Проповеди

مضمون 9: رومیوں (رومیوں دی کتاب اُتے تفسیر)

[5-1 باب] رومیوں ۵ باب دا تعارف

دینی پاکیزگی دی تعلیم سچ نئیں ہیگی
 
پولُس ایس باب وچ ایمان دے راہیں منادی کردااے پئی صرف اوہو ای جیہڑے خُدا دی راست بازی اُتے ایمان رکھدے نیں ، ” خُدا نال  میل جول “ رکھدے نیں ۔ ایہدا سبب ایہہ ہیگااے ایس لئی پئی خُداباپ نے یسوع نوں ساڈے لئی بپتسمہ دلوایا تے ایتھوں تیک پئی اوہنے ساڈے لئی سولی اُتے اپنا مہنگا لہو وگا دتا سی ۔
پر،اسیں  بوہتا گواہی دیندے آں پئی اج کل بوہتے مسیحی خُدا نال میل جول نئیں رکھدے ، ایس لئی پئی او خُدا دی راستبازی دے بارے بھورا جنہاں وی نئیں جان دے ۔ایہہ اوہناں بارے سچ ہیگا اے جیہڑے اج کل دی دینی مسیحیت اُتے یقین رکھدے نیں ۔ ایس لئی ، دینی پاکیزگی دی تعلیم خُدا دے اگے ککھ دی نئیں ہیگی اے ۔
ایمان دے راہیں خُدا دی راستبازی نوں پاؤنا ،ایہہ پاکیزگی دی تعلیم اُتے ایمان لیاؤن نالوں بوہتا چنگا ہیگااے ۔ خُدا باپ نے اِنج نئیں آکھیا پئی جے ایمانداراں دے دل پاپاں نال بھرے ہون گے تاں وی اوہ اوہناں نوں مسیح دے لوک سدے گا ۔ خُدا پاپیاں نوں اپنے پُتر بناؤن لئی قبول نئیں کردا ۔خُدا اک بندے وانگر نئیں ہیگااے ۔اوہ مکتی داتا ہیگا اے جیہڑا کدی وی کسےایہو جیہے  بندے نوں اپنے لوکاں وچ نئیں گن دا ،جیہڑا اپنے دل وچ پاپ رکھدا ہووے ۔ خُدا جیہدے اُتے اسیں ایمان رکھدے آں ، قادرِ مطلق ہیگااے ۔کیہ خُدائے قادرِ مطلق تے خُداجیہڑا علم رکھن والا تے ہر کسے نوں ویکھن والا ،ہر جھوٹ بولن والے دے بارے چنگی طرحاں نہ جانے گا ؟ فیر سانوں جاننا تے ایمان لیاؤنا چاہی دااے پئی اوہ اک پاپی مسیحی نوں ،جیہدا ایمان اک غلط ایمان ہیگااے ، اپنے لوک آکھ کے نئیں بلاؤندا۔
ہر کسے نوں خُدا دے اگے وفادارہونا چاہی دااے ۔ پاکیزگی دی تعلیم ،جنہوں لوک غلط طریقے نال جان دے تے اوہدے اُتے ایمان لیاؤندے نیں ،کُجھ ایہو جیہی اے جیہڑ ی خُدا نوں مخول کردی اے ۔ ایس لئی ،سانوں خُدا دی راستبازی دے سچ نوں چنگے طریقے نال سمجھ لین دے بعد یسوع اُتے مکتی داتا وانگر ایمان لیاؤنا چاہی دااے ۔ ایس سچ توں ہٹ کے پئی کیہ کوئی یسوع اُتے ایمان لیاؤندا اے یاں نئیں ،خُدا باپ ایہہ کدی نئیں آکھدا پئی کسے لئی پاپ نوں دل وچ رکھنا بالکل چنگا کم ہیگااے ۔ اوہ ایہو جیہا ہیگااے جیہڑا لازمی طور اُتے پاپیاں نوں اوہناں دے پاپاں دی سزا دیندااے ۔
ایس لئی ،تہانوں پاپ دا مسئلہ حل کرن لئی خُدا دی راستبازی نوں جانن تے اوہدے اُتے ایمان لیاؤن دی لوڑ ہیگی اے ۔خُدا یسوع دے بپتسمے تے سولی اُتے ساڈے ایمان رکھن دا خیال  کرے گا تے ساڈے پاپاں توں سانوں چھڈاوے گا ۔ ایس لئی پئی اسیں خُدا دی راستبازی اُتے ایمان لیاؤندے آں ،ایس لئی خُدا سانوں اپنے لوک بلاؤندا اے ۔ سانوں گل نال لاؤندا تے سانوں برکتاں دیندااے ۔ خُدا باپ ساڈے ٹھیک ایمان نوں اپنی راستبازی وچ قبول کردااے ۔
 
