Predigten

مضمون 4: روزدیہاڑےدے پاپاں داحل

[4-1] کثرت دے فدیے دی خُوشخبری <یوحنا ١٣: ١۔١۷>

<یوحنا ١٣: ١۔١۷>
” فسح دی عیدتوں پہلاں جد یسوُع نیں جان لیا پئی میرا ویلا آن اَپڑیا اے پئی دُنیا نُوں چھڈ کے پیو کول جاواں تے اَپنے لوکاں نال جیہڑے دُنیا وِچ سَن جِویں دی محبت رکھداسی آخر تیکر محبت رکھدا رہیا۔تے جدوں اِبلیس شمعون دے پُتر یہوداہ اسکریوتی دے دِل وِچ پا چُکیا سی پئی اوہنوں پھڑوائے تے شام دا کھانا کھاندیاں ویلے ۔یسوُع نیں ایہہ جان کے پئی پیو نیں ساریاں شیواں میرے ہتھ وِچ کردِتیاں نیں تے میَں خُدا دے کولوں آیا تے فیر خُدا دے کول جاندا آں ۔ کھانے توں اُٹھ کے لیڑے لائے تے رومال لے کے اَپنے لک نال بنیا ۔ ایہدے بعد بھانڈے وِچ پانی پا کے چیلیاں دے پیر دھون تے جیہڑا رومال لک نال بنیا سی اوہدے نال پُونجنے شروع کر دِتے ۔ فیر اوہ شمعون پطرس تیکر اَپڑیا ۔اوہنے اوہنوں آکھیا اَے خُداوند !کیہ تُوں میرے پیردھوندا ایں؟یسوُع نیں جواب وِچ اوہنوں آکھیا جو میَں کرداآں تُوں ہُن نئیں جان دا پر بعدوں سمجھیں گا۔پطرس نیں اوہنوں آکھیا تُوں میرے پیر اَبد تیکر کدی نئیں دھوپائیں گا۔ یسوُع نیں اوہنوں جواب دِتا پئی جے میَں تینوں نہ دھوواں تے تُوں میرے نال شامل نئیں ۔ شمعون پطرس نیں اوہنوں آکھیا اَے خُداوند !صرف میرے پیر ای نئیں سگوں ہتھ تے سِروی دھودے۔یسوُع نیں اوہنوں آکھیا جیہڑا نہا چُکیااے اوہنوں پیراں دے اَڈ کُجھ ہور دھون دی لوڑ نئیں سگوں بالکل پاک اے تے تُسیں پاک ہوپر سارے دے سارے نئیں ۔ کیوں جے اوہ اَپنے پھڑوان والے نُوں جان داسی ایس لئی اوہنے آکھیا تُسیں سارے پا ک نئیں ۔ جدوں اوہ اوہناں دے پیر دھو چُکیا تے اَپنے لیڑے پا کے فیر بہہ گیا تے اوہناں نُوں آکھیا کیہ تُسیں جان دے اوپئی میَں تُہاڈے نال کیہ کیتا؟تُسیں مینوں اُستاد تے خُداوند آکھ د ے او تے خوب آکھ دےاوکیوں جے میَں آں۔جدوں میَں خُداوند تے اُستاد نیں تُہاڈے پیر دھوتے تے تُہاڈے اُتے وی فرض اے پئی اِک دُوجے دے پیر دھویا کرو۔ کیوں جے میَں تُہانوں اِک نمونہ وکھایا اے پئی جِویں میَں تُہاڈے نال کیتا تُسیں وی ایویں کریا کرو۔میَں تُہانوں سچ آکھداآں پئی نوکر اَپنے مالک توں وڈا نئیں ہوندا تے نہ گھلیا ہویا اپنے گھلن والے توں ۔ جے تُسیں ایہناں گلاں نُوں جان دے او تے مبارک
او شرط اے ہے پئی ایہناں اُتے عمل وی  کرو۔“
 
 
یسوُع نے فسح دی عید توں اِک دِن پہلاں پطرس دے پیرکیوں دھوئے ؟اوہدے پیر دھون توں تھوڑا چِرپہلاں یسوُع نے آکھیا ، ” تُوں ہُن نئیں جان دا پر بعدوں سمجھیں گا۔“ شمعون پطرس یسوُع دے چیلیاں وِچوں سب توں چنگا چیلا سی ۔ اوہدا ایمان سی پئی یسوُع خُدا دا پُتر تے نالے اوہنے یسوُع دے مسیِح ہون دی گواہی دِتی ۔  جدیسوُع نے اوہدے پیر دھوتے ،تے لازمی طورتے ایویں کرن دی اِک معقول وجہ سی ۔ جدوں پطرس نے اپنے ایمان دا اِقرار کیتا پئی یسوُع مسیِح سی تے ایہدے توں ایہہ مُرادسی پئی اوہ ایمان رکھدا سی پئی یسوُع مکتی داتا اےجیہڑا اوہنوں اوہدےسارے پاپاں توں بچاوے گا۔
                                     
یسوُع نے کیوں سُولی چڑھن توں پہلاں
چیلیاں دے پیردھوتے؟
کیوں جے اوہ اوہناں کولوں چاہندا سی پئی
اوہ اوہدی مکمل مکتی نُوں سمجھن
 
اوہنے پطرس  دے پیر کیوں دھوتے ؟ یسوُع نُوں پتہ سی پئی بڑی چھیتی پطرس تِن واری اِنکار کرے گا، یعنی اوہ مستقبل وِچ پاپ جاری رکھے گا ۔
جے یسوُع دے اَسمان اُتے جان توں بعد ، پطر س دے دِل وِچ کوئی پاپ پِچھے رہ گیا ہوندا تے اوہ یسوُع دے نال شریک ہون دے قابل نہ ہوندا۔ پر یسوُع اپنے سارےچیلیاں دی کمزوریاں نُوں جان داسی تے اوہ ایہہ نئیں چاہندا سی پئی اوہناں دے پاپ اوہدے تے چیلیاں دے وِچکار رکاوٹ بنن ۔ ایس لئی ، اوہنوں ایہناں نُوں ایہہ سکھان دی لوڑ سی پئی اوہناں دِیاں ساریاں بدکاریاں پہلاں ای دھودِتیا ں گئیاں سَن ۔ ایہہ وجہ سی پئی اوہنے اپنے چیلیاں دے پیر دھوتے ۔ یسوُع نےاَپنے مرن تے اوہناں توں جُدا ہون توں پہلا ں ایہہ یقین کیتا پئی اوہ اوہدے بپتسمہ دی خوشخبری اُتے ،تے ایسے طرحاں ساری حیاتی دے پاپاں دی مکمل معافی اُتے پکے ہوکے قائم رہن۔
یوحنا ۱۳ باب وِچ ایس مکمل مکتی دے بارے گل کیتی گئی اے جیہڑی یسوُع نے اَپنے چیلیاں لئی پوری کیتی ۔ اوہناں دے پیردھون دے ویلے ،یسوُع نے اوہناں نُوں اپنے  بپتسمہ  دی  خوشخبری  دی سمجھ
دے بارے دَسیا جیہدے سبب سارے اِنسان خطاواں توں پاک ہوسکدے نیں ۔
” مستقبل وِچ ابلیس دے دھوکے وِچ نہ آنا ۔ میَں دریائے یردن وِچ بپتسمہ لین دے سبب تُہاڈے سارے پاپ اپنے اُتے لے لئے نیں تے صلیب اُتے اوہناں د ی سزاپاواں گا ۔فیر ،میَں مُردیاں وِچوں جی اُٹھاں گا ۔تے تُہاڈے سبھناں لئی نویں پیدائش حاصل کرن دی مکتی نُوں مکمل کر دیواں گا ۔ تُہانوں ایہہ سکھان لئی پئی میَں بے شک تُہاڈے مستقبل دے پاپ وی دھودِتے نیں، پاپاں دی معافی دی اصل خوشخبری دی تعلیم دین لئی میَں سُولی چڑھن توں پہلاں تُہاڈے پیر دھوتے ۔ایہہ نویں پیدا ئش حاصل کرن دی خوشخبری دا بھیت اے۔ ایویں تُہانُوں سبھناں نُوں ایمان رکھنا چاہی دا اے ۔ “
سانُوں ساریاں نُوں سمجھنا چاہی دا اے پئی  یسوُع نے اپنے چیلیاں دے پیر کیوں دھوتے تے ایہہ وی جاننا چاہی دا اے پئی اوہنے ایہہ کیوں آکھیا ، ” جیہڑا میَں کردا آں تُوں ہُن نئیں جان دا پر بعدوں سمجھیں گا۔“ صرف فیر اَسیں نویں سرے توں پیدا ہون دی خوشخبری اُُتے ایمان لیا سکدے تے آپ وی  نویں پیدائش حاصل کر سکدے آں ۔
 
 
یسوُع نے یوحنا ١٣ : ١۲ وِچ فرمایا
 
خطاواں کیہ نیں؟
اوہ اجیہے پاپ نیں جیہڑے اَسیں اپنی کمزوری
دی وجہ توں ہر روز کردے آں
 
صلیب اُتے مرن توں پہلاں ،یسوُع نے اپنے چیلیاں نال فسح دی عید منائی تے اپنے ہتھاں نال اوہناں دے پیر دھون دے راہیں اوہناں نُوں پاپاں دی معافی دی خوشخبری لئی قائل کیتا ۔
” یسوع  نیں ایہہ جا ن کے پئی پیونیں ساریاں شیواں میرے ہتھ  وِچ  کر  دِتیاں
نیں تے میَں خُدا دے کولوں آیا تے فیر خُدا دے کول جاندا آں  ۔ کھانے توں اُٹھ کے لیڑے لائے تے رومال لے کے اَپنے لک نال بنیا ۔ ایہدے بعد بھانڈے وِچ پانی پا کے چیلیاں دے پیر دھون تے جیہڑا رومال لک نال بنیا سی اوہدے نال پُونجنے شروع کر دِتے ۔ فیر اوہ شمعون پطرس تیکر اَپڑیا ۔اوہنے اوہنوں آکھیا اَے خُداوند !کیہ تُوں میرے پیر دھوندا ایں؟یسوُع نیں جواب وِچ اوہنوں آکھیا جیہڑا میَں کرداآں تُوں ہُن نہیں جان دا پر بعدوں سمجھیں گا۔“ (یوحنا۱۳:۳۔۷)
اوہنے اپنے چیلیاں نُوں بپتسمہ دی خوشخبری تےاپنے بپتسمہ دے پانی دے راہیں پاپاں دے کفارے دی تعلیم دِتی ۔
اوس ویلے ،یسوُع نال وفاداری دا اِظہار کردے ہویاں ، پطرس ایہہ مجھن دی صفت نئیں رکھدا سی پئی یسوُع نے اوہدے پیرکیوں دھوتے۔ یسوُع دے کلام کرن توں بعد اوہدا یسوُع اُتے ایمان دھرن دا طریقہ بدل گیا ۔ یسوُع اوہناں پاپاں دی معافی تے اپنے بپتسمہ دے پانی دی خوشخبری دے بارے دَسناچاہنداسی ۔
 دُوجے لفظاں وِچ ، اوہ فکرکرداسی پئی پطرس اپنے آئندہ پاپاں دی وجہ توں یعنی مستقبل وِچ جِسم دے پاپاں دے سبب  اوہدے  کول  آن  دے  قابل  نہیں  ہو وے  گا۔  یسوُع  نے  اوہناں  دے  پیر
دھوتے تاں پئی ابلیس اوہدے چیلیاں دا ایمان کھو نہ لوے۔بعد وِچ پطرس سمجھ گیا پئی یسوُع نے ایویں کیوں کیتا؟
یسوُع نے راہ تیار کیتی تاں پئی جیہڑا وی اوہدے بپتسمہ دے پانی تے خون اُتے ایمان لیاوے اوہ ابدتیکر اپنے پاپاں توں مکتی پاوے ۔
یوحنا ١٣باب وِچ ،اوہنے اپنے چیلیاں دے پیردھوندے ہویاں جیہڑاکلام کیتا اوہ تحریری شکل وِچ موجود اے ۔ ایہہ بڑاای خاص کلام اے جِنہوں صِرف سچے طورتےنویں پیدائش داتجربہ رکھن والا بشرای سمجھ سکدااے۔
فسح دی عید توں بعد ،یسوُع اپنے چیلیاں دے پیر دھون دے راہیں اوہناں نُوں ایہہ سمجھن وچ مدد دینا چاہنداسی پئی اوہنے اوہناں دی ساری جندڑی دے پاپ پہلاں ای دھودِتے سَن ۔ یسوُع نے فرمایا، ” میَں کیوں تیرے پیر دھورہیا آں تُوں ہُن نہیں  جان دا پر بعدوں سمجھیں گا۔“ پطرس نُوں آکھے جان والے ایہناں لفظاں وِچ نویں سِرےتوں پیداہون دی سچیائی پائی جاندی اے۔
سانُوں ساریاں نُوں یسوُع دے بپتسمہ نُوں جانناتے اوہدے اُتے ایمان رکھناچاہی  دا  اے ،  جِنہے
ساڈی ساریاں بدکاریاں تے پاپ دُورکردِتے ۔ یردن وِچ یسوُع دابپتسمہ ہتھ رکھن دے راہیں پاپ نُوں منتقل کرن دی خوشخبری سی ۔ سانُوں ساریاں  نُوں یسوُع دے کلام اُتے ایمان لیانا چاہی دا اے۔ اوہنے اپنے بپتسمہ دے راہیں دُنیا دے سارے پاپ چُک لئے تے سزاجرن تے مصلوب ہون دے راہیں پاپاں دی معافی مکمل کیتی ۔ یسوُع نے سارے اِنساناں نُوں اوہناں دے سارے پاپاں توں رہائی بخشن لئی بپتسمہ لیا۔
 
 
ساڈ ی پوری جندڑی دِیاں خطاواں دی مکتی یسوُع دے
 بپتسمہ تے خون دے نال مکمل ہوئی۔
 
راستبازاں دےبرخلاف ابلیس دا کیہ’ جالاے؟
ابلیس اوہناں نُو ں فیر پاپی بنان دے سلسلے وِچ
راستبازاں نُوں دھوکہ دین دی کوشش کردا اے
 
یسوُع چنگی طرحاں جان داسی پئی اوہدے سُولی چڑھن توں بعد اوہ مویاں وِچوں جی اُٹھے گا، تے اَسمان اُتے چلاجاوےگا،تے ابلیس نالے جھوٹا ایمان کھلارن والے ، چیلیاں نُوں دھوکہ دین دی کوشش کرن گے ۔ اَسیں پطرس دی گواہی توں ویکھ سکدے آں،  ”  تُوں زندہ خُداداپُترمسیح ایں “پئی اوہ یسوُع اُتے ایمان دھرداسی ۔ پر ایہدے باوجود ، یسوُع پطرس نُوں فیرپاپاں دی معافی دی خوشخبری اوہدےذہن وِچ پکی کرنا چاہنداسی ۔ اوہ خوشخبری یسوُع دا بپتسمہ سی ، جِیہدے راہیں اوہنے دُنیا دے سارے پاپ دُور کردِتے ،اوہ پطرس ، دُوجے چیلیاں تے سانُوں تے بعد وِچ آن والے لوکاں نُوں فیر ایہدی تعلیم دینا چاہنداسی ۔” جیہڑا میَں کرداآں تُوں ہُن نئیں جان دا پر بعدوِچ سمجھیں گا۔“
جدوں یسوُع دے چیلیاں نے پاپ کیتا، ابلیس نے ایہہ کہہ کے اوہناں دی اَزمائش کیتی تے اوہناں نُوں مجرم ٹھہرایا،” ویکھو!جے تُسیں پاپ کردے او، تے تُسیں کِس طرحاں بےپاپ ہوسکدے او؟تسیں مکتی نئیں پائی ۔تُسیں صِرف اِک پاپی او۔“ ایس قِسم دے مرض نُوں روکن لئی ، یسوُع نے  اوہناں
نُوں دَسیا پئی اوہدے بپتسمہ اُتے اوہناں  دے  ایمان  نے  اوہناں  دی  ساری  حیاتی —  ماضی ، حال تے مستقبل دے پاپاں نُوں پہلے ای دھو دِتا سی ۔
” تُسیں جان دے او پئی میَں بپتسمہ لیا !یردن وِچ میرے بپتسمہ لین دی وجہ ایہہ سی  پئی  تُہاڈے ساری حیاتی دے تے پاپاں نُوں ، ایسے طرحاں اِنسان ذات دے مورُوثی پاپ نُوں وی دھودِتا جاوے ۔کیہ ہُن تُسیں ایہہ سمجھن دی قابلیت رکھ دےاو پئی میَں کیوں بپتسمہ لیا تے کیوں مینوں مصلُوب ہوناتے صلیب اُتے مرناپیا ؟ “ یسوُع نے  چیلیاں نُوں  ایہہ وکھان لئی اوہناں دے پیر دھوتے پئی اوہنے اپنے بپتسمہ دے راہیں اوہناں دے روز روزدےپاپ دُور کر دِتے یعنی اوہ اوہناں دی خاطر صلیب اُتے سزا نُوں جرے گا ۔
ہُن میَں تے تُسیں یسوُع دے بپتسمہ تے خون دی خوشخبری اُتے ایمان رکھن دے سبب اپنے سارے پاپاں توں چھُٹکارہ حاصل کر چُکے آں جیہڑا سانُوں ساڈے سارے پاپاں دی معافی حاصل کرن دے قابل کردا اے ۔ یسوُع نےساڈی خاطر بپتسمہ لیا تے صلیب اُتے ٹنگیا گیا ۔اوہنے اپنے بپتسمہ تےخون دے راہیں ساڈے سارے پاپ دھودِتے ۔اوہ ہر شخص جیہڑا پاپاں دے کفارے دی خوشخبری نُوں جان دا تے ایہدے اُتے ایمان رکھدا اے اپنے سارے پاپاں توں چھُٹکارہ حاصل کر چُکیا اے۔
فیر مکتی پاؤن توں بعد ،کِسے شخص نُوں کیہ کرنا چاہی دااے ؟اوہنوں ہرروز اپنے پاپاں دا اِقرار کرنا چاہی دااے تے یسوُع دے بپتسمہ تے خون دی مکتی یعنی اپنےسارے پاپاں دے کفارے دی خوشخبری اُتے ایمان رکھنا چاہی دا اے ۔پاپاں دی معافی دی خوشخبری اجیہی  شَےہے جیہڑی ،نویں سِرے توں پیدا ہوئے لوکاں دے ذہن اُتے گہرائی نال نقش ہونی  چاہی دی اے ۔
دُوجی وار پاپ کرن دے سبب ،کیہ تُسیں دُوجی وار پاپی بن جاؤگے ؟بالکل نئیں۔ ایہہ جان دے ہوئے پئی یسوُع نے پہلے ای ساڈے سارے پاپ دُورکردِتے نیں ،اَسیں دُوجی وار کِس طرحاں پاپی بن سکدے آں؟ یسوُع دابپتسمہ تے صلیب اُتے اوہدا وگن والا خون ای ساڈے سارےپاپاں دے کفارہ دی خوشخبری اے ۔جیہڑاو ی پاپاں دی معافی دی ایس سچی خوشخبری اُتے ایمان رکھدااےاوہ  ’راستباز ‘ شخص دے طورتے نویں سِرے توں پیدا ہو سکدا اے ۔
 
 
راستباز کدی دُوجی وارپاپی نئیں بن سکدے
 
کیوں راستباز کدی دُوجی وارپاپی نئیں بن سکدا؟
کیوں جے یسوُع پہلے ای اوہناں دے ساری
عمردے پاپاں دا کفارہ دے چُکیا اے
 
جے تُسیں پاپاں دی معافی ،یعنی پانی تے رُوح دی خوشخبری اُتے ایمان رکھن دے باوجود ، محسوس کردے اوپئی تُسیں روز روز دے پاپاں دی وجہ توں پاپی او ، تے تُہانوں یردن اُتے جانا پوےگا، جتھے یسوُع نے بپتسمہ لے کے ساڈے سارے  پاپاں نُوں چُک لیا سی ۔جے مکتی پاؤن توں بعد وی تُسیں پاپی بن گئے ،تے فیر یسوُع نُوں دُوجی وار بپتسمہ لینا پوے گا ۔ تُہانوں اَپنے پاپاں دی معافی اُتےیسوُع دے بپتسمہ دی خوشخبری اُتے ایمان رکھن دی لوڑ اے۔ تُہانوں یا درکھنا چاہی دا اے پئی یسوُع نے اپنے بپتسمہ دے راہیں تُہاڈےسارے پاپاں نُوں اِکوواری دُورکردِتا۔ تُہانوں یسوُع اُتے مکتی داتادےطورتے نہ مکن والا ایمان رکھنا اے ۔
یسوُع اُتے مکتی داتادےطورتے ایمان رکھن دا مطلب اے تُسیں یسوُع دے بپتسمہ اُتے ایمان رکھ دے او، جِنہے تُہاڈی حیاتی دے سارے پاپاں نُوں دُورکردِتا۔جے تُسیں سچی مُچی یسوُع دے بپتسمہ ، صلیب ،اوہدی موت تے مُردیاں وِچوں جی اُٹھن اُتے ایمان رکھ دے او ،تے فیر دُوجی وار کدی تُسیں پاپی نہیں بن سکدے ، بھانویں تہاڈے کولوں کِسے وی قِسم دا پاپ کیوں نہ ہوجاوے  ۔ تُسیں اپنے ایمان دی وجہ توں ساری حیاتی دے پاپاں توں مکتی حاصل کر چُکے او۔
یسوُع مسیِح نے چنگی طرحاں مستقبل دے پاپاں نُوں وی دھودِتا ، ایتھوں تیک پئی اوہناں پاپاں نُوں وی جیہڑے اَسیں اپنی کمزوری دے سبب کردے آں ۔کیوں جے یسوُع نُوں اپنے بپتسمہ دی اہمیت اُتے زور دینا سی ، ایس لئی اوہنے اپنے چیلیاں دے پیرپانی نال  دھو کے ،پاپاں دی معافی دی خوشخبری نُوں ،یعنی اپنے بپتسمہ نُوں ظاہر کیتا۔ یسوُع مسیِح نے بپتسمہ لیا ، سُولی چڑھیا ، مویاں وِچوں جی اُٹھیا، اَسمان اُتے چڑھ گیاتے دُنیا دے سارے پاپ تے پوری اِنسانی پیِڑھی دی مکتی لئی خُدا دے اُچیرے کفارے دا وعدہ پورا کیتا ۔ نتیجے دے طورتے ،اوہدے چیلے پاپاں دے کفارے دی خوشخبری ، یعنی  یسوع  دے  بپتسمہ،صلیب
تے مُردیاں وِچوں جی اُٹھن دی منادی اپنی جنڈری دے اَخیر تیکر کرن دے قابل سَن ۔
 
