئی پئی اوہنے ساڈے پاپاں نوں کامل طریقے نال مکا دتا اے ، ایس لئی بدرُوحاں ہُن سانوں دکھ نئیں دے سکدیاں تے نہ ای سانوں مار سکدیاں نیں۔ ایس لئی پئی جدوں تُسیں ایس خوشخبری نوں جان دے تے ایہدے اُتے ایمان رکھدے او تاں ، بدرُوحاں باہر نکل جاندیاں تے تہاڈی حیاتی بدل جاندی اے۔
دوجے اکھراں وچ ، اوہ لوک جیہڑے جگ دے نوکر سن ،ایس قید توں چھٹ گئےنیں ۔ خُدا نے پاپیاں نوں راستباز بناؤن دا حیرانی والا کم کیتا اے ، دھرتی دے ایہناں لوکاں نوں اسمانی لوک بناؤنا ، تے ، جدوں خُداوند واپس آوے گا ، تاں اوہ ایہناں نوں اپنی بادشاہی لئی اُتاں چُک لوے گا ۔
ساڈی دھرتی والی حیاتی ساڈی اخیر نئیں ہیگی ۔ سانوں اپنے وانگر بناؤن دے بعدوں، خُدا نے سانوں ایس دھرتی اُتے صرف تھوڑے چِر لئی رہن لئی نئیں رکھیا ۔ اصل وچ بدن وچ جان تھوڑے چِر لئی ہوندی اے ۔ جدوں اسیں سکولوں ویہلے ہوندے آں ، اسیں پہلوں ای ۲۰ ویں دہائی تیک دے وچکار اپڑ جاندے آں ۔اسیں اپنی ۳۰ ویں دہائی تیک نوں اپنیاں حیاتیاں لئی اک نیہ بناؤن لئی بسر کر دیندے آں ، تے جدوں تیک ایہہ نیہ ساڈے کجھ بنن لئی تیار ہو جاندی اے ، اسیں پہلوں ای اپنی ۴۰ یاں ۵۰ ویں دہائی وچ ہیگے آں ۔ جدوں اسیں اخیریں ایس ویلے اُتے اپڑ جاندے آں جتھے اسیں اپنے آپ وچ سوچدے آں پئی ہُن اسیں تھوڑا جیہا سکون کرسکدے آں تے حیاتی دے سواد لَے سکدے آں تاں ، ساڈی ساری حیاتی لنگھ گئی ہوندی اے ، تے اسیں مُک جاندے آں ۔ جویں صبح پُھل کھڑدے نیں تے دوپہر ویلے تیک کملا جاندے نیں ، جدوں اسیں ایہہ سمجھدے آں پئی اخیریں اسیں حیاتی بسر کر لئی ،تاں سانوں پتہ لگدا اے پئی ساڈا ویلا لنگھ گیا اے ، تے اسیں صرف بوہت چھیتی مُک جاندے آں ۔
ایس لئی حیاتی بوہت تھوڑی اے۔ پر ایس توں وی بے نصیبی دی گل ایہہ ہیگی اے پئی بوہت سارےلوک ایہو جیہے وی نیں جنہاں نوں حیاتی دے ایس تھوڑے ہون دا پتہ ای نئیں لگدا ۔ فیر وی بدنی طریقے نال ساڈیاں حیاتیاں دا مکنا ساڈا مکنا نئیں ہیگا، ایس لئی پئی ایہہ صرف ساڈیاں رُوحاں دی رُوحانی حیاتیاں دا شروع ہونا اے ۔ کیوں ؟ ایس لئی پئی خُدا ، بھاویں اوہ ساڈیاں دھرتی دیاں نکیاں جیہاں حیاتیاں دا مُل اُتارداپیا اے ، اوہنے ساڈے لئی نہ صرف ہزار ورہیاں دی بادشاہی سگوں نواں اسمان تے دھرتی وی تیار کیتی اے ، جتھے اسیں ہمیش لئی رہواں گے ۔ ایہہ خُدا دی ہمیش دی حیاتی دی برکت اے جیہڑی اوہنے صرف اوہناں نوں دتی اے جیہڑے اوہدے پانی تے رُوح دے کلام اُتے ایمان رکھ کے نویں سریوں جمے نیں ۔