 
خُدا دنیاوی جج نئیں ہیگا اے
 
 خُدا دی راستبازی اُتے ایمان دی نیہ ابرہام دے ایمان اُتے ہیگی اے ،جیہڑا پکا ہو کے  خُدا دے کلام اُتے ایمان لیایا سی ۔بوہتے مسیحی رسمی پاکیزگی دی تعلیم بارے غلط جان دے نیں ،تے ایس طرحاں سانوں چاہی دا اے پئی ایس گل بارے اوہناں نوں کھُل کے سمجھائیے ۔ تہانوں یقین ہیگا اے پئی ایتھے کوئی ایہو جیہی شے نئیں ہیگی ،جیہڑی بالکل ٹھیک ہووے یاں ایس جگ دی کسے وی عدالت وچ ٹھیک انصاف ہوندا ہووے ۔ تہانوں ایہہ گل اپنے ذہن وچ رکھنی چاہی دی اے پئی ایس جگ دا دنیاوی جج سدا فیصلے کرن وچ غلطی کر سکدااے ۔
ایہدا سبب ایہہ ہیگا اے پئی سارے انسانی جج کسے کم دے نئیں ہیگے ،ایتھوں تیک پئی خُدا دی راستبازی نوں نئیں جان دے ،جیہدے وچ سچ تے جھوٹ بارے جانن دا طریقہ ہیگا اے ۔ بوہتے مسیحیاں دا خُدا دی راستبازی دے بارے غلط جھکا ہیگااے جیہڑی سانوں ،  ” ایمان دے راہیں راستباز بناؤندی اے ۔ “ (رومیوں ۵ باب)ایس لئی پئی اپنے  خیال وچ اوہ اوہدی سزا توں بچن دی بالکل ایہو ای دلیل رکھدے نیں پئی اوہ پاپی ہوندیاں ہوئیاں وی بچ جان گے ۔
دینی پاکیزگی دی تعلیم اک غلط فیصلے کرن والی تعلیم ہیگی اے ۔ اِنج ایس لئی ہوندااے ،ایس لئی پئی ایہہ تعلیم بندیاں نیں اپنی سوچ نال بنائی اے ۔ لوک غلط فیصلے کرن وچ بوہت اگے ہیگے نیں ایس لئی پئی او ہ قادرِ مطلق نئیں ہیگے ۔ ایس لئی، اوہ خُدا اُتے غلط طریقے نال ایمان رکھدے نیں ،اصل وچ اوہ اوہناں نوں اوہناں دی سوچ مطابق پاکیزگی دی تعلیم دے سبب راستباز بنا چُکیا اے ۔ ایہہ ایمان اوہناں نوں ایس پاسے لَے آؤندااے پئی خُدا فرماؤندااے پئی ،  ” میَں پاک ہون وچ تہاڈی حمایت کرداہاں ایس لئی پئی تسیں کسے نہ کسے طریقے نال میرے اُتے ایمان لیائے او ۔ “
پر خُدا ایس طرحاں دا کم کدی وی نئیں کرسکدا ۔ بوہتے لوکاں دا یقین ہیگا اے پئی ایس لئی پئی اوہ کسے نہ کسے طریقے نال یسوع اُتے ایمان رکھدے نیں ، ایس لئی بھاویں اوہ پاپ کردے نیں تاں وی خُدا حالے تیک اوہناں نوں اپنے لوکاں وانگر قبول کردااے ۔ ایہہ اوہ گلاں ہیگیاں نیں جیہڑیاں اوہناں نیں اپنے دلوں سوچیاں نیں ، تے ایہو ای سب توں بوہتا جھوٹا ایمان ہیگا اے جیہڑا پئی شیطانی بدرُوحاں فریب دیندیاں نیں ۔
ایس لئی اوہناں نوں چاہی دااے پئی اوہ اپنے ایمان دے مکان نوں خُدا دی راستبازی دی نیہ رکھ کے دوبارہ بناؤن ۔ کویں اک پاک تے قادرِ مطلق خُدا اک بندے نوں جیہدے دل وچ پاپ ہیگا اے پاک بناؤندااے ؟ کیہ خُدا نے فیصلہ کر لیا اے پئی جنہاں دے دلاں وچ پاپ ہیگااے اوہناں نوں پاک بناوے ؟ ایس طرحاں دیاں گلاں سوچنا تے ایس طرحاں دیاں گلاں اُتے یقین کرنا بندیاں دی اپنی سوچ ہیگی اے تے ہور کُجھ وی نئیں ہیگااے ۔ خُدا سچیائی دا خُدا ہیگااے تے کدی غلط فیصلہ نئیں کردا ۔ کویں خُدا جیہڑا آپ سچیائی دا خُدا ہیگااے ،اپنی کچہری وچ بالکل اوسے طرحاں غلطی کرسکدااے جویں پئی بندے کردے نیں؟اِنج کدی نئیں ہوسکدا ۔ خُدا راستباز خُدا ہیگااے جیہڑا اوہناں نوں پاک بناؤندااے جنہاں دے ایمان دی نیہ اوہدی راستبازی اُتے ہیگی اے تے جیہڑے اوہدی راستبازی اُتے ایمان لیاؤندے نیں۔
کیہ تسیں خُدا دی راستبازی بارے جان دے او ؟ کیہ تسیں اوہدی راستبازی نوں جان دے تے ایمان لیاؤندے او؟ ایہہ راستبازی ساری دی ساری پانی تے رُوح دی خوشخبری وچ مل سکدی اے ۔ خُدا دی راستبازی جیہدے بارے رومیوں دا خط گل کردااے نوں جانن لئی تہانوں پانی تے رُوح دی خوشخبری نوں سمجھنا چاہی دااے ۔ تسیں انج کیتیوں اَڈ خُدا دی راستبازی نوں کدی وی نئیں سمجھ سکدے ۔ ہر کسے نوں ایس سچیائی بارے سمجھنا چاہی دااے ۔ اک بندہ جیہڑا خُدا دی راستبازی نوں سمجھ لیندااے ، ایہو جیہا بندہ ہیگااے جنہے چنگی طرحاں ایس سچیائی نوں جان لیا اے ،جیہڑی اوہنوں راستباز بناؤندی اے ۔
سانوں ساریاں نوں خُدا دی راستبازی اُتے جیہڑی پاک بائبل وچ دسی گئی اے ،ایمان لیاؤنا چاہی دا اے ،نئیں تاں تہاڈا ایمان جیہدی نیہ جھوٹے انسانی انصاف تے خیالاں اُتے ہیگی اے ، برباد ہو جاوے گا ۔ جے تسیں حالے تیک ایس طرحاں دا ایمان رکھیا اے ،تاں تہانوں چاہی  دا  اے پئی ہُنے  ای خُدا دی
راستبازی دے کلام دے مطابق ایمان لَے آوو۔
 بوہتے مسیحی ، تھیالوجی دے راہیں دینی پاکیزگی دی تعلیم سکھ چُکے نیں تے حالے تیک سوچدے نیں پئی ایہہ سچی ہیگی اے ۔ پر، ہُن تہانوں خُدا دی راستبازی اُتے سچے ایمان ول واپس پرت آؤنا چاہی دااے ۔ خُدا دی راستبازی کھُلے طریقے نال ، یسوع دے یوحنا کولوں بپتسمہ لین تے اوہدےصلیبی لہو اُتے ایمان دے راہیں ظاہر ہوئی اے ۔
 
 
ایہہ آکھیا گیا اے پئی مصیبت نال صبر پیدا ہوندااے
 
رومیوں ۵:۳ ۔ ۴وچ اِنج لکھیا اے پئی ، ” تے صرف ایہو ای نئیں سگوں مصیبتاں وچ وی فخر کرئیے ،ایہہ جان دیاں ہوئیاں پئی مصیبت نال صبر پیدا ہوندا اے تے صبر نال پُختگی تے پُختگی نال آس پیدا ہوندی اے ۔ “  نویں سریوں جمن والے سارے مسیحی آس رکھدے نیں پئی خُدا لازمی طور اُتے اوہناں نوں ہر طرحاں دیاں مصیبتاں توں بچاوےگا ۔ ایہہ آس صبر پیدا کردی اے تے صبر نال پُختگی پیدا ہوندی اے ۔ ایس لئی ، راستباز جیہڑے خُدا دی راستبازی اُتے ایمان رکھدے نیں ، ایتھوں تیک پئی اوہ اپنی مصیبتاں وچ وی خوشی نال بھنگڑے پاؤندے نیں۔
پولُس نے فرمایا پئی خُدا دی راستبازی اُتے ایمان خُدا دی بادشاہی لئی آس ہیگااے تے ایہہ آس سانوں پریشان نئیں ہون دیندی ۔ راستباز کول کس طرحاں دی آس ہیگی اے ؟ اوہناں کول ایہو جیہی آس ہیگی اے جیہدے راہیں اوہ خُدا دی بادشاہی وچ جاندے تے ہمیش دی حیاتی بسر کر سکدے نیں ۔ایہو جیہا ایمان کتھوں آؤندااے ؟ ایہہ خُدا باپ دی محبت دے راہیں یسوع مسیح دی راستبازی اُتے ایمان لیاؤن نال آؤندااے ۔
 
