خطبے

مضمون 9: رومیوں (رومیوں دی کتاب اُتے تفسیر)

[1-3باب] <رومیوں ۱:۱۷> راستبازایمان نال جیوندا رہوےگا

 >رومیوں ۱:۱۷>
”ایس لئی پئی اوہدے وچ خُدا دی راستبازی ایمان نال تے ایمان لئی ظاہر ہوندی اے جویں لکھیا اے پئی راستبازایمان نال جیوندا رہوےگا۔“
 
 
لازمی ہیگااے پئی اسیں ایمان نال جیوندے رہیے
 
راستباز کویں جیوندا رہوےگا؟ ایمان دے راہیں ۔ راستباز ایمان نال جیوندااے۔ اصل وچ ، جگ والا  ’ ایمان ‘ بوہت رَلواں تے عام ہیگااے ،پر ایہہ بائبل دی بوہت خاص گل ہیگی اے ۔ راستبازصرف ایمان نال جیوندااے ۔راستباز کویں جیوندا اے؟ اوہ خُدا اُتے ایمان رکھیاں جیوندارہندااے ۔ میَں آس رکھدا ہاں پئی میَں ایس حصے نال تہاڈے دل دے ہنیرے مکاواں گا کیوں جے اسیں بدن وچ ہیگے آں تے پاک رُوح ساڈے وچ وسیا ہویا اے ۔ اسیں بوہتے حوالیاں وچوں  اپنی من مرضی دیاں گلاں لبھدے آں ، نہ پئی بائبل وچ لُکے ہوئے اصل  مطلب نوں جان دے آں ۔ خورے اسیں بائبل دے اَکھراں والے مطلب نوں ای سمجھدے آں ۔اسیں اِکو ای ویلے رُوح تے بدن وچ ہیگے آں ۔ایس  لئی ،بائبل آکھدی اے پئی ،اسیں راستباز ، ایمان رکھ کے جیوندے رہواں گے کیوں جے ساڈے کول پاپاں دی معافی ہیگی اے۔
 
 
پر مسئلہ ایہہ ہیگااے پئی بدن کدی نیک کم کرن والا نئیں ہو سکدا
 
پر مسئلہ ایہہ ہیگا اے پئی اسیں بدن وی رکھدے آں ۔ایس طرحاں، بوہتیاں معاملیاں وچ ، اسیں بدن ولوں سزا پاؤندے آں ۔ کئی واری ،اسیں سزاپاؤندے آں تے بدنی خیالاں والیاں کُجھ شیواں پا لیندے آں ،تے جدوں ایہہ شیواں ایمان ول پوہنچدیاں نیں تاں ساڈا ایمان ڈول جاندااے ۔فیروی ، پاک بائبل سوکھے طریقے نال  دسدی اے پئی  راستباز صرف ایمان نال جیوندارہوے گا ۔فیر ایہدا کیہ مطلب ہیگااے ؟ تسیں سوچ سکدے او ’ اوہ راستباز کتھے ہیگے نیں جیہڑے ایمان نال جیوندے نئیں ہیگے ؟ کاہدے لئی تسیں ایس آیت اُتے بوہدا دھیان دیندے او ؟ کیہ ایہہ پاک کلام دیاں دوجیاں آیتاں وانگر نئیں ہیگی اے ؟‘
اج ،میَں تہانوں ایس آیت بارے دسنا چاؤہنا واں ۔ لازمی ہیگا اے پئی اسیں ایمان نال جیوندے رہیے۔اسیں اپنے علم دے گھاٹے دا احساس نئیں کردے ،ایتھوں تیک پئی جدوں اسیں کُجھ دسن دی ہمت کردے آں،اسیں سوچدےآں پئی اسیں ایہدے بارے اپنے خیال مطابق بوہت کُجھ جان دے آں ۔ اوہ کیہڑا ویری ہیگااے جیہدے خلاف اک پاپی جنگ کرن لئی تیار ہیگااے؟اک بندہ جیہڑا نویں سریوں نئیں جمیا اپنے خیالاں تے اپنے بدن نال جنگ کردا رہندا اے ۔ کیہڑا نویں سریوں جمن والے بندے نال جنگ کرن لئی تیار ہیگااے ؟اک بندے دے اندر رُوح تے بدن آپس وچ لڑدے رہندے نیں ۔تسیں حیران ہوو گے پئی میَں کاہدے لئی اینوں گھڑی مُڑی دہراؤنداہاں ،جد پئی پہلوں ای میَں ایس گل بارے جان دا ہاں ۔ پر میَں اینوں گھڑی مُڑی دہراؤنا ایس لئی چاؤہندا ہاں ،کیوں جے ایہہ مہنگا کلام ہیگااے ۔
ایتھوں تیک پئی نویں سریوں جمن والے پاک بندے دی رُوح تے  بدن وی لگاتار اک دوجے نال جنگ کردے رہندے نیں کیوں جے اوہ وی بدن رکھدے نیں ۔ بدن اک طبیعت والا حصہ ہیگا اے تے ایہہ ایمان نال جیون دی تھاں اُتے جندڑی دیاں ساریاں مشکلاں نوں سوکھیاں کرن تے موج مستیاں دی جندڑی بسرکرن دی ہمت کردااے ۔ بدن دا اک ہور حصہ ایہو جیہے راستباز بندے دا وی اے جیہڑا کُھلے دل نال رہندا چاؤہندااے تے کوئی خطا کریوں اَڈ کامیابی نال خُدا تیک اپڑن دی ہمت کردا اے ، جیہڑا پئی بائبل دے دسے ہوئے ایس ایمان نال پئی راستباز ایمان نال جیوندا رہوےگا ،بوہت دُور دی جندڑی ہیگی اے ۔
سو، راستبازدا بدن وی کامل ہونا چاؤہندااے تے رُوحانی کماں وچ وی اوہ ہر اک رُوحانی مسئلے نال کامل طور اُتے نبڑن دی ہمت کردااے تے ایسے وچکار بدن دے کامل ہون دی و ی آس رکھدا  اے ۔ پر کیہ کوئی بندہ بدن دے راہیں ایمان دی جندڑی دی اَگوائی کر سکدا اے ؟ جویں پئی پولُس نے آکھیا اے ، ”  سو جیہڑی نیکی کرن دا ارادہ کردا ہاں اوہ تاں  نئیں کردا پر جیہڑے بھیڑے کم دا ارادہ نئیں کردا اوہ کر لینا واں “ (رومیوں ۷:۱۹)۔بدن کدی چنگےکم نئیں کر سکدا ۔ ساڈے  بدن وچ  اک جماندرُو عادت ہوندی اے پئی بھاویں بدن پاپ داپُتلا ہیگااے تے پاپ نوں ڈک نئیں سکدا تاں فیر وی اسیں خدا دے اگے چنگی جندڑی بسر کرنا چاؤہندے آں ۔
 
