คำสอน

مضمون 10: مُکاشفہ(مُکاشفہ دی کتاب اُتے تفسیر)

[2-9باب] (مُکاشفہ۲: ۱۸- ۲۹) کیہ تُسیں پانی تے رُوح دے راہیں مکتی پا چُکے او؟

)مُکاشفہ۲: ۱۸- ۲۹(
 
تھواتیرہ دی کلیسیا محبت، ایمان تے صبر نال خُدا دے کماں دی سیوا کردی سی ،تے ویلا لنگھن دے نال نال اوہدے کم چنگے ہوندے جاندے سن ۔ پر ایہناں دناں وچ ای ، ایہہ ای کلیسیا سی جیہڑی اک جھوٹی نبیہ توں ڈر گئی سی ۔ایہدیاں بدکاریاں ، دوجے اکھراں وچ دسدیاں ہوئیاں ، اوہ ایہہ سن پئی ایہدے کئی لوک بے نصیبی نال ایس مکتیوں اڈ جھوٹی نبیہ ہتھوں بھٹک کے بتاں دی پوجا تے گندے کم کرن لگ پئے سن۔ خُدا وند نے ایس طرحاں تھواتیرہ دی کلیسیا نوں آکھیا پئی اوہ توبہ کرے تے اخیر تیک اپنے پہلوں ورگے عقیدے اُتے چلن ۔ خُداوند نے ایہہ وعدہ وی کیتا پئی اوہ جیہڑے اپنے عقیدے دی اخیر تیک راکھی کردے نیں ، اوہ اوہناں نوں لوکاں اُتے حکومت تےسویر دا تارا دیوےگا ۔
 
 
اِیزبل دا بعل
 
اِیزبل اک غیر یہودی شہزادی سی جیہڑی اپنے کافر دیوتا ، بعل نوں ، بنی اسرائیل وچ لیائی سی ، مطلب اےجدوں اوہ اخی اب راجے دی ووہٹی بنی (۱۔ سلاطین۱۶ : ۳۱)۔ بعل سورج دا دیوتا سی ، فینیشینزدا دا اک بُت جیہدی لوک ترقیاں پاؤن دی آس رکھ کے پوجا کردے سن ۔ ایس دیوتے دیاں تصویراں چھاپیاں جاندیاں سن تے ایہناں نوں پوجیاجاند ا سی ، ایہدے بعدوں ایہنوں منن والے اپنے خنوادے تےچنگی فصل لئی دعا کردے سن ۔ ایہہ سارے جگ دی ساری دھرتی تے قدرت دی پوجا دے عام کفر وانگر سی ۔ مثال دے طور اُتے ،اک وڈے پتھر اُتے دیوتا نال گل بات کرنا تے ایہنوں دیوتا وانگر پوجنا قدرتی شیواں دی پوجا وانگر اک عام کافراں والی رسم سی ۔ ایس طرحاں دیاں دینی رسماں تے عقیدے اوہناں لوکاں کول نیں جیہڑی پینتائزم نوں من دے نیں ۔
اِیزبل دے راہیں ایس بُتاں دے پجاری دین بارے دوجیاں نوں دسن دے نال ای ، بعل بنی اسرائیل دے لوکاں لئی بُتاں دی پوجا اک بوہت وڈا دیوتا بن گیا ۔ راجہ اخی اب ، جیہڑا صرف سچے یہوواہ خُدا دی بھگتی کردا سی ، ایس اوپری قوم دی زنانی نال اوہدے ویاہ دے سبب اوہ وی بعل دی پوجا کرن لگ پیا سی ۔ بوہت سارے بنی اسرائیلی ایہدے پچھے چل پئے ، اوہناں نے اپنے سچے خُدا نوں چھڈ دتا تے اوہدی تھاں اُتے بعل دی پوجا کر کے بُت پرستی کیتی ۔ ایس طرحاں اوہناں نیں خُدا دے غصے نوں اپنے اُتے آؤن لئی آکھیا ۔
خُدا نے کلیسیا وچ جھوٹی نبیہ اِیزبل دے ایمان دی اجازت دین لئی تھواتیرہ دی کلیسیادے خادم نوں جھڑکیا ۔ایِزبل تے اوہدے پچھے چلن والیاں نوں توبہ کرن دا حکم دیندیاں ہوئیا ں ، خُدا نے خبردار کیتا پئی جے اوہ آکھا نئیں منن گے تاں اوہ اوہناں اُتے وڈے دُکھ تے بربادی گھلے گا ۔
ایہدا مطلب ایہہ ہیگا اے پئی خُدا دی کھری کلیسیا مال تے پیسے دھیلیاں دی مالکی نوں اپنے معاملیاں اُتے فتح پاؤن دی اجازت نئیں دے سکدی اے ۔ ایہد ا مطلب ایہہ ہیگا اے پئی اج دےایمان دار جگ دی اپنے خُدا وانگر پوجا نئیں کر سکدے ، جویں پئی اسرائیلیاں نیں چوکھی فصل تے ترقیاں لئی ، سورج دے دیوتا ، بعل دی پوجا کیتی ۔
۳-یوحنا ۱: ۲ دسدااے ، پیارے۔ مَیں ایہہ دُعا کرنا آں پئی جیویں تُوں رُوحانی ترقی کرنا ایں اوسے طرح تُوں سارِیاں گلّاں وِچ ترقی کریں تے تگڑا رہَیں۔ جدوں اسیں یوحنا رسول دے ایمان ول ویکھدے آں تاں اسیں ویکھدے آں پئی اوہدی پہلی فکر رُوحانی ترقی دی سی ۔ یوحنا رُوحاں دی ترقی لئی فکر مند سی ، دوجیاں ساریاں شیواں دی ترقی بعدوں ہوندی اے، پہلوں نئیں ۔ تاں ، فیر اج دے لوکاں دا ایمان کویں بدلیا؟ ایہہ اک ایمان دی خرابی اے جیہڑا صرف بدنی برکتاں پاؤنا چاؤہندا اے ، جگ دی ترقی نوں ایمان توں ودھ سمجھدا اے تے رُوحانی بھلیائی لئی کسے وی دوجے معاملے نوں اک پاسے سُٹ دیندا اے ۔ بوہت سارے لوک یسوع اُتے اپنیاں روحاں نوں امیربناؤن لئی ایمان نئیں رکھدے ، سگوں صرف اپنیاں حیاتیاں نوں امیربناؤن لئی ایمان رکھدے نیں ۔
 ساڈے آلے دوالے بوہت سارے دینی فرقے نیں ، جیہڑے نشیاں وانگر زہر بھرے نیں ،
جیہڑےدعویٰ کردے نیں پئی اوہناں دی بھگتی بدلے اوہ اپنے پچھے چلن والیاں نوں مال تے تندرستی دیندے نیں ۔ اِیزبل دے بعل دی پوجا کجھ اِنج دی ای سی ۔ لوکاں نیں اپنی حیاتی دی ترقی تے چوکھی فصل پاؤن لئی ایسےطرحاں دے فرقیاں دی سیوا کیتی ۔
اج کل نویں سریوں جمن والیاں کلیسیاواں وچ ،کجھ اپنیاں کلیسیاواں نوں ودھاؤن لئی اِیزبل دےعقیدےداسہارالیندے نیں ۔ پر اوہناں دی دانائی خُدا د ی ہیکل وچ بُت رکھن وانگر اے ۔
اِیزبل نہ تاں بنی اسرائیل وچ سگوں یہوواہ دی ہیکل وچ وی اوپریاں قوماں دے دیوتا بعل نوں لیائی ۔ ایس طرح دا ایمان جیہڑا بدنی تے جگ دے فائدیاں دی ترقی پچھے چلدا اے جد پئی یسوع وچ پاپ دے فدیے ولوں سُتا رہندااے اوہناں ای غلط ایمان اے جنہاں خُدا دیاں اکھاں اگے بُتاں نوں پوجنا اے ۔
اج سارے جگ دیاں کلیسیاواں یوحنا ۱ : ۲۹دی اِنج آکھدیاں ہوئیاں منادی کردیاں نیں ، ”تہاڈے سارے پاپ مُک گئے نیں ، ایس لئی پئی یسوع نے اوہناں نوں سولی اُتے چُک لیا سی ۔ “ اوہناں نیں یسوع دے بپتسمے نوں صرف اک مدد گار وانگر جانیااے ، اوہ دعویٰ کردے نیں پئی یسوع اُتے کسے وی طرح ایمان رکھ کے مکتی مل سکدی اے ، ایتھوں تیک پئی جے کوئی بندہ یسوع دے بپتسمے اُتے ایمان نئیں رکھدا اے ۔ پر مسیح نے یوحنا کولوں جیہڑا بپتسمہ لیا ، اوہ بپتسمہ جیہدے نال اوہنے جگ دے سارے پاپاں نوں اپنے اُتے چُک لیا ، کوئی چُنن والی شے نئیں اے جنہوں اپنی من مرضی نال من سکدے یاں چھڈسکدے آں ۔ یسوع دے بپتسمے نوں صرف اک مدد وانگر جاننا تے اوہدی منادی کرنا بعل دی پوجا کرن دے برابر اے ۔
تاں فیر ،کاہدے لئی ، ایہہ لوک یسوع دے بپتسمے دے اڈ خوشخبری دی منادی کردے نیں ؟ اوہ اِنج کردے نیں ایس لئی پئی اوہناں دی آس خُدا دی بادشاہی وچ نئیں ، سگوں ایس دھرتی اُتے ایہدے جگ دے مال وچ ہیگی اے ۔ ایہو جیہے لوک جنہاں دے کول ایہو جیہا عقیدہ اے بالکل اوہناں لوکاں وانگر نیں جیہڑے اوپریاں قوماں دے دیوتا بعل دی پوجا کردے سن ۔
اوہ لوک جیہڑے پانی تے رُوح دی خوشخبری اُتے ایمان رکھدے سن ،تے ہُن اوہ صرف سولی دے لہو دی منادی کردے پئے نیں ، اوہناں نوں ایہہ سمجھ لینا چاہی دا اے پئی اوہ بعل دی بھگتی دی پوجا کرن وانگر ڈاہڈا پاپ کردے پئے نیں ۔
 کوئی وی ایس جگ دے مال دے فائدیاں اُتے اپنا مقصد مقرر کر کے چنگی طریقے نال سیوا نئیں
کرسکدا ۔ جے پادری یسوع دے بپتسمے نوں چھڈ کے صرف سولی اُتے اوہدے لہو دی منادی کردے ، تاں خورے اوہ ایس جگ دے پیسے دھیلے دے فائدیاں نوں اکٹھیاں کرن دے لائق ہوسکن گے ۔ پر اوہناں نوں ایہہ پتہ ہونا چاہی دا اے پئی نہ تاں ایہو جیہاایمان اصلی ایمان اے تے نہ ای اوہ ایس طرحاں کھری منادی کردے پئے نیں ۔
مکاشفہ دے حوالے نوں ویکھدیاں ہوئیاں ، سانوں پتہ لگدااے پئی تھواتیرہ دی کلیسیا دے آگُو نے وی اپنی کلیسیا وچ بعل دی پوجا کیتی سی ، بالکل جویں اِیزبل نے بعل دی پوجا کیتی سی ۔
جے لوک پانی تے رُوح دی خوشخبری اُتے ایمان نئیں رکھدے تاں پاک رُوح نہ تاں اوہناں دے دلاں وچ رہ سکدا اے تے نہ ای اوہناں وچ کم کر سکدااے ۔ جویں پئی پولُس رسول سانوں دسدااے ،”پر جیہدے وچ مسیح دا رُوح نئیں ہیگا اوہ اوہدا نئیں ہیگا ، “ بھاویں کوئی خُدا دا پُتر ہیگا اے یاں نئیں ہیگا ایہدا پک ایس گل نال ہوندااے پئی کیہ اوہدے دل وچ مسیح دا رُوح ہیگا اے یاں نئیں۔ بائبل سانوں دسدی اے پئی اوہ لوک جنہاں کول مسیح دا رُوح نئیں ہیگااوہ ردّ کردتے گئے نیں۔
 