 
خُداوند فرماؤنداپیا اے پئی اسیں بے دین ہیگے ساں
 
” ایس  لئی  پئی  جدوں  اسیں  ماڑے  ای  ساں  تاں ٹھیک  ویلے اُتے مسیح بے
 دین بندیاں لئی مریا سی  “ (رومیوں ۵:۶)۔اسیں اپنے جمن توں پہلاں یاں جدوں اسیں اپنی ماں دی ٹہِڈھ وچ ای ساں ، یاں جدوں اسیں جمے تاں سی پر خُدا نوں نئیں جان دے ساں ، اوس ویلے توں ساڈے کول اپنی ساری حیاتی وچ پاپ کرن توں ہٹ کے تے اپنی اخیر دوزخ وچ بسر کرن توں ہٹ کے کوئی واہ نئیں ہیگی سی ۔
جدوں ساڈے پہلے ماپے آدم تے حوا نے پاپ کیتا ، تاں خُدا نے ایہہ آکھدے ہوئیاں ساڈے مکتی داتا نوں گھلن داوعدہ کیتا ،   ” اوہ تیرے سر نوں پھیوے گا تے تُوں اوہدی اَڈی اُتے ڈنگ ماریں گا۔ “ (پیدائش ۳ :۱۵)۔ایس وعدے دے مطابق ، یسوع مسیح ایس جگ وچ آیا ، ایتھوں تیک پئی ساڈے پاپ کرن توں پہلاں ، اوہ ایس جگ وچ آیا تے سانوں ساڈے سارے پاپاں توں مکتی دتی ۔ اوہنے جگ دے پاپاں نوں چُکن لئی یوحنا کولوں بپتسمہ لیا تے سولی اُتے اپنا لہوروڑھ کے اوہنے ایناں سارے پاپاں نوں مکا دتا اے ۔ اوہنے موت دے بعد جی اُٹھن دے راہیں ساڈے سارے پاپاں نوں مکا دتا اے ۔ یسوع نے سارے لوکاں دے پاپاں نوں تے میرے تے تہاڈے وانگر دے بے دین لوکاں دے پاپاں نوں،اپنے بپتسمے دے راہیں چُک لیا تے سولی اُتے مر کے، ایمان لیاؤن والیاں نوں اوہناں دے سارے پاپاں توں چھڈا دتا اے ۔
کیہ اسیں دین دار ہیگے آں ؟ اک دیندار بندہ خُدا دے اگے بوہت ٹہور نال کھلوندا تے اپنے آپ نوں پاپ توں وکھ رکھدا اے ۔ پر ایہہ خُدا دی کامل راستبازی ہیگی سی جنہے یسوع نوں میری تے تہاڈے ،بے دین لوکاں لئی بپتسمہ لین دی اجازت دتی ، تے فیر اوہ سولی اُتے مرگیا تے فیر مویاں وچوں جیوں اُٹھیا ۔جدوں اسیں ماڑے ای ساں تاں ایہہ خُدا دی محبت ہیگی سی  جنہے سانوں مکتی دتی سی ۔
 پُرانے عہد نامے وچ بالکل اِسرائیلیاں وانگر جویں پئی ہرورہے اوہ اپنے پاپاں دی قربانی اُتے وڈے کاہن دے ہتھ رکھن نال اپنے پاپ قربانی دے پسوُ اُتے سُٹ دیندے سَن (احبار ۱۶:۲۰ ۔   ۲۱)،یسوع مسیح نے نہ صرف سارے انساناں دے پاپا ں نوں اِکو ای وار یوحنا بپتسمہ دین والے کولوں بپتسمہ لَے کے چُک لیا سگوں فیر اوہ سولی ول ٹُر پیا ایس لئی پئی اوہ جگ دے پاپاں نوں نویں عہد نامے ول لَے کے جاندا پیا سی ۔ خُدا دی راستبازی ایس سچیائی ول اشارہ کردی اے پئی یسوع مسیح نے بپتسمہ لین تے اپنا لہو وگاؤن دے راہیں پاپیاں دے سارے پاپاں نوں دھو دتا اے ۔
کیہ میَں تے تسیں دیندار ہیگے آں ؟ کیہ خُداوند سانوں پاپیاں نوں بچاؤن نئیں آیا جیہڑے بے دین ہیگے آں ؟ خُدا نوں چنگی طرحاں پتہ ہیگا اے پئی اسیں سارے بے دین ہیگے آں ۔ اسیں بے دین ہیگے آں ،ایس لئی پئی اسیں اپنے جمن دیہاڑے توں لَے کے مرن دیہاڑے تیک پاپ کرن توں کدی باز نئیں آسکدے آں ۔ پر ،جدوں اسیں پاپی ای ساں تاں مسیح نے یوحنا لوکاں بپتسمہ لین تے سولی اُتے لہو وگاؤن دے راہیں ساڈےاُتے اپنی محبت وکھائی اے ۔
 
 
یسوع نے ساڈا لیکھ بدل دتا اے
 
ایہدے بارے دھیان کرنا چاہی دااے پئی ساڈا بندیاں دا اپنے جمن دیہاڑے توں لَے کے کیہ نصیب ہیگاسی ۔ ساڈے جمن دیہاڑے توں لَے کے ساڈی کیہ قسمت ہیگی سی ؟ ساڈا لیکھ دوزخ دی اگ وچ جانا ہیگا سی ۔فیر ایہہ کویں سوکھاہو گیا پئی میَں تے تسیں دوزخ وچ جان والے ایس مقدر توں چھڈائے گئے ؟ ایس لئی پئی اسیں خُدا دی راستبازی اُتے ایمان لیائے ، ایس لئی ساڈا نصیب یکدم بدل گیا ۔ اوہ سچیائی جنہے ساڈا لیکھ بدل دتا پانی تے رُوح دی خوشخبری ہیگی اے ۔ ایس لئی پئی اسیں یسوع مسیح اُتے ایمان لیائے جنہے خُدا دی راستبازی نوں پورا کیتا اے ، ایس لئی ساڈا نصیب مبارک بن گیا ۔
 ہیٹھاں دسے گئے گیت دیاں مشہور آیتاں نوں خورے تسیں جان دے ہووو، ” اولا فضل ! ایہدی  تال بوہت مٹھی ہیگی اے ،جنہے میرے جیہے بے نصیب نوں مکتی دتی ! اک وار میَں گواچ گیا ساں ،پر ہُن میَں واپس آگیا ہاں ، میَں انھاں ساں ، پر ہُن میَں ویکھداہاں ۔ “ خُدا دی محبت تے  راستبازی سچیائی ہیگی اے جیہڑی ساڈی مکتی دی گواہی دیندی اے ۔ ہر کوئی جدوں اوہ خُدا دی راستبازی نوں جان لیندا تے ایمان لیاؤندااے تاں اپنے دل وچ موجود پاپاں دی معافی پا لیندا تے اوہ اَسمانی سکون دا سواد لَے سکدا اے ۔ہُن ایس جگ وچ ہر کوئی جیہدے دل وچ پاپ ہیگا اے ، بھاویں اوہ کسے نہ کسے طرحاں یسوع اُتے ایمان رکھدااے تاں اوہ اوہنوں چاہی دا اے پئی خُدا دی راستبازی نوں جانن لئی پانی تے رُوح دی خوشخبری ول مونہہ کرے ۔
اصل وچ جیہڑے مسیحی پانی تے رُوح دی خوشخبری نوں نئیں جان دے اوہناں نوں ایس گل دا وی پتہ نئیں ہیگا پئی اوہناں دے پاپ یسوع مسیح اُتے لد دتے گئے سَن ۔ایس لئی، اوہ ایس لائق نئیں ہیگے پئی خُدا دی راستبازی نوں پا سکن ۔ بھاویں اوہناں دا ایمان ہیگا اے پئی یسوع ایس جگ وچ آیا تے سولی اُتے مرن دے راہیں اوہناں نوں اوہناں دے پاپاں توں مکتی دتی ،  تاں  وی  اوہناں  نوں  اپنی  مکتی اُتے  یقین
نئیں ہیگا ۔ ایس طرحاں ، گئی گواتی عقل دا سہارا لیندے نیں پئی خُدا نے خور ے اوہناں نوں ایس جگ نوں بناؤن توں پہلا ں ای وکھ کر لیا سی ۔ دوجے اکھراں وچ ،اوہ مسیحیت اُتے جگ دے دوجے دیناں وانگر ایمان رکھدے نیں ۔
۱۱ آیت دسدی اے ، ” تے صرف ایہو ای نئیں سگوں اپنے خُداوند یسوع مسیح دے راہیں جیہدے سبب ہُن ساڈا خُدا نال میل ہو گیا اے ، خُدا اُتےفخر وی کردے آں۔ “ کنہے خُدا نال ساڈا پاپیاں دا میل کروایا اے ؟ یسوع مسیح نے باپ نال ساڈا میل کروایا اے ۔ کویں ؟ اپنے آپ نوں ایس جگ وچ لیاؤن ،۳۰ورہے دی عمر وچ یوحنا کولوں بپتسمہ لین ، سولی اُتے مرن ، فیر مویا ں وچوں جی اُٹھن تے ایس کم نوں کرن دے راہیں جیہڑا خُدا دی ساری راستبازی نوں پورا کردااے ۔ یسوع خُدا دی راستبازی وچ ایس وچ اَسمان وڈے کاہن وانگر آؤن تے بندیاں دے پاپاں نوں چُکن دے راہیں ،ساڈے ایمانداراں لئی مکتی داتا بن گیا ۔ یوحنا بپتسمہ دین والے کولوں جیہڑا پئی دھرتی دا وڈاکاہن ہیگا سی ،کولوں بپتسمہ لین ، سولی اُتے لہووگاؤن تے فیر موت اُتے فتح پا کے مویاں وچوں جی اُٹھن دی قُدرت نال مسیح ساڈا مکتی داتا بنیا اے ۔
جدوں یسوع مسیح نے پہلوں ای ساڈے پاپاں نوں مکا دتا ،اسیں ایس لائق ہوگئے ساں پئی خُدا دی راستبازی نوں ایمان نال پائیے  ۔ ہر کوئی جیہڑا ایمان لیاؤندااے پئی یسوع کامل طریقے نال سانوں ساڈے سارے  پاپاں توں مکتی دے چُکیا اے ،اوہ خُدا وچ مزے نال رہوے گا ۔ ہر کوئی جیہدے دل وچ پاپ ہیگااے ،ایتھوں تیک پئی نکے توں نکا پاپ وی ، تاں اوہ خُدا دا پُتر نئیں ہیگا اے ۔
بھراوو تسیں خورے پہلوں ای جان دے ہووو پئی ایس جگ دے لوک سوچدے نیں پئی دینی پاکیزگی تے دینی راستبازی دی تعلیماں سچیاں ہیگیاں نیں ۔ جے خُدا بادشاہی کرے تاں  کیہ ایہہ ٹھیک ہیگاا ے پئی جے اسیں صرف ایہہ آکھیے پئی اسیں یسوع اُتے ایمان رکھدے آں ،بھاویں ساڈے دلاں وچ پاپ ہیگااے ؟ یاں کیہ ایہہ ہو ر وی چنگا ہووے گا پئی ایس لئی پئی اسیں  اپنے آپ نوں مسیحی آکھدے آں ،ایس لئی اسیں اپنے نوں خُدا دے لوک ہون ول اشارہ کردے آں ؟
خُداوند دی سکھائی ہوئی دعا وچ اسیں آکھدے آں،  ” اے ساڈے باپ ، تُو جیہڑا اَسمان اُتے ہیگا ایں ، تیرا نام پاک منیا جاوے ۔“  ایس عبارت دا مطلب ہیگااے پئی اوہ جیہڑے اپنے دلاں وچ  پاپاں نال بنھے رہندے نیں ،ہو نئیں سکدا پئی اوہ خُدا نوں ،  ’ باپ  ‘  آکھ کے بلاسکن ۔ کیہ سانوں حالے تیک وی دینی پاکیزگی دی تعلیم اُتے ایمان رکھناچاہی دااے ؟ کیہ اک بندہ جیہڑا موجودہ ویلے وچ اک پاپی ہیگااے ،خُداوند نوں اپنا مکتی داتا بلا سکداا ے؟ ہو سکدا اے پئی اوہ کئی ورہیاں توں خُداوند نوں بلاؤنداہووے ، پر ایہو جیہا بندہ اخیر خُداوند نوں چھڈ دیوے گا ،ایس لئی پئی دلوں مسیحی اَکھواؤن وچ اوہنوں شرم آؤندی اے ۔ ایس لئی ،تہانوں پتہ ہونا چاہی دا اے پئی دینی راستبازی دیاں تعلیماں تہانوں  خُدا دی راستبازی توں وکھ کر دین  گئیاں  ۔
دینی پاکیزگی دی تعلیم وی غلط ہیگی اے ۔ ایہہ تعلیم آکھدی اے پئی اسیں ہولی ہولی بدل سکدے آں ، ایتھوں تیک پئی اسیں اپنے مرن توں تھوڑی دیر پہلاں پاک ہو جاندے آں ،تے ایس طرحاں اسیں خُدا نال اک پاک بندے وانگر میل جو ل کر سکدے آں ۔ کیہ تسیں سوچدے او پئی تسیں اپنی ہمت نال ہولی ہولی پاک ہو کے اینے بوہتے پاک ہو جاندے او پئی پاپ توں اَڈ اپنے خُدا نال میل جو ل کر سکو؟ اِنج کدی نئیں ہو سکدا ۔ سچیائی سانوں دسدی اے پئی اک بندہ خُدا دی راستبازی نوں جانن تے ایہدے اُتے ایمان لیاؤن دے راہیں ای خُدا دی بادشاہی وچ جا سکدا اے ۔
 