 
پطرس دی جِسمانی کمزوری
 
پطرس نے کیوں یسوُع دا اِنکار کیتا؟
کیوں جے اوہ کمزور سی
 
بائبل مقدّس  سانُوں دَسدی اے پئی جد پطرس کائفا،یعنی سردارکاہن دے نوکراں دے سامنے ہویا تے اوہناں نے اوہدے اُتے یسوُع دے مریداں وِچوں اِک ہون دااِلزام  لایا تے اوہنے دُوجی وار ایہہ کہندیاں ہویاں ،اوہدا اِنکار کیتا ، ” میَں ایس بندے نُوں نئیں جان دا۔“ فیر اوہنے تیجی واری لعنت کیتی تے قسم کھادی ۔
آؤاَسیں متی ۲٦: ۶۹۔۷۵توں ایہہ حوالہ پڑھیے ۔ ”تے پطرس باہرویہڑے وِچ بیٹھا سی پئی اِک نوکرانی نے اوہدے کول آکے آکھیا پئی تُوویں یسوُع گلیلی دے نال سی ۔ اوہنے سب دے سامنے ایہہ آکھ کے اِنکار کیتا پئی میَں نئیں جان دا تُوں کیہ آکھدی ایں۔ تے جد اوہ ڈیوڑھی وِچ چلا گیا تے دُوجی نے اوہنوں ویکھیا تےجیہڑے اوتھے سَن اوہناں نُوں  آکھیا پئی ایہہ وی یسوُع ناصری دےنال سی ۔ اوہنے قسم کھا کے اِنکار کیتا پئی میَں اوس بندے نُوں نئیں جان دا ۔ تھوڑی دیر بعد جیہڑے اوتھے کھڑے سَن اوہناں نے پطرس کول آکے آکھیا بے شک تُوویں ایہناں وِچوں ایں کیوں جے تیری بولی توں وی ظاہر ہوندااے۔ ایس اُتے اوہ لعنت کرن تے قسم کھا ن لگ پیا پئی میَں ایس بندے نُوں نئیں جان دا تے اوسے ویلے کُکڑ نے بانگ دِتی ۔پطرس نُوں یسوُع دی اوہ گل یاد آئی جیہڑی اوہنے آکھی سی پئی کُکڑ دے بانگ دین تو پہلا ں تُوں میرا تِن واری اِنکار کریں گا تے اوہ باہر جاکے پھُٹ پھُٹ کے رویا ۔ “ (متی۲۶ : ۶۹۔۷۵ )۔
پطرس سچی مُچی یسوُع اُتے ایمان رکھداتے وفاداری نال اوہدی پیروی کرداسی ۔ اوہدا ایمان  سی پئی خُداوند یسوُع مکتی داتا، تے آن والانبی سی ۔پرجد یسوُع نُوں پیلاطُس دے کٹہرے وِچ لیانداگیا، اوہدے لئی اِختیار والیاں دے سامنے یسوُع نال تعلق نُوں چھُپانا اوکھا ہو گیا،تے اوہنے یسوُع دا اِنکا ر کیتا تے اوہدے اُتے لعنت کیتی ۔
پطرس ایہہ نئیں جان دا سی پئی اوہ یسوُع دا اِنکار کرے گا،پر یسوُع نُوں پتہ سی پئی اوہ ایویں ای کرے گا ۔ یسوُع پطرس دی کمزوری نُوں مکمل طورتے جان دا سی ۔ اِنج یسوُع نے پطرس دے پیر دھوتے تے اوہدے ذہن وِچ مکتی دی خوشخبری جمادِتی ، جیہدا یوحنا ١٣باب وِچ ذِکراے، ” تُسیں آئندہ دِناں وِچ پاپ کروگے ،ایس لئی میَں تُہاڈے مستقبل دے پاپاں نُوں پہلے ای دھودِتا اے۔“
جد پطرس دی حیاتی خطرے وِچ سی تے بے شک اوہنے اِنکار کیتا ۔ پر ایہہ اوہدے جِسم دی کمزوری سی جِنہے اوہنوں ایویں کرن لئی مجبور کیتا ۔ ایویں ، اپنے چیلیاں نُوں اوہناں دی مستقبل دیاں  ناراستیاں توں چھُڈان لئی یسوُع نے پہلوں ای اوہناں دے پیر دھوتے ۔
” میَں تہاڈے مستقبل دے پاپاں دا وی کفارہ دیواں گا ۔مینوں ایس لئی مصلُوب ہونا سی کیوں جے میَں بپتسمہ لیا تے تُہاڈے سارے پاپ اَپنے اُتے چُک لئے ،تے میَں تُہاڈے سب دا سچامکتی داتا بنن لئی ایہناں سبھناں دی قیمت اداکراں گا۔میَں خُدا ، تُہاڈا مکتی داتا آں۔میَں تُہاڈے پاپاں دی پوری قیمت اداکراں گا، تے اَپنے بپتسمہ تے خون دے راہیں تُہاڈا آجڑی بناں گا ۔میَں تُہاڈی مکتی دا آجڑی آں ۔“
ایس سچیائی نُوں مضبوطی نال اوہناں دے دِلاں وِچ قائم کرن لئی ، یسوُع نے فسح دی عید دے بعدوں اوہناں دے پیر دھوتے ۔ ایہہ خوشخبری دی سچیائی اے ۔
نویں پیدائش حاصل کرن دے بعد وی ،کیوں جے ساڈا بدن کمزور اے، ایس لئی اَسیں دُوجی وار پاپ کراں گے ۔ بے شک، سانُوں پاپ نئیں کرنا چاہی دا ،پر جدوں ساڈے کولوں پاپ ہو جاندا اے تے سانُوں پطرس دی طرحاں سخت اوکھلاں داسامنا کرنا پیندا اے ، تے ساڈے کولوں نہ چاہندے ہویاں وی پاپ ہو جاندا اے۔ اَسیں جِسم وِچ حیاتی بسر کردے آں ، بعض ویلے اپنے پاپاں دی وجہ توں اَسیں تباہی دے کنڈھےاُ تے کھڑےہوجاندے آں۔ جد تیک اَسیں ایس دُنیاوِچ رہندے آں ساڈا بدن پاپ کردا رہوے گا ۔ پر یسوُع نے اپنے بپتسمہ تے صلیب اُتے خون وگان دے راہیں ایہناں سارے پاپاں نُوں مٹا دِتا۔
اَسیں یسوُع دے مکتی داتا ہون دا انکار نئیں کردے ، پرجدوں اَسیں جِسم وِچ حیاتی  بسر کر دے
آں ، تے خُدا دی مرضی دے خلاف پاپ کرنا جاری رکھدے آں۔ ایہہ ساڈے جِسم نال پیدا  ہون دی وجہ توں ایں ۔
یسوُع چنگی طرحاں جان دا سی پئی اَسیں جِسم وِچ جیوندیاں ہویاں پاپ کراں گے، ایویں یسوُع اپنے بپتسمہ تے خون دے راہیں ساڈے پاپاں دی قیمت ادا کرن دے سبب ساڈا مکتی داتا بن گیا ۔ اوہنے اوہناں سب نُوں اوہناں دے پاپاں توں مکتی بخشی جیہڑے اوہدی مکتی تے اوہدے مویاں وِچوں جی اُٹھن اُتے ایمان لیائے ۔
 ایسے وجہ توں چونہہ انجیلاں دا شروع یوحنا اصطباغی دے راہیں یسوُع دے بپتسمہ لین توں ہوندا اے ۔اوہدی جِسمانی حیاتی دا مقصد نویں پیدائش حاصل کرن دی خوشخبری ،یعنی مکتی دی خوشخبری نُوں توڑچاڑھنا سی ۔
 
اَسیں جِسم وِچ کِنّی دیر تیک پاپ کردے آں؟
اَسیں اپنی پوری حیاتیاں وِچ پاپ کردے آں
اوس دِن تیکر جد تیک اَسیں مرنئیں جاندے
 
جد پطرس نے اِک واری نئیں دو واری نئیں سگوں تِن واری کُکڑ دے بانگ دین تو پہلاں اوہدا اِنکار کیتا ، تے لازمی طورتےاِنج کیتاں اوہد ا دِل کس قدر ٹُٹیا ہووےگا ؟ اوہ کس قدر شرمندگی محسوس کرداہووے گا ؟ اوہنے یسوُع دے سامنے قسم کھادی سی پئی کدی اوہدا اِنکار نئیں کرے گا ۔ اوہنے اپنے بدن دی کمزوری دے سبب پاپ کیتا پر اوہنے اوس ویلے خُودنُوں کس قدر نفرت دے قابل محسوس کیتا ہووے گا جد اوہ اپنی کمزوری دا شکار ہویا تے اِک واری نئیں سگوں تِن واری یسوُع دا اِنکار کیتا؟ جد یسوُع نے اوہدے اُتے نظر کیتی ہووے گی تے اوہنے خُود نُوں کس قدر مایوس جاپیا ہووے گا ؟
پر یسوُع ایہہ سب کُجھ تے ہوروی جان دا سی ۔ایس لئی اوہنے فرمایا ، ” میَں جان داآں ،تُوں فیر گھڑی مُڑی پاپ کریں گا۔پر میَں پہلے ای اپنے بپتسمہ دے راہیں ایہناں سب پاپاں نُوں دُور کردِتا ،کِتے تُہاڈے پاپ تُہاڈے لئی ٹھوکر دا سبب نہ بنن تے تُہانوں میرے توں پِچھاں پاپ ول پھیر دین ،ایویں نہ ہووے پئی تُہانوں میرے کول فیر آنا ناممکن نظر آوے  ۔ میَں بپتسمہ لین تے تُہاڈے پاپاں دی سزا جھلن دے سبب مکمل طورتے تُہاڈا مکتی داتا ٹھہریا آں ۔ میَں خُدا ،تہاڈا آجڑی بن گیا آں۔ اپنے پاپاں د ی معافی دی خوشخبری اُتے ایمان لیاؤ۔ بھانویں جِسم وِچ تُہاڈے کولوں لگاتار پاپ ہوندے رہن تے فیر وی میَں تُہاڈے نال محبت کردارہواں گا ۔میَں پہلے ای تُہاڈیاں بدکاریاں دُور کردِتیاں نیں ۔تُہاڈے پاپاں دی معافی دی خوشخبری ابد تیکر مؤثر اے ۔ تُہاڈے لئی میری محبت وی اَبدی اے۔“
یسوُع نے پطرس تے باقی چیلیاں نُوں دسیا ، ”جے میَں تینوں نہ دھوواں تے تُوں میرے نال شامل نئیں ۔“ یوحنا ١٣ باب وِچ ایس خوشخبری نُوں بیان کرن دی ایہہ وجہ سی پئی اِنسان نُوں پانی تے رُوح نا ل نویں پیدائش حاصل کرن لئی ایہہ بوہت ضروری سی ۔ کیہ تُسیں ایس گل اُتے ایمان رکھدے او ؟
۹آیت وِچ لِکھیا اے، ” شمعون پطرس نیں اوہنوں آکھیا ،اَے خُداوند !صِرف میرے پیر ای نئیں سگوں ہتھ تے سر وی دھودے۔یسوُع نیں اوہنوں آکھیا جیہڑا نہا چُکیا اے اوہنوں پیر دے اَڈ کُجھ ہوردھون دی لوڑ نئیں ،سگوں بالکل پاک اے۔“
سوہنے متر و،کیہ تُسیں آئندہ ’  جِسم وِچ پاپ‘  کرو گے   یاں   نئیں ؟  تُسیں  لازمی   طور  تے   پاپ کروگے ۔ پر یسوُع نے فرمایا پئی اوہنے مستقبل دےپاپ وی دھودِتے نیں ، یعنی اپنے بپتسمہ تے خون دے راہیں ساڈے بدن دیاں ساریاں بدکاریاں دُور کر دِتیاں نیں، تے اوہنے واضح طورتے سچیائی دے کلام نُوں ، یعنی مصلوبیت توں پہلاں کفارے دی خوشخبری نُوں ، اپنے چیلیاں دے سامنے بیان کیتا ۔
کیوں جے اَسیں اپنی ساری کمزوریاں دےنال بدن وِچ حیاتی بسر کردے آں، ایس لئی اَسیں پاپ کرنا بند نئیں کر سکدے ۔ یسوُع نے اپنے بپتسمہ دے راہیں دُنیا دے سارے پاپ دھودِتے ۔اوہنے صِرف ساڈے سِرتے بدناں نُوں ای نئیں ،سگوں ساڈے پیر یعنی ساڈے مستقبل دے پاپاں نُوں وی دھودِتا ۔ ایہہ نویں پیدائش حاصل کرن لئی ، یسوُع دے بپتسمہ دی خوشخبری اے۔
یسوُع نُوں بپتسمہ دین توں بعد ،یوحنا اصطباغی نے گواہی دِتی ، ” ویکھو! ایہہ خُدا دا برّہ اے جیہڑادُنیا داپاپ چُکی لے جاندا اے “ (یوحنا۱:۲۹) سانُوں ایمان رکھنا چاہی دا اے پئی جد یسوُع نے بپتسمہ لیا دُنیا دے سارے پاپ یسوُع اُتے منتقل  ہون دے راہیں دُور کر دِتے گئے ۔
ایس پاپی دُنیا وِچ حیاتی بسرکردے ہویاں  ،اِنسان پاپ کرنا بند نئیں کر سکدا ۔ ایہہ واضح سچیائی اے ۔ جد کدی ساڈے بدن دی کمزوری سر چُک دی اے ، سانُوں خُود نُوں یاد کروان دی لوڑ اے پئی یسوُع نے ساڈے تے دُنیا دے سارے پاپ معافی دی خوشخبری دے راہیں دُور کر دِتے تے اپنے خون دی وجہ توں اوہناں دی قیمت ادا کیتی ۔ سانُوں دِل دِیاں ڈونگھائیاں توں اوہدا شکر اداکرنا چاہی دا اے۔ آؤ ایمان نال اِقرار کریے پئی یسوُع ساڈا مکتی داتا تے ساڈا خُدا اے ۔خُداوند دی وڈیائی ہووے ۔
ایس دُنیا وِچ رہن والا ہرشخص جِسم وِچ پاپ کردااے ۔ لوک پوری حیاتی  جِسم  وِچ مسلسل  پاپ
کردے نیں تے مرجاندے نیں۔
 
 
لوکاں دے دِلاں وِچ بھیڑے خیال
 
کِسے شخص نُوں کیہ ناپاک
 کردا اے ؟
مختلف قِسم دے پاپ تے
 بھیڑے خیال
 
متی ١٥ : ١۹ ۔۲۰وِچ یسوُع فرماؤندا اے،  ” کیوں جے بھیڑے خیال ۔ خون ریزیاں ۔ زناکاریاں ۔حرامکاریاں ۔چوریاں ۔ جھوٹی گواہیاں ۔ بدگوئیاں دِل وِچوں ای نکلدیاں نیں ۔ ایہو گلاں نیں جیہڑیاں بندے نُوں ناپاک کر دیاں نیں پر ہتھ دھوتے اَڈ کھانا کھانا بندے نُوں ناپاک نئیں کردا ۔ “ کیوں جے بندے دے دِل وِچ موجود بوہت سارے پاپ اوہنوں ناپاک کردے نیں ، ایس لئی اوہ ناپاک اے ۔
 
 
ہر بندے نُوں اَپنی بھیڑی فطرت پچھاننی چاہی دی اے
 
ہر اِنسان دے دِل وِچ کیہ اے ؟
بارہ قِسم د ے پاپ (مرقس ۷:۲۱۔۲۳)
 
سانُوں ایہہ آکھن دے قابل ہونا ایں ، ” ایہہ بارہ قِسماں دے پاپ لوکاں دےدِلاں وچ پائے
جاندے نیں۔ ایہہ سب میرے دِل وِچ وی پائے جاندے نیں۔ ایہہ بارہ قِسم دے پاپ میرے اندر پائے جاندے نیں جِناں دا ذِکربائبل مقدّس وِچ پایا جاندا اے ۔“پانی تے رُوح نال نویں پیدائش حاصل کرن توں پہلا ں سانُوں اپنے دِلاں وِچ پائے جان والے مورُوثی (پیودادیاں وَلوں)پاپاں دا اِقرار کرنا پوےگا ۔ سانُوں مَنناپوے گا پئی اَسیں خُدادے حضُور مکمل طورتے پاپی آں ۔ پر اَسیں بوہت واراں اِنج نئیں کردے ۔ساڈے وِچوں بوہت سارےلوک ایہہ آکھدے ہوئے اپنے پاپاں لئی بہانے بناؤندے نیں،  ” ایہہ خیال میرے دِل وِچ پہلے موجود نہیں سَن ،میَں گھڑی پل لئی گمراہ ہوگیا ساں ۔ “
پر یسوُع نے بندے دے بارے کیہ آکھیا؟ اوہنے واضح طورتے بیان کیتا پئی جیہڑا کُجھ بندے دے دِل وِچوں نکلدا اے اوہنوں ’  ناپاک ‘  کردااے۔ اوہنے سانُوں دَسیا پئی بندے دے دِل وِچ ناپاک خیال پائے جاندے نیں۔ تُسیں کیہ سوچ دے او؟ کیہ تُسیں نیک او یاں بد او ؟ کیہ تُسیں جان دے او پئی ہربندے دے دل وِچ ناپاک خیال پائے جاندے نیں ۔ آہو، ہر کِسے دے خیال بھیڑے نیں۔
چند وَرہے پہلاں سیول کوریاوِچ ، اِک وَڈا ڈیپارٹمنٹل سٹور اچانک ڈِگ گیا  ۔جِنہاں خانوادیاں دے سوہنے اَپنیاں جاناں کھوبیٹھے اوہ خانوادے بڑےغمگین سَن، پر بوہت سارے لوک ایس افسوسناک واقعے توں سواد لین لئی اوتھے گئے ۔
کُجھ نے سوچیا ، ”کِنّے لوک مرے؟دوسو؟ نئیں ، ایہہ تعداد بوہت گھٹ اے۔ خورے ؟ تِن سو؟ خیر ،جے مر ن والیاں دی تعداد گھٹوگھٹ اِک ہزارہوندی  ۔ ۔ ۔ ۔ “تے ایہہ بوہتی دِلچسپی تے ویکھن دے لائق نظارہ ہوندا۔ لوکاں دے دل ایس حد تیک بدکار ہو سکدے نیں۔ سانُوں ایہہ قبول کرنا ایں۔ایہہ مرن والیاں دی کس قدر بے قدری سی ۔ ایہہ خانوادیاں لئی کس قدر پریشانی دی گل سی !کجھ خانوادے مالی طورتے تباہ ہوگئے۔
پر کجھ تماشہ ویکھن والے بوہت زیادہ ہمدردی دے جذبے نئیں رکھدے سن ۔ ”جے ہور زیادہ لوک ہلاک ہوندے تے تماشہ بوہتا دلچسپ ہوندا!کِویں دا نظارہ ہوندا!کیہ ہوندا جے ایہو کم لوکاں نال بھرے ہوئے بیس بال دے میدان وِچ ہویا ہوندا ؟ہزاراں لوک ملبے تھلے دَب جاندے ، کیہ اوہ نہ دب دے ؟ آہو!ایہہ واقعہ ایہدے توں بوہتی دلچسپی دا سبب ہوندا! “ بے شک کجھ لوکاں نے اِنج سوچیا ہووے گا ۔ ایہو کجھ اَسیں کاراں دے حادثیاں دے بارے سُن سک دے آں ۔بے چین تماشہ گیر چھوٹی ہلاکتاں اُتے مایوس ہون دا رُجحان رکھدے نیں۔
اَسیں سب جان دے آں پئی بعض ویلے اَسیں کس قدر بدکار ہو سکدے آں۔ بے  شک  اَسیں
ایہنوں اُچی آواز وچ بیان نئیں کراں گے ۔ خورے اوہ اپنیاں جیبھاں ہلاکے ہمدردی دا اظہار کرن جد اَسیں کسے حادثے نوں اچانک ویکھ دے آں، پر اوہلے ، اپنے دِلاں دے اندر ،ساڈے ٹِڈھ وچ ہوربوہتے نظارے ویکھن دی سدھر موجود اے۔ اَسیں خوفناک حادثے ویکھنا چاہندے آں، جتھے ہزاراں لوک ہلاک ہون، جتھے تیک ایہہ ساڈی دلچسپی دے خلاف نہیں جاندا ۔ انسان دا دل ایس طرحاں کم کردااے ۔ ساڈے وچوں بوہتے لوک نویں پیدائش حاصل کرن توں پہلاں ایویں دے ہوندے نیں ۔
 
 
ہر بندے دے دِل وچ خونریزی
                             
اَسیں کیوں پاپ کردے آں؟
کیوں جے اَسیں اپنے دِلا ں وچ بھیڑے خیال
رکھدے آں
 
خُدا نے سانوں دسیا پئی بندے دے دل وچ خونریزی پائی جاندی اے۔ پر بوہت سارے لوک ایس گل دا خُدا دے سامنے ایہہ آکھ کےانکارکرن گے، ” تسیں کس طرحاں ایہہ آکھ سکدے او!میں اپنے دل وچ  کوئی قاتلانہ خیال نہیں رکھ دا آں! کیویں تُسی مینوں انج دا بندہ خیال کر سکدے او! “ اوہ لوک کدی نئیں منن گے پئی اوہناں دے دِلاں وچ خونریزی پائی جاندی اے ۔اوہناں دے خیال وچ قاتل کسے ہو رپیڑھی و چوں ہوندے نیں ۔
” اوس دِن والی خبراں وِچ پیشہ ور قاتل دی خبر آئی ، ایہدے وِچ اجیہے لوکاں دے بارے دَسیا گیا جِنہاں نے لوکاں نوں قتل کرکے اپنے تہہ خانیا ں وِچ دفن کردِتا،ایہہ اوہ لوک سَن جناں دے دِلاں وِچ خونریزی پائی  جاندی سی !ایہہ مختلف پیِڑھی اے ۔ میَں اوہناں ورگانہیں ہوسکدا!اوہ بدمعاش لوک نیں !قاتل! “ اوہ غصے وِچ آکے شور پاندے نیں،  ” ایس بدکاری دی پیِڑھی نُوں ایس  زمین توں مٹا  دِتا جانا چاہی دا اے !ایہناں ساریاں نُوں سزائے موت دا حکم دِتاجانا چاہی دا اے ! “
پر بھیڑی قسمت نال ،خونریزی دا خیال ایہناں غضبناک ،پیشہ ور قاتلاں  تے  خون  کرن  والے
دے خیالاں وِچ پایا جاندا اے ۔ خُداسانُوں دَسدا اے پئی سارے بندیا ں دے دِلاں وِچ خون ریزی پائی جاندی اے ۔ سانُوں خُدا دے کلام نُوں قبول کرنا چاہی دا اے جیہڑا ایتھوں تائیں پئی ساڈے اندر لُکی ہوئی شَیواں نُوں ویکھ دا اے ۔ ایویں ، سانُوں مَننا چاہی دااے ،” میَں اجیہا پاپی آں جیہدے دِل وِچ خون ریزی پائی جاندی اے۔“
آہو ،خُداسانُوں دَسدااے پئی سارے بندیاں دے دِل وِچ بھیڑے خیال پائے جاندے نیں جناں وِچ خون ریزی وی شامل اے۔آؤ خُدا دے کلام نُوں قبول کریے ۔ پیِڑھیاں جس قدربدکار ہوندیاں جاندیاں نیں ،ہر طرحاں دے حفاظتی ہتھیار مارمکان دے ہتھیار بن دے جاندے نیں ۔ ایہہ سب ساڈے دِلاں وِچ خون ریزی دی وجہ توں اے۔تُسیں غصے یاں خوف دے عالم وِچ قتل کر سکدے او۔ میَں ایہہ نئیں آکھ رہیا پئی ساڈے وِچوں ہر اِک سچ مُچ دُوجیاں نُوں قتل کرے گا ، پر ساڈےدِلاں وِچ ایہہ خیال پایا جاندااے ۔
اَسیں سب اپنے دِلاں وِچ بھیڑے خیالاں دے نال پیدا ہوئے آں۔ کُجھ لوک بے شک تیک پوہنچدے نیں ، ایس لئی نہیں پئی اوہ پیدائشی طورتے قاتل ہوندے نیں ،سگوں ایس لئی پئی ساڈے سبھناں وِچ قاتل بنن دی خصلت پائی جاندی اے ۔ خُداسانُوں دَسدا اے پئی ساڈے دِلاں وِچ بُرے خیال تے  خونریزی پائی جاندی اے۔ایہہ سچ اے۔ ساڈے وِچوں کوئی ایس سچیائی دا اِنکار نئیں کر سکدا ۔
ایویں ، ساڈے لئی ٹھیک راہ ایہہ ہے پئی خُدا دے کلام نُوں قبول کریے تے اوہدے پِچھے چلیے ۔ اَسیں ایس دُنیا وِچ ایس لئی پاپ کردے آں کیوں جے ساڈے دِلاں وِچ بھیڑے خیال پائے جاندے نیں۔
 
 
ساڈے دِلاں وِچ زناکاری
 
خُدا فرماؤندا اے پئی ہر بندے دے دِل وِچ زناکاری پائی جاندی اے۔ کیہ تُسیں متفق او؟ کیہ تُسیں من دے او پئی تُہاڈےدِل وِچ زناکاری پائی جاندی اے؟آہو،ہر بندے دے دِل وِچ زناکاری پائی
جاندی اے۔
ایس وجہ توں جِسم ویچن تے دُوجے بدکاری دے دھندے  وسیب  وِچ  سِرے  چڑھدے نیں ۔
ایہہ دھنداہراِنسانی تاریخ دے دَور وِچ دولت کمان دا سب توں بوہتا محفوظ طریقہ رہیا اے ۔ دُوجے کاروبار معاشی بحران دی وجہ توں متاثر ہو سکدے نیں ، پر ایہہ بدکاری دے کاروبار زیادہ متاثر نئیں ہوندے ، ایس لئی پئی ہر بندے دے دِل وِچ زناکاری وَسدی اے۔
 
 
پاپیاں دا پھل پاپ اے
 
انسان ذات دا موازنہ کیہدے نال ہوندا اے؟
اوس درخت نال جیہڑا صِرف پاپ دے
پھل پیدا کردا اے
 
جِویں سیب دا بوٹا سیب پیداکردا اے،ناشپاتی دا بوٹا ناشپاتی        ،کھجوردابوٹا کھجورتے کینودابوٹا کینو پیدا کردا اے، ایویں اَسیں ، جیہڑے اپنے دِل وِچ بارہ قِسم دے پاپ لے کے پیدا ہوئے آں ،بچ نئیں سکدے سگوں پاپ دےپھل پیداکردے آں۔
یسوُع فرماؤندا اے پئی جیہڑا کُجھ بندے دے اندروں نکلدااے اوہ اوہنوں ناپاک کردااے ۔ کیہ تُسیں متفق او؟ اَسیں صِرف یسوُع دے کلام نال متفق ہوکے آکھ سکدے آں،” آہو،اَسیں پاپی یعنی بدکاراں دی   پیِڑھی آں۔ آہو ،اے خُداوند ، تُوں ٹھیک فرماؤندا ایں۔“ آہو ،سانُوں اپنی بدیاں نُوں مَنناچاہی دا اے ۔ سانُوں خُدا دے حضُور اپنے بارے سچیائی نُوں مَننا چاہی دااے ۔
جِس طرحاں یسوُع مسیِح نےخُدادی مرضی دی فرمانبرداری کیتی ، اوسے طرحاں سانُوں وی خُدا دے کلام نُوں قبول کردے ہویاں ، اوہدی پیروی کرنی اے۔ ایہہ پانی تے رُوح دے راہیں اپنے سارے پاپاں توں بچن دا واحد رستہ اے۔ایہہ خُدا وَلوں نعمتاں نیں۔
میرے ملک نُوں چونہہ موسماں دی سوہنی برکت ملی اے۔ جد موسم تبدیل ہو ندااے، تے مختلف قِسماں دے بوٹے اپنے پھل پیدا کردے نیں۔ بالکل ایسے طرحاں ، ساڈے دِلاں وِچ پائے جان والے بارہ پاپ ساڈے  اُتے  قابض نیں  تے  لگاتارساڈے کولوں  پاپ کراؤندے نیں۔  اَج ، خورے
ساڈے دِلاں اُتے خونریزی دا قبضہ ہو سکدا اے جد پئی کل خورے زناکاری دا قبضہ ہووے۔
فیر ، ایس توں اَگلے دِن ، بھیڑے خیال ، فیر حرامکاری ، چوری ، جھوٹی گواہی ۔ ۔ ۔ ۔ تے ایرہ وغیرہ ۔ اَسیں سارے وَرہے ، ہر مہینے ، ہردِن ، ہر ویلےپاپ کردے رہندے آں ۔ کوئی اجیہا دِن نئیں لنگھداجیہدے وِچ اَسیں کِسے قِسم دا پاپ نئیں کردے۔ اَسیں  اَپنے آپ وِچ پاپ توں دُور رہن دِیاں قسماں کھاندے رہندے آں پئی اَسیں  پاپ نئیں کراں گے، پر اَسیں  پاپ کرن توں باز نئیں رہ سکدے ایس لئی پئی اَسیں ایسےطرحاں پیدا ہوئے آں ۔
کیہ تُسیں کدی سیب دا اجیہا بوٹا ویکھیا اے جِنہے سیب پیدا کرن توں ایس لئی اِنکارکیتا ہووے پئی اوہ ایویں کرنا نئیں چاہندا؟  ” میَں سیب پیدا نہیں کرنا چاہندا! “بے شک بھاویں اوہ پھل پیدا نہ کرن دا پکا اِرادہ کرلوے،تے فیر وی اوہ کس طرحاں سیب پیدا نئیں کرےگا؟ پھُل ہر حال وِچ بہار وِچ اَپنے ویلے تےکھڑن گے ،سیب گرمی وِچ وَدھن گے تے پکن گے ، تےاوہناں دا پھل توڑن تے لئی تیارہووے گا،تے  پت جھڑ دے موسم وِچ کھاہداجائے گا۔
ایہہ رب دی قُدرت دا اِنتظام اے ،تے پاپیاں دی حیاتی نُوں  وی   لازمی   طور  تے  قُدرت  دے
ایسے اِنتظام دے پِچھے چلنا چاہی دا اے۔ پاپی بچ نئیں سکدے سگوں پاپ دا پھل پیدا کردے نیں ۔
 
