خطبے

مضمون 3: پانی تے رُوح دی خوشخبری

[3-7 باب] <عبرانیوں ۷:۱ ۔ ۲۸> کہانت بدل گئی

>عبرانیوں ۷:۱ ۔ ۲۸>
”تے ایہہ ملکِ صِدقِ سالم دا بادشاہ ۔ خُدا تعالیٰ دا کاہن سداکاہن رہندااے ۔ جدوں ابرہام بادشاہواں نُوں قتل کرکے واپس آؤنداسی تے ایسے نے اوہدا استقبال کیِتا تے اوہدے لئی برکت چاہی ۔ایسے نُوں ابرہام نے ساریاں شیواں دی دہ یکی دِتی ۔ایہہ اوّل نے اپنے ناں دے مطلب وانگر راستبازی دا بادشاہ اے تے فیر سالم یعنی صلح دابادشاہ ۔ایہہ بے باپ بے ماں بے نسب نامہ اے۔ نہ اوہدی عمر داشروع نہ حیاتی دا اخیر سگوں خُدا دے پُتر وانگر ٹھہریا ۔ایس لئی غور کرو پئی کِنج دا وڈیرہ سی جنہوں قوم دے وڈیر ے ابرہام نے لُٹ دے ودھیا توں ودھیا مال دہ یکی دِتی ۔ہُن لاوی دی اولاد وِچوں جیہڑے کہانت دا عہدہ پاؤندے نیں اوہناں نُوں حکم اے پئی اُمت یعنی اپنے بھراواں توں ایتھوں تیک پئی اوہ ابرہام ای دی نسل وِچوں جمے نیں شریعت دے مطابق دہ یکی لین ۔ پرجیہدانسب نامہ اوہناں توں وَکھ اے اوہنے ابرہام توں دہ یکی لئی تے جیہدے نال وعدے کیتے سَن اوہدے لئی برکت چاہی ۔تے ایہدے وِچ کلام نئیں ایں پئی نِکا وڈے توں برکت پاؤندااے ۔ تے ایتھے تاں مرن والے بندے دہ یکی لیندے نیں ،پر اوتھے اوہو ای لیندااے جیہدے حق وِچ گواہی دِتی جاندی اے پئی اوہ جیوندااے ۔ ایس لئی اَسیں آکھ سکد ے آں پئی لاوی نے وی جیہڑا دہ یکی لیندا اے ابرہام  دے راہیں دہ یکی دِتی ۔ایس لئی پئی جیہڑے ویلے ملکِ صِدق نے ابرہام  نُوں جی آیاں آکھیا سی اوہ اوس ویلے تیک اپنے پیو دے جثے وِچ سی ۔ ایس لئی جے بنی لاوی دی کہانت وِچوں کاملیت مِلدی اے (کیوں جے اوسے دے راہیں اُمت نُوں شریعت ملی سی )توفیر کیہ لوڑسی پئی دُوجا کاہن ملکِ صِدق دے وانگر جمے تے ہارون دے طریقے دا نہ گِنیا جاوے ؟تے جدوں کہانت بدل گئی تے شریعت دا وی بدلنا ضروری اے۔ کیوں جے جیہدے بارے ایہہ گلاں آکھیاں جاندیاں نیں اوہ دُوجے قبیلے وِچ شامل اے جیہدے وِچوں کسے نیں چڑھاویاں دی تھاں دی سیوانہیں کیتی ۔ ایس لئی  ظاہر اے پئی ساڈا خُداوند یہوداہ وِچوں جمیا تے ایس فِرقے دے حق وِچ موسیٰ نے کہانت دا کوئی ذکر نئیں کیِتا ۔تے جدوں ملکِ صِدق دے وانگر اِک ہور ایہو جیہا کاہن جمن والا سی ۔جیہڑا بدنی حکماں دی شریعت دے موافق نئیں سگو ں سدا رہن والی حیاتی دی طاقت دے مطابق مقرر ہووے تے ساڈا دعویٰ ہوروی صاف ہوگیا۔ کیوں جے اوہدے حق وِچ ایہہ گواہی دِتی گئی اے پئی تُوں ملکِ صِدق دے وانگر سدالئی کاہن ایں ۔ایس لئی پہلاحکم ماڑاتے فضول ہون دی وجہ تو ں مک گیا ۔ (کیوں جے شریعت نے کسے شے نُوں پوریاں نئیں کیِتا)تے اوہدی تھاں اُتے چنگی اُمید رکھی گئی جیہدے وسیلے نال اَسیں خُدا دے نیڑے جا سکدے آں ۔تے کیوں جے مسیح کا مقرر ہونا بغیر شرط دے نہ ہویا ۔(کیوں جے اوہ تے بغیر شرط دے کاہن مقرر ہوئے نیں پر ایہہ شرط دے نال اوہدے وَلوں ہویا جنہیں ایہدے بارے آکھیا پئی خُداوند نے شرط رکھی اے تے اوہدے توں پھرے گا نئیں پئی تُوں سدالئی کاہن ایں)۔ایس لئی یسوع اِک چنگے عہد دا ضامن ٹھہریا ۔تے ایس لئی موت دی وجہ تو ں قائم نہ رہ سکدے سَن ایس لئی اوہ تے بوہت سارے کاہن مقرر ہوئے ۔پر کیوں جے ایہہ سدالئی قائم رہن والا اے ایس لئی ایہدی کہانت سدا لئی اے ۔ایسے لئی جیہڑے اوہدے راہیں خُدا دے کول آؤندے نیں اوہ اوہناں نوں ساری دی ساری مکتی دے سکدا اے کیوں جے اوہ اوہناں دی شفاعت لئی سدالئی جیوندا اے ۔ ایس لئی ایہو جیہا ای وڈا کاہن ساڈے وارے وِچ وی سی جیہڑا پاک تے بے عیب تے بےداغ ہوئے تے پاپاں توں اَڈ تے اَسماناں توں اُچا کیِتا گیا ہووے ۔ تے اوہناں وڈے کاہناں ورگا ایہدا بھکاری نہ ہووے پئی ہردیہاڑے پہلاں اپنے پاپاں تے فیر اُمت دے پاپاں لئی چڑھاوے چڑھائے کیوں جے ایہنوں اوہ اِکو ای واری کر چُکیا جیہڑے ویلے اپنے آپ نُوں قربان کر دِتا ۔ ایس لئی پئی شریعت تے ماڑےبندیاں نُوں  وڈاکاہن مقررکردی اے پر اوس قسم دا کلام جیہڑی شریعت دے بعد کھاہدی گئی اوس پُتر نُوں مقرر کردا اےجیہڑاسدا لئی کامل کیِتا گیا اے ۔ “
 
 
یسوع نے اَسمانی کہانت دا اِنتظام کیِتا
 
کیہڑاوڈااے،وڈاکاہن ملکِ صِدق یاں
ہارون دی نسل وِچوں زمینی وڈا کاہن؟
وڈاکاہن ملکِ صِدق
 
پُرانے عہد نامہ وِچ ملکِ صِدق ناں دا اِک وڈاکاہن موجودسی ۔ ابرہام دے زمانے وِچ ،کِدر لاعمر
تے بادشاہواں نے اوہدے نال اِکٹھ کیِتا ،اوہناں دے نال سدوم تے عمورہ دی ساریاں شیواں چُک لیاں ۔ابرہام نے اپنے سکھائے ہوئے کامیاں نُوں ہتھیار دِتے ،جیہڑے اوہدے خانوادے وِچ جمے سَن تے اوہناں نُوں کِدرلاعمر تے اوہدے نال اکٹھ کرن والیاں دے خلاف جنگ لئی گھلیا ۔
اوتھے ،اوہنے کِدرلاعمر ،عیلام دے بادشاہ تے اوہدے نال اکٹھے بادشاہواں نُوں ہرا دِتا تے اپنے بھتیجے لُوط تے اوہدے سارے سامان نُوں واپس لیایا۔اپنے ویریاں نُوں ہراکے واپس آؤن دے بعد ،ملکِ صِدقِ سالم دا بادشاہ تے خُدا دا ساریاں توں ودھیا کاہن روٹی تے مَے لیایا تے ابرہام نُوں برکت دِتی ۔ تے ابرہام نے اوہنوں ہر شے دا ۱۰ واں حصہ دِتا(پیدائش ۱۴ باب)۔
پاک کتاب وِچ وڈاکاہن ملکِ صِدق تے اوہدے نسب نامہ دے وڈے کاہناں دی وڈیائی تفصیل دےنال بیان کیتی گئی اے۔ وڈاکاہن ملکِ صِدق ” امن داراجہ  “ تے  ” راستبازی دا راجہ  “ ،بے باپ ،بے ماں تے بے نسب نامہ سی۔ نہ دِناں دا شروع تے نہ حیاتی دا اخیر رکھدے ہویاں ،سگوں خُدا دے پُتر وانگر بنیا ،اوہ سدالئی کاہن دے وانگر قائم رہندا اے ۔
پاک کتاب سانُوں یسوع مسیح دی وڈیائی اُتے ،جیہڑا ملکِ صِدق دے نسب نامے داوڈا سی ،نویں عہد نامہ وِچ یسوع دی کہانت تے پُرانے عہد نامہ دے وڈے کاہن ہارون دے نال موازنہ کرن دے راہیں احتیاط دےنال غورکرن لئی آکھدی اے۔
لاوی دی اولاد کاہن بن دے سَن تے لوکاں کولوں دہ یکی لیندے سَن ،ایہو ای ،اوہناں دے بھرا ،ایتھوں تیک پئی جے اوہ ابرہام دی نسل سَن ۔پرجدوں ابرہام نے وڈے کاہن ملکِ صِدق نُوں دہ یکی دِتی ،لاوی اوس ویلے اپنے پیو دےجثے وِچ سی ۔
کیہ پُرانے عہدنامہ دے کاہن یسوع توں وڈے سَن؟ ایہہ پاک کتاب وِچ واضح کیتا گیا اے ۔ کیہ یسوع دھرتی دے وڈے کاہناں توں وڈا اے ؟کنوں کس توں برکت ملنی چاہی دی اے ۔ عبرانیوں دے لکھاری نے ایہدے بارے وِچ شروع توں گل کیتی اے ۔  ” تے ایہدے وِچ کلام نئیں پئی نِکا وڈے توں برکت پاؤندا اے ۔ “ ابرہام نے وڈے کاہن ملکِ صِدق دے راہیں برکت پائی ۔
سانُوں کِنج اپنے ایمان وِچ جیوندارہنا اے ؟ کیہ سانُوں پُرانے عہد نامہ دے پاک تنبُو دے اکٹھ دے چڑھاوے دے بندوبست دے راہیں خُدا دے حکماں اُتے انحصار کرنا چاہی دا اے ،یاں کیہ سانُوں یسوع مسیح اُتے انحصار کرنا چاہی دا اے جیہڑا ساڈے کول اپنی پانی تے رُوح دی قربانی دے راہیں اَسمانی وڈے کاہن دے وانگر آیا ؟
انحصار کردے ہویاں اَسیں کیہڑی تشریح نُوں چُن دے آں ، کیہ اَسیں  برکت  یافتہ یاں لعنت
یافتہ ہاں ۔ کیہ اَسیں خُدا دے کلام دے وانگر جیوندے تے ہر دیہاڑے چڑھاوے چڑھاؤندے آں،یاں کیہ اَسیں مکتی اُتے ایمان رکھن نُوں چُن دے آں جیہڑی یسوع سانُوں پانی تے خُون دے نال اِکو ای وار سدالئی اپنے آپ نُوں پیش کرن دے راہیں عطا کرچُکیا اے؟ سانُوں ایناں دوآں وِچوں اِک نُوں چُننا ایں ۔
پُرانے عہد نامے دے دِناں وِچ ،اِسرائیل دے لوکاں نے ہارون تے لاوی دی نسل وَل ویکھیا ۔ نویں عہد نامہ دے دِناں وِچ ،جے ساڈے کولوں پچھیا جاندا اے کیہڑا وڈا اے، یسوع یاں ہارون دی نسل دےکاہن ،فیر، سوال دے اَڈ اَسیں جواب د ے سکدے آں پئی یسوع وڈا اے ۔ پر جد پئی لوک ایس سچ نُوں کھُل کھلا کے جان دے نیں ،تھوڑےجیہے اپنے ایمان وِچ ایہدی پیروی کردے نیں۔
پاک کتاب سانُوں ایس سوال دا اِک پکاجواب دیندی اے ۔ ایہہ دسدی اے پئی یسوع ، جیہڑا اِک وکھری پیڑھی وِچوں سی جنہاں وِچوں کوئی وی کدی چڑھاوے چڑھاؤن دی سیوا نئیں کر چُکیا سی ،نے اَسمانی کہانت نُوں سنبھالیا۔ ” تے جدوں کہانت بدل گئی تے شریعت دا وی بدلنا ضرور اے ۔ “
خُدا نے موسیٰ دے راہیں اِسرائیل دے لوکاں نُوں حکم تے شریعت دی ۶۱۳ تفصیلی شِقاں دِتیاں سَن ۔ موسیٰ نے لوکاں نُوں شریعت تے حکماں دے وانگر رہن لئی آکھیا تے لوک اِنج کرن لئی اکٹھےہوئے ۔
 
کیوں خُدا نے پہلے عہد نُوں اِک پاسے
کر دِتا تے دُوجے نُوں قائم کیتا ؟
کیوں جے اِنسان پہلے عہد وانگر حیاتی
بسرکرن لئی بوہت ماڑاسی ۔
 
پاک کتاب وِچ ،اِسرائیل دے لوکاں نیں توریت : پیدائش ،خروج ، احبار ،گنتی تے استثنا وِچ دِتے گئے خُدا دے حکماں دے راہیں حیاتی بسر کرن دی قسم چُکی ۔خُدا نے اوہناں لئی ہر حکم دا اعلان کیِتا تے اوہناں نیں اَن جھک ہوکے ہر حکم اُتے  ” ہاں “ آکھیا۔
ایس لئی، اَسیں ویکھ سکدے آں پئی اِستثنا دے بعد،یعنی یشوع توں ، اوہ کدی خُدا دے حکماں دے وانگر نئیں رہے ۔ ۱۔سلاطین تے ۲۔سلاطین توں یعنی قاضیاں توں ،اوہناں نیں اپنے آگوآں نُوں بے عزت کرنا شروع کردِتا ،تے بعد وِچوں ،اوہ اینے سڑ بُجھ گئے سَن پئی اوہناں نیں پا ک تنبُو دے اکٹھ دے چڑھاوے دے بندوبست نُوں بدل دِتا ۔
تے اخیر وِچ ملاکی وِچ، اوہ چڑھاوے لئی خُدا دےاِک بے ریا چڑھاوے نُوں پیش کرن دی ہدایت دے باوجود بے چجے پسُو لیائے ۔ اوہناں نیں کاہناں نُوں آکھیا ، ” مہربانی کرکے اینوں اَکھوں اوہلے کرو۔مہربانی کرکے اینوں ای نُوں قبول کرو۔“ خُدا دی شریعت دے وانگر چڑھاوے چڑھاؤن دی تھاں اُتے ، اوہناں نیں اینوں اپنی مرضی نال بدل دِتا ۔
اِسرائیل دے لوکاں نے کدی وی خُدا دی شریعت نُوں ساری دی ساری نُوں قائم نہ رکھیا ایتھوں تیک پئی پُرانے عہد نامے دےدِنان وِچ اِک واری وی نئیں ۔ اوہ بھُل گئے تے سدھار پُنے وِچ مکتی نُوں اَکھیوں اوہلے کردِتا جیہڑی بندوبست وِچ وکھائی گئی سی ۔ ایس لئی خُدا نُوں چڑھاوے دے بندوبست نُوں تبدیل کرنا پیا ۔ یرمیاہ وِچ خُدا نے آکھیا ، ” میَں اِسرائیل دے خنوادے تے یہوداہ دے خنوادے نال نواں عہد بنھاں گا ۔ “
آؤ اَسیں یرمیاہ ۳۱ : ۳۱۔ ۳۴ ویکھیے ۔ ” ویکھ اوہ دِن آؤندے نیں خُداوند فرماؤندا اے جدوں میَں اِسرائیل دے خنوادے تے یہوداہ دے خنوادے نال نواں عہد بنھاں گا ۔ اوس عہد وانگر نئیں جیہڑا میَں اوہناں دے پیو دادے نال کیتا جدوں میَں اوہنا ں اُتے اپنا ہتھ رکھیا تاں پئی اوہناں نُوں مصر دے ملک وِچوں کڈھ لیاواں تے اوہناں نے میرے اوس وعدے نُوں توڑیا ، ایتھوں تیک پئی میَں اوہناں دا مالک ساں خُداوند فرماؤندا اے ۔سگوں ایہہ اوہ وعدہ اے جیہڑا میَں اوہناں دِناں دے بعد اِسرائیل دے خنوادے نال بنھاں گا ۔ خُداوند فرماؤندا اے میَں اپنی شریعت اوہناں دے دِلاں وِچ رکھا ں گا تے اوہناں دے دِل اُتے اوہنوں لکھاں گا تے میَں اوہناں دا خُدا ہوواں گا تے اوہ میرے لوک ہون گے ۔ تے اوہ فیر اپنے اپنے گوانڈھی تے اپنے اپنے بھرانُوں ایہہ آکھ کے نئیں سکھاؤن گے پئی خداوند نُوں پچھانو کیوں جے نِکے توں لے کےوڈے تیک اوہ سارے مینوں جانن گے خُداوند فرماؤندا اےایس لئی پئی میَں اوہناں دیاں بھیڑیاں کرتُوتاں معاف کردیواں گا تے اوہناں دے پاپ نُوں یاد نہ کراں گا۔ “
خُدا نے آکھیا پئی اوہ اِک نواں وعدہ قائم کرےگا ۔اوہ پہلوں ای اِسرائیل دے لوکاں نال اِک وعدہ قائم کر چُکیا سی ،پراوہ خُدا دے کلام دے وانگر حیاتی بسرکرن وِچ ناکام ہوگئے ۔ایس طرحاں ،اوہنے اپنے لوکاں نال مکتی دا اِک نواں وعدہ قائم کرن دا فیصلہ کیِتا ۔
اوہناں نے   خُدا دے اَگے اِک قسم کھاہدی سی  ” اَسیں ضرور صرف تیری پوجا کراں گے تے تیرے کلام تے حکماں دے مطابق حیاتی بسرکراں گے ۔ “ خُدا اوہناں نُوں دس چُکیا سی ، ” تُسیں میرے اَگے دوجے بُتاں نُوں نئیں رکھو گے “ تے اِسرائیلی آکھ چُکے سَن ، ” یقیناً اَسیں کدی کسے بُت نُوں نئیں پوجاں گے ۔صرف تُوں ساڈا کلا خُدا ایں ۔ کوئی دوجا ساڈا خُدا نئیں ہو سکدا ۔“ پر اوہ اپنی قسم اُتے قائم نہ رہ سکے ۔
شریعت دا دِل ۱۰ حکماں دے آل دوالے ہیگا اے :  ” میرے اَگے تُوں بُتاں دی پوجا نہ کریں۔ تُوں اپنے لئی کوئی ہتھاں نال گھڑکے بنائی ہوئی مورت نہ بناویں ۔نہ کسے دی صورت بناویں ،یاں کسے شے ورگی نہ بناویں تے اوہناں دے اَگے نہ جھکیں تے نہ اوہناں دی سیوا کریں ۔ چیتا کرکے تُوں سبت دادِن پاک مننا ۔تُوں خُداوند اپنے خُدا دا ناں بے فائدہ نہ لویں ۔اپنے پیوتے ماں دی عزت کریں ۔ تُوں قتل نہ کریں ۔تُوں زنانی نال بدکاری نہ کریں ۔تُوں چوری نہ کریں ۔تُوں اپنے گوانڈی دے خلاف جھوٹی گواہی نہ دیویں۔تُوں اپنے گوانڈھی دے گھر دا لالچ نہ کریں۔“  (خروج۲۰ باب)۔
ایہہ ہور ۶۱۳تفصیلی شِقاں وِچ وی ونڈیا گیا اے ،جیہڑیاں اوہناں نُوں اپنی ساری حیاتیاں وِچ قائم رکھنیاں سَن ۔ ” دھیاں دے نال کیہ  نہ کرناتے پُتراں دے نال کیہ نہ کرنا ،تے مترئی ماں دے نال کیہ کرنا۔۔۔“ خُدا دی شریعت نے اوہناں نُوں سارے چنگے کم کرن دا تے کوئی بھیڑا کم نہ کرن دا حکم دِتا ۔ایہہ ۱۰ حکم تے ۶۱۳ تفصیلی شِقاں نیں ۔
فیر وی ،ساری اِنسانی پیڑھی دے وِچکار ایتھوں تیک پئی اِک بندہ وی موجود نئیں ہیگا جیہڑا اوہدی شریعت دی ساریاں شِقاں نُوں قائم رکھ سکیاہووے ۔ ایس لئی خُدا نُوں اوہناں دے سارے پاپاں توں اوہناں نُوں بچاؤن لئی دُوجی راہ تیار کرنی پئی ۔
کدوں کہانت بدلی ؟یسوع دے ایس جگ وِچ آؤن دے بعد ،کہانت بدل گئی ۔یسوع نے ہارون دی نسل دے سارے کاہناں کولوں کہانت لے لئی ۔اوہنے پاک تنبُو دے چڑھاوےدی قربانی نُوں اِک پاسے رکھ دِتا جیہڑا پئی لاوی دی نسل دےکاہناں دا جماندرُو حق سی ۔ اوہنے کلے نیں ای ودھیا اَسمانی کہانت دا بندوبست کیِتا ۔
اوہ ایس جگ وِچ ،ہارون دی نسل وانگر نئیں ،سگوں یہوداہ ،بادشاہواں دے خنوادے وانگر آیا ۔اوہنے اپنے بپتسمہ تے سُولی اُتے لہو دے راہیں اپنے آپ نُوں اِک چڑھاوے وانگر پیش کیِتاتے ساری اِنسانی پیڑھی نُوں اوہناں دے پاپاں توں مکتی دِتی ۔
اپنے آپ نُوں قربان کرن دے راہیں اوہنے ساڈے لئی پاپ دے مسئلے نُوں حل کرنا سوکھا کر دِتا ۔ اوہنے اپنے بپتسمہ تے لہو دےچڑھاوے دے راہیں اِنسانی پیڑھی دے سارے پاپاں نُوں دھو دِتا ۔ اوہنےہمیش لئی سارے پاپاں لئی اِک ہمیشہ دا چڑھاوا پیش کیِتا ۔
 
 
کہانت وِچ تبدیلی دے نال  نال شریعت وِچ وی اِک تبدیلی موجود سی
 
مکتی دا بدلیا ہویا قانون کیہ اے؟
یسوع مسیح دا ہمیش دا چڑھاوا
 
سوہنےبیلیو ،پُرانے عہد نامہ دی کہانت نویں عہد نامہ وِچ بدل گئی ۔ پُرانے عہد نامہ دے دِناں وِچ ، ہارون دی نسل ، لاوی دے خنوادے دے وِچکار وڈےکاہن ، نے اِسرائیلیاں دے پچھلے سال دے پاپاں دے بدلے کفارہ دین لئی قربانی چڑھائی ۔ وڈا کاہن بوہتےپاک تھاں تے جانداسی ۔اوہ چڑھاوے دے پسُو دے لہو نال ترس والی تھاں دے اَگے جاندا سی ۔ صرف وڈاکاہن پردے دے پچھے جا سکدا سی ،جیہڑی پئی بوہتی پاک تھاں سی۔
پر یسوع دے آؤن دے بعدوں ،ہارون دی کہانت اوہدے کول آگئی ۔ یسوع نے ہمیش دی کہانت نُوں سانبھ لیا ۔ اوہنے اپنے آپ نُوں پیش کرنے دے راہیں ہمیش دی کہانت دا بندوبست کیِتا ،تاں پئی ساری اِنسانی پیڑھی اپنے سارے پاپاں توں مکتی یافتہ ہو سکے ۔
پُرانے عہد نامہ وِچ ، وڈے کاہن نُوں اپنے سارے لوکاں لئی بندوبست کرن توں پہلاں وچھے دے سِر اُتے اپنے ہتھاں نُوں رکھن دے راہیں اپنے پاپاں دا کفارہ دینا پیندا سی ۔ ہتھاں دے رکھے جان دے راہیں اوہ اپنے پاپاں نُوں ،ایہہ آکھدے ہویاں لدداسی ، ” یا خُدایا ،میَں پاپ کر چُکیا ہاں ۔“ فیر اوہ پسُو نُوں قربان کردا تے ترس کھان والی تھاں اُتے اوہدے اَگے اوہدا لہو ۷ واری تراؤنک دا سی ۔
جے وڈاکاہن ہارون آپ مکمل نئیں سی ، تُسیں سوچ سکدے او لوک کنے ماڑے سَن ۔لاوی دا پُتر ، وڈاکاہن ہارون خود آپ پاپی سی ۔ ایس لئی اوہنوں اپنے آپ دے پاپاں تے  اپنے خنوادے لئی کفارہ دین
لئی اِک وچھا قربان کرنا پینداسی ۔
یرمیاہ ۳۱باب وِچ خُداوند نے آکھیا ، ” میَں وعدے نُوں توڑاں گا میَں تُہاڈے نال وعدہ کر چُکیا ہاں ،پر تُسیں ایہدے اُتے قائم نئیں رہے۔ایس لئی میں وعدے نُوں اِک پاسے رکھاں گا ، جیہڑا تُہانُوں صاف نہ کر سکیا تے تُہانُوں مکتی دا اِک نواں وعدہ دیواں گا ۔میَں تُہانُوں ہور اپنے حکماں دے راہیں نئیں بچاواں گا ،سگوں تُہانُوں پانی تے رُوح دی خوشخبری دے راہیں مکتی پیش کراں گا ۔“
خُدا نے سانُوں نواں وعدہ دِتا ۔جدوں ویلا آیا ،یسوع بندے دی شکل وِچ ،ایس جگ وِچ آیا، جگ دے پاپ چُکن لئی اپنے آپ نُوں پیش کیِتا تے سانوں بچان لئی سُولی اُتے لہو وگایا جیہڑے اوہدے اُتے ایمان رکھدے نیں ۔ اوہنے اپنے بپتسمہ دے راہیں ساری اِنسانی پیڑھی دے پاپاں نُوں چُک لیا ۔
خُدا دی شریعت اِک پاسے رکھ  دِتی تے بدل گئی ۔اِسرائیلی مکتی یافتہ ہو سکدے سَن جے اوہ خُدا دی شریعت دے مطابق جیوندے رہندے ، پر اوہ اِنج کرن وِچ ناکام ہو گئے ۔ ” ایس لئی پئی شریعت  دے راہیں تے پاپ دی پچھان ای ہُندی اے۔ “ (رومیوں ۳ : ۲۰)۔
خُدا اِسرائیلیاں نُوں احساس دوانا چاہنداسی پئی اوہ پاپی سَن تے پئی شریعت اوہناں نُوں نئیں بچا سکدی سی ۔اوہنے اوہناں نُوں پانی تے رُوح دی مکتی دی شریعت دے راہیں چھُٹکارہ دِتا ، اوہناں دے کماں دے راہیں نئیں ۔اپنی بے حد محبت وِچ خُدا نے سانُوں اِک نواں وعدہ دِتا ،جیہدے راہیں اَسیں یسوع دے بپتسمہ تے لہو دے وسیلے جگ دے سارے پاپاں توں مکتی یافتہ ہو سکدے آں۔
جے تُسیں اوہدے بپتسمہ تے لہو دا مطلب جانیوں اَڈ یسوع اُتے ایمان رکھدے او، تُہاڈا سارا ایمان بے فائدہ اے ۔جدوں تُسیں ایہہ کردے او۔ تُسیں اوہدے توں بوہتا دُکھ اُٹھاندے او جدوں تُسیں یسوع اُتے اُکاایمان نئیں رکھدے سی ۔
خُدا نے آکھیا پئی اوہنوں اِنسانی پیڑھی نُوں اوہناں دے پاپاں تُوں بچاؤن لئی اِک نواں وعدہ قائم کرنا سی ۔ نتیجہ دے طور اُتے ،اَسیں ہُن اپنے کماں دی شریعت دے راہیں نئیں ،سگوں پانی تے لہو دے وسیلےمکتی دی راستباز شریعت دےراہیں مکتی یافتہ ہُندے آں ۔
ایہہ اوہدا سداداوعدہ سی تے اوہنے ساڈے لئی اپنا وعدہ پورا کیِتا جیہڑے یسوع اُتے ایمان رکھدے آں ۔اوہنے سانُوں یسوع دی وڈیائی بارے دَسیا ۔اوہنے سانُوں پُرانے عہد نامہ وِچ ہارون دی نسل دے کاہناں نال اوہداموازنہ کرن دے وسیلے دسیا پئی اوہ کناں وڈا اے ۔
اَسیں یسوع دے پانی تے لہو دے وسیلےنال مکتی اُتے ایمان رکھن دے  راہیں خاص بن  جاندے
آں ۔ مہربانی نال ایہدے اُتے احتیاط نال دھیان کرو۔  تُہاڈا پادری کناں پڑھیا لکھیا تے مٹھی بولی بولن والا اے،ایہہ کوئی مطلب نئیں رکھدا ۔ اوہ کویں یسوع توں وڈا ہو سکدا اے ؟ کوئی رستہ موجود نئیں ہیگا ۔اَسیں صرف پانی تے لہو دی خوشخبری دے وسیلے نال مکتی یافتہ ہوسکدے آں ، کدی وی سدھے طریقے نال خُدا دے حکماں دا آکھا منن دے راہیں نئیں ۔ کیوں جے کہانت بدل گئی سی ،یعنی مکتی دی شریعت وی بدل گئی سی ۔
 
 
خُدا دی محبت دی اُچیائی
 
کیہڑی شے اعلیٰ اے ،خُدا دی محبت
یاں خُدا دی شریعت ؟
خُدا دی محبت
 
اَسیں صرف مکتی یافتہ ہو سکدے آں جدوں اَسیں یسوع اُتے ایمان رکھدے آں ۔ ایہہ جان دیاں ہویا ں پئی یسوع نے سانُوں کویں بچایا ،ساڈے لئی خُدا دی محبت کنی وڈی اے ۔ فیر حکماں دے ایمان تے خُدا دی محبت دی وڈیائی دےایمان دے وِچکار کیہ فرق اے ؟
اِنصاف کرن والے خُدا دے کلام دی تھاں اُتے اپنے آپ دی فرق پاؤن والی خُدا دی تعلیم تے اپنے ای تجربیاں دے نال بوہتی لوڑ نوں نال ملاؤندے نیں ۔ایس لئی ، یسوع اُتے کھرا تے رُوحانی ایمان پانی تے رُوح دے وسیلے نال کامل کیتی گئی مکتی دی وڈیائی اُتے ایمان رکھن  دے راہیں مل دا اے ۔
ایتھوں تیک پئی اَج ، بوہت سارے لوک آکھدے نیں پئی نسلی پاپ معاف کیِتا جاندا اے ،پر کیہ اوہناں نُوں ہر دیہاڑے دے پاپاں لئی ہر دیہاڑے توبہ کرنی ایں ۔ بوہت سارے لوک ایہدے اُتے ایمان رکھدے نیں تے پُرانے عہد نامے دے حکماں دے مطابق اپنی حیاتیاں بسر کرن دی کوشش کردے نیں۔ اوہ ہُن تیک یسوع دی مکتی دی وڈیائی توں بے خبر نیں جیہڑی پانی تے رُوح دے راہیں ملی سی ۔
پُرانے عہد نامے وِچ ،اِسرائیلیاں نُوں اپنے پاپاں توں مکتی پاؤن لئی خُدا دی شریعت دے مطابق
حیاتی بسر کرنی پینی سی ۔ پر اوہ مکتی نہ پاسکے ۔کیوں جے خُدا ساڈی کمزوریاں نُوں جان دا اے تے ایہہ سچ اے پئی اَسیں ادھورے آں ،اوہنے اپنے حکماں نُوں اِک پاسے رکھ دِتا ۔اَسیں کدی وی کلے اپنے کماں دے راہیں مکتی نئیں پا سکدے ۔ یسوع نے آکھیا پئی اوہ سانُوں اپنی پانی تے رُوح دی خوشخبری دے راہیں مکتی دیوے گا ۔ اوہنے آکھیا، ” میَں تُہاڈے وِچوں ساریاں نُوں تُہاڈے پاپاں توں اپنے آپ چھڈاواں گا ۔“ خُدا نے ایسے طرحاں پیدائش وِچ پیشنگوئی کیتی سی ۔
” اوہ تیرے سِر نُوں پھیوے گا تے تُوں اوہدی اَڈی اُتے کٹیں گا۔“ (پیدائش ۳: ۱۵)۔آدم تے حوا دے پاپ کرن تے ڈِگن دے بعد ، اوہناں نے خُدا کولوں اپنی بھیڑی کرتُوت لُکان لئی اِک کوشش دے طورتے انجیر دے پتیاں دے لیڑے بنائے ۔ خُدا نے اوہناں نُوں سدیا تے مکتی دے نشان دے طور تے چمڑے دے لیڑے پوائے ۔ پیدائش مکتی دیاں دو قِسم دے لیڑیاں دی گل کردی اے ۔اِک انجیر دے پتیاں نال بنے ہوئے سَن تے دوجے چمڑے نال بنے ہوئے سَن۔ تُسیں کیہڑے سوچ دے او، چنگےنیں ۔بناں شک چمڑے دے لیڑے چنگے نیں کیوں جے پسُو دی حیاتی بندے نُوں بچان لئی پیش کیتی جاندی سی ۔
انجیر دے پتیاں دے لیڑے بڑی چھیتی سُک جاندے نیں ۔جویں تُسیں جان دے او، انجیر دا پتا ۵ اُنگلاں دے نال اِک ہتھ وانگر نظر آؤندا اے ۔ ایس لئی انجیر دے پتیاں دے لیڑے پاؤن دا مطلب اے کسی دا اپنے چنگے کماں دے پچھے لُکنا۔جے تُسیں انجیر دے پتیاں دے لیڑے پائے تے بہہ گئے ،پتے بڑی چھیتی ٹوٹیاں وِچ پاٹ جان گے ۔جدوں میَں اِک بچہ ساں ،میَں سپاہی وانگر کھیڈن لئی اراروٹ دے پتیاں دی زرہ بکتر بناؤندا ہُنداساں ۔ کوئی مطلب نئیں رکھدا میَں کِنی احتیاط نال اوہناں نُوں پایا اوہ دِن دے مُکن تیک پاٹ کے وَکھ وَکھ ہو جاندے سَن ۔ ایسے طریقے نال اِنسانی پیڑھی دا کُولا ماس پاکیزگی نوں اوکھیا ں بناؤندا اے ۔
پر پانی تے لہو دی مکتی نیں ،یسوع دے بپتسمہ تے اوہدی سُولی اُتے موت نیں پاپیاں نُوں خُدا دی محبت دی وڈیائی دی گواہی دین لئی لوڑ توں بوہتا بچایا ۔ اِنج ایہہ اے پئی کویں خُدا کی محبت خُدا کی شریعت توں وَدیا اے  ۔
 