 
بھاویں اک بندے دے راہیں پاپ ایس جگ وچ آیا
 
ہُن آیت ۱۲ نوں پڑھدے آں ،  ” ایس لئی جویں اک بند ے دے راہیں پاپ جگ وچ آیا تے پاپ دے سبب موت آئی تے اِنج موت ساریاں بندیاں وچ ودھ گئی ،ایس لئی پئی ساریاں نیں پاپ کیتا ۔  “ کویں پاپ جگ دے سارے لوکاں دے دلاں وچ چلا گیا تےایہہ پاپ جگ دے کنیاں لوکاں وچ ودھ گیا ؟ پاک کتاب فرماؤندی اے ،  ” ایس لئی اک بند ے دے راہیں پاپ جگ وچ آیا۔ “
دوجے اکھراں وچ ،ایہہ آکھیا گیا پئی پاپ اک بندے آدم دے راہیں آن پوہنچیا ، تے اسیں سارے اوہدی اولاد ہیگے آں ۔ فیر کویں جگ دے پاپ مکے سَن ؟ ایہہ آکھیا جا سکدااے پئی ایہہ وی بالکل اوسے طرحاں ہویا جویں پئی پاپ پہلوں اک بندے راہیں آیا سی ۔
بندے دے پاپ ایس لئی آن پوہنچے سَن ایس لئی پئی اوہ خُدا دی بنائی ہوئی شریعت اُتے ایمان نہ لیائے ۔ایتھوں تیک پئی حالے وی جیہڑا خُدا وند دے کلام اُتے ایمان نئیں لیاؤندا وہ پاپی ہیگا اے تے دوزخ وچ اپنے اخیری دن بسرکرے گا ۔
ایس لئی، سانوں ہیٹھاں دسیاں گیاں گلاں نوں جاننا چاہی دااے ۔اسیں اپنے پاپاں دے سبب پاپی نئیں ، سگوں اپنے پیودادیاں دے سانوں دتے ہوئے پاپاں دے سبب پاپ رکھدے آں ۔ تہانوں پتہ ہونا چاہی دااے پئی لوکاں دے پاپ کرن دا سبب ایہہ ہیگا اے پئی اوہ ماڑے ہیگے نیں تے اپنے دلاں وچ پاپ رکھدے نیں ۔ لوک جیہڑے پاپ کردے نیں اوہ بدکاریاں اکھواؤندیاں نیں ۔ اوہناں دے پاپ کرن دا سبب ایہہ ہیگااے ،ایس لئی پئی اوہ ایس جگ وچ جم دے نیں ، جیہڑا پاپ نال بھریا ہویا اے ۔ ایس لئی پئی جیہڑا ایس پاپ نال بھرے ہوئے جگ وچ جم دا اے ، برباد ہون والا ہیگااے ، اوہ پاپ توں ہٹ کے ہور کُجھ نئیں کر سکدا۔
اسیں اپنے مُڈھ توں ای پاپی بنے آں ، پاپ دی نسل ، ایس لئی پئی اسیں اپنے پاپاں نوں اپنے پیو دادے کولوں حصے وچ پایا اے ۔ پر، تہانوں پتہ ہونا چاہی دااے پئی ہر کوئی خُدا دی راستبازی اُتے ایمان لیاؤن دے راہیں پاک تے راستباز بن سکدااے ۔
 
