خطبے

مضمون 8: پاک رُوح

[8-13] <یوحنا ۱۶:۵۔۱۱> پاک رُوح دے کم تے برکتاں

>یوحنا ۱۶:۵۔۱۱<
پر ہن میں اپنے گھلاون والے کول جاناں واں تے تہاڈے وچوں کوئی میتھوں نئیں پچُھ دا پئی توں کِتھے جاناں ایں؟ سگوں ایس لئی پئی میں ایہہ گلاں تہانوں آکھیاں نیں تہاڈاں دل غم نال بھر گیا اے۔ پر مَیں تہانوں سچ آکھدا واں پئی میرا جانا تہاڈے لئی فائدہ مند اے کیوں جے اگر میں نہ جاواں تے اوہ مددگار تہاڈے کول نئیں آوے گا پر جے جاواں گا تے اوہنوں تہاڈے کول بھیج دیواں گا۔ تے اوہ آکے دنیا نوں پاپ تے راست بازی تے عدالت دے بارے وچ قصور وار ٹھہرائے گا۔ پاپ دے بارے وچ ایس لئی پئی کیوں جے اوہ میرے اُتے ایمان نئیں لیاؤندے۔ راست بازی وچ ایس لئی پئی کیوں جے میں باپ دے کول جاناں واں تے تُسیں مینوں فیر نہ ویکھو گے۔عدالت دے بارے وچ ایس لئی پئی کیوں جے دنیا دا سردار مجرم ٹھہرایا گیا اے۔
 
 
رُوح پاک دے کم کیہ نیں ؟
اوہ دنیا نوں پاپ ، راستبازی، تے عدالت دے بارے
وچ مجرم ٹھہراوندا اے ۔
 
پیدائش ۱:۲ وچ ایہہ لکھیا ہویا اے، ” تے دھرتی ویران تے سنسان سی تے گہراواُتے ہنیرا سی تے خدا دی رُوح پانی دی سطح اُتے ٹردی پھردی سی۔ اسیں ایس حوالے نال ویکھ سکدے آں پئی رُوح پاک کھِچا تانی تے پاپ نال بھرے دلاں وچ نئیں وسدا، سگوں صرف اوہناں دے دلاں وچ رہندا اے جیہڑے پئی ایس سوہنی خوشخبری اُتے ایمان رکھ دے نیں۔ فیروی، بوہت سارے لوک اپنی کھچاتانی تے کھوکھلے پن وچ جوش بھرے ایمان دے ایہہ کہندیاں ہویاں شکار ہو جاندے نیں پئی اوہ رُوح پاک دی بھرپوری پاونا چاؤہندے نیں جد پئی اوہ اپنے دلاں وچ پاپ رکھ دے نیں۔
 جوش بھری تے حد توں ڈاہڈی خوشی دی حالت وچ حاصل کیتا  گیا  رُوح سوہنا  رُوح  نئیں اے۔
شیطان دا کم جوش نال بھرے ہوئے بے دین ایمانداراں تے مُک دا اے ،تے جوش نال بھرے ہوئے لوک بوہت آسانی نال اوہدیاں چالاں تے اختیار دے اثر ہیٹھ جال وچ پھس دے پئے نیں۔ سگوں رُوح پاک خدا دا اوہ شخص اے جیہڑا پئی ذہین، جذباتی تے کامل مرضی رکھدا اے۔ اوہنے ایس دنیا نوں پیدا کرن لئی خدا باپ تے اوہدے پتر یسوع مسیح دے نال رل کے کم کیتا۔ ہُن اسیں سِکھاں گے پئی کس طرحاں دا کم رُوح ایس دنیاوچ کرچکیا اے۔
 
 
رُوح پاک دنیا دے پاپ نوں قصور وار ٹھہراوندا اے
 
رُوح پاک سب توں پہلا کم کیہ کردا اے؟ اوہ پاپی دنیا نوں مجرم ٹھہراوندا اے۔ اوہ لوک جیہڑے اوہدے راہیں مجرم ٹھہرائے جاندے نیں اوہ اوہو لوک نیں جیہڑے یوحنا ہتھوں یسوع دے بپتسمے تے اوہدے سولی اُتے وگن والے لہو دی ایس سوہنی خوشخبری نوں نئیں من دے۔ اوہ اوہناں ساریاں پاپیاں نوں تے اوہناں دے پاپاں نوں مجرم ٹھہراوندا اے جیہڑے پانی تے روح دی ایس سوہنی خوشخبری اُتے ایمان نئیں رکھدے۔
 