  
اوہ جیہڑے ہُن تیک خُدا دی شریعت اُتے ایمان رکھدے نیں
 
کیوں اِنصاف کرن والے ہر دیہاڑے اپنے
کماں نال نویں لیڑے بناؤندے نیں ؟
کیوں جے اوہ نئیں جان دے پئی اوہناں دے
کم اوہناں نُوں راستباز نئیں بنا سکدے ۔
 
اوہ جیہڑے انجیر دے پتیاں نال اپنے لیڑے بناؤندے نیں قانون والیاں حیاتیاں بسرکردے نیں ۔ایناں گواچےایمانداراں نُوں اپنے لیڑیاں نُوں اِک باقاعدہ بنیاد اُتے بدلنا ایں۔ اوہناں نُوں ہر دیہاڑے نویں لیڑے بناؤنے نیں جدوں اوہ گرجے جاندے نیں ۔ ” سوہنے خُدایا،میَں پچھلے ہفتے بوہت پاپ کیتا اے ۔پر یا خُداوندا ،میَں ایمان رکھدا ہاں پئی تُوں مینوں سُولی اُتے مکتی دِتی ۔یا خُداوند ا ،مہربانی نال میرے پاپاں نُوں سُولی لہو نال دھو دے ! “ اوہناں نیں لیڑیاں دا اِک نواں جوڑا ٹھیک اوسے ویلے اوتھے سیوں لیا۔ ” آہا،خُداوند دی تعریف ہووے۔ ہیلیلویاہ ! “
پر اوہناں نیں بڑی چھیتی گھر وِچ لیڑیاں دادوجا جوڑا بنانا ایں ۔کاہدے لئی ؟ کیوں جے اوہناں دے پُرانے جوڑے پاٹ گئے نیں ۔ ” سوہنے خُداوندا ،میَں پچھلے ۳ دناں توں فیر پاپ کر چُکیا ہاں ۔مہربانی نال مینوں معاف کردے ۔ “ اوہ ہر واری توبہ دے نویں لیڑے سیوندے تے پاؤندے نیں ۔
شروع شروع وِچ لیڑے خورے کئی دِناں تیک چلن،پر تھوڑی دیربعد ، اوہناں نُوں ہر دیہاڑے اِک نویں جوڑے دی لوڑ اے ۔ جویں اوہ خُدا دی شریعت دے مطابق کدی جیوندے نئیں رہ سکدے ،او ہ اپنے آپ وِچ شرمندے ہو جاندے نیں ۔ ” ہائے ، ایہہ بوہت دُکھی کردااے ۔یا خُداوند ا ،ہائے ،یا خُداوندا ،میَں اِک واری فیر پاپ کر لیا اے ! “ تے اوہناں نیں توبہ دے نویں لیڑے بناؤنے نیں ۔”ہائے یا خُداوندا ، اَج انجیر دے پتیاں دے لیڑے  بناؤنے بوہت اوکھے نیں ۔“ اوہ اِک نواں جوڑا سیون لئی سخت محنت کردے نیں ۔
جدوں کدی ایہوجیہے لوک خُداوندنُوں پکاردے نیں ،ایہہ اوہناں دے پاپاں دا اقرار کرنا اے ۔ اوہ اپنے بُلاں نُوں کٹ دے نیں تے خُدا دے اَگے روندے نیں ،  ”  خُدا~یا!  “  تے ہر دیہاڑے نویں لیڑے
بناؤنے جاری رکھدے نیں ۔فیر ،کیہ ہوندا اے جدوں اوہ اوہدے توں تھک جاندے نیں؟
اِک سال وِچ اِک یاں دو واری اوہ پہاڑاں اُتے جاندے نیں تے روزہ رکھدے نیں ۔ اوہ کوشش کردے نیں تے بوہتے پکے تے بوہت مشکل نال پائے جان والے لیڑےبناؤندے نیں ۔  ” خُدا یا،مہربانی نال میرے پاپاں نُوں دھودے ۔مہربانی نال مینوں نواں بنا دے ۔یا خُداوندا ،میَں تیرے اُتے ایمان رکھدا ہاں۔“ اوہ رات ویلے دُعا منگن نُوں بوہتا چنگا سمجھدے نیں ۔ ایس لئی ،اوہ دِن ویلے آرام کردے نیں تے جویں ایں ہنیرا ہُندا اے ،اوہ اپنی ساری ہمت نال رُکھاں اُتے لمکدے نیں ،یاں ہنیر بھرے غاراں وِچ جاندے نیں تے خُدا دے اَگے روندے نیں ۔  ” یا خُداوندا ،میَں ایمان رکھدا ہاں! “ ۔ ” میَں توبہ کردا ہاں تے اپنے دل نوں اِک دُکھی ذہن نال بھرداہاں “ اوہ اُچی آواز وِچ دُعا منگدے تے روندے نیں ،  ”  میَں ایمان رکھدا ہاں “ تے ایس طریقے نال اوہ خاص لیڑے بناؤندے نیں اوہ جیہڑی آس رکھدے نیں پئی اِک لمے چِر تیک ٹُرن گے ،پر اوہ کدی نئیں ٹُردے ۔   
پہاڑی دُعاواں دے بعد تھلے آؤنا کناں طاقت دیندا اے ! اِک تازی ہَوا وانگر ،یاں پہاڑ دے مینہ وانگر جیہڑارُکھاں تے پھُلاں اُتے پیندی اے ، اوہناں دیاں رُوحاں آرام تے قادر ِ مطلق دے فضل نال بھر جاندیاں نیں ۔ پہاڑی رُوح توں بوہتا کھرا محسوس کردے ہویاں اوہ اپنے کھرے نویں لیڑے پا کے جگ دے اَگے آؤندے نیں ۔
پر اوہ اپنے گھر تے گرجے وِچ واپس آؤندے نیں تے فیر حیاتی شروع کردے نیں ، لیڑے میلے ہون لگ پیندے نیں تے پاٹن لگ جاندے نیں۔
اوہناں دے بیلی پچھدے نیں ، ” تُسیں کِتھے سو؟ “
” آہو میَں تھوڑے چِر لئی دُور رہیا ساں ۔ “
” تُسیں اِنج دِسدے او پئی تُہاڈاکُجھ بھار گواچ گیا اے! “
” جی آہو،ٹھیک ،پر ایہہ دوجی کہانی ایں۔“
اوہ کدی ظاہر نئیں کردے پئی اوہناں نیں روزہ رکھیا سی ،اوہ صرف گرجے جاندے تے دُعا منگدے نیں ۔
” میَں کدی زنانی دا حرص نئیں کراں گا ۔ میَں کدی جھوٹ نئیں بولاں گا ۔میَں اپنے گوانڈھی دے گھر دا لالچ نئیں کراں گا ۔ میں سارے لوکاں نال محبت کراں گا۔ “
پر اوسے ویلے جدوں اوہ اِک سوہنے سینے ،پتلیاں لتاں والی زنانی نُوں ویکھدے نیں ، اوہناں دے
دِلاں وِچ پاکیزگی اوسے ویلے کھری شہوت وِچ بدل جاندی اے ۔  ” ویکھو سکرٹ کناں چھوٹا اے ! سکرٹ نکے توں نکے ہُندے جاندے نیں !میَں اوہناں لتاں نُوں فیر ویکھ لیا اے !ہائے !نئیں!ہائے ،یا خُداوندا !میَں فیر پاپ کرلیا اے ! “
شرعی بندے پاک نظر آؤندے نیں پر تُہانوں پتہ لگنا چاہی دا اے پئی اوہناں نیں ہر دیہاڑے نویں لیڑے بناؤنے نیں ۔ شرعی بندے دا ایمان انجیر دے پتیاں دے لیڑیاں وِِچ اے ۔ یعنی غلط ایمان ۔بوہت سارے لوک خُدا دی شریعت دے وانگر پاکیزگی نال جیوندے رہن دی بوہت کوشش کردے نیں ۔ اوہ پہاڑاں اُتے اپنے سنگ پاڑ پاڑ کے روندے نیں ۔ایس  طرحاں اوہناں دی آواز بالکل پاک آواز وانگر گونجناں شروع ہو جاندی اے ۔
شرعی بندے اِک وِگڑی ہوئی ہستی رکھدے نیں جدوں اوہ گرجے وِچ دُعا والی عبادتاں دی اَگوائی کردے نیں ۔” اَسمان وِچ پاک پیو! اَسیں ایس پچھلے ہفتے وِچ پاپ کر لیا اے ۔ مہربانی نال سانُوں معاف کردے ۔۔۔“ اوہ بُک بُک ہنجو روندے نیں تے باقی سارے لوک اوہناں وانگر ای کردانیں ۔اوہ اپنے دِل  وِچ سوچدے نیں ، ” اوہ یقیناً پہاڑاں اُتے دُعا تے روزے وِچ بوہت چِر گزار چُکیا اے ۔اوہ بوہت پاک تے وفادار منیاجاندا اے ۔“ پرکیوں جے اوہدا ایمان شرعی اے ۔ ایتھوں تیک پئی دُعا دے مکن توں پہلاں ،شرعی بندے دا دِل اپنے آپ اُتے مان تران تے پاپ نال بھرن لگ پیندااے ۔
جدوں لوک انجیر دے پتیاں دے نویں کھرے لیڑے بناؤندے نیں ، اوہ خورے ۲ یاں  ۳مہینیاں تک چل سکدے نیں ۔پربڑی چھیتی یاں بعد وِچ ،لیڑے لیراں بن جاندے نیں تے اوہناں نیں اِک نواں جوڑا بناؤنا اے تے اپنی ول فریب والی حیاتیاں دے نال ٹُرنا ایں ۔ایہہ شرعی  بندیاں دی حیاتی اے جیہڑےمکتی یافتہ ہون دے سلسلے وِچ شریعت وانگر رہن دی کوشش کردے نیں ۔
اوہناں نُوں انجیر دے پتیاں نال لگاتار نویں لیڑے بناؤنے نیں۔ شرع پسندی انجیر دے پتیاں دا ایمان اے۔شرعی بندے تُہانُوں دَسدے نیں ، ” تُسیں سارے پچھلے ہفتے توں پاپ کر چُکے او، کیہ تُسیں نئیں کیِتا؟ فیر توبہ کرو۔“
فیر اوہ تُہاڈے اُتے اِک اُچی آواز نال رولا پاؤندے نیں ۔ ” توبہ کرو!دُعا منگو! “
اِک شرعی بند ہ جان دااے کویں اپنی آواز نُوں پاک کرنا اے ۔ ” یا خُداوندا!میَں معافی چاہندا ہاں۔میَں شریعت وانگر نئیں رہیا ۔میَں تیرے حکماں نُوں قائم نئیں رکھیا ۔یا خُداوندا مینوں معاف کردے ،مینوں معاف کردے ،صرف اِک واری ہو ر۔“
اوہ کدی شریعت مطابق جیوندے نئیں رہ سکدےایتھوں تیک پئی بھاویں اوہ اِنج کرن دی بہادری نال کوشش کردے نیں۔ اصل وِچ اوہ خُدا دی شریعت تے اپنے آپ وِچ خُدا نُوں للکاردے نیں ۔اوہ خُدا دے اَگے خُود پسند نیں۔
 
 
چُڈال بئی دے وانگر
 
خُدا نے کیوں شریعت نُوں اِک
پاسے رکھ دِتا؟
ایس لئی پئی ایہہ سانُوں پاپ
توں بچاؤن لئی بے فائدہ سی
 
اِک واری اِک گھبرُوبندہ چُڈال بئی ناں دا موجود سی ۔ ۱۹۵۰ وِچ ،کوریا دی جنگ وِچکار ،اشتمالی سپاہی آئے تے اوہدے پکے ایمان نُوں ڈانواں ڈول کرن تے اوہنوں اِک اشتمالی بنان لئی اِک کوشش دے طور اُتے سبت دےدِن اوہنوں برانڈاصاف کرن دا حکم دِتا ۔پر ایس مذہبی گبھرُو بندہ اوہناں دا آکھامنن توں مُکرگیا ۔اوہناں نے زور لایا، پر اوہ گھبرُو بندہ فیر مُکر گیا ۔
اخیر وِچ سپاہیاں نیں اوہنوں اِک رُکھ نال بنھ دِتا تے اوہدے اُتے بندوق رکھی ۔ ” تُوں کیہ چاہناں ایں ؟برانڈے نُوں صاف یا قتل ہونا؟ “
جدوں اوہنوں اِک فیصلہ کرن لئی مجبورکیِتا گیا ،اوہنے آکھیا ، ” میں سبت دے پاک دِن اُتے کم کرن دی بجائے مرناپسند کراں گا ۔ “
” تُوں اپنی مرضی نُوں چُنیا اے تے اَسیں تیری فرمانبرداری کرن وِچ خوش ہوواں گے“
فیر اوہناں نے اوہنوں چھیتی نال ماردِتا ،کلیسیادے آگواں نے اوہدے نہ تھِڑکن والے مذہبی ایمان دی یادگاری لئی اوہدے مرن دے بعد اوہنوں اِک ڈیکن مقررکیِتا ۔
اوہدے پکے اِرادے دے باوجود اوہد ا مذہبی ایمان غلط سی ۔ اوہ   کیوں   برانڈے دی   صفائی   تے
اوہناں سپاہیاں دے اَگے خوشخبری دی منادی نہ کرسکیا ؟اوہ کیوں اینا ں اڑیل ہویا تے ایہدے لئی مرگیا ؟کیہ خُدا اوہدے سبت دے دِن کم نہ کرن دی تعریف کرے گا؟نئیں۔
سانُوں اِک رُوحانی حیاتی بسرکرنی چاہی دی اے ۔ساڈے کم نئیں سگوں ساڈا ایمان خُدا دے اَگے ضروری اے ۔ کلیسیا دے آگُو چُڈال بئی وانگر کسے دی یادگیری مناؤنا ں چاہندے نیں ایس لئی پئی اوہ اپنی ودھیا ہون تے اپنے آپ دے فِرقے دا صحیح عقیدہ وکھاؤنا چاہندے نیں۔ ایہہ بالکل اوہناں فریبی فریسیاں وانگر اے جنہاں نیں یسوع نُوں للکاریا۔
اسی شرعی بندیاں کولوں کُجھ نئیں سِکھ سِکھدے ۔سانُوں رُوحانی ایمان دے بارے سِکھنا چاہی دا اے۔سانُوں ایس گل اُتے دھیان دین دی لوڑ اے پئی کیوں یسوع نے بپتسمہ لیا تے سوُلی اُتے لہووگایا ،تے پانی تے رُوح دی خوشخبری دے سچ اُتے پچھاننا چاہی دا اے ۔
سانُوں پہلاں اوہناں سوالاں دے جواب لبھن دی کوشش کرنی چاہی دا اے تے فیر جگ دے سارے لوکاں تیک خوشخبری کھلارن دی کوشش کرنی چاہی دی اے ،تاں جے اوہ نویں سِریوں جم پین ۔سانُوں اپنیاں حیاتیاں رُوحانی کماں دے ناویں لاؤنیاں چاہی دیاں نیں ۔
جے تُہانُوں اِک منادی کرن والا دَسدااے ، ” اوس گھبرُو بندے چُڈال بئی وانگر بنو۔سبت دا دیہاڑا پاک منَو۔“ اوہ صرف تُہانُوں اِتوار دیہاڑے گرجے وِچ لیاؤن دی کوشش کررہیا اے ۔
ایتھے اِک دُوجی کہانی ایں جیہڑی خورے بوہتا چانن ثابت کر سکے ۔ اِک زنانی موجودسی جنہوں اِتوار نُوں گرجے جان لئی بوہت دُکھاں وچوں لنگھ کے جانا پینداسی ۔ اوہدے سوہرے مسیحی نئیں سَن تےاوہناں نیں اوہنوں گرجے جان توں روکن لئی بڑے ہتھ پیرمارے۔اوہناں نیں اوہنوں اتوار دیہاڑے کم کرن لئی آکھیا ۔ پر اوہ ہفتے دی رات نُوں کھیتاں  وِچ چلی جاندی سی تے چن دی لَو وِچ کم کردی سی تاں جے خنوادے والے اتوار نُوں گرجے جان تو ں اوہنوں روکن لئی کوئی بہانہ نہ بناؤن ۔
 بِناں شک ، گرجے جانا بوہت ضروری اے ،پرکیہ ایہہ کافی اے ،ہراتوار صرف وکھالے طور تے عبادت وِچ آؤنا پئی اَسیں کِنے ایمان دار آں؟ کھرے ایماندار پانی تے رُوح دے راہیں نویں سِریوں جمے سَن ۔جدوں کوئی نویں سِریوں جم دا اے تے فیر کھرا ایمان شروع ہُندااے ۔
کیہ تُسیں شریعت دے مطابق حیاتی بسرکرن دے راہیں اپنے پاپاں توں مکتی یافتہ ہو سکدے او؟ نئیں ۔ میَں تُہانُوں شریعت ولوں اکھاں پھیرن لئی نئیں آکھدا،پر اَسیں سارے جان دے آں پئی اِنسان
ہُندیاں ہویاں شریعت دیاں ساریاں حداں اُتے قائم رہنا بوہت اوکھا اے ۔
یعقوب ۲: ۱۰آکھدا اے،  ”  کیوں جے جنہیں ساری شریعت اُتے عمل کیِتا تے اِکو ای گل وِچ غلطی کیتی اوہ ساریاں گلاں وِچ قصوروارہویا۔  “ ایس لئی پہلاںسوچو ،تُسیں پانی تے رُوح دی خوشخبری دے راہیں نویں سِریوں کویں جم سکدے او ۔فیر اِک گرجے وِچ جاؤ جتھے تُسیں خوشخبری سُن سکدے او۔ تُسیں نویں سِریوں جمن دے بعدایماندار حیاتی بسرکرسکدے او۔ فیر جدوں خُداوند بلاؤندااے ، تُسیں اوہدے اَگے خوشی نال جا سکدے او۔
جھوٹے گرجیاں وِچ جا کے اپنا ویلا نہ گواؤ۔غلط چڑھاوے چڑھا  کے اپنےپیسے نہ گواؤ۔ جھوٹے کاہن تُہانُوں دوزخ جان توں نئیں بچا سکدے ۔ پہلاں پانی تے رُوح دی خوشخبری سُنو تے نویں سِریوں جموو۔
ایس بارے وِچ سوچو پئی یسوع کیوں ایس جگ وِچ آیا سی ۔جے اَسیں شریعت دے مطابق حیاتی بسرکرن دے راہیں اَسمان دی بادشاہی وِچ جا سکدے ساں ،اوہنوں ایس جگ وِچ آؤن دی لوڑ نئیں سی ۔ اوہدے آؤن دے بعدوں ،کہانت بدل گئی ۔ شریعت پسندی اِک گُزریاویلا بن گئی ۔ساڈے مکتی یافتہ ہون توں پہلا ں ، اَسیں سوچیا پئی اَسیں شریعت دے مطابق حیاتی بسر کرن دے راہیں مکتی یافتہ ہو سکدے ساں ۔پر ایہہ ہور کھرے ایمان دا نشان نئیں ہیگا ۔
یسوع نے سانُوں جگ دے سارے پاپاں توں اپنی محبت نال ، اپنے بپتسمہ دے پانی دے نال ، اپنے لہو تے رُوح دے نال مکتی دِتی ۔اوہنے ساڈی مکتی یردن اُتے اپنے بپتسمہ ،سُولی اُتے اپنے لہو تے اپنے جی اُٹھن دے راہیں مکمل کیتی ۔
خُدانے پُرانے اصولاں نُوں اِک پاسے رکھ دِتا کیوں جے اوہ ماڑے تے بےفائدہ سَن،” ( کیوں جے شریعت نے کسے شے نُوں کامل نئیں کیِتا)تے اوہدی تھاں اُتے اِک چنگی آس رکھی گئی جیہدے راہیں اَسیں خُدا دے نیڑے جا سکدے آں ۔تے ایتھوں تیک مسیح نُوں مقررکرنا قسم دے اَڈ نہ ہویا ۔ “ (عبرانیوں ۷ : ۱۹ ۔ ۲۰)۔یسوع نے اِک قسم چُکی تے اپنے بپتسمہ تے لہو دے نال سانُوں ساڈے پاپاں توں مکتی دِتی ۔ شرع د ے مطابق شہادت اِک بے پھل موت اے تے صرف کھراایمان پانی تے رُوح دی خوشخبری اُتے ایمان رکھنا اے ۔
سانُوں پھلدارایمان رکھنا اے ۔ تُسیں اپنی رُوح لئی کنوں چنگا سوچدے او؟ کیہ ایہہ باقاعدگی نال گرجے وِچ جانا تے شریعت دے مطابق حیاتی بسر کرنا چنگا ہووے گا ۔ یاں کیہ خُدادی کلیسیا وِچ جانا بوہتا چنگا ہووےگا ،جتھے نویں سِریوں جمن دی پانی تے رُوح دی خوشخبری دی منادی کیتی جاندی اے ، تاں جے تُسیں نویں سِریوں جم سکو؟ کہڑا گرجا تے کیہڑا مناد تُہاڈی رُوح لئی بوہتا فائدہ مند ہووےگا ؟ایہدے بارے وِچ سوچو تے اِک نُوں چُنو جیہڑا تُہاڈی رُوح لئی چنگا ہووے گا ۔
خُدا اِک مناد دے راہیں تُہاڈی رُوح نُوں بچاؤندااے جیہدے کول پانی تے رُوح دی خوشخبری دے الفاظ نیں ۔ ہر کسے نُوں اپنی رُوح لئی یقیناً ذمہ داری چُکنی چاہی دی اے ۔ اِک اصل وِچ سیاناں ایمان دار اوہ ہیگا اے جیہڑا اپنی رُوح نُوں خُدا دے کلام دے ناویں لاؤندااے ۔
 