 
اسیں ایمان والی جندڑی بدن وچ رہندیاں رواں نئیں رکھ سکدے ۔
 
بوہت دھیان نال دسدا پیاہاں پئی  بدن نال سچیائی دی حیاتی بسرکرنا ،ایہہ سچے ایمان توں بوہت دُور ہیگا اے ۔ جدوں اسیں بائبل مطابق ویکھدے آں تاں ساڈے خیال تے عادت بالکل خُدا دے خلاف ہیگے نیں ۔ بدن نال کامل بننا تے کسے مشکل توں اَڈ ایمان دی جندڑی وچ ٹُرنا ایہہ اوکھا ہیگا اے ۔ بندیاں دا بدن مٹی دا اے ۔ پاک بائبل دسدی اے ، ” اوہنوں یاد ہیگااے پئی اسیں مٹی دے ہیگے آں “(زبور ۱۰۳:  ۱۴)۔ایتھوں تیک پئی ایہہ بُلبلیاں وانگر ہیگا اے جیہڑا تھوڑے جیہے ویلے لئی دِسیا تے فیر ایہہ نئیں کیوں جے ایہہ مک جان والا اے ۔
کیہ اک نویں سریوں جمن والا بندےتے نویں سریوں نہ جمن والا بندے ،دے بدن پاک بن سکدے نیں ؟ کیہ اک نویں سریوں جمن والا بندہ  بدن وچ رہندیاں ہویاں پاپ نوں قابو کرسکدااے ۔ جے  بدن پاپ نوں قابو کر سکدا اے تاں سانوں ایمان وچ جیون دی کوئی لوڑ نئیں ہیگی اے ۔کیہ فیر ساڈے  بدن اپنی طاقت نال جیوندے رہ سکدے نیں ؟ سانوں لازمی طور اُتے پتہ اے پئی ایہہ اوکھا کم اے ۔ مسئلہ ایہہ ہیگااے پئی کیہ سانوں ایہہ پتہ اے تے اسیں من دے آں پئی ، اسیں نویں سریوں جمے آں یاں نئیں۔ ایہدے ہوندیاں بدن ایناں ماڑا ہیگااے پئی اوہ لگاتار پاپ کردارہندااے ۔
سانوں اپنے بدن بارے کناں پتہ اے ؟ اسیں اپنے بارے کناں جان دے آں ؟ تسیں خورے سوچدے او پئی تسیں اپنے  آپ نوں ۱۰۰٪  جان دے او ، پر تسیں اپنے آپ نوں سارے دے سارے نئیں جان دے پئی تسیں سچ مُچ ایہہ نئیں من دے پئی تسیں پاپی او ۔ ایہدے بارے کیہ خیال ہیگااے پئی تسیں اپنے آپ نوں کناں جان دے او ؟ ایتھوں تیک پئی ۵۰٪ بوہتا ہووے گا ۔ لوک عام طور اُتے اپنے آپ نوں بوہتے توں بوہتا  ۱۰٪ یاں ٪ ۲۰ تیک ای سمجھدے نیں۔ اصل وچ ،اوہ اپنے آپ نوں ۱۰٪ یاں  ٪ ۲۰ ای جان دے نیں ،پر اوہ سوچدے نیں پئی اوہ اپنے آپ نوں ۱۰۰٪ جان دے نیں ۔جدوں اوہناں نوں لگدا اے پئی اوہناں نیں بوہتے گندے کم کیتے نیں تاں اوہ شرمندے ہوجاندے نیں تے خُداوند پِچھے ٹُرنا چھڈ دیندے نیں ۔فیر اوہ سوال کردے نیں پئی کیہ عقیدے اُتے اخیر تیک چل سکدے نیں یاں نئیں ،تے ایس نتیجے اُتے اپڑدے نیں پئی ایہہ اوکھا کم ہیگااے ۔
گندے پانی وانگر گندے کم بندیاں دی عقل وچوں وگ جاندے نیں ۔اوہناں لئی پاک حیاتیاں بسر کرنا اوکھا کم ہیگااے ۔  ”  اوہ ،میرے خیال وچ خُداوند دے پِچھے بوہتاچِرٹُرنا اوکھا کم ہیگااے ۔ میرے خیال وچ میرا بدن اِکو ای واری سارے پاپاں دے مکن نال چنگا ہوگیا سی ، پر میرا بدن حالے تیک ماڑا ہیگااے تے بھاویں میَں بوہت چِر پہلاں نویں سریوں جمیا ساں پرفیر وی  بوہت چھیتی کامل ہون توں پہلاں پاپاں وچ ڈگ پیناں ہاں  ۔ بدن نکما تے بد صورت ہیگا اے ۔“ اسیں اپنے  بدن بارے بالکل نئیں جان دے تے اوس توں ودھ کے اسیں اپنے  بدن دیاں کرتُوتاں  نوں وی مننا نئیں چاؤہندے ۔ اِنج نتیجہ ایہہ نکلدااے پئی جدوں سانوں پتہ لگدااے پئی بدن وچوں بدنی سوچاں نکلدیاں نیں ،تاں اسیں  بدن نال ایماندار جندڑی  بسر نئیں کر سکدے ۔اسیں بدن راہیں اپنی جندڑیاں  ایمان ول نئیں لَے جاسکدے ۔انسانی  بدن کیہ ہیگااے ؟ جے بندے دے بدن نوں اوہدی ہمت نال بوہت سواریا جاوے تاں کیہ اے ہر ورہے پاکیزگی وچ ودھ کے پاک ہو جاوے گا تے ساڈا  بدن خُدا اَگے اک کامل جنڈری بسر کرے گا ؟ ایہہ مکمل طور اُتے اوکھا کم ہیگااے ،تے بدن اخیری ساہواں تیک پاپ ڈکن وچ ساڈی کوئی مدد نئیں کر سکدا ۔
 