 
’ یسوُع دےبپتسمہ تے صلیب نوں ‘  ساڈے پاپاں دا کفارہ دینا سی
 
یسوُع دے فدیے توں کیہ مُرا داے ؟
ایہہ یسوُع دے بپتسمہ (ہتھاں دے رکھے جان )تے اوہدے
صلیبی خون دے راہیں پاپ دی مزدوری اے
 
آئیےایہہ جانن لئی بائبل مقدّس  وِچوں اِک حوالہ پڑیےپئی پاپی ، بدکاراں دی پیِڑھی ، کِس طرحاں خُدادےحضور اپنے پاپاں داکفارہ دے سکدی تے خوشحالی وِچ حیاتی بسر کرسکدی اے ۔ایہہ پاپاں دے کفارہ دی خوشخبری اے۔
احبار۴ باب وِچ ، اِنج لکھیا اے،  ”تے جے کوئی عام بندیاں وِچوں اِرادیوں اَڈ خطا کرے تے اوہناں کماں وِچوں جِنہاں توں خُدا نے منع کیتا اےکِسے کم نُوں کرکے مجرم ہو جاوے ۔ تے جد اوہ خطا جیہڑی اوہنےکیتی  اوہنوں د سی جاوے تے اوہ اپنی اوس خطا دے سبب جیہڑی اوہدے کولوں ہوئی اِک بے عیب بکری لیاوے۔ تے اوہ اپنا ہتھ خطادی قربانی دے پسُو اُتے دھرے تے خطا دی قربانی دے ایس پسُو نوں سوختنی قربانی دی تھاں اُتے ذبح کرے۔ تے کاہن اوہدا کُجھ خون اپنی اُنگلی اُتے لے کے اوہنوں سوختنی قربانی دے مذبح دے سِنگاں اُتے لاوے تے اوہدا بقایا سارا خون مذبح دے پاوے اُتے ڈوہل دیوے۔ تے اوہ اوہدی ساری چربی نُوں وکھریاں کرے جِویں سلامتی دے ذبیحہ دی چربی وکھری کیتی جاندی اے تے کاہن اوہنوں مذبح اُتے راحت انگیز خوشبو دےطورتے خُداوند لئی ساڑے ۔ ایویں کاہن اوہدے لئی کفارہ دیوے تے اوہنوں معافی ملے گی  ۔“ (احبار ۴:۲۷۔۳۱)۔
پُرانے عہد نامہ دے دَور وِچ لوک کِس طرحاں لوک اَپنےپاپاں دا کفارہ دیندے سَن؟اوہ پہلے پاپ دی قربانی دے پسُو دے سِر اُتے اپنے ہتھ رکھدے تے اوہدے اُتے پاپ لددیندے سَن ۔
احبار دی کتاب وِچ لِکھیا اے۔ ” بنی اِسرائیل نُوں آکھ پئی جد تُہاڈے وِچوں کوئی خُداوند لئی چڑھاوا چڑھائے تے تُسیں ڈنگراں یعنی گاں، وَچھے تے بھیڈ بکری دا چڑھاواچڑھانا ۔ جے اوہدا چڑھاگاں وَچھے دی سوختنی قربانی ہووے تے اوہ بے عیب نَر نُوں لے کے اوہنوں خیمہ ء اِجتماع دے بُوہے اُتے چڑھائے تاں پئی اوہ خُود خُداونددے حضُور مقبول ٹھہرے ۔ تے اوہ سوختنی قربانی دے پسُو دے سر اُتے اپنا ہتھ رکھے تے فیر اوہ اوہدے وَلوں مقبول ہوئے گا تاں پئی اوہدے لئی کفارہ ہووے۔“ (احبار ۱: ۲ ۔ ۴)۔
جداوس دَور دے شخص نے اپنے دِل وِچ پاپ کیتا، تےاوہنوں پاپ دی قربانی تیار کرنی پیندی سی جیہڑی پاپ دے فدیے لئی وَرتی جاندی سی ۔اوہنوں پاپ دی قربانی دے سِر اُتے پاپاں نُوں لدن لئی اپنے     ’ ہتھ رکھنے ‘ پیندے سَن ،جِنہوں نُوں اوہ کر چُکیا سی ۔پاک خیمہءاجتماع دے ویہڑے وِچ ، سوختنی قربانی دا مذبح سی ۔ ایہہ اِک صندوق دی طرحاں سی ،جیہڑا منبردی میز توں بھورا جیہا وڈا سی ، تے اوہدے چونہہ کونیاں اُتے سنگ سَن ۔ بنی اِسرائیل پاپ دی قربانی دے پسُو دے سر اُتے ہتھ رکھن دے راہیں اپنے پاپاں دا کفارہ دیندے تے اوہدا گوشت سوختنی قربانی دے مذبح اُتے ساڑدے سَن۔
خُدا نے احبار دی کتاب وِچ لوکاں نُوں آکھیا پئی ،” اوہ اپنی مرضی نال  اوہنوں  خیمہ  ء  اجتماع
دے ویہڑے دے بوہے اُتے اوہنوں خُدا دے حضُور ساڑن۔ “ جداوہ پاپ دی قربانی دے ایس پسُو دے سِر اُتے ہتھ رکھدے تے اوہناں دے پاپ اوہدے اُتے منتقل ہو جاندے سَن، تے فیر پاپی شخص اوہنوں ذبح کرداتے اوہداخون سوختنی قربانی دے مذبح دے سِنگاں اُتے لاندا ۔
ایہدے بعدوں  ، ایس قربانی دے پسُو نُوں دھوکے اوہدے اندرلے اَنگاں نُوں صاف کیتا جاندا تے اوہد ے گوشت دے ٹوٹے کرکے اوہنوں سوختنی قربانی دے مذبح دی سواہ اُتے جلایا جاندا۔ فیر اوہناں دے کفارہ لئی اوہدے گوشت دی راحت انگیز خوشبو ،خُدا دے حضُور چڑھائی جاندی سی ۔ ایویں اوہ اپنے روز روزدے پاپاں دا کفارہ دیندے سَن۔
خُدانے اوہناں نُوں سالانہ پاپاں دے کفارے دی قربانی دی وی اِجازت دِتی ۔ایہہ روز روزدے پاپاں دے کفارہ دی قربانی توں مختلف سی ۔ ایس صورت وِچ ،سردار کاہن کَلّا ، بنی اِسرائیل دی تھاں اُتے پاپ دی قربانی دے پسُو دے سِراُتے ہتھ رکھدا تے رحمگاہ دے پُورب وَل ست واری خون چھڑک دا سی۔ ایسے طرحاں ، ہر وَرہے دے ستویں مہینے دی دسویں تاریخ نُوں بنی اِسرائیل دے سامنے زندہ بکرے دے سِر اُتے ہتھاں دا رکھیا جانا ادا کیتا جاندا سی (احبار١٦ : ٥۔۲۷)۔
 
پُرانے عہد نامہ دی پاپ دی قربانی نُوں
کون ظاہرکردااے ؟
یسوُع مسیِح
 
 ہن آؤاَسیں ویکھیے پئی نویں عہد نامہ وِچ قربانیاں دا نظام کِویں تبدیل ہویا تے خُدا دا ابدی آئین کِس طرحاں وَرہیاں توں ہُن تیک قائم اے ۔
یسوُع نُوں کیوں صلیب اُتے اپنی جان دینی پئی ؟اوہنے اِس زمین اُتے  کیہ  غلط  کیتا  پئی  خُدا  نے اپنے پُتر نُوں صلیب اُتے مرن دِتا ؟ کِنّہے اوہنوں صلیب اُتے مرن لئی مجبور کیتا؟ جد دُنیا دے سارے پاپی ، یعنی اَسیں سب پاپ وِچ ، ڈِگ گئے تے یسوُع اوس ویلے سانُوں چھُڈان لئی آیا ۔
اوہنے یردن وِچ یوحنا اصطباغی کولوں بپتسمہ لیا تے صلیب اُتے اِنسانی پیِڑھی دی تھاں اُتے سارے پاپاں دی سزا نُوں جھلیا ۔ جِویں یسوُع  نے بپتسمہ لیا ، صلیب اُتے اپنا خون روڑھیا، اوہ  بالکل  پُرانے
عہدنامہ دے کفارہ دے وانگر سی، یعنی پاپ دی قربانی دے پسُو دے اُتے ہتھ رکھنا تے اوہدا خون وگانا،ہُوبہُو  ملداسی ۔
پُرانے عہد نامہ وچ ایس طرحاں کیتا جاندا سی ۔ پاپی بندہ پاپ دی قربانی دے پسُو دے سِر اُتے ہتھ دھردا تے اپنےپاپاں دا ایہہ آکھ کے اِقرار کرداسی، ” اَے خُداوند میَں پاپ  کیتا۔میَں خونریزی  تے زناکاری کیتی اے۔ “ فیر ، اوہدے پاپ،پاپ دی قربانی دے پسُو اُتے منتقل ہو جاندے سَن ۔
جس طرحاں پاپی شخص پاپ دی قربانی دے پسُو نُوں ذبح کرداتے اوہنوں خُدادےحضُور پیش کرداسی ، یسوُع نُوں وی اوسے طرحاں ساڈے پاپاں دی معافی دی خاطر قربان کردِتا گیا ۔یسوُع نے میری تے تہاڈی خاطر بپتسمہ لیا ،صلیب اُتے اپنا خون وگایا تے اپنی قربانی دے راہیں سارے پاپ معاف کر دِتے ۔
اصل وِچ، یسوُع ساڈی خاطر مویا ۔جد اَسیں اوہدے بارے سوچ دے آں ، تے اوہناں بے عیب پسُواں نُوں لوکاں دے سارے پاپاں دی خاطر قربان کرن تو کیہ مُراد سی ؟ کیہ  اوہناں سارے پسُواں نُوں پاپ دے بارے عِلم سی ۔ پسُوپاپ نُوں جان دے نئیں سَن ۔ اوہناں بے عیب رہنا سی ۔
ایہناں بے عیب پسُواں دی طرحاں ، یسوُع وِچ، وی،کوئی پاپ نئیں پایا جانداسی ۔ اوہ پاک خُدا، خُدادا پُتر اے تے اوہنے کدی پاپ نئیں کیتا ۔ ایویں ، جد اوہ ٣۰ وَرہے داہویا تے اوہنے یردن وِچ بپتسمہ لین دے راہیں ساڈےسارے پاپ چُک لئے۔
یسوُع صلیب اُتے اوہناں پاپاں دی وجہ توں مریا جیہڑے اوہنے ساڈے کولوں لے لئے ۔ ایہہ مکتی لئی اوہدی خدمت سی جِنہے اِنسان ذات دے سارے پاپاں نُوں دھودِتا۔
 
 
پاپاں دے کفارہ لئی خوشخبری دا شروع
 
کیوں یسوُع نے یردن وِچ یوحنا اصطباغی
کولوں بپتسمہ لیا سی؟
ساری راستبازی نُوں پوراکرن لئی
 
متی ٣باب وِچ اِنج لِکھیا اے، ” اوس  ویلے یسوُع   گلیل توں  یردن  دے  کنارے  یوحنا   کول اوہدے کولوں بپتسمہ لین لئی آیا۔ پریوحنا ایہہ آکھ کے اوہنوں منع کرن لگا پئی میَں آپ تیرے کولوں بپتسمہ لین دا محتاج آں تے تُوں میرے کول آیا ایں ؟ یسوُع نیں جواب وِچ اوہنوں آکھیا ہُن تُوں ہون ای دے کیوں جے سانُوں ایسے طرحاں ساری راستبازی پوری کرنا مناسب اے۔ “ (متی ۳ : ۱۳۔۱۵)۔
سانُوں ایہہ جاننا تے سمجھنا اے پئی یسوُع نے کیوں٣۰ وَرہے دی عمر وِچ بپتسمہ لیا ؟ اوہنے سارے انساناں دے پاپاں دا کفارہ دین تے خُدا دی راستبازی نُوں پوراکرن لئی بپتسمہ لیا ۔ سارے انساناں نُوں اوہناں دے پاپاں تو ں چھُڈان لئی ،یسوُع مسیِح ،کَلّے  حقیقی نے جیہڑا بے عیب سی ، یوحنا اصطباغی کولوں بپتسمہ لیا ۔
ایویں ، اوہنے دُنیا دے پاپ چُک لئے تے سارے انساناں دے پاپاں دے کفارہ لئی خُود نُوں پیش کیتا ۔ خُود نُوں پاپ توں چھُڈان لئی سانُوں پوری سچیائی نُوں جاننا تے ایہدے اُتے ایمان لیاچاہی دااے ۔ایہہ ساڈی ذمہ داری اے پئی اوہدی مکتی اُتے ایمان لیائیے تے نجات پائیے ۔
یسوُع دے بپتسمہ توں کیہ مُرا د اے؟ اوہدے توں اوہو ای مُراداے جیہڑی پُرانے عہد نامہ وِچ ،ہتھ رکھن توں مُرادسی ۔ پُرانے عہدنامہ وِچ،سارے لوکاں دے پاپاں نُوں سردارکاہن دے ہتھ رکھن دے راہیں پاپ دی قربانی اُتے منتقل کیتا جانداسی ۔ ایسے طرحاں ،نویں عہدنامہ وِچ ، یسوُع نےخُودنُوں پاپ دی قربانی دے طورتےپیش کرن تے یوحنااصطباغی کولوں بپتسمہ لین دے راہیں دُنیا دے سارے پاپ چُک لئے۔
یوحنااصطباغی اِنساناں وِچوں سب تو ں اُچیراسی جِنہوں خُدا نے اِنسان  ذات  دے  نمائندہ  دے
طورتےمقرر کیتا ۔ اِنسانی پیِڑھی دے نمائندہ تے سردارکاہن دے طورتے ،اوہنے دُنیا دے سارے پاپ یسوُع اُتے لدن لئی اوہدےاُ تے اپنےہتھ رکھے۔’  بپتسمہ توں مُراد   ’ اُتےلدنا ‘  ، ’ دفن کرنا تے دھویاجانا  ‘ اے۔
کیہ تُسیں جان دے اوپئی یسوُع ایس دُنیا وِچ کیوں آیا تے اوہنے یوحنااصطباغی کولوں کیوں بپتسمہ لیا؟کیہ تُسیں بپتسمہ دے معنے سمجھ دے ہویاں  ، یسوُع اُتے ایمان رکھدے او؟ یسوُع دےبپتسمہ دا مقصدساڈےسارےپاپاں نُوں دُورکرن لئی سی یعنی اوہناں پاپاں نُوں جیہڑے اَسیں ،بدکرداراں دی نسل اپنے جِسم وِچ ساری جندڑی کر دے رہندے آں ۔ یسوُع نے ساڈےسارے   پاپاں  دے کفارہ  دی
سچی خوشخبری دے توڑ چاڑھن لئی یوحنا اصطباغی کولوں بپتسمہ لیا ۔
متی ٣ : ١٣ ۔١۷ وِچ ،ایہہ ’  اوس ویلے ‘ توں شروع ہوندا اے تے ایہہ اوس ویلے نُوں بیان کردا اے جس ویلے یسوُع نے بپتسمہ لیا ، جد بندیاں دے سارے پاپ اوہدے اُتے لد دِتے گئے ۔
’اوس ویلے‘ یسوُع نے اِنسان ذات دے سارے گناہ چُک لئے ، تِن وَرہیاں بعد صلیب اُتے اپنی جان قربان کیتی ، تے تِن دِن بعدمویاں وِچوں جی اُٹھیا۔ دُنیا دے سارے پاپ دھون لئی، اوہنے اِکوواری بپتسمہ لیا ، اِکوواری صلیب اُتے جان قربان کیتی ،تے اِکوواری مُردیاں وِچوں جی اُٹھیا ۔اوہناں سبھناں لئی جیہڑے خُدا دے حضُور اپنے پاپاں تو ں مکتی حاصل کرنا چاہندے نیں، اوہنے دُنیا دے سارے پاپ نُوں اِکو ای وارچُکیا تےہمیشہ لئی مکتی بخش دِتی ۔
یسوُع نُوں کیوں بپتسمہ لینا پیا ؟ اوہنے کیوں کنڈیاں دا تاج پاؤناپیا تے اِک عام مجرم دی طرحاں پیلاطُس دے کٹہرے وِچ مجرم ٹھہرنا پیا؟ اوہنوں کیوں صلیب اُتے چڑھنا تے خون وگاکے اپنی جان قربان کرنی سی ؟ ایس لئی پئی اوہنے دُنیا دےسارے، میرے ،تے تُہاڈے پاپاں نُوں اپنے بپتسمہ دے راہیں اپنے اُتے چُک لیا ۔ساڈے پاپاں لئی ، اوہنوں صلیب اُتے اپنی جان قربان کرنی سی ۔
سانُوں مکتی دے کلام اُتے ایمان لیانا اے پئی خُدا نے سانُوں مکتی بخشی تے اوہدا شکر ادا کرنا اے ۔ یسوُع دےبپتسمہ ،اوہدی صلیب تے اوہدے مویاں وِچوں جی اُٹھن دے اَڈ ، ساڈے لئی کوئی مکتی نہیں۔
جد یسوُع نے دُنیا دے سارے پاپاں نُوں دُور کرن لئی یوحنا کولوں بپتسمہ لیاتے اوہنے ساڈے پاپ دُور کر دِتے ، تے سانُوں مکتی بخش دِتی جیہڑے اوہدی مکتی دی خوشخبری اُتے ایمان رکھدے نیں ۔ اجیہے کُجھ لوک نیں جیہڑے ایہہ سوچ دے نیں ، ” پر اوہنے صِرف مورُوثی پاپ نُوں دُور کیتا ، کیہ اِنج نئیں سی ؟ “ پراوہ غلط نیں ۔
بائبل مقدّس وِچ ایہہ گل واضح طورتے درج اے پئی یسوُع نے اِکو واری بپتسمہ دے ویلے دُنیا دے سارے پاپ چُک لئے۔ساڈے سارےپاپ،جِنہاں وِچ مورُوثی پاپ شامل نیں دُھل چُکےنیں۔ یسوع متی ٣ : ١٥ وِچ آکھدااے، ” کیوں جے سانُوں ایسے طرحاں ساری راستبازی پوری کرنا مناسب اے۔“ ساری راستبازی پوری کرن توں ایہہ مُراد ہے پئی سارے پاپاں نُوں ،کِسے اعتراض توں اَڈ ،ساڈےتوں دُورکیتاگیا اے۔
کیہ یسوُع نیں ساڈی ساری حیاتی دے پاپاں نُوں معاف کیتا اے ؟ آہو،اوہنے ایویں کیتا اے ۔ آؤ سب توں پہلاں احبار دی کتاب وِچوں ایس گل دے ثبوت نوں لبھیے۔ایہہ کتاب سانُوں سردار کاہن
تے یومِ کفارہ دی قربانی دے بارے دَسدی اے ۔
 
 
سارے بنی اِسرائیل دے سالانہ پاپاں لئی کفارے دی قربانی
                                                                   
کیہ اِسرائیلی ایس زمینی پاپ دی قربانی دے راہیں
اِکو ای وار تے ہمیش لئی پاک ہوسکدے سَن ؟
کدی نئیں
 
”تے ہارون خطادی قربانی دے وَچھے نُوں جیہڑا اوہدے وَلوں اے چڑھاکے اَپنے تے اَپنے گھرانے لئی کفارے دیوے ۔فیر ایہناں دونواں بکریاں نُوں لے کے اوہناں نُوں خیمہ ء اجتماع دے بوہے اُتے خُداوند دے حضُور کھلارے۔ تے ہارون ایہناں دونواں بکریاں اُتے چِٹھیاں پاوے ۔اِک چِٹھی خُداوند لئی تے دُوجی عزازیل لئی ہووے ۔تے جس بکرے اُتے خُداوند دے ناں دی چِٹھی نکلے اوہنوں ہارون لےکے خطادی قربانی لئی چڑھاوے۔ پرجس بکرے اُتے عزازیل دے ناں دی چِٹھی نکلے اوہ خُداوند دے حضُور زندہ کھلاریا جاوے تاں پئی اوہدے نال کفارہ دِتا جاوے تے اوہ عزازیل لئی بیابان وِچ چھڈ دِتا جاوے۔“ (احبار  ۱۶ :۶ ۔ ۱۰)۔ایتھے، ہارون اِسرائیل دے سالانہ  پاپاں  دا  کفارہ دین  لئی ملاپ دی تھاں خیمہء اجتماع دے بوہے اُتے دو بکرے لینداسی ۔
”تے ہارون ایہناں دونواں بکریاں اُتے چِٹھیاں پاوے۔ اِک چِٹھی خُداوند لئی  تے  دُوجی   عزازیل   لئی ہووے ۔“
قربانی دا اِک ڈنگرروزمرّہ دے پاپاں دا شرعی کفارہ دین لئی یعنی قربانی دےسِر اُتے اپنےہتھ رکھن دے راہیں اوہدے اُتے پاپی دے پاپ منتقل کرن دے سلسلے وِچ درکار ہونداسی ۔ پر اِسرائیلیاں دے سالانہ پاپاں لئی ،سردارکاہن ،سارے لوکاں وَلوں ، ہر وَرہے دے ستویں مہینے دی دسویں تاریخ نُوں سالانہ پاپ ، پاپ دی قربانی دے پسُو دے سر اُتے لد دینداسی ۔
احبار١٦ : ۲۹ ۔ ٣١ وِچ ، ایہہ لِکھیا اے ، ” ستویں مہینے دی دسویں تاریخ  نُوں تُسیں  اَپنی  اَپنی
جان نُوں دُکھ دینا تے اوس دِن کوئی بھاویں اوہ دیسی ہووے یاں پردیسی ہووے جیہڑا تُہاڈے وِچ رہن سہن رکھداہووے کسے       طرحاں دا کم نہ کر ے۔ کیوں جے اوس دِن تُہاڈے واسطے تُہانوں پاک کرن لئی کفارہ دِتا جاوےگا۔ ایویں تُسیں اپنے سب پاپاں توں خُداوند دے حضُور پاک ٹھہروگے ۔ ایہہ تہاڈے لئی خاص آرام دا سبت ہووے گا ۔ تُسیں اوس دِن اَپنی اَپنی جان نُوں دُکھ دینا ۔ ایہہ دائمی قانون ا ے۔“ (احبار۱۶ : ۲۹ ۔۳۱)۔
پُرانے عہد نامہ وِچ ، بنی اِسرائیل اپنے روز مرّہ دےپاپاں دے کفارہ لئی خطا دی قربانی لیاندے سَن تے ایس اِقرار دے نال اوہدے سِر اُتے پاپ لد دیندے ،  ” اَے خُداوند، میَں فلاناں فلاناں پاپ کیتا ۔ منت نال مینوں معاف کر۔“ فیر ، اوہ خطا دی قربانی دے ڈنگرنُوں ذبح کردے ، کاہن نُوں اوہدا خون دیندے تے ایس اطمینان نال گھر واپس چلے جاندے پئی ہُن اوہ ایہناں پاپاں توں مکت نیں۔ ایویں ، قربانی دا پسُو اپنے سِر اُتے پاپ چُک کے ،قربانی چڑھان والے شخص لئی مرجاندا ۔ اوس شخص دی تھاں خطادی قربانی دے پسُو نُوں ماردِتا جاندا سی ۔ پُرانے عہد نامہ وِچ ، خطادی قربانی وِچ بکرا،برّہ ،وَچھا،ٹہگا شامل سَن یعنی پاک پسُواں وِچوں کوئی اِک جِنہاں نوں خُدا نے مقررکیتاسی ۔
خُدا نے اپنی حدوں دُونی رحمت دے راہیں ،بجائے ایہدے پئی پاپی اپنے پاپاں لئی مرجاندا، ایہہ ممکن کیتا پئی اوہدی تھاں پسُو اپنی جان قربان کرے ۔
جِویں پُرانے عہدنامہ وِچ ، پاپی کفارہ دی قربانی دے راہیں اپنے پاپاں دی معافی حاصل کرسکدے سَن ۔ہتھ رکھن دے سبب پاپی دِیاں خطاواں خطادی قربانی         اُتے لد دِتیاں جاندیاں تے اوہدا خون سردارکاہن نُوں پیش کردِتا جانداسی تاں پئی اوہ پاپی دے پاپاں دا کفارہ دیوے۔
پر،ہرروز پاپاں داکفارہ دینا ممکن نہیں سی ۔ایس لئی ،خُدا نے سردارکاہن نُوں اِجازت دِتی پئی اوہ بنی اِسرائیل وَلوں ہر وَرہے دے ستویں مہینے دی دسویں تاریخ نُوں پورے وَرہے دے پاپاں داکفارہ دیوے ۔
فیر ، یومِ کفارہ اُتے سردارکاہن داکردار کیہ سی ؟اوّل،سردارکاہن ہارون ،خطا دی قربانی دے پسُو اُتے اَپنےہتھ رکھدا ،لوکاں دے پاپاں دا اِقرارکردا، ” اَے خُداوند بنی اِسرائیل نے ایہہ ایہہ پاپ کیتے،مثال طورتےخونریزی ،زناکاری ، حرامکاری ،چوری ، جھوٹی گواہی ،کفربولنا۔ ۔ ۔ ۔“
فیر، اوہ قربانی دے پسُو نُوں ذِبح کردا، اوہدا خون لیندا ،جِنہوں ست واری اوس رحمگاہ اُتےچھڑکدا جیہڑی خیمہ ء اِجتماع دے پاک ترین مقام دے اندر سی ۔  ( بائبل مقدّس  وِچ ۷دا ہندسہ کاملیت دا ہندسہ
سمجھیاجاندااے)۔
ایہہ اوہدی ذِمہ داری سی پئی لوکاں دے سالانہ پاپ اوہناں وَلوں پاپ دی قربانی دے پسُو دے سِراُتے لددیوے ،تے پاپ دی قربانی دا پسُواوہناں دی تھاں تے عوِضی دےطور تےقربان ہوجانداسی۔
کیوں جے ، خُدااِنصاف پسند اے، ایس لئی سارے لوکا ں نُوں اوہناں دے پاپاں توں چھُڈان لئی ، اوہنے پاپ دی قربانی دے پسُو نُوں اوہناں دی تھاں تے قربان ہون دی اِجازت دِتی ۔ کیوں جے خُداسچی مُچی رحیم اے، ایس لئی اوہنے لوکاں نُوں اجازت دِتی پئی اوہ اپنی تھاں اُتے قربانی دے پسُو نوں نذرکرن۔فیر،سردارکاہن رحمگاہ دے پُورب وَل خون چِھڑکدا، تے فیریومِ کفارہ اُتے،یعنی ستویں مہینے دی دسویں تاریخ نُوں، لوکاں دے پِچھلے وَرہے دے پاپاں دا کفارہ دیندا ۔
 
