خطبے

مضمون 10: مُکاشفہ(مُکاشفہ دی کتاب اُتے تفسیر)

[2-1باب]  (مُکا شفہ ۲: ۱۔۷) اِفِسُس دی کلِیسیا دے ناں خط

 )مُکا شفہ ۲: ۱۔۷(
اِفِسُس دی کلِیسیا دے فرِشتے نُوں ایہہ لِکھ۔پئی جِس اپنے سَجے ہتّھ وِچ سَتّ تارے لَئے ہوئے نیں تے سونے دِیاں ستّاں دِیویاں وِچ پِھردا اے۔ اوہ ایہہ آکھدا اے پئی۔مَیں تیرے کمّ تے تیری محنت تے تیرے صبر نُوں تے جاننا آں تے ایہہ وی پئی تُوں بُریاں نُوں ویکھ نئیں سکدا۔ تے جیہڑے اپنے آپ نُوں رسُول آکھدے نیں تے ہَین نئیں۔ تُوں اوہناں نُوں ازما کے جُھوٹھیاں ویکھیا۔تے تُوں صبر کرنا ایں تے میرے ناں دی خاطر مُصِیبت سہہ سہہ کے تھکیا نئیں۔پر مَینُوں تیرے اُتّے ایہہ شکایت اے۔ پئی تُوں اپنی پہلی مُحبّت نُوں چھڈ دِتّا۔ایس لئی تُوں چیتا کر پئی تُوں کِتّھوں ڈِگّا ایں۔ تے تَوبہ کر کے پہلے وانگر کمّ کر۔ تے جے تُوں تَوبہ نا کریں گا۔ تے تیرے کول مَیں آ کے تیرا دِیوا اوہدی تھاں توں ہٹا دیاں گا۔بے شک تیرے وِچ ایہہ گلّ تے اے۔ پئی تُوں نِیکُلیوں دے کمّاں توں نفرت کرنا ایں جِنہاں توں مَیں وی نفرت کرنا آں۔جِہدے کنّ ہون اوہ سُن لَئے۔ پئی رُوح کلِیسیاواں نُوں کِیہ آکھدا اے۔ جیہڑا جتے مَیں اوہنوں اوس زِندگی دے بُوٹے نالوں جیہڑا خُدا دی بہشت وِچ اے۔ پَھل کھان نُوں دیاں گا۔
 
 
تشریح
 
آیت۱:”اِفِسُس دی کلِیسیا دے فرِشتے نُوں ایہہ لِکھ۔پئی جِس اپنے سَجے ہتّھ وِچ سَتّ تارے لَئے ہوئے نیں تے سونے دِیاں ستّاں دِیویاں وِچ پِھردا اے۔ اوہ ایہہ آکھدا اے پئی۔“
افسُس دی کلیسیاخُدا دی کلیسیا سی جیہدی نیہ پانی تے رُوح دی خوشخبری دے راہیں رکھی گئی جیہدی پولُس رسول نے منادی کیتی سی ۔ ”سونے دے سَتّ دِیوے “ایس لکھائی وچ خُدا دیاں کلیسیاواں ، اوہ جیہڑیاں پانی تے رُوح دی خوشخبری اُتے ایمان رکھدیاں نیں دے اکٹھ تے”سَتّ تارے“ خُدا دے خادماں داحوالہ دیندے نیں ۔ دوجے پاسے ” جِس اپنے سَجے ہتّھ وِچ سَتّ تارے لَئے  ہوئے نیں “ایس
جملے دا مطلب اےپئی خُدا آپ اپنے خادماں نوں سنبھالدا تے ورتدا اے ۔
سانوں ایہہ سمجھنا چاہی دا اے پئی خُدا نے اپنے بندے یوحنا دے راہیں آسیہ دیاں ست کلیسیاواں نال  جیہڑا کلام کیتااوہ اوہدیاں موجودہ ویلے دیاں ساریاں کلیسیاواں نال وی گل کردا اے جیہڑیاں ہُن اخیری ویلے وچ نیں ۔ اپنی کلیسیاواں تے خادماں دے راہیں ،خُدا ساڈے نال گل کردا تے دسدا اے پئی اوہناں مصیبتاں تے ازمائشاں اُتے  کویں فتح پائیے جیہڑیاں سانوں اُڈیکدیاں نیں ۔سانوں مُکاشفہ دے کلام نوں سُن کے تے ایہدے اُتے ایمان رکھ کےشیطان اُتے فتح پاؤنی چاہی دی اے ۔ خُدا اپنیاں کلیسیاواں وچوں ہر اک بندے نال گل کرداپیا اے ۔