 
یسوع اِک سونہہ دے راہیں کاہن بنیا
 
کیہ لاوی دی پیڑھی دی نسل اِک
سونہہ دے راہیں کاہن بنی سی ؟
نئیں ۔صِرف یسوع اِک سونہہ
دے راہیں کاہن بنیا ۔
 
عبرانیوں ۷ : ۲۰ ۔ ۲۱ آکھداا ے، ” تے ایس لئی مسیح دا مقرر ہونا سونہہ دے اَڈ نہ ہویا ۔( کیوں جے اوہ تے سونہہ دے اَڈ کاہن مقرر ہوئے نیں ،پرایہہ سونہہ دے نال اوہدے ولوں ہویاجنہے اوہدے بارے آکھیا پئی خُداوند نے سونہہ کھاہدی اے تے اوہدے ولوں پھرے گا نئیں پئی تُوں ہمیش دا کاہن اے)۔ “
تے زبور ۱۱۰ : ۴ آکھدااے ، ” خُداوند نے سونہہ کھاہدی اے تے پھرے گا نئیں پئی
تُوں ملکِ صِدق دے طور اُتے سدا تیکر کاہن اے۔“ خُداوند نے اِک سونہہ کھاہدی ۔اوہنے ساڈے نال اِک وعدہ کیِتا تے لکھائی کیتے ہُوئے کلام دے راہیں سانُوں وکھایا ۔ ” میَں ملکِ صِدق  دی بابت ہمیش داوڈاکاہن بن جاواں گا ۔ملکِ صِدق راستبازی دا بادشاہ ،امن دا بادشاہ تے سداتیکر وڈاکاہن اے ۔ مَیں تُہاڈی نجات دے لئی ملکِ صدق دی بابت ہمیش لئی وڈاکاہن بن جاواں گا “
یسوع ایس جگ وِچ آیا تے چنگے وعدے دی ضمانت بن  گیا  اے   (عبرانیوں ۷ : ۲۲)۔ وچھیاں
تے بکریاں دے لہو دی تھاں اُتے ،اوہنے ساڈے سارے پاپ دھون لئی بپتسمہ لین تے سوُلی اُتے لہو وگان دے راہیں چڑھاوے وانگر اپنے آپ نُوں پیش کیِتا ۔
پُرانے عہد نامہ دے دِناں وِچ ،جدوں اِک وڈاکاہن مرداسی ،اوہد پُتر جدوں اوہ تی (۳۰) ورہیاں داہو جانداسی کہانت نُوں چالُو رکھدا سی ۔ جدوں اور بُڈھا ہوجاندا تے اوہدا پُتر ا تی (۳۰) ورہیاں دی حیاتی نُوں پوہنچ جاندا،اوہ اپنے پُتر نُوں کہانت دے دینداسی ۔
وڈے کاہن دے بوہت سارے پُتر موجود سَن ۔ایس لئی داؤد نے اِک بندوبست لاگُو کیِتا جیہدے راہیں اوہناں ساریاں نےواری واری اپنا فرض سنبھالیا ۔ جویں اوہ ہارون دی پیڑھی وِچوں سارے کاہناں دے وانگر مقرر کیتے جاندے سَن ،اوہ کہانت دا بندوبست کرن دا حق تے فرض رکھدے سَن ۔لوقاآکھدا اے ، ” ابیاہ دے فِرقے وِچوں اِک زکریاہ ناں دا کاہن سی ۔۔ جدوں خُدا دے اَگے اپنے فِرقے دی واری اُتے کہانت دا کم کرداسی تے اِنج ہویا۔۔۔ “
یسوع ایس جگ وِچ آیاتے سدالئی کہانت دے بندوبست نُوںسانبھ لیا ۔ اوہ چنگیاں شیواں دے آؤن لئی اِک کاہن وانگر آیا ۔ اوہنے پانی تے رُوح دی نویں سِریوں جمن دی مکتی نُوں پورا کیِتا ۔
ہارون دی اولاد اپنے جثے وِچ ماڑی تے نکمی سی ۔ کیہ ہُندا جدوں اِک وڈاکاہن مرداسی ؟ اوہدے پُتر کہانت دی سرداری نُوں سانبھ لیندے سَن ، پر ایہوجیہے چڑھاوے اِنسانی پیڑھی دی  مکتی دے پک لئی کافی نئیں ہوسکدی سن ۔ اِنسانی پیڑھی دے راہیں ایمان کدی وی اِک کھرا تے مکمل ایمان نئیں ہو سکدااے ۔
نویں عہد نامہ دے دِناں وِچ یسوع ایس جگ وِچ آیا ۔ پر اوہنوں لگاتار چڑھاوے پیش کرن دی لوڑ نئیں کیوں جے اوہ سدا لئی جیوندااے ۔ اوہنے اپنے بپتسمہ دے نال ساڈے پاپاں نُوں سدا لئی چُک لیا ۔ اوہنے اپنے آپ نُوں پیش کیِتا تے اوہناں ساریاں نُوں پاپ توں مکمل طور اُتے چھڈاؤن لئی سُولی اُتے چڑھیا ،جیہڑے اوہدے اُتے ایمان رکھدے نیں ۔
ہُن، اوہ جیوندا اے تے ساڈے لئی گواہی دین لئی خُدا دے سجے ہتھ بیٹھا ہویا اے ۔  ”  سوہنے پیو،اوہ خورے ہُن تیک اَدھورے نیں،پر اوہ میرے اُتے ایمان رکھدے نیں ۔ کیہ میَں بوہت چِر پہلاں اوہناں دے سارے پاپ نئیں چُکے ؟ “ یسوع ساڈی مکتی دا ہمیش دا وڈا کاہن اے۔
دھرتی داکاہن کدی وی مکمل نئیں سَن ۔ جدوں اوہ مردے ،اوہناں دے پُتر کہانت سانبھ لیندے ۔ ساڈا خُداوند سداتیک جیوندااے ۔اوہنے ساڈے لئی ایس جگ وِچ آؤن ، یوحنا اصطباغی کولوں بپتسمہ لین تے فیر ساڈے سارے پاپاں لئی سُولی اُتے لہو وگاؤن دے راہیں ہمیش دی مکتی نُوں پورا کیِتا ۔” تے
جدوں اوہناں دی معافی ہوگئی تے فیر پاپ داچڑھاوا نئیںرہیا۔“(عبرانیوں ۱۰: ۱۸)۔ یسوع اخیر ویلے تیک ساڈی مکتی دی گواہی دیندا اے ۔ کیہ تُسیں پانی تے رُوح دے وسیلے نال نویں سِریوں جم پئے او؟
” ایس لئی ایہو جیہا ای وڈاکاہن ساڈے لائق وی سی جیہڑا پاک تے بِناں فریب تے بے داغ ہووے تے پاپاں توں اَڈ تے اَسماناں توں اُچا کیِتا گیا ہووے۔“(عبرانیوں ۷ : ۲۶)۔ ”ایس لئی پئی شریعت تے ماڑے بندیاں  نُوں وڈاکاہن مقرر کردی اےپر اوس سونہہ دا کلام جیہڑی شریعت دے بعدکھاہدی گئی اوس پُتر نُوں مقرر  کردا اے جیہڑا سدا دے لئی کامل کیِتا گیا اے۔“ (عبرانیوں ۷ : ۲۸)۔
تُہانوں جو کُجھ میَں دَسنا چاہندا ہاں اوہ ایہہ ہیگا اے پئی یسوع مسیح ، بےعیب نے ، اپنے بپتسمہ دے پانی تے سُولی اُتے اپنے لہو دے وسیلے اِکو ای واری تے ہمیش لئی ساڈے پاپاں نُوں دھودِتا اے ۔ اوہنے سانُوں ساڈے سارے پاپاں توں کماں دی شریعت دے وسیلے نال نئیں ، سگوں ساڈے سارے پاپ چُکن تے ہمیش لئی ساڈی عدالت ہون توں بچایا ۔
کیہ تُسیں ایمان رکھدے او پئی اوہنے سانُوں ساڈے سارے پاپاں توں ہمیش دی مکتی دے راہیں مکتی دِتی ؟جے تُسیں ایمان رکھدے او ،تُسیں مکتی یافتہ جے ۔پر جے تُسیں نئیں رکھدے جے ، تُہانُوں ہُن تیک یسوع دی ہمیش دی مکتی دے بارے وِچ بوہتا کُجھ سِکھنا ایں ۔
کھرا ایمان پانی تے رُوح دی خوشخبری توں، بڑی پکیائی نال نبیاں دیاں کتاباں اُتے قائم رہیا ں ملدا اے ۔ ہمیش دا اَسمانی وڈاکاہن ،یسوع مسیح ، اپنے بپتسمہ تے سُولی والے لہو دے راہیں ساڈا ہمیش دا مکتی داتا بن گیا ۔
 
 
سانُوں اپنے ایمان نُوں پکیائی نال سمجھنا ایں
 
” یسوع اُتے ایمان رکھن دا  “ کیہ  مطلب اے؟
یسوع دے بپتسمہ تے اوہدے سُولی والے
 لہو اُتے ایمان رکھنا
 