 
فیر کویں راستباز جیوندا رہ سکدا اے ؟
 
”جے تہاڈے کولوں خطاہوجاوے تےتسیں اوہناں سارے حکماں اُتے جیہڑے خُداوند نے موسیٰ نوں دتے سَن عمل نہ کیتا ، مطلب اے  ، جیہڑے دن توں خُداوند نے حکم دینا شروع کیتا اوس دن تو ں لَے کے اگانہہ جیہڑے حکم خُداوند نے تہاڈی آؤن والیاں نسلاں نوں موسیٰ دے راہیں ،تہانوں دتے نیں ۔ اوہدے وچ جے بےخیال وچ کوئی غلطی ہوگئی ہووے تے دوجے لوکاں نوں اوہدا پتہ نہ ہووے ،تاں سارے لوک اک وچھا سوختنی قربانی لئی چڑھاوے تاں پئی اوہ خُداوند دے اگے سکون پوہنچاؤن والی خوشبو ہووے تے اوہدے نال شرع وانگر اوہدی نذر دی قربانی تے اوہدا تپاون وی چڑھاوے تے غلطی دی قربانی لئی اک بکرا چاڑھے ۔ اِنج کاہن بنی اسرائیل دے سارے لوکاں لئی فدیہ دیوے ،تاں اوہناں نوں معافی ملے گی ،کیوں جے ایہہ صرف بھُل ہیگی سی تے اوہناں نیں اوس بھُل دی تھاں اُتے اوہ قربانی وی چڑھائی جیہڑی خُداوند دے اگے اَگ والی قربانی بن دی اے تے غلطی دی قربانی وی خُداوند دے اگے چڑھاویں ۔ فیر اسرائیل دے سارے لوکاں نوں تے اوہناں پردیسیاں نوں وی جیہڑے اوہناں وچ رہندے نیں معافی ملے گی کیوں جے لوکاں کولوں ایہہ بے خیال وچ ہویا اے ۔ تے جے اِکو ای بندہ بےخیال وچ غلطی کرے تاں اک ورہے دی بکری غلطی دی قربانی لئی چڑھاوے ۔اِنج کاہن اوس بندے ولوں جنہے بے خیال وچ غلطی کیتی ،اوہدی غلطی لئی خُداوند دے اگےفدیہ دیوے تاں اوہنوں معافی ملے گی ۔ جیہڑے بندے نے بے خیالی وچ غلطی کیتی ہووے اوہدے لئی تسیں اِکو ای قانون رکھنا بھاویں اوہ  بنی اسرائیل وچوں دیسی ہووے  یاں پردیسی جیہڑا اوہناں وچ رہنداہووے ۔  “ (گنتی ۱۵:۲۲ ۔ ۲۹)۔ 
” جے تہاڈے کولوں خطاہوجاوے تےتسیں اوہناں سارے حکماں اُتے جیہڑے خُداوند نے موسیٰ نوں دتے سَن ،عمل نہ کیتا ہووے۔ “پاک بائبل وچ ایسے طرحاں دی  ” بے خیالی دی غلطی “دیاں بوہت ساریاں گلاں نیں ۔ بدن توں بے خیال وچ غلطی ہو جاندی اے تے اوہدے کولوں کُجھ اِنج دا ہو جاندااے جیہڑا اوہ نئیں کرنا چاہندا۔ میَں تہانوں دسدا ہاں پئی جے بدن لئی کامل ہونا سوکھا ہوندا ، تاں وی پاپاں توں معافی پاؤن دے بعد وی کامل نئیں بن سکدا سی ۔جدوں سانوں مکتی  ملدی اے  چھیتی نال بدن کامل طوراُتے راستباز وکھالی دیندااے ۔ پر اصل وچ ، ایہہ سانوں ظاہر ہون وچ ساڈی مدد نئیں کردا سگوں ایہدی تھاں اُتے سانوں لُکا لیندااے ۔ بدن نوں  گندیاں کماں ول  کھِچ پیندی اے تے سدا پاپ کردا اے ۔ بدن سدا ایہو جیہے پاپ کردااے جنہاں کولوں خُدا نفرت کردااے ۔کیہ بدن بے گنت واری پاپاں وچ نئیں ڈِگدا ؟ کیہ بدن سدا ایہو جیہی جندڑی بسر کردااے ،جویں پئی خُدا چاؤہندااے ؟بدن سداایہو جہیے کم کردااے جیہڑا خُدا نوں پسند نئیں ہیگے ۔ بدن سدا بے قابو ہوکے پاپاں
وچ ڈِگ پیندااے ۔
خُدا دی شریعت ۱۰ حکماں اُتے قائم ہیگی اے تے ایہہ ۶۱۳ قسماں دیاں کھول کے دسیاں گیاں  شقاں اُتے  مشتمل ہیگی اے ۔  ” میرے اگے تُوں دوجیاں خُداواں نوں نہ منیں ۔تُوں اپنے لئی کوئی ہتھ نال گھڑی ہوئی مورت نہ بناویں ۔ تُوں خُداوند اپنے خُدا دا ناں بے فائدہ نہ لویں ۔تُوں خُداوند اپنے خُدادے حکم مطابق سبت دے دن نوں یاد کرکے پاک منیں ۔اپنے باپ تے ماں دی عزت کریں ۔ تُوں خُون نہ کریں ۔ تُوں زنا نہ کریں ۔ تُوں چوری نہ کریں ۔ تُوں اپنے گوانڈھی دے خلاف جھوٹی گواہی نہ دیویں ۔ تُوں اپنے گوانڈھی یاں اوہدے گھر دے مال دا لالچ نہ کریں ۔“  پہلے ۴ حکم اوہ حکم ہیگے نیں جنہاں دا تعلق خُدا نال ہیگااے ۔ایناں حکماں دے بعد ۵ ویں حکم توں لَے کے ۱۰ ویں حکم تیک اوہ حکم ہیگے نیں ، جنہاں دا تعلق انسان نال ہیگااے ۔ پر کیہ بدن شریعت دا آکھا منن لئی خوش ہیگااے ؟
ایتھے سڑکاں اُتے پیدل ٹُرن والیاں دی حفاظت لئی سڑک پار کرن لئی چٹے رنگ دیاں لائناں بنائیاں ہوندیاں نیں ۔پر بدن کدی وی ٹریفک قانوناں مطابق عمل نئیں کرنا چاؤہندا ۔ فیر وی ، لوک ایس ڈر نال ایناں لائناں اُتے ٹُر کے سڑک پار کردے نیں پئی دوجے لوک اوہناں نوں ویکھدے پئے نیں ۔ اصل وچ ، اوہ قانون دا آکھنا مننا ای نئیں چاؤہندے ۔ ایس لئی جدوں سجے کھبے کوئی وی نئیں ہوندا تاں اوہ سڑک دے اشاریاں نوں توڑ کے سڑک پا ر کر جاندے نیں ۔
بدن اپنے آپ پاپ کردااے ۔ جے اوہ چنگے بھلے پڑھے لکھے نیں ،تاں بھاویں لوک اوہناں نوں ویکھن یاں نہ ویکھن اوہ ٹریفک قانون مطابق چلن گے ۔ فیروی، اوہ صرف بدن دےراہیں ای اینوں منن گے ۔ اسیں تاں ٹریفک قانون مطابق سڑک پار کرن نوں چنگا نئیں سمجھدے تے جناں ہو سکے ایہدا آکھا نہ منن دی ہمت کردے آں ۔
