শিক্ষা

مضمون 10: مُکاشفہ(مُکاشفہ دی کتاب اُتے تفسیر)

[4-2باب] (مُکاشفہ۴:۱-۱۱ ) یسوع خُدا اے

)مُکاشفہ۴:۱-۱۱ (
 
مُکاشفہ  ۴ باب دے راہیں ، اسیں ایہہ جان سکد ے آں پئی ساڈا یسوع کس طرح دا خُدا اے ، تے ایہہ جان کےساڈا ایمان پکا ہوندا اے ۔ جدوں کلام دے راہیں ملن والی تعلیم ایمان وچ بدل جاندی اے تے ساڈے دلاں وچ قیم ہو جاندی اے ، تاں اسیں خُدا وند اُتے پکے ایمان نال شیطان نال لڑ سکدے آں تے اوہدے کولوں جِت سکدے آں جدوں اوہدے پرت آؤن دا ویلا نیڑے آجاوے گا تے مخالفِ مسیح نکل کے سامنے آوے گا تے سانوں دھمکیاں دیوے گا ۔
اسیں ہُن اپنے ایمان نوں پال دے پئے آں تاں پئی اسیں وڈے دکھ جرن دے پہلے ساڈھے تِن ورہیاں دی ازمائشاں لئی تیار ہو سکیے ۔ جے اسیں اوہ دیہاڑے اپنے ایمان دی پالنا توں اڈ ملاقات کراں گے تاں اسیں لازمی طور اُتے اپنا ایمان گوا لواں گے ۔ پر جے اسیں پکے ایمان دی تیار ی کردے آں تاں، اسیں بہادری نال اقرار کر سکدے آں ، ایتھوں تیکرپئی جے سانوں تھوڑے چر بعد ای بھاویں مرنا کیوں نا پوے ، جنہے سانوں بچایا اے اوہ خُدا اے ،تے ایہہ پئی اسیں خُدا تعالیٰ دے پُتر آں جیہڑا شیطان توں بوہت اُچا اُچیرا اے ، جیہڑا خُدا ورگا نئیں ہیگا ۔
پر ایس طرح کرن لئی ، سانوں پہلوں اپنے دلاں وچ پکا ایمان رکھنا چاہی دا پئی خُداوند وڈی قُدرت اے ،تے ایہہ پئی اسیں اوہدے پُتر آں ۔ ساڈا خُداوند ، جیہڑا خُدا باپ دے برابر اے، بوہت نکا ہوگیا جدوں اوہ سانوں ساڈےسارے پاپاں توں بچاؤن لئی ایس دھرتی اُتے آیا ؟ اوہ بندے دے بدن وچ ایس دھرتی اُتے آیا ، اک خادم وانگر ، جیہڑا ساڈے توں وی نکا ہو گیا جیہڑا ، جیہڑے اوہدے اپنے بنائے ہوئے آں ۔ جے خُدا وند اینی حلیمی نال نئیں سگوں جگ دے راجیاں وانگر طاقت تے اختیار نال آؤندا تاں کیہ ہوندا ؟ تگڑے لئی  ایہہ صرف عام جیہی اے پئی اوہ صرف تگڑیاں نوں ای بیلی بناوے تے اپنی طاقت نوں نکیاں ، عیبیاں تے  ماڑیاں اُتے وکھاوے۔ پر خُداوند ایتھوں تیکر پئی ساڈے توں وی نکیاں وانگر ایس دھرتی اُتے آیا ، نکیاں تے ماڑیاں دا بیلی بنیا ، تے اوہناں نوں اