Κηρύγματα

مضمون 5: پاپ داسچا اِقرار

[5-1] >۱۔ یوحنا ۱: ۹> کویں پاپ دا سچا تے ٹھیک اقرار کرئیے

>۱۔ یوحنا ۱: ۹>
”جے اپنے پاپاں دا اقرار کرئیےتے اوہ ساڈے پاپاں نُوں معاف کرن تے سانوں ساری بدکاری توں پاک کرن وچ سچا تے انصاف کرن والا اے۔“
 
 
لہو دی خوشخبری ادھی خوشخبری ہیگی اے
 
کیہ اسیں صرف لہو دی خوشخبری دے
راہیں اسمان دی بادشاہی وچ جا سکدے آں؟
کدی نئیں ۔ سانوں کامل خوشخبری اُتے ایمان لیاؤنا
اے (مطلب اے،پانی تے رُوح دی خوشخبری اُتے)۔
 
۱ ۔ یوحنا۱ : ۹ صرف راستباز اُتے لاگُو ہوندااے ۔جے کوئی پاپی جیہدے پاپ حالے تیک معاف نئیں ہوئے نیں ،ایس حوالے دے اَکھراں مطابق اپنے ہر دیہاڑے دے پاپاں دی معافی لئی کوشش کرے اور اپنیاں غلطیاں نوں منے تے اوہدے پاپاں دا فدیہ نئیں ہووےگا۔ کیہ تسیں سمجھدے او ،میَں ایتھے کیہ آکھداپیا واں ؟ ایہہ حوالہ اوہناں پاپیاں اُتے لاگُو نئیں ہوندا جیہڑے حالے تیک نویں سریوں جمے نئیں ۔
ایس جگ وچ بوہت سارے لوک نیں جیہڑے حالے تیک نویں سریوں جمے نئیں پر اوہ ۱ ۔ یوحنا دے پہلے باب وچوں ایہہ حوالہ لیندے نیں تے دعا منگدے تے معافی دی آس اُتے اپنے پاپاں توں توبہ
کردے نیں ۔
پر کیہ کوئی جیہڑا نویں سریوں جمیا نئیں اپنی اقرار دیاں دعاواں دے راہیں اپنے پاپاں توں مکمل مکتی پاسکدے نیں؟ ایہہ بڑاخاص نکتہ اے،جنہوں اگانہہ ہور ودھن توں پہلاں سانوں سمجھنا تے واضح کرنا ا ے۔
یوحنا دا پہلا خط پڑھن توں پہلاں ،تہانوں فیصلہ کرنا اے ، یوحنا رسول اک راستباز بند ہ سی یاں پاپی سی ۔ مینوں تہاڈے کولوں تھلے دِتا ہویا سوال پچھن دی اجازت دیوو۔کیہ یوحنا رسول پانی تے رُوح دی خوشخبری اُتے ایمان رکھن دے راہیں نویں سریوں جمیا ہویااک راستباز بندہ سی یاں پاپی سی ؟
جے تسیں آکھدے او یوحنا رسول اک پاپی سی ،تسیں اپنے عقیدے وچ پاک کتاب دے مطابق غلط ہیگے او، جے یوحنا رسول اک راستباز بندہ سی جیہڑا نویں سریوں جمیا سی ،جدوں اوہ یسوع اُتے ایمان لیایا،تے ایہہ گل کھُل جاندی اے پئی اوہدا ایمان تہاڈے توں وکھراسی ۔ تہانوں یوحنا رسول دے وانگر بالکل اوہو جیہا ایمان رکھنا اے۔
مینوں تہاڈے کولوں اک ہور سوال پچھن دی اجازت دیوو۔کیہ یوحنا رسول راستبازاں یاں پاپیاں نوں ایہہ خط لکھداپیا سی ؟ یوحنا رسول راستبازاں نُوں خط لکھدا پیا سی ۔
ایس لئی جے پاپی جیہڑے نویں سریوں جمے نئیں ،۱ ۔ یوحنا ۱ : ۸ ۔ ۹ دا حوالہ دیندے نیں تے اوہناں نوں اپنے آپ اُتے لاگُو کردے نیں ،تے ایہہ غلط ہیگااے ۔جے تہانوں راستباز بننا اے خُدا دے اگے اپنے پاپاں دا اقرار کروتے پانی تے رُوح دی خوشخبری اُتے ایمان رکھو ۔ فیرخُدا تہاڈے سارے پاپاں نُوں خوشخبری نال ختم کر دیوےگا جیہڑے پہلاں ای جگ دا پاپ دھو چُکی اے ۔
یوحنا رسول دا ایمان ایہو جیہا ای اے ۔ ۱ ۔یوحنا ۵ وچ اوہ آکھدااے پئی اوہ ” پانی ،لہو تے رُوح “ اُتے ایمان رکھدا اے ۔ کیہ تسیں یسوع مسیح اُتے ایمان رکھدے او جیہڑا پانی ،لہو تے رُوح دے راہیں آیا؟ کیہ تسیں صرف یسوع اُتے ایمان رکھدے او جیہڑا صلیب دے راہیں آیا یاں اپنے بپتسمہ ، اپنے لہو تے رُوح دے راہیں آیا؟
کیہ تسیں صرف لہو دی خوشخبری اُتے ایمان رکھن دے راہیں اَسمان دے بادشاہی وچ جا سکدے او؟ جے تہاڈا ایمان صرف  صلیبی لہو دی خوشخبری اُتے ہیگا اے تے تسیں صرف اَدھی خوشخبری نُوں سمجھدے او۔ جے تسیں صرف صلیبی لہو اُتے ایمان رکھدے او ،کوئی شک نئیں تسیں اپنے آپ نُوں ہر دیہاڑے پاپاں دی معافی دی دعاواں منگدے ہوئے پاووگے ۔ آس ایہہ  ہیگی اے  پئی  تسیں ایمان رکھ
دے او پئی تہاڈے پاپ صرف توبہ دیاں دعاواں دے راہیں دھوتے جا سکدے نیں ۔
پر کیہ تہاڈے پاپ دُھل سکدے نیں جدوں تسیں صرف صلیبی لہو اُتے ایمان رکھدے ، توبہ کردے تے اپنے ہر دیہاڑے دے پاپاں دی معافی لئی دعا منگدے او؟ جےتسیں ایناں لوکاں وچوں ہیگے جے ،فیر تہاڈے پاپ تہاڈے دل وچ قائم رہن گے کیوں جے کوئی وی صرف صلیبی لہو اُتے ایمان رکھن یاں ہر دیہاڑے توبہ دیاں دعاواں منگن دے راہیں اپنے پاپاں نُوں دھو نئیں سکدا۔جے تسیں اوہناں ورگے جے فیر تسیں حالے تیک پانی تے رُوح دی خوشخبری نو ں نئیں جان دے تے تہاڈا ایمان ادھوراہیگا اے ۔
یوحنا رسُول نویں سریوں جم پیا سی کیوں جے اوہ پانی تے لہو تے رُوح دی خوشخبری اُتے ایمان رکھدا سی ۔ پر تسیں صرف صلیبی لہو اُتے ایمان رکھدے جے ۔ جدوں تسیں آپ خوشخبری نوں ٹھیک سمجھ نئیں رکھدے ،تسیں کویں دوجیاں دی مکتی تیک اَگوائی کر سکدے او؟ تسیں خُود نویں سریوں جمے نئیں جے سگوں توبہ دی دعاواں دے راہیں اپنے پاپاں دے فدیہ دی کوشش کر دے پئے او ۔ ایہہ راہ تہانوں کدی وی کِتے وی نئیں لے جاوےگا۔
کوئی مطلب نئیں رکھدا ،کوئی بھانویں کِنے ہتھ پیر ماردیاں ہویاں دعاواں منگدا تے توبہ کردااے ، اوہدے پاپ اوہدے دل وچوں دھوئے نئیں جا سکدے ۔ جے تسیں کئی واری محسوس کردے او پئی تہاڈے پاپ مُک گئے نیں ،ایہہ صرف تہاڈا خیال تے دلی جذبیاں دا حاوی ہونا اے ۔ جے تسیں دعا تے توبہ کردے او ،تسیں اک دن یا کُجھ دیر لئی اپنے آپ نوں نروئے محسوس کرن دے لائق ہوسکدے او۔ پر ایس طریقے نال تسیں کدی اپنے پاپاں توں چھُڈائے نئیں جاسکدے ۔
پاپی اپنے پاپاں توں مکتی دی آس اُتے دعا تے توبہ کردے نیں ۔ایہو ای سبب اے اوہ اک لمے ویلے توں یسوع اُتے ایمان رکھن دے باوجود ،بھانویں حالے تیک پاپی نیں ۔اوہ پانی تے رُوح دی خوشخبری نوں نئیں جان دے ۔ جے تسیں یسوع اُتے ایمان رکھدے او ،پر حالے تیک نویں سریوں جمے نئیں جے ،تسیں وی خورے ایناں لوکاں ورگے جے ۔ جے تسیں ہر دیہاڑے دی دعاواں تے توبہ نال اپنے پاپاں دی معافی پاؤن دی کوشش کردے او،ایہہ اک کھُلی گواہی ہیگی اے پئی تسیں حالے تیک نویں سریوں جمے نئیں جے ۔ تہانوں فیصلہ کرنا اے ،پئی تسیں پانی تے رُوح دی خوشخبری اُتے ایمان رکھدے او ،جویں یوحنا رسُول نے کیتا یاں اپنے ایمان نُوں اپنے دلی خیالاں تے جذبیاں اُتے قائم رکھنا اے ۔ ایہہ تے اک کھُلا سچ ہیگااے، تےدوجا جھوٹ ہیگااے۔
 پاک کتاب دے مطابق اصل خوشخبری ایہہ ہیگی اے پئی یسوع نے بپتسمہ لیا تے اِکو ای واری
 تے ساریاں لئی جگ دے سارے پاپاں نُوں چُک لیا تے سولی اُتے سارے پاپیاں لئی دُکھ جریا ۔ جے کوئی یسوع دے بپتسمہ تے سولی اُتے اوہدے مرن اُتے یقین رکھدا اے ، اوہ یکدم اپنے سارے پاپاں توں مکتی پاوےگا ۔دوجی گل ، جے کوئی اپنی بدکاریاں ، توبہ دیاں دعاواں نال دھون دی کوشش کردااے ،اوہ کد ی اپنے پاپاں توں چھُڈایاں نئیں جاوےگا ۔ کیہ تسیں سمجھدے او پئی تسیں اپنے ہر دیہاڑے دے پاپاں نُوں چیتے رکھ سکدے او ؟ کیہ خُدا اوہناں پاپاں دی پرواہ کردا اے جنہاں تو ں تسیں توبہ نئیں کیتی ؟ کیہ ہر دیہاڑے دے پاپاں دے مسئلے  داکھُلا حل توبہ دیا ں دعاواں ہیگیاں نیں ؟ایناں سوالا ں دا اِکوجواب نئیں ہیگا اے ۔
 
 
سچی توبہ تے اِقرار دا مقصد
 
اِقرارتے چنگیاں کماں دی حد کیہ ہیگی اے؟
بھانویں سانوں اپنی ساریاں حیاتیاں وچ اپنے
پاپاں دا اقرار کرنا اے ، اسیں کدی وی صرف اپنی بدکاریاں دا
اِقرار کرن تے چنگے کماں دے راہیں مکتی یافتہ نئیں
ہوسکدے ۔
 
پاک کتاب وچ توبہ دا مطلب غلط ایمان ولوں کھرے ایمان ول پرتنا اے ، تے راستباز لئی ، کسے دااپنی غلطی نُوں من لینا تے خوشخبری دی لو وچ واپس مُڑنا اے ۔
جے تسیں حالے تیک پاپی جے ،تہانوں تھلے درج کیتیاں گئیاں گلاں وانگر اِقرار کرناچاہی دا اے۔ ” سوہنے خُدایا ، میَں پاپ کیتا تے دوزخ وچ جان دے لائق ہیگا واں ۔پر میَں اپنے پاپاں توں مکتی پاؤن دی آس رکھداہاں ۔ مہربانی نال مینوں میرے سارے پاپاں توں چھُڈا۔ میَں حالے تیک نویں سریوں جمیا نئیں ہیگا تے میَں جان دا ہاں میَں دوزخ دا سزاوار ہیگا واں۔“ ایہہ اک ٹھیک اِقرار ہیگا اے  ۔