آیت۲:مَیں تیرے کمّ تے تیری محنت تے تیرے صبر نُوں تے جاننا آں تے ایہہ وی پئی تُوں بُریاں نُوں ویکھ نئیں سکدا۔ تے جیہڑے اپنے آپ نُوں رسُول آکھدے نیں تے ہَین نئیں۔ تُوں اوہناں نُوں ازما کے جُھوٹھیاں ویکھیا۔“
خُداوند نے اِفسُس دی کلیسیادی ایہدے کم ، محنت ، صبر ، بُرائی دی  برداشت دا گھاٹا ، جھوٹیاں رسولاں نوں بے پردہ کرن تے ایہدی پچھان لئی تعریف کیتی ۔ اسیں ایس  توں بوہت چنگی طرح جان سکدے آں پئی اِفسُس دی کلیسیادا ایمان تے نذرانہ بوہت وڈاسی ۔ پر سانوں ایہہ سمجھنا چاہی دا اے پئی ایس توں ہٹ کے پئی ایمان دا شروع کناں ای چنگا کیوں نہ ہووے ، جے ایہہ ایمان بعد وچ راہوں بھٹک جاندا اے تاں ، ایہہ بیکار ہو جاندااے ۔ساڈا ایمان لازمی طور اُتے سچا ایمان ہونا  چاہیداجیہدا شروع تے اخیر پکے طور اُتے اکو ای رہندا اے ۔   
پر اِفسُس دی کلیسیا دے خادم دا ایمان ایہو جیہا نئیں سی ، تے ایسے لئی خُدا نے اوہنوںسختی نال جھڑکیا تے خبردار کیتا پئی  اوہ اوہدے دیوے نوں اوہدی تھاں توں اک پاسے کر دیوے گا ۔جویں پئی کلیسیادی تاریخ توں پتہ لگدا اے ، آسیہ کوچک  وچ وسدیاں ست کلیسیاواں نوں سچ مُچ ایہناں دیاں دیویاں نوں ہٹا کے لعنتی کیتا گیا سی ۔ سانوں اِفسیوں دی کلیسیا دے سبقاں توں سکھنا چاہی دا تے یاد رکھنا چاہی دا اے پئی ساڈیاں کلیسیاواں دی پانی تے رُوح دی خوشخبری اُتے ایمان دی شروع دی تعلیم نال خُدا ولوں منظوری ہونی چاہی دی اے ، تے سانوں خُدا دے خادم بننا چاہی دا اے جیہڑے ایس ایمان دے سبب ساڈیاں کلیسیاواں نوں سنبھالدے نیں ۔
آیت ۳:”تے تُوں صبر کرنا ایں تے میرے ناں دی خاطر مُصِیبت سہہ سہہ کے تھکیا نئیں۔“
ساڈا خُداوند اپنیاں ساریاں کلیسیاواں اُتے دھیان رکھدا اے تے چنگی طرح  جان دا اے پئی ایہدے پاک لوک اوہدے ناں دی خاطر کویں محنت کردے نیں ۔ پر اِفسیوں  دی کلیسیادے پاک لوک اپنے مُڈھلے ایمان نوں چھڈ دے پئے سن تے پانی تے رُوح دی کھری خوشخبری نوں دوجیاں عقیدیاں نال گھٹ کر کے پُٹھے راہ اُتے پین لگ پئے سن ۔
آیت۴:”پر مَینُوں تیرے اُتّے ایہہ شکایت اے۔ پئی تُوں اپنی پہلی مُحبّت نُوں چھڈ دِتّا۔“
 اِفسیوں  دی کلیسیا دے خادم تے پاک لوکاں دے ایمان دے کم اینے چنگے سن پئی خداوندنے آپ ایہناں دے کماں ، محنت تے صبردے لئی ایہناں دی تعریف کیتی۔ اوہناں نیں جھوٹیاں رسولاں نوں ازمایاتےبے پردہ کیتا سی ، ایہناں نیں خداونددے ناں دی خاطر صبر تے مشقت کیتی سی ، تے اوہ تھکدے نئیں سن ۔ پرایہناں بوہت تعریف کیتے جان والے کماں وچ ، جیہڑی ایہناں وچوں کسے توں بوہت چوکھی خاص گل جیہڑی اوہناں کولوں گواچ گئی سی : اوہناں نیں یسوع مسیح دے راہیں دتی گئی اپنی پہلی مُحبّت نُوں چھڈ دِتّاسی۔