 
بندے وچ پاپ کدوں توں شروع ہویا اے؟
 
” ایس لئی پئی شریعت دے دتے جان تیک جگ وچ پاپ  تاں ہیگا سی پر جتھے شریعت  نئیں اوتھے پاپ دا حساب نئیں ہوندا ۔ “ (رومیوں ۵:۱۳)۔کیہ ساڈے خُدا دی شریعت نوں جانن توں پہلاں ایتھے پاپ ہیگا سی ؟ خُدا دی شریعت نوں جانن توں پہلاں سانوں سمجھ نئیں آؤندی پئی ایس پاپ دے کم وچ  اسیں خُدا دے اگے کویں لعنتی بن دے آں ۔ خُدا نے سانوں دسیا پئی ، ” تسیں میرے اَگے ہوراں خُداواں نوں نہ منیاجے ، تسیں اپنے لئی کوئی ہتھ نال بنائی ہوئی مورت نہ رکھنا —  نہ کسے شے دی صورت بناؤنا جیہڑی اُتے اَسمان وچ، یاں ہیٹھاں دھرتی اُتے ، یاں دھرتی ہیٹھاں پانی وچ ہیگی اے : تُوں اوہناں اگے متھاں نہ ٹیکیں تے نہ ای اوہناں دی عبادت کریں ، تُوں خُداوند اپنے خُدا دا نام بے فائدہ نہ لویں،تے یاد کر کے تُوں سبت دا دن پاک منیں ۔“  خُدا دے ایناں قانوناں تے ایناں حکماں دیاں ۶۱۳ شِقاں نوں جانن توں پہلاں جیہڑے سانوں دسدے نیں پئی کیہ کرنا چاہی دا اے تے کیہ نئیں کرنا چاہی دا ، اسیں سچ مُچ اپنے پاپاں  نوں نئیں پچھان دے ساں ۔
ایس لئی ،  ” ایس لئی پئی شریعت دے دتے جان تیک جگ وچ پاپ  تاں  ہیگا سی
پر جتھے شریعت  نئیں اوتھے پاپ دا حساب نئیں ہوندا ۔ “  ایس لئی پئی  ساڈے  اوپریاں قوماں کول  شریعت نئیں ہیگی سی تے ایس طرحاں ایہنوں جان دے وی نئیں ساں ، اسیں اینوں جانیوں اَڈ ای پاپ کردے ساں ۔ بوہتے کوریا دے لوک اک بوہت وڈے پتھر اگے ،ایہہ سوچدیاں ہوئیاں پئی ایہہ اک بُدھا ہیگا اے ، دعا کردے نیں ، تے اوہناں نوں حالے تیک پتہ ای نئیں ہیگا پئی  اسیں اک ہتھ نال بنائی ہوئی مورت اگے متھے ٹیک دے آں ۔ اوہناں نئیں پتہ پئی دوجے خُداواں اگے متھے ٹیکنا ، خُدا دی نگاہ وچ پاپ ہیگااے ۔
پر، پاپ تاں  شریعت دتے جان توں پہلاں ای جگ وچ ہیگا سی ۔ خُدا نے آدم نوں بناؤن دے گھٹو گھٹ ۲۵۰۰ ورہے بعد سانوں شریعت دتی ۔ ایتھوں تیک پئی بھاویں خُدا نے اِسرائیلیاں نوں موسیٰ دے راہیں گھٹوگھٹ ۱۴۵۰ ورہے مسیحا توں پہلاں ، شریعت دتی تاں وی پاپ ایس جگ وچ بوہت پہلاں اک بندے ، آدم دے سبب آپہونچیا سی تے ایتھوں تیک پئی شریعت دے آؤن توں پہلاں ای پاپ سارے لوکاں دے دلاں وچ چلا گیا سی ۔
 
 
 یسوع اپنے لوکاں دا مکتی داتا ہیگا اے
 
کیہ یسوع مسیح نے اکلے نیں ایس جگ دے سارے پاپاں نوں مکا دتا ا ے؟آہو ۔ ۱۴ آیت وچ ، ایہہ دسیا گیا اے پئی تاں وی موت نے اوہناں ساریاں اُتے بادشاہی کیتی جنہاں نیں آدم دی نافرمانی دی مثال مطابق  پاپ یا جرم کیتا سی ۔ ایس لئی ، آدم اوہدی اک قسم سی جیہڑا آؤن والا ہیگا سی ۔جویں اک بندے دے راہیں لوک پاپی ہوگئے ۔ بالکل اوسے طرحاں یسوع مسیح ایس جگ وچ آیا تے سانوں پانی تے رُوح دی خوشخبری دے راہیں مکتی دتی اے ۔
 یسوع مکتی داتا بنیا اے جنہے اپنے لوکاں نوں اوہناں دے پاپاں توں مکتی دتی ۔ ایتھے صرف اک مکتی داتا ہیگااے جنہےآدم دی پاپی نسل وچوں سانوں مکتی دتی اے ۔” تے کسے ہور دے راہیں مکتی  نئیں ہیگی ایس لئی پئی اَسمان دے ہیٹھاں بندیاں نوں کوئی دوجا نام نئیں دتا گیا جیہدے راہیں اسیں مکتی  پاسکیے ۔“(اعمال ۴:۱۲)۔ساڈے لئی اکو ای ہمیشگی دا مکتی داتا ہیگا اے تے اوہدا نام یسوع مسیح ہے ۔
لازمی ہیگا اے پئی سانوں پتہ لگے پئی اسیں اک بندے ،مطلب اے آدم دے راہیں اپنے آپ
پاپی بن جاندے آں ۔ کیہ تہانوں پتہ ہیگا اے پئی یسوع مسیح اوہ مکتی داتا ہیگا اے جنہے اِکو ای وار جگ دےپاپاں نوں مکا دتا اے ؟ کیہ تسیں ایمان رکھدے او پئی یسوع مسیح ای اوہ مکتی داتا ہیگا اے جنہے بپتسمہ تے سولی اُتے لہو روڑھن دے راہیں اِکو ای وارایس جگ دے پاپاں نوں مکادتا اے ؟ کیہ تہاڈا ایمان ہیگا اے پئی یسوع مسیح جگ دے پاپاں نوں مکاؤن دے راہیں اوسے طرحاں اصلی مکتی داتا بنیا جویں پئی آدم نافرمانی کرن دے راہیں سارے پاپاں دا سبب بنیا سی ؟  
یسوع ایس جگ وچ اوہناں ساریاں نوں بچاؤن لئی آیا جیہڑے اک بندے ، آدم دے سبب توں پاپی بن گئے سَن تے یوحنا کولوں بپتسمہ لین دے راہیں اوہنے سارے پاپاں نوں اپنے اُتے چُکدے  ہوئیاں ،پاپاں دی سزا پاؤن دے راہیں ،اوہنے سولی اُتے لہو روڑھیا تے خُدا دی اوس  راستبازی نوں پورا کیتا ، جنہے ساڈے سارے پاپاں نوں مکا دتا اے ۔ ایس طرحاں اوہ ساڈا مکتی داتا بنیا ۔
اسیں یسوع اُتے ایمان لیاؤن دے بعد دینی راستبازی دی تعلیم یاں دینی پاکیزگی دی تعلیم اُتے ایمان لیاؤن دے راہیں مکتی نئیں پائی اے ۔ سگوں یسوع نے اِکو ای وار سانوں ہمیشہ دی مکتی دتی اے ۔ یسوع نے فرمایا پئی صرف اوہو ای جیہڑے پانی تے رُوح دے راہیں نویں سریوں جمے نیں ۔ خُدا دی بادشاہی وچ جا سکدے تے اوہنوں ویکھ سکدے نیں ۔
انسانی دل دی تہہ وچ کیہ خیال چمبڑیا ہویا اے ؟ ایہہ مذاق تے روگ دے سلسلے دا اصول ہیگا اے ۔ اوہ سوچدے نیں پئی خیالاں دی ڈونگھیائی وچ جانا ، اوہناں دے ہتھ پیر مارنا تے بھج نس کرنا ، کسے نہ کسے طرحاں مکتی ول کم کرے گی ۔ پر ہر کوئی صرف ایمان دے راہیں اوس ویلے اصلی مکتی  پاؤندا اے جدوں اوہ پانی تے رُوح دی خوشخبری اُتے ایمان رکھدااے ۔اگانہہ ہور ، یسوع ایس جگ وچ آیا تے سانوں پاپا ں توں بچاؤن لئی سولی اُتے مرگیا ۔ اوہ اوہناں ساریاں دا مکتی داتا بنیا جیہڑے اصل خوشخبری اُتے ایمان لیاؤندے نیں۔
اپنے آپ نوں گئے گواتے خیالاں توں بچاووپئی اک بندا توبہ دی لفظی  دعا واں دے راہیں راستباز بن سکدا تے پاکیزگی تیک اپڑ سکدا اے ۔ پاک بائبل وچ ، اک بندہ یسوع مسیح ، ایس جگ وچ آیا ، ساڈے پاپاں نوں چُکن لئی بپتسمہ لیا تے اوہنے سولی اُتے پاپاں دا فدیہ دے کے ساڈی مکتی نوں پورا کیتا ۔
 