 
اوہ دنیا نوں خدا دی راستبازی بارے قصوروار ٹھہراوندا اے
 
رُوح پاک دوجہ کم کیہ کردا اے؟ اوہ پاپیاں نوں اوہناں دے پاپاں توں بچاؤن لئی خدا دی راستبازی تے یسوع دی کامیابی دی گواہی دیندا اے۔ یوحنا ۱۶ :۱۰وچ آکھیا گیا اے، ”راست بازی بارے ایس لئی پئی کیوں جے میَں باپ دے کول جاناں واں تے تُسیں مینوں فیر نہ ویکھو گے۔ سانوں ایہہ جانن دی لوڑ اے پئی بائبل وچ خدا دی راستبازی توں کیہ مراد اے۔ ایہدے توں مراد سچیائی اے پئی یسوع نے یوحنا کولوں بپتسمہ دے راہیں دنیا دے سارے پاپاں نوں اپنے اُتے چک لیا تے ایہہ پئی جیہڑا کوئی اوہدے اُتے ایمان رکھدا اے اوہ خدا دے فضل راہیں راستباز بن سکدا اے۔ یسوع نے یوحنا اصطباغی ہتھوں بپتسمہ لیا تے جگ دے سارے پاپاں نوں قبول کیتا، سولی اُتے اپنا لہو بہایا، زندہ ہویا تے سارے پاپیاں دا مکتی داتا بن گیا۔ ایہہ اوہ سوہنی خوشخبری اے جیہڑی پئی خدا نے سانوں دِتی اے۔ یسوع نے خدا دی رضا مطابق پانی تے لہو راہیں دنیا دے سارے پاپاں نوں اپنے اُتے چک لیا تے ایس طرحاں ساڈیاں زندگیاں دا مالک بن گیا۔
رُوح پاک لوکاں دی یوحنا راہیں یسوع دے بپتسمہ تے اوہدے صلیبی لہو دی خوشخبری اُ تے ایمان رکھن لئی مدد کردا اے، پئی ایس طرحاں اوہناں نوں اوہناں دے پاپاں توں معافی حاصل کرن وچ مدد کرداپئا اے۔ تہانوں ایہہ جانن دی لوڑ اے پئی تثلیث وچ خدا دے کم ستائشی نیں۔ رُوح پاک ایس سوہنی خوشخبری لئی، لوکاں نوں خدا دی محبت تے ایمان رکھن دے قابل بناؤندیاں ہویاں کم کردا اے۔ اوہ پانی تے روح دی ایس سوہنی خوشخبری دی سچیائی دے ثابت ہون دی وی ضمانت دیندا اے۔
 
 
اوہ دنیا نوں عدالت بارے قصور وارٹھہراؤندا اے
 
رُوح پاک تیجاکم کیہ کردا اے؟ اوہ شیطان دے کماں نوں تباہ کردا اے۔ شیطان ایہہ کہندیاں ہویاں لوکاں دے خیالاں وچ پھُس پھُس کردا اے، ” تسیں یسوع اُتے تے ایمان رکھ سکدے او، پر مسیحیت نوں دنیا دے سارے مذہباں وچوں محض اک مذہب دے طور تے سوچو۔“ گو بھانویں اوہ یسوع اُتے ایمان رکھ دے نیں تد وی شیطان لوکاں نوں یسوع دے بپتسمہ تے اوہدے سولی اُتے وگن والے لہو تے ایمان رکھن توں روکن دی کوشش کردا اے تاں پئی اوہ اپنے پاپاں دی معافی حاصل کرن دے قابل نہ رہن ۔ کیوں جے شیطان مسیحیت نوں اک ”عام“ مذہب وچ گھٹاوندا اے، ایس لئی بوہت سارے لوک شیطان دے ایس دھوکے وچ آجاندے نیں پئی یسوع اُتے ایمان رکھن دی دلیل محض چنگے لوگ بننا اے۔ فیروی، یسوع تے ایمان رکھن دا اصل مقصد راستباز لوکاں دے طور تے نویں سریوں جمنااے۔
تہانوں جھوٹا ایمان نئیں رکھنا چاہی دا۔ جھوٹا ایمان تہانوں پاک نئیں بنا سکدا ، ایہدے نال کوئی فرق نئیں پیندا پئی تسیں یسوع اُتے کِناں ایمان رکھ دے او۔ جے اگر تسیں جھوٹا ایمان رکھدے او، تد فیر تسیں شیطان دے جھوٹاں پاروں یسوع نوں صاف طور تے نہ جانو گے تے نہ ای ویکھو گے۔ رُوح پاک اوہناں لئی نجات دی ضمانت بن جاندا اے جیہڑے پانی تے رُوح دی ایس سوہنی خوشخبری تے ایمان رکھن دے راہیں مکتی پا چکے نیں۔ اوہ لوک جیہڑے اپنے دلاں وچ پاپ رکھ دے نیں اوہناں دے سارے عقیدے کِسے فائدے دے نئیں۔
رُوح پاک ایس سوہنی خوشخبری دی سچیائی دی گواہی دیندا اے۔ یسوع نے دنیا دے سارے پاپاں نوں چُک لے جاون لئی بپتسمہ لیا تے اوہ پاپاں دی قیمت ادا کرن لئی سولی چڑھیا۔ رُوح پاک ایس سچیائی دی گواہی دیندا اے۔ رُوح پاک دنیا دے سارے لوکاں نوں سچی خوشخبری اُتے ایمان رکھن دے راہیں اپنے سارے پاپاں توں معاف ہون دی نصیحت کردا اے۔ فیروی، سانوں ذہن وچ رکھنا چاہیدا اے پئی رُوح پاک اوہناں نوں مجرم ٹھہراؤندا تے عدالت کرداے جیہڑے اپنے دلاں وچ ایس سوہنی خوشخبری نوں نئیں لیندے۔
 