سانُوں ایہدے بارے سوچن دی لوڑ اے پئی اَسیں کویں چنگے طریقے نال یسوع اُتے ایمان رکھ سکدے آں تے اپنے ایمان نُوں سِدھا قائم رکھ سکدے آں ۔ کویں اَسیں یسوع اُتے سوارے تے چنگے طریقے نال ایمان رکھ سکدے آں ۔ اَسیں یسوع دے بپتسمہ تے سُولی اُتے اوہدے لہو دی خوشخبری اُتے ایمان رکھن دے راہیں اِنج کر سکدے آں ۔
ٹھیک ایمان یسوع دے کم اُتے اوہدے بپتسمہ تے لہو اُتے ،اپنے آپ دے پُٹھے خیالاں نُوں ملاؤن دے اَڈ ایمان رکھنا ایں ۔ کیہ تُسیں اینوں سچ جان دیاں ہویا ں ایہدے اُتے ایمان رکھدے او؟ تُہاڈی رُوحانی حالت کس طرحاں دی اے ؟ کیہ تُسیں بوہت سارا اپنے آپ دے کماں تے ہمتاں اُتے انحصار کردے او؟
بوہتا ویلا نئیں لنگھیا جدوں توں میَں یسوع اُتے ایمان رکھنا شروع کیِتا ، پر میَں گھٹوگھٹ ۱۰ ورہیاں تیک شریعت دے پاروں دُکھ اُٹھایا۔اَخیر میَں ایس طرحاں دی حیاتی توں تنگ آگیا ؟ ایتھوں تیک پئی میَں اپنے لئی اوہ ویلا یاد کرنا چنگا نئیں سمجھدا۔میری گھر والی ایتھے بیٹھی ہوئی اے اوہ جان دی اے ساڈے لئی ایہہ کناں ڈراؤنا سی ۔
” اِتوار نُوں،میَں آکھداساں ، میری جند،آؤاَج اَسیں خوشی منائیے۔“
” پر اَج اِتوار اے! “
اوہ ایتھوں تیک پئی اِتوار دے دیہاڑے کپڑے نئیں دھوندی سی ۔ اِ ک اِتوار، میر ی پینٹ اُدھڑ گئی ۔پراوہنے مینوں آکھیا سومواردے دیہاڑے تیکر اُڈیکو ۔اصل وچ ایہہ سچ اے ،ایتھوں تیک پئی میَں بوہت پکاساں جناں پئی اَسیں سبت نُوں ٹھیک طریقے نال من دے آں ۔ پر ایہہ بوہت اوکھا سی ۔ اَسیں کدی اِتوار دیہاڑے آرام نئیں کیِتا کیوں جے سبت نُوں چنگے طریقے نال قائم رکھنا بوہت اوکھا سی ۔ میَں ہُن تیک اوہناں دِناں نُوں یادکردا ہاں ۔
سوہنے بیلیو ، یسوع اُتے سچ  مُچ ایمان رکھن لئی ،سانُوں اوہدے بپتسمہ تے اوہدے سولی والے لہو دے راہیں ساڈے پاپاں دے کفارے اُتے ایمان رکھنا اے ۔ کھرا ایمان یسوع دا خُدا ہونا تے اوہ سارے کم جیہڑے اوہنے ایس جگ وِچ کیتے ،اوہناں اُتے ایمان رکھنا اے ۔ کھرا وفادار اوہدے منہ دیاں ساریاں گلاں اُتے ایمان رکھدااے ۔
ایہدا کیہ مطلب اے ، ” یسوع اُتے ایمان رکھو؟ “ ایہہ یسوع دے بپتسمہ تے اوہدے لہو اُتے ایمان رکھنا اے ۔ ایہدے وِچ بوہت سادگی موجود اے ۔سانُوں ساریاں نُوں جو کُجھ کرنا اے پاک کتاب
وِچ ویکھنا اے تے خوشخبری اُتے ایمان رکھنا اے۔ سانُوں ساریاں نُوں چنگے طریقے نال ایمان رکھنا چاہی دا اے۔
” یا خُداوندا، تیرا شُکر ہووے ۔ ہُن میَں سمجھدا ہاں پئی یہ میری ہمتاں دے راہیں نئیں ہویا اے !کیوں جے شریعت پاپ دا عِلم اے ۔ (رومیوں ۳ : ۲۰)۔ہُن میَں ایہہ سمجھدا ہاں ۔ میَں سوچیا پئی کیوں جے شریعت چنگی سی ،کیوں جےایہہ خُدا دا حکم سی ، مینوں ہمت  کرنی چاہی دی اے تے ایہدے مطابق رہنا چاہی دااے ۔میَں ہُن تیک بوہت اوکھی ہمت کیتی اے، پر ہُن میَں ویکھدا ہاں پئی میَں ایہہ پُٹھا سوچداساں یعنی میَں شریعت دے مطابق نہ رہ سکیا ۔ ہُن میَں سمجھدا ہاں پئی میَں کدی وی خُدا دے حکماں اُتےقائم نئیں رہ سکدا!ایس لئی ،خُدا دی شریعت دے راہیں ،ہُن میَں احساس کرداہاں پئی میرا دِل بھیڑے خیالاں تے تقصیراں نال بھریا ہویا اے ۔ ہُن میَں سمجھدا ہاں پئی شریعت ساڈے دِل وِچ پاپ دے عِلم نُوں بٹھان لئی دِتی گئی اے ۔آہو ،تیراشُکر ہووے ،یا خُداوندا۔میَں تیری مرضی نُوں غلط سمجھیا تے شریعت اُتے قائم رہن دی بوہت پکی ہمت کیتی ۔ میرے لئی اصل وِچ ایتھوں تیک پئی ایہہ ہمت کرنا اپنے آپ نُوں چنگیاں جاننا سی ۔ میَں توبہ کردا ہاں ۔ہُن میَں جان دا ہاں پئی یسوع نے بپتسمہ لیا تے میری مکتی لئی لہو وگایا !میَں ایمان رکھدا ہاں ! “
تُہانُوں پورے دل نال تے کھرا ایمان رکھنا اے ۔ تُہانُوں صرف پاک کتاب دی لکھیاں ہوئیاں گلاں اُتے ایمان رکھنا چاہی دا اے ۔ ایہہ کلا رستہ اے پئی تُسیں مکمل طور اُتے نویں سِریوں جم سکدے او۔
یسوع اُتے ایمان رکھنا کیہ اے ؟کیہ ایہہ اِنج دی شے ہیگی اے جیہڑی اَسیں اِک چِر دے وِچکار پوری کرنی اے؟کیہ ساڈا ایمان اِک مذہب اے جیہدے لئی تُہانُوں کم کرنا اے ؟لوک دیوتا بنا چُکے نیں ،تے اوہ ایناں دیوتیاں نُوں کٹھیاں کرن لئی مذاہب بناچُکے نیں ۔ مذہب اِک کم اے  جیہدے راہیں لوک اِک مقصد تیک اَپڑن لئی کم کردے نیں، یعنی بندے نُوں نیکی کرن لئی آکھنا  ۔
فیر ایمان کیہ اے؟ایہدا مطلب اے خُدا اُتے ایمان رکھنا تے اوہدے وَل ویکھنا ۔اَسیں یسوع دی مکتی وَل ویکھدے آں تے ایس برکت لئی اوہدا شُکر اداکردے آں ۔ایہہ کھرا ایمان اے۔ ایہہ ایمان تے مذہب دے وِچکار فرق اے ۔ اِک وار تُسیں ایناں دوآں دے وِچکار وَنڈ کر سکدے او ،تُسیں اپنے ایمان دی جان پچھان لئی ۱۰۰ نکتے حاصل کروگے ۔
خُدا دے علم دے سیانے جیہڑے نویں سِریوں نئیں جمے ،سانُوں دَسدے نیں پئی سانُوں یسوع اُتے ایمان رکھنا چاہی دا اے تے دِلوں صاف رہنا چاہی دااے ۔ کیہ کوئی صرف صاف دِل ہون دے راہیں ایماندار ہو سکدا اے ؟ بِناں شک سانُوں چنگے ہونا چاہی دا اے ۔ کیہڑے اوہناں وِچوں بوہتی صاف دِل حیاتیاں بسرکردے نیں ۔جیہڑے ساڈے وِچوں نویں سِریوں جمے نیں؟
پر نکتہ ایہہ ہے پئی اوہ پاپیاں نُوں ایہہ آکھدا اے ۔ اِک عام پاپی دے اندر ۱۲ قِسماں دے پاپ موجود نیں ۔ کویں اوہ دِلوں صاف رہ سکدااے ؟لازمی ، اوہدا ذہن خورے سمجھ سکدا اے ،کیہ کرنا اے ۔ پر اوہدا دِل اینوں چالُو نئیں رکھ سکدا ۔جدوں اِک پاپی گرجے وِچوں باہر پیر رکھدا اے ،دِلوں صاف رہنا صرف اِک خیال بن جاندااے تے اوہدی عادت اوہنوں پاپ وَل موڑدی اے ۔
ایس لئی ،سانُوں اپنے دِلاں وِچ فیصلہ کرنا اے ،کیہ اَسیں شریعت دے مطابق جیوندے رہ سکدے آں یا یسوع دے بپتسمہ تے سُولی والے لہو اُتے ایمان رکھن دے راہیں ،یعنی اَسمان دی بادشاہت دے سدادے وڈے کاہن اُتے ایمان رکھنے دے وسیلے نال مکتی یافتہ ہوئیے۔
ایہہ چیتا رکھو پئی یسوع اوہناں لئی جیہڑے ایمان رکھدے نیں کھرا وڈاکاہن اے ۔آؤ اَسیں یسوع دے بپتسمہ تے اوہدے سُولی والے لہو دے وسیلے کھری مکتی اُتے ایمان رکھن تے جانن دے راہیں مکتی یافتہ ہوئیے۔
 
 
نویں سِریوں جمے ہوئے لوک جگ دے اخیر توں ڈردے نئیں
 
کیوں نویں سِریوں جمےہوئے لوک جگ دے
اخیر توں نڈ ر نیں؟
کیوں جے اوہناں دا پانی تے رُوح دی خوشخبری
اُتے ایمان اوہناں نُوں پاپ توں مکتی دیندا اے ۔
 
جدوں تُسیں سچ مُچ نویں سِریوں جم دے او ،تُسیں ایس گل توں نئیں ڈرنا پئی جگ اخیر وَل جاندا پیا اے ۔ کوریاوِچ بوہت سارے مسیحیاں نے دعویٰ کیِتا پئی جگ۲۸ /اکتوبر،۱۹۹۲نُوں مُک جاووے گی ۔اوہناں آکھیا ،ایہہ کِناں کہرام بھریا تے ڈراؤنا ہووےگا ۔پر اوہناں دے سارے دعوے جھوٹے ہو گئے ۔سچ مُچ نویں سِریوں جمے ہوئے ہوک پاکیزہ طریقے نال رہندے نیں ، اوہ اخیری ویلے تیک خوشخبری دی منادی کردے پئے نیں ۔جدوں تیک ایہہ دُنیا مکن تیک اپڑ دی اے ،سانُوں ساریاں نُوں جو کجھ کرنا اے پانی تے رُوح دی خوشخبری دی منادی کرنی اے ۔
جدوں لاڑا آووےگا ،ووہٹیاں جیہڑیاں سچ مُچ پانی تے روح دے وسیلے نال نویں سِریوں جم پئیاں نیں ایہہ آکھدیاں ہوئیاں ،اوہنوں بڑی خوشی نال مل سکدیاں نیں ، ” آہو،تُسیں اخیریں آگئے او !میرا جثہ ہُن تیک ادھورا اے ،پر تُسیں میرے نال محبت رکھی تے مینوں میرے سارے پاپاں تُوں مکتی دِتی ۔ایس لئی میَں اپنے دل وِچ کوئی پاپ نئیں رکھدی ۔ یا خُداوند ا ، تیرا شکر ہووے ،تُوں میرا مکتی داتا ایں ! “
یسوع سارے راستبازاں دا رُوحانی لاڑا اے ۔ ویاہ سچ مُچ ہُندااے کیوں جے لاڑا ووہٹی نال محبت کردااے ،ایدھر اودھر کوئی دُوجا رستہ نئیں ہیگا اے ۔ میَں جان دا ہاں ایہہ کئی واری ایس جگ وِچ اِنج واقع ہُندااے ،پر اَسمان وِچ ،ایہہ لاڑا اے جیہڑا فیصلہ کردا اے پئی کیہ ویاہ ہونا اے ۔ ایہہ لاڑا یسوع اے جیہڑا اپنی محبت دی بنیاد اُتے ویاہ کرن نُوں ووہٹیاں دے اَڈ چُن دا اے تے مکتی پیش کردااے ۔ اِنج اَسمان اُتے ویاہ ہُندا اے ۔
لاڑا ووہٹیاں دے بارے سب کُجھ جان دا اے ۔کیوں جے اوہدی پیاریاں ووہٹیاں ایہو جیہیاں پاپناں سَن ۔ اوہنوں اوہناں اُتے رحم آیا تے اوہناں نُوں اپنے بپتسمہ لین تے سولی اُتے لہو وگان دے راہیں
سارے پاپاں توں چھڈا لیا ۔
ساڈا خُداوند یسوع ، ہارون دی پیڑھی وانگر ایس جگ وِچ نئیں آیا ۔ اوہ ایس جگ وِچ اِک زمینی چڑھاوا چڑھاؤن نئیں آیا ۔لاوی یعنی ہارون دی اولاد کم کرن لئی بوہت سارے موجودسَن ۔
اصل وِچ، پُرانے عہد نامہ دے چڑھاویاں دا کھراکردار یسوع مسیح اپنے آپ دے اَڈدوجا نئیں سی۔ ایس لئی ،جدوں اِک اصلی شے ایس جگ وچ آئی ،ایہد ے پرچھاویں نال کیہ ہویا؟ پرچھانواں اِک پاسے رکھ دِتا گیا ۔
جدوں یسوع ایس جگ وِچ آیا ،اوہنے کدی چڑھاوے نئیں چڑھائے ،جویں ہارون نے چڑھائے ۔ اوہنے اپنے آپ نُوں پاپیاں دی مکتی لئی بپتسمہ لین تے لہو وگان دے راہیں اِنسانی پیڑھی نُوں پیش کیِتا ۔ اوہنے سولی اُتے مکتی پوری کیتی ۔
اوہنا ں لئی جیہڑے یسوع دے بپتسمہ تے سولی والے لہو اُتے ایمان رکھدے نیں ۔ مکتی اوپریاں طریقیاں وِچ نئیں آووے گی ۔ یسو ع نے ساڈے پاپاں لئی فدیہ اِک غیر واضح طریقے نال نئیں دِتا ۔ اوہنے اینوں صاف طور تے کیتا ۔ ” رستہ ، سچ تے حیاتی میَں آں ۔“ (یوحنا ۱۴ : ۶)۔یسو ع ایس جگ وچ آیا تے سانُوں اپنے بپتسمہ ،اپنے مرن تے اپنے جی اُٹھن دے راہیں مکتی دِتی ۔
 
 
پُرانا عہد نامہ یسوع دا نمونہ اے
 
دوجا وعدہ قائم کرن دی کیہ وجہ سی ؟
کیوں جے پہلا وعدہ ماڑا تے نکماسی ۔
 
پُرانے عہد نامہ نویں عہد نامہ دے پرچھانواں اے ۔ایتھوں تیک یسوع نے کدی پُرانے عہد نامہ دے وڈے کاہناں وانگر چڑھاوے نئیں چڑھائے ، اوہنے اِک ودھیا کہانت دا بندوبست کیِتا ،یعنی اسمانی ہمیش دی کہانت دا ۔ کیوں جے لوک ایس جگ وچ اپنے جمن ویلے توں پاپی نیں ، اوہ پاپی بن جاند ے نیں ،
تے اوہ کدی وی خُدا دی شریعت دے راہیں راستبازنئیں بن سکدے ۔ ایس لئی خُدا نےدوجا وعدہ قائم کیتا ۔
ساڈے اَسمانی پیو نے ایس جگ وچ اپنے کلے کارے پُتر نُوں گھلیا تے جواب وچ سانُوں اوہدے بپتسمہ ،اوہدے لہو تے اوہدے جی اُٹھن اُتے ایمان رکھن دے لئی آکھیا ۔ایہہ خُدا دا دوجا وعدہ اے ۔ دوجا وعدہ ساڈے نال پانی تے رُوح د ی خوشخبری اُتے ایمان رکھن دا مطالبہ کردا اے ۔
خُداوند سانُوں اگانہہ ہور چنگیاں کماں لئی نئیں آکھ رہیا ۔ اوہ سانوں نئیں دَسدا پئی مکتی یافتہ ہون لئی کویں رہنا اے ۔ اوہ صرف سانُوں اپنے پُتر دے راہیں مکتی اُتے ایمان رکھن لئی آکھدا اے ۔ ساریاں توں ودھ کے اوہ سانوں اوہدے بپتسمہ تے سولی والے لہو اُتے ایمان رکھن لئی آکھدا اے ۔ تے سانُوں ہاں آکھنا اے۔
پاک کتاب وِچ ،یہوداہ دے خنوادے نے بادشاہی نوں قائم رکھیا ۔ اِسرائیل دے سارے بادشاہ سلیمان بادشاہ تیک یہوداہ دے خنوادے وچوں جمے سَن ۔ایتھوں تیک پئی بادشاہی دی ونڈ پین دے بعد ، یہوداہ دے خنوادے نیں ۵۸۶مسیح توں پہلاں وِچ ایہدے ٹوٹے ٹوٹے ہون تیکر جنوبی بادشاہت دے تخت اُتے قبضہ رکھیا ۔ ایس طریقے نال ،یہودیہ دے لوک اِسرائیلیاں لئی قائم رہندے نیں ۔ لاوی دا خنوادہ کاہناں وچوں اِک سی ۔ اِسرائیل دا ہر خنوادہ اپنے آپ دا کردار رکھدا سی ۔ خُدا نے یہوداہ دے خنوادے نال وعدہ کیا پئی یسوع اوہدے رُتبیاں وِچوں اُٹھے گا ۔
کیوں اوہنے ایہہ وعدہ یہوداہ دے خنوادے نال قائم کیتا ؟ ایس وعدے نُوں قائم کرنا جگ دے سارے لوکاں نال اِک وعدہ قائم کرن دے وانگر سی کیوں جے اِسرائیلی جگ دے لوکاں دی اَگوائی کردے نیں۔ یسوع نے اپنا وعدہ پورا کیتا ،جیہڑا اوہدے بپتسمہ ،اوہدی سولی والی موت تے اوہدے جی اُٹھن دے راہیں اِنسانی پیڑھی دی مکتی سی ۔
 