 
اوہ جیہڑے یسوع دے بپتسمے نوں جان دے تے اوہدی منادی کردے نیں
 
جدوں کوئی یسوع دے بپتسمے (پانی)اُتے ایمان رکھدااے ، جیہدے نال اوہنے جگ دے سارے پاپاں نوں اپنے اُتے چُک لیا، تے سولی اُتے اوہدے لہو اُتے ایمان رکھدا اے ، تاں پاک رُوح اوہدے دل وچ رہ سکدا اے۔
پر جے کوئی پانی تے رُوح دی خوشخبری اُتے ایمان نئیں رکھدا ، تاں ایتھوں تیک پئی جے اوہ یسوع لئی شہید وی ہو جاوے ، تاں ایہہ اصل شہادت نئیں ہووے گی ، سگوں صرف اپنی راستبازی نوں قیم رکھن دی کوشش کردی پئی اے۔ کجھ لوک ، صرف صلیبی لہو اُتے ایمان رکھدے نیں ، خوشخبری دی منادی کرن لئی جگ دیاں دریڈیاں نکراں تیکر جاندے نیں ، اپنی ساری حیاتی مشن دے کماں دے ناویں لاؤندے نیں ، تے بوہتی وار اپنے عقیدے لئی شہید وی ہو جاندے نیں ۔
مسیح دی محبت دے اثر نال ، لوک ایس طرحاں شہید ہو سکدے نیں ایتھوں تیکر پئی جے اوہ
صرف سولی اُتے مسیح دے لہو اُتے ای ایمان رکھدے نیں ۔ پر جویں پئی متی ۷ : ۲۳ سانوں دسدااے ، ایہہ کیہ ودھیا ہووے گا جے خُداوند آپ اوہناں دے سارے کماں تے قربانیاں نوں منن توں مکرے جاوے ۔ ایہدے نال کوئی فرق نئیں پیندا پئی اوہناں نیں بوہت گج وج کے تے سچے دل نال خوشخبری دی منادی کیتی مثال دے طور اُتے ، جویں ، مورمون مشنری کردے نیں ۔ ایس لئی پئی اوہناں نیں پانی تے رُوح دی خوشخبری دی منادی نئیں کیتی سی ، ایس لئی اوہناں دے ایمان تے اوہناں دیاں ساریاں کوششاں بے فائدہ رہن گئیاں ۔
خُدا نے تھواتیرہ دی کلیسیا دے خادم نوں جھڑکیا ایس لئی پئی اوہنے اِیزبل دے پچھے چلن والیاں ورگے ایمان نوں کلیسیا وچ ودھن پُھلن دی اجازت دتی تے اوہناں دے ودھن پُھلن نوں جریا۔ اج دے لوکاں وچ بوہت سارے دینی آگُو ہیگے نیں جویں بالکل اِنج ای نیں ، جیہڑے لوکاں نوں دھوکہ دیندے نیں ۔ مسیح دے جمن دے بعدوں ، اوہدا بپتسمہ ، اوہد ا سولی اُتے چڑھنا ، اوہدی موت ، اوہدا جیوں اُٹھنا ،تے اوہدا اسمان اُتے چڑھ جانا ایہناں ساریاں گلاں اُتے ، خُدا دی اصل کلیسیا دا ٹھیک ایمان ہونا چاہی دا اے تے کھری خوشخبری نوں ودھاؤنا چاہی دا اے ۔ نئیں تے اوہناں دا ایمان ضائع ہوجاوے گا ۔
جھوٹے نبی ایہہ دعویٰ کردے نیں پئی مکتی پاؤن لئی ، یسوع دے بپتسمہ دی لوڑ نوں جانیوں اڈ صرف یسوع دے لہو اُتے ایمان رکھنا ای ٹھیک اے ۔ ایس لئی پئی اوہناں نیں پانی دی سچیائی نوں چھڈ دتا اے ، ایس لئی مسیحیت وگڑ گئی اے تے جگ دے بوہتیاں دیناں وانگر بن گئی اے ۔ ایس لئی مسیحیت جگ دے سارے لوکاں لئی مکتی نئیں لیا سکی ۔
سولی اُتے یسوع دے بپتسمےتے اوہدے لہو توں اڈ،مسیحیت صرف اک دین وانگر اے جیہڑا جگ دیاں چنگیاں کماں تے نیکیاں دی گل کردا اے ۔ یورپ تے شمالی امریکہ وچ ، جتھے بوہتے لوک مسیحی سن ، مشرقی دین ہُن بوہتے مشہور ہو گئے نیں ۔ کاہدے لئی ؟ ایس لئی پئی ایس طرحاں دے دین والی مسیحیت پاپاں دی معافی تے خُدا اُتے اصل ایمان نئیں دے سکی سی ،تے ایس طرحاں بوہت سارے لوک مشرقی دیناں دی صوفیانہ نوعیت ول جھکے تے سوچدے نیں پئی ایہہ مغربی دیناں نالوں چنگے دین دِسدے نیں ۔ پر مسیحیت نہ تاں مغربی اے تے ناای کوئی مشرقی دین اے ۔
ہُن ویلا آگیا اے پئی اسیں پانی تے رُوح دی خوشخبری تے اج دی مسیحیت دی حالت اُتے دوبارہ دھیان کرئیے۔ سانوں ایہہ پچھن تے دھیان کرن دی لوڑ ہیگی اے پئی مسیحیت دی سچیائی کاہدے لئی وگڑ گئی اے جویں پئی اج کل اے ، تے اج دی مسیحیت بوہتیاں لوکاں دیاں نظراں وچ کاہدے لئی بےفائدہ تے پریشان کرن والی ہو گئی اے ۔ ایہدا جواب پانی تے رُوح دی خوشخبری وچ لبھدا اے ۔پانی تے رُوح دی خوشخبری نوں جانیوں اڈ یسوع اُتے ایمان رکھنا خُدا دیاں اکھاں اگے بعل دی پوجا کرن دے برابر اے ۔ خُدا دے اگے سب توں وڈا پاپ مکتی دی سچیائی وانگر پانی تے رُوح دی خوشخبری اُتے ایمان رکھن توں مکرنا اے ۔
اج دی مسیحیت پانی تے رُوح دی خوشخبری دی خوبصورتی نوں نئیں سگوں جگ دی خوبصورتی نوں چنگیاں جان دی اے ۔ آسیہ وچ ستاں کلیسیاواں نیں یسوع دے بپتسمے تے سولی اُتے اوہدے لہو اُتے ایمان رکھ کے خُداوند دی سیوا کیتی سی ۔ پر ، جویں پئی بائبل وچ وکھایا گیا اے ،اوہ ، وی ، وکھ وکھ طریقے نال جگ دے اگے مُک گئیاں ، جویں پئی پانی تے رُوح دی خوشخبری نوں بوہت چھیتی مکا دتا گیا ، تے لوکاں دے دلاں اُتے بوہتا بوہتا قبضہ ایس جگ نے کر لیا ۔
کیہ ہووے گا جے کوئی کلیسیا مکتی دی سچیائی ، پانی تے رُوح دے راہیں نویں سریوں جمن دی خوشخبری دی منادی نئیں کردی اے ، تے ایہدی تھاں اُتے صرف سولی والے لہو دی منادی کردی اے ؟ میَں ایہہ سوال ایس لئی کیتا اے پئی ایتھوں تیک پئی خُدا دی کلیسیا ، وی جے جگ پچھے چلدی اے تاں ، بوہت چھیتی جگ دے راہیں وگڑجاوے گی ،تے ایہدے کجھ ای چِر بعدوں ایہہ دعویٰ کرنا شروع کردیوے گی پئی مکتی پاؤن لئی یسوع دے بپتسمے نوں نہ جاننا ٹھیک اے ۔ ایس لئی میَں خُدا دے کلام دے راہیں ایس خاص گل بارے دوجی واری گل کردا پیا ہاں تے ایہنوں گھڑی مُڑی دہراندا پیاہاں ۔
 