فیر نویں سریوں جمے ہوئے پاک لوکاں نُوں کِنج دا اِقرار کرنا چاہی دااے ؟ ” سوہنے خُدایا، میَں
بدن دے پِچھے لگ کے پاپ کر چُکیا ہاں ۔میَں ایمان رکھداہاں ،یسوع نے یوحنا اصطباغی کولوں بپتسمہ لیا تے مینوں میرے سارے پاپاں توں چھُڈا لیا ،ایتھوں تیک پئی اوہناں پاپاں توں وی جیہڑے اجے ہُنے میَں کیتے نیں ، جد پئی مینوں میرے پاپاں لئی مر جانا سی ۔ میَں خُداوند دا شکر ادا کرداہاں پئی اوہ مینوں پانی تے لہو دے راہیں بچا چُکیا اے۔“ نویں سریوں جمے ہوئے بندے تے نویں سریوں نہ جمے بندے دے  اِقرار وچ ایہہ فرق ہیگااے ۔
سانوں ساریاں نُوں یوحنا رسُول وانگر اوہو ای ایمان رکھنا چاہی دااے ۔جے تسیں اپنےپاپاں نُوں اِقرار دے پِچھے لکان دی کوشش کردے او جیہڑا راستباز لئی اے ،فیر تسیں مرن توں کدی نئیں بچوگے جیہڑی پاپ دی دیہاڑی اے ۔
ساریاں پاپیاں نُوں جیہڑے نویں سریوں جمے نئیں ،اوہناں نُوں اِقرار کرن والیاں دعاواں دے پِچھے لکن نوں چھڈدینا چاہی دااے تے پانی ،لہوتے رُوح دی کھری خوشخبری اُتے ایمان رکھنا شروع کر دینا چاہی دااے  ۔ اوہناں نوں یوحنا رسُول دے ایمان توں سکھنا چاہی دااے تے ایسے طرحاں مکتی پاؤنی چاہی دی اے ۔
پاپی احساس نئیں کردے ،اوہناں دے پاپاں دی سزا کنی ڈاہڈی ہووےگی ۔ خُدا دے اگے بوہت ڈاہڈا پاپ پانی تے رُوح دی نویں سریوں جمن دی خوشخبری اُتے ایمان نہ رکھنا اے ۔
اوہ سارے جیہڑے یسوع اُتے ایمان رکھدے نیں پر حالے تیک نویں سریوں جمےنئیں ہیگے ،اوہناں نوں خُدا دے اگے اقرار کرنا چاہی دااے ، ” خُداوند ا ،میَں ایہو جیہا پاپی آں جنہوں دوزخ دی بل دی اگ وچ سُٹنا چاہی دااے ۔“ جد پئی ایہہ آکھن توں باز آؤنا چاہی دااے ،  ” خُداوندا،مہربانی نال میرے پاپاں نُوں دھودے ۔“  جدوں پاپی اپنے دل وچ خوشخبری نوں قبول کردااے پئی یسوع نے دریائے یردن اُتے اپنے بپتسمہ تے سولی اُتے اپنے لہودے راہیں اوہنوں بچایا ،اوہ اپنے سارے پاپاں توں چھُٹ سکدا اے ۔ایہہ بڑا خاص اقرار ہیگااے جیہڑاپاپی نوں خُدا دے اگے اپنے سارے پاپاں توں مکتی پاؤن لئی کرنا چاہی دااے ۔