 
اِنسانی پیڑھی دے پاپ توبہ کرن دے راہیں دھوتے نئیں جا سکدے
 
کیہ اِنسان دے پاپ توبہ دے نال
دھوتے جا سکدے نیں؟
نئیں
 
یرمیاہ۱۷: ۱ وچ لکھیا ہویا اے پئی ہربندے دے پاپ دوتھاواں اُتے لکھے جاندے نیں  ۔ ”یہوداہ دا پاپ لوہے دے قلم تے ہیرے دی چنُج نال لکھیا گیا اے ۔ اوہنا ں دے دِلاں دی تختی اُتے تے اوہناں دے چڑھاویاں دے سِنگاں اُتے چھاپیا گیا اے ۔“
ساڈے پاپ ساڈے دِلاں اُتے لکھے جاندے نیں ۔ اِنج اَسیں جان دے آں پئی اَسیں پاپی آں ۔ایس توں پہلاں پئی کوئی یسوع اُتے ایمان رکھن لئی آؤندا اے اوہ خبردار نئیں ہیگا پئی اوہ اِک پاپی اے ۔ کاہدے لئی ؟ کیوں جے خُدا دی شریعت اوہدے دل وچ موجودنئیں ہیگی ۔ ایس لئی ، اِک واری جدوں کوئی یسوع اُتے ایمان رکھدا اے ،اوہ احساس کردا اے پئی اوہ خُدا دے اَگے اِک پاپی اے ۔
کئی صرف اِحساس کردے نیں پئی اوہ یسوع اُتے ایمان رکھن دے بعدوں ۱۰ ورہیاں تیکر پاپی نیں ۔ ” اَے سوہنے! ، میَں اِک پاپی آں !میَں سوچدا ہاں میَں مکتی پا گیا ساں ،پر کسے طرحاں میَں ہُن تیک اِ ک پاپی آں ! “ احساس اِک دن ہُندااے جدوں اَسیں اخیری طور تے سچ مُچ اپنے آپ نُوں جویں اَسیں ہیگے آں ،ویکھدے آں ۔ا وہ ۱۰ ورہیاں لئی اینے خوش سَن پر اچانک اوہ سچ ویکھدے نیں ۔کیہ تُسیں جان دے او کاہدے لئی ؟ ایہہ احساس ہُندا اے کیوں جے اخیر وِچ اوہناں دے اصل پاپ تے تقصیراں اخیری طور اُتے خُدا دی شریعت دے راہیں نکھڑ جاندیاں نیں۔ ایہو جیہا بندہ نویں سِریوں جمن دےاَڈ ۱۰ورہیاں توں یسوع اُتے ایمان رکھ چُکیا اے ۔
کیوں جے پاپی اپنے دل وچوں اپنےپاپاں نُوں مکا نئیں سکدا اے ، اوہ خُدا دے اَگے اِک پاپی ای رہندا اے ۔ کئی ۵ورہے ،تے دوجے ایس احساس تیک اپڑن لئی ۱۰ ورہے لاؤندے نیں ۔ کئی ایس احساس تیک ۳۰ورہیاں دے بعد اَپڑدے نیں ،کئی ۵۰ ورہیاں بعدوں ،تے کئی کدی وی مرن تیک ایس سچ دا احساس نئیں کردے ۔” سوہنے خُدایا ، میَں اپنے ذہن وِچ حکماں نُوں رکھن توں پہلاں چنگاہُنداساں ۔مینوں یقین سی پئی میَں شریعت اُتے چنگی طرحاں عمل کردا پیاں ہاں ،پر ہُن میَں احساس کرداہاں پئی میَں ہر دیہاڑے پاپ کر چُکیا ہاں ۔ “ بالکل جویں پولُوس رسول نے آکھیا ، ’ اِک ویلے  شریعت دے اَڈ میَں جیونداساں پر جدوں حکم آیا تے پاپ جی اُٹھیا تے میَں مرگیا۔‘  (رومیوں ۷ : ۹)۔میَں اِک پاپی آں ایتھوں تیک پئی میَں مسیحی اُتے ایمان رکھدا ہاں ۔
ایہہ تُہاڈے اپنے پاپ نیں ۔ جیہڑے تُہانُوں خُدا دے کلام دے مطابق جیوندے رہن توں روکدے نیں ۔ تُہاڈے پاپ تُہاڈے دل اُتے لکھے جاندے نیں۔کیوں جے خُدا تُہاڈے پاپاں نُوں اوتھے لکھدااے ، جدوں تُسیں دعا لئی اپنے سِر نُوں جھکاؤندے او ،تُہاڈے سارے پاپ اُٹھ کھلوندے نیں ۔ ”حیرانی والی گل !میَں پاپ آں  جیہڑاتُسیں کیِتا سی ۔ “
” پر میَں ۲ ہزارورہے پہلاں تیرا فدیہ دِتا سی ۔ تُسیں کیوں بالکل اچانک فیر اپنے آپ نُوں مینوں وکھارہے او َ؟ تُسیں دُور کیوں نئیں جا چُکے او ؟ “
” اوئے ، ایناں گندہ نہ بن !میَں تیرے دِل اُتے لکھیا ہویا ہاں۔ ایہدا کوئی مطلب نئیں پئی تُسیں کیہ سوچدے او ،تُسیں ہُن تیک اِک پاپی او۔“
” نئیں !نئیں! “
ایس لئی ، پاپی فیر۲ ورہے پہلاں کیتے گئے پاپاں لئی توبہ کردااے ۔” خُداوندا، مہربانی نا ل مینوں معاف کردے ۔میَں ہُن تیک اوہناں پاپاں توں دُکھ سہنداہاں جیہڑے میَں پہلاں کیتے سَن۔ میَں اپنے پاپاں تو ں توبہ کیتی پر اوہ ہُن تیک میرے نال نیں ۔ مہربانی کرکے مینوں معاف کردے ۔ کیوں  جے  میَں
پاپ کر چُکیا ہاں۔“
پر کیہ اوہ توبہ کرن نال دُور ہوجاندے نیں ؟کیوں جے لوکاں دے پاپ اوہناں دے دِلاں اُتے لکھے جاندے نیں ۔اوہ پانی تے رُوح دی خوشخبری دے اَڈ کدی وی مکائے نئیں جا سکدے۔ صرف پانی تے رُوح دی خوشخبری دے راہیں اصلی کفارہ حاصل کیِتا جا سکدا اے ۔اَسیں صرف یسوع دی اصل خوشخبری اُتے  ایمان دے راہیں مکتی یافتہ ہو سکدے آں ۔
 
 
میَں تُہاڈا مکتی داتا ہوواں گا
 
سانُوں نویں وعدہ اُتے کویں رَدِّ عمل ظاہر کرنا
چاہی دااے؟
سانُوں ایہدے اُتے اپنے دِلاں وِچ ایمان رکھنا اے
تے ایہدی سارے جگ وِچ منادی کرنی اے ۔
 
ساڈے خُداوند نے ساڈے نال اِک نواں وعدہ کیِتا ۔” میَں تُہاڈا مکتی داتا بناں گا ۔میَں تُہانُوں پانی تے لہو دے راہیں جگ دے سارے پاپاں توں مکمل طور اُتے چھُڈاواں گا ۔ میَں یقیناًاوہناں ساریاں  نُوں برکت دیواں گا جیہڑے میرے اُتے ایمان رکھدے نیں۔“
کیہ تُسیں خُدا دے نال ایس نویں وعدے اُتے ایمان رکھدے او؟اَسیں اپنے سارے پاپاں توں مکتی یافتہ تے نویں سِریوں جم سکدے آں ۔ جدوں اَسیں اوہدے وعدے نوں سچ جان دے تے پانی تے لہو دے وسیلے نال اوہدی مکتی اُتے ایمان رکھدے آں ۔
اَسیں اِک ڈاکٹر اُتے بھروسہ نئیں کردے جے اوہ چنگے طریقےنال ساڈی بیماری دی جان پچھان نئیں کردا ۔اِک ڈاکٹر نُوں پہلاں اپنے بیماراں دی بیماری نُوں چنگے طریقے نال جان پچھان کرنی اے تے فیر ٹھیک دوائی اوہدے لئی کڈھے گا ۔ دوائیاں دیاں ساریاں قسماں موجود نیں ، پر ڈاکٹر نُوں چنگے طریقے نال جاننا چاہی دا اے پئی کیہڑی دوائی ورتنی اے ۔ اِک واری ڈاکٹر اپنے بیماراں دی بیماری دی ٹھیک جان پچھان کردااے ، اوہناں نُوں شفادین لئی بوہت ساریاں دوائیاں موجود نیں ۔پر غلط چھان بین دے نال ،اوہ ساریاں چنگیاں دوائیاں بیمار نُوں صرف حالوں بے حال کر سکدیاں نیں ۔
ایسے طرحاں ، جدوں تُسیں یسوع اُتے ایمان رکھدے او،تُہانُوں خُدا دے کلا م اُتے بنی ہوئی اپنی رُوح دی حالت دی چھان بین کرنی اے ۔ جدوں تُسیں خُدا دے کلام نال اپنی روح دا جائزہ لیندے او ،تُسیں صحیح طریقے نال ویکھ سکدے او پئی تُہادی رُوح کیہڑے حال وِچ اے ۔رُوحاں دا ڈاکٹر کوئی ہتھ پیر ہلائیوں اَڈ اپنے سارے روگیاں نُوں چنگیاں کر سکدااے ۔ اوہ سارے نویں سِریوں جم سکدے نیں ۔
جے تُسیں آکھدے او ، ”   میَں نئیں جان دا پئی میَں پاپاں توں مکت ساں ۔“ ایہدا مطلب اے
تُسیں مکتی یافتہ نئیں جے ۔جے اِک پادری سچ مُچ یسوع دا چیلا اے ۔ اوہنوں اپنے پچھے چلن والیاں لئی پاپ دے مسئلے نُوں حل کرن دے لائق ہونا چاہی دا اے ۔ فیر اوہ اوہناں دے ایمان دے مسئلے نُوں حل کرنا چالُو رکھ سکدااے تے اوہناں دی رُوحانی  طور اُتے راہنمائی کر سکدااے ۔ اوہنوں اپنے پچھے چلن والیاں دی ٹھیک رُوحانی حالت ویکھن دے لائق ہوناچاہی دااے ۔
یسوع ایس جگ وچ جگ دے سارے پاپاں نُوں چُکن لئی آیا ۔اوہ آیا تے بپتسمہ لیا تے سولی اُتے مرگیا ۔جدوں اوہنے سارے پاپاں دا کفارہ دِتا ،کیہ اوہنے تُہاڈے پاپ چھڈ دِتے ۔ پانی تے رُوح دا کلام ایمانداراں دے پاپاں نُوں مکاندا اے ۔
خوشخبری طاقت والے بم وانگراے ۔ایہہ اُچیاں گھراں تو ں  لے کے ہر شے نُوں اُڈا دیندی اے ۔ یسوع دا کم اِنج ای اے ۔اوہ اوہناں دے پاپاں نوں مکاؤندااےجیہڑے اوہدے وِچ پانی تے رُوح دی خوشخبری نال اوہدے اُتے ایمان رکھدے نیں  ۔ آؤ اَسیں پانی تے رُوح دی خوش خبری اُتے دھیان کریے ۔ جویں ایہہ پاک کتاب وِچ وکھائی گئی اے۔
 
 
پُرانے عہد نامہ وِچ ہتھاں دے رکھے جان دی خوشخبری
 
پُرانے عہد نامہ وِچ ہتھاں دے رکھے
جان دا کیہ مطلب سی ؟
ایہدامطلب پاپاں دے چڑھاوے اُتے
پاپاں نُوں لدناسی ۔
 
آؤ اَسیں پاپاں دی معافی دی خوشخبری دے سچ نُوں احبار۱ : ۳ ۔ ۴ وِچوں ویکھیے ۔ ”جے ایہدا چڑھاوا گاں وچھے دی سُخی قربانی ہووے تے اوہ بے عیب نَر نُوں لیا کے اوہنوں اکٹھ دے تنبو دے بوہے اُتے چڑھائے تاں جے اوہ آپ خُداوند دے اَگے قبول ہووے ۔ تے اوہ سُخےچڑھاوے دے پسُو دے سِر اُتے اپنا ہتھ رکھے ، فیر اوہ اوہدے ولوں قبول ہووے گا تاں جے اوہدے لئی کفارہ ہووے۔“
ایہہ حوالہ سانُوں دَسدااے  پئی سُخے ہوئے چڑھاوے اکٹھ دے تنبو دے ملن دے بوہے اُتے خُداوند دے اَگے چڑھاویاں دے سِر اُتے ہتھاں دے رکھے جان دے راہیں چڑھائے جانے چاہی دے سَن تے چڑھاوا اِک جیوندا بے پاپ پسُو ہونا چاہی دا اے ۔
پُرانے عہد نامہ دے دِناں وِچ ،اِک پاپی اپنے ہر دیہاڑے دے پاپاں لئی کفارہ دین لئی چڑھاوے اُتے اپنے ہتھاں نُوں رکھداسی ۔اوہ خُداوند دے اَگے پاپ دے چڑھاوے نوں ذبح کردا تےکاہن اوہدا لہو لیندا تے سُخے ہوئے چڑھاوے دے سنگاں اُتے اینوں لاؤندا سی ۔ فیر اوہ باقی لہو قربانی والی تھاں دی بنیاد اُتے ڈوہل دیندا سی تے پاپی اوس دیہاڑےدےپاپ لئی معاف کیتا جاندا سی ۔
اِک سال دے پاپ لئی ،احبار ۱۶ : ۶ ۔ ۱۰، وِچ ایہہ لکھا ہویا اے ، ” تےہارون تقصیر دے چڑھاوے دے وچھے نُوں جیہڑا اوہدے ولوں اے چڑھاکے اپنے تے اپنے گھر لئی کفارہ دیوے ۔فیر اوہناں دونواں بکریاں نُوں لے کے اوہناں نُوں اکٹھ دے تنبو دے بوہے اُتے خُداوند دے اَگے کھڑا کرے ۔تے ہارون اوہناں دونواں بکریاں اُتے چِٹھیاں پاوے ۔ اِک چِٹھی خُداوند لئی تے دُوجی عزازیل لئی ہووے ۔ تے جیہڑے بکرے اُتے خُداوند دے ناں دی چِٹھی نکلے اوہنوں ہارون لے کے تقصیر دے چڑھاوے لئی چڑھائے ۔پر جیہڑے بکرےاُتے عزازیل دے  ناں دی چِٹھی نکلے اوہ خُداوند دے اَگے جیوندا کھڑاکیِتا جاوے تاں جے اوہدے نال کفارہ دِتا جاوے تے اوہ عزازیل دے لئی بیابان وِچ چھڈدِتا جاوے ۔ “ جویں پاک کتاب وِچ دَسیا گیا اے ،عزازیل دا مطلب ” بجھانا اے“ ایس  لئی اِک ورہے دے پاپاں دا ستویں مہینے دی دسویں تاریخ اُتے کفارہ دِتا جانداسی ۔
احبار ۱۶ : ۲۹ ۔۳۰ وِچ ایہہ لکھیا ہویا اے ،  ” تے تُہاڈے لئی اِک سداداقانون ہووے پئی ستویں مہینے دی دسویں تاریخ نوں تُسیں اپنی اپنی جان نُوں دُکھ دینا تے اوس دیہاڑے کوئی بھاویں اوہ دیسی ہووے یاں پردیسی جیہڑا تُہاڈے وِچ رہندا ہووے ،کسے طرحاں دا کم نہ کرے ۔ کیوں جے اوس دیہاڑے تُہاڈے لئی ،تُہانُوں پاک کرن لئی کفارہ دِتا جاوے گا ۔ ایس لئی تُسیں اپنےسارے پاپاں توں خُداوند دے اَگے پاک ٹھہروگے۔“
ایہہ دیہاڑا سی جیہدے وِچ اِسرائیلی اِک ورہے دے پاپ لئی کفار ہ دیندے سَن ۔ایہہ کویں ہو سکدا سی ؟پہلاں ، وڈے کاہن ہارون نُوں چڑھاوا چڑھاؤنا پیندا سی ۔جیہڑا اِسرائیل دے لوکاں دی اَگوائی کرداسی ؟ہارون ،خُدا نے ہارون تے اوہد ی نسل نُوں وڈےکاہناں دے وانگر من لیا سی ۔
ہارون اپنے تے اپنے خنوادے لئی وچھے دا کفارہ پیش کرداسی ۔ اوہ وچھے نُوں ذبح کردا تے اوہدا کُجھ لہو ترس گاہ اُتے تے اوہدے اَگے ۷  واری تراؤنکداسی ۔اوہنوں سب تو ں پہلاں اپنے تے اپنے خنوادے لئی کفارہ دینا پینداسی ۔
فدیہ دا مطلب اےکسے دا اپنےپاپاں نُوں پاپ دے چڑھاوے اُتے لدنا تے پاپ دے چڑھاوے نُوں اپنی تھاں اُتے مرن دینا ۔ پاپی اوہ اے جنہوں مرنا اے ،پر اپنے پاپاں دے لئی چڑھاویاں اُتے اوہناں نُوں لدن دے راہیں تے اپنی تھاں اُتے اوہدے مرن دے وسیلے نال فدیہ دے سکدا سی ۔
اوہدے  تے اوہدے خنوادے دے اوہناں پاپاں دے فدیہ دے بعدوں ، اوہ اک بکرا خُدا دے اَگے پیش کردا سی جد پئی دوجا بکرا اِسرائیل دے لوکاں دی موجودگی وِچ عزازیل دے طور اُتے جنگل وِچ گھلداسی ۔
اِک بکرا پاپ دے چڑھاوے دے طور اُتے چاہڑیا جانداسی ۔ہارون پاپ دے چڑھاوے دے سِر اُتے اپنے ہتھاں نوں رکھدا تے من دا ،  ” یا خُداوندا ،تیرے لوک اِسرائیلیاں نے سارے ۱۰ حکماں تے تیری شریعت دیاں ۶۱۳ شِقاں(حدبندیاں) دی بے عزتی کیتی ۔اِسرائیلی پاپی  بن  گئے  نیں ۔  ہُن میَں
اپنے ہتھ ایس بکرے اُتے اپنے پورے ورہے دے سارے پاپاں نوں لدن رکھداہاں۔“
اوہ بکرے دی گردن وڈدا تے اوہدے لہو نال  اکٹھ دے تنبو دے اندر بوہتی پاک تھاں وِچ جاندا۔ فیر اوہ اوہدا کُجھ لہو ترس دی تھاں اُتے تے اوہدے اَگے ۷ واری تراؤنکدا۔
بوہتے پاک تھاں دے اندر وعدے داصندوق اے ۔ایہداسرپوش ترس والی تھاں اَکھواندااے ۔ تے ایہدے اندر وعدے دے پتھر دیاں دو تختیاں ،من دے سونے دا مرتبان تے ہارون دا سوٹا جیہڑا اُگ پیا سی ۔
ہارون دا ڈنڈا جیہڑا جی اُٹھن نُوں ظاہر کردااے ،وعدے دی پتھردیاں دو تختیاں اوہدا انصاف تے من داسونے دا مرتبان اوہدا حیاتی دا کلام اے ۔
وعدے دے صندوق دے اُتے اِ ک سرپوش اے ۔ لہو ترس کھان والی تھاں دے اَگے ۷واری تراؤنکیا جاندا سی ۔جویں پئی وڈےکاہن دے چولے دے کناریاں اُتے سونے دیاں ٹلیاں لمکیاں ہوئیاں سَن ،اوہ چھنکدیاں سَن جدوں اوہ لہو تراؤنکداسی ۔
احبار ۱۶ : ۱۴ ۔۱۵ وِچ ایہہ لکھیا اے ”  فیراوہ اوس وچھے دا کُجھ لہو لے کے اوہنوں اپنی اُنگل نال چڑھدے وَل سرپوش دے اُتے تراؤنکے تے سرپوش دے اَگے وی کُجھ لہو اپنی اُنگل نال ۷ واری تراؤنکے ۔فیر اوہ تقصیر دے چڑھاوے دے اوس بکرے نُوں ذبح کرے جیہڑا جماعت ولوں اے تے اوہدے لہو نُوں پردے دے اندر لیا کے جویں اوہنے وچھے دے لہو نال کیتا سی اوسے طرحاں ایہدے نال وہ کرے تے اوہنوں سرپوش دے سَر اُتے تے اوہدے اَگے تراؤنکے ۔ “
ٹلیاں ہرواری وجدیاں سَن جدوں اوہ بکرے داکُجھ لہو تراؤنکداسی تے سارے اِسرائیلی جیہڑے باہر اکٹھےہُندے سَن اوس آواز نُوں سُن سکدے سَن ۔کیوں جے اوہناں دے پاپاں لئی فدیہ وڈے کاہن دے راہیں دِتا جانا پیندا سی ۔ٹلیاں دی آواز دا مطلب اے ،اوہناں دے پاپ معاف کیتے گئے سَن ۔ایہہ اِسرائیل دے سارے لوکاں لئی برکت دی آواز سی ۔
جدوں ٹلیاں ۷واری وجدیاں سَن اوہناں نیں آکھیا ، ” ہن میَں سکون وِچ آں ۔میَں سارے ورہے دے پاپاں توں پریشان رہ چُکیا ساں ،تے ہُن میَں آزادی محسوس کردا ہاں ۔“تے لوک اپنی حیاتیاں وِچ جُرم دے احساس توں آزادی محسوس کردے ہویاں واپس چلے جاندے سَن۔ ٹلیاں دی آواز اوس ویلے بالکل ایہو جیہی سی جویں نویں سِریوں جمن دی پانی تے رُوح دی خوشخبری ہیگی اے ۔
جدوں اَسیں پانی تے رُوح دی مکتی دی خوشخبری نُوں سُن دے آں تے اپنے دِلاں نال ایہدے اُتے ایمان رکھدے آں تے اینوں اپنے منہ نال من لیندے آں ، ایہہ پانی تے رُوح دی خوش خبری اے ۔جدوں ۷واری ٹلی وجدی سی ، اِسرائیلیاں دے سارےورہے دے پاپ معاف کیتے جاندے سَن ۔اوہناں دے پاپ خُدا دے اَگے دھوئے جاندے سَن ۔
اِسرائیلیاں لئی اِک بکرا قربان کرن دے بعدوں ، وڈاکاہن دوجے بکرے نُوں لیندا تے اکٹھ دے تنبو دے باہر اُڈیکن والے لوکاں دے کول لے جاندا سی ۔ جدوں اوہ ایہنوں ویکھدے ، وڈاکاہن ہارون دوجے بکرے دے سِر اُتے اپنے ہتھاں نُوں رکھداسی ۔
احبار ۱۶ : ۲۱۔۲۲ وِچ، ” تے ہارون اپنے دونویں ہتھ اوس جیوندے بکرے دے سِر اُتے رکھ کے اوہدے اُتے بنی اِسرائیل دیاں ساریاں بدکاریاں تے اوہناں دے سارے پاپاں تے تقصیراں دا اقرار کرے تے اوہناں نُوں اوسے بکرے دےسِر اُتے لد کے اوہنوں کسے بندے دے ہتھ جیہڑا ایس کم لئی تیار ہووے جنگل وِچ گھل دیوے ۔تے اوہ بکر ا اوہناں دیاں ساریاں بدکاریاں اپنے اُتے لدیاں ہویاں کسے اُجاڑ تھاں وِچ لے جاوے گا ۔ایس لئی اوہ اوس بکرے نُوں جنگل وِچ چھڈ دیوے ۔ “
وڈاکاہن ،ہارون، دوجے بکرے (عزازیل)دے سِر اُتے اپنیاں ہتھاں نُوں رکھداسی تے خُدا دے اَگے اِسرئیلیاں دے سارے ورہے دے سارے پاپاں دا اقرار کرداسی ۔  ” یا خُداوندا، اِسرئیلیاں نے تیرے اَگے پاپ کیتا اے ۔ اَسیں ۱۰حکماں تے تیری شریعت دیاں ساریاں ۶۱۳ حداں دی بے عزتی کیتی اے ۔ یا خُداوندا ،میَں اِسرئیلیاں دے پورے ورہے دے سارے پاپاں نُوں ایس بکرے دے سِر اُتے لدداہاں ۔ “
یرمیاہ ۱۷ :۱ دے مطابق ، پاپ دو تھاواں اُتے لکھے جاندے نیں ۔اِک کماں دی کتاب وِچ تےدوجے اوہناں دے دِلاں دیاں تختیاں اُتے ۔
ایس لئی جے لوکاں نیں اپنے پاپاں لئی فدیہ دینا اے ،اوہناں دے پاپاں نُوں کماں دی کتاب وِچوں تے اوہناں دے دِلاں دیاں تختیاں اُتوں مٹانا اے۔ فدیہ دیہاڑے اُتے ،اِک بکرا اِنصاف دی کتاب وِچ لکھے،پاپاں لئی سی تے دوجا اوہناں دے دلاں دیاں تختیاں اُتے چھاپے ہوئے پاپاں لئی سی ۔
 