صرف اوس ویلے جدوں تُسیں لُکیا مَن کھاندے او تے تہاڈا نام چٹے پتھر اُتے لکھیا گیا اے تاں تہاڈا چُکیا جانا ہو سکدا اے ۔ خُداسانوں دسدااے پئی صرف اوہو ای لوک جیہڑے اوہدے مَن نال ودھدے پھلدے نیں اوہ وڈے دکھ جرن وچکار شیطان اُتے فتح پا سکن گے ، تے صرف اوہناں لوکاں دے نام چٹے پتھر اُتے لکھے جان گے جنہاں اوہدے اُتے فتح پائی اے ۔ اوہ جیہڑے اوہدے اُتے فتح نئیں پاؤندے ، ایس لئی ، اوہناں نوں چُکے جان بارے خواب وی نئیں ویکھنا چاہی دا ، تے نہ ای اوہ نویں سریوں جمن بارے سوچ سکدے نیں ۔
بوہت مہنگی تے بوہتے مُل والی شے پاؤن لئی وڈیاں قربانیاں دی لوڑ ہوندی اے ۔ اک ودھیامثال سونا اے ؛ سونے نوں لبھن تے کڈھن وچ بوہت چوکھی محنت ،ویلا ، تے خطرہ وی ہوندااے ۔ سونے دیاں کاناں وچ بوہت سارے لوک مر گئے نیں ایس توں پہلوں پئی اوہناں نوں کچے سونے دا اک ٹوٹا وی ملدا ۔ سونا دین والی دھرتی وچوں سونا کڈھنا وی بوہت اوکھا کم اے ۔ ساری دیہاڑی مٹی دے ٹرک بھر کے صرف تھوڑا جیہا سونا لبھدا اے ۔ ہور ایہہ پئی ، ایہہ ہر دریاوچ نئیں لبھدا ، سگوں تہانوں پہلوں ایہو جیہے دریانوں لبھنا پیندا اے جیہدے وچ بوہتا سونا ہووے ۔ دوجے اکھراں وچ ، سونا لبھن لئی بوہت محنت ، کدی کدی تاں تہاڈی حیاتی وی چاہی دی ہوندی اے۔ فیر ، لوک سونا لبھن لئی بوہت چوکھی کوشش کیوں کردے نیں ؟ اوہ اِنج کردے نیں ایس لئی پئی اوہناں دے خیال وچ سونا ایہناں مہنگا اے ، جیہدے لئی اوہ اپنیاں حیاتیاں نوں خطرے وچ پاؤندے نیں ۔
پر ، جیہڑا سونے تے چاندی نالوں بوہت چوکھا مہنگا تے بوہتے مُل دا اے ،اوہ ایہہ سچیائی اے پئی اسیں خُدا دے پُتر بن سکدے آں ۔ سونا دتہاڈے بدن لئی تہانوں نقلی خوشی دیوے گا ، پر خُدا دے پُتر بن کے تہانوں کدی نہ مکن والی ، ہمیش دی خوشی لبھدی اے ۔ اخیری ویلیاں وچ چُکے جان لئی ، ہزارورہیاں دی بادشاہی نویں اسمان تے دھرتی دا مال، پیسہ دھیلا ، تے عزت نال سواد لین ،تے ہمیش دی ایہو جیہی حیاتی بسر کرن لئی ، تہانوں ہُن ایس دھرتی دے ساریاں جھوٹیا ں نال لڑنا پوے گا ، پانی تے رُوح دی خوشخبری اُتے ایمان رکھناپوے گا، تے اپنے ایمان دی راکھی کرنی تے اپنی فتح نوں پکیاں بنانا پوے گا۔
ایس جگ وچ ، بوہت سارے جھوٹے نیں جیہڑے سدا ساڈے دلاں نوں تنگ کرن دے ویلے لبھدے نیں ، تے ساڈے ایمان نوں ہراؤن دی کوشش کردے نیں ۔ اوہ لوک جیہڑے پانی تے رُوح دی خوشخبری اُتے ایمان رکھدے نیں تے اپنے دلاں وچ سچیائی رکھدے نیں اوہناں نوں پتہ اے پئی اوہناں دا ایمان بوہت مہنگا اے ۔ تے ایس لئی اوہ ایس ایمان دے مہنگے ہون نوں جان دے نیں ، ایس لئی اوہ ایہناں ساریاں جھوٹیاں تعلیماں دے خلاف لڑدے نیں جیہڑے اوہناں کولوں ایس ایمان نوں کھون دی کوشش کردیاں نیں ۔ جے اسیں سمجھ لیے پئی کنے لوک ایس ایمان لئی ترسدے پئے نیں تے فیر وی ایہنوں نئیں پاسکدے ، تے جے اسیں ایہہ سوچئے پئی صرف ایہہ ایمان ای میمنے دے ویاہ دے جشن وچ جی آیاں نوں آکھن دا جوڑا پواؤندااے تے سانوں اپنی ہمیش دی حیاتی دی برکت دیندا اے ، سانوں ایہنوں کامل طریقے نال اپنا بناؤنا چاہی دا اے تے کسے نوں وی ایس ایمان نوں ساڈے کولوں وکھ کرن دی اجازت نئیں دینی چاہی دی ۔ ایہہ اوس طرحاں دا ایمان اے جیہڑا لڑدا تے فتح پاؤندااے۔
میَں مُکاشفہ دےکلام دی جائز تعلیم تے دانانی دی مشہوری کرن دی لوڑ چاؤہنداساں — پکیاں کرن لئی پئی تُسیں پانی تے رُوح دی مہنگی خوشخبری دی راکھی کرن دے لائق ہووو — ایس لئی مینوں پتہ ہیگا سی پئی بوہت سارےجھوٹے استاد مُکاشفہ دےکلام نوں نہ صرف لوکوں نوں سگوں پاک لوکاں نوں وی دھوکہ دین تے پھساؤن لئی ورتن دی کوشش کرن گے ۔ ایہہ اے کیوں میَں اپنے پیغاماں تے کتاباں دےر اہیں مُکاشفہ دےکلام دی منادی کردا پیاہاں ، تاں پئی ایہہ پکا کیتا جا سکے پئی اخیری ویلیاں وچ ٹھیک تعلیم تے عقیدے نال اپنی ایمان دی حیاتی بسرکر سکو۔
مُکاشفہ دی کتاب بوہت خاص شے پیش کردی اے ۔ پر مُکاشفہ داکلام اوہناں لوکاں لئی کجھ وی ظاہر نئیں کرداجیہڑے خُدادا لُکیا ہویا مَن نئیں کھا سکدے نیں تے جنہاں دے دلاں وچ پاک رُوح نئیں ہیگا۔ اخیری ویلیاں دیاں نشانیاں توں لَے کے چُکے جان تیک ، ہر مسیحی دی آس ، نویں اسمان تے دھرتی تیک ، مُکاشفہ دےکلام وچ اک بوہت خاص ارادہ لکھیا گیا اے ۔ پر خُدا دی دانائی دے سبب جیہڑے ہر کسے اُتے اپنے بھیت نئیں کھولدا، مُکاشفہ اک اوکھی کتاب بنی ہوئی اے جنہوں ہر کوئی نئیں سمجھ سکدا ۔ کوئی نئیں ہیگا اوہناں لوکاں توں ہٹ کے جیہڑے خُدا دے مَن نال ودھے پھلے نیں تے جنہاں دے نام پانی تے رُوح دے راہیں نویں سریوں جمن نال تے جھوٹیاں اُتے فتح پاؤن دے راہیں چٹے پتھر اُتے لکھے گئے نیں، مُکاشفہ دےکلام نوں سمجھ سکدے نیں ۔
ایس لئی پئی ، ایہناں دے تعلیم دے گھاٹے وچ ، اوہ لوک جیہڑے نویں سریوں نئیں جمے ، دکھ جرن توں پہلوں چُکے جان یاں دکھ جرن توں بعدوں چُکے جان دی گل کردے نیں، تے ہُن ساڈے کول وی کجھ ہیگے نیں جیہڑے ایہہ دعویٰ کردے نیں پئی ہزار ورہیاں دی بادشاہی صرف گلی باتی اے ۔ خُدا دا کلام سچیائی اے ، تے ایہہ کھول کے دسدااے پئی چُکے جانا وڈے دکھ جریوں بغیر نئیں ہووے گا ۔ ایہہ سانوں دسدا اے پئی چُکیا جانا وڈے دکھ جرن دے ستاں ورہیاں دے زمانےدا ادھا ویلا لنگھن توں تھوڑا جیہا بعدوں ہووے گا — پاک لوکاں دی شہادت دے بعدوں ، تے یک دم اوہناں دے جیوں اُٹھن نال ۔