اک پاپی نوں صرف ایہہ اقرار کرنا چاہی دااے پئی اوہ حالے تیک نویں سریوں جمیانئیں اے تے پانی تے رُوح دی خوشخبری اُتے ایمان رکھدااے ۔فیر اوہ یکدم مکتی پا لوے گا ۔پانی تے رُوح دی خوشخبری دے راہیں ، سارے پاپیاں دی مکتی مکمل ہو گئی سی ۔ ” تے کسے ہور دے راہیں مکتی نئیں ہیگی کیوں جے اَسمان دے تھلے بندیاں نوں کوئی دوجا ناں نئیں دِتا گیا جیہدے راہیں اسیں مکتی پاسکیے ۔“ (اعمال ۴ : ۱۲)۔خُدا نے سارے پاپیاں نُوں اوہناں دے پاپاں توں اپنے پُتر یسوع نوں یوحنا اصطباغی دےراہیں بپتسمہ لین تے سولی اُتے مرن دے راہیں مکتی دِتی ۔
خُداوند نے اوہناں سارے پاپاں نوں دھودِتا جیہڑے لوک اپنے بدن تے اپنے دلاں نال اپنے جمن توں لے کے اپنے مرن تیک کردے نیں ۔ سانوں مکتی پاؤن لئی سچی خوشخبر ی اُتے ایمان رکھنا اے ۔ ایہہ اِکو راہ اے ، جیہدے نال اسیں اپنے سارے پاپاں توں چھُڈائے جاسکدے آں تے سچ مُچ پاک ہو سکدے آں ۔اسیں اکو ای واری تے ہمیش لئی راستباز بن سکدے آں ،جدوں اسیں پانی تے رُوح دی خوشخبری اُتے ایمان رکھدے آں ۔
یسوع نے بپتسمہ لیا ،جگ دے پاپاں نُوں چُک لیا تے سولی اُتے جان دے راہیں اوہناں دا مُل تاریا تے ۳  دِناں دے بعد مویاں وچوں جی اُٹھیا تے ہُن خُدا دے سجے ہتھ بیٹھا ہویا اے ۔ایہو ای کامل سچیائی اے ۔
سانوں ساریاں نوں ایہہ اقرار کرنا چاہی دااے ۔ ” خُداوندا،میَں بچ نئیں سکدا سگوں اپنے مرن دیہاڑے تیک پاپ کردارہواں گا ۔ میَں اپنی ماں دے ٹِڈھ توں پاپی جمیا واں تے سارے پاپاں دے بھار دے سبب جیہڑے میرے کولوں ہوئے نیں ،مینوں دوزخ دی بَل دی اگ وچ سُٹ دِتا جانا چاہی دااے ۔ ایس وجہ توں یسوع اُتے ایمان رکھنا چاہندا واں جیہڑا پانی ، لہو تے رُوح دے راہیں آیا تے میرا مکتی داتا بن گیا ۔ “
بالکل اوسے طرحاں جویں متی ۳ باب وچ لکھیا اے ،یسوع نے سارے جگ دا پاپ چُک لیا ، جدوں اوہنوں دریائے یردن وچ بپتسمہ دتا گیا ۔ ایہدے وچ اوہ پاپ وی شامل نیں جیہڑے اسیں مرن دیہاڑے تیک کردے آں ۔ ” تے سچیائی نوں جانو گے تے سچیائی تہانوں چھُڈاوے گی ۔ “ (یوحنا ۸ : ۳۲)۔
جے یسوع نے سانوں صرف نسلی پاپ توں مکتی دِتی سی تے ساڈے اپنے پاپاں نوں اپنے آپ دے راہیں آپ ای ایس مسئلے نوں حل کرن دے بارے وچ دَسیا سی ،اسیں لگاتار دُکھ وچ رہواں گے ۔ پر یسوع نے سانوں اپنے بپتسمہ تے لہو دے راہیں ساڈے سارے پاپاں توں چھُڈایا ۔ ہُن سانوں کاہدی فکر ہیگی اے ؟ جدوں اسیں یسوع دے بپتسمہ تے اوہدے صلیبی لہو اُتے ایمان رکھدے آں ،تے خُداوند داشکراداکردے آں تے پاک رُوح ساڈے دلاں وچ وسدا اے ۔