 
ہرکِسے نوں برکت والاایمان رکھنا چاہی دا اے
 
برکت والاایمان کیہ اے؟ ایہہ اوہ ایمان اے جیہڑا ساڈے پاپاں دی معافی دےراہیں رُوح پاک دی بھرپوری نوں پاؤن دی اگوائی کردا اے۔ فیروی،اسیں سارے جگ وچ بوہت سارے مسیحی دیکھدے آں جیہڑے ہُن تیک اپنے دلاں وچ پاپ رکھدے نیں، گو بھانویں اوہناں نے یسوع اُ تے اپنے عقیدے نوں اِک لمےچِر تائیں قائم کیتاسی۔ جِنے لمے چِرتوں اوہ یسوع اُتے ایمان رکھد ے نیں، اوہنا بوہتا اوہ پاپی بن جاندے نیں۔ سب توں وڈا مسئلہ جیہڑا اوہناں نوں اوہناں دے پاپاں توں مکت ہوون توں روک دا اے اوہ ا یہہ وے پئی اوہ ایہہ سوچدے نیں پئی اوپریاں بولیاں تے سُپنے ویکھنا ایس گل داثبوت اے پئی اوہ رُوح پاک پا چکے نیں۔ اوہ لوک اپنے پاپاں لئی خدا دی عدالت توں بے خبر نیں۔
ایس دنیا وچ بوہت سارے لوک رُوح پاک دے کم نوں شیطان دے کم توں وکھ نئیں کرسکدے۔ شیطان دا کم اوہناں نوں جھوٹے عقیدے دین دےراہیں اک پریشانی دی حالت ول ٹور دیندا اے تے فیر اوہناں دی تباہی ول اگوائی کردا اے۔ شیطان خدا دے خلاف ہوندیاں ہویاں ایہو کُجھ ای حاصل کرن دی کوشش کرد ا اے ۔ شیطان لوکاں دے توہم پرست عقیدیاں دے اثر ہٹھ ڈِگن دا سبب بن دا اے تے اوہناں نوں اپنے غلام بنا لیندا اے ۔ شیطان ہو لی ہولی اوہناں وچ ایس قسم دے معجزے تے عجیب کماں دے تجربے دی سدھربٹھادیندا اے، اوہناں لئی ایہہ سوچن دا سبب بن دیاں ہویاں پئی قدرت توں اُتاں دے تجربے ایس سوہنی خوشخبری اُتے ایمان راہیں رُوح پاک دی بھرپوری پاؤن دی تھاں زیاد قدر دے قابل نیں ۔
فیروی رُوح پاک لوکاں نوں کلام دے راہیں خدا دی دنیا نوں ویکھن دی اجازت دیندا اے۔ رُوح پاک دے راہیں، اوہ ایہہ جان دیاں ہویاں ایمان رکھدے نیں پئی خدا نے انسان نوں پیدا کیتا، پئی اوہ اوہناں نال محبت کردا اے تے خدا اوہناں نوں بچاؤنا چاؤہندا اے۔ پاپیاں لئی اوہدامنصوبہ یسوع مسیح دے راہیں اوہناں نوں پانی تے روح دی خوشخبری دین راہیں اوہناں دے پاپاں توں رہائی دینا تے اوہناں نوں ایمان دے راہیں اوہدی محبت وچ زندہ رہن لئی دعوت دینا سی۔
۱۔ پطرس ۳ :۲۱کہندا اے، ” تے اوسے پانی دے ورگا وی پئی بپتسمہ یسوع مسیح دے جی اٹھن دے راہیں ہن تہانوں بچاؤندا اے۔“ ۱۔ پطرس ۱ :۲۳ ایہہ وی کہندا اے، ” ایس لئی پئی تسیں فانی تخم توں نئیں سگوں غیرفانی توں خدا دے کلام دے راہیں جیہڑا زندہ تے قائم اے نویں سرے توں جمے او۔“
رُوح پاک دا کم بندے نوں پاپ دی سچائی، راستبازی، تے عدالت دے بارے نور دینااے ، تے اوہناں نوں ایہناں سچائیاں اُ تے ایمان رکھن دے قابل کرنااے۔ رُوح پاک اوہناں نوں خدا دی عدالت دے بارے وچ جانن دی اجازت دیندا اے تے اوہ یسوع دے بپتسمہ تے اوہدے سولی اُتے وگن والے لہو دی ایس سوہنی خوشخبری تے ایمان رکھن دے راہیں اپنے پاپاں توں رہا ہو سکدے نیں۔ رُوح پاک اوہناں نوں علم دیندا اے پئی اوہ اوہناں دے اندر اے کیوں جے اوہ پانی تے روح دی خوشخبری اُ تے ایمان رکھدے نیں۔
ہُن تیک اسیں روح پاک دے کم ویکھ چکے آں۔ ایس دنیا وچ سارے لوک رُوح پاک دی بھرپوری تے خدا دی محبت صرف تد ای پا سکدے نیں جدوں اوہ یسوع دی پانی تے روح دی خوشخبری اُ تے ایمان رکھن دےراہیں پاپاں دی معافی حاصل کردے نیں۔
 