پُرانے نامہ وِچ چڑھاوے دے بندوبست دے
راہیں خُدا نے اِسرائیلیاں نُوں کیہ وکھایا ؟
پئی مکتی داتا آوے گا تے اوہناں دے پاپاں نُوں اِکو ای
وار تے ہمیش لئی بوہت چنگے طریقے نال دھودیوے گا
 
بکرے دے سِر اُتے ہتھاں نُوں رکھن دے راہیں وڈے کاہن نے لوکاں نُوں وکھایا پئی اوہناں دے پورے ورہے دے پاپ بکرے اُتے لدے گئے سَن ۔جدوں پاپ بکرے دے سِر اُتے رکھے جاندے سَن ،اِک عام بندہ بکرے نُوں جنگل وِچ لے جانداسی ۔
فلسطین ریتلی زمین اے ۔بکر ا جیہڑا اِسرائیلیاں دے پورے ورہے دے سارے پاپاں نُوں چُکدا سی ایس کم لئی مقرر اِک بندے دے راہیں ریتلی تھاں وِچ لیایا جانداسی ،جتھے نہ پانی تے نہ ای گھاہ ہُندی سی ۔ لوک کھڑے ہُندے تے عزازیل نُوں جنگل وِچ جاندیاں ویکھدے سَن ۔
اوہ اپنے آپ نال گل کردے ، ” مینوں مرنا چاہی دااے ،پربکرامیرے پاپاں لئی میری تھاں اُتے مرےگا ۔ پاپ دی دیہاڑی موت اے،پر بکرا میرے لئی مردا اے ، بکریا ، تیرا شکریہ ۔تیری موت دا مطلب اے پئی میَں جیوندا رہ سکدا ہاں۔“ بکراریتلی تھاں وِچ بوہت دُور لے  جایا جاندا تے اِسرائیلی اِک ورہے دے پاپ لئی معاف کیتے جاندے سَن ۔
جدوں تُہاڈے دِل دے پاپ ، پاپ دے چڑھاوے اُتے لدے جاندےنیں ،تُسیں پاک ہو جاندے او۔ ایہہ بوہت سوکھا اے ۔ اصل وِچ ہمیشہ جویں ایں اَسیں اینوں اِک وار سمجھدے آں ایہہ سوکھا ہُنداا ے ۔
بکر ا بوہت دُور جاکے اکھیوں اوہلے ہو جانداسی ۔بندہ اینوں چھڈن دے بعدوں کلا واپس آؤندا سی ۔ اِسرائیلیاں دے پورے ورہے دے سارے پاپ چلے جاندے سَن ۔بکرا پانی یا گھاہ دے اَڈ ریتلی تھاں وِچ آوارہ پھرداتے اخیروِچ اِسرائیلیاں دے پاپاں دے اِک ورہے دے مُل دے نال مرجانداسی ۔
پاپ دی دیہاڑی موت اے،تے خُدا دی عدالت پوری ہو جاندی سی ۔خُدا نے بکرے دا چڑھاوا دِتا تاں پئی اِسرائیلی حیاتی پا سکن ۔ اِسرائیلیاں دی ورہے دے وِچکار دیاں ساریاں بدکرداریاں صاف کیتیاں جاندیاں سَن ۔
جویں اِک دیہاڑے دے پاپ تے اِک ورہے دے پاپ پُرانے عہد نامہ دے دِناں وِچ ایسے طرحاں معاف کیتے جاندے سَن۔ایہہ خُدا د اوعدہ سی پئی ساڈے پاپ اِنج ای اِکو ای وار تے ہمیش لئی معاف کیتے جان گے ۔ ایہہ اوہدا وعدہ سی پئی اوہ ساڈے کول مسیحا نُوں گھلے گا تے سانُوں ساڈے سارے حیاتی دے پاپاں توں آزاد کرے گا ۔ یہ وعدہ یسوع دے بپتسمہ دے راہیں پوراہویا سی ۔
 
 
نویں عہد نامہ وِچ پانی تے رُوح دے راہیں نویں سِریوں جمنا
 
کیوں یسوع نے یوحنا اصطباغی کولوں بپتسمہ لیا؟
جگ دے سارے پاپ چُکن دے راہیں،ساری راستبازی پوری
کرن لئی ،نویں عہد نامہ وِچ یسوع دا بپتسمہ پُرانے عہد نامہ
وِچ بالکل ہتھاں دا رکھیا جانا سی ۔
 
آؤ اَسیں متی ۳ : ۱۳ ۔۱۵ پڑھیے ۔  ” اوس ویلے یسوع گلیل توں یردن دے کنارے یوحنا کول اوہدے کولوں بپتسمہ  لین آیا۔ پر یوحنا ایہہ آکھ کے اوہنوں منع کرن لگا پئی میَں آپ تیرے کولوں بپتسمہ  لین دا محتاج آں تے تُوں میرے کول آیا ایں؟ یسوع نے جواب دیندیاں ہویاں اوہنوں آکھیا ہُن تُوں ہون ای دے کیوں جے سانُوں ایسے طرحاں ساری راستبازی پوری کرنا ٹھیک اے ۔ایس اُتے اوہنے ہون دِتا ۔“
یسوع یردن اُتے گیا تے یوحنا اصطباغی کولوں بپتسمہ لیا تے اِنج کرن نال ،اوہنے ساری راستبازی پوری کیتی ۔ اوہنے یوحنا کولوں بپتسمہ لیا ۔یوحنا زنانیاں وِچوں جمن والیاں وِچوں ساریاں توں وڈا سی۔
متی ۱۱ :۱۱۔۱۲ آکھدا اے ، ” میَں تُہانُوں سچ آکھدا ہاں پئی جیہڑے زنانیاں وِچوں جمے نیں اوہناں وِچوں یوحنا بپتسمہ  دین والے توں وڈاکوئی نئیں ۔   ۔ ۔ ۔ تے یوحنا بپتسمہ  دین والے دے دِناں توں ہُن تیک اَسمان دی بادشاہی اُتے زور ہندارہیااے۔“
یوحنا اصطباغی اِنسانی پیڑھی دا آگُو ہون لئی خُدادے راہیں چُنیا گیا تے مسیح توں  ۶ مہینے  پہلاں گھلیا
گیا سی ۔ اوہ ہارون دی نسل وِچوں تے آخری وڈاکاہن سی ۔
جدوں یسوع اوہدے کول آیا ، یوحنا  اِصطباغی نے آکھیا،” میَں آپ تیرے کولوں بپتسمہ  لین دا محتاج آں تے تُوں میرے کول آیا ایں؟ “
” ہُن تُوں ہون ای دے کیوں جے سانُوں ایسے طرحاں ساری راستبازی پوری کرنا ٹھیک اے ۔“ اوہدا مطلب اِنسانی پیڑھی نُوں پاپ توں  آزاد کرنا سی تاں پئی اوہ خُدا دے پُتر بن سکن ۔ یسوع نے یوحنا نُوں آکھیا ، ” سانُوں پانی تے رُوح دے راہیں نویں سِریوں جمن دی خوشخبری نُوں پوریاں کرنا اے ۔ ایس لئی مینوں ہُنے بپتسمہ دیوو۔“
یوحنا نے یسوع نُوں بپتسمہ دِتا ۔ایہہ یسوع لئی چنگا سی پئی جگ دے سارے پاپاں نُوں چُکن لئی بپتسمہ لوے۔ کیوں جے اوہنے بوہت چنگے طریقے نال بپتسمہ لیا،ایس طرحاں اَسیں اپنے ساریاں پاپاں توں چنگے طریقے نال مکتی یافتہ ہو گئے آں۔ یسوع نے بپتسمہ لیا تاں جے ساڈے سارے پاپ اوہدے اُتے لدے جا سکن ۔
 یسوع ایس جگ وِچ آیا تے بپتسمہ لیا جدوں اوہ ۳۰ ورہیاں دا سی ۔ایہہ اوہدی پہلی خدمت سی ۔ یسوع نے جگ دے سارے پاپاں نُوں مٹاؤن دے راہیں ساری راستبازی نُوں پوریاں کیِتا ۔ ایس طرحاں
ساریاں لوکاں نُوں پاک ٹھہراکے وِکھ کیتا ۔
یسوع ایس جگ وِچ آیا تےسانُوں ساڈے ساریاں پاپاں توں بوہت چنگے طریقے نال چھڈاؤن لئی  بپتسمہ لیا ۔ ” ایسے طرحاں“ ساری راستبازی پوری کیتی گئی سی ۔
خُدانے آکھیا ، ” ایہہ میرا سوہنا پُتر اے جیہدے توں میَں خوش آں ۔“ (متی ۳ :۱۷)۔یسوع مسیح جان داسی پئی اوہ اِنسانی پیڑھی دے سارے پاپاں نُوں چُکے گا تے سُولی اُتے اپنے مرن تیک لہو وگائے گا ، پر اوہنے ایہہ آکھدیاں ہویاں ،اپنے پیو دی مرضی نُوں منیا ، ” فیر وی نہ جویں میَں چاہنداہاں سگوں جویں توں چاہنداایں اُنج ای ہووے۔“ (متی ۲۶ : ۳۹)۔پیودی مرضی اِنسانی پیڑھی دے سارے پاپاں نُوں دھونا تے ایس طرحاں جگ دے لوکاں نُوں مکتی پیش کرنی سی ۔
ایس لئی یسوع آکھا منن والے پُتر نے، اپنے پیو دی مرضی دا آکھیا منیا تے یوحنا اصطباغی کولوں بپتسمہ لیا ۔
 یوحنا ۱ : ۲۹ وِچ اے ، ” دوجے دیہاڑے اوہنے یسوع نُوں اپنے وَل آؤندیاں ویکھ کے آکھیا ویکھو ایہہ خُدا دا میمنا اے جیہڑا جگ دا پاپ چُک لے جاندااے۔  “  یسوع  نے  سارا پاپ چُک لیا تے
سُولی والی تھاں گُلگُتا اُتے لہو وگایا ۔ یوحنا اِصطباغی نے گواہی دِتی ،  ” ویکھو ایہہ خُدا دا میمنا اے جیہڑا جگ دا پاپ چُک لے جاندااے۔  “
کیہ تُسیں پاپ رکھدے او یاں نئیں؟ کیہ تُسیں اِک راستباز یاں اِک پاپی بندے او؟ سچ ایہہ اے پئی یسوع نے جگ دا پاپ چُک لیا تے ساڈے ساریاں لئی سُولی اُتے مرگیا ۔
 
ایس جگ دے سارے پاپیاں دے پاپ کدوں
یسوع اُتے لدے گئے سَن ؟
یسوع نے ساڈے پاپ چُک لئے جدوں اوہنے یردن
اُتے یوحنا اصطباغی کولوں بپتسمہ لیا سی ۔
 