کیہ تسیں یسوع اُتے ایمان رکھدے او؟ کیہ تسیں ایمان رکھدے او پئی پاک رُوح تہاڈے وچ وسدااے ؟ تہاڈے سارے پاپ یسوع اُتے لد دِتے گئے سن ، جدوں اوہنے اپنے بپتسمہ دے راہیں جگ دا سارا پاپ چُک لیا ۔اوہنے بعد وچ سولی اُتے ساڈے پاپاں لئی دُکھ جریا تے سانوں ہمیش دی لعنت توں چھُڈادِتا ۔ ایہہ اصل خوشخبری اے ۔
 
 
راستباز دا اِقرار
 
کسے راستباز دا سچا اِقرار کیہ اے ؟
اِقرار کرنا پئی اوہ ہر دیہاڑے پاپ کردے نیں پر ایس
سچ اُتے ایمان رکھنا پئی یسوع نے اوہناں دے ہر دیہاڑے
دے پاپاں نُوں اَج توں تقریباً ۲۰۰۰؁ ورہے
 پہلاں دھودِتا سی ۔
 
۱ ۔یوحنا ۱ : ۹ آکھدااے ، ” جے اپنےپاپاں دا اِقرارکرئیے تے اوہ ساڈے پاپاں نوں معاف کرن تے سانوں ساری بدکاری توں پاک کرن وچ سچا تے انصاف کرن والا اے۔“ ایہدا مطلب ایہہ ہیگا اے پئی ، اوس بندے نوں جیہڑا پانی تے رُوح دی خوشخبری اُتے ایمان رکھن دافیصلہ کردااے یقیناً اپنے پاپاں دا اِقرار ایہہ آکھدیاں ہویاں کرناچاہی داا ے ۔ ” خُداوندا، میَں بچ نئیں سکدا سگوں اپنی ساری حیاتی پاپ کراں گا ،پرمیَں جان داہاں میَں اپنے سارے پاپاں توں توبہ دی دعاواں دے راہیں بچ نئیں سکدا ۔میَں ایمان رکھداہاں پئی پاپ دی دیہاڑی موت اے تے یسوع دے بپتسمہ تے اوہدے سولی اُتے مرن توں علاوہ کوئی شے میرے پاپاں نوں دھو نئیں سکدا۔ میَں اِقرار کرداہاں ،میَں اَج پاپ کیتااے ،پر میَں ایمان رکھدا ہاں یسوع نے ایہہ پاپ  یردن اُتے ۲۰۰۰؁ ورہے پہلاں ای دھودِتاسی جیہڑا میرے کولوں ہُن ہویااے ۔“جے کوئی بندہ ایس طرحاں دعا منگدااے، اوہدے دل اُتے چھایا ہویا پاپ دا مسئلہ بڑی چھیتی حل ہو جاوے گا۔
اوہ جیہڑے پہلاں ای نویں سریوں جم پئے نیں ،اوہناں نے صرف اپنے پاپاں دا اِقرار کرنا اے
۔ اوہ صرف ایس سچ دا پک کردے نیں پئی یسوع نے پہلاں ای اینوں دھودِتااے ،جیہڑا وی پاپ اوہ کردے نیں ۔کیوں جے یسوع نے بپتسمہ لیا تے پاپیاں لئی ۲۰۰۰؁ ورہے پہلاں مرگیا ،کوئی گل نئیں اوہ کِنے ای ماڑے نیں ، اوہناں دے سارےپاپ مکمل طور اُتے دھودِتے گئے نیں ۔
ایہہ حوالہ جیہڑا اَج اسیں پڑھیا اے راستباز لئی بڑا چنگااے ۔ پرجے اک پاپی ایس آیت نوں پڑھ لیندااے تے اینوں غلط طریقے نال ورتدااے ،اودوزخ وچ ختم ہو جاوےگا ۔ فیر وی ، ایہہ پاک کتاب وچوں سب توں بوہتے غلط ورتے جان والے حوالیاں وچوں اے ۔ایہہ اک لمے چِر لئی مسیحیاں دے وچکار بوہت غلط سوچ وچار دا سبب بنیا رہیا اے ۔
 اک کہاوت ہیگی اے پئی ،ادھورا حکیم ،جان دا خطرہ اے ۔جے اک اناڑی حکیم اوس توں بوہتا کرن دی کوشش کردااے ،جیہدے بارے اوہ ککھ نئیں جان دا ،اوہ خورے اپنے بیمار نوں مارای دیوے ۔