ہر دیہاڑے دی حیاتی بسر کردیاں ہویاں چُکے جان دا ویلاآؤنا — پائلٹ یکد م غائب ہو جاندے نیں تے ماواں سارے جگ وچوں کھان دیاں میزاں اُتوں غائب ہوجاندیاں نیں —میَں ایہہ دُکھ نال دسدا ہاں پئی ، اِنج کدی نئیں ہووے گا ۔ سگوں، چُکیا جانا اوس ویلے ہووے گا جدوں جگ اُتے وڈیاں مصیبتاں آؤن گئیاں ، بھوچال ایہنوں فناہ کردین گے ، تارے اسمان اُتوں ڈگن گے ، تے دھرتی ٹوٹے ٹوٹے ہو جاوے گی ۔ دوجے اکھراں وچ ، چُکیا جانا ،سکون والے دیہاڑے وچ دیہاڑے دی وڈی لو وچ نئیں ہووے گا ۔
تارے حالے تیک نئیں ڈِگے ، جگ دا تیجہ حصہ سڑ جانا حالے رہندا اے، تے سمندر وی حالے لہو نئیں ہویا ۔ ایہدے توں میراکیہ مطلب اے ؟ میرا مطلب اے پئی چُکےجان دا اجے ویلانئیں اے۔ خُدا سانوں دسدا اے پئی اوہ سانوں ایہہ نشانیاں دیوے گا پئی چُکے جان دے آؤن توں پہلوں اسیں سارے پچھان سکیے ۔ ایہہ نشان بربادیاں نیں جیہڑیاں ایس جگ اُتے آؤن گئیاں —تیجہ حصہ سمندر تے دریا لہو ہو جاندے نیں ، تیجہ حصہ جنگل سڑ جاندے نیں ، ڈِگدے ہوئے تارے ، گندہ پانی ، وغیرہ ۔
جدوں جگ ایس طرحاں وڈیاں مصیبتاں نال بھریا ہووے گا ، تاں مخالفِ مسیح حکم دین لئی نکلے گا ۔ پہلوں اک تعریف کیتے جان والے سارے جگ دے آگُو وانگر نکلدے ہویاں ، اوہ اخیریں اک ظالم راجہ بن جاوے گا جیہڑ ا اپنی ساری طاقت نال جگ اُتے راج کرے گا ۔ بائبل سانوں دسدی اے پئی ایہہ اوس ویلے ہووے گا ، جدوں مخالفِ مسیح دا سارے جگ اُتے ظالم راج قائم ہووے گا ، خُداوند اپنے پاک لوکاں نوں لین لئی دھرتی اُتے پرت آوے گا ۔ چُکیا جانا اوس ویلے نئیں ہووے گا جدوں وڈیاں قدرتی مصیبتاں اجے ہون والیاں نیں تے مخالفِ مسیح دا آؤنا باقی ہیگا اے۔
ایہہ غلط اے ، دوجے اکھراں وچ ، کسے لئی وی اپنا کم چھڈنا، سکول جانا چھڈ دینا ، تے اپنیاں حیاتیاں وچ آلے دوالے دے کماں نوں کامل طریقے نال روک دینا ، ایہہ سوچدے ہویاں پئی اوہ چُکے جان والے نیں، جدوں اصل وچ اوہ نشان جنہاں دا خُدا نے ساڈے نال وعدہ کیتا اے ، حالے تیک پورے نئیں ہوئے۔ تہانوں ایس طرحاں راہوں نئیں بھٹکنا چاہی دا ، ایس لئی پئی ایہہ شیطان دےجھوٹاں دے جال وچ پھسنا اے ۔