تاں فیر ، خُدا دا سانوں شریعت دین دا کیہ مقصد ہیگااے؟ شریعت دے راہیں پاپ دی پچھان ہی ہوندی اے (رومیوں ۳:۲۰)۔شریعت دے راہیں ،سانوں پتہ لگدااے پئی اسیں اینے پاپی ہیگے آں ،جنہاں سدا ۱۰حکماں  داآکھا نئیں منیا اے ۔ اسیں سدا پاپ کیتے نیں ۔ شریعت ساڈے توں چاؤہندی اے ،اسیں چنگے کم کریے تے بدیاں توں بچیے ۔ فیر وی ، ساڈےبدن نوں سدا  پاپ کرن ول کھِچ پیندی اے ،کیوں جے ایہہ شریعت نوں منن توں بوہت ماڑا ہیگااے ۔ پاک بائبل دسدی اے پئی راستباز ایمان نال جیوندا رہوےگا ۔ فیر وی ، راستباز جیہڑےبدن رکھدےنیں ،کویں ایمان دے راہیں  جیوندے رہ سکدے نیں ؟ اوہ اپنے بدن وچ شریعت مطابق وی نئیں رہ سکدے تاں اوہ کویں جیوندے رہن؟   راستباز
خُدا اُتے یقین دے راہیں جیوندا رہندااے ۔
رُوح خُدا دی مرضی پچھے چلنا چاؤہندی اے ،پر بدن خُدا دے ۱۰ حکماں دیاں ساریاں شقاں دا آکھا نہ من کے ،سداپاپ کردا اے ۔بدن نوں پاپ ول کھِچ پیندی اے ،تے اوہ اج وی ایہہ پاپ کردااے تے کل وی اینوں دُہراوے گا ۔ ایتھے کُجھ ایہو جیہے پاپ وی ہیگے نیں ،جنہاں نوں بدن دوجیاں پاپاں توں چنگیا ں جان دااے ۔ بندے دا بدن ساری عمر پاپ کردااے ۔کیہ ایہہ سچ ہیگا اے یاں نئیں ؟
 آؤ ۵ ویں حکم نوں غور نال ویکھیے ،  ”  اپنے ماں تے باپ دی عزت کریں “ ایہہ مکمل چنگی گل ہیگی اے ،تے بھاویں لوک ایہدے اُتے عمل کرن دی ہمت کردے نیں تاں وی اوہ ہر ویلے ایہدے اُتے قائم نئیں رہ سکدے ۔ ایس لئی اسیں ایہدے بارے گل کرنی بند کر کے ، اگلے حکم دی گل کردے آں ،ایہدے توں اگلا حکم ہیگااے  ” تُوں خون نہ کریں۔ “ ساڈے وچوں ہر کوئی کسے نہ کسے نوں اپنے خیالاں وچ قتل کر دیندااے ،پر کُجھ ایہو جیہے لوک وی ہیگے نیں جیہڑے اصل وچ دوجیاں دا خون کر دیندے نیں ۔ایس لئی ، ایہدے توں اگلے حکم دی گل کردے آں ،کیوں جے خون کرنا بوہت وڈا پاپ ہیگااے  ۔ ایہدے توں اگلے حکم ایہہ ہیگااے ،  ”  تُوں زنا نہ کریں“ تے  ”  تُوں چوری نہ کریں۔ “ ایہہ ایہو جیہے پاپ ہیگے نیں جیہڑے ساڈی جندڑی وچ ہر دیہاڑے وکھالی دیندے نیں ۔ کئی لوکاں نوں چوری تے زناکاری کرن دی عادت ہوندی اے ۔ اوہناں نوں ایہہ پاپ کرن دی عادت پَے جاندی اے ۔ کیہ اوہ پرائی زنانی دی تمنا نئیں کردے ؟ (بائبل دسدی اے ،پرائی زنانی دی تمنا کرنا وی اک پاپ ہیگااے )۔ اوہ دوجیاں دے مال نوں اوہناں دے اصل تھاں توں ہٹاؤن (چوری کرن )وچ بوہت کاریگر ہیگے نیں۔ بدن جدوں وی چاؤہندااے  ایہو جیہے بھیڑے کم کردااے ۔
آؤ فرض کریے ، پئی اسیں ایناں ۱۰ حکماں دے پاپاں وچوں صرف اک یاں دو قسماں دے پاپ کردے آں ۔ کیہ اِنج کریاں اسیں خُدا دے اگے راستباز بن سکدے آں ؟ نئیں ،اِنج نئیں ہو سکدا ۔ اسیں خُدا دے اگے بدن راہیں نہ تاں سچے ہیگے آں تے نہ ای  راستباز ہیگے آں ،کیوں جے نکے توں نکا پاپ وی اک پاپ ہیگااے ۔بدن گھڑی مُڑی پاپ کردااے ۔ایہہ اج وی پاپ کردا اے تے کل وی تے اوس ویلے تیک پاپ کردا رہوے گا جدوں تیک اسیں مر نہ جائیے ۔ بدن ساڈی مدد نئیں کر سکدا سگوں جدوں تیک اسیں مر نہ جائیے ،ایہہ خُدا دے اگے پاپ کردا رہندا اے ۔سو ،کیہ تسیں خُدادے اگے اک دن لئی وی پاک یاں کھرے ہیگے او ؟ آؤ بدن نوں رُوح توں وکھ کر کے ایہدے ول دھیان کریے ۔ کیہ تسیں بدن دے راہیں کامل بنن لئی خُدا دے اگے کدی پاپ نئیں کیتا ؟ ہر کوئی جدوں اپنے منجے اُتے بھیڑے خیال سوچدااے  تاں او ہ پاپ کردااے ۔ ایتھوں تیک پئی اپنے سفنیاں ،خیالاں وچ سوہنیاں زنانیاں دے بارے بھیڑے خیال سوچیاں ای اوہ پاپی بن جاندااے ،اوہ اپنے گندے خیالاں توں مزے لیندانیں ۔ اسیں سارے  پاپ کردے آں۔
جو کُجھ وی  خُدا سانوں دسدااے  بدن او ہ کم نئیں کردا تے جو کُجھ اوہ کرن توں منع کردااے بدن اوہ کم کردااے ۔ بھاویں ساڈے پاپ مکائے گئے نیں ،تاں وی ساڈا بدن اوہو ای اے ۔کویں اسیں کامل بن سکدے آں ؟ جے ساڈا بدن ادھورااے تاں فیر پاک ہون دا کیہ طریقہ اے ؟ پر ، کیہ ایہہ یسوع مسیح دے راہیں سوکھا نئیں ہیگااے ؟
اسیں اوہ ہاں جنہاں نیں ایہہ پاپ کیتے نیں ۔کیہ اسیں یسوع دے اگے پاپ کیتے نیں ؟ —آہو ، اسیں پاپ کیتے نیں — کیہ اسیں ہُن وی پاپ کردے آں یاں نئیں ؟ — آہو اسیں کردے آں ۔ — کیہ اسیں پاپ کردے رہندے آں ؟ — آہو ، ایہہ ساڈے توں ہو جاندااے — اسیں جدوں تیک بدن دے تنبُو وچ ہیگے آں تاں ساڈے مرن دیہاڑے تیک کوئی نہ کوئی غلطی ساڈے توں ہوندی رہوے گی ۔ اسیں ایہو جیہے پاپی آں جیہڑے اپنی آخری ساہ تیک کوئی نہ کوئی غلطی کر ای لیندے آں تے پاپ کرن توں رُکدے نئیں ۔ فیر کویں اسیں اپنے سارے پاپاں توں مکتی پا سکدے آں ؟ سب توں پہلاں ، جے تسیں نویں سریوں نئیں جمے ،تاں تہانوں چاہی دااے پئی تسیں خُدا دے اگے اپنے پاپاں دا اقرار کروتاں پئی اوہ تہاڈے پاپ مکادیوے ۔ مکتی پاؤن دے بعدوں ،سانوں اپنے پاپاں دا اقرار کرن دی لوڑ نئیں ہیگی ،پئی اسیں پاپی ہیگے آں ۔ پر اسیں منیا اے پئی اسیں پاپ کیتے نیں ۔ جدوں اسیں پاپ کیتے نیں تاں سانوں شریعت دے راہیں اپنے آپ اُتے دھیان کر ن دے بعد اپنے پاپاں نوں مننا چاہی دااے ، ایتھوں تیک پئی جے اسیں چنگیاں بنن لئی کدی کدی بدن نال چنگے کم و ی کردے آں ۔لازمی ہیگااے پئی پاپ دے پاپ ہون دا اقرار کریے ۔
 