ایہدا کیہ مطلب اے ؟ ایہدا مطلب ایہہ  ہیگا اے پئی اوہ پانی تے رُوح دی خوشخبری اُتے قائم رہن توں نکمے رہے سن جنہے اوہناں نوں خُداوند وچ پسند تے ایمان دے راہیں اوہناں دے سارے پاپاں توں اکو ای واری مکتی پاؤن دی اجازت دتی سی ۔ دوجے پاسے ، پانی تے رُوح دی خوشخبری نوں چھڈن دا مطلب ایہہ ہیگا اے پئی اوہناں نیں جھوٹیاں تعلیماں تے دوجیاں خوشخبریاں نوں اپنی کلیسیا وچ  چُپ چُیتے آؤن دی اجازت دتی سی  ۔
فیر ، ایہہ دوجی خوشخبری تے تعلیماں کیہ سن؟ اوہ جگ دے فلسفے تے بندیاں دے خیال سن ۔ ایہہ شیواں اج وی مکتی دی سچیائی توں مکر دیاں نیں جیہڑی خُدا نے سارے لوکاں نوں دتی اے ۔ ایہہ بندے دے بدن لئی فائدے مند ثابت ہو سکدے نیں ، یا فیر خورے لوکاں وچ اکٹھیاں ہون تے امن لیان لئی وی چنگے ہون ، پر ایہہ لوکاں  دے  دلاں نوں  خُدا  دے  نال  اکٹھیاں  نئیں  کر سکدے ۔ ایس
طرحاں اِفسُس دی کلیسیا دا خادم تے پاک لوک خُدا دے اگے لعنتی ہو کے رد ّکیتے ہوئیاں وانگر اپنے ایمان توں مکر گئے سن ۔ تے ایہو ای سبب ہیگا اے پئی اوہناں نوں خُداوند نے جھڑکیا سی ۔
کلیسیادی تاریخ اُتے دھیان کردے ہوئیاں ، اسیں ویکھ سکدے آں پئی پانی تے رُوح دی خوشخبری مُڈھلی کلیسیا دے ویلے دے شروع توں ای ڈکو ڈولے کھان لگ پئی ۔ ایس سبق توں سکھدے ہوئیاں ،سانوں پانی تے رُوح دی خوشخبری اُُتے پکیاں ہوکے چلنا چاہی دا اے ، اپنے پکے ایمان نال خُداوند نوں خوش کرنا چاہی دا اے ، تے شیطان تے جگ دے خلاف ساڈی کوشش وچ اوہناں اُتے فتح پاؤنی چاہی دی اے ۔
فیر ، اِفسُس دی کلیسیا دے خادم تے پاک لوکاں لئی ” پہلی محبت “کیہ سی ؟ اوہناں دی پہلی محبت کوئی ہور نئیں سگوں پانی تے رُوح دی خوشخبری سی جیہڑی خُدا نے اوہناں نوں دتی سی ۔ پانی تے رُوح دی خوشخبری مکتی دا کلام اے جیہڑا ہر کسے نوں جگ دے سارے پاپاں توں مکتی دین دی طاقت رکھدا اے ۔
خُدا نے پولوس ، یوحنا تے آسیہ دیاں ست کلیسیاواں دے خادماں اُتے پانی تے رُوح دی خوشخبری ظاہر کیتی تے اوہناں نوں ایہنوںسمجھن دی اجازت دتی ۔ ایس طرح اوہ ایس خوشخبری اُتے ایمان رکھ سکدے نیں، تے کویں اوہناں لوکاں نیں جنہاں نیں ایہناں دے راہیں منادی کیتی گئی خوشخبر ی نوں سُنیا تے ایمان رکھیا  ایس جگ دے سارے پاپاں توں مکتی پاسکے ۔