 
یسوع دے بپتسمے نال تے اوہدے بپتسمے توں اڈ خوشخبری وچ کیہ فرق اے
 
تُسیں تے میَں ،اسیں ساریاں نیں پانی تے رُوح دی خوشخبری اُتے ایمان رکھ کے اپنے سارے پاپاں توں معافی پائی اے ۔ پانی تے رُوح دی ایہہ خوشخبری خُداوند دی سچیائی اے ، جد پئی یسوع دا بپتسمہ ،سولی اُتے اوہدا لہو ،تے پاک رُوح ساڈی مکتی دے گواہ نیں۔
 ۱-یوحنا ۵: ۵۔۷ تے ۱-پطرس۳: ۲۱ سانوں دسدے نیں پئی ”پانی “ مطلب اے
ساڈی مکتی دا نشان اے ، تے ایہہ اوہو ای مکتی دا کلام اے جیہڑا متّی ۳: ۱۵ وچ وکھالی دیندا اے جتھے یسوع اپنے بپتسمے نال سارے لوکاں دے سارے پاپاں نوں اپنے اُتے چُک لیندا اے ۔ جدوں یسوع دا بپتسمہ ایناں خاص اے ، تاں فیر کس طرحاں مسیح یسوع دے بپتسمے نوں اک پاسے کر کے تے سولی اُتے صرف اوہدے لہو دی منادی کرکے سانوں پکی تے کامل مکتی مل سکدی اے ؟ پاپ توں مکتی پاؤن والیاں نوں کلام اُتے ایمان رکھ کے مکتی دی صاف لکیر کِچھنی چاہی دا اے ۔ اوہناں نوں اپنے آپ نوں گھڑی مُڑی یاد کراؤنا چاہی دا اے تاں پئی ایہہ لکیر ہور وی ڈوہنگی ہوندی جاوے ۔
جے کوئی بندہ اپنی مکتی نوں وکھ کرن دی صاف لکیر نئیں کھچ سکدا ، تاں ایہدا مطلب صرف ایہہ ہو سکدا اے پئی حالے تیک اوہ بندہ مکتی یافتہ نئیں ہویا اے ۔ ایہہ سوچنا غلط ہیگا اے پئی ساڈی پاپ توں مکتی صرف ساڈے ایمان دا اک بوہت خاص مرحلہ اے ۔ پاپ توں مکتی رُوحانی پکیائی دا اک مرحلہ نئیں ہیگا، سگوں ایہہ ساڈے عقید ے دی نیہ اے ، جیہڑا ساڈے ایمان دے گھر نوں چٹان اُتے بناؤن دا سب توں بوہتا خاص مرحلہ اے ۔
ایس لئی ،سانوں مکتی دے مسئلے نوں صرف وکھ وکھ فرقیاں دے ، ”دلی خیالاں “دے معاملے وانگر نئیں سوچنا چاہی دا ۔ اک فرقے دے دلی خیال دوجے فرقے توں وکھ ہو سکدے نیں ، پر بائبل دی سچیائی ، ایہہ سچیائی جیہڑی یسوع نے اپنے بپتسمے نال ساڈے سارے پاپاں نوں اپنے اُتے چُک لیا ، ایہہ اک ایمان توں دوجے ایمان تیک وکھ نئیں ہو سکدی اے ۔ ایہو ای سبب ہیگا اے پئی جدوں اسیں پانی تے رُوح دی خوشخبری منادی کردے پئے آں تاں اسیں یسوع دے بپتسمے دی خاص لوڑ نوں نئیں چھڈ سکدے آں ۔
اسیں مسیح دے بپتسمے نوں نئیں چھڈ سکدے آں تے صرف یسوع دی ، ”خُدا دا میمنا جیہڑا جگ دا پاپ چُک کے لَے جاندا اے “وانگر منادی کردے آں یاں ایہہ منادی کردے آں پئی صرف سولی دے لہو اُتے ایمان رکھ کے ای لوکاں نوں مکتی مل سکدی اے ۔ سانوں یسوع مسیح دے بپتسمے تے سولی اُتے اوہدے لہو دونواں اُتے ایمان رکھ کے اپنے پاپاں دی معافی پاؤنی چاہی دی اے ۔ یسوع دے بپتسمے اُتے ایمان رکھن توں اڈ صرف سولی اُتے اوہدے لہو اُتے ایمان رکھ کے کسےدے سارے پاپ کویں مُک سکدے نیں ؟ جدوں لوک صرف سولی دے لہو اُتے ایمان رکھدے نیں ، تاں کیہ اوہناں دے دل دے پاپ وی مُک جاندے نیں ؟ بالکل نئیں !
بائبل دے راہیں، یسوع نے ساڈے پاپ ،تے اوہناں دی سزا نوں جریا ، ایہہ خُدا دی راستبازی دی گواہی اے ۔ اصل ایمان جیہڑا ساڈے کول ہونا چاہی دا اے اوہ مسیح دے عہد نامے دی ایس سچے علم اُتے ایمان اے ۔میرا سچے علم توں کیہ مطلب اے ؟ میرا مطلب ایہہ ہیگا اے پئی خُدا دے راہیں ساڈے پاپاں دی سزا نوں ، اوہدی راستبازی کیہ اے ، تے خُدا دے اگے فناہ ہون والا ایمان کس طرحاں دا ایمان اے ، نوں کُھل کے سمجھنا اے ۔ صرف ایہناں ساریاں نوں جان کے ای ساڈاکھرے علم توں کھرا ایمان ودھ سکدا اے ۔
جے ،خوشخبری دی منادی کردیاں ہوئیاں ، اسیں یسوع دے بپتسمے یاں سولی اُتے اوہدے لہو نوں چھڈ دیندے آں ، فیر اسیں جیہدی منادی کردے آں اوہ پانی تے رُوح دی خوشخبری نئیں ہووے گی ۔ جے اسیں خُدا دی سچیائی بارے اپنیاں دلی مثالاں دیندے آں تے ایہہ منادی کردے آں پئی ہر کوئی بھاویں کسے طرحاں وی یسوع اُتے ایمان لیا کے مکتی یافتہ ہوسکدا اے تاں منادی کرن والے تے سُنن والے دونویں ای پاپی رہ جان گے ۔ کیہ اسیں یسوع دے بپتسمے اُتے ایمان رکھدے آں یاں نئیں دےوچکار فرق ای ، لوکاں نوں بچاؤن بارے سارے فرق بناؤندااے ۔
جدوں اسیں رسولاں دے ایمان نوں ویکھیے ،تاں سانوں پتہ لگدا اے پئی اوہناں نیں صرف سولی والے لہو دی منادی نئیں کیتی سی ۔ اوہناں ساریاں نیں مکتی دے اکو ای کم وانگر یسوع دے بپتسمے تے اوہدے صلیبی لہو دونواں اُتے ای ایمان رکھیا سی ۔ ایہہ بحث کرنا پئی یسوع نے سولی اُتے ساڈے سارے پاپاں نوں چُک لیا سی ایس گل اُتے ایمان رکھیوں اڈ پئی اوہنے پہلوں اوہناں نوں اپنے بپتسمے نال اپنے اُتے چُک لیا سی ، نہ صرف بندیاں دیاں دلیلاں وچ بے عقلی اے ، سگوں ایہہ پانی تے رُوح دی سچیائی اُتے وی پورا نئیں آؤندااے ۔ جیہڑے لوک ایس طرح دی ادھی خوشخبری اُتے ایمان رکھدے نیں اوہناں نوں اوہناں دے پاپاں توں مکتی نئیں مل سکدی ۔
 