 
روح پاک دی شخصیت
 
رُوح پاک قادرِ مُطلق خدا اے۔ اوہ  شخصیت  دیاں  ضروری  خصلتاں  بنام،  ذہانت،  جذبہ  تے
مرضی رکھدا اے۔ کیوں جے رُوح پاک ذہانت رکھدا اے، اوہ ایتھوں تیک پئی بندیاں دے دلاں دیاں لُکیاں ہویاں گلاں تے خدا دی تہہ تیک دیاں شیواں نوں وی جان لیند ااے (۱۔ کرنتھیوں۲: ۱۰) تے آدمیاں دے دلاں نوں وی لب لیندا اے۔
کیوں جے رُوح پاک جذبہ رکھدا اے، اوہ اوہناں لوکاں توں شاداے جیہڑے خدا دے کلام اُتے ایمان رکھدے نیں، پرایمان نہ رکھن والیاں دے خلاف دلوں ہانواں بھردا اے۔ راستباز رُوح پاک دے راہیں خدا دی محبت ،وی محسوس کرسکدے نیں۔
روح پاک ”مددگار“ وی اکھواؤندااے۔ ایہدا مطلب ایہہ وے پئی رُوح پاک مشکلاں وچ راستبازاں دی مدد کردا اے، تے اوہناں دے دشمناں دے خلاف لڑکے اوہناں لئی فتح لیاؤندا اے۔ اوہ ساڈے انساناں وانگر ای ذہانت، جذبہ، تے مرضی رکھدا اے، تے اوہ اوہناں وچ وَسدا اے جیہڑے پانی تے روح دی خوشخبری اُتے ایمان رکھدے نیں۔
 
 
 رُوح پاک دا کم ہیٹھ دِتے گئے پیراگراف وانگر اے
 
رُوح پاک لوکاں نوں اجازت دیندا اے پئی پاپاں دی معافی دی سچیائی نوں جانن تے اوہ ایمانداراں دے دلاں وچ وسدا اے۔ اوہدا کم سچیائی دی گواہی دینا اے جدوں پئی یسوع نے اپنے بپتسمہ تے اپنے لہو دے راہیں نسلِ انسانی دے سارے پاپاں نوں اپنے اُتے چک لیا (۱۔یوحنا ۵ :۶ ۔۸) ۔ اوہ ہر مشکل وچ اپنے خادماں تے مقدساں نوں تسلی وی دیندا اے تے اوہناں نوں فیر توں کھڑا ہوون لئی مضبوط کردا اے۔ اوہ آپ خود اوہناں لئی شفاعت کردا اے جیہڑےنئیں جان دے ہوندے پئی اوہناں نوں کیہ دعا کرنی چاہی دی اے (رومیوں ۸: ۲۶)۔ تے اوہ راستبازاں نوں خدا دی کلیسیا وچ سکون دیندا اے تے اوہناں دی اپنے کم دی کثرت لئی اگوائی کردا اے (زبور ۲۳)۔
 
 
کلامِ مقدس توں ملدے رُوح پاک دے کم
 
رُوح پاک راستبازاں دی اپنے دلاں وچ ایس سچیائی دی پچھان تے ایمان رکھن تے دوجیاں تیک ایہدی منادی کرن لئی اگوائی کر دا اے ۔ ”ہر اک صحیفہ جیہڑا خدا دے الہام توں اے تعلیم تے اِلزام تے درستگی تے راستبازی وچ دیکھ بھال کرن لئی فائدہ مند وی اے۔“ (۲۔ تیمتھیں ۳ :۱۶)
تسیں خداوند دی کتاب وچوں لبھو تے پڑھو۔ اِیہناں وچوں اک وی گھٹ نئیں ہووے گا تے کوئی بغیر جوڑےتوں نئیں ہووے گا کیوں جے میرے منہ نے ایہی حکم کیتا اے تے اوہدی رُوح نے ایہناں نوں جمع کیتا اے۔“(یسعیاہ ۳۴:۱۶)
تے پہلاں ایہہ جان لووو پئی پاک کتابِ دی کسے نبوت دی گل نوں کھولناکسے دے آپنےوس وچ نئیں ہیگا۔ کیوں جے نبوت دی کوئی گَل بندے دی چاؤن نال کدی نئیں ہوئی سگوں بندے رُوح پاک دی حرکت دے راہیں  خدا دے ولوں بولدے سَن۔“( ۲۔ پطرس ۱ :۲۰۔۲۱)
رُوح پاک خدا دے خادماں نوں خدا دا کلام لکھن لئی الہام دے چُکیا سی تاں پئی اسیں اوہنوں پڑھ سکیے۔ اوہ لوکاں نوں پانی تے روح دی خوشخبری توں جان پہچان کراؤندا اے تے ایہدی ایس دنیا وچ منادی کرن لئی ساڈی اگوائی کردا اے۔ ایس لئی گو بھانویں راستباز اپنیاں حیاتیاں وچ بوہت ساریاں آزمائشاں دے دکھ چُک سکدے نیں، فیر وی اوہ اوہناں آزمائشاں اُتے غلبہ پاؤن دے قابل نیں رُوح پاک دی قدرت دا شکر ہووے۔
 