ساڈے خُداوند دے راہیں دتی گئی پانی تے رُوح دی خوشخبری مسیح دے بپتسمے تے سولی اُتے اوہدے لہو دے کلام وچ لبھدی اے ۔ فیر وی اِفسُس دی کلیسیا دا خادم ،بھاویں اوہ  پانی تے رُوح دی خوشخبری دے راہیں خُداوند نال ملیا سی تے شروع وچ شکرگزاری نال ایہدی منادی کیتی ، اوہنےبعد وچ ایس خوشخبری نوں چھڈ دتا ۔ ایس طرح ، خُداوند نے ایس حوالے وچ اوہدے دھوکے اُتے اوہنوں جھڑکیا ۔
آیت ۵:”ایس لئی تُوں چیتا کر پئی تُوں کِتّھوں ڈِگّا ایں۔ تے تَوبہ کر کے پہلے وانگر کمّ کر۔ تے جے تُوں تَوبہ نا کریں گا۔ تے تیرے کول مَیں آ کے تیرا دِیوا اوہدی تھاں توں ہٹا دیاں گا۔“
اِفسُس دی کلیسیا دا خادم خُدا دی محبت توں ڈگ پیا سی ایہدا  مطلب ایہہ سی  پئی  لوکاں نیں  پانی
تے رُوح دی خوشخبری چھڈ دتی سی ۔ ایس لئی خُدا وند نے اوہناں نوں آکھیا پئی اوہ ایس گل اُتے دھیان کرن پئی جتھے اوہناں نیں اپنا ایمان گوا لیا اے ، توبہ کرن تے پہلوں ورگے کم کرن ۔
فیراِفسُس دی کلیسیادے پانی تے رُوح دی خوشخبری  نوں گواؤن  دا  سبب کیہ سی ؟  اِفسُس  دی
کلیسیادے ایمان دی کمی،جیہڑی اوہدے خادم دے بدنی خیالاں دا پتہ دسدی اے ،ایہو ای سبب ہیگا اے پئی کلیسیا بھٹک گئی ۔پانی تے رُوح دی خوشخبری خُدا ولوں اے ، اک خاص سچیائی جنہے ایس جگ دے سارے دیناں دے جھوٹیاں عقیدیاں تے تعلیماں دے سارےجھوٹ نوں ظاہر کیتا ۔ ایہدا مطلب ایہہ ہیگا اے پئی جد اِفسُس دی کلیسیانے پانی تے رُوح دی خوشخبری دی منادی کیتی تے ایہنوں ودھایا ،تاں جگ دے لوکاں نال جھگڑا لازمی سی ۔
ایس جھگڑے دے نتیجے وچ ، اِفسُس دی کلیسیا دے ایمانداراں لئی  جگ دے لوکاں نال معاملے ہور بوہتے اوکھے ہوگئے، ایتھوں تیک پئی ایہناں نوں اپنے ایمان لئی  کُٹاں ماراں کھانیاں پئیاں ۔ ایس توں بچن لئی تے لوکاں نوں خُدا دی کلیسیا وچ وڑنا سوکھا بناؤن لئی ، اِفسُس دی کلیسیا دا خادم پانی تے رُوح دی خوشخبری توں وِدیاں ہویا تے ودھیری فلسفیانہ خوشخبری دی تعلیم سکھاؤن دی اجازت دتی ۔
ایتھے ” فلسفیانہ خوشخبری “اک ایہو جھوٹی خوشخبری اے جیہڑی بندیاں دے خیالاں نال بنائی گئی اے جیہڑی ناصرف خُدا دے بندے دے وچکار میل جول نوں ودھاؤن دی کوشش کردی اے سگوں مویاں وچکار رشتے وچ امن لیاؤن دی کوشش وی کردی اے ۔ ایس طرح داعمودی تے افقی ایمان اوہ ایمان نئیں ہیگا جیہڑا خُدا ساڈے کولوں چاہندااے ۔ اوہ ایمان جیہڑا خُدا چاہندااے اوہ اک ایمان اے ،جیہڑا خُدا نال  آکھا منن والے تعلقات دے راہیں ، اوہدے نال ساڈے  امن نوں ودھاؤندااے ۔
 اِفسُس دی کلیسیا دے خادم دی پانی تے رُوح دی خوشخبری توں وکھ رہن دا سبب ایہہ ہیگا اے پئی اوہنے ایہو جیہی گل نوں پسند کرن دی کوشش کیتی جنہوں خُدا دی کلیسیا وچ پسند نئیں کیتا جاندا —یعنی ایہہ جگ دے لوک  جیہڑے پانی تے رُوح دی خوشخبری اُتے ایمان نئیں رکھدے—تے ایہدیاں تعلیماں نوں اپنیاں آساں مطابق کر دیندے نیں ۔ خُدا دی کلیسیا دی نیہ پانی تے رُوح دی خوشخبری دے کلام اُتے ای رکھی جا سکدی اے ۔