 
خوشخبری دی منادی کرن والے دے کم
 
بائبل مطابق گل کردیاں ہویاں ، رُوحانی رشتے طے کرن والے اوہ نیں جیہڑے پانی تے رُوح
دی خوشخبری دی منادی کردے نیں ۔ رُوحانی مکتی دے رشتے طے کراؤن والیاں نوں خُداوند تے اوہدیاں ووہٹیاں وچکاروچولے بننا چاہی دا اے ۔ پہلا کم جیہڑا اوہناں نوں کرنا چاہی دا اے اوہ پاپیا ں نوں منادی کرنی اے جو کجھ خُداوند نے اوہناں لئی کیتا اے ۔ اوہناں نوں دوجیاں نوں ایہہ سکھاؤنا چاہی دا اے یسوع نے اپنے اُتے اوہناں دے پاپاں نوں چُکن لئی بپتسمہ لیا سی ، تے ایہہ پئی اوہنے اوہناں ساریاں پاپاں لئی سولی اُتے دکھڑے جرے سی ۔ اوہناں نوں ایہہ وی ٹھیک طریقے نال ایہہ جاننا چاہی دا اے پئی کیہ ووہٹیاں ایہدے اُتے بھروسہ رکھدیاں نیں یاں نئیں ، تے جدوں ووہٹیاں بھروسہ رکھدیاں نیں ، تاں رشتے کراؤن والیاں دا کم چنگے طریقے نال پورا ہو جاندااے ۔
ایہنوں پورا کرن لئی ، رشتے پکے کراؤن والیاں نوں لاڑا کیہڑا اے تے اوہنے اوہناں لئی جو کجھ کیتا اے ووہٹیاں نوں ایہہ کھول کے دسنا بوہت لوڑی دا اے، تاں پئی ووہٹیاں سوکھے طریقے نال ایہنوں سمجھ سکن ۔ جدوں ووہٹیاں دلوں ایہہ جان دیاں نیں پئی لاڑے نے اوہناں لئی کیہ کجھ کیتااے ، فیر رشتے پکے کراؤن والیاں نوں اوہناں نوں ایہہ سچیائی سکھاؤنی پوے گی پئی لاڑے نے اپنے پانی تے لہو نال اوہناں دے سارے پا پاں نوں مکا دتا اے ۔
جدوں ایس طرحاں ووہٹیاں نے اوہ سارے کم من لَے جیہڑے لاڑے نے اوہناں لئی کیتے نیں ، فیر اوہ بن جاندیاں نیں تے مسیح دیاں ووہٹیاں اکھواؤندیاں نیں ۔ اوہ جیہڑے یسوع مسیح دی ووہٹی بن گئے نیں اوہناں نوں ایہہ جاننا چاہی دا اے پئی لاڑے نیں اوہناں نوں پانی تے رُوح دی خوشخبری دے کفارے نال خریدیا اے ۔ اوہناں نوں ایہہ سمجھنا چاہی دا اے پئی اوہناں نوں اپنے بناؤن لئی ، لاڑے نے اپنے پانی تے لہو نال اوہناں دے سارے پاپاں نوں پاک کیتا اے ، اوہناں نوں برف وانگر چٹا کر دتا اے ، تے اوہناں نوں اپنیاں ووہٹیاں وانگرقبول کیتا اے ۔
صرف فیر ای ووہٹی لاڑے دی ہمیش لئی عزت کر سکدی اے تے اوہنوں ٹھیک طرحاں پچھان سکدی اے ۔ اوہ جیہڑے اپنے سارے پاپاں توں مکتی پا گئے نیں اوہ راستباز نیں ، راستباز لوک بے پاپ نیں ، تے بے پاپ ای یسوع مسیح دیاں ووہٹیاں نیں ۔ جدوں ووہٹیاں ایہو جیہا ایمان رکھدیاں نیں تاں ، اوہ لاڑے نال ویاہ کر سکدیاں نیں ، تے لاڑا اوہناں نوں اپنے سینے لاؤن لئی قبول کر سکدا اے ۔ ایسے طرحاں ، جدو ں صرف رُوحانی رشتے پکے کراؤن والے سچیا ئی دے کلام نال ووہٹیاں نوں تیار کردے نیں تاں اوہ کامیابی نال اپنے ویاہ دا انتظام کر سکدیا ں نیں ۔
کامیاب ہون لئی ، رُوحانی مکتی دے رشتے پکے کراؤن والیاں نوں ایہہ جاننا چاہی دا اے پئی لاڑا کس طرحاں دیاں ووہٹیاں پسند کردا اے ۔ یسوع ، ساڈا لاڑا ، کوئی پاپ نئیں رکھدا اے ۔ اوہ پاک اے ۔ ایس لئی یسوع کسے وی خطا توں اڈ بے پاپ ووہٹیاں پسند کردا اے ۔ ایس لئی رشتے پکے کراؤن والے لاڑے دے کماں نوں ووہٹیاں دی ستھرائی تے شنگھار لئی ورتدے نیں ۔ ووہٹیاں دے ایس شنگھار دا مطلب ایہہ ہیگا اے پئی اوہ صرف لاڑے دے سبب پوری ہوئی پانی تے رُوح دی خوشخبری دے راہیں اپنے پاپاں توں سارے دیاں ساریاں پاک ہون دے بعدوں لاڑے کول لیائیاں جان گئیاں ۔ جے اوہ اوہدے کول لیائیاں جاندیاں نیں جدوں اوہناں دے صرف ادھے پاپ معاف ہوئے نیں تاں ، لاڑا اوہناں نوں قبول نئیں کرے گا ،ایس لئی پئی اوہ چاؤہندا اے پئی اوہدیاں ووہٹیاں بے پاپ ہون ۔ خُدا دے خادم جیہڑے ایہہ کم کردے نیں اوہ رُوحانی مکتی دے رشتے پکے کراؤن والے نیں ۔
خُدا دے خادماں نوں ، ایس لئی ، اوہناں دی رُوحانی مکتی لئی ووہٹیاں نوں تیار کردے رہنا چاہی دا اے ۔ ایہدے نال ای ، سانوں ایہہ وی سوچنا چاہی دا اے پئی اج دی مسیحیت وچ بوہتے بدنی رشتے پکے کراؤن والے نیں جیہڑے ہر تھاں اُتے اپنے پیسے دھیلیاں دے فائدیاں نوں ودھاؤندے نیں تے جگ دے مال نوں بدوبدی کھوہ لیندے نیں ۔ ایہہ بدنی رشتے پکے کراؤن والے یسوع مسیح تے ردّ کیتیاں ہوئیاں ووہٹیاں دونوا ں ولوں بےعزتی دا سبب ہون گے ۔ سانوں بدنی رشتے پکے کراؤن والے نئیں بننا چاہی دا ۔
 