  
یسوع نے سانوں پاپا ں توں جیہڑی ہمیش دی مکتی دتی اے اوہدا حال پاپ وانگر نئیں ہیگا سی
 
۱۵ آیت دسدی اے ،  ” پر پاپ دا جیہڑا حال ہیگا اے اوہ فضل دی نعمت دا نئیں ،ایس لئی پئی جدوں اک بندے دے پاپ نال بوہت سارے لوک مر گئے تاں خُدا دا فضل تے اوہدا جیہڑا انعام اِکو ای بندے مطلب اے ، یسوع مسیح دے فضل نال پیدا  ہویا بوہت سارے لوکاں اُتے لازمی طور اُتے بوہت چوکھا اُتریا اے ۔ “
کیہ جدوں یسوع نے بپتسمہ لیا تاں میرے تے تہاڈے پاپ اوہدے اُتے لد دتے گئے سَن ؟ آہو اوہ لد دتے گئے نیں ۔ یسوع جگ دے پاپاں نوں لَے کے سولی ول ٹُر پیا تے ساڈے لئی اوہنے پاپاں دی سزا جری ۔
خُدا دی مکتی اک مفت نعمت ہیگی اے تے بائبل دسدی اے پئی ایہدا حال پاپ وانگر نئیں ہیگا اے ۔
یسوع نے اپنی ۳۳ ورہیاں دی حیاتی وچ، سانوں جیہڑے اپنی ساری حیاتی کوئی نہ کوئی پاپ کر لیندے آں ، اپنے بپتسمے تے صلیبی لہو دے راہیں مکتی دتی اے ۔ ایتھوں تیک پئی ایمان دے راہیں پاپاں توں مکتی پاؤن دے بعد جیہڑی اِکو ای وار پوری ہوئی ،ساڈے بدن توں کوئی نہ کوئی پاپ ہو جاندااے ، ایس لئی پئی ایہہ مکن والا تے ماڑا ہیگا اے ۔ جے اسیں ایس سچیائی اُتے ایمان رکھدے آں پئی یسوع نے اپنے بپتسمے راہیں ساڈے سارے پاپاں نوں اِکو ای وار چُک لیا تے سولی اُتے لہو وگاؤن نال ساری راستبازی نوں پورا کیتا ، تاں بھاویں ساڈا بدن پاپ کر لوے تاں وی اسیں مکتی پا سکدے آں ۔  
پاپ دے چھٹکارے دی مکتی دی نعمت داحال آدم دے پاپ وانگر نئیں ہیگااے ۔ خُدا دی پاپاں توں مکتی دی نعمت لوکاں دے ہر دیہاڑے پاپاں وانگر اوہناں نوں ہر دیہاڑے نئیں دتی جاندی ۔ پاپاں توں مکتی دی سچیائی دسدی اے پئی خُدا پہلوں ای سانو ں اپنے بپتسمے تے صلیبی لہو دے راہیں گھٹوگھٹ ۲۰۰۰ ورہے پہلاں پاپاں توں مکتی دے چُکیا اے ۔
خُدا دی مکتی دی نعمت جیہڑی سانوں ساڈے سارے پاپاں توں چھڈاؤندی اے ،خُدا دی راستبازی ہیگی اے ،جیہڑی اِکو ای وار یسوع دے بپتسمے تے صلیبی لہو دے راہیں پوری ہوئی سی  ۔ پاپاں دی ہمیشہ دی مکتی توبہ دیاں دعاواں دے راہیں معافی منگن نال ہر دیہاڑے نئیں ملدی ، جویں پئی اج کل بوہتے مسیحی اینوں لبھدے نیں ۔ ایہہ سچیائی دسدی اے پئی خُدا نوں پہلوں ای پتہ ہیگا سی پئی اسیں پاپ کر لواں گے تے ایسے لئی اوہنے بپتسمہ لیا تے اِکو ای وار ایس جگ دے سارے پاپاں نوں چُک لیا ۔ ایس لئی ،خُدا باپ نے اپنے پُتر دے بپتسمے تے صلیبی موت دے راہیں اپنی راستباز ی نوں پورا کیتا ۔ خُدا دی ساری راستبازی پوری ہو گئی اے ایس لئی پئی یسوع نے بپتسمہ لیا ، سولی اُتے لہو روڑھیا تے مویاں وچوں جیوں اُٹھیا ۔   
اج کل بوہتے مسیحی ایمان رکھدے نیں پئی جدوں اوہ توبہ دیاں دعاواں پڑھدے نیں تاں اوہناں دے پاپ مک جاندے نیں ۔ کیہ ایہہ سچ مُچ ٹھیک  اے ؟ بالکل نئیں ۔جے اک بندہ سوچ دا اے پئی اوہ کسے نوں جانوں مارن دے بعد توبہ دیاں دعاواں کر کے ایس پاپ دا فدیہ دے سکدا اے تاں ایہہ بالکل غلط ہیگا اے۔ ایس طرحاں دا خیال سوچ کے بندہ کُجھ نئیں کر سکدا ۔ خُدا ولوں پاپاں نوں مکاؤن لئی ،ہر بندے نوں ہمیشہ پاپاں دا مُل اُتارنا  پوے گا ۔ اِنج کرن لئی ، خُدا نے اپنے پُتر گھلیا تے اوہنے یوحنا کولوں بپتسمہ لیا تےسولی اُتے لہو وگاؤن دے سبب اوہنے ساڈے سارے پاپاں نوں مکا دتا اے ۔ بندے دے پاپ یسوع مسیح دے بپتسمے تے صلیبی لہو اُتے ایمان لیاؤن دے سبب ای دُھل سکدے تے دُور ہو سکدے نیں : نہ پئی مونہوں بول کے گھڑی مُڑی توبہ دیاں دعاواں پڑھن نال ۔
ایس لئی ، پاک بائبل دسدی اے ،  ” ایس لئی پئی جدوں اک بندے دے پاپ نال بوہت سارے لوک مر گئے تاں خُدا دا فضل تے اوہدا جیہڑا انعام اِکو ای بندے مطلب اے ، یسوع مسیح دے فضل نال پیدا  ہویا بوہت سارے لوکاں اُتے لازمی طور اُتے بوہت چوکھا اُتریا اے ۔ “ خُدا دی مکتی دی نعمت ہڑ وانگوں وگدی اے بالکل اوسے طرحاں جویں ساری رات  نل توں پانی وگدا رہوے  تاں پانی ہر پاسے کھلر جاندااے ، ایس توں ہٹ کے پئی بھاویں ایمان لیاؤن توں پہلاں اسیں کنے ای پاپ کیتے ہون ،ایمان لیاؤن دے بعد اوہدی مکتی سانوں ساڈے سارے پاپاں توں بچاؤن لئی چوکھی وگدی اے ۔
 یسوع بپتسمے دے راہیں ایس جگ دے سارے پاپاں نوں مکا چُکیا اے ۔ تے ایہہ وی پئی خُدا دی مکتی اوہناں بدیاں توں جیہڑیاں اسیں کیتیاں نیں بوہت وڈی ہیگی اے ،ایتھوں تیک پئی ساڈے مکتی پاؤن دے بعد وی اوہدی مکتی بوہت چوکھی ہیگی اے ۔ کیہ ایہہ اِنج ای ہیگی اے ؟
 