پُرانے عہد نامہ دے مطابق کون قربانی دا برّہ اے؟
یسوُع جیہڑا بے عیب اے
 
سردارکاہن یوم ِ کفارہ اُتے بنی اِسرائیل لئی دو بکرے قربان کرداہونداسی ۔ اِک چھڈیا  ہویا   بکرا اَکھواندا سی جیہدا مطلب’  بھجانا  ‘ ایں ۔ بالکل ایسے طرحاں یسوُع مسیِح نویں عہد نامہ دا چھڈیا ہویا بکرا اے ۔” کیوں جے خُدا نیں دُنیا نال اجیہی محبت رکھی پئی اوہنے اَپنااِکو اِک پُتر دے دِتا تاں پئی جیہڑا وی اوہدے اُتے ایمان لیاوے مرنہ جاوے سگوں ہمیش دی حیاتی پاوے۔“ (یوحنا۳: ۱۶)
خُدا نے اَپنا کَلّا پُتر قربانی دے بّرہ دے طورتےسانُوں بخش دِتا۔ تے ساری دُنیا لئی قربانی دےبّرہ دےطورتےاوہنے یوحنا اصطباغی کولوں بپتسمہ لیا، تے دُنیا دا مکتی داتا تے مسیِحا بن گیا ۔ یسوُع دا مطلب ’مکتی داتا‘تےمسیح دامطلب’ ممسوح بادشاہ ‘اے، ایویں یسوُع مسیِح دا مطلب ،’خُداداپُتراےجیہڑاسانُوں ساریاں نُوں بچان لئی آیا۔‘
ایویں ، جِس طرحاں پُرانے عہد نامہ وِچ یومِ کفارہ اُتے لوکاں دے سالانہ پاپاں دا کفارہ دِتا جانداسی اوسے طرحاں ،یسوُع مسیِح نے گھٹوگھٹ دو ہزار وَرہے پہلاں ایس دُنیا وِچ ، ساڈے سارے پاپاں دے کفارہ دی خوشخبری نُوں پوراکرن لئی بپتسمہ لیا تے صلیب اُتے خون وگادِتا ۔
ایتھے آؤ اَسیں احبار دی کتاب وِچوں اِک حوالہ پڑھیے ۔ ” تے ہارون اپنے دونویں ہتھ  اوس
زندہ بکرے دےسِر اُتے رکھ کے اوہدے اُتے بنی اِسرائیل دِیاں ساریاں بدکاریاں تے اوہناں دے سارے پاپاں تے خطاواں دااِقرار کرے تے اوہناں نُوں بکرے دے سِر اُتے دھر کےاوہنوں کِسے شخص دے ہتھ جیہڑا ایس کم لئی تیار ہووے بیابان وِچ بھجوا دیوے۔تے اوہ بکرا اوہنا ں دِیا ں ساریاں بدکاریاں اپنے اُتے لدے ہویاں کِسے ویرانے وِچ لے جاوے گا۔ ایویں اوہ ایس بکرے نُوں بیابان وِچ چھڈ دیوے۔“ (احبار۱۶:۲۱۔۲۲)۔
ایہہ لِکھیا اے پئی سارے اِسرائیلیاں دے پاپ اوس بکرے دے سِر اُتے لددِتے جاندے سَن  جِویں پئی احبار پہلے باب وِچ لِکھیا اے ۔’ اوہناں دِیاں ساریاں خطاواں ‘ توں مُراد اوہ پاپ نیں جیہڑے اوہ اپنے دِلاں وِچ تے اپنے بدن دے راہیں کردے نیں۔تے  ’اوہناں دِیاں ساریاں خطاواں‘ ہتھ رکھن دے راہیں پاپ دی قربانی دے پسُو دے سِر اُتےلددِتیاں جاندیاں سَن ۔
 
 
خُدادی شریعت دے سبب ، سانُوں اپنے سارےپاپاں دا سچا عِلم رکھنا ایں
 
خُدانے سانُوں کیوں شریعت دِتی؟
سانُوں پاپ داعِلم دین لئی
 
خُدا دی شریعت۶١٣ حکماں اُتے مشتمل اے ۔ اصل وِچ،جد اَسیں اوہدے بارے سوچ دے آں، تے اَسیں اوہ کم کیتے جیہڑے اوہنے کرن توں منع کیتا تے اوہ نہیں کیتے جیہڑےاوہنے سانُوں کرن لئی آکھیا سی ۔
ایس لئی ، اَسیں پاپی آں ۔ بائبل مقدّس وِچ لِکھیا اے پئی خُدا نے سانُوں ایس لئی شریعت دِتی پئی اَسیں اپنے پاپاں نُوں چنگی طرحاں جانیے (رومیوں٣: ۲۰)۔ایہدے توں مُراد ایہہ ہے پئی اوہنے سانُوں شریعت تے اپنے حکم بخشے تاں پئی سانُوں سکھائے پئی اَسیں پاپی آں ۔ اوہنے سانُوں ایہہ حکم ایس لئی نہیں بخشے پئی اَسیں اوہناں دے مطابق حیاتی بسرکرن دی صلاحیت رکھ دےآں،سگوں ایس لئی پئی اَسیں اپنے پاپاں نُوں جانیے ۔
اوہنے سانُوں شریعت تے حکم ایس لئی نئیں بخشے پئی اَسیں ایہناں اُ تے عمل کریے ۔ تسیں اِک کُتے کولوں اِنساناں دی طرحاں حیاتی بسرکرن دی توقع نئیں کر سکدے ۔ بالکل ایسے طرحاں ، اَسیں خُدا دی شریعت دے قاعدے اُتے پورے نئیں اُتر سکدے ، پر اوہدی شریعت تے حکماں دے راہیں صِرف اپنے پاپاں نُوں جان سکدے آں۔
خُدا نے شریعت تے حکم سانُوں ایس لئی بخشے کیو ں جے اَسیں پاپ دا بھنڈار آں ، پر اَسیں اصل وِچ ایہدااحساس نہیں کردے ۔” تُسیں خونی ،زناکار،بدکار او، “  خُدا تفصیل نال حکماں دے راہیں سانُوں دَسدااے ۔ اوہنے سانُوں دَسیا پئی اَسیں خون نہ کریے۔ ایہدے باوجود اَسیں اپنے  دِلاں   وِچ  تے  بعض ویلے اَپنے بدن راہیں خون  کردے آں۔
پر،کیوں جے شریعت وِچ ایہہ لِکھیا اے پئی سانُوں خون نہیں کرنا چاہی دا، سانُوں پتہ اے پئی اَسیں خونی آں تے ایہہ آکھدے آں،” ہاں میَں غلط سی ۔میَں پاپی آں ایس لئی پئی میَں اوہ  کم  کیتا  جیہڑا
مینوں نہیں کرنا چاہی دا سی ۔میَں تے پاپ کیتااے۔“
بنی اِسرائیل نُوں پاپ توں چھُڈان لئی ،خُدا نے پُرانے عہد نامہ وِچ ہارون نُوں کفارہ دی قربانی چڑھان لئی مقرر کیتا، تے ایہہ ہارون ای سی جیہڑا وَرہے وِچ اِک واری لوکاں لئی کفارہ دینداسی ۔
پُرانے عہد نامہ وِچ،یومِ کفارہ اُتے خُدا دے سامنے دو قربانیاں چڑھائیاں جاندیاں سَن ۔ اِک خُدا دے حضُور چڑھائی جاندی جد پئی دُوجی ،قربانی دے پسُو اُتے ہتھ رکھ کے اوہنوں بیابان وِچ چھڈ دِتاجانداسی ،جیہڑی اپنے اُتے لوکاں دے سالانہ پاپ چُک کے لے جاندی سی ۔ایس توں پہلاں کوئی مناسب شخص ایس بکرے نُو ں بیابان وِچ چھڈ کے آوے ، سردار کاہن اوس زندہ بکرے دے سِر اُتے اَپنےہتھ رکھدا تے اِسرائیل دے سارے پاپاں دا اِقرار کرداسی ، ” اے خُداوند ،لوکاں نے خونریزی ،حرامکاری ،بُت پرستی کیتی۔ ۔ ۔ ۔ اَسیں تیرے سامنے پاپ کیتا۔“
فلسطین دی سرزمین ریتلابیابان اے۔ چھڈے ہوئے بکر ے نُوں بوہت وڈے بیابان وِچ چھڈدِتا جاندا تے اوتھے اوہ اَخیرہلاک ہوجانداسی ۔جد اوہنوں بھیجیا جاندا ،تے بنی اِسرائیل اوہدےاُ تے نظر رکھدے سی جد تیکر اوہ نظراں توں پراں نہ ہو جاندا،تے ایمان رکھدے سَن پئی اوہناں دے پاپ عزازیل دےبکرے نال چاچُکے نیں ۔ ایویں لوک ذہنی سکون حاصل کر دے تے چھڈیا ہویا بکرا  سارے
لوکاں دے سالانہ پاپاں دی خاطر بیابان وِچ مرجاندا۔
ایسے طرحاں ، خُدا نے اپنے برّے یعنی یسوُع مسیِح ، دے راہیں ساڈے سارے پاپاں دا کفارہ دِتا۔
یسوع دے بپتسمہ تے صلیب اُتے خون وگان دے راہیں ساڈے سارے پاپ مکمل طورتے دھودِتے گئے سَن ۔
یسوُع خُدا تے ساڈا مکتی داتا اے۔اوہ خُدا دا پُتر اے جیہڑا ساری اِنسانی پیِڑھی نُوں چھُڈان لئی آیا ۔ اوہ خالق اے جِنہے سانُوں اپنی شکل اُتے پیدا کیتا تےاوہ سانُوں ایس دُنیا وِچ چھُڈان لئی آیا۔
نہ صرف ساڈے روز روزدے پاپ جیہڑے اَسیں بدن وِچ کردے آں، سگوں ساڈے مستقبل دے پاپ، سوچاں تے بدن وِچ کیتے جان والے سارے پاپ وی یسوُع اُتے لد دِتے گئے ۔ ایویں ، اوہنوں خُدا دی راستبازی پوری کرنی سی ، یعنی دُنیا دے سارے پاپاں دے کفارے دی تکمیل لئی یوحنا اصطباغی کولوں بپتسمہ لینا سی تاں پئی دُنیا دےسارے پاپاں دا مکمل کفارہ دیوے ۔
یسوُع دے صلیب اُتے چڑھن توں تِن ورہے پہلاں،جداوہنے اپنی خدمت نُوں شروع کیتا ، تے اوہنے دریائے یردن وِچ یوحنا اصطباغی کولوں  بپتسمہ لین دے سبب  دُنیا  دے سارے پاپ  چُک  لئے۔
ساڈے سارے پاپاں داکفارہ دین دے راہیں اِنسانی پیِڑھی دی مکتی دا شروع اوہدے بپتسمہ توں ہویا ۔
دریائے یردن وِچ ، جس مقام تے گھٹوگھٹ لک تیکر اُچا پانی سی ، اوتھے یوحنا اصطباغی نے یسوُع اُتے اپنے ہتھ رکھے تے اوہنوں پانی وِچ غوطہ دِتا ۔ بپتسمہ پُرانے عہد نامہ وِچ ہتھ رکھن دے وانگ سی تے سارےپاپاں نُوں منتقل کرن دا اوہوای اَثر رکھدا سی ۔
پانی وِچ غوطہ دین توں مُراد مرجانا، تے پانی وِچوں باہر آن توں مُراد مُردیاں وِچوں جی اُٹھنا سی ۔ ایویں ، یوحنا کولوں بپتسمہ لین دے سبب یسوُع نے اپنے مقصد دی تِنّاں گلاں نُوں پورے طورتے ظاہرکیتا :یعنی سارے پاپ چُکنا ، مصلُوب ہونا تے مُردیاں وِچوں جی اُٹھنا۔
اَسیں صِرف یسوُع دے کلام دی فرمانبرداری کرن دے راہیں مکتی حاصل کرسکدے آں جیہڑا سانُوں پاپ تو ں چھُڈاندااے ۔خُدا نے سانُوں یسوُع دے راہیں چھُڈان دا فیصلہ کیتا تے اوہ عہد جیہڑا اوہنے پُرانے عہدنامہ وِچ بنیا سی اوس ویلے پورا ہوگیا ۔ ایس عمل دے راہیں ،یسوُع ساڈے سارے پاپ اپنےسِراُتے چُک کے سولی وَل وَدھیا ۔
 
کس قِسم دا کم ساڈے لئی باقی اے جدوں توں
یسوُع نے ساڈے سارے پاپ دھودِتے؟
سب جو سانُوں کرنا اے خُدا دے کلام
اُتے ایمان رکھنا اے
 
یوحنا١:۲۹ وِچ لِکھیا اے، ” دُوجے دِن اوہنے یسوُع نُوں اَپنے وَل آؤندیاں ویکھ کے آکھیا ویکھو ! ایہہ خُدا دا برّہ اے جیہڑا دُنیا دا پاپ  چُکی لے جاندااے ۔“ یوحنا اصطباغی نے گواہی دِتی ،” ویکھو !ایہہ خُدا دا برّہ اے جیہڑا دُنیا دا پاپ  چُکی لے جاندااے۔“ جد یسوُع نے یردن وِچ بپتسمہ لیا تے اِنسان ذات  دے سارے پاپ اوہدے تے منتقل ہوگئے ۔ ایس گل اُتے ایمان رکھو!فیر تُہانوں تُہاڈے سارے پاپاں دے کفارے دی برکت ملے گی۔
سانُوں سب نُوں خُدا دے کلام اُتے ایمان رکھنا اے ۔ سانُوں اپنے خیالاں تے  سرکشی  نُوں  دُور
 کرناتے  خُدا دے لِکھے ہوئے کلام دے پِچھے چلنا اے۔ سانُوں لازمی طورتے سادگی نال ایمان رکھنا چاہی دااے پئی یسوُع نے دُنیادےسارے پاپ چُک لئے ۔
ایہہ آکھنا اےپئی یسوُع دُنیا دےسارےپاپ چُک کے لے گیا ، تے ایویں آکھنا اے پئی اوہنے ساڈے پاپاں دی معافی لئی خُدادی راستبازی نُوں پوراکیتا ،دونواں دا بالکل اِکوای مطلب اے۔’  بپتسمہ ‘ تے ’ ہتھ رکھن ‘ دا وی اِکو مطلب اے ۔
 اَسیں ’ سب ‘  ،   ’  سب کُجھ ‘ یاں ’ سارے ‘ آکھیے ، ایس سب توں مُراد اِکو ای اے ۔ پُرانے عہد نامہ وِچ ’ہتھ رکھن‘ دا  مطلب نویں عہدنامہ وِچ تبدیل نہیں ہوندا،سوائے ایہدے پئی لفظ ’  بپتسمہ ‘ اوہدی تھاں اُتے ورتیا گیا اے ۔
گل ایتھے آکے مک دی اے پئی یسوُع نےبپتسمہ لیا تے ساڈے پاپاں دی خاطر صلیب اُتے سزانُوں جھلیا۔تے اَسیں سچی خوشخبری اُتے ایمان لیاندے آں تے مکتی یافتہ ہوسکدے آں ۔
جد بائبل مقدّس آکھدی اے پئی  یسوُع نے ’ دُنیا دے سارے پاپ ‘ چُک لئے (یوحنا ١:۲۹ ) ، تے دُنیا دے پاپاں توں کیہ مُراد اے؟ایہدے توں مُراد اوہ سارے پاپ نیں ، جِنہاں دے نال اَسیں پیدا ہوئے ساں ، یعنی سارے بھیڑے خیال ،چوری ، زناکاری ، لالچ، بدکاری ، جھوٹ ،گھمنڈ تے بیوقوفی جیہڑی سادے ذہناں وِچ وَسی ہوئی اے ۔ ایہدے توں مُراد جِسم تے سوچ وِچ پائی جان والیاں ساریاں             بدکاریاں تے خطاواں نیں۔
” کیوں جے پاپ  دی مزدُوری موت اے،پر خُدادی بخشش ساڈے خُداوند یسوُع مسیِح وِچ ہمیش دی حیاتی اے ۔“ (رومیوں ۶:۲۳)۔”تے اَڈ خون وگائے معافی نئیں ہوندی ۔“ (عبرانیوں ۹:۲۲)۔جِویں پئی ایہناں آیتاں وِچ بیان کیتا گیا اے ،سارے پاپاں دی قیمت اداکرن دی لوڑاے۔یسوُع مسیِح نے ساری اِنسان ذات نُوں پاپ توں چھُڈان لئی اپنی ای جان دی قربانی پیش کر دِتی ، تے اِکو واری ساڈی خاطر پاپ دی قیمت ادا کردِتی ۔
ایویں ، سانُوں اپنے سارے پاپاں توں بچن لئی ،سانُوں سب نُوں جیہڑاکرنا اے سچی خوشخبری — یعنی یسوُع دے بپتسمہ تے اوہدے خون تے اوہدی الوہیت اُتے ایمان رکھنا ایں ۔
 
 
کل دے پاپاں لئی کفارہ
 
کیہ سانُوں اگانہہ اپنے پاپاں لئی قربانی
پیش کرن دی لوڑ اے؟
فیر کدی نئیں
 
کل تے پرسوں دے پاپ،تے اوہ گناہ جیہڑے اَسیں اپنے پیداہون توں مرن دے دن تیک کردے آں ،اوہ وی ، ’ دُنیا دے پاپ ‘ وِچ شامل نیں ۔ جِویں پئی اَج ،پِچھلے کل،تے اوہدے توں پِچھلے دن دے پاپ وی ’  دُنیا دے پاپ ‘ وِچ شامل نیں ۔پیدائش توں موت تیک اِنسان دے سارے پاپ  ’  دُنیا دے پاپ ‘ دا اَنگ نیں ۔تے دُنیا دے اصل پاپ اوہدے بپتسمہ دے راہیں یسوُع اُتے منتقل ہوگئےسَن  ۔ ایویں مرن دے دِن تیک اَسیں جِنہے وی پاپ کراں گے اوہ پہلے ای ساڈے توں دُور کردِتے گئے نیں ۔
لوڑ ایہہ ہے پئی اَسیں سچی خوشخبری تے خُدا دے لِکھے ہوئے کلام اُتے ایمان لیائیے، ایہہ فرماں برداری کردے ہویاں مکتی پائیے ۔ سانُوں اپنے پاپاں توں مکتی حاصل کرن لئی اپنے خیالاں نُوں اِک پاسے رکھ دینا چاہی دااے  ۔تُسیں ایہہ پُچھ سکدے او، ” اوہ کِس طرحاں ایہناں پاپاں  نُوں وی چُک سکدا اے جیہڑے ہُن تیک کیتے ای نہیں گئے؟ “  فیر میَں تُہاڈےکولوں جواب وِچ پُچھنا چاہواں گا ، ” کیہ ہرواری جد اَسیں پاپ  کراں گے یسوُع نُوں فیر دُنیا وِچ آناتے گھڑی مُڑی خون وگاناپوےگا؟ “
نویں پیدائش حاصل کرن دی خوشخبری وِچ پاپاں دی خوشخبری دی شریعت پائی جاندی اے ۔ ”تے اَڈ خون وگائے معافی نئیں ہوندی ۔“(عبرانیوں ۹:۲۲)۔جد پُرانے عہد نامہ  دے دَور وِچ ، اِک شخص اپنے پاپاں توں رہائی حاصل کرنا چاہندا سی، تے اوہنوں پاپ دی قربانی دے پسُو اُتے ہتھ رکھن دے راہیں اوہدے اُتے اپنے پاپ لدنے پیندے سَن ، تےپاپ دی قربانی دے ایس پسُو نُوں اوس بندے دے پاپاں لئی مرناپینداسی ۔
 بالکل ایسے طرحاں ، خُداداپُتر ساری اِنسانی پیڑھی نُوں چھُڈان لئی ایس دُنیا وِچ آیا ۔اوہنے سارے پاپاں نُوں دُور کرن لئی بپتسمہ لیا، تے ساڈے پاپاں دی قیمت ادا کرن لئی صلیب اُتے اپنا خون وگادِتا ، تے ایہہ آکھ کے صلیب اُتے اپنی جان دے دِتی پئی   ” تمام ہویا۔ “  اوہ تِن دِن بعد مُردیاں وِچوں جی اُٹھیا تے ہُن خُدا دے سجے ہتھ بیٹھا اے ۔ ایس طرح اوہ ابد تیکر ساڈا مکتی داتابن گیا اے ۔
اپنے پاپاں توں مکمل رہائی حاصل کرن لئی ،سانُوں اپنے سارے قائم کردہ نظریے تے مذہبی عقیدیاں نُوں چھڈنا اے جیہڑے ہر روزساڈے روز مرّہ دے پاپاں توں رہائی حاصل کرن لئی توبہ دِیاں دُعاواں منگن دی نصیحت کردےنیں ۔ اِنسانی پیِڑھی دے پاپاں دی معافی لئی ، شرعی قربانی ،ہمیشہ لئی، چڑھائی جانی سی ۔ اَسمانی خُدا نے دُنیا دے سارے پاپ اپنے پُتر دے راہیں اوہدے اُتے لد دِتے تے اوہنوں صلیب اُتے ساڈی خاطر جان قربان کرن لئی دے دِتا ۔اوہدے مُردیاں وِچوں جی اُٹھن دے راہیں ساڈی مکتی مکمل ہوگئی ۔
” حالاں پئی اوہ ساڈی خطاواں دی وجہ توں زخمی کیتا گیا تے ساڈی بدکاری دے سبب کُچلیا گیا۔فیروی اوہنے ساڈیاں مشقتاں چُک لئیاں تے ساڈے غماں نُوں جھلیا ۔پر اَسیں اوہنوں خُدا دا ماریا کُٹیا تے ستایا ہویا سمجھیا۔ ۔ ۔ ۔پر خُداوند نے ساڈی ساریاں دی بدکاری اوہدے تے لد دِتی ۔ “ یسعیاہ ٥٣باب وِچ ، ایہہ بیان کیتا گیا اے ،دُنیا یعنی ساری اِنسانی پیِڑھی دِیاں ساریاں بدکاریاں تے خطاواں یسوُع مسیِح اُتے لد دِتیاں گئیاں۔
نویں عہد نامہ وِچ، اِفسیوں ١:۴ وِچ اِنج لِکھیا اے، ” اوہنے سانُوں جہان بنن توں پیشتر اوہدے وِچ چُن لیا۔  “ ایہہ حوالہ سانُوں دَسدااے پئی خُدا نے سانُوں جہان بنان توں پیشتر اوہدے وِچ چُن لیا ۔ ایتھوں تیک پئی دُنیا دے پیدا ہون توںوی پہلاں ، خُدا نے سانُوں اپنے لوک ،یعنی مسیِح وِچ بے عیب راستبازہون لئی چُنیا۔پہلے ساڈا جوکُجھ وی خیال ہووے، ہُن سانُوں خُدادے کلام یعنی ، پانی ، خون تے رُوح دے کلام اُتے ایمان لیان نال اوہدی فرمانبرداری وی کرنی چاہی دی اے۔
خُدا نے سانُوں دَسیا پئی اوہدے برّے یسوُع مسیِح نے دُنیا دا پاپ چُک لیا تے ساری دُنیا دا کفارہ دے دِتا ۔ عبرانیوں ١۰ باب وِچ اِنج لِکھیا اے،  ” کیوں جے شریعت جیہدے وِچ آن والیاں چنگیاں شیَواں دا پرچھانواں ایں تے ایہناں شیَواں دی اَصلی صورت نہیں  ایہہ اِکو طرحاں دِیاں قربانیاں جیہڑیاں ہر وَرہے بلاناغہ چڑھائیاں جاندیاں نیں کول آن والیاں نُوں بالکل مکمل نہیں کر سکدیاں ۔“ (عبرانیوں۱۰:۱)۔
ایتھے،ایہہ  لِکھیا اے پئی ،ہر وَرہےاِکو طرحاں دِیاں قربانیاں  بلاناغہ چڑھائیاں جاندیاں سَن،اوہ سانُوں بالکل مکمل نہیں کردیاں۔ شریعت وِچ آن والیاں چنگیاں شیَواں دا پرچھانواں اے،تےاوہ سچیاں شیَواں دی اَصل شکل نہیں اے۔ یسوُع مسیِح ، مسیِحا جیہڑا آن والا سی ، اوہنے بپتسمہ لین تے ساڈے پاپاں دے کفارہ لئی صلیب اُتے قربانی ہون دے راہیں ہمیشہ لئی سانُوں مکمل بنا دِتا(بالکل ایسے طرحاں جِویں اِسرائیل دے سالانہ پاپاں دا اِکو وار کفارہ دِتاجانداسی )۔
ایویں یسوُع نے عبرانیوں ١۰ باب وِچ  آکھیا ،  ”  اوہ  فیر  آکھدا اے  ویکھ  میَں  آیا  آں تاں  پئی تیری مرضی پوری کراں ایویں اوہ پہلے نُوں ختم کردااے تاں پئی دُوجے نوں قائم کرے ۔اوسے مرضی دے سبب اَسیں یسوُع مسیِح دے بدن دےاِکوواری قربان ہون دے راہیں پاک کیتے گئے آں۔تے ہر اِک کاہن کھلوکے ہرروز عبادت کردااے تے اِکو ای طرحاں دِیاں قربانیاں گھڑی مُڑی چڑھاندااےجیہڑیاں بالکل پاپاں نُوں دُور نہیں کر سکدیا ں ۔پر ایہہ شخص ہمیش لئی پاپاں دے واسطے اِکو ای قربانی چڑھاکے خُدادے سجے پاسے جا بیٹھا ۔ تے اوسے ویلے توں اُڈیک وِچ اے پئی اوہدے ویری اوہدے پیراں ہیٹھاں دی چَوکی بنن۔ کیوں جے اوہنے اِکو ای قربانی چڑھان نال ایہناں نُوں ہمیش لئی مکمل کر دِتااے جیہڑےپاک کیتے گئے نیں۔تے رُوح القدّس وی سانُوں ایہہ ای دَسدااے کیوں جے ایہہ آکھن توں بعد پئی ۔ خُدافرماؤندا اے جیہڑا عہد میَں اوہناں دِناں دے بعد اوہناں نال بنہاں گا اوہ ایہہ ہے پئی میَں اَپنے قانون اوہناں دے دِلاں اُتے لِکھاں گاتےاوہناں دےذہن وِچ پاواں گا۔فیراوہ ایہہ آکھدااے پئی اوہناں دے پاپاں تے بے دینیاں نُوں فیر کدی یاد نہ کراں گا ۔ تے جدوں اوہناں دی معافی ہوگئی اےتے فیر پاپ دی قربانی ہور نئیں رہی ۔ “ (عبرانیوں۱۰: ۹ ۔۱۸)۔
ساڈاایمان اےپئی یسوُع نے اپنے بپتسمہ تےصلیب اُتے خون روڑن دے راہیں سانُوں دُنیا دےسارے پاپاں توں مکتی بخشی اے ۔
 