 
شیطان دیاں چالاں نوں سمجھو
 
ایتھوں تیک خُدا دے خادماں تے لوکاں وچ، بوہتے ایہو جیہے وی نیں جیہڑے شیطان دی دھوکہ دین دی ڈوہنگھی چال نوں نئیں جان دے ۔ دوجے اکھراں وچ ، بوہتے ہیگے نیں ،جنہاں نوں ایس گل دا پتہ ای نئیں پئی شیطان سانوں بوہت چوکھی ڈیگن دی کوشش کردااے ۔ خُدا دے بوہتے خادم ایہہ سوچن وچ ناکام ہیگے نیں پئی شیطان پانی تے رُوح دی خوشخبری نوں کویں بدل تے وگاڑ چُکیا اے ، تے اوہنے کویں ایمانداراں نوں اوس دےجھوٹے عقیدے پچھے چلن لئی دھوکہ دتا اے ۔ نتیجے طور اُتے ، یسوع وچ بوہتے ایماندار پانی تے رُوح دی اصل خوشخبری دی تھاں اُتے اک وگڑی ہوئی خوشخبری دے نال مُک گئے نیں ، تے خُدا دی آس اُلٹ ، اوہناں دیاں رُوحاں وی فناہ ہو گئیاں نیں ۔
خُدا سانوں دسدااے ، ” اِیزبل دیاں تعلیماں پچھے نہ چلو ۔ میرے واپس آؤن تیک پانی تے رُوح دی اپنی خوشخبری اُتے پکیاں ہوکے ایمان رکھو تے منادی کرو۔ فیرمیَں تہانوں قوماں اُتے راج کراواں گا ۔ “پر اوہ لوک جیہڑے اِیزبل دے عقیدے ولوں دھوکہ کھاندے پئے نیں ، خُدا سانوں ایہہ وی دسدااے ، اوہ اوہناں نوں دکھ جرن تے اگ دی بھٹی وچ سُٹ دیوےگا ۔
جدوں مسیح دے پرت آؤن دا ویلا آوے گا ، اسیں اوہناں لوکاں نوں ویکھاں گے جنہاں نیں ایہدے اُتے ایمان رکھیا تے صرف یسوع دے لہو اُتے اپنے ایمان نوں دھوکہ دے کے مکتی دی منادی کیتی سی ۔ ایہہ لوک اپنے عقیدے اُتے فخر کرن دا شکار نیں ، ہمیش دوجیاں لوکاں توں ودھیا ہوندے ہوئیاں جنہاں دا ایمان اوہناں توں وکھ ہوندااے ۔ پر خُدا اوہناں لوکاں دے ایمان تے اوہناں لوکاں دے ایمان جیہڑے پانی تے رُوح دی خوشخبری اُتے ایمان رکھدے نیں دے وچکار فرق پاؤندا اے تے وکھریاں کردا اے : ” جیہڑا جتے تے جیہڑا میرے کمّاں دے سببّوں اخِیر تِیکر عمل کرے مَیں اوہنوں قوماں اُتّے اختیار دیاں گا۔تے اوہ لوہے دے ڈنڈے نال اوہناں اُتّے حکُومت کرے گا۔ جیویں گھمیار دے بھانڈے ٹُٹ پُھٹ جاندے نیں۔ ایسے طرح مَیں وی اجیہا اختیار اپنے باپ کولوں لیا اے ۔“
جدوں ساڈا خُداوندایس دھرتی اُتے پرت آوے گا تاں ، بوہت سارےمسیحی ہون گے جیہڑے نویں سریوں جمیوں اڈ ای خُداوند نال ملن گے ۔ ایس لئی پئی اوہناں نیں پانی تے رُوح دی خوشخبری اُتے ایمان نئیں رکھیا سی ، ایس لئی اوہ اپنے دلاں وچ پاپ رکھدے ہوئیاں ای خُداوند نال ملن گے ۔ پر اوہ جنہاں نے دلوں پانی تے رُوح دی خوشخبری اُتے ایمان رکھ کےاپنے پاپاں توں معافی پا لئی اے ، ایس توں فرق ، اوہ خُداوند دے آؤن نال بدل جان گے ، تے اوہدے نال بادشاہی کرن گے ۔ جویں پئی ایتھے آکھیا گیا اے ، خُداوند تے اوہدے لوکاں دی طاقت لوہے دے ڈنڈے وانگر اے جیہڑا گھمیار دے بھانڈیاں نوں توڑ کے کچرا بناؤندا اے ۔
خُدا لازمی طور اُتے ساریاں قوماں اُتے اوہناں لوکاں نوں طاقت دیوے گا جیہڑے اخیرتیک پانی تے رُوح دی خوشخبری نال اپنے ایمان دی راکھی کردے نیں ۔ ساڈا خُداوند سانوں دسدا اے پئی ایہہ طاقت اوہو جیہی ای طاقت اے جیہو جیہی اوہنے باپ ولوں پائی اے ۔ سانوں اِیزبل تے بلعام ورگے جھوٹے نبیاں دے خلاف لڑنا تے اوہناں اُتے فتح پاؤنی چاہی دی اے ، تاں پئی اسیں اوس طاقت نال جیہڑی خُداوند سانوں دیوے گا ایہناں قوماں اُتے ہمیش لئی راج کر سکیے ۔
 