 
اسیں ایمان نال پاک بنے آں
 
فیراسیں ایہہ اقرار کرن دے بعد پاپ دا مسئلہ کویں نبیڑ سکدے آں ؟ کیہ اسیں ایس ایمان نال  پئی یسوع نے یوحنا بپتسمہ دین والے کولوں بپتسمہ پاؤن دے راہیں ساڈے سارے پاپاں نوں چُک لیا تے ساڈی مکتی لئی اوہنے سزاپائی تے اوہ سانوں بچاؤن لئی سولی اُتے چڑھ گیا ؟—آہو— اسیں ایمان رکھدے آں پئی اوہ سارے پاپ جیہڑے اسیں بدن راہیں کیتے سَن ،جدوں یسوع نے بپتسمہ لیا ،تاں اوہنے اپنے اُتے لد لَے سَن ۔ فیر ایس جملے دا کیہ مطلب ہیگااے پئی ، ” راستباز ایمان نال جیوندا رہوےگا ؟  “
رُوح اُتے ایمان رکھو نہ پئی بدن اُتے ،صرف خُدا اُتے ،اوہدے کلام اُتے تے اوہدی شریعت اُتے ایمان لیاؤنا سانوں پاک کرسکدااے تے اوہدے اُتے ایمان لیاکے ای اسیں پا ک ہو سکدے آں ۔ کیہ سچ ہیگا یاں نئیں؟ آہو ایہہ سچ ہیگااے ۔ جے اسیں پاپاں توں معافی پا کے راستباز بن جاندے آں تاں وی بدن حالے تیک ماڑا تے کامل ہون توں بوہت دُور ہیگااے ۔ پاک بائبل دسدی اے ، ” کیوں پئی راستبازی لئی  ایمان لیاؤنا دلوں ہوندااے تے مکتی پاؤن لئی اقرار موہنھ توں کیتا جاندااے ۔ “ (رومیوں ۱۰:۱۰)۔پر بدن سدا ماڑا تے ادھورا ہیگااے بالکل اوسے طرحاں جویں پولُس دا سی ۔ ایس لئی ، نہ تاں اسیں راستباز بن سکدے تے نہ ای ایس بدن راہیں راستبازی تیک اَپڑ سکدے آں ۔ بدن راستباز جندڑی بسر نئیں کرسکدا ۔  
اوہ اِکلا راہ جیہدے راہیں راستباز جیوندا رہ سکدااے ،صرف خُدا اُتے ایمان لیاؤنا، مطلب اے، پاپاں توں معافی تے اوہناں نعمتاں نوں مننا اے جیہڑیاں خُدا نے سانوں دتیاں نیں ۔ سو اسیں خُدا دی اوس راستبازی اُتے ایمان لیاؤن دے راہیں پاک گنے جا سکدے آں تے اوہدی راستبازی اُتے یقین رکھ کے جیہڑی اسیں اوہدے کولوں پائی اے راستبازبن سکدے آں، تے ہمیش دی حیاتی پا سکدے آں ۔ سانوں ہمیش دی حیاتی خُدا اُتے ایمان لیاؤن دے راہیں ملدی اے ۔ایس لئی بائبل دسدی اے پئی راستباز ایمان رکھن نال جیوندا رہوےگا ۔اسیں ایمان دے راہیں پاک بن دے آں تے ایسے ایمان وچ رہندیاں اپنی حیاتیاں گزار کے خُدا دی راستبازی پا لیندے آں ۔ بھاویں بدن پاپی اے تاں وی ایہہ عقل دے گھاٹے دے سبب پاک بنن دی ہمت کردا اے ،بھاویں اِنج ہو نئیں سکدا ۔اسیں صرف تاں ای جیوندے رہ سکدے آں جدوں اسیں اوہنوں اپنا خُدا ، اپنا مالک ،تے اپنا ایالی جان کے  ایمان  رکھدے ہویاں خُداکولوں مدد پاؤندے آں ۔
ایس لئی پولُس رسول فرماؤندااے ، ” راستبازایمان رکھن نال جیوندارہوے گا  “ اوہ پُرانے عہد نامے وچوں حبقوق دی کتاب وچوں ایہہ حوالہ دیندااے ۔ اوہ ایہہ وی آکھدااے ، ”  ایس لئی پئی اوہدے وچ (خوشخبری )خُدا دی راستبازی ایمان نال تے ایمان لئی ظاہر ہوندی اے ۔  “خُدا دی  راستباز ی کیہ ہیگی اے ؟ کیہ ایہہ بالکل بندیاں دی راستباز ی وانگر ہیگی اے ؟کیہ ایہہ ساڈے پاپاں نوں تھوڑا تھوڑا گھٹ کر کے سانوں پا ک بناوے گی ؟ کیہ اسیں کامل ہیگے آں کیوں جے اسیں یسوع اُتے یقین کرکے تے ایمان لیا کے ہور کوئی پاپ نئیں کردے ؟
صرف خوشخبری وچ ، خُدا دی راستبازی نظر آؤندی اے تے صرف ایہو ای سانوں پاپاں توں مکتی دے راہیں پاک بنا سکدی اے کیوں جے اسیں بدن دے راہیں کدی راستبازنئیں بن سکدے ۔ ” ایس لئی پئی اوہدے وچ خُدا دی راستبازی ایمان نال تے ایمان لئی ظاہر ہوندی اے ۔  “  ایہدا مطلب اے پئی اسیں صرف ایمان دے راہیں راستباز بن  دے آں ۔ راستبازخُدا اُتے ایمان لیا کے راستبازبنن دے بعد جیوندارہ سکدا اے ۔ راستبازخُدادی راستبازی نوں پاکے تے ایمان رکھ کے اوہدیاں برکتاں پاکے راستبازبن دا اے ۔
 
 
لازمی ہیگا اے پئی اسیں ایمان رکھ کے جیوندے رہیے
 
ایمان وچ جیونا ایسا طرحاں ہیگا اے پئی اک بندہ ریت دیاں کنکراں توں وی بوہت آسانی نال ٹوٹے ٹوٹے ہو جاوے ، ایس گل توں ہٹ کے، بھاویں او ہ کناں ای تگڑا کیوں نہ ہووے  ۔اوہ آکھدا اے   ” پئی خُداوند میَں اِنج کراں گا ۔ “ فیروی، بدن اِنج نئیں کر سکدا ۔اسیں پاپاں توں معافی پاؤن دے بعدخُداوند اُتے ایمان لیاؤن تے پاپ دی غلامی  توں چھٹکارے دے کلام تے شریعت اُتے ایمان لیا کے جیوندے آں ۔ جے اسیں ایمان دی جندڑیاں دی اَگوائی بوہتے چِر تیک کریے تاں کیہ بدن وچ چنگیاں عادتاں ودھ سکدیاں نیں تے سوہنا بن جاندااے ؟ نئیں کدی نئیں ۔ ایس لئی ، ایمان دی حیاتی ساری دی ساری خُدا اُتے ایمان رکھن دےراہیں ملدی اے ۔ اسیں خوشخبری اُتے پُختہ ایمان دےراہیں راستباز بن دے آں تے خُدا اُتے ایمان لیاؤن دے راہیں اسیں اوہدیاں نعمتاں پا کے جیوندے آں۔
راستباز ایمان رکھ کے جیوندارہوے گا ۔اسیں خُدا اُتے ایمان لیا کے جیوندے آں ۔ کیہ تسیں ایس گل اُتے ایمان رکھدے او؟— آہو— کیہ تسیں اپنے بدن دے وکھ وکھ کماں تے طور طریقیاں نوں جان گئے او؟ کیہ تسیں سوچ دے او ،   ’  میَں من دا ہاں پئی میرے بدن دا صرف ۲۰٪ حصہ نیک ہیگا اے بھاویں میرے بدن دے باقی حصے حالے تیک نیک نئیں ہیگے ؟ ‘  پر پاک بائبل دسدی اے پئی راستباز ایمان رکھ کے جیوندا رہوےگا ۔ خُدا آکھدااے پئی کوئی وی بدن راہیں جیوندا نئیں رہ سکدا ، ایتھوں تیک پئی ۱٪.۰وی نئیں۔ کیہ تسیں خُداوند دی دوبارہ آمد تیک پاک رہنا چاؤہندے او تے بدن راہیں تھوڑی جیہی وی آس رکھدے او؟
ایہدے ہُندیاں پئی اسیں کنے ای پاپ کیتے نیں ،اسیں یسوع اُتے ایمان لیاؤن دے راہیں راستباز بن سکدے آں ۔ جے اسیں یسوع اُتے ایمان نئیں رکھدے تاں اسیں بھاویں کنے ای نیک کیوں نہ ہویے ،ایہدے ہُندیاں اسیں بدن وچ پاپی ہیگے آں ۔ جدوں اسیں یسوع اُتے ۱۰۰٪ ایمان رکھدے آں تاں اسیں پاک بن جاندے آں پر جے اسیں یسوع اُتے ٪ ۱۰۰ ایمان نئیں رکھدے تاں اسیں پاپی بن جاندے آں ۔ کیہ جے اسیں تھوڑے پاپ کریے تاں خُدا خوش ہوندااے ؟ جے اسیں بدن راہیں راستباز بنیے تاں کیہ ایہدے توں خُداخوش ہوندا اے ؟  
 
 
خُدادی راستبازی سانوں سچے بناؤندی اے
 
رومیوں ۳:۱ ۔ ۸نوں ویکھیے ، ” سویہودی کاہدے لئی ساریاں توں ودھیا اے تے ختنے دا کیہ فائدہ ؟ ہر طرحاں توں ودھیا ۔ سب توں ودھیا ایہہ گل پئی خُدا دا کلام اوہناں دے حوالے کیتا گیا ۔ جے کئی بے وفاہوئے تاں کیہ ہویا ؟ کیہ اوہناں دی بے وفائی خُدا دی وفاداری نوں جھوٹیاں کر سکدی اے ؟ بالکل نئیں ۔ سگوں خُدا سچارہوے تے ہر اک بندہ جھوٹا ۔ ایس لئی لکھا اے پئی توں اپنیاں گلاں وچ سچا بنیں تے اپنی ہر اڑاؤنی اُتے فتح پاویں ۔ جے ساڈیاں بھیڑیاں کرتُوتاں خُدادی راست بازی دی نیک وکھاؤندی اے ،تاں اسیں کیہ آکھیے ؟ کیہ ایہہ پئی خُدا بے انصاف ہیگااے جنہوں غصہ آؤندااے ؟ (میَں ایہہ گل بندیاں وانگر آکھداہاں)۔بالکل نئیں ۔نئیں تاں خُداکویں جگ دا انصاف کرے گا ۔ جےمیرے جھوٹ دے سبب خُدادی سچیائی اوہدے جلال لئی بوہتی نظر آئی تاں فیر کاہدے لئی پاپیاں وانگر مینوں حکم دتا جاندااے؟ تے اسیں کیوں بدی نہ کریے تاں پئی بھلیائی پیدا ہووے ؟ ایس لئی ساڈے اُتے ایہہ توہمت لائی وی جاندی اے تے کئی آکھدے نیں پئی ،ایناں دا ایہو ای قول ہیگااے ،پر ایہو جیہاں دا قصور وار بننا انصاف ہیگااے ۔“ (رومیوں۳:۱ ۔ ۸)
پولُس رسول نے فرمایا ، ”جے میرے بدی خُدا دی راستبازی دی چنگیائی وکھاؤندی اے تاں اسیں کیہ آکھیے ؟ کیہ ایہہ پئی خُدا بے انصاف ہیگااے جنہوں غصہ آؤندااے ؟  “ کیہ خُدا ناراست تے غلط ہیگا اے جیہڑا اک بندے نوں جیہدا بدن مرن دیہاڑے تیک پاپ کردارہندااے ،نوں اپنے فضل نال چھڈا لیندااے ۔ پولُس رسول نے اوہناں نوں جواب وچ کیہ آکھیا ،کیہ اسیں بوہتے ماڑے نظرآئیے تاں پئی خُدا دی راستبازی جیہڑی سانوں ساڈے سارے پاپاں توں بچاؤندی اے ،ہور ودھے۔ پولُس رسول اوہناں نال گل کردااے جیہڑے ایس خیال وچ گواچے ہوئے نیں پئی اک بندہ جیہڑا اپنی ساری جندڑی پاپ وچ ڈگیا رہندااے کویں پاک بن سکدااے؟ اوہ فرماؤندااےبندے دی کمزوری خُدا دی راستبازی وکھاؤندی اے ۔ انسانی پیڑھی دا بدن اوہدی آخری ساہ تیک پاپ توں بچن وچ اوہدی مدد نئیں کر سکدا سگوں اپنی کمزوری دے سبب خُدا دی راستبازی دی وڈیائی کردا اے ۔
جے کوئی اپنی راستبازی تے اپنی ہمت نال راستباز بن دااے تاں فیر خُدا دی راستبازی بے معنی ہیگی اے ، کوئی وی خُدا دے راہیں ۹۷٪ تے ۳٪ وی اپنے کماں نال مکتی نئیں پا سکدا۔ پولُس آکھدا اے ،خُدا اِکلا ای اوہناں ساریاں نوں جیہڑے اپنے مرن تیک پاپی ہیگے نیں  یسوع اُتے ایمان لیاؤن دے سبب اوہناں نوں کامل مکتی دیندااے ۔ایس طرحاں ساڈی بدی خُدا دی راستبازی دا چنگیاں ہونا دسدی اے ۔ جدوں تیک بدن مر نئیں جاندا ہر دیہاڑے پاپ توں بچن وچ مدد نئیں کر سکدا ،ایتھوں تیک پئی ایہہ اک دیہاڑے لئی وی کامل ہون دے لائق نئیں ہیگا ۔ سچ ایہہ ہیگا اے پئی یسوع نے خُدا دی راستبازی دے بوہتے ہون نوں وکھا کے ایہناں ادھورے پاپیاں نوں کامل مکتی دتی اے ۔ایس لئی پولُس رسول فرماؤندااے ،  ” ایس لئی ساڈے اُتے ایہہ توہمت لائی وی جاندی اے تے کئی آکھدے نیں پئی ،ایناں دا ایہو ای قول ہیگااے ،پر ایہو جیہاں دا قصور وار بننا انصاف ہیگااے ۔“ (رومیوں۳ : ۸) ۔