 
پانی تے رُوح دے راہیں نویں سرے توں پیدا ہون دی مکتی
 جیہڑی ساڈے دِلاں تے ذہناں اُتے چھاپی ہوئی اے
 
کیہ اَسیں راستباز آں ایویں کیوں جے اَسیں اگانہہ
توں پاپ نئیں کردے؟
نئیں۔اَسیں راستباز آں کیوں جے یسوُع نے ساڈے سارے
پاپ چُک لئے تے اَسیں اوہدے اُتے ایمان رکھدے آں
 
کیہ تُسیں  سارے اوہدی مکمل مکتی اُتے ایمان رکھدے او؟——آمین—— کیہ تُسیں ایمان نال خُدا دے کلام دی فرمانبرداری کردے اوپئی یسوُع نے سانوں چھُڈان لئی خُودبپتسمہ لیا،تےصلیب اُتے اپنا خون وگایا ؟ سانُوں نویں پیدائش حاصل کرن لئی بڑے یقینی طور نال اوہدے کلام اُتے ایمان رکھنا چاہی دی اے ۔ جد اَسیں ایہہ ایمان رکھدے آں پئی یسوُع مسیِح نے ،معافی دی خوشخبری دے راہیں ،ساڈے تے پوری دُنیا دے پاپ دھودِتے تے اَسیں مکتی حاصل کرسکد ے آں ۔
اَسیں خُدا دی شریعت دی فرمانبرداری کرن نال کدی بے گناہ نئیں ہوسکدے پر اَسیں خُدا دے کماں اُتے ایمان لیا ن دے راہیں مکمل بن سکدے آں ۔ یسوُع مسیِح نے یردن وچ بپتسمہ لین دے راہیں ساڈے سارے پاپ چُک لئے تے صلیب اُتے ساڈے ایہناں سارے پاپاں دی عدالت تے سزانُوں جھلیا ۔اپنے پورے دِل نال ایس خوشخبری اُتے ایمان لیان دے سبب ،اَسیں اپنے سارے  پاپاں توں مکتی حاصل
کر سکدے آں تے راستباز ٹھہر سکدے آں ۔کیہ تُسیں ایس گل اُتے ایمان رکھدے او؟
یسوُع دابپتسمہ ، اوہدی مصلُوبیّت تے مُردیاں وِچوں جی اُٹھنا ،سب اِنسانی پیڑھی دے پاپاں دی معافی لئی اے۔ تے مکتی دی شریعت دی بنیاد ، خُدا دی حدوں بوہتی تے شرطوں اَڈ محبت اے۔ اَسیں جس طرحاں دے وی آں خُدا ساڈے نال محبت کردااے تے اوہ سچا اے ، ایس لئی اوہنے سانُوں پہلے راستباز ٹھہرایا ۔ اوہنے یسوُع دے بپتسمہ دے راہیں ساڈے سارے پاپاں نُوں دُور کرن دے سبب سانُوں راستبازٹھہرایا ۔
ساڈے سارے پاپاں نُوں مٹان لئی ،اوہنے اَپنے کَلّے پُتر یسوُع نُوں ساڈے لئی ایس دُنیا وچ بھیجیا۔ اوہنے یسوُع نُوں اجازت دِتی پئی اوہ اپنے بپتسمہ دے راہیں دُنیا دے سارے پاپ اپنے اُتے چُک لئے تے فیر ساڈے سارے پاپاں لئی اوہنوں سزا دِتی جاوے ۔ اوہنے پانی ، خون تے اپنی بے ریا محبت دی مکتی دے راہیں سانُوں اپنی راستباز اَولادٹھہرایا ۔
عبرانیوں ١۰ : ١٦  وِچ لِکھیا اے،  ” میَں اپنے قانون اوہناں دے دِلاں اُتے لِکھاں گاتے اوہناں دے ذہن وِچ پاواں گا ۔ “
ساڈے دِلاں تے ذہناں وِچ، کیہ اَسیں خُدادے حضُور پاپی آں یاں راستباز ؟ جے اَسیں خُدا دے کلام اُتے ایمان رکھدے آں ،تے اَسیں راستباز ٹھہردے آں۔ یسوُع مسیِح نے ساڈے سارے پاپ چُک لئے تے اوہناں دی سزانُوں جھلیا ۔یسوُع مسیِح ساڈا مکتی داتا اے ۔ خورے تُسیں ایہہ سوچو، ”کیوں جے اَسیں ہرروز پاپ کردے آں ایس لئی اَسیں کِس طرحاں راستباز ٹھہرسکدے آں ؟اَسیں لازمی طورتے پاپی آں۔“ پر جدو ں اَسیں خُدا دے کلام اُتے ایس طرحاں ایمان رکھدے آں ،جِویں یسوُع مسیِح نے پیودی فرمانبرداری کیتی ،تے اَسیں راستباز بن جاندے آں۔
بے شک جِویں میَں پہلے آکھ چُکیا آں ، ساڈی پیدائش توں پہلے ای پاپ ساڈے دِلاں وِچ موجود سَن ۔پاپاں دی معافی دی خوشخبری نُوں اپنے دِلاں وِچ قبول کرن توں بعد اَسیں اپنے سارے پاپاں توں مکتی حاصل کر لئی ۔ جد اَسیں خوشخبری نُوں جان دے نئیں ساں، اوس ویلے اَسیں پاپی ساں ۔پرجداَسیں یسوُع دی مکتی اُتے ایمان لیاناشروع کیتااَسیں راستباز ٹھہرے تے فیر اَسیں خُدا دی راستبازاَولادبن گئے ۔ ایہہ اوہ راستباز ٹھہرن دا ایمان اے جیہدے بارے پولُس رسوُل نےبیان کیتا ۔ ایس معافی دی خوشخبری اُتے ایمان سانُوں ’  راستباز ‘ ٹھہراندااے ۔
نہ پولُس رسوُل ، نہ ابرہام ،تےنہ ایمان لیان والے پیودادےوِچوں کوئی ہور،اپنے عملاں دی وجہ
توں راستباز ٹھہریا ،سگوں اوہ سب خُدادے  کلام ، یعنی  اوہدے  پاپاں  دی  معافی  دی   برکتاں  دے  کلام اُتے ایمان لیان دے راہیں راستبازٹھہرے ۔
عبرانیوں ١۰:١٨وِچ لِکھیا اے، ”تے جدوں اوہناں دی معافی ہوگئی اے تے فیر پاپ دی قربانی ہور نئیں رہی ۔ “ جِویں پئی لِکھیا اے خُدا نے سانُوں چُھڈایا تاں پئی اَسیں اپنے پاپاں وِچ نہ مرئیے ۔کیہ  تُسیں ایس کلام اُتے ایمان رکھدے او؟ ——آمین ——
فلپیوں دو باب وِچ لِکھیا اے، ” اوہو جیہا مزاج رکھو اجیہا مسیِح یسوُع دا وی سی ۔ اوہنے  بھاویں خُدا دی صورت اُتے سی خُدا دے برابر ہون نُوں قبضے وِچ رکھن دی شَے نہ سمجھیا۔ سگوں اَپنےآپ نُوں خالی کردِتا تے خادم کی صُورت اِختیار کیتی تے اِنساناں ورگا ہوگیا ۔ تےاِنسانی شکل وِچ ظاہر ہوکےاَپنے آپ نُوں نِکّا کر دِتا تے ایتھوں تیک فرمانبردار رہیا پئی موت سگوں صلیبی موت گواراکیتی ۔ ایسے واسطے خُدا نے وی اوہنوں بوہت اُچا کیتا تے اوہنوں اوہ ناں بخشیا جیہڑا سب ناواں توں اُچا اے ۔ تاں پئی یسوُع دے ناں اُتے ہر اِک گوڈا جُھکے۔ بھاویں اَسمانیاں دا ہووے بھاویں زمینیاں دا ۔ بھاویں اوہناں دا جیہڑے زمین دے تھلے نیں۔ تے خُدا پیو دے جلال لئی ہراِک زبان اِقرار کرے پئی یسوُع مسیِح خُداوند اے ۔“ (فلپیوں ۲ :۵ ۔۱۱)۔
یسوُع مسیِح نے جیہڑا اوہدے جلال دا نُورتے اوہدی فطرت دا صحیح نمائندہ اے(عبرانیوں ١ : ٣)،اپنے لئی کِسے نہ مُکن والی شہرت دا پِچھا نہ کیتا ۔ایہدی بجائے ، اوہنےخُود خادم دی شکل اِختیار کیتی ، تے انسان ورگا ہوگیا ۔اوہنے اَپنے آپ نُوں نِکاکرلیاتے سانُوں چھُڈان لئی موت تیک فرماں بردار رہیا ۔
ایس لئی اَسیں یسوُع دی وڈیائی کردے آں، ” اوہ ساڈا خُدا،مکتی داتا تے بادشاہ اے۔“ ساڈے خُدا نُوں جلال دین تے یسوُع دی وڈیائی کرن دی وجہ ایہہ ہے پئی یسوُع نے آخر تیک اپنے پیو دی مرضی دی فرمانبرداری کیتی ۔ جے اوہ فرمانبرداری نہ کردا ،تے ایس ویلے اَسیں خُدا دے پُتر نُوں جلال نہ دے رہے ہوندے ۔پرخُدا دا پُتر نے مرن تیکر اپنے پیو دی مرضی دی فرمانبرداری کیتی ۔ایس لئی ساریاں مخلوقاں تے سارے لوک ایس زمین اُتے اوہنوں جلال دیندے نیں تے ابد تیک دیندے رہن گے ۔
یسوُع مسیِح خُدا دا برّہ بن گیا جیہڑا دُنیا دے سارے پاپ چُک کے لے گیا تے ایہہ لکھیا ہویااے پئی اوہنے اپنے بپتسمہ دے راہیں اوہناں سبھناں نُوں چُک لیا ۔ ہُن گھٹوگھٹ دو ہزار وَرہے لنگھ چُکے نیں جد یسوُع نے دُنیا دے سارے پاپ چُک لیے سَن  ۔ میَں تے تُسیں جد توں پیدا ہوئے آں اوس  ویلے   توں
ایس دُنیا وِچ حیاتی بسرکررہے آں، تے ساڈے سارے پاپ وی دُنیا دے پاپاں وِچ شامل نیں۔
 
کیہ اَسیں پاپی بن جاواں گے جے اَسیں
 کل پاپ کردے آں؟
نئیں، کیوں جے یسوُع نے ساڈے ماضی ،حال تے مستقبل دے
سارے پاپاں نوں چُک لیا
 
ساڈی اپنی حیاتی بھردیا ں خطاواں نُوں موروثی پاپ تو ں الگ کیتیوں  بغیر کیہ اَسیں اپنی پیدائش دے ویلے توں ای پاپ نئیں کیتے؟— آہو ، اَسیں اِنج   کرچُکے آں—
یسوُع جان دا سی پئی اَسیں اپنی پیدائش دے دن توں مرن دے دن تیک پاپ کراں گے، ایس لئی اوہنے پہلا ای ساڈے سارے پاپ چُک لئے ۔کیہ ہُن تُسیں ویکھ سکدے او؟ جےسانُوں ستّر وَرہے حیاتی بسر کرنی پیندی ،تے ساڈے پاپ ۱۰۰ توں بوہتے کوڑا چُکن والے ٹرکاں توں وی بوہتے ہوندے ۔ پر یسوُع نے اپنے بپتسمہ دے راہیں ساڈے سارے پاپ اِکو ای ویلے تے ہمیش لئی دُورکردِتے تے اوہ اوہناں نُوں اپنے نال صلیب اُتے لے گیا۔
جے یسوُع نے صِرف موروثی پاپ چُکیا ہونداتے اَسیں سب ہلاک ہوجاندے تے دوزخ وِچ جاندے ۔ ایتھوں تیک پئی جے اَسیں ایہہ محسوس کیتا ہوندا پئی اوہنے ساڈےسارے پاپ دُور نئیں کیتے تے ایہدے توں ایہہ سچیائی بدل دی نئیں پئی یسوُع نےساڈے سارے پاپ دُور کردِتے نیں ۔
ایس دُنیا وِچ  اَسیں کِنّے پاپ کر سکدے آں ؟ ساڈے سارے پاپ جیہڑے اَسیں  کردے آں ، دُنیادے پاپ وچ شامل نیں ۔
جد یسوُع نے یوحنا نُوں بپتسمہ لئی آکھیا،تے بالکل ایہوسی پئی اوہدا کیہ مطلب سی ۔ یسوُع نے خُود اپنی گواہی دِتی پئی اوہنے ساڈے سارے پاپ چُک لئے نیں۔ خُدا نے یسوُع توں پہلے اپنے خادم نُوں بھیجیا تے یسوُع نے اوہدے کولوں بپتسمہ لیا، اِنساناں دے نمائندے، یوحنا کولوں بپتسمہ  لین   لئیا  اوہدے   اَگے
  سِرجُھکان دے سبب یسوُع نے سارے اِنساناں دے سارے دے سارےپاپ چُک لئے ہُن ۲۰ توں ٣۰وَرہےدی عمرتیک، ٣۰ توں ۴۰وَرہے دی عمرتیک ،تے جتھے تیک حیاتی ہووے؛ ساڈے سارے پاپ ایتھوں تیک پئی ساڈے بالاں دے پاپ دُنیا دے ایہناں پاپاں وچ شامل نیں ،جِنھاں نُوں یسوُع نے اپنے
بپتسمہ دے راہیں چُک لیا سی  ۔
کون آکھ سکدااے پئی ایس دُنیا وِچ پاپ موجود اے ؟یسوُع مسیِح نے دُنیا دے سارے پاپ چُک لئے تے جد اَسیں ،کِسے شک دے اَڈ دِل نال ،یسوُع دے ایس کم اُتے ایمان لیاؤندے آں ،جیہڑا وہنے سانُوں سارے پاپاں توں مکتی دین لئی کیتا تے اَسیں سب مکتی حاصل کر سکدے آں۔ یعنی اوہدا بپتسمہ تے قیمتی خون وگان اُتے۔
بوہت سارے لوک اپنی سرکش حیاتی نُوں اپنے ای خیالاں وِچ چھپا دیندے نیں، تے اپنی حیاتی دے بارے ایس طرحاں گل کردےنیں جِویں ایہو ای سب توں ضروری اے ۔ پر بوہت سارے اجیہے لوک وی نیں جِنھاں نے اوکھیاں حیاتیاں بسر کیتیاں نیں۔ اپنی نویں پیدائش توں پہلاں میَں وی اجیہی حیاتی لنگھائی ۔ تُسیں کس طرحاں معافی دی خوشخبری ، یسوع دے بپتسمہ ، تے اوہدے خون نُوں سمجھ سکدے یا اوہنوں قبول نئیں کرسکدے او ؟
 
 
پاپیاں دی مکتی مکمل ہوچُکی اے
 
یسوُع نے کیوں پطرس د ے پیر دھوتے؟
کیوں جے اوہ چاہنداسی پئی پطرس ایس سچیائی اُتے مضبوط ایمان
رکھے پئی اوہ اپنے بپتسمہ دے راہیں پہلاں ای اوہدے مستقبل دے
سارے پاپاں نُوں دھوچُکیا سی
 
آؤیوحنا ١۹ باب پڑھیے ،”تے اوہ اپنی صلیب آپ چُک کے اوس تھاں تیکر باہر گیا جیہڑی کھوپڑی اَکھواندی اے ۔جیہداترجمہ عبرانی وِچ گُلگتااے۔اوتھے اوہنا ں نیں اوہنوں تے دو ہور بندیاں نُوں مصلُوب کیتا۔اِک نُوں ایدھر تے اِک نُوں اودھر تے یسوُع نُوں وِچکار ۔ تے پیلا طُس نیں اِک تختی لکھ کے صلیب اُتے ٹنگ دِتی ۔ اوہدے اُتے لِکھیا سی  ۔ یسوُع نا صری یہودیاں دا بادشاہ ۔ایس تختی نُوں بوہت سارے یہودیاں نیں پڑھیا۔ ایس لئی پئی اوہ  تھاں جِتھے یسوُع مصلُوب ہویا سی شہر دے لاگے سی تے اوہ عبرانی ،یونانی تے لاطینی وِچ لِکھی ہوئی سی“(یوحنا
۱۹: ۱۷۔۲۰)۔
سوہنےمِترو،یسوُع نے دُنیا دے سارے پاپ چُک لئے تے پیلاطُس دے کٹہرے وِچ اوہنوں صلیب دین دا حکم دِتا گیا ۔ ہُن آؤ سب رَل کے ایس منظر دے بارے سوچیے ۔
۲٨ آیت توں ، ” ایہدے بعد جدوں یسوُع نیں جان لیا پئی ہُن ساریاں گلاں پوریاں ہوگئیاں نیں تاں پئی نوِشتہ پورا ہووے تے آکھیا میَں پیاسا آں ۔اوتھے سِرکے دے نال بھریا ہویا اِک بھانڈا رکھیا سی ۔ایویں اوہناں نیں سِرکے وِچ ڈبوئے ہوئے سپنج نُوں زوفے دی ٹہنی اُتے دھرکے اوہدے منہ نال لایا ۔تے جدوں یسوُع نیں اوہ سِرکہ پیتا تے آکھیا ’ تمام ہویا ‘ تے سرجُھکاکے جان دے دِتی۔“ (یوحنا ۱۹: ۲۸۔۳۰)۔
یسوُع نے آکھیا، ” تمام ہویا! “ تےایہدے بعدوں مرگیا ۔تِن دن اوہ مویاں وِچوں جی اُٹھیا تے اَسمان اُتے چڑھ گیا ۔
یوحنا اصطباغی کولوں یسوُع دے بپتسمہ لین تے صلیب اُتے جان قربان کرن وِچ اِک بوہت ڈونگھا تعلق پایا جاندا اے؛ اِک دے اَڈ دوجے دے واقعہ ہون دی کوئی وجہ نئیں ۔ ایس لئی آؤخُداوند یسوُع دی وڈیائی کریے ۔ پئی اوہنے سانُوں معافی دی خوشخبری دے راہیں مکتی بخش دِتی ۔
بندے داجِسم ہمیش جِسم دِیا ں لوڑاں دے پِچھے چل دا اے ۔ ایس لئی  اَسیں اپنے جِسم نال پاپ کرنا بند نئیں کرسکدے ۔ یسوُع مسیِح نے سانُوں بدن دے پاپاں توں چھُڈان لئی سانُوں اپنا بپتسمہ تےخون بخش دِتا ۔ اوہنے اپنی خوشخبری دے راہیں سانُوں ساڈے بدن دے پاپاں توں مکتی بخشی ۔
جِنھاں لوکاں نُوں اپنےپاپاں دی مکمل معافی حاصل کرنی اے اوہ یسوُع اُتے ایمان لیا ن دے راہیں جیہڑا بیت الحم وِچ جمیا، جِنھے یردن وِچ بپتسمہ لیا ، جِنھے صلیب اُتے جان قربان کیتی تے جیہڑا تِن دِن بعد مویاں وِچوں جی اُٹھیا ، کِسے وی ویلے اَسمان دی بادشاہی وِچ داخل ہو سکدے نیں ۔ایس لئی اَسیں خُداوند دی وڈیائی کردے تے اوہدے ناں نُوں ابد تیک جلال دیندے آں ۔
یوحنا دی انجیل دے آخری  باب وِچ یسوُع مُردیاں وِچوں جی اُٹھن دے بعدوں گلیل نُوں گیا ۔ اوہنے پطرس دے کول جا کے اوہنوں آکھیا ، ” اَے شمعون یوحنا دے پُتر کیہ تُوں ایہناں توں بوہتی میرے نال محبت رکھداایں ؟ “تے پطرس نے اوہنوں جواب دیندے ہویاں آکھیا ، ” آہوخُداوند تُوں تے جان دا ای ایں پئی میَں تینوں عزیز رکھدا  آں  “ فیر یسوُع  نے  اوہنوں آکھیا  ،
”  تُوں میرے برّے چَرا۔“
پطرس نے سب گلاں نُوں یعنی یسوُع دے بپتسمہ تے اوہدے خون دی خوشخبری نُوں یعنی پاپاں دی معافی نُوں چنگی طرحاں جانیا ۔ہُن جد پئی اوہ پانی تے خون دی خوشخبری یعنی پاپاں دی معافی اُتے ایمان لے آیا تے اوہنے اوس سبب نُوں جان لیا پئی یسوُع نے کیوں اوہدے پیر دھوتے سَن ،اوہدا ایمان یسوُع وِچ ہور مضبوط ہوگیا۔
 آؤ یوحنا ۲١: ١٥ نُوں دُوجی واری پڑھیے ۔”تے جد کھانا کھا لیا تےیسوُع نے شمعون پطرس نُوں آکھیا اَے شمعون یوحنا دے پُتر کیہ تُوں ایہناں توں بوہتی میرے نال محبت رکھداایں ؟پطرس نے اوہنوں جواب دیندے ہویاں آکھیا ،’آہوخُداوند تُوں تے جان دا ای ایں پئی میَں تینوں عزیز رکھدا آں ‘ فیر یسوُع نے اوہنوں آکھیا  ، تُوں میرے برّے چَرا۔“ اوہ اپنے برّے پطرس دے حوالے کر سکداسی ایس لئی پئی پطرس اوہدا چیلا سی ، ایس لئی پئی پطرس نُوں مکمل مکتی بخشی گئی سی تے ایس لئی پئی پطرس راستباز تے خُدا دا مکمل خادم وی سی ۔
جے پطرس اپنے روز مرّہ دے پاپاں دے سبب پاپی بن جاندا، تے یسوُع نے اوہنوں وی پاپاں دی معافی لئی خوشخبری دی منادی کرن لئی نہ آکھیا ہوندا،ایس لئی پئی اوہ باقی چیلیاں دے نال ،جِسم وِچ ہرروز پاپ کرن توں باز نئیں رہ سکدا سی     ۔ پر، یسوُع          نے اوہنوں اوس خوشخبری دی منادی کرن لئی آکھیا ،جِنہے اوہناں دےسارے پاپاں نُوں دُور کردِتا، کیوں جے اوہ اوہدے بپتسمہ تے صلیب اُتے وگن والے خون تے پاپاں دے کفارے دی خوشخبری اُتے ایمان رکھدے سَن ۔
 