ساڈے ایس جگ وِچ جمن توں بعد ،ایتھوں تیکر پئی اِسیں ۱ توں ۱۰ ورہے دی عمر دے وِچکار پاپ کردے آں ۔ یسوع نے اوہناں پاپاں نُوں چُک لیا ۔اَسیں ۱۱ توں ۲۰ ورہیاں دی عمر دے وِچکار وی پاپ کردے آں ۔پاپ جیہڑے اَسیں اپنے دِلاں وِچ کردے آں تے اپنے کماں وِچ کردے آں ،اوہنے اوہناں ساریاں نُوں چُک لیا سی  ۔
اَسیں۲۱ توں ۴۵ ورہیاں دی عمر دے وِچکار وی پاپ کردے آں ۔ اوہنے اوہناں ساریاں نُوں ایسے طرحاں چُک لیا سی  ۔اوہنے جگ دے ساریاں پاپاں نُوں چُک لیا تے سُولی اُتے مرگیا سی ۔ اَسیں اپنے جمن دیہاڑے توں لے کے اپنے مرن دیہاڑے تیک پاپ کردے آں ۔ پر اوہنے اوہناں ساریاں نُوں چُک لیا۔
” ویکھو! ایہہ خُدا دا میمنا اے جیہڑا جگ دا پاپ چُک لے جاندااے۔ “ سارے پاپ اوہناں وِچوں ،پہلے آدمی آدم توں لے کے ایس جگ وِچ جمن والے آخری آدمی تیک — جدوں کدی اوہ ہو سکدا اے —  اوہنے اوہناں نُوں چُک لیا۔ اوہنے چُنیا تے پسند کیِتا پئی کناں دے پاپاں نُوں اوہنوں چُکنا ہووےگا ۔
اوہنے ساڈے وِچوں صرف کئیاں نوں محبت کرن دا فیصلہ نئیں کیِتا ۔اوہ   جثے   وِچ آیا   تے   جگ دے سارے پاپاں نُوں چُک لیا تے سُولی اُتے مرگیا ۔ اوہنے ساڈے وِچوں ساریاں لئی سزا نُوں سہاریا  تے
سدا لئی ایس جگ دے پاپاں نُوں مٹا دِتا ۔
اوہدی مکتی توں کوئی وی بندہ باہرنئیں سی ۔” جگ دا ساراپاپ “ ساڈے سارے پاپاں نُوں شامل کردااے ۔ یسوع نے اوہناں ساریاں نُوں چُک لیا ۔
اپنے بپتسمہ تے لہو دے نال اوہنے جگ دے سارے پاپاں نُوں صاف کردِتا ۔ اوہنے اپنے بپتسمہ دے راہیں اوہناں ساریاں نُوں چُک لیا تے سُولی اُتے ساڈے لئی سزا نُو جریا۔ یسوع نے سُولی اُتے مرن توں پہلاں ،اوہنے آکھیا، ” مکمل ہو گیا  “ (یوحنا ۱۹ : ۳۰)،یعنی پئی اِنسانی پیڑھی دی مکتی پوری سی ۔
یسوع سُولی اُتے کیوں چڑھیا سی ؟کیوں جے جسم دی جان لہو وِچ اے تے لہو کسے دی حیاتی لئی فدیہ دیندا اے (احبار ۱۷ : ۱۱)۔یسوع نے کاہدےلئی بپتسمہ لیناسی ؟کیوں جے اوہ جگ دے سارے پاپاں نُوں چُکنا چاہندا سی ۔
” ایہدے بعد وں جدوں یسوع نے جان لیا پئی ہُن ساریاں گلاں پوریاں ہو گئیاں تاں جے خُدا دی مرضی پوری ہووے تے آکھیا پئی مینوں تریہہ لگی اے ۔“ (یوحنا ۱۹ : ۲۸)۔ یسوع ، ایہہ جان دے ہویاں مرگیا پئی پُرانے عہد نامہ وِچ خُدا دے سارے عہد یردن اُتے اوہدے بپتسمہ دے نال تے سُولی اُتے اوہدی موت دے نال پورے ہوگئے سَن ۔
یسوع جان دا سی پئی پاپاں دی معافی اوہدے راہیں پوری ہوئی سی تے آکھیا ، ” مکمل ہوگیا  “ اوہ سُولی اُتے مرگیا ۔ اوہنے سانُوں پاک کیِتا اے ، ۳ دیہاڑے بعد مویاں وِچوں جی اُٹھیا تے اَسمان اُتے چڑھ گیا ۔ جتھے اوہ ہُن خُدا دے سجے ہتھ بیٹھا ہویا اے ۔
یسوع دے بپتسمہ تے اوہدی سُولی والی موت دے راہیں سارے پاپاں نُوں دھونا پانی تے روح دی نویں سِریوں ہون دی برکت والی خوشخبری اے ۔ ایہدے اُتے ایمان رکھو، تے تُسیں اپنے سارے پاپاں توں معاف کیتے جاؤگے ۔
اَسیں ہر دیہاڑے توبہ لئی دُعاکرن دے وسیلے اپنے پاپاں لئی فدیہ نئیں دے سکدے۔ چھٹکارا اِکو ای وار تے ہمیش لئی یسوع دے بپتسمہ تے اوہدی صلیبی موت دے راہیں عطاکیتا گیا اے ۔ ” تے جدوں ایناں دی معافی ہو گئی اے تےفیر پاپ دا چڑھاوا نئیں رہیا۔“ (عبرانیوں ۱۰ : ۱۸)
ہُن سانُوں جیہڑا سب کُجھ کرنا اے یسوع دے بپتسمہ تے اوہدے  سُولی  اُتے  مرن دے  راہیں پاپاں دی معافی اُتے ایمان رکھنا اے ۔ ایمان رکھو تے تُسیں مکتی یافتہ ہو جاؤگے ۔
رومیوں ۵ : ۱ ۔۲ آکھدا اے ، ” ایس لئی جدوں  اَسیں ایمان نال راستباز ٹھہرے تے
خُدا دے نال اپنے خُداوند یسوع  مسیح دے وسیلے صلح رکھیے۔جیہدے وسیلے نال ایمان دے راہیں  اوس فضل تیک ساڈی پہونچ وی ہوئی جیہدے اُتے قائم ہیگے آں تے خُدا دے جلال دی آس اُتے فخر کریئے۔ “
پاک ہون دا کوئی دوجا رستہ نئیں ہیگا سگوں پانی تے رُوح دی نویں سِریوں جمن دی برکت والی خوشخبری اُتے ایمان رکھنا اے ۔
 
 
خُدا دی شریعت دا مطلب
 
کیہ اَسیں شریعت دے راہیں
 پاک ہو سکدے آں؟
نئیں ۔اَسیں پا ک نئیں ہو سکدے ۔ شریعت صرف
سانُوں ساڈےپاپاں توں خبردار کر سکدی اے۔
 
عبرانیوں ۱۰ :۹ ،وِچ لکھیاہویا اے ، ” تے فیر ایہہ آکھدا اے پئی ویکھ میَں آیا ہاں تاں جے تیری مرضی پوری کراں۔ ایس لئی اوہ پہلے نُوں ختم کردااے تاں پئی دوجے نُوں قائم کرے “ اَسیں شریعت دے راہیں پا ک نئیں ہوسکدے ۔ایہہ صرف سانُوں پاپی بناؤندی اے ۔خُدادا مطلب ساڈے لئی شریعت دا آکھنا مننا نئیں ہیگا۔
رومیوں ۳ : ۲۰ آکھدا اے ، ” ایس لئی پئی شریعت دے راہیں تے پاپ دی پچھان ای ہُندی اے ۔“ خُدا نے اِسرائیلیوں نُوں موسیٰ دے راہیں شریعت دِتی جدوں ابرہام دے وعدہ حاصل کرن دے بعد۴۳۰ورہے لنگھ گئے سَن ۔ اوہنے اوہناں نُوں شریعت دِتی پئی اوہ جان سکن پئی خُدا دے اَگے پاپ دا کیہ مطلب اے ۔ خُدا دی شریعت دے نہ ہون وِچ ،اِنسانی پیڑھی پاپ دی کوئی پچھان نئیں رکھدی سی ۔ خُدا نے سانُوں اپنی شریعت دِتی تاں پئی اَسیں پاپ دی جان پچھان تک اَپڑ سکیے۔
ایس لئی شریعت دا کلا مطلب سانُوں جانن دی اجازت دیندا اے پئی  اَسیں  سارے  خُدا  دے
اَگے پاپی آں ۔ ایس جان پچھان دے راہیں ساڈا مطلب پانی تے رُوح دی نویں سِریوں جمن دی برکت والی خوشخبری اُتے ایمان رکھن دے راہیں یسوع وَل پرتنا اے۔ ایہہ شریعت دا مطلب اے جیہڑی خُدا نے سانُوں دِتی سی ۔
 
 
خُداوند ،خُدا دی مرضی پوری کرن لئی آگیا اے
 
سانُوں خُدادے اَگے کیہ کرنا اے؟
سانُوں یسوع دے راہیں خُدا دی مکتی اُتے
ایمان رکھنا اے۔
 
” میَں آیا ہاں تاں پئی تیری مرضی پوری کراں ۔ایس لئی اوہ پہلے نُوں ختم کردااے تاں پئی دوجے نُوں قائم کرے۔ “ (عبرانیوں ۱۰ : ۹)۔کیوں جے اَسیں شریعت دے راہیں پاک نئیں بن سکدے ۔ خُدا سانوں اپنی شریعت دے نال مکتی نئیں دِتی ،سگوں اپنی پوری خلاصی دے نال۔خُدا نے سانُوں اپنی محبت تے اِنصاف دے نال مکتی دِتی ۔
” اوسے مرضی دے سبب اَسیں یسوع مسیح دے بدن دے اِکو ای وار قربان ہون دے راہیں پاک کیتے گئے آں ۔ تے ہر اِک کاہن تے کھلوکے ہر دیہاڑے عبادت کردا اے تے اِکو ای طرحاں دیاں قربانیاں ہر وار چڑھاؤندااے جیہڑیاں کدی وی پاپاں نُوں دُور نئیں کر سکدیاں ۔ “ (عبرانیوں ۱۰ : ۱۰ ۔۱۲)۔
اوہ خُدا دے سجے ہتھ بیٹھا کیوں جے اوہدا مکتی دا کم پورا ہوگیا سی تے اوہدے کرن لئی کوئی ہور کم نئیں رہیا سی ۔ا وہ سانُوں مکتی دین لئی دوبارہ نہ بپتسمہ لوے گا تے نہ ای اپنے آپ نُوں قربان کرےگا۔
ہُن کیوں جے جگ دے سارے پاپ دھوتے گئے نیں،اوہنوں جو سب کُجھ کرنا ایں اوہناں نُوں ہمیش دی حیاتی دینی اے ،جیہڑے اوہدے اُتے ایمان رکھدے نیں۔ہُن اوہ اوہناں اُتے رُوح  دے   نال
ٹھپالاؤندااے جیہڑے پانی تے رُوح دی مکتی اُتے ایمان رکھدے نیں ۔
یسوع ایس جگ وِچ آیا تے جگ دے سارے پاپ چُک لئے تے سُولی اُتے مرگیا  ،اِنج اوہنے اپنا کم پورا کر لیا ۔ ہُن مطلب اے خُداوند دا کم پوراہوگیا اے ، اوہ خُدا دے سجے ہتھ بیٹھا ہویا اے ۔
سانُوں بڑے یقین نال اپنے خُداوند یسوع اُتے ایمان رکھنا چاہی دا اے ،جنہیں ہمیشہ دے لئی سانُوں پاپاں توں مکتی دِتی ۔ اوہنے سانُوں اپنے بپتسمہ تے لہو دے نال ہمیشہ دے لئی مکمل بنادِتا ۔
 
 
اوہ جیہڑے خُدا دے ویری بن جاندے نیں  
 
خُدا دے ویری کون نیں؟
اوہ جیہڑے یسوع اُتے ایمان رکھدے نیں
پر اپنے دِلاں وِچ پاپ رکھدے نیں۔
 
عبرانیوں ۱۰ : ۱۲ ۔۱۳ وِچ خُداوند آکھدا اے ، ” پر ایہہ شخص ہمیشہ دے لئی پاپاں دے واسطے اِکو ای چڑھاواچڑھاکے خُدا دے سجے پاسے جا بیٹھا ۔تے اوسے ویلے توں اُڈیک وِچ اے پئی اوہدے ویری اوہدے پیراں تھلے دی چوکی بنن۔“ اوہنےآکھیا پئی اوہ اخیری عدالت تیک اوہناں دے لیکھ دا فیصلہ کرن لئی اُڈیکے گا ۔
اوہدے ویری ہُن تیک آکھدے نیں ، ” یا خُدایا مہربانی نال میرے پاپاں نُوں معاف کردے۔“ شیطان تے اوہدے پچھے چلن والے پانی تے رُوح دی خوشخبری اُتے ایمان نئیں رکھدے تے اوہدے کولوں معافی منگنا چالُو رکھدے نیں ۔
ساڈا خُداوند خُدا اوہناں نُوں ہُنے نئیں سزادیوےگا ۔ پر یسوع دےدوجی واری آؤن دے دیہاڑے اُتے اوہناں دی عدالت ہووے گی تے ہمیشہ دے لئی دوزخ وِچ سزا پاؤن گے ۔ خُدا ایس آس اُتے اوس دیہاڑے تیک اوہناں نُوں برداشت کردااے پئی اوہ توبہ کرن گےتے مکتی پا کے راستباز بن جان گے ۔
ساڈے خُداوند یسوع نے ساڈے سارے پاپ چُک لئے تے ساڈے لئی مرگیا جیہڑے  اوہدے
اُتے ایمان رکھدے نیں  ۔یسوع کسے دیہاڑے اوہناں ساریاں نُوں چھڈاؤن لئی ظاہر ہووے گا جیہڑے اوہدے اُتے ایمان رکھدے نیں ۔  ” آہو،یا خُداوندا ، مہربانی کرکے ساڈے کول چھیتی نال آ۔ “ اوہ دوجی واری اَسمان دی بادشاہی وِچ اوہدے نال ہمیشہ تیکر رہن لئی بے پاپ لوکاں نُوں لین آووے گا ۔
اوہ جیہڑے ایس گل اُتے زور دیندے نیں پئی اوہ پاپی نیں ،جدوں خُداوند واپس آووے گا اَسمان اُتے کوئی تھاں نہیں پاؤن گے ۔ اخیری دیہاڑے اُتے اوہناں دی عدالت ہووے گی تے دوزخ دے انگاریاں وِچ سُٹ دِتے جان گے ۔ایہہ سزا اوہناں نُوں اُڈیکدی اے جیہڑے پانی تے رُو ح دے راہیں نویں سِریوں جمن اُتے ایمان رکھن توں مُکر دے نیں ۔
ساڈاخُداوند یسوع اوہناں نُوں اپنے ویریاں دے وانگر خیال کردا اے جیہڑے جھوٹ اُتے ایمان رکھدے نیں ۔ایس وجہ توں سانُوں ایس جھوٹ دے خلاف لڑنا اے ۔ ایہو ای وجہ اے سانُوں پانی تے رُو ح دے راہیں نویں سِریوں جمن دی برکت والی خوشخبری اُتے ایمان رکھنا اے ۔
 
 
سانُوں پانی تے رُو ح دی خوشخبری اُتے ایمان رکھنا اے
 
کیہ ہُن ساڈے پاپاں دے لئی فدیہ دی لوڑ ہیگی اے یعنی
ساڈے سارے قرضیاں (پاپاں) دا سارا مُل تار دِتا گیا اے ؟
نئیں ۔بالکل نئیں ۔
 
عبرانیوں ۱۰ : ۱۵ ۔۱۶ آکھدا اے ،” تے پاک رُوح وی سانُوں ایہو ای دِسدااے کیوں جے ایہہ آکھن دے بعد پئی خُداوند فرماؤندا اے جیہڑا وعدہ میں اوہناں دیہاڑیاں دے بعد اوہناں نال بنھاں گا اوہ ایہہ ہے پئی میَں اپنے قانُون اوہناں دے دِلاں اُتے لکھا ں گاتے اوہناں دے ذہن وِچ پاواں گا ۔ “
ساڈے سارے پاپاں نُوں مٹاؤن دے  بعد ، اوہنے آکھیا  ،  ” جیہڑا  وعدہ  میں  اوہناں دیہاڑیاں دے بعد اوہناں نال بنھاں گا اوہ ایہہ ہے “ ایہہ وعدہ کیہ اے ؟   ” میَں  اپنے قانُون
اوہناں دے دِلاں اُتے لکھا ں گاتے اوہناں دے ذہن وِچ پاواں گا ۔ “ اَسیں پہلاں اوہدی شریعت دے مطابق اِک قانونی حیاتی بسر کرن دی کوشش کیتی ، پر اَسیں شریعت دے راہیں اصل وِچ مکتی یافتہ نئیں ہوسکے ۔
بعدوں اَسیں جانیاں پئی یسوع پہلاں ای اوہناں نُوں مکتی دے چُکیا اے جیہڑے اپنے دِلاں وِچ پانی تے روح دی نویں سِریوں جمن دی برکت والی خوشخبری اُتے ایمان رکھدے نیں ۔ جیہڑا کوئی یسوع دے بپتسمہ تے لہو اُتے ایمان رکھدا اے چھڈایاجاندا اے ۔
یسوع مکتی دا مالک اے ۔” کیوں جے اَسمان دے تھلے بندیاں نُوں کوئی دوجا ناں نئیں بخشیا گیا جیہدے راہیں اَسیں مکتی پاسکیے ۔“ (اعمال۴ : ۱۲)۔یسوع ایس جگ وِچ ساڈے مکتی داتا دے وانگر آیا ۔کیوں جے اَسیں اپنے کماں دے راہیں مکتی یافتہ نئیں ہو سکدے ، یسوع نے سانُوں مکتی دِتی تے ساڈے دِلاں دیاں تختیاں اُتے لکھیا پئی اوہنے سانُوں اپنی محبت تے مکتی دی شریعت دے نال مکتی دِتی ۔
” اوہناں دے پاپاں تے بے دینیاں نُوں فیر کدی یاد نہ کراں گا۔ تے جدوں اوہناں دی معافی ہوگئی اے تے فیر پاپ دا چڑھاوا نئیں رہیا۔ “ (عبرانیوں ۱۰ :۱۷ ۔۱۸)۔
ہن اوہ ساڈے غیر شرعی کماں نُوں ہوریاد نئیں کردا۔ ہُن مطلب اے پئی اوہنے سارے پاپاں نُوں چُک لیا اے ،اَسیں ایماندار ہور پاپ نئیں رکھدے جنہاں دی سانُوں معافی منگنی ایں ۔ ساڈے قرضے پورے تار دِتے گئے تے دوبارہ تارن لئی کُجھ باقی نئیں رہیا ۔لوک یسوع دی خدمت وِچ ایمان دے راہیں مکتی یافتہ ہُندے نیں ،جنہیں سانُوں اپنے بپتسمہ تے صلیبی لہو دے راہیں مکتی دِتی ۔
ہُن سانُوں جو کُجھ کرنا ایں پانی تے یسوع دے لہو اُتے ایمان رکھنا اے ۔ ”تے سچیائی نُوں جانوگے تے سچیائی تُہانُوں چھڈائے گی ۔ “ (یوحنا ۸ :۳۲)۔یسوع دے راہیں مکتی اُتے ایمان رکھو ۔پاپاں دی معافی حاصل کرنا ساہ لین توں بوہتا سوکھا اے ۔تُہانُوں جو کُجھ کرنااے ،ایناں گلاں اُتے ایمان رکھنا اے ،جویں ایہہ ہیگیاں نیں ۔ مکتی صرف خُدا دے کلام اُتے ایمان رکھن دے نال ملدی اے ۔
ایمان رکھو پئی یسوع ساڈا مکتی داتا اے (مطلب اے،یسوع دے بپتسمہ تے اوہدی صلیبی موت اُتے )تے صرف ایمان رکھو پئی مکتی تُہاڈی اے ۔اپنے آپ دے خیالاں دا انکار کروتے صرف یسوع دے راہیں مکتی اُتے ایمان رکھو۔میَں دُعا منگدا ہاں پئی تُسیں سچ مُچ یسوع اُتے ایمان رکھو گے تے اوہدے نال ہمیشہ دی حیاتی وِچ جان لئی تیار رہووگے۔