 
سچیائی دی واضح مکتی !
 
پاپیاں نوں بچاؤن لئی ،ساڈے خُداوند نوں ایس دھرتی اُتے آؤنا پیا ، تے سارے لوکاں دے سارے پاپاں نوں اپنے آپ اُتے لین لئی ، اوہنوں یوحنا کولوں بپتسمہ لینا پیا۔ ایس لئی پئی ساڈے پاپاں نوں لین لئی خُداوند نے بپتسمہ لیا سی ، ایس لئی اوہ ایہناں پاپاں نوں سولی تیک لَے جاسکدا سی ، اوہدے اُتے مر سکدا سی ، تے مویاں وچوں جیوں سکدا سی ۔ اوہنے ایہہ راستباز کم ساڈے لئی پورے کیتے سن ، ایس لئی پئی ہُن اوہ ایہہ جر نئیں سکدا سی پئی سارے لوک لگاتار اپنے پاپاں وچ رہندے تے ایہناں وچ دُکھ پیڑاں جردے رہندے ۔ پانی تے رُوح دی خوشخبری اوہ سچیائی اے جیہڑی تہانوں تہاڈے سارے پاپاں توں مکتی دِلا سکدی اے ۔
تے ساڈا خُداونداوہناں ساریاں لئی مکتی داتا بن سکدا اے جیہڑےپانی تے رُوح دی خوشخبری اُتے ایمان رکھدے نیں ۔ ایس لئی پئی خُداوند نے یوحنا کولوں بپتسمہ لیا سی ، ایس لئی اوہ ایس حیران کرن والے نتیجے دا پھل دے سکدا سی جیہدی گواہی یوحنا ۱: ۲۹تے یوحنا۱۹: ۳۰ وچ ملدی اے : دُوجے دِن یُوحنّا یِسُوع نُوں اپنے ولّ آؤندیاں ویکھ کے آکھیا ویکھو خُدا دا برّہ جیہڑا دُنیا دا گُناہ چُک لے جاندا اے۔ تے پُورا ہویا!“ جیہڑے لوک خُدا دے ایس کلام دے راہیں اپنی سزا نوں من دے نیں اوہ اوہدے اُتے پکا ایمان رکھن دے لائق نیں ایس لئی پئی اوہ جان دے نیں پئی یسوع نے اپنے بپتسمے نال اوہناں دے سارے پاپاں دی فکر کیتی ۔ سانوں اپنے دلاں وچ سچے دل نال جھاتی پاؤنی چاہی دی اے ، ایس لئی پئی جے اسیں پانی تے رُوح دی خوشخبری اُتے ایمان نئیں رکھدے تاں ، ساڈے پاپ ساڈے دلاں وچ قیم رہندے نیں ۔
جدوں اسیں اوہناں لوکاں دے دلاں اُتے ڈوہنگھا دھیان کر دے آں جیہڑے یسوع دے
بپتسمے نوں اک پاسے سُٹ دیندے نیں تے سولی اُتے صرف اوہدے لہو اُتے ایمان رکھدے نیں تاں ، اسیں ویکھدے آں پئی اوہناں دے دلاں وچوں پاپ دے ہون توں مکر یا نئیں جاسکدا۔ سانوں یوحنا بپتسمہ دین والے دے راہیں یسوع دے بپتسمے اُتے خاص کر کے دھیان کرنا چاہی دا اے تے ایہدے اُتے ہور وی پکیاں ہوکےایمان رکھنا چاہی دا اے ، ایس لئی پئی اسیں خُدا دے کلام وچ اپنے خیالاں مطابق کجھ اوہدے وچ لکھ یاں ختم نئیں کرسکدے ۔ سانوں ساریاں نوں جھوٹیاں خوشخبریاں دا مقابلہ کرنا چاہی دا اے ، ایس لئی پئی ایہہ اوہناں لوکاں دے ایمان نوں فناہ کر سکدیاں نیں جیہڑےپانی تے رُوح دی خوشخبری اُتے ایمان رکھدے نیں ۔
یسوع نے آپ سانوں دسیا اے ، ”خبردار فریسیاں دے خمیر توں ہُشیار رہو۔ “ایتھے ”خمیر“دامطلب اوہ نئیں ہیگا جیہڑا شراب یاں روٹی بناؤن لئی ورتیا جاندا اے ، سگوں ایہدا مطلب ایہو جیہی خوشخبری اے جیہدے وچ یسوع دا بپتسمہ نہ ہووے ۔ سانوں ایس سچیائی نوں جاننا تے ایہدے اُتے ایمان رکھنا چاہی دا اے پئی یسوع نے جگ دے پاپاں نوں اپنے بپتسمے نال اپنے اُتے چُکیا تے ایہناں نوں سولی اُتے لَے گیا ، تے ایہہ پئی سولی اُتے مر کے تے مویاں وچوں جیوں کے ساڈا اصلی مکتی داتا بن گیا اے ۔
اپنے ولوں ، یسوع نے یوحنا دے راہیں بپتسمہ لَے کے جگ دے سارے پاپاں نوں لَے لیا ، تے ایہناں ساریاں نوں اپنے سولی والے لہو نال مکا دتا ۔ پر لوکاں ولوں ، ایس لئی پئی اوہ بپتسمے اُتے ایمان نئیں رکھدے جیہڑا یسوع نے یوحنا کولوں لیا سی ، اوہناں دے پاپ بالکل اوسے طرحاں قیم رہندے نیں ۔ ایس سچیائی اُتے ایمان رکھیوں اڈ پئی یوحنا نے جگ دے سارے پاپاں نوں یسوع اُتے لدن لئی اوہنوں بپتسمہ دتا سی ، اوہناں دے پاپاں نوں مُڈھوں مکایا نئیں جا سکدا۔ پانی تے رُوح دی خوشخبری طاقت والی خوشخبری اے جیہڑی ساڈے سارے پاپاں نوں دھو دیندی اے تے سانوں برف وانگر چٹا بنا دیندی اے ، جدوں اسیں یسوع دے بپتسمے تے اوہدے سولی والے لہو دونواں اُتے ای ایمان رکھدے آں ۔
 