 
رُوح پاک دیاں نعمتاں تے پھل
 
            رُوح پاک دیاں نعمتاں دا مطلب اوہ صلاحیتاں نیں جیہڑیاں اوہ مقدساں نوں دوجیاں تائیں خدا دی ایس سوہنی خوشخبری دے پھیلاؤن لئی دیندا اے۔ ایس لئی پاک لوک اپنے آپ نوں اپنیاں خدا ولوں بخشش ہویاں نعمتاںسمیت خدا دے کم لئی وقف کر دیندے نیں تے روح پاک اوہناں دی خداوند نوں جلال دین لئی مدد کردا اے۔ ” پئی ہر بندے وچ رُوح دا ظاہرہونا فائدہ اپڑاؤن لئی ہوندا اے “
(۱۔کرنتھیوں۱۲: ۷)۔
رُوح پاک دیاں نعمتاں دا مقصد پاک لوکاں نوں ایمان نال لیس کرنا تے اوس دوڑوچ نسن وچ مددکرناسی جیہڑی اوہناں دے اگے سی(افسیوں ۴ :۱۱۔۱۲)۔ رُوح پاک خُدا دے خادماں تے مقدساں نوں ایس خوشخبری نوں پھیلاؤن وچ مدد دین لئی صلاحیتاں دیندا اے۔ خدا دی کلیسیااوہناں مقدساں دا اک حصہ اے جیہڑے یسوع مسیح وچ پاک ہوئے نیں (۱۔کرنتھیوں ۱: ۲)۔
کیوں جے یسوع مسیح کلیسیا دا سب توں وڈا پاسبان اے، ایس لئی ہر مسیحی جیہڑا رُوح پاک حاصل کر چکیا اے اوہنوں آپنے حاصل کیتے گئے مرتبے تے ذمہ داریاں دے مطابق ورتوں کرنی چاہی دا اے ۔ رُوح پاک مقدساں نوں روحانی سمجھ تے صلاحیت دیندا اے تاں پئی اوہ خداد ی بادشاہی دے لئی کم کر سکن۔ اوہ ایس خوشخبری دے جلال نوں ظاہر کرن لئی ہر کم کردا اے جیہڑی خدا نے سانوں دتی۔ اوہ کہندا اے، ”پس تسیں کھاویا پیو جو کجُھ وی کرو سب کجُھ خدا دے جلال دے لئی کرو۔   (۱۔کرنتھیوں ۱۰۔۳۱)۔
 