ایہہ زندگی دااصول اے پئی جے کسے نوں بڑا پڑھیا لکھیا ہونا اے تے اپنے کماں نوں بڑے چنگے طریقے نال کرن لئی اوہنوں تجربہ کار ہون دی لوڑ اے ۔ بالکل اِنج ای ایمان دی دنیا وچ ہوندا اے ۔ اوہ لوک جیہڑے خُدا دے کلام دی تعلیم دیندے نیں ،اوہناں نوں ایسے طرحاں سچیائی نوں پچھاننااے جویں اوہ ٹھیک تے صاف طور اُتے لکھی گئی اے تے اوہ جیہڑے اوہناں توں سِکھدے نیں ،اوہناں نوں ایمان رکھنا چاہی دااے ،جویں اوہناں نوں سکھایا جاندااے ۔
جے منادی کرن والا اپنے پچھے چلن والیاں نوں غلط خُدائی تعلیم سکھاؤندے نیں ،یاں جے ایمان  دار پاک کتاب نوں غلط طور اُتے سِکھدے نیں ،دونواں لئی ایہدا نتیجہ صرف سزا تے دوزخ ہووے گا ۔ صرف نویں سریوں جمے ہوئے لوک پاک کتاب نوں ٹھیک طریقے نال سکھا سکدے نیں ۔ ایتھوں  تیک پئی چنگی دوائی بیمار نوں مار سکدی اے جے ایہہ غلط طریقے نال دتی جاندی اے ،تے بالکل اِنج ای خُدا دے کلام نوں سکھن تے سکھاؤن دے بارے وچ وی اے ۔ ایہہ ایناں لوڑی دا اے جویں اگ ساڈی حیاتی وچ۔ پر بالکل جویں ایہہ تباہی کرے گی جے اگ بچیاں دے ہتھ وچ دِتی جاندی اے ،خُدا دا کلام وی غلط ہتھاں وچ ڈاہدی تباہی لیاسکدااے ۔
سانوں راستباز دے اِقرار تے پاپیاں دے اِقرار دے وچکار فرق دی پچھان کرنی اے ۔ ۱ ۔یوحنا  ۱ : ۹ راستبازاں لئی اے ۔ جدوں راستباز بندہ ایمان دے نال خُداوند دے اگے اپنے پاپاں دا اِقرار کردااے ،اوہ اوہناں توں مکتی پا جاندااے ،کیوں جے یسوع نے اَج توں تقریباً۲۰۰۰؁ ورہے پہلاں ای سارے پاپاں نُوں
دھودتاسی ۔
پاپیاں دا ایہہ ایمان رکھنا غلط اے پئی اوہناں دے پاپ جدوں وی اوہ معافی لئی دعامنگدے نیں ہر ویلے دھوئے جاندے نیں ۔ جدوں کوئی نویں سریوں جمیا نئیں ،کیہ اوہدے پاپ صرف اقرار کرن دے راہیں دھوئے جاسکدے نیں ؟
خُدا نصاف کرن والا اے ۔ اوہنے ایس جگ وچ اپنے کلے پُتر نُوں گھلیا تے اوہدے بپتسمہ دے راہیں اوہنوں جگ دے سارے پاپاں نوں چُکن دتا تے اوہنا ں ساریاں نوں مکتی دیندااے جیہڑے اوہدے پانی دے بپتسمہ تے اوہدے صلیبی لہو اُتے ایمان رکھدے نیں ۔ ایس لئی ، جدوں اک راستباز بندہ اپنے پاپاں دااقرار کردااے ،خُدا اوہنوں دَسدااے پئی یسوع نے تقریباً اَج توں ۲۰۰۰؁ ورہے پہلاں ای سارے پاپاں نوں چُک لیا سی ۔ ایہو جیہا بندہ ایس طرحاں سچ نوں پکیاں کردااے پئی اوہدے دل وچ کوئی پاپ نئیں ہیگااے ،بھانویں اوہدابدن ہُن وی پاپ کردا اے ۔