 
آؤ اسیں فتح پاؤن والے بنیے
 
ایس خاص حوالے توں ، اسیں خُدا دے کلام نوں تھواتِیر ہ دی کلِیسیا نال گل کردیاں ویکھیا اے
۔ خُدا نے تھواتِیر ہ دی کلِیسیا دے خادم نال وعدہ کیتا سی پئی اوہ ایہنوں قوماں اُتے راج کراوے گا ۔ ہر نویں سریوں جمن والا پاک بندہ رُوحانی لڑائی وچ لڑدا رہندا رُوحانی لڑائی دے میدان وچ رہندااے ۔ سانوں پانی تے رُوح دی خوشخبری اُتے اپنے ایمان نال ہمیش ایس رُوحانی لڑائی دے میدان وچ فتح پاؤنی چاہی دی اے ۔ ایہہ رُوحانی لڑائی اوسے ویلے ای شروع ہو جاندی اے جدوں کوئی پانی تے رُوح دی خوشخبری اُتے ایمان رکھدا اے ۔
جیہڑے لوک پانی تے رُوح دی خوشخبری اُتے ایمان رکھدے نیں اوہناں نوں شیطان دے خلاف اپنی لڑائی وچ اوہدے اُتے فتح پاؤنی چاہی دی اے ۔ساڈے وچوں تھوڑے جیہے ای شیطان دے خلاف لڑدے نیں تے خُدا دے اگے کھلون تیک جھوٹیاں خوشخبریاں اُتے فتح پا جان گے ۔ جیہڑے لوک فتح پاؤندے نیں اوہناں دا ایمان ہیگا اے پئی ساڈے خُداوند نے ساڈے سارے پاپاں نوں ایس دھرتی اُتے آ کے ، بپتسمہ لَے کے ، سولی اُتے مرن تے مویاں وچوں جیوں اُٹھن دے راہیں مکا دتا اے ۔ ایہدے توں کوئی فرق نئیں پیندا پئی دوجے کیہ آکھدے نیں ، اوہ اپنے عقیدے اُتے پکے ہیگے نیں پئی اوہناں دے پاپاں نوں پاک کرن دی تھاں یردن دا دریااے ، تے ایہہ پئی اوہناں دے سارے پاپاں نوں بپتسمے دے راہیں یسوع دے حوالے کیتا گیا سی جیہڑااوہنے یوحنا کولوں لیا سی ۔
ساڈے خُداوند نے سانوں شیطان نال لڑن تے اوہدے اُتے فتح پاؤن دا حکم دتا اے ۔ ساڈا بدن کدی کدی بوہتا کم کردیاں ہوئیاں تھک سکدا اے ، پر پانی تے رُوح دی خوشخبری اُتے ساڈا ایمان جھوٹیاں خوشخبریاں دے خلاف اپنی لڑائی کدی نئیں ہارسکدا ۔
خُداوند سانوں دسدااے ، ” بِھیڑے بُوہے راہ وڑو۔ کیوں جو موکلا اے اوہ بُوہا تے کُھلا اے اوہ راہ جیہڑا بربادی نُوں پُہنچاندا اے۔ تے بُہتے نیں جیہڑے اوتھوں وی وڑدے نیں۔کیوں جو بِھیڑا اے اوہ بُوہا تے سَوڑا اے اوہ راہ جیہڑا زِندگی نُوں پُہنچاندا اے۔ تے جیہڑے اوہنوں لبّھدے نیں تھوڑے نیں۔ “ (متّی ۷: ۱۳۔۱۴)۔پُرانے عہد نامے دا نبی ایلیاہ بعل دے ۸۵۰ توں بوہتے کاہناں نال لڑیا تے جت گیا ۔
پولُس رسول نے وی آکھیا پئی ایہدے توں ہٹ کے کوئی دوجی خوشخبری نئیں اے سگوں جنہوں اوہناں نیں ودھایا اکو ای خوشخبری سی (گلتیوں۱: ۷)۔ پولُس دی ایہہ خوشخبری یسوع دے بپتسمے تے سولی اُتے اوہدے لہو اُتے ایمان توں ہٹ کے کوئی ہور نئیں سی ۔ اوہ لوک جیہڑے ایس خوشخبری اُتے ایمان رکھدے نیں ، جدپئی اوہناں دے نویں سریوں جمن دے بعدوں وی اوہناں وچ کئی کمیاں ہوسکدیاں نیں ، اوہناں دے دلاں وچ ہمیش لئی کوئی پاپ نئیں ہیگا اے۔ ساڈے خُداوند نے ساڈے سارے پاپاں نوں اپنے پانی نال پاک کر دتا تے ایہناں پاپاں لئی اپنے لہو نال اوہناں دی تھاں اُتے ساری سزا جری ۔ یسوع دا بپتسمہ تے سولی اُتے اوہدا لہو ایمان لیاؤن والیاں لئی ہمیش دی مکتی لیایا اے ۔
مکتی پاؤن والیاں نوں ، خُداوند اوہناں دے ایمان دی راکھی کرن ، لڑن تے اخیر تیک فتح پاؤن دی طاقت دیندا اے ۔