کیہ اسیں خُدا دے راہیں راستباز بن سکدے آں ؟ کیہ ساڈا بدن پاپا ں توں معافی پاؤن دے بعد کامل  ہو سکدا اے ؟ نئیں بدن اِنج نئیں کرسکدا ۔ کیہ میَں تے تسیں جگ دے باقی سارے لوکاں نوں ایس سوال توں باہر کڈھ سکدے آں ،پئی بدن دے راہیں راستباز بنیے ؟—  نئیں—   پرکیہ  خُدا وند نے سانوں  کامل مکتی دتی اے ؟—  آہو — خُدا وند نے سانوں ساڈے سارے پاپاں توں   کامل مکتی دتی اے۔ جے اسیں یسوع اُتے سچے دل نال ایمان لیاؤندےآں تاں کیہ اسیں فیر وی پاپاں نال لبڑے ای آں — نئیں — اسی بدکار ای کیوں نہ ہوئیےجے اسیں یسوع اُتے سچے دلوں ایمان لیاندااے تاں فیر اسیں پاک ہیگے آں۔
خُداوند نے فرمایا ، ”  فیر تسیں سُنیا ای اے پئی تہاڈے توں پہلیاں نوں آکھیا گیا سی پئی جھوٹی قسم نہ کھاویں سگوں اپنیاں قسماں خُداوند لئی پوریاں کریں ۔ پر میَں تینوں آکھدا ہاں پئی بالکل قسم نہ کھاویں۔ نہ تاں اَسمان دی کیوں جے اوہ خُدا دا تخت ہیگااے۔ نہ دھرتی دی کیوں جے اوہ اوہدے پیراں دی چوکی ہیگی اے۔نہ یروشلیم دی کیوں جے اوہ وڈیرے بادشاہ دا شہر ہیگااے ۔ نہ اپنے سِر دی قسم کھاویں کیوں جے تُوں اک وال نوں وی چِٹا یاں کالا نئیں کرسکدا ۔سگوں تہاڈی گل ہاں ہاں یاں نئیں نئیں ہووے کیوں جے جو کُجھ ایہدےتوں بوہتا اے اوہ بدی نال ہیگااے ۔ “ (متی۵:۳۳ ۔ ۳۷) قسم کھانا آپ  اک پاپ ہیگااے کیوں جے تسیں جیہڑی قسم کھاندے او اوہنوں پوریاں نئیں کرسکدے ۔ ایس لئی بعدوں کُجھ کرن لئی نہ تاں قسم کھاوو تے نہ ای ضمانتی بنو۔ صرف اوہدے کلام اُتے یقین رکھو ،تاں فیر تسیں جیوندے رہووگے ۔ جے اسیں اوہدی راستبازی اُتے ایمان رکھیے تاں تسیں راستباز بن سکدے او ، تے جے تسیں ایہدے اُتے ایمان رکھو تاں خُداوند لازمی تہاڈی مدد کرے گا ۔
ایتھے بوہت ساریاں پُٹھیاں تعلیماں ہیگیاں نیں ۔اسیں بدن نوں اِکو تھاں اُتے رکھدے آں تے اِنج کرکے اسیں سزا پاؤندے آں کیوں جے اسیں بدن دے تنبُو وچ ہیگے آں ۔ ایس لئی ساڈے وچکار اک جانچ  کرن والا ہیگا اے جیہڑا خُدا دے کلام اُتے ایمان رکھن وچ نال نئیں ہیگا اے ۔ساڈے وچکار دو انصاف کرن والے ہیگے نیں ۔اک اسیں آپ تے دوجا ساڈا خُداوند یسوع المسیح ہیگااے ۔ایس لئی ایہہ دونویں ساڈے اُتے حکم چلاؤں دی جُرات کردے نیں ۔ اسیں بدن دی شریعت ول بوہت دھیان کرلیندے آں تے اِنج ای سزا پاؤندے آں۔کیوں جے اسیں بدن وچ ہیگے آں ۔ بدن سانوں دسدااے ، ” تسیں چنگے ہیگے او ،بھاویں تسیں پاپ کردے رہوو۔ جے تہاڈا بدن۱۰۰٪ راستباز نئیں تاں میَں تہانوں راستباز مناں گا ۔ “بدن دی جانچ کرن والا سدا تہانوں شاباش دیوےگا ۔
پر ، خُدا دی راستبازی نوں جانچن والا چاؤہندااے پئی اسیں ۱۰۰٪پاک ہوئیے ۔اوہو ای پاک ہیگے نیں جنہاں نے ایمان دے راہیں پاپاں توں معافی پا لئی اے تے ایمان دے راہیں راستباز  بن گئے نیں ۔ ایس لئی ، اوہدی خوشخبری  اُتے ایمان رکھو جیہڑی پہلوں ای خُدا دی راستبازی تیک اَپڑ گئی اے ۔ اسیں پہلاں ای راستباز بنا دتے گئے آں ،جیہڑے خُدا اُتے ایمان لیاؤندے نیں اوہ سچ مُچ جیوندے رہن گے ۔ اوہ خُدا دی مدد نال مبارک بن دے نیں ۔ راستباز ایمان رکھیاں جیوندا رہوے گا ۔ ایہدا مطلب ہیگااے پئی بے ایمان تے اوہ جیہڑے بدن وچ جیوندے نیں ،جیوندے نہ رہن گے ۔ میَں تہانوں اک بوہت وڈی فوٹوڈا اک نکا جیہا ٹوٹا ای دسدا پیا ہاں ۔ میَں تہانوں گھڑی مُڑی ایہہ دسدا پیاہاں تے ایہدامطلب  کھول دے دسدا پیا ہاں ، اوسے طرحاں جویں اسیں ہڈیاں نوں لگاتار اوس ویلے تیک اُبالدے آں ، جدوں تیک ایہدا چٹا شوربا نئیں بن جاندا ۔
 