 
اک بندے ، یسوع مسیح دے راہیں
 
 آیتاں ۱۶ تے ۱۷ دسدیاں نیں پئی ، ” تے جویں اک بندے دے پاپ دا پھل ملیا ،انعام دا اوسے طرحاں حال نئیں ایس لئی پئی اک دے ای سبب توں اوہ فیصلہ ہویا جیہدا پھل سزا دا حکم ہیگا سی پر بتھیرے پاپاں نال ایہو جیہی نعمت پیدا ہوئی جیہدا پھل ایہہ ملیا پئی لو ک راستباز بنے۔ایس لئی پئی جدوں اک بندے دے پاپ دے سبب نال موت نے اوس اک دے راہیں بادشاہی کیتی تاں جیہڑے لوک فضل تے راستبازی دا انعام چوکھا سارا پاؤندے نیں اوہ اک بندے مطلب اے ،یسوع مسیح دے راہیں ہمیش دے حیاتی وچ لازمی بادشاہی کرن گے ۔ “
اک بندے دے پاپ دے سبب موت نے سارے لوکاں اُتے بادشاہی کیتی ۔ ایہہ ایس پاسے اشارہ کردا اے پئی اک بندے آدم دا پاپ ، سارے لوکاں دے پاپی ہون دا سبب بنیا ،تے ایس پاپ دے سبب ہر کسے نوں خُدا دی لعنت ملدی اے ۔ جیہڑا بندہ پاپ کرے گا اوہو ای مرے گا تے دوزخ وچ جاوے گا ۔ ایہدا مطلب ایہہ ہیگاا ے پئی ، خُدا دی راستبازی اک بندے یسوع مسیح دے راہیں ہمیش دی حیاتی لئی بادشاہی کرے گی ۔ اوہ جیہڑے ایس وگدے ہوئے فضل تے راستبازی دی نعمت نوں پا چُکے نیں ،ایہو جیہے ہیگے نیں جنہاں نوں پانی تے رُوح دی خوشخبری اُتے ایمان لیاؤن دے راہیں مکتی دے نعمت دتی گئی اے ۔ اوہ خُدا دے وڈے فضل نوں پاؤندے تےحیاتی وچ لازمی بادشاہی کرن گے ۔
آیت ۱۸ دسدی اے ، ” پر جویں اک پاپ دے سبب توں اوہ  فیصلہ کیتا گیا ، جیہدا پھل سارے بندیاں دی سزا دا حکم ہیگا سی ، اوسے طرحاں راستبازی دے اک کم دے راہیں سارے بندیاں نوں اوہ نعمت ملی جیہدے نال راستباز بن کے اوہ حیاتی پاؤن گے۔  “
ایتھے، سانوں اک سوال پچھن تے اوہدے جواب دی لوڑہیگی اے :  ”  کیہ ایہہ سوچ چنگی ہیگی اے پئی اک بندے دے پاپ دے سبب ،اسیں سارے پاپی بن گئے آں؟  “ کیہ تسیں اپنے پاپاں ، یاں اپنے باپ آدم دے خُدا دے خلاف پاپ کرن دے سبب پاپی بنے او؟ جے اسیں سارے آدم دی نافرمانی  دے سبب پاپی بنے آں ، تاں فیر اسیں یسوع مسیح دے اوس چنگے کم دے راہیں جیہڑا اوہنے سانوں پاپاں توں مکتی دین لین کیتا ،راستباز بن دے آں ۔ جے اک بندہ خُدا دی راستبازی اُتے ایمان لیاؤندا اے ، تاں کیہ سچ مُچ اوہدے پاپ مک جاندے نیں ؟ —آہو — اوہ پاک بن دا اے ۔
” اوسے طرحاں راستبازی دے اک کم دے راہیں سارے بندیاں نوں اوہ نعمت ملی جیہدے نال راستباز بن کے اوہ حیاتی پاؤن گے۔  “ خُدا دی راستبازی دی مفت نعمت نوں پاؤن دا مطلب ایہہ نئیں ہیگا پئی اسیں یسوع اُتے کسے نہ کسے طریقے نال ایمان لیاؤن دے بعد ہر دیہاڑے توبہ دی دعاواں دے راہیں پاکیزگی تیک اپڑئیے ۔ کدی نئیں! جدوں پولُس رسول  ’  ایمان دے راہیں راستباز ‘ بنن دے بارے گل کردااے تاں نہ ای ایہدا ایہہ مطلب ہیگا اے پئی اسیں نام دی دینی مسیحی تعلیم  راہیں پاکیزگی پائیے ۔
بوہتے مسیحیاں دے دلاں وچ صرف ایس لئی پاپ ہیگا اے ،کیوں جے اوہ صرف یسوع دے صلیبی لہو اُتے ای ایمان رکھدے نیں ۔ ایس لئی ، اوہ جگ دے پاپاں نوں اپنے دلاں وچ لکاؤن لئی دینی پاکیزگی دی تعلیم نوں قبول کردے تے اوہدے پچھے چلدے نیں تے ایہہ آکھدے ہوئیاں اپنے آپ نوں تسلی دیندے نیں پئی ، ” بھاویں ساڈے دلاں وچ پاپ ہیگے نیں ،تاں وہ اوہ سانوں اپنے  پا ک لوکاں وچ گن دا اے ۔ “  پر ایہہ تعلیم قدرت توں ہٹ کے تے لعنتی بنائی جاوے گی  ۔
 آیت ۱۹ دسدی اے ،  ” ایس لئی پئی جویں اِکو ای بندے دی نافرمانی دے سبب بوہت سارے لوک پاپی بن گئے ،اوسے طرحاں اک دی فرمانبرداری نال بوہت سارے لوک راستباز  بنن گے ۔ “
ایتھے اک بندہ اوہ ہیگا اے جنہے نافرمانی کیتی تے دوجا اوہ جیہڑا فرمانبردار ہیگا سی ،دونویں ظاہر ہوئے نیں ۔ اک آدم ہیگا سی تے دوجا ساری انسانی پیڑھی دا مکتی داتا ، یسوع مسیح سی ۔ آدم دی نافرمانی نے سارے لوکاں نوں پاپی کر دتا ،تے ایسے طرحاں یسوع نے اپنے باپ دی مرضی دی فرمانبرداری کر کے یوحنا کولوں بپتسمہ لین ، جگ دے پاپاں لئی سولی اُتے مرجان ، تے سانوں پاپ توں چھڈاؤن لئی موت اُتے فتح پا کے مویاں وچوں جی اُٹھن دے راہیں لوکاں دی صلح خُدا باپ نال کرا دتی ۔ خُدا باپ ایمانداراں نوں اپنی راستباز ی دے راہیں یسوع وچ کامل طور اُتے راستباز بناؤندااے ۔  
۲۰ آیت دسدی اے ، ” تے وچکار شریعت آن پوہنچی تاں پئی پاپ بوہتا ہوجاوے پرجتھے پاپ بوہتا ہویا اوتھے فضل اوہدے توں وی بوہت چوکھا ہویا ۔“