سانوں ایہناں ساریاں دے خلاف لڑنا چاہی دا اے تے ایہناں اُتے فتح پاؤنی چاہی دی اے پئی ایس طرحاں دیاں جھوٹیاں تعلیماں سانوں پھساؤن لئی بنائیاں گئیاں نیں ۔ پانی تے رُوح دی خوشخبری اُتے ایمان ای جھوٹیاں تعلیماں اُتے فتح پاؤن والااکلاایمان اے ۔ صرف اوہو ای لوک جیہڑے یسوع دے بپتسمے اُتے ایمان رکھدے نیں جنہے اوہناں دے سارے پاپاں نوں چُک لیا ، ایہناں پاپاں دیاں سنگلاں وچوں سارے دے سارے چھٹ گئےنیں۔ ایس لئی پئی یسوع نے اپنے بپتسمے نال ساڈے پاپاں نوں اپنے اُتے چُک لیا ، تے ایس لئی پئی اوہنے سانوں اپنے لہو نال خرید لیا جنہے ساڈے پاپاں نوں مکا دتا اے ، ایس لئی اسیں ایہناں ساریاں کماں اُتے ایمان رکھ کے اوہدی کامل مکتی پا چُکے آں جیہڑے خُداوند نے ساڈے لئی کیتے نیں—صرف ایمان تے ایمان دے راہیں ۔ جیہڑے لوک ایس کلام اُتے ایمان رکھدے نیں اوہ ہُن خُدا دے پُتر بن گئے نیں ، تے اوہ اوہناں ساریاں ارادیاں اُتے فتح پاؤن گے جیہڑے خُدا نے اوہناں لئی تیار کیتے نیں ۔
دوجے پاسے ، صرف اکو ای شے اوہناں جھوٹیاں نوں اڈیکدی اے جیہڑے یسوع اُتے ایمان رکھن دا دعویٰ رکھن دا کردے نیں تے فیر وی اپنے دلاں وچ پاپ رکھدے نیں ، تے جیہڑے خُداوند دی سیوا وچ صرف اپنے ای لالچ نوں لبھدے نیں، اوہ سزا اے جنہوں اوہ شیطان نال رَل کے جرن گے ۔ ایس لئی پانی تے رُوح دی خوشخبری بوہت مہنگی اے۔ صرف اوہو ای لوک جیہڑے ایہنوں جان دے نیں تے جیہڑے سچیاں تے جھوٹیاں خوشخبریاں وچکار فرق پچھان دے نیں اوہ خُدا دا لُکیا مَن کھا سکدے نیں ، اخیروچ ساریاں جھوٹیاں اُتے فتح پاسکدے نیں تے ہزار ورہیاں د ی بادشاہی تے نویں اسمان تے نویں دھرتی اُتے جاسکدے نیں ۔ کلام پڑھوتے آپ ای ویکھو پئی اصل سچیائی کیہ اے جیہڑی تہانوں بچا سکدی اے ، تہانوں آس دے سکدی اے ، تے تہانوں ہمیش دی حیاتی دے سکدی اے ۔ ایہنوں سمجھو ، تے ایہدے اُتے بھروسہ رکھو ۔ ایہہ فتح والا ایمان اے ۔
فتح ساڈی رُوحانی لڑائی وچ ساڈے لئی بوہت خاص اے ایس لئی پئی ایس لڑائی وچ ہارن دا سبب صرف اک نکا جیہا گھاٹا نئیں ہیگا ، سگوں ایہدا مطلب دوزخ دا حقدار ہونا اے ۔ دوجیاں لڑائیاں وچ اسیں کسے گھاٹے نوں پوریاں کر سکدے آں ، پر ایس ایمان دی لڑائی وچ گھاٹے نوں پوریاں کرن دا کوئی موقع نئیں اے ۔ ایس لئی تہاڈی سچیائی کیہ اے تے تہاڈے اپنے خیال کیہ نیں، تہاڈے بدن دالوبھ ، تے جھوٹیاں استاداں دے جھوٹاں دی پچھان دے لائق ہونا چاہی دا اے ،تے تہانوں کلام دی لو نال ایہدے ویلیاں دے بارے وچ ٹھیک تعلیم نوں سمجھن لئی اپنے ایمان نوں اخیر تیک پکیاں کرنا چاہی دا اے۔