 
آہو خُداوند تُوں تے جانداای ایں پئی میَں تینوں عزیز رکھدا آں
                                 
کیہ تُسیں دُوجی وار ’ پاپی ‘ بن جاؤگے جد تُسیں
 فیر پاپ کروگے ؟
نئیں۔ یسوُع نے یردن اُتے میرے مستقبل دے
سارے پاپاں نُوں پہلے ای چُک لیا
 
یسوُع نے پطرس نُوں جو کجھ آکھیا، آؤایہدے اُتے غور کریے۔” اَے شمعون یوحنا دے پُتر کیہ تُوں ایہناں توں بوہتی میرے نال محبت رکھداایں ؟ “ پطرس نے اوہنوں جواب دیندے ہویاں آکھیا ، ” آہوخُداوند تُوں تے جان دا ای ایں پئی میَں تینوں عزیز رکھدا آں۔“ اوہدا محبت دااِقرار سچا سی ،تے ایس طرحاں اوہ اوہدےمونہہ وِچوں سارے پاپاں دے کفارہ دی خوشخبری دے ایمان وِچوں نکل رہیا سی ۔
جے یسوُع نے پطرس تے باقی چیلیاں  دے پیر دھون دے راہیں اوہناں نُوں پاپاں دی معافی دی خوشخبری نہ دِتی ہوندی تے اوہ ایس طورتے اپنی محبت دا اِظہار کرن دے لائق نہ ہوندے ۔
ایہدی بجائے، جد یسوُع نے اوہدے کول آکے پُچھیا ،” کیہ تُوں ایہناں توں وَدھ کے میرے نال   محبت رکھداایں ؟ “ پطرس نے ایہہ جواب دِتا ہوندا، ” اَے خُداوند میَں نامکمل تے پاپی آں ۔ میَں ایہو جیہا پاپی آں جیہڑا ایہناں توں ودھ کے تینوں محبت نئیں کرسکدا ۔ منت نال مینوں کلیاں چھڈدے ۔ “ تے پطرس نس گیا ہونداتے خُود نُوں یسوُع کولوں چھُپا لیندا۔
پر آؤپطرس دے جواب اُتے سوچیے ۔ اوہ پاپاں دی معافی دی خوشخبری ، یعنی یسوُع دے بپتسمہ تے خون دی خوشخبری دی برکت رکھدا سی جِنھے ساری اِنسانی پیِڑھی نُوں چھُڈایا ۔
 ایس لئی اوہنے آکھیا، ” آہوخُداوند تُوں تے جان داای ایں پئی میَں تینوں عزیز رکھدا آں۔“ محبت دا ایہہ اِقرار یسوُع دی معافی دی خوشخبری اُتے ایمان لیان دے سبب اوہدے اندروں نکلیا ۔ پطرس معافی دی سچی خوشخبری اُتے ایمان رکھدا سی جیہدے راہیں یسوُع نے ساری دُنیا دے پاپ چُک لئے ۔ایتھوں تیک پئی مستقبل دے پاپ وی ایہدے وِچ شامل نیں جیہڑے اِنسان اپنی کمی تے جِسم دی کمزوری دے سبب کرن گے ۔
کیوں جے پطرس پاپاں دی معافی دی خوشخبری اُتے پکا ایمان رکھدا سی تے اوہدا ایہوا ی ایمان سی پئی یسوُع خدا دا بّرہ اے، ایس لئی اوہ بِلا جھِجک یسوُع نُوں جواب دے سکداسی ۔ یسوُع دی مکتی پاپاں دی معافی توں مل دی اے،ایویں پطرس اپنے روزمرّہ دےپاپاں توں وی رہا ہوچُکیا سی ۔ پطرس دُنیا دے پاپاں دی معافی دی خوشخبری دے راہیں مکتی حاصل کرن تے ایمان رکھداسی ۔
کیہ تُسیں وی پطرس ورگے او؟کیہ تُسیں یسوُع نال محبت تے اوہدے اُتے بھروسہ کر سکدے او، جِنھے اپنی معافی دی خوشخبری ،ا پنے بپتسمہ تے خون دے سبب دُنیا دے سارے پاپ دُور کردِتے ؟تُسیں کس طرحاں ایہدےاُ  تے ایمان تے ایہدے نال محبت نئیں  رکھ  سکدے؟ کوئی  ہور  دُوجا  طریقہ نئیں
اے۔
جے یسوُع نے صرف ماضی یاں حال دے پاپ ای دُور کیتے ہوندے تے ساڈے لئی مستقبل دے پاپ چھڈ دِتے ہوندے ، تے اَسیں ایس طرحاں وڈیائی کرن دے قابل نہ ہوندے ،جس طرحاں ہُن کردے آں۔ہور، اوہدے سبب اَسیں لازمی طورتےدوزخ وچ جاواں گے ۔ایس لئی سانُوں سب نُوں ایہہ اِقرار کرنا چاہی دا اے پئی سانُوں سارے پاپاں دی معافی دی کثرت دی خوشخبری اُتے ایمان لیا ن دے راہیں مکتی بخشی گئی اے ۔
جِسم دی رغبت ہمیش پاپ وَل ہوندی اے تے اَسیں ہر ویلے پاپ کردے  آں ۔  ایویں  سانُوں
ایہہ اِقرار کرنا چاہی دااے پئی سانُوں یسوُع دےبپتسمہ تے خون ، پاپ دے اُچیرے کفارے دی خوشخبری اُتے جیہڑا یسوُع نے ساڈی خاطر دِتا، ایمان لیا ن دے سبب مکتی ملی اے ۔
جے اَسیں پاپاں دے کفارے ، یسوُع دے بپتسمہ تے خون دی خوشخبری اُتے ایمان نہ لیاندے تے کوئی ایماندار اپنے روز مرّہ دے پاپاں توں رہائی حاصل نہ کردا۔ مزید ،جے ہر واری اِقرار کرن تے دُہران دے سبب اپنے روز مرّہ دے پاپاں  توں سانُوں مکتی   مِلدی ،  تے   خورے   اَسیں   ہر   واری  راستباز
ٹھہرن وِچ سُستی کر جاندے تے پاپ ساڈے دِلاں وچ ہر ویلے موجود رہندے  ۔
جے ایویں ہوندا ، تے اَسیں گھڑی مُڑی پاپی ٹھہردے رہندے تے یسوُع نال محبت کرن تے اوہدی قُربت حاصل کرن دے لائق نہ ہوندے ۔ فیر، اَسیں یسوُع دی مکتی اُتے ایمان لیان دی قابلیت نہ رکھدے تے اپنی حیاتی دے خاتمےتیک اوہدی پیروی نہ کر پاؤندے۔
 یسوُع نے سانُوں پاپاں دی معافی دی خوشخبری بخشی تے اوہناں نُوں بچالیا جیہڑے ایمان لیائے ۔ اوہ مکمل مکتی دا تا بن گیا تے اوہنے اوہناں ساریاں خطاواں نُوں مٹادِتا جیہڑیاں اَسیں ہرروز اپنی حیاتی وِچ کردے آں تاں پئی اَسیں سچے طورتے اوہدے نال محبت کرئیے ۔
اَسیں ایماندار صِرف یسوُع دے بپتسمہ تے خون دی خوشخبری تے اپنے پاپاں دی معافی اُتے ایمان رکھدے آں۔ سارے ایماندار، ہمیش لئی یسوُع نال محبت رکھ سکدے نیں تے پاپاں دی معافی دی خوشخبری دے راہیں جیہڑی یسوُع نے سانُوں بخشی مکتی دی محبت دے قیدی بن سکدے آں ۔
سوہنے بیلیو!جے یسوُع نے نِکّے جیہے پاپ نُوں وی پِچھے رہن دِتا ہونداتے نہ تُسیں یسوُع اُتے ایمان لیان دے لائق ہوندے تے نہ تُسیں پاپاں دی معافی دی خوشخبری دی گواہی دین دے قابل ہوندے ۔ تُسیں خُدا دے خادم دے طورتے کم کرن دے لائق نئیں ہوووگے۔
پر،جے تُسیں پاپاں دی معافی دی خوشخبری اُتے ایمان رکھدے او،تے تُسیں دُنیا دے سارے پاپاں توں بچ سکدے او۔ اوہ اوس ویلے تُہانوں دُنیا دے سارے پاپاں توں مکتی بخشدااے،جد تُسیں معافی دی ایس سچی خوشخبری نُوں قبول کردے اوجیہدا یسوُع دے کلام وِچ ذِکرکیتا گیا ۔
 
 
” کیہ تُوں ایہناں تو ں بوہتی میرے نال محبت رکھدا ایں؟ “
 
کیہڑی شَے سانُوں کِسے وی دُوجی شَے نالوں بوہتی
یسوُع نال محبت کرن دے قابل کر چُکی اے؟
اوہدے بپتسمہ دے راہیں ساڈے لئی اوہدی محبت ،جِنھے
ساڈے سارے پاپ دھودِتے ، ایتھوں تائیں پئی ساڈے
مستقبل دے پاپ وی دھودِتے
 
خُدا نے اپنے  برّیاں نُوں اوہناں خادماں دے حوالے کیتا ، جیہڑے پاپاں دی معافی دی خوشخبری اُتے ایمان رکھدے سَن ۔ یسوُع نے تِن واری پطرس کولوں پُچھیا ” اَے شمعون یوحنا دے پُتر کیہ تُوں ایہناں تو ں بوہتی میرے نال محبت رکھداایں؟ “تے پطرس نے ہر واری جواب دِتا  ” آہو خُداوند تُوں تے جان دا ای ایں پئی میَں تینوں عزیز رکھدا آں۔“  ہُن آؤ پطرس دے جواب اُتے غور کرئیے ۔ اَسیں ویکھدے آں پئی ایس اِظہار وِچ اوہدی مرضی شامل نئیں سی ، سگوں دُنیا دے سارےپاپاں دی معافی دی خوشخبری اُتے اوہداا یمان سی ۔
جد اَسیں کِسے نال محبت کردے آں، تےجے اوہ محبت ساڈی مرضی دے مطابق اے تے اوہ ساڈی کمزوری پاروں ہِل سکدی اے۔ پرجےاوس محبت دی مضبوطی دا اِنحصار خُدادی محبت اُتے اے تے فیراوہ ہمیش تیک قائم رہوے گی ۔خُدادی محبت ،بنا م ساڈے سارے پاپاں دا اُچیر اکفارہ ،یسوُع دے بپتسمہ داپانی ،تےرُوح دی مکتی  وی اجیہے نیں۔
پاپاں دی معافی دی خوشخبری اُتے جیہڑا  اَسیں  ایمان  رکھدےآں  اوہنوں  خُداوند  لئی  ساڈی
خدمت تے اوہدے لئی ساڈی محبت دی بنیاد ہونا چاہی دااے ۔جے اَسیں اوہدے نال صرف اپنی مرضی دی بنیاد اُتے محبت رکھی ، تے کل نُوں اَسیں ٹھوکر کھاواں گےتے ساڈاانجام ایہہ ہووےگاپئی اَسیں اپنی ای بدکاریاں دے سببوں خُودتوں نفرت کراں گے۔ پر یسوُع نےساڈےسارےپاپ دھودِتے:یعنی موروثی پاپ ،ساڈے ماضی  دے پاپ، روز مرّہ دے پاپ،آئندہ دے پاپ تےساڈی پوری حیاتی  دے پاپ دھو دِتے ۔ اوہنے ایس رُوئے زمین اُتے کِسے شخص نُوں اپنی مکتی توں اَڈ نئیں رہن دِتا ۔
ایہہ سب سچ اے۔ جے ساڈی محبت تے ایمان دی بنیاد ساڈی اپنی مرضی تے اِرادیاں اُتے ہے ،تے اَسیں اپنےایمان وِچ ناکام ہوجاواں گے۔پرکیوں جے ساڈی محبت تے ایمان دی بنیاد معافی دی خوشخبری اُتے ہے جیہڑی یسوُع نے سانُوں بخشی تے  اَسیں پہلے ای خُدا دے پُتر،دِھیاں ،یعنی رستباز لوک آں ۔ کیوں جے اَسیں پانی تے رُوح دی مکتی اُتے ایمان رکھدے آں، ایس لئی اَسیں بے پاپ آں۔
ایس سچیائی دی وجہ توں پئی سانُوں مکتی حاصل ہوئی ،اوہ ساڈی اپنی ذات دی اچھائی دی شکل  وِچوں نہیں ، سگوں خُدا دی محبت تے اوہدی سچی مکتی دی شریعت توں یعنی اپنے پاپاں دی معافی دے راہیں، اَسیں راستباز آ ں ، بھاویں اَسیں اپنی اصلی حیاتی وِچ کِنّے ای نامکمل تے کمزور آں۔ اَسیں اَسمان دی بادشاہی وِچ جاواں گے تے آخر وِچ ابدیت تیکر اوہدی وڈیائی کراں گے۔ کیہ تُسیں ایس گل اُتے ایمان رکھ دے او؟
١۔یوحنا ۴:١۰ بیا ن کردا اے ، ” محبت ایہدے وِچ نئیں پئی اَسیں خُدانال محبت کیتی سگوں ایس وِچ ہے پئی اوہنے ساڈے نال محبت کیتی تے ساڈے پاپاں دے کفارہ لئی اَپنے پُتر نُوں بھیجیا۔“ یسوُع نے سانُوں پانی تے رُوح دے نال بچایا،ایویں سانُوں معافی دی خوشخبری ،یسوُع دے بپتسمہ تے اوہدے خون اُتے ایمان رکھنا چاہی دا اے۔
جے خُدا نے سانُوں پاپاں دی معافی دی خوشخبری دے سبب مکتی نہ دِتی ہوندی ، تے اَسیں مکتی حاصل نہیں کرسکدے سی ۔بھاویں اَسیں کِنّے جوش نال ایمان کیوں نہ رکھدے ۔پر یسوُع نے ایہناں سارے پاپاں نُوں معاف کردِتا جیہڑے اَسیں اپنے دِلاں تے بدناں وِچ کیتے ۔
خُدا اُتے ایمان لیان ،راستباز ٹھہرن لئی ،سانُوں پانی تے رُوح دے کلام ،معافی دی خوشخبری اُ تے ایمان رکھن دے راہیں اپنی مکتی اُتے  پکا ایمان ر کھنا چاہی دا اے۔دُنیا دے سارے پاپاں دی معافی دی خوشخبری یسوُع دے بپتسمہ تے اوہدے خون اُتے ایمان رکھن تے مشتمل اے ۔ معافی دی خوشخبری سچے
ایمان دا موضوع ، مکتی دی سچی بنیاد اے،تے خُدادی بادشاہی وِچ جان دی کنجی اے ۔
 
 
سانُوں اپنی مَن مرضیاں دے ایمان نُوں دفع کرناچاہیے
 
سچا ایمان کِتھوں حاصل ہونداے؟
ایہہ خُداوند دی محبت توں حاصل ہوندااے،جیہڑا پہلے ای
ساڈے سارے مستقبل دےپاپ دھوچُکیا اے
 
اجیہا ایمان یاں محبت جیہڑے اِک شخص دی اپنی مرضی دے متعلق ہون اوہ ناں تے سچا  ایمان اےتے ناں ای  سچی محبت اے۔ ایس دُنیا وِچ بوہت سارے اجیہے لوک نیں جیہڑے پہلے نیک نیّتی دے نال خُدااُتے ایمان رکھدے نیں پر بعدوِچ اپنے دِلاں وِچ پاپ دی موجودگی دے سبب اپنا سارے دا ساراایمان گنوابہندے نیں۔
پرسانُوں لازمی طورتے بڑی چنگی طرحاں جاننا چاہی دااے پئی یسوُع نے دُنیا دے سارےپاپاں نُوں دھودِتا: نہ صرف معمولی بدکاریاں نُوں سگوں اوہناں وڈے پاپاں نُوں وی جیہڑے لاعِلمی وِچ کیتے گئے سَن ۔
تے یوحنا١٣باب وِچ ،اَپنےچیلیاں نُوں مکتی دی وڈیائی تے ابدیت دی تعلیم دین لئی ، یسوُع نے اپنی مصلوبیت توں پہلاں اوہناں نُوں جمع کیتا ۔ اَپنےچیلیاں نال کھانا کھان توں پہلے اوہ اپنے کثرت دے مکتی دے نکتے نُوں واضح کرن لئی اُٹھیا تے اوہناں دے پیر دھوتے ۔ سانُوں ساریاں نُوں معافی دی ایس خوشخبری نُوں جاننا تے ایہدےاُ تے ایمان رکھنا چاہی دا اے جیہدی  یسوُع   نے  چیلیاں   دے   پیر  دھون
دے راہیں تعلیم دِتی ۔
پر شروع وِچ پطرس نے یسوُع نُوں سختی نال منع کیتا پئی اوہ اوہدے پیر نہ دھوئے ۔” تُوں میرے پیر کدی ابدتیک دھونہ پائیں گا! “تے ایہہ اوہدی اپنی مَن مرضی دے راہیں  ایمان دا اِظہار سی ۔ پر یسوُع نے اوہنوں دَسیا  ” جیہڑا میَں کرداآں تُوں ہُن نئیں جان داپر بعدوں سمجھیں گا۔“
ہُن ،پانی تے رُوح دی خوشخبری نال  اَسیں کلام دِیاں گلاں نُو ں سمجھ سکدے آں جیہڑیاں ساڈی سمجھ توں باہر سَن ۔ ایہہ سچیائی دا کلام ؛جیہڑا پانی تے رُوح دی خوشخبری ،پاپاں دی  معافی  اے  جیہڑی  اِک
پاپی نُوں پورے دِل نال ایمان لیا ن دے سبب راستباز ٹھہراندی اے ۔
پطرس  باقی چیلیاں نال مچھیاں پھڑن لئی گیا ،اوہ ایسے طرحاں مچھیاں پھڑ رہے سَن جِس طرحاں یسوُع نال ملن توں پہلاں مچھیاں پھڑدے سَن۔فیر، یسوُع نے اوہناں دے سامنے ظاہرہوکے اوہناں نُوں بلایا ۔ یسوُع نے اوہناں لئی کھانا تیار کیتا تے جدوں اوہ کھا رہے سَن تے پطرس نے ایس کلام نُوں سمجھ لیا جیہڑا یسوُع نے پہلے بیان کیتاسی ۔” جیہڑا میَں کرداآں تُوں ہُن نئیں جان داپر بعدوں سمجھیں گا۔ “ آخرکار اوہ ایس گل نُو ں سمجھ گیا جیہڑی یسوُع نے پیر دھون دے ویلے اوہنوں آکھی سی ۔
” خُداوند نے میرےسارے پاپ دُورکردِتے میرے سارےپاپ جیہڑے میَں اپنی کمزوری دی وجہ توں کیتے ۔جِنھاں وِچ اوہ پاپ وی شامل نیں جیہڑے میَں فیر کراں گا۔“  پطرس نے اپنی مرضی تے اِرادہ دے ایمان نُوں چھڈ دِتا تے یسوُع دے بپتسمہ تے خون یعنی پاپاں دی  معافی دی خوشخبری اُتے ایمان لیانا شروع کیتا ۔
ناشتے توں بعد یسوُع نےپطرس نُوں پُچھیا، ” کیہ تُوں ایہناں توں بوہتی میرے نال محبت رکھدا ایں؟“ ہُن یسوُع دی محبت وِچ ایمان دی مضبوطی حاصل کردے ہویاں پطرس نے اِقرار کیتا ۔ ” آہو خُداوند تُوں تے جان دا ای ایں پئی میَں تینوں عزیز رکھدا آں۔ “  پطرس ایویں آکھ سکداسی ایس لئی پئی اوہنے جان لیا سی پئی یسوُع دے ایہہ آکھن توں کیہ مُراد سی ، ” پر بعدوں سمجھیں گا۔“ اوہ اپنے سچے ایمان ،یسوُع دے بپتسمہ تے خون یعنی پاپاں دی معافی دی خوشخبری اُتے ایمان دا اِقرار کرسکداسی ۔
 
 
بعد وِچ ، اوہ خُدا دا اِک سچا خادم بن گیا
 
تُسیں کِویں خُدا دےسچےخادم بن سکدے او؟
اپنے سارےپاپاں لئی اوہدے اَبدی فدیے اُتے
ایمان رکھن دےراہیں
 
ایس تجربے توں بعد پطرس تے باقی رسوُلاں نے اپنی حیاتی دے آخری ساہ تیکر خوشخبری دی منادی کیتی ۔ ایتھوں تیک پئی پولُس ،جِنھے بے رحمی نال مسیِحیاں نُوں ستایا سی اوہنے رومی  سلطنت دےاوس خطرناک دَور وِچ خوشخبری دی گواہی دِتی ۔
یسوُع دے بارہ چیلیاں وِچوں  یہوداہ اسکریوتی نے یسوُع نُوں ویچ دِتاتےبعد وِچ خُود نُوں پھاہے لا لیا ۔تے ایہہ پولُس رسوُل سی جِنھے بعد وِچ اوہدی تھاں لئی ،چیلیاں نے اپنے وِچکار متیاہ نُوں چُنیاں پر خُدانے پولُس نُوں چُنیاں،ایس طرحاں  پولُس یسوُع دا چیلا بن گیا تے اوہنے یسوُع دے باقی چیلیاں نال رَل کےپاپاں دی  معافی دی خوشخبری دی منادی کیتی ۔
یسوُع دے بوہتے چیلے شہید ہوئے ۔ ایتھوں تیک پئی موت دِیاں دھمکیاں دے باوجود ، اوہناں نے اپنے ایمان دا اِنکارنہ کیتا تے سچی خوشخبری دی منادی کردے رہے ۔
اوہ ایویں منادی کرچُکےسَن: ” یسوُع مسیِح نے اپنے بپتسمہ تے خون دے نال ،یعنی، معافی دی خوشخبری نال تُہاڈے بدن دےسارےپاپاں نُوں دُورکردِتا۔ یسوُع نے یردن اُتے بپتسمہ لین نال تُہاڈے پاپاں نُوں چُک لیا تے تُہاڈے لئی صلیب اُتے سزاجَری ۔ یسوُع دے بپتسمہ تے صلیب اُتے ، اوہدے وگن والے خون دی خوشخبری اُتے ایمان لیاؤتے مکتی حاصل کرو۔  “
بوہت سارے لوکاں نے ایس خوشخبری نُوں سُنن تے ایہدے اُتے ایمان لیا ن دے راہیں مکتی حاصل کیتی اے ۔ ایہہ یسوُع دے بپتسمہ ، اوہدے خون ، تے اوہدی رُوح دی خوشخبری اُتے ایمان لیان دی قوت اے ۔
چیلیاں نے پانی تے رُوح دی خوشخبری دی، ایہہ آکھدیاں ہویاں منادی کیتی ،  ” یسوُع خُدا تے مکتی داتا اے۔“ کیوں جے اوہناں نے پانی تے رُوح دی خوشخبری دی گواہی دِتی سی ایس لئی میَں تے تُسیں یسوُع دے بپتسمہ ، خون تے مکتی دی خوشخبری نُوں سُن کے پاپ توں بچ سکدے آں ۔ خُدادی بے حدمحبت ، تے یسوُع دی مکمل مکتی دے سبب ، اَسیں سب یسوُع دے چیلے بن گئے آں۔
کیہ تُسیں سب ایمان رکھدے او؟یسوُع نےساڈےنال ایس قدر محبت کیتی پئی اوہنے سانُوں پانی ، رُوح تے معافی دی خوشخبری بخشی تے اَسیں یسوُع دے راستباز  چیلے  بن  گئے  آں۔ معافی  دی  سچی
خوشخبری دی تعلیم دین لئی ، یسوُع نے اَپنے چیلیاں دے پیر دھوتے ۔
یسوُع نے اپنے چیلیاں دے پیر دھو،کے اوہناں نُوں تے سانُوں ایہہ سکھایا پئی دُنیادے سارے پاپ، اوہ سارےپاپ ، جیہڑے اَسیں اپنی ساری حیاتی دے وِچ کیتے، اوس ویلے مکمل طورتے دُور کر دِتے گئے جد یسوُع نے بپتسمہ لیاتے صلیب اُتے خون وگایا ۔ اَسیں یسوُع دی محبت تے معافی دی خوشخبری لئی اوہدا شکر ادا کردے آں۔
یسوُع نے اپنے چیلیاں دے پیر دھون دے راہیں سانُوں دو گلاں دی تعلیم دِتی ۔اوّل ، ایہہ اوہناں نُوں سکھان لئی سی جِویں اوہنے فرمایا، ” جیہڑا میَں کرداآ ں تُوں ہُن نئیں جان دا پر بعد وں سمجھیں گا ، “ پئی ساڈے سارےپاپ معافی دی خوشخبری ،یسوع دے بپتسمہ تے خون دے راہیں دُور کیتے گئے سَن۔
 دُوجا، اوہناں نُوں ایس گل دی تعلیم دین لئی سی پئی جس طرحاں یسوُع نے پاپیاں نُوں مکتی بخشن تے راستباز ٹھہران لئی خُود نُوں حلیم کیتا ، اَسیں جیہڑے نویں سِرےتوں پیدا ہوئے آں ،معافی دی خوشخبری دی منادی کرن دے راہیں سانُوں دُوجیاں دی خدمت کرنی چاہی دی اے ۔اَسیں جیہڑے پہلے آئے ساڈا حق اے پئی اَسیں بعد وِچ آن والیاں دی خدمت کرئیے۔
فسح دی عید اُتے یسوُع دے چیلیاں دے پیر دھون دِیاں دونویں  وجہاں واضح نیں تے اَج وی کلیسیا وِچ موجود نیں۔
کوئی چیلا اپنے اُستاد نالوں وڈانئیں ہوسکدا۔ ایس لئی اَسیں دُنیا نُوں ایس طرحاں خوشخبری سناؤندے تے اوہدی خدمت کردے آں جِویں اَسیں یسوُع دی خدمت کردے آں۔  سانُوں جِنھاں نُوں پہلاں مکتی ملی،بعد وِچ آن والے لوکاں دی خدمت کرنی چاہی دی اے ۔ایہہ تعلیم دین لئی ، یسوُع نے اپنے چیلیاں دے پیردھوتے۔نالے ،پطرس دے پیردھون توں، اوہنے ساڈے اُتے ایہہ وی واضح کیتاپئی اوہ ساڈا مکمل مکتی داتا اے تاں پئی اَسیں دُوجی واری ابلیس کولوں دھوکہ نہ کھائیے ۔
تُسیں سب معافی ،یعنی پانی تے رُوح دی خوشخبری اُتے ایمان لیاکے مکتی حاصل کرسکدے او۔ یسوُع نے اپنے بپتسمہ ، مصلُوبیّت ، تے مُردیاں وِچوں جی اُٹھن دے سبب ساڈے سارے پاپ دُورکردِتے ۔ صرف اوہ لوک ابد تیکر دُنیا دےپاپاں توں مکتی حاصل کر سکدے نیں جیہڑے اوہدی خوشخبری اُتے ایمان رکھدے نیں۔
 