 
رُوح دیاں نعمتاں دیاں وکھریاں وکھریاں قِسماں
 
رُوح پاک دیاں نعمتاں دیاں بارہ قسماں نیں ۔ اسیں بائبل وچ ویکھ سکدے آں پئی ایہہ نعمتاں وکھریاں وکھریاں شکلاں وچ وکھرے وکھرے لوکاں وچ ظاہر ہوندیاں نیں۔ نعمتاں دی اک لما حساب رومیوں۱۲ :۶۔۸، ۱۔کرنتھیوں ۱۲ :۸۔۱۰، تے اِفسیوں ۴:۱۱  وچ ملدا اے۔ ہیٹھاں ۹ روحانی نعمتاں دے ذکر اے جیہڑیاں ۱۔کرنتھیوں بارھویں باب وچ دسیاں گیاں نیں ۔
۱) علم دا کلام:  ایہہ سانوں پانی تے روح دی خوشخبری نوں سمجھن لئی روحانی الہام بخش دا اے تے سانوں ایس سوہنی خوشخبری دی منادی کرن دی اجازت دیندا اے۔
۲) حکمت دا کلام:  ایہہ خدا دے لکھے ہوئے کلام دے وسیلے اوہناں بےگنت مسئلیاں نوں حل کرن دی صلاحیت دیندا اے جیہڑے راستبازاں دی حیاتی وچ آؤندے نیں ۔
۳) اِیمان:  رُوح پاک مقدساں نوں مضبوط ایمان تے اعتماد عطا ادا کردا اے تاں پئی اوہ جانن تے اپنے پاپاں تے شیطان توں بچن دا معجزہ کرسکن۔ اک راستباز بندہ ایمان دی طاقت  دے  راہیں آپنے
پاپاں توں معافی حاصل کر سکدا اے تے روحانی ابتری نوں شفا دے سکدا اے۔
۴) شِفا:  رُوح پاک راستباز لوکاں نوں خُد ادے کلام مطابق اوہناں دے ایمان دے راہیں شفا دین دی قابلیت دیندا اے ۔
۵) معجزیاں دی قُدرت:  ایہہ اوہ حیران کن نعمت اے جیہڑی مقدس نوں خدا دے کلام اُتے ایمان رکھن دے وسیلے خدا دا کم کرن دی اجازت دیندی اے۔ معجزہ اک اجیہی شے اے جیہڑی انسان دے فطری قانون دے علم دیاں حداں توں اُتاں جا کے ایمان دےراہیں قدرت توں اُتاں دے واقعے دے طور ہوندی اے ۔
۶) نبوت:  ایس ویلے صرف اوہ لوک ای کلام دے اکھراں مطابق نبوت کر سکدے نیں جیہڑے خدادے کلام اُتے ایمان رکھدے تے فرمانبرداری کردے نیں۔ کسِے اجیہے بندے دے اکھر سچی نبوت نئیں ہو سکدے جیہڑا اجیہے عقیدے رکھدا اے جیہڑے پئی ایس گل اُتے قائم نئیں پئی بائبل وچ کیہ لکھیا ہو یا اے ۔ خدا دے اوہ خادم جیہڑے روح پاک دی بھرپوری رکھدے نیں، اوہ خدادے کلام دی منادی کردے نیں تے ایس طرحاں اوہناں نوں کلیسیاں راہیں اوہدا کم کرن لئی روحانی مشقت تے نیکی دی ہدایت کردے نیں جیہڑی خدا دا بند ن اے ۔ رُوح پاک نے ایہہ صلاحیت خدادے خادماں تے مقدساں نوں دتی اے۔
۷) رُوحاں دا اِمتیاز: ایہہ ایس گل نوں جانن دی صلاحیت اے پئی  کیہ کسے بندے نے آپنے پاپاں دی معافی حاصل کر لئی اے ۔ جے اسیں ایہہ نعمت نئیں رکھدے تد فیر شیطان ہتھوں ساڈا بھٹک جانا سوکھاہو جاندا اے ۔ کیوں جے دنیا شیطان دے اختیارہیٹھ اے، ایس لئی اسیں صرف ایس سوہنی خوشخبری اُتے ایمان رکھن دےراہیں ایہہ نعمت رکھ سکدے آں جیہڑی خدا نے سانوں دتی تے ایس طرحاں ایس دنیا وچ آزمائشاں، بھاراں تے بدیاں اُتے غالب آسکدے آں۔ اک راستباز بندہ سچی خوشخبری اُتے ایمان رکھن دے وسیلے ایہہ نعمت حاصل کردا اے۔ ایس طرحاں اوہ دس سکدا اے پئی کیہ کوئی بندہ اپنے دل وچ پاپ رکھدا اے۔
۸) طرحاں طرحاں دیاں بولیاں بولنا :  بائبل سانوں اوپریاں بولیاں وچ بولن دے بارے دس دی اے۔ ” پر کلیسیا وچ اوپری بولی وچ دس ہزار گلاں کہن نالوں مینوں ایہہ بوہتا چنگا لگدااے پئی دوجیاں دی تعلیم دے لئی پنج ای گلاں عقل نال آکھاں“ (۱۔کرنتھیوں۱۴: ۱۹)۔ اکمقدس نوں ایہہ جاننا چائی دا اے پئی اوپریاں بولیاں جیہڑیاں او آپ وی سمجھ نئیں سکدا ، اوہناں وچ بولن دی تھاں خدا دی سچیائی دے کلام نوں سمجھنا زیادہ ضروری اے۔ ایس لئی اوہناں نوں اوپریاں بولیاں بولن توں بچنا چاہی دا اے۔
۹) دوجیاں بولیاں دا ترجمہ:  ایہہ نعمت شاگرداں نوں مڈھلی کلیسیا دے دور وچ خوشخبری دی منادی کرن دی اجازت دین لئی دِتی گئی سی۔ اج کل رُوح پاک خوشخبری نوں وکھریاں وکھریاں بولیاں وچ ترجمے کرن دی خدمت تے پیغاماں دی تشریح دے راہیں پھیلاؤن دیا اے۔ جے خوشخبری دی منادی کرن والا بندہ ساریاں بولیاں وچ بول سکدا ہووے تد فیر ترجمہ کرن والے دی لوڑ نئیں ہوندی ۔ فیروی، جدوں اسی بولیاں دیاں رکاوٹاں دا سامنا کردےآں ، تے خداہمیش آپنےکم پوریاں کرن لئی ترجمہ کرن والیاں نوں گھل دا اے ۔ خدا غیر منظم تے جذباتی حالت وچ کم نئیں کردا۔ رُوح پاک ایس سوہنی خوشخبری وچ کم کردا اے تے وکھریاں وکھریاں بولیاں وچ ایس خوشخبری دا ترجمہ کرن لئی مقدساں دی اگوائی وی کردا اے۔
 