اج دے دناں وچ مُڈھلی کلیسیا دے دناں وانگر ، حالے وی بوہت سارے لوک ہیگے نیں ، جیہڑے ایہہ سمجھدے  نیں پئی مکتی پاؤن لئی یسوع اُتے کسے طرح وی ایمان رکھنا کافی اے ، تے جیہڑے نئیں ویکھد ے کیوں اوہ پانی تے رُوح دی خوشخبری اُتے ایمان رکھن ۔ پر خُدا ولوں دتی گئی پانی تے رُوح دی خوشخبری نوں چھڈدیا ں ہوئیاں یسوع اُتےایمان لیاؤنا اک بوہت ای غلط عقیدہ اے ۔ جیہڑے لوک صرف اک دینی کم وانگر خُداوند اُتے ایمان رکھدے نیں ، ادھے دلوں کم کردے نیں ، اوہ خُدا دے ویری بن جاندے نیں ۔ ایہو ای سبب ہیگا اے پئی خُداوند نے اِفسُس دے خادم نوں جھڑکیا تے اوہنوں نصیحت  کیتی پئی اوہ اپنے غلط ایمان توں توبہ کرے تے اپنے پہلے ، سچے تے پکے  ایمان ول پرت آوے ، جد وں اوہنے پانی تے رُوح دی خوشخبری پہلی واری سُنی سی ۔  
ساڈے لئی ایتھے اک خاص سبق اے:  جے خُدا دی کلیسیا پانی تے رُوح دی خوشخبری اُتے اپنے توں دُور ہو جاندی اےتاں خُدا اوہنوں ہُن اپنی کلیسیا نئیں آکھے گا ۔ ایس لئی پئی خُداوند نے آکھیا پئی اوہ دِیوے نوں اوہدی تھاں توں ہٹا دیوے گا تے ایہنوں پانی تے رُوح دی خوشخبری اُتے ایمان رکھن والیاں نوں دیوے گا ۔
اک کلیسیا جیہڑی ردّ کر چُکی اے تے ہُن پانی تے رُوح دی خوشخبری دی منادی نئیں کردی خُدا دی کلیسیا نئیں ہیگی ۔ ساڈے لئی ایہہ سمجھنا بوہت لازمی ہیگا اے پئی پانی تے رُوح دی خوشخبری اُتے ایمان رکھنا ، راکھی کرنا تے منادی کرنا کسے دوجے کماں نالوں بوہت  خاص اے ۔
اُتے لکھے ہوئے حوالے وچ ایشیاکوچک جتھے ست کلیسیاواں ہیگیاں سن ہُن اک مُسلم علاقہ اے ۔ خُداوند نے ایس طرح ایتھوں دے دِیوے ، خُدا دی کلیسیا، نوں اوہدی تھاں توں ہٹا دتا اے، تے سانوں سارے جگ وچ پانی تے رُوح دی خوشخبری دی  منادی کرن دتی اے ۔ پر خُدا دی سچی کلیسیاوچ پانی تے رُوح دی خوشخبری دی سچیائی اے ۔ خُدا دی کلیسیا دا ایہدے اڈ وجود نئیں ہو سکدا ۔ یسوع دے بارہ چیلیاں نیں رسولاں دے دناں وچ  پانی تے رُوح دی خوشخبری اُتے پکا ایمان رکھیا سی (۱-پطرس ۳: ۲۱ ، رومیوں دا باب ۶ ، ۱-یوحنا باب ۵)۔
حالے تیک ، بوہت بے نصیبی دی گل ایہہ ہیگی اے پئی ایشیا کوچک وچ خُدا دیاں کلیسیاواں نیں مُڈھلی کلیسیا دے دناں توں ای پانی تے رُوح دی اصل خوشخبری گوا لئی سی ، تے ایہدے نتیجے وچ ایہہ مسلمان علاقہ بن گیا سی ۔ ہور ایہہ  پئی ، ایتھوں تیک پئی روم دی کلیسیا ،رومی راجے قسطنطین دے راہیں جاری کیتے گئے میلان ایڈ کٹ (Edict of Milan (نال پانی تے رُوح دی خوشخبری توں وکھ رہن دے حادثے وچ  پھسی سی ۔ 