 
اوس خوشخبری اُتے ایمان رکھو جِنھے ساڈے روزمرّہ دےسارےپاپاں نُوں دھودِتا ۔
 
اَسیں معافی دی خوشخبری ، پانی تے رُوح دے کلام اُتے ایمان لیان دے سبب ابلیس دے سارے فریباں نُوں ختم کرسکدے آں۔ لوک بڑی آسانی نال ابلیس دے دھوکے وِچ آجاندے نیں تے ابلیس مسلسل اوہناں دے کَنّاں وِچ  پھُوکاں ماردارہندا اے۔ایہہ جان دےہویاں پئی لوکاں دے جِسم لگاتاردُنیاوِچ پاپ کردے رہندے نیں، اوہ کِویں پاپ توں اَڈ ہو سکدے نیں؟ سارے اِنسان پاپی نیں۔
فیر وی ،سانُوں اوہدے جواب دا پتہ اے ۔ ” ایہہ جان دے ہویاں پئی یسوُع نے اپنے بپتسمہ دے راہیں ساڈے بدن دےسارے پاپ دُور کردِتے، ایس لئی اِک ایماندار دے اندر کِس طرحاں پاپ موجود ہوسکدا اے؟ “  یسوُع نے پاپ دی پوری قیمت ادا کر دِتی اے ،ایس  لئی  ہُن  کیہڑا   پاپ  باقی   اے جیہدی سانُوں قیمت ادا کرنی اے ؟
جے اَسیں پانی تے رُوح دی خوشخبری اُتے ایمان نئیں رکھدے ،تے ابلیس دِیاں گلاں ٹھیک لگدیاں نیں۔پر،جے اَسیں خوشخبری نُوں اپنے کول رکھدے آں ،تے اَسیں خُدادے کلام دِیاں سچائیاں اُتے ہمیشہ قائم رہن والا ایمان رکھ سکدے آں۔
سانُوں لازمی طورتےپانی تے رُوح نال نویں پیدائش حاصل کرن دی خوشخبری اُتے ایمان رکھنا چاہی دا اے ۔ سچاایمان ایہہ ہے پئی یسوُع دے بپتسمہ ، اوہدے صلیب اُتے وگن والے خون ، اوہدی موت، تے مویاں وِچوں جی اُٹھن اُتے یقین کرنا ایں۔
کیہ تُسیں کدی پاک خیمہ ء اجتماع دے نمونے اُتے غور کیتا اے ؟ایہہ اِک چھوٹا جیہا خیمے داگھراے۔ ایہہ گھردوحصّیاں وِچ تقسیم کیتا گیا اے، باہروالاحصّہ پاک مقام اے تے اندر والا حصّہ پاک ترین مقام اے،جیہدے اندر رحمگاہ اے۔
پاک خیمہء اجتماع دے باہر والے ویہڑے وِچ ۶۰ستون کھلوتے نیں،تے پاک مقام دے ۴۸تختے نیں ۔ خُدادے کلام دے معنے سمجھن لئی ساڈےذہناں وِچ خیمہء اجتماع دی تصویر لازمی طورتے ہونی چاہی دی اے۔
 
 
 
خیمہء اجتماع دے ویہڑےدا بُوہا کِس شَے نال بنیا ہویا سی ؟
 
خیمہء اجتماع دے ویہڑے دابُوہا کِس
شَے نال بنیا ہویا سی؟
اَسمانی ، اَرغوانی ، تے لال رنگ دے لیڑے تے باریک
وٹے ہوئے دھاگے دے بُنے ہوئے پردے نال
 
خروج۲۷:١٦ وِچ خیمہء اجتماع دے ویہڑے دے بُوہے دا ذِکرکیتا گیا اے، ”تے ویہڑے دے بُوہےلئی بیس ہتھ دا اِک پردہ ہووے جیہڑا اَسمانی ،اَرغوانی تےلال رنگ دے لیڑے تے باریک وٹے ہوئےکتان دا بنیا ہووے ۔ تے ایہدے اُتے پھُل بوٹے کڈھے ہون ۔اوہدے ستون چارتے ستوناں دے خانے وی چار ای ہون۔“  خیمہء اجتماع دے ویہڑے دے بُوہےلئی جیہڑیاں شیَواں وَرتیاں گئیاں اوہناں وِچ اَسمانی ،اَرغوانی ،لال لیڑا تے باریک وٹیاہویاکتان سی ۔ ایہنوں بڑی محنت نال بنایاگیا سی تے رنگاں نال بھریاہویا سی  ۔
خُدا نے موسیٰ نُوں حکم دِتاپئی بُوہا اَسمانی ،اَرغوانی تےسرخ دھاگے نال بُنیا جاوے تاں پئی سب نُوں اندر داخل ہون دی راہ لبھن وِچ آسانی ہووے۔ اَسمانی ،اَرغوانی ،لال تے   باریک کتانی دھاگے نال  بُنیا ہویابُوہا چونہہ ستوناں اُتے لایا گیا سی ۔
ایہہ چار شیَواں خُدادی مکتی دی واضح طورنال اَگوائی  کردیاں نیں جِنھاں دے راہیں اوہ اوہناں سب لوکاں نُوں مکتی بخشے گا جیہڑے خُدا دے پُتر ،یسوع دے بپتسمہ ، تے خون  دے راہیں، اوہدے خُدا ہون اُتے ایمان لیان گے ۔
پاک خیمہء اجتماع دی تعمیروِچ جیہڑیاں وی شیَواں وَرتیاں گئیاں اوہناں دے بڑے خاص  معنے سَن تے ایہہ خُدا دے کلام تے یسوُع دے راہیں ،اوہدے اِنسانی پیِڑھی نُوں چھُڈان دے منصُوبے نُوں پیش کردے سَن ۔
ہُن، پاک خیمہء اجتماع دے ویہڑے دے بُوہےلئی کِنّیاں مختلف  شیَواں وَرتیاں گئیاں  سَن؟چار مختلف شیَواں وَرتیاں گئیاں سَن؛اَسمانی ، اَرغوانی ،لال کپڑاتے باریک کتانی دھاگہ ۔ ایہہ چار رنگ نویں پیدائش دی خوشخبری اُتے ایمان دی مضبوطی حاصل کرن لئی بڑے معنی رکھدیاں نیں ۔  جے ایہہ ضروری  نہ ہوندے ،تے کلام وِچ ایہناں دے بارے گل بات نُوں ایہناں کھول کے بیان نہ کیتا جاندا۔
پاک خیمہء اجتماع دے ویہڑے دے بُوہےلئی جیہڑیاں شیَواں ورتیاں گئیاں ،ساڈی مکتی اُتے واضح معافی عائد کردیاں نیں ۔ ایویں ، خُدا نے ایہہ گلاں موسیٰ اُتے واضح کیتیاں تے اوہنوں دَسیا پئی اوہناں نُوں بالکل ایس نمونے دے مطابق بنائے جیہڑا اوہنوں وکھایا گیا سی۔
 
 
خُدادی خوشخبری وِچ اَسمانی ،اَرغوانی تے لال کپڑےتوں کیہ مُراد اے؟
 
خیمہء اجتماع لئی اِستعمال کیتیاں گئیاں ساریاں
شیَواں نےکیہ ظاہر کیتا؟
اوہدے بپتسمہ تے خون دے راہیں یسوُع دی مکتی نُوں
 
پاک خیمہء اجتماع دےاندر ،اَسمانی ، اَرغوانی ،لال تے باریک کتانی لیڑے نُوں اوس پردے نُوں بنان لئی دُوجی واروَرتیاگیا جیہڑا پاک مقام تے پاک ترین مقام دے وِچکار لمکایا گیا سی ۔ ایہوجیہے لیڑے سردارکاہن دے بانے لئی وَرتےگئے،جیہڑا وَرہے وِچ اِکو ای واری پاک ترین مقام وِچ داخل ہوسکداسی ۔
اَسمانی رنگ دا وٹیاہویادھاگہ یسوُع دےبپتسمہ دانشان اے۔١۔پطرس ٣:۲١ وِچ ایہہ دَسیا گیا اے۔ ”تے اوسے پانی دا مشابہ وی یعنی بپتسمہ یسوُع مسیِح دے جی اُٹھن دے راہیں ہُن تہانُوں بچاؤندااے۔“ایس آیت وِچ پطرس نے پکا کیتا پئی یسوُع دا بپتسمہ ،فدیے دی مکتی دے مشابہ دے طورتے ہے ،جیہدے راہیں اوہنے دُنیا دےسارے پاپ اپنے اُتے لے لئے۔ بپتسمہ دے وسیلے یسوُع نے ساڈےسارےپاپ اپنے اُتے چُک لئے ۔ ایس لئی ، اَسمانی رنگ دا لیڑایعنی یسوُع دابپتسمہ مکتی دے کلام دا حدوں بوہتا ضروری رنگ اے۔
لال رنگ دا لیڑا یسوُع دے خون دا نشان اے ،تے اَرغوانی رنگ دا  لیڑا  اوہدی  الُوہیت  دا —  یسوُع دے بادشاہ تے خُدا ہون دے نشان نُوں ظاہرکردااے ۔ ایس لئی  لیڑے  دے تِنوں  رنگ  یسوُع
اُ تے ساڈے ایمان تے اوہدی مکتی حاصل کرن لئی ضروری سَن۔
سردارکاہن جیہڑا سوائی چمکیلا ویس پاؤندااوہنوں افود آکھیاجانداسی ۔ تے افود دا چوغہ سارا اَسمانی رنگ دا ہونداسی ۔ سردارکاہن سِر اُتے پگڑی رکھداسی ، جیہدے اُتے خالص سونے دا پَتر لگیا ہونداتے اوہدے اُتے ایہہ کڈھیا سی ،  ’ خُداوند لئی مقدّس‘ اوہ پَتر، اَسمانی رنگ دی ڈوری دے نال ،وی ، پگڑی اُتے بنیاجانداسی ۔
 
 
اَسمانی وٹے ہوئےدھاگے دے راہیں پیش کیتی گئی سچیائی
                                       
اَسمانی وٹیا ہویادھاگہ کیہ ظاہر کردااے؟
یسوُع دا بپتسمہ
 
میَں کلامِ مقدّس وِچ  اَسمانی رنگ دے معنے تے غورکیتا۔کلامِ مقدّس اَسمانی رنگ دے بارے کیہ بیان کردااے ؟سانُوں اَسمانی ،اَرغوانی تے لال رنگاں وِچوں اَسمانی رنگ نُوں سمجھناچاہی دا اے ۔
اَسمانی دھاگہ ’پانی ‘ نُوں ،جیہڑا یسوُع دا بپتسمہ اے ظاہرکردااے ۔ یسوُع مسیِح نے یوحنا اصطباغی کولوں بپتسمہ لیا تاں پئی دُنیادےسارے پاپ اپنے اُتے چُک لئے (متی ٣:١٥)۔
جے یسوُع نے اپنے بپتسمہ دے راہیں دُنیادےسارے پاپ اپنے اُتے نہ چُکے ہوندے، تے اَسیں ایماندار لوک خُدا دے حضُور مقدّس نئیں ٹھہر سکدےسی ۔ایس لئی یسوُع مسیِح نُوں ایس دُنیا وِچ آکے یوحنا اصطباغی کولوں دریائے یردن وِچ بپتسمہ لیناپیا،تاں پئی دُنیا دےسارےپاپ دُور کردیوے۔
پاک خیمہء اجتماع دے ویہڑے دے بُوہے وِچ اَسمانی رنگ دا وٹیا ہویادھاگہ وَرتن دا مقصد ایہہ سی کیوں جے اَسیں یسوُع دے بپتسمہ دے اَڈ مقدّس نئیں ہوسکدےسی ۔
لال رنگ دے دھاگے تو ں مُراد اوہدا خون ،یسوُع دی موت سی ۔اَرغوانی  دھاگہ  یسوُع  دے
خُدا ہون نُوں بیان کردااے، ایس طرحاں یسوُع دا مقام ، ” واحد حاکم ۔بادشاہواں دا بادشاہ تے خُداونداں دا خُداوند اے۔“ (۱۔تیمتھیس۶:۱۵)۔
سچ ایہہ ہے پئی لال رنگ دے دھاگے توں مُراد مسیح دا خون سی جیہڑا سارے اِنساناں دے پاپاں دی قیمت اداکرن لئی صلیب اُتے وگایا گیا۔ یسوُع مسیِح جِسم وچ ہوکے ایس دُنیا وِچ آیا تاں پئی ساری اِنسانی پیِڑھی دے پاپ اپنے بپتسمہ دے راہیں اپنے اُتے چُک لئے  ، تے یسوُع نے خُود نُوں پاپ دی ساری مزدوری اداکرن لئی صلیب اُتے قربان کردِتا۔ یسوع دابپتسمہ تے خون دی معافی سچی خوشخبری اے جیہدی ایہناں دھاگیاں دے راہیں پیشن گوئی کیتی گئی جیہڑے پُرانے عہد نامہ وِچ پاک خیمہء اجتماع وِچ وَرتے گئے سَن ۔
خیمہء اِجتماع دے ستون کِکردی لکڑی دے بنائے گئے ، تے خانے پِتل دے تےپِتل دے خانیاں نُوں چاندی نال مڑھیاگیا سی ۔
سارے پاپیاں نُوں اوہناں دے پاپاں دی سزملنی سی ایس لئی پئی پاپ دی مزدُوری موت اے۔ ایس توں پہلاں پئی کوئی خُداکولوں نویں حیاتی دی برکت حاصل کردا، اوہنوں پُرانے عہدنامہ دے دَوروِچ اپنےپاپاں دی قربانی پیش کرنی پیندی سی ۔
پر، نویں عہد نامہ وِچ ،یسوُع دے بپتسمہ نے جیہڑا پُرانے عہدنامہ وِچ پاک خیمہء اِجتماع دےاَسمانی رنگ دےدھاگے دے وسیلہ پیش کیتاگیا اے ، اوہنے ساڈےسارے پاپ دُورکردِتے نیں۔یسوُع ساڈے پاپ صلیب اُتے لےگیا ،خون وگایا ، تے اوہناں دی سزانُوں جھلیا تے ایویں کرکے ، اوہنےسانُوں سارے ایماندار لوکاں نُوں معافی دی خوشخبری دے راہیں مکتی بخش دِتی ۔ اوہ بادشاہواں دا بادشاہ تے پاک خُدااے ۔
سوہنے مسیِحیو،یسوُع دا بپتسمہ مکتی دا بپتسمہ سی ،جِنھے ساڈے پاپاں نُوں دُورکرن دے سبب سانُوں بچالیا ۔یسوُع، جیہڑاخُدااے ،ایس دُنیا وِچ جِسم وِچ آیا (اَرغوانی  وٹیا ہویا دھاگہ) ؛اوہنے دُنیا دے سارےپاپاں نُوں چُکن لئی بپتسمہ لیا (اَسمانی وٹیا ہویادھاگہ) ؛ اوہنوں مصلُوب کیتا گیا تے صلیب اُتے اوہداخون وگایا گیا تاں پئی ساڈی خاطر سزانُوں جَرے  (لال وٹیا ہویادھاگہ ) ۔بےشک یسوُع دابپتسمہ واضح تعلیم دیندااےپئی اوہ ساری اِنسانی پیِڑھی دا سچا مکتی داتا بن گیااے ۔
اَسیں ایہنوں رنگاں وِچ ویکھ سکدے آں جیہڑے پاک خیمہ ء اِجتماع دے  بُوہے لئی   وی   ورتے
گئے سَن۔
اوس بُوہے دے لیڑے تے اَسمانی ،اَرغوانی تے لال رنگ وِچ باریک کتانی دھاگے دی کڈھائی کرنا سانُوں واضح طورتے خُدادی مکتی دی سچیائی دے بارے دَسنا سی ۔ باریک کتانی لیڑے توں ایتھے مُراد ایہہ ہے پئی اوہنے فرق دے اَڈ سانُوں سبھناں نُوں ساڈے پاپاں توں مکتی بخشی ۔ ایہہ کفارہ دی مکتی لئی بوہت ضروری سی ۔
اَسیں ایہوای پاک خیمہء اِجتماع دے بُوہےلئی  وَرتی جان والیاں شیَواں توں ویکھ سکدے آں پئی یسوُع مسیِح نیں سانُوں پاپیا ں نُوں اَڈ منصوبے دے مکتی نئیں بخشی ۔اوہنے ، خُدا دے بوہت ہوشیاری نال تیار کیتے گئے منصوبے دی پیروی کردے ہویاں ،بپتسمہ لیا، تے صلیب اُتے قربان ہویا ، فیر اِنسانی پیِڑھی دی مکتی دی مکمل تکمیل لئی ،مُردیاں وِچوں جی اُٹھیا۔اَسمانی ،اَرغوانی تے لال دھاگہ یعنی معافی دی خوشخبری دِیاں شیَواں دے نال ،یسوُع نیں اوہناں سبھناں نُوں مکتی بخشی جیہڑے اوہدی مکتی اُتے ایمان رکھدے سَن ۔
 
 
پُرانے عہد نامہ دا پِتل دا حوض نویں عہد نامہ دے بپتسمہ دا پرچھاواں سی
 
کاہن کیوں پاک مقام وِچ داخل ہون توں پہلا ں
اَپنے ہتھ تے پیر دھوندےسَن؟
کیوں جے اوہناں نُوں کِسے پاپ دے اَڈ خُدادے
سامنے کھلوناپینداسی
 
حوض وی پِتل نال بنیا ہویاسی ۔پِتل ایس سزانُوں پیش کردااے  جیہڑی   یسوُع   نیں   ساڈے  لئی
جھَلی ۔ پانی دے حوض نیں خوشخبری دے ایس کلام نُوں پیش کیتا جیہڑا سانُوں دَسدا اے پئی ساڈیاں ساریاں ناراستیاں دُور کیتیاں جاچُکیاں نیں۔
ایہہ ساڈے اُتے واضح کردااے پئی ساڈے روز مرّہ دےپاپاں دا دھوتاجانا کِس  طرحاں  جاری
رہیا۔ سارے اِنسان ذات دے روز مرّہ دےپاپ یسوُع دے بپتسمہ دے کلام اُتے ایمان لیان دے راہیں دُور ہو سکدے نیں۔
سوختنی قربانی دا مذبح عدالت نُوں پیش کردااے ۔ دُوجے لفظاں وِچ ،یسوع  دا  پانی ،  جیہڑا  اَسمانی
رنگ دا اے،ساڈےپاپاں دے کفارہ دی خوشخبری اےیعنی یسوُع دا بپتسمہ جیہڑا اوہنے یوحنا اصطباغی کولو ں لیا (متی ٣:١٥،١۔یوحنا ٥:٥۔١۰ )۔ایہہ کفارہ دے راہیں مکتی دی خوشخبری دی گواہی دا کلام اے ۔
١۔یوحنا ٥ وِچ اِنج لکھیا اے ، ” اوہ غلبہ جیہدے نال دُنیا مغلوب ہوئی اے ساڈا ایمان اے۔تے گواہی دین والے تِن نیں ۔ رُوح تے پانی تے خون تے ایہہ تِنوں اِکو گل اُتے متفق نیں ۔ “ اوہ سانُوں ایہہ وی دَسدااے پئی جیہڑاخُدادے پُتراُتے ایمان رکھدا اے اوہ  اپنے آپ وِچ پانی ، خون تے رُوح دی گواہی رکھدااے ۔
خُدا نے سانُوں کفارہ دی خوشخبری دے سبب مقدّس ہون تے پاک خیمہ ء اِجتماع وِچ داخل ہون دا حق بخشیا۔ ایویں، ہُن اَسیں ایمان وِچ حیاتی بسرکرسکدے آں تے خُدا دے کلام توں رَج سکدے آں، خُداتوں برکت پا سکدے آں تے راستباز حیاتی بسرکر سکدےآں۔ خُدادے لوک بنن توں مُراد اے کفارہ دی خوشخبری اُ تے ایمان لیان دے راہیں مکتی حاصل کرنا تے خیمہ ء اِجتماع دے اندر حیاتی بسرکرنا ایں۔
اَج بوہت سارے لوک ایہہ آکھدے نیں پئی پاک خیمہ ء اِجتماع دے بُوہے وِچ وَرتے جان والے اَسمانی ، اَرغوانی ، لال رنگ دے دھاگیاں دے معنے سمجھے اَڈ ایمان لیاناکافی اے ۔جے اِک شخص ایہناں دے معنے سمجھے اَڈ ، یسوُع اُتے ایمان رکھدا اے تے اوہدا ایمان سچا نئیں ہوسکدا ، ایس لئی پاپ ہُن وی اوہدے دِل وِچ موجود اے۔ اوس شخص دے دِل وِچ پاپ ایس لئی موجود ہووے گا کیوں جے اوہ کفارہ دی خوشخبری یعنی پانی ،خون تے رُوح دی خوشخبری دے راہیں نویں سرے توں پیدا ہون دے سبب
سچیائی اُتے ایمان نئیں لیایا ۔
جے اِک شخص نُوں آکھیا جانداپئی اوہ کِسے شخص دے بارے رائے دیوے جنھوں اوہ اوکھل نال جان دا سی ۔ تے جے ،سُنن والیاں نُوں خوش کرنا مقصود ہووے تے، اوہنے آکھیا ، ” آہو،میَں ایس شخص دا یقین کردا آں۔بھاویں ، میری ایس شخص نال کدی ملاقات نئیں ہوئی ، فیر وی ،میَں ایہدے اُتے یقین کردا آں ۔“ کیہ تُہاڈے خیال وِچ سُنن والے ایہہ سُن کے خوش ہون گے؟ خورے تُہاڈے وِچوں کجھ لوک اجیہے اِنسانی کماں توں خوش ہون ،پر خُداساڈے توں ایہہ نئیں چاہندا  پئی  اَسیں  ایس طرحاں  دا ایمان رکھیے ۔
خُداچاہندااےپئی اَسیں پاپاں دی معافی دی خوشخبری ، یعنی اَسمانی (یسوُع دا بپتسمہ) ، اَرغوانی (یسوُع دی الُوہیّت) تے لال (یسوُع دے خون) دے راہیں یسوُع دی مکتی اُتے ایمان لیائیے۔ یسوُع اُتے
ایمان لیان توں پہلاں سانُوں ایہہ جاننا چاہیدااے پئی اوہنے سانُوں کِس طرحاں سارے پاپاں توں مکتی بخشی ۔
جدوں اَسیں یسوُع اُ تے ایمان رکھدے آں ، تے سانُوں ایہہ جاننا چاہی دا اے پئی اوہنے سانُوں کس طرحاں پانی (یسوُع دے بپتسمہ)،خون (اوہد ی موت)تے رُوح (یسوُع خُداہون)دے راہیں ساڈے سارے پاپاں توں مکتی بخشی ۔
جدوں اَسیں سچیائی وِچ ایس گل نُوں سمجھ لیندے آں ،تے فیر ای اَسیں ایہداتجربہ کرسکدے تے ایمان رکھ سکدے آں ۔ سچیائی نُوں جانے اَڈ ساڈا ایمان کدی مکمل نئیں ہووے گا ۔ سچا ایمان صِرف یسوُع دی مکتی دی گواہی ، معافی دی خوشخبری ، تے یسوُع نُوں اِنسانی پیِڑھی دا سچا مکتی داتا سمجھن دے سبب حاصل ہوندااے ۔
فیر، اوہ کِویں دا ایمان ہووے گا ،جیہدے وِچ یسوُع دا مذاق اُڈایا جاندااے ؟ آؤ ایہنوں ویکھئیے۔
 