 
 روح پاک دے پھل کیہ نیں؟
 
رُوح پاک دے پھلاں دے بارے بائبل سانوں دسدی اے، ” پر رُوح دا پھل محبت، خوشی، اطمینان، تحمل، مہربانی، نیکی، ایمانداری، حلم، پرہیزگاری اے۔اجیہے کماں دی کوئی شریعت مخالف نئیں اے ( گلتیوں ۵ :۲۲۔۲۳)۔
۱) محبت:  راستباز دی کھری محبت سارے پاپیاں نوں اوہناں دے پاپاں توں پانی تے رُوح دی ایس سوہنی خوشخبری دی منادی کرن دے راہیں بچاؤنا اے۔ کیوں جے راستباز لوک ایس سوہنی خوشخبری نوں رکھدے نیں جیہڑی یسوع دی کھری محبت اے ،ایس لئی اوہ کھری محبت دی خوشخبری دی منادی کردے نیں تے دوجیاں جاناں دے لئی سچی محبت رکھدے نیں۔
۲) خوشی:  ساڈے نویں سرے توں پیدا ہوؤن توں بعد ایہہ ساڈے دلاں دی ڈوہنگیائی وچوں پُھٹ دی ہوئی ناقابل بیان اچیری خوشی اے۔ اوہ راستباز بندہ جیہڑا پئی سارے پاپاں توں معاف ہو چکیا اے اپنے دل وچ خوشی رکھدا اے (فلپیوں ۴:۴)۔ کیوں جے راستبازاں دے دِلاں وچ خوشی پائی جاندی اے ایس لئی اوہ دوجے لوکاں دے نال اپنی خوشی نوں ونڈن دی صلاحیت رکھ دے نیں۔
۳) اطمینان:  ایہہ تسلی دا دل اے جیہڑا اوس راستباز بندے نوں دِتا جاندا اے جیہڑا پانی تے روح دی خوشخبری اُتے ایمان رکھن دےراہیں اپنے پاپاں توں معاف ہو چکیا اے۔ روح پاک راستباز بندے لئی اطمینان دی ایس سوہنی خوشخبری دی منادی کرن دا سبب بن دا اے۔ اوہ لوک جیہڑے اطمینان دی ایس سوہنی خوشخبری نوں سن چکے نیں اوہ دوجیاں دی دنیا دے پاپاں اُتے غالب آؤن تے ایمان دی طاقتور سمجھ رکھن تے نجات دی نعمت اُتے یقین رکھن لئی اگوائی کرن دے قابل نیں۔ اوہ راستباز لوک جیہڑے خدا تے نسلِ انسانی وچکار صلح کراؤندے نیں خدا دے پُتراکھواؤندے نیں۔ (متی ۵ :۹) تے دوجیاں دی پاپ دی معافی حاصل کرن وچ اگوائی کردے نیں (امثال۱۲: ۲۰)۔ رُوح پاک راستبازاں لئی راستباز حیاتیاں دی اگوائی کرن دا سبب بن دا اے تے دوجیاں نوں صلح دے نال ایس سوہنی خوشخبری نوں پھیلاؤن دےراہیں برکت دیندا اے۔
۴) تحمل: تحمل دے پھل اوہناں راستبازاں دے دل وچ نیں جیہڑے ایس سچی خوشخبری اُتے ایمان رکھن دے راہیں اپنے پاپاں توں مکت ہو چکے نیں۔ اسیں ایہہ پھل روح پاک دے نال ابدی شراکت دی سمجھ دی ترقی پاؤن دے راہیں حاصل کرسکدے آں۔ راستبازاں وچ تحمل تے صبر دا دل موجود ہوندا اے۔
۵) مہربانی:  جدوں اسیں پاپاں نال لدے ہوئے ساں تد خُدا نے ساڈے اُتے رحم کیتا تے سانوں ساڈے سارے پاپاں توں یسوع دے بپتسمہ تے اوہدے سولی اُتے وگن والے لہو دے راہیں چھڑایا۔ کیوں جے یسوع نے ساڈے اُتے رحم کیتا تے ساڈے سارے پاپاں نوں مٹادِتا تے کیوں جے اسیں اوہدے اُتے ایمان رکھیا تے اوہدے فضل نوں حاصل کیتا، ایس لئی اسیں وی محبت کرسکدے آں تے دوجیاں اُتے رحم کرسکدے آں۔ راستباز مہربانی توں بھرپور دل تے ایس سوہنی خوشخبری دے پھل رکھ دے نیں۔
۶) نیکی:  نیکی دا ایتھے مطلب ”بھلائی “ اے ۔ راستباز لوک اپنے دلاں دی ڈوہنگیائی وچ نیکی تے خداوند اُتے ایمان رکھدے نیں۔
۷) ایمانداری:  ایمانداری دا مطلب خُدا اُتے ایمان توں بھرپور دل رکھنا اے۔ کسے مقدس وچ ایمانداری یسوع نال وفادار ہون نال حاصل ہوندی اے۔
۸) حلیم: ایہدامطلب اے دوجیاں نوں مکمل طو رتے سمجھن دی صلاحیت رکھنا تے اوہناں نوں اپنے دل وچ گرم جوشی تے نرمی نال قائم رکھنا اے۔ راستباز  اپنے  دشمناں  نال  وی  محبت کرن تے
اوہناں دی رہائی لئی دعا کرن دا دل رکھدا اے۔
۹) پرہیز گاری:  پرہیز گاری کسے دا اپنے آپ نوں درست رکھنا، بدکار زندگی گزارن توں بچناتے ایہدی تھاں پرہیز گاری تے نفس اُتے قابورکھن نال زندہ رہنااے ۔
 