 
سانوں ایمان لیاؤن دی لوڑ ہیگی اے
 
پاک بائبل نوں بوہت جانن دی لوڑ ہیگی اے ،پر سانوں ایہہ جانن دی بوہت لوڑی ہیگی اے پئی اسیں کناں ایمان رکھدے آں ۔ کُجھ لوک پاک کتاب وچ صرف خُدا دے لوکاں نوں بناؤن اُتے ای یقین رکھدے نیں۔ کُجھ لوک دونواں ، خُدا دے اَسمان تے دھرتی نوں بناؤن تے یسوع مسیح دے صرف  اصل پاپاں نوں دھون اُتے  یقین کردے نیں۔ اوہناں دا ایمان ہیگااے پئی اوہناں دے ہر دیہاڑے دے پاپ ہر دیہاڑے مک جان گے ۔اوہ بدن دے شریعت مطابق اپنے آپ نوں آپ قصوروار بناؤندے نیں ۔ اسیں کناں ایمان رکھدے آں ؟ راستباز ایمان رکھ کے جیوندا رہوے گا ۔ راستبازبننا تے جیوندے رہنا صرف ایمان راہیں ای  ہو سکدااے ۔مُڈھ توں لَے کے اخیر تیک سانوں خُدا اُتے ایمان رکھن دی لوڑ ہیگی اے ۔
ایس لئی تسیں کنا ں ایمان رکھدے او ؟کیہ تسیں کدی دنیاوی خیالاں وچ پھسیا ں ہوئیاں ،ایہہ سوچدیاں ہویاں اپنےآپ نوں جانچیا اے  ”  میَں بوہت نیک ہیگا واں  “ میرا بدن بوہت چنگا اے ،یاں  ’ میَں ‘ ایمان لیاؤن وچ بوہت ماڑا ہیگاواں ۔کیہ تسیں اپنے آپ نوں جانچدیاں ہویاں ،اپنے آپ نوں اَج ۸۰٪ تے اگلے دن ۹۵٪نمبر دتے نیں ۔ پر ایہہ سوچدیاں ہویاں پئی جے میَں نہ جم دا تاں میرے لئی چنگا ہوندا ، اگلے دناں وچ صرف ۵٪نمبر دتے ہون ، کیہ تسیں اِنج سوچدے او ؟— آہو — میَں اِنج کرداہاں ۔
کئی واری تاں میَں سنجیدگی نال اِنج سوچدا ہاں ۔ ایتھوں تیک پئی جدوں میَں اپنے آپ نوں تسلی دیندا ہوندا ہاں ، تاں وی میَں ایہہ سوچداہاں ، ” جے میَں خُدا وند نوں نہ جان دا تے نہ اوہدے اُتے ایمان لیاؤندا تاں ایہہ میرے لئی چنگا ہوندا۔ ایمان دے راہیں خُدا دے ناویں لائی ہوئی حیاتی بسر کرنا بوہتا اوکھا لگدااے ۔ حالے تیک ایہہ بوہت ڈاہدا کم ہیگااے ۔ میَں گزرے ویلے نوں اکٹھیاں کرن تے آؤن والے ویلے نوں ویکھن لئی شک وچ پیا ہاں ۔ میَں ایمان وچ حیاتی بسر کرن توں حالے تیک کسے نہ کسے طرحاں تعریف کرن دے لائق ہیگاواں ۔ پر خُداوند ہُن توں  میَں  تیرے نال کامل طور اُتے ٹُرن دے لائق نہ ہوواں گا ۔ جدوں توں میَں تینوں جانیاں اے ،مینوں پاپ دی پچھان ہو گئی اے ۔ جدوں توں میَں تینوں جانیاں اے ،اوس ویلے توں بوہتے سارے خیال تے سوچاں میرے دلوں باہر آئے نیں ۔ میَں تینوں بالکل جانیوں اڈ ای ، اے خُداوند ،تھوڑا جیہا تیرے پِچھے ٹُریا ہاں ۔ پر ہُن میرے دل وچ تیرے ہوربوہتا پِچھے ٹُرن لئی، مینوں اپنے آپ اُتے کوئی اعتبار نئیں رہیا  ۔کیوں ؟ کیوں جے مینوں پتہ ہیگا اے پئی خُدا پاک تے کامل ہیگااے ۔ اوہ ! خُداوند ، میَں ہوربوہتا تیرے پِچھے نئیں ٹُر سکدا ۔ مینوں یقین نئیں ہیگااے ۔“
ایس لئی، خُداوند سانوں دسدا اے پئی ایمان رکھدے ہویاں جیوندے رہیے ،کیوں جے اوہ سانوں بوہت جان دااے ۔ا وہ آکھدااے ،  ” ایہہ لازمی ہیگا اے پئی تسیں راستباز رہوو تے ایمان دے راہیں مبارک بنو۔ تہاڈے سارے پاپ یسوع مسیح اُتے اوہدے بپتسمے راہیں لد دِتے گئے سَن ۔ جدوں وی میَں تہاڈے بدن نوں شریعت دے میچے نال میچ دا ہاں تاں تسیں سدا پاپ کردے او ۔ ایس لئی ایہہ من لوو پئی تسیں پاپ روکن دی ہمت نئیں کرسکدے ۔ کیہ تہاڈا مکتی داتا تہاڈے سارے پاپ چُک کے لَے گیا اے یاں نئیں ؟ — آہو ، اوہنے اِنج کیتا اے — کیہ تہاڈے سارے پاپ تہاڈے مکتی داتا اُتے لدے گئے سَن یاں نئیں ؟—  آہو—  تاں کیہ تسیں پاپ وچ ہیگےاوہ یاں نئیں ؟ —  نئیں—  کیہ خُداوند نے تہانوں مکتی دتی اے یاں نئیں ؟—   آہو—  تاں فیر ڈاہڈے تےکالے دن نُور نال چمکدیاں دناں وچ ، اک گیت دے اوہناں بولاں وانگر بدل جان گے پئی :”اَج میری رُوح وچ نُور سورج وانگر لشکارے ماردااے۔ “
 
 
 اسیں دوبارہ پاپی نئیں بن سکدے
 
جدوں اسیں آؤن والے ویلے بارے سوچدے آں تاں ہو سکدا اے پئی بے آس ہوئیے ،پرجدوں اسیں ایمان نال خُداوند ول ویکھدے آں تاں ایہہ چمکدا رتے روشن ہیگااے ۔ ایس لئی، خُدا آکھدا اے پئی راستبازایمان نال جیوندارہوےگا کیہ تسیں ایہدے اُتے ایمان رکھدے او؟—  آہو —  اسیں ایمان رکھ  کے  ای مکتی  پائی اے تے ایسے دے راہیں جیوندے وی آں ۔کیہ اسیں ایہدے اُتے ایمان رکھدے آں ؟ اسیں خُدا اُتے ایمان لیاکےحیاتی پاؤندے آں ۔صرف  راستباز ای ایمان رکھ کے جیوندارہوےگا ۔ کیہ تسیں ایہہ ایمان رکھدے او ؟—  آہو —  کیہ تسیں بدن نوں سوار کے خُدا دی راستبازی نوں ٹھیک رکھ سکدے او ؟ — نئیں— جدوں بدن بدی کردااے تاں کیہ خُدا دی راستباز ی بے اثر ہو جاندی اے ؟ کیہ اسیں فیر پاپی بن جاندے آں؟ — نئیں —
پولُس رسول نے گلتیوں ۲:۱۸وچ فرمایا اے ،  ”  کیوں جے جو کُجھ میَں ڈھا دتا اے جے اوہنوں فیر بناواں تاں اپنے آپ نوں قصوروار بناؤنداہاں ۔ “ جیہڑابندہ ایمان رکھدا اے پئی اوہدے پاپ بپتسمے راہیں یسوع مسیح اُتے لد دتے گئے سَن تے ایہہ پئی اوہدے پاپاں لئی سولی اُتے اوہنے دُکھڑے جرے ،ایہو جیہا بندہ کدی وی پاپی نئیں ہو سکدا ۔ اک بندہ جیہڑا یسوع دا منکر نئیں ہوندا،اوسے ویلے پاک تے بےپاپ بن جاندا اے ،ایس لئی پئی اوہدے سارے پاپ یسوع اُتے لدے گئے سَن تےاوہ فیر کدی دوجی وار پاپی نئیں ہوسکدا ۔ کیہ تسیں اوہنوں پا لیا اے ؟ — آہو —  
خُدا جنہے سانوں مکتی دتی اے ہمیش لئی ساڈا خُداوند تے ساڈا باپ ہیگااے ۔ خُدا سداساڈی مدد کردا اے تے جگ دے اخیر تیک ساڈے نال ہیگااے ۔ایہدا سبب ایہو ای اے پئی اوہ آکھدااے ، ”ایمان وچ جیوندے رہوو۔جے تسیں میرے اُتے ایمان رکھوگے تاں میَں تہاڈی مدد کراں گا ۔جیہڑے نویں سریوں جم دے نیں فرشتے آن کے اوہناں دی سیوا کردے نیں ۔“  فرشتے ساڈے تے خُدا وچکا ر سیواکار ہیگے نیں ۔ اوہ خُداوند نوں ساڈے بارے ہر گل دسدے نیں۔ خُدا سانوں اپنے دھئیاں پُتربناؤندااے ۔ اسیں عادت ولوں پاپی ہیگے آں ۔ اسیں بدن دے کماں راہیں کدی راستباز نئیں بن سکدے ،پر اسیں ایمان دے راہیں راستبازبنائے گئے آں ۔
 اسیں خُداوند دا شکر ادا کردے آں ۔ خُداوند ایمان دے راہیں ساڈا ایالی تے باپ بن گیا اے ۔