خُدا نے ستاں نرسنگیاں تے ستاں پیالیاں دیاں مصیبتاں نوں تیار رکھیا اے ، تےاوہنے ساڈے اُتے وڈیاں دکھاں نوں آؤن دی اجازت دتی اے ۔ جدوں سارا جگ بوہت وڈیاں مصیبتاں وچ پھس جاوے گا— وڈی اگ فنا ہ کرے گی ،تارے ڈِگن گے، سمندر، دریاتے سوتے لہو ہوجان گے — تاں مخالفِ مسیح نکلے گا ، تے تہانوں ایہہ سمجھنا چاہی دا اے پئی وڈے دکھ جرن دے ستاں ورہیاں دےزمانےدے شروع ہون دے اشارے نیں ۔ پاک لوکاں دی شہادت ، جیوں اُٹھنا تے چُکیا جانا ستاں نرسنگیاں دیاں آفتاں دے مکن ویلے اُتے ہووے گا ، جدوں اخیری نرسنگا پھوکیا جاوے گا ، پر ایس توں پہلوں پئی ستاں پیالیاں دیاں آفتاں شروع ہون ۔
جدوں خُدا دی چوتھی مُہر مُک جاوے گا ، مخالفِ مسیح پاک لوکاں نوں ایمان نوں چھڈن بارے آکھے گا ۔ اوس ویلے ، جنہاں دے نام حیاتی دی کتاب وچ لکھے گئے نیں—مطلب اے ، نویں سریوں جمن والے پاک لوک جنہاں نیں مَن کھاہدااے تے جنہاں دے نام چٹے پتھر اُتے لکھے ہوئے نیں — دلیری نال شہید ہو جان گے ۔ ایہہ اخیری تے بوہت وڈا ایمان اے جیہڑا سارا جلال خُداوند نوں دیندااے ۔ ایہہ اوہناں لوکاں دا دلیری والا ایمان اے جیہڑے پانی تے رُوح دی خوشخبری دے مطابق ایمان رکھدے نیں تے حیاتی بسر کردے نیں ۔ خاص کر کے، ایہہ ،اوہ ایمان اے جیہدی مدد نال اسیں اپنی رُوحانی لڑائی وچ فتح پاسکدے آں ۔
سانوں ہر مُل اُتے اپنے مخالفاں اُتے فتح پاؤنی چاہی دی اے ،نویں سریوں جمن دے بعدوں، سانوں جھوٹیاں دے خلاف لڑنا تے اوہناں اُتے فتح پاؤندے رہنا چاہی دااے ۔ اِنج کرن لئی ، سانوں خاص
کر کے ایہو جیہی حیاتی بسر کرنی چاہی دی اے جیہڑی خُدا دے مَن نال ودھدی پھلدی اے تے اپنے خُداوند دے کلام دی منادی اخیری ساہ تیکرکردی اے ۔ فتح پاؤن والیاں لئی ، خُدا نے اپنا جلال تے برکتاں دین دا وعدہ کیتا اے ۔ اوہ ایمان جیہڑاخُدا دے راہیں ہوا وچ چُکے جان داحقدار اے ، پاک لوکاں لئی سب توں وڈی آس ، تے ہزار ورہیاں دی بادشاہی تے نویں اسمان تے دھرتی لئی پکا ایمان —ایہناں ساریاں شیواں دی اجازت صرف اوہناں نوں ہووے گی جنہاں نیں خُدا دے کلام اُتے ایمان رکھ کے سارے جھوٹیاں اُتے فتح پا کے خُدا دا لُکیا ہویا مَن پا لیا اے ۔
جیہڑے لوک جان دے نیں سچ مُچ کیہ مہنگا اے اوہ ایہنوں پاؤن لئی ساراکجھ ویچ دیندے نیں تے اِنج کردے رہن لئی وڈیاں قربانیاں دیندے نیں ۔ ایس لئی پئی اِنج دیاں قربانیاں پیڑاں دین لئی نئیں سگوں اک وڈیاں خوشیاں لَے کے آؤن گئیاں ،تے ایس لئی ایہہ سچ مُچ مہنگا خزانہ اے جیہڑا سانوں اخیریں سارا کجھ دیوے گا ۔ ساڈے لئی سوکھا اے ، پئی اسیں ایہدی راکھی کرن لئی ہر شے وار دئیے ۔
میری آس تے دُعا ہیگی اے پئی تُسیں ہزارورہیاں دی بادشاہی تے نویں اسمان تے دھرتی دی آس رکھدے رہووگے ، ایس آس نال سارے مخالفاں اُتے فتح پاووگے ، تے اخیریں وڈی خوشی تے راضی دل نال جِت کے وکھالی دیوو گے ۔