 
اوہ ایمان جیہڑایسوُع دا مذاق اُڈاندااے
 
ایمان لئی کیہ بوہتی لوڑاے؟
یسوُع دے بپتسمہ داٹھیک علم
 
تُہانوں ایہہ چنگی  طرحاں جاننا ایں پئی یسوُع اُتے اَنھاایمان رکھنا اوہدا مذاق اُڈان دے برابراے۔جے تُسیں سوچدے او، ” میرے لئی ایمان لیانااوکھااے،پرکیوں جے اوہ خُداتے خُدادا پُتر اے، ایس لئی مینوں کِسے وی طرحاں اوہدے اُتے ایمان لیانا ہووے گا،“تے فیر تُسیں یسوُع دا مذاق اُڈارہے او۔ جے تُسیں سچی مُچی نویں سِرے توں پیدا ہونا چاہندے او، تے تُہانُوں لازمی طورتے یسوُع دے بپتسمہ ، خون تے کفارہ دی خوشخبری اُتے ایمان لیانا چاہیدااے ۔
کفارہ دی خوشخبری نُوں جانے اَڈ یسوُع اُتے ایمان رکھنا ،اوہدے اُتے ایمان نہ رکھن دے برابر اے۔ صِرف یسوُع دے خون دی خوشخبری دی منادی کرنا سچیائی نُوں جانے اَڈ فضول محنت  کرنا ایں ۔
یسوُع کِسے توں ایہہ نئیں چاہندا پئی کوئی اوہدے اُتے اَنھّاایمان لیا کے آلے دوالے منادی کردا جاوے،یاں فیراوہدےاُ تے بے وجہ ایمان رکھے۔ اوہ چاہندااے پئی اَسیں کفارہ دی خوشخبری نُوں جان کے اوس اُتے ایمان رکھیے۔
جدوں اَسیں یسوُع اُتے ایمان رکھدے آں تے سانُوں ایہہ مَننا چاہی دا اے پئی کفارے دی خوشخبری ، یسوُع دابپتسمہ تے خون ایں۔ جدوں اَسیں یسوُع اُتے ایمان رکھدے آں، تے اَسیں خُدادے کلام دے راہیں کفارہ دی خوشخبری نُوں سمجھنا ایں تے خاص طورتے ایہہ جاننا ایں پئی اوہنے ساڈےسارےپاپاں نُوں کس طرحاں دُور کیتا ۔
اَسیں ایہہ وی جاننا ایں پئی پاک خیمہ ء اِجتماع دے بوہے اُتے اَسمانی ،اَرغوانی تے لال رنگ دے
لیڑے کیہ عائد کردے نیں۔فیر ، اَسیں سچا ایمان رکھ سکدے آں جیہڑا ابدتیکر قائم رہوےگا ۔
 
 
اَسیں کدی وی یسوُع اُتے، جیہڑا اَسمانی ،اَرغوانی تے لال دھاگے دا ظہور اے ایمان لیائے
 اَڈ نویں سِرےتوں پیدا نئیں ہو سکدے
                        
پاک مقا م وِچ داخل ہون توں پہلاں
 کاہن کیہ کردے سَن؟
اوہ پِتل دے حوض دے پانی نال اپنے ہتھ تے
 پیَر دھوندے سَن
 
ساڈے خُداوند یسوُع نیں سانُوں مکتی بخشی ۔اَسیں خُداوند دی وڈیائی کرن دے اَڈ ہور کُجھ نئیں کر سکدے جدوں اَسیں ایہہ ویکھدے آں پئی اوہنے کِس قدر کاملیت نال سانُوں مکتی بخشی ۔ سانُوں پاک خیمہ ء اِجتماع اُتے نظررکھنی چاہی دی اے۔اوہنے پاک خیمہ ء اِجتماع دے اَسمانی ،اَرغوانی تے لال رنگ دے راہیں سانُوں خوشخبری داکلام بخشیا تے ایہناں دے سبب سانُوں بچا لیا ۔ اَسیں خُداوند داشکرتےاوہدی تعریف کردے آں۔
پاپی خوفناک عدالت داسامنا کیتے اَڈ پاک مقام وِچ داخل نئیں ہوسکدے سَن ۔ اِک شخص کِس طرحاں اپنے پاپاں دی سزا جَرے اَڈ پاک مقام وِچ داخل ہو سکداسی ؟ایہہ ناممکن ہوندا ۔ جے اجیہا شخص ممنوعہ مقام اُتے داخل ہوجاندا، تے اوس نُوں اوتھے اوسے ویلے مار دِتاجاندا سی ۔ ایہہ بڑی سخت سزاسی  ۔ اِک پاپی نہ تے پاک مقام وِچ داخل ہو سکداسی تے نہ ای  زندہ رہن دی اُمیدکرسکداسی ۔
ساڈے خُداوند نیں پاک خیمہ ء اِجتماع دے بوہے وِچ لُکے ہوئے بھیت دے سبب سانوں چھُڈایا ۔اَسمانی،اَرغوانی ، لال تے باریک کتانی دھاگے دے نال، اوہنے سانُوں چھُڈایا ۔  ایہناں  دے   راہیں
اوہنے اپنی مکتی دے بھیت نُوں ساڈے اُتے ظاہر کیتا ۔
 ہُن کیہ میَں تے تُسیں ایس طرحاں مکتی پائی اے؟ جے اَسیں اَسمانی ،اَرغوانی تےلال دھاگے  دے کلام اُتے ایمان نہیں لیاندے تے کفارہ دی خوشخبری دے راہیں کوئی مکتی نئیں ہوسکدی ۔اَسمانی رنگ توں مُراد  خُدا نہیں؛ایہہ یسوُع دے بپتسمہ دے علاوہ کِسے دُوجی شَے نُوں ظاہرنہیں کردا۔ ایہہ یسوُع دا بپتسمہ ایں جِنھے ساڈے سارے پاپ چُک لئے۔
اِک شخص اَسمانی دھاگے اُتے ایمان لیائے اَڈ زیادہ توں زیادہ سوختنی قربانی تے مذبح تیک جاسکدااے۔ پر، اوہ پاک مقام وِچ داخل نہیں ہو سکدا،جِتھے خُداوند رہندا اے۔
ایویں ، ایس توں پہلاں پئی اَسیں پاک خیمہ ء اِجتماع دے بُوہےوِ چوں داخل ہوئیے ، سانُوں اَسمانی دھاگہ (یسوُع دے بپتسمہ) ،لال دھاگہ (اوہدے صلیبی خون) تے اَرغوانی دھاگہ (یسوُع خُدادے طور،تے خُدادے پُتر) اُتے ایمان رکھنا ایں ۔ صِرف جدوں اَسیں ایمان لیاندے آں تے خُدا سانُوں چنگیاں جان دا اے،تے سانُوں  پاک ترین مقام دے پردے دے راہیں داخل ہون دی اِجازت دیندا اے۔
کجھ لوک خیمہ ء اِجتماع دے باہر والے ویہڑے دے وِچ داخل ہوکے سوچ دے نیں پئی اوہ اندرداخل ہوگئے نیں۔ پر ایہہ مکتی نہیں ۔ سانُوں مکتی حاصل کرن لئی اَگے جاناایں۔ سانُوں پاک ترین مقام وِچ داخل ہون دے قابل بننا ایں۔
پاک ترین مقام وِچ داخل ہون لئی ،سانُوں پِتل دے حوض کولوں لنگنا ایں ۔ پِتل دا حوض یسوُع
دے بپتسمہ نُوں ظاہرکردا اے، تے سانُوں یسوُع دے بپتسمہ نال ساڈے روز مرّہ دے سارے پاپاں توں دھوندا اے تے پاک مقام وِچ داخل ہون لئی پاک بناندااے۔
پُرانے عہد نامہ وِچ ،کاہناں نُوں اندر جان لئی خُود نُوں دھونا پیندا  سی  تے  نویں  عہد  نامہ  وِچ ،
یسوُع نیں اپنے چیلیاں دے اوہناں دِیاں حیاتی بھردِیاں خطاواں نُوں دھون نُوں ظاہر  کرن لئی پیردھوتے ۔
خُدادی شریعت وِچ لِکھیا اے،  ” کیوں جے پاپ دی مزدُوری موت اے، پر  خُدا  دی  بخشش ساڈے خُداوند یسوُع مسیِح وِچ ہمیش دی حیاتی اے۔“ (رومیوں۶:۲۳)۔ خُدا کِسے بہانے دے اَڈ ہراِنسان دے پاپاں نُوں پرکھدااے،پر اوہنے ایہناں نُوں اپنے پُتر اُتے لدیا تے اوس نُوں اِنسان دی بجائے سزا دِتی ۔ ایہہ خُدا دی محبت ،یعنی اوہدی مکتی اے۔سچی مکتی صِرف اوس ویلے حاصل ہوندی اے جدوں اَسیں کفارہ دی خوشخبری اُتے ایمان لیاندے آں جیہڑی ، بپتسمہ ، خون ، موت تے یسوُع دے مُردیاں وِچوں جی اُٹھن تے مشتمل اے۔
 
 
نویں سِرے توں پیدا ہون دے سلسلے وِچ، کِسے شخص نُوں کدی بائبل مقدّس  دی سچیائی ،
یعنی پاپاں لئی کفارے دی خوشخبری دی حقارت نئیں کرنی چاہیدی
 
ساڈے کرن لئی کیہڑی اِک شے باقی اے؟
ایہہ خوشخبری ،یعنی خُدادے تحریری کلام اُتے
ایمان رکھنا اے
 
میَں کدی دُوجے لوکاں دی حقارت نئیں کیتی ۔ جد کوئی شخص اجیہی شَے دے بارے گل کردا اے جیہدے بارے میَں نئیں جان دا ، تے میَں اوہدے کولوں نرمی نال واضح کرن دی درخواست کردا آں۔ پر جد میَں اپنے آلے دوالے دے لوکاں کولوں ، پاک خیمہء اِجتما ع دِیاں تفسیراں پُچھاں ، تے  کوئی
مینوں اوہدے بارے نہ دَس سکیا ۔
فیر میَں کیہ کر سکداساں؟ مینوں واپس بائبل مقدّس دی اَگوائی لینی پئی ۔ بائبل مقدّس وِچ خیمہ ء اِجتماع دے بارے کِتھے گل کیتی گئی اے ؟ خروج دی کتاب وِچ ایہدا  کھُلابیان  اے ۔ جے  اِک شخص غور
نال ایس کتاب دا مطالعہ کرے تے اوہ خُدا دے تحریر ی کلام توں ایہدے معنے نُوں سمجھ سکدا اے ۔
سوہنے مِترو ،اَڈ سوچے سمجھے یسوُع اُتے تُسیں ایمان لیا  کے مکتی  نئیں  پاسکدے۔ تُسیں  باقاعدگی
نال کلیسیا وِچ شامل ہون دے راہیں نویں پیدائش حاصل نئیں کرسکدے۔ سانُوں پتہ اے پئی یسوُع نیں نیکدیمس نُوں کیہ آکھیا۔ ” میَں تینوں سچ آکھدا   آں جد تیکر کوئی بشر پانی تے رُوح دے نال نویں سِرے تو ں پیدا نہ ہووے ، اوہ خُدادی بادشاہی وِچ داخل نئیں ہوسکدا۔ ۔ ۔ ۔بنی اِسرائیل دا اُستاد ہوکےکیہ  تُوں ایہناں گلاں نُوں نئیں جان دا؟ “ (یوحنا۳:۵،۱۰)۔
اوہ سارے لوک جیہڑے یسوُع اُتے ایمان رکھدے نیں ایہناں نُوں اَسمانی دھاگے (جدوں یسوُع نُوں بپتسمہ دِتا گیا تے اوہنے دُنیادےسارےپاپ ُچک لئے)،لال دھاگے(ساڈے سارےپاپاں دی خاطر یسوُع دی موت) ،تے اَرغوانی دھاگے (یسوُع مکتی داتا،خُدا،تے خُداداپُتراے) یعنی ساریاں اُتے ایمان رکھنا ایں ۔
سانُوں ایہہ ایمان لیاناہووے گا پئی یسوُع دُنیا دےسارےپاپیاں دامکتی داتا اے ۔ ایس  ایمان دے اَڈ ، اِک شخص نہ تے نویں پیدائش حاصل کرسکدا اے، تے نہ خُدادی بادشاہی دی پاک تھاں وِچ داخل ہو سکدا اے ۔ ایتھوں تیک پئی اوہ ایس دُنیا وِچ ایہدے اَڈ ایمانداری نال حیاتی بسر نئیں کر سکدا ۔
کیہ ایہہ اِنتہائی سوکھی گل نئیں ہووے گی جے اِک شخص یسوُع اُتے ایمان لیان دے راہیں نویں پیدائش حاصل کرے؟— آہو—  ”  ♫تُہانوں مکتی مل چُکی اے۔مینوں مکتی مل چُکی اے ۔سانُوں ساریاں نُوں مکتی مل چُکی اے۔ “ کِنّی سوہنی گل اے!پر بوہت سارے اجیہے لوک نیں جیہڑے سچے طورتے ’ نویں پیدائش ‘ حاصل کیتے اَڈیسوُع اُتے ایمان رکھدے نیں۔
سانُوں بائبل دی سچیائی نُوں جانن دے نال نال،یسوُع اُتے وی ایمان رکھنا ایں ۔سانُوں معافی دی ایس خوشخبری نُوں جاننا ہووے گا جیہدا بائبل مقدّس وِچ ذِکراے، تے پاک خیمہء اِجتماع وِچ داخل ہون تے ایمان دی دُنیا وِچ خُدادے نال رہن لئی ، اَسمانی ، اَرغوانی تےلال رنگ دے دھاگے دے معنے نُوں وی جاننا ایں۔ ایمان دے خیمہء اِجتماع وچ، اَسیں فیر ای بخوشی حیاتی بسرکرسکدے آں جدوں تیکر یسوُع سانُوں اپنی بادشاہت وِچ لین لئی دُوجی وارنئیں آجاندا۔ ایس لئی ٹھیک طورتے  یسوُع اُتے  ایمان
رکھنا ساڈے واسطے ضروری اے۔
 
 
سچی خوشخبری اَسمانی رنگ دےوَٹے ہوئے دھاگے نال پاکیزگی دا سبب بن دی اے
 
یسوُع دی صلیب دے نال نال ساڈی مکتی لئی
ضروری شرط کیہ اے؟
یسوُع دا بپتسمہ
 
لوک سوچ دے نیں پئی اوہ غلطی کیتے اَڈ مکمل حیاتی بسر کرسکدے نیں ۔پر،جِنّی اوہ نیکی کرن دی کوشش کردے نیں، اوہنی چھیتی اوہ اپنی کمزوری دااحساس کرن گے۔ اِنسان بالکل اَدھا اے ،ایس لئی اوہدے لئی پاپ کرن توں بازرہناناممکن ایں،پرکیوں جے یسوُع نیں سانُوں اَسمانی ،اَرغوانی تے لال رنگ دے دھاگے دے راہیں مکتی بخشی ، ایس لئی کفارہ دی خوشخبری دے سبب اَسیں پاک ہو سکدے تے خُدا دے پاک مقام وِچ داخل  ہوسکدے آں۔
جے خُدا نیں سانُوں اَسمانی ،اَرغوانی تے لال رنگ دے دھاگے نال مکتی نہ بخشی ہوندی تے اَسیں اَپنے آپ پاک مقام وِچ داخل ہون دے لائق کدی نہ ہوندے ۔ایہدی کیہ وجہ اے ؟جے صِرف اوہ جیہڑے بدن وِچ مکمل نیں پاک مقام وِچ داخل ہو سکدے سَن ،تے کوئی نہ ہووے گا جیہڑا ایس لائق ہووے ۔ جدوں کوئی شخص سچی خوشخبری نُوں جانن دے اَڈ یسوُع اُتے ایمان لیاندا اے تے اوہ صِرف اپنے دِل وِچ ہورپاپ کماندا اے۔
یسوُع نیں سانُوں اپنی مکتی دے راہیں چھُڈایا جیہدا اوہنے  بڑی ہوشیاری نال منصوبہ بنایا؛ یعنی اَسمانی ،اَرغوانی، لال تےباریک کتانی  دھاگے دی  مکتی نال  اوہنے ایویں کیتا ۔اوہنے ساڈے سارے پاپ دھو دِتے ۔کیہ تُسیں ایس گل اُتے ایمان رکھدے او؟ —آہو— کیہ تُسیں اپنے دِل وِچ معافی دی خوشخبری دی سچیائی رکھدے اوتے اوہدی گواہی دیندے او؟ —آہو—
تُسیں صِرف جدوں خوشخبری دی گواہی دیندے اوتے تُسیں اپنے  متھے  اُتے  ایہہ سونے  دا  پَتر
لگاسکدے اوجیہدے اُتے لِکھیا اے،  ’  خُداوند لئی مقدّس  ‘ تے   ’ شاہی کاہناں دے فرقے ‘ (۱۔پطرس ۲:۹) وِچ شامل ہوسکدے او۔ صِرف اوسے ویلے تُسیں لوکاں دے سامنے کھلوکے اوہناں نُوں دَس سکدے او پئی تُسیں خُدادے خادم اوجیہڑے شاہی کاہن دے طورتے  خدمت  کر رہے
نیں۔
سردارکاہن دی پگ اُتے سونے داپَتر لگاسی تے ایہہ پَتر اَسمانی رنگ دی ڈوری نال بنیا ں ہویا سی ۔ اَسمانی رنگ دی ڈوری ای کیوں؟ایس لئی پئی یسوُع نیں معافی دی خوشخبری دے راہیں سانُوں مکتی بخشی، تے اپنے بپتسمہ دے راہیں ساڈے سارے پاپ چُک لئے تے سانُوں بےپاپ بنایا۔ نویں عہدنامہ دا بپتسمہ،پُرانے عہد نامہ وِچ ہتھ رکھن دے برابر اے۔
اَسیں کِنّی ای محبت تے وفاداری نال یسوُع اُتے ایمان کیوں نہ رکھدے ہوئیے، اَسیں اَسمانی ،اَرغوانی تے لال رنگ دے دھاگے دے لُکےہوئے  کلام نُوں چنگی طرحاں جانے اَڈ ایہہ پَتر حاصل نئیں کرسکدے جیہدے اُتے ’خُداوند لئی مقدّس‘ لِکھیا ہویا اے۔
اَسیں کِس طرحاں راستباز ٹھہرے ؟ متی ٣:١٥  وِچ ایہہ لِکھیا اے، ” کیوں جے سانُوں ایسے طرحاں ساری راستبازی پوری کرنا مناسب اے۔“ یسوُع نیں بپتسمہ لیا تے سانُوں دُنیا دےسارےپاپاں توں مکتی بخش دِتی۔ کیوں جے اوہنے بپتسمہ لے کے ساڈے سارے پاپ دُور کردِتے ایس لئی اَسیں ایمان دارلوک راستباز بن گئےآں ۔
یسوُع دے بپتسمہ دے اَڈ اَسیں کِس طرحاں آکھ سکدے آں پئی اَسیں پاپ تو ں مکت آں؟ بھاویں اَسیں یسوُع اُتے ایمان رکھیے ، بھاویں اَسیں یسوُع دے مصلُوب ہون دے بارے سوچ کے چِلّائیے ،تے ایس دُنیا دے سارے اَتھُروساڈے پاپاں نُوں نہیں دھو سکدے سَن ۔نئیں ۔ بالکل نئیں ، بھاویں اَسیں کِنّاں ای چِلّائیے تے توبہ کرئیے،ساڈے پاپ ساڈے اندر قائم رہن گے۔
’ خُداوند لئی مقدّس  ‘   کیوں جے اوہنے اپنے بپتسمہ تے خون دے راہیں ساڈے سارے پاپ دُور کردِتے، خُدا نیں ساڈے پاپیاں دے سارے پاپاں نُوں یسوُع اُتے منتقل ہون دی اجازت دِتی ،کیوں جے مکتی دے کلام دا بائبل وِچ ذِکراے، ایس لئی اَسیں اَپنیاں ساریاں کمزوریاں تے خامیاں دے  باوجود اَپنے ایمان دے راہیں راستباز بن گئے آں۔
ایویں،ہُن اَسیں خُدا دے حضُور کھلوسکدے آں ۔ہُن اَسیں راستباز دےطورتےحیاتی  بسر کر
سکدے تے دُنیا نُوں خوشخبری سناسکدےآں۔” میَں مکتی پا لئی ۔تُسیں مکتی پالئی ۔ اَسیں ساریاں نیں مکتی پا لئی ۔ “ اَسیں خُدادے حضُور رحیم منصوبہ دے مطابق مکتی پائی اے ۔
تُہاڈے دِلاں وِچ کفارہ دی خوشخبری دے کلام دے اَڈ ،کوئی مکتی نہیں، بھاویں تُسیں کِنّی ای سخت محنت کرلوو ۔ایہہ مشہور کورین گیت دے لفظاں دی طرحاں نیں جیہدے وِچ اجیہی محبت دا ذِکراے جیہدا صلہ نہ مِلے۔”ہائے، جدوں کدی میَں اوہنوں ویکھداآں میرا دِل بِلاوجہ دھڑک دا اے ، ہرواری جدوں میَں اوہدے کول ہونداآں۔ مینوں لازمی طورتے بے صلہ محبت وِچ رہنا چاہی دا اے۔ “ میرا دِل تیزی نال دھڑک دا اے ،پر اوہدانئیں۔پرمیری محبت دا مینوں کدی صِلہ نہیں مِلیا۔ بدقسمتی نال ،بوہت سارے مسیحی ہُن تیک خُداوَلوں بے صلہ محبت رکھدے نیں۔
لوک اِنج سوچن دا رُجحان رکھدے نیں پئی بوہت سارے مختلف لوکاں نُوں مختلف طریقیاں نال مکتی حاصل ہوندی اے۔ اوہ پُچھدے نیں ،” ایہہ بپتسمہ دی خوشخبری دے سبب کیوں حاصل ہوندی اے؟ “جے یسوُع دے بپتسمہ دی خوشخبری نہ ہوندی تے کدی مکمل مکتی نئیں ہو سکدی سی ۔ خُدا دے حضُور راستباز ٹھہرن دا ایہہ واحد طریقہ اے ایس لئی پئی اپنے سارےپاپاں توں مکمل طورتے پاک صاف ہون دا ایہوای واحد طریقہ اے۔
 
 
اَسمانی دھاگے دی اوہ کیہ مکتی اے جیہڑی یسوُع نیں سانُوں بخشی؟
 
سانُوں کیہ راستباز بنا چُکیا اے؟
اَسمانی ، اَرغوانی تے لال دھاگے دی خوشخبری
 
اَسمانی ، اَرغوانی تے لال دھاگے دی خوشخبری دے راہیں مکتی سارے اِنساناں لئی خُدا دی نعمت اے ۔ ایہہ نعمت سانُوں پاک خیمہ ء اجتماع وِچ داخل ہون تے امن و امان دی حیاتی بسر کرن دے لائق کرچُکی اے ۔ ایہنے سانُوں راستباز ٹھہرایا تے کلیسیا وِچ شامل ہون دے قابل بنایا،تے یعنی کلیسیا دے راہیں پاک کلام وِچ تربیت  حاصل کرن دے قابل کر چُکیا اے۔
جدوں وی اَسیں خُدا دے حضُور دُعاکرن لئی جاندے آں خوشخبری خُدادی محبت نال سانُوں برکت دیندی اے ۔ ایس لئی مکتی ساڈے لئی ایس قدر اَنمُلّی اے ۔یسوُع سانُوں  ’ چٹان اُتے‘  ایمان دا گھر بنان لئی آکھدا اے ۔ایہہ چٹان اوہدے بپتسمہ دی خوشخبری اے۔ سانُوں ساریاں نُوں چاہی دا اے پئی مکتی حاصل کرئیے، مکتی وِچ حیاتی بسر کرئیے ، اَسمان اُتے جائیے، ہمیش دی حیاتی پائیے تے  خُدا دی  اولاد
بن جائیے۔
سوہنے مِترو ، کفارہ دی خوشخبری دے سبب اَسیں ایمان نال پاک خیمہ ء اِجتماع وِچ داخل ہون دے لائق ٹھہردےآں۔ساڈے سارے پاپاں دا دھوتا جانا  (یسوُع دا بپتسمہ) تے صلیب دی عدالت دے سبب ، یعنی سانُوں یسوُع دے بپتسمہ دی خوشخبری اُتے ایمان لیان دے راہیں مکتی ملی اے۔
ساڈے پاپاں دے اُچیرے کفارے لئی ،یعنی یسوُع دابپتسمہ تے خون اوہ خوشخبری اے ، جیہڑی ساڈے سارے پاپاں نُوں دُورکردی اے۔ کیہ تُسیں ایس گل اُ تے ایمان رکھدے او؟سچی خوشخبری کفارہ دی اَسمانی خوشخبری اے جِنھے مکمل طور تے ساڈے پاپاں نُوں دھودِتا ۔
کفارے دی خوشخبری اُتے ایمان لیا ن دے سبب اَسیں نویں پیدائش حاصل کیتی اے ۔ یسوُع نیں سانُوں کفارے دی خوشخبری بخشی اے، جِنھےساڈے روز مرّہ دے سارے پاپاں ،تے ایتھوں تائیں پئی سارے مستقبل دے پاپاں نُوں دھودِتا ۔ خُداوند دی وڈیائی ہووے۔ہیلیلویاہ !
پانی تے رُوح دی خوشخبری  (یعنی پانی تے خون دی خوشخبری ) ای اوہ سچی خوشخبری اے جیہڑی یسوُع مسیِح دے راہیں توڑ اَپڑی تے سنائی گئی ۔ ایہہ کتاب یسوُع دی خوشخبری ، یعنی پانی تے رُوح دی خوشخبری دے بھیت نُوں بیان کرن لئی لکھی گئی اے۔
کیوں جے بوہت سارے لوک مکمل سچیائی نُوں جانے اَڈ ،یسوُع اُتے ایمان رکھدے نیں ،  ایس
لئی اوہ ہُن صِرف خُود بنیاد پرست ہون یاں مسیِحی اِلٰہی عِلم دی دُنیا وِچ  (برائے ناں فلسفی الٰہی عِلم) اِک مُٹھ مذہب پرست ہون تے مان تران کر رہے نیں ؛مختصرطورتے ،اوہ بدعت تے اُلجھن وِچ حیاتی بسرکردے نیں ایس لئی سانُوں پِچھاں پرتنا تے سچی خوشخبری اُتے ایمان رکھنا چاہی دا اے ۔حالے بوہتی دیر نئیں ہوئی ۔
میَں اپنی دُوجی کتاب وِچ اوہناں لوکاں لئی ہور بوہتاکھول کے بیان کرنا چاہواں گا جیہڑے پانی تے رُوح دے راہیں نویں سِرے توں پیدا ہون دے بارے سوال رکھدے نیں۔