آیت۶:”بے شک تیرے وِچ ایہہ گلّ تے اے۔ پئی تُوں نِیکُلیوں  دے  کمّاں توں
نفرت کرنا ایں جِنہاں توں مَیں وی نفرت کرنا آں۔“
نیِکُلیوں اوہو ای لوک سن جنہاں نیں یسوع دا ناں  اپنے جگ دے تے مادی فائدیاں لئی ورتیا۔ پر اِفسُس دی کلیسیا نوں نیِکُلیوں دیاں تعلیماں تے کماں توں نفرت سی ۔ اِفسُس دی کلیسیا لئی ، ایہہ اک ایہو جیہی شے سی جیہڑی خُدا دے راہیں بوہت تعریف دے   لائق سی ۔
آیت ۷:”جِہدے کنّ ہون اوہ سُن لَئے۔ پئی رُوح کلِیسیاواں نُوں کِیہ آکھدا اے۔ جیہڑا جتے مَیں اوہنوں اوس زِندگی دے بُوٹے نالوں جیہڑا خُدا دی بہشت وِچ اے۔ پَھل کھان نُوں دیاں گا۔“
خُدا دے خادماں دے تے پاک لوکاں نوں ایہہ سُننا چاہی دا اے پئی پاک رُوح اوہناں نوں کیہ فرماندااے ۔ پاک رُوح جو کجھ اوہناں نوں فرماندااے اوہ اوہناں دے ایمان دی راکھی تےپانی تے رُوح دی خوشخبری نوں اخیر تیک ودھاؤنااے ۔ اِنج کرن لئی ،اوہناں نوں جھوٹ ودھاؤن والے لوکاں دے خلاف لڑنا تے فتح پاؤنی ہووے گی ۔ جھوٹ دے خلاف لڑائی ہارن دا مطلب بربادی اے ۔ایماندار تے خُدا دے بندیاں نوں اپنے ویریاں اُتے اپنیاں بانہواں نال جِتنا تے فتح پاؤنی چاہی دی اے مطلب، خُدا دے کلام تے پانی تے رُوح دی خوشخبری نال ۔
خُدا نے فرمایا ، ” جیہڑا جتے مَیں اوہنوں اوس زِندگی دے بُوٹے نالوں جیہڑا خُدا دی بہشت وِچ اے۔ پَھل کھان نُوں دیاں گا۔“ خُدا زندگی دے بُوٹےدا پھل صرف اوہنوں دیوے گا  ”جیہڑا جتے “پر کیہ یاں کیہدے توں جِتیے؟سانوں اپنے ایمان نال اوہناں توں جِتناایں جیہڑے پانی تے رُوح دی خوشخبری اُتے ایمان نئیں رکھدے ۔ ایمانداراں نوں اوہناں لوکاں نال ہمیش لئی رُوحانی لڑائیاں وچ حصہ لینا چاہی دا اے  جیہڑے جھوٹ نال تعلق رکھدے نیں ،تے اوہناں نوں اوہناں دے ایمان راہیں ایہناں لڑائیاں وچ فتح مند بن کے ودھنا چاہی دا اے ۔ اوہناں نوں سارا جلال وی خُدا نوں ای دینا چاہی دا اے تےپانی تے رُوح دی خوشخبری اُتے اپنے ایمان نال فتح والی زندگی بسر کرنی چاہی دی اے ۔ صرف اوہو ای لوک ، جیہڑے سچیائی اُتے  ایمان نال ، اپنی کوشش وچ اپنے ویریاں اُتے فتح پاؤن گے ، خُدا دے راہیں دتے گئے نویں اسمان تے دھرتی وچ  رہن دے لائق ہون گے ۔
مُڈھلی کلیسیا دے دناں وچ ، پانی تے رُوح دی خوشخبری اُتے ایمان رکھن تے ایہدی راکھی  کرن دی کوشش  کرن والیاں نوں شہید ہونا پیا ۔ ایسے طرحاں ، جد مخالفِ مسیح دے ظاہر ہون دا ویلا آجاوے گا، بوہت ساریاں شہادتاں ہون گئیاں ۔