 
رُوح پاک دے نال بھرنا
 
رُوح پاک دے نال بھرن دا کیہ نتیجہ اے ؟ ایس برکت نوں پاؤنا مقدساں دا خدا دی کلیسیا وچ شامل ہو کے یسوع مسیح دے شاگرداں وانگر زندہ رہن دی اجازت دیندا اے۔ روح پاک راستبازاں نوں راستبازی دے ہتھیار بنن تے اپنے آپ نوں مسیح دی مرضی نو پوریاں کردیاں ہویاں وقف کرن دے قابل کردااے۔ راستباز دی مرضی خداوند دی مرضی دے راہیں قابو وچ رہندی اے ،تے اوہ مرضی نال اپنی ساری ملکیتی شیواں تے صلاحیتاں خدا لئی وقف کردے نیں۔ روح پاک راستبازاں دے لئی روحانی غربت، شکست یاں مایوس نئیں سگوں فتح، خوشی تے اعتماد دی سمجھ دے نال دنیا دے پاپاں اُتے غالب آؤن دے لئی وقف حیاتیاں گزارن دا سبب بن دا اے۔ (رومیو ں باب ۷)۔
پر جد رُوح پاک تہاڈے اُتے نازل ہووے گا تے تُسیں طاقت پاو گے تے یروشلیم تے سارے یہودیہ تے سامریہ وچ زمین دی اخیرتائیں میرے گواہ ہوو گے(اعمال ۱:۸) ۔رُوح پاک دی بھرپوری راستباز دی خوشخبری دی منادی کرن وچ اگوائی کردی اے۔
خُداوند نے اوہناں نوں ایمان دی طاقتور سمجھ دِتی اے جنہاں وچ رُوح پاک وسدا اے۔ تے خدا نے اوہناں نوں اوہدے پُتر بنن دا حق دِتا اےجنہاں دے پاپ یسوع دی ایس سوہنی خوشخبری اُتے اوہناں دےایمان دے راہیں معاف ہو گئے نیں۔ (یوحنا۱: ۱۲)۔ راستباز لوک جیہڑے ایمان دےراہیں خدا دے پُتر بن چکے نیں اوہ ایس دنیا وچ ایس سوہنی خوشخبری دی منادی کرسکدے نیں۔
راستباز لوک پاپاں دی معافی لئی خوشخبری دے راہیں شیطان نوں ہراؤن دی صلاحیت رکھدے نیں۔ اوہ روحانی روگاں نوں شفادین (مرقس۱۶ :۱۸)، شیطا ن دی قُدرت نوں کچلن (لوقا۱۰: ۱۹)، تے اسمان دی بادشاہی وچ داخل ہوون (مکاشفہ۲۲: ۱۴) دی وی قُدرت رکھدے نیں۔ راستباز لوک خُدا دے وعدے دے کلام اُتے ایمان رکھن دے راہیں  بادشاہواں  وانگر اوسے ای  اختیار  دے  نال زندہ
رہندے نیں (۲۔کرنتھیوں ۶: ۱۷۔۱۸)۔
رُوح پاک راستباز لوکاں دیاں ساریاں دنیاوی سدھراں نوں کڈھن دا سبب بن دا اے۔ اوہ ساڈی سچی خوشخبری دی منادی کرن دے لئی اگوائی وی کردا اے (گلتیوں ۵: ۶)۔
رُوح پاک راستباز لئی ایس سوہنی خوشخبری نوں پڑھن تے ایمان رکھن تے اوہنوں دوجیاں نوں سکھاؤن دا سبب بن دا اے۔ (۱۔تیمتھیس ۴ :۱۳)۔
رُوح پاک راستبازاں نوں ہر روز خُد ادی کلیسیا وچ اکٹھا کردااے (عبرانیوں ۱۰ :۲۵)۔
رُوح پاک راستبازاں لئی اوہناں دے پاپاں دا اقرار کرن (۱۔یوحنا ۱: ۹ ) تے اوہناں دے دلاں نوں سچیائی دی روشنی لئی روشن کرن دے قابل بناؤن دا (افسیوں ۵: ۱۳) سبب بن دا اے۔
رُوح پاک راستبازاں دی اپنیاں حیاتیاں وچ دُرست رستے لئی اگوائی کردااے (زبور ۲۳)۔
رُوح پاک راستبازاں نوں اوہدیاں نعمتاں نہ بجھاؤن لئی کہندا اے۔(۱۔ تھسلنیکیوں ۵: ۱۹)۔
رُوح پاک حیران کردین والی خوشخبری دےراہیں اچیرے کم کردا اے (مرقس۱۶: ۱۷۔۱۸)۔
رُوح پاک راستبازاں دی خُداوند دے شاگرداں وانگرزندہ رہن لئی اوہناں نوں خُد ادی کلیسیا وچ شامل ہوون دی ترغیب دین لئی اگوائی کردا اے۔ اوہ راستبازاں دی ایس سوہنی خوشخبری دی منادی کرن، رُوحانی حیاتیاں گزارن تے رُوح پاک دی بھرپوری حاصل کرن وچ اگوائی کردا اے۔ ایہہ ایس شاندار خوشخبری دےراہیں رُوح پاک دا کم اے۔ (۱۔پطرس ۲: ۹)۔
اوہ ایس ویلے وی مقدساں دیاں دلاں وچ کم کرن دیا اے ۔ ہیلیلویاہ!