ایتھے آکھیا گیا اے پئی وچکار شریعت آن پوہنچی پئی ساڈی بدیاں بوہتیاں ہو جان ۔ آدم دی اولاد ہوندے ہوئیاں ، لوک اصل وچ پاپ وچ جم دے نیں ، فیر وی اوہ پاپ کردے ہوئیاں وی پاپ نوں نئیں پچھان دے ۔ شریعت توں اَڈ ، کوئی پاپ نوں کدی نئیں پچھان سکدا پئی ایہہ پاپ ہیگا اے ۔ تے صرف خُدا دی شریعت دے راہیں ای ، اوہ اپنے پاپاں نوں ویکھ سکدا اے ۔ پر ،جدوں اسیں شریعت نوں جان دے آں ، تاں اسیں بوہتے بوہتے اپنے پاپاں نوں پچھانن لگ پیندے آں ۔بھاویں لوک اصل وچ پاپاں نال بھرے ہوئے سَن ، تاں وی اوہ اپنے پاپ بھرے بدن نوں نئیں جان دے سَن ،جدوں تیک اوہ شریعت نوں پاؤن دے بعد ہولی ہولی اپنے پاپ بھرے کماں توں واقف نہ ہوئے ۔ ایس لئی پاک بائبل فرماؤندی اے ،   ” تے وچکار شریعت آن پوہنچی تاں پئی پاپ بوہتا ہوجاوے ۔“
” پرجتھے پاپ بوہتا ہویا اوتھے فضل اوہدے توں وی بوہت چوکھا ہویا ۔“ ایہدا مطلب ہیگا اے پئی ہر کوئی شریعت دے راہیں، اپنے پاپاں نوں  پچھان کے اوہدی راستبازی اُتے ایمان لیاؤن دے راہیں اوہدا پُتر بن سکدا اے ۔ جدوں اوہ شریعت دے راہیں اپنی بربادی تے پاپ بھرے ہون بارے خبر پاؤندے نیں تاں صرف اوس ویلے ای بندے خُدا دی راستبازی نال بھری ہوئی اصل خوشخبری دے راہیں خُدا دے فضل نوں پچھان سکدے نیں ۔ اوہ جیہڑے شریعت دا اقرار کرن توں پہلاں چنگی طرحاں جان دے نیں پئی اپنے پاپاں دے سبب اپنی اخیر دوزخ وچ بسر  کرن گے ، ایس لئی ، اوہناں نوں بوہت شکر ادا کردے ہوئیاں یسوع اُتے ایمان لیاؤنا چاہی دا  اے ،جنہے اپنے بپتسمے تے سولی اُتے موت دے راہیں اوہناں نوں مکتی دتی اے ۔ جویں جویں اسیں شریعت دے راہیں اپنے پاپی ہون بارے پچھان دے جاندے آں ،اوسے طرحاں ای اسیں خُدا دی راستبازی دے راہیں بنائی گئی وڈی مکتی لئی شکر گزار ہوندے جاندے آں ۔
۲۱ آیت دسدی اے ،  ” تاں پئی جویں پاپ نے موت دے راہیں بادشاہی کیتی اوسے طرحاں فضل وی ساڈے خُداوند یسوع مسیح دے راہیں ہمیش دی حیاتی لئی راستبازی دے راہیں بادشاہی کرے ۔ “
بائبل دسدی اے پئی پاپ نے موت دے راہیں بادشاہی کیتی۔پر، خُدا دا فضل جیہڑا اوہدی راستبازی ہیگا اے ،یسوع دے پانی تے لہو وچ ہیگا اے ۔ ایس لئی پئی اوہدی راستبازی مکمل طور اُتے سانوں ساڈے سارے پاپاں توں مکتی دے چُکی اے ، ایس لئی اسیں خُدا پُتر بنائے گئے آں ۔
دینی پاکیزگی دی تعلیم تے دینی راستبازی دی تعلیم بے ہودہ بنائی ہوئی گل  ہیگی اے جنہے انسانی دلیل  نال تے اوہناں دے راہیں بنی جیہڑے خُدا اے کلام توں اکھاں پھیر دے نیں ۔ ایہہ گل ٹھیک ہیگی اے پئی ایہو جیہاں تعلیماں دین دے اُستاداں ، تے وڈے اُستاداں دے غلط ثبوت توں کم لین توں ہٹ کے  کُجھ نئیں ہیگا اے ، جیہڑی کدی سنوارےنئیں جا سکدی ۔ خُدا دی سچیائی کھلی تے پکی ہیگی اے ۔
اسیں اسی سچیائی اُتے ایمان لیاؤن دے راہیں مکتی پاؤندےآں پئی یسوع ،جیہڑا پئی خُدا ہیگا اے بندیاں وانگر بدن وچ آیا ،سانوں ساڈے سارے پاپاں توں مکتی دے چُکیا اے ۔جیہڑے اوہدے اُتے ایمان لیاچُکے نیں اوہ مکتی یافتہ ہیگے نیں۔ کیہ تسیں ایہدے اُتے ایمان رکھدے او ؟ —آہو —
جے تسیں خُدا دی راستبازی اُتے ایمان رکھدے او ، تاں تسیں مکتی یافتہ ہیگے او ۔تسیں اپنے پاپاں توں چھڈائے گئے تے لازمی طور اُتے مکتی پا چُکے او۔ جے تسیں اڑی کردے او پئی لگاتا ر دعاواں کردے رہنا تے بے پاپ حیاتی بسر کرن نال تسیں بچ سکدے او تاں فیر تسیں ضد وچ اڑے ہوئے جے پئی تسیں یسوع دے اَڈ ای مکتی پا سکدے او ۔ ایس توں ہٹ کے پئی تسیں کنی ای دینی پاکیزگی دے تعلیم اپنے کماں تے ہمتاں نال سچیائی توں ہٹ کے مکتی پاؤن دے لائق بنن دی تعلیم کیوں نہ دو صرف یسوع ای مکتی دا اِکلا بوہا ہیگا اے۔
ایتھو ں تیک پئی  ٪ ۱.۰  وی  شریعت   اُتے عمل نہ کرنا ،اِنج ای ہیگا اے جویں ۱۰۰٪ شریعت اُتے عمل نہ کرنا اے ۔ خُداسانوں دسنا چاؤہندااے پئی اسیں اوہدی شریعت دی فرمانبرداری کرن لئی ایتھوں تیک پئی  ٪ ۱.۰ وی لائق نئیں ہیگے۔ اوہ جیہڑے سوچدے نیں پئی اوہ گھٹوگھٹ ۵٪ شریعت اُتے چلدے نیں تے اوہنوں ۱۰٪ تیک ودھاؤن دا منصوبہ رکھدے نیں اوہ مکمل طور اُتے اپنی کم کرن توں سُست تے خُدا دی راستبازی  دے خلاف ہیگے نیں ۔ سانوں خُدا دی راستبازی نوں اپنے خیال تے دلیل نال سمجھن دی ہمت نئیں کرنی چاہی دی اے ۔ اوہدی راستبازی سانوں ساڈے پاپاں توں مکتی دے چُکی اے ، تے سانوں اُڈیکدی اے پئی اسیں ایہدے اُتے ایمان لیائیے تاں پئی اسیں اوہدے پُتر بن سکیے ۔
خُدا قادرِ مطلق تے رحم کرن والا تے کرم کرن والا اے ،ایس لئی اوہ اِکو ای وار سانوں ساڈے سارے پاپاں توں مکتی دے چُکیا اے ۔ اسیں یسوع دے بپتسمے تے صلیبی لہو لئی اوہدے شکر گزار ہیگے آں ، جنہیں کامل طور اُتے سانوں ساڈے پاپاں توں مکتی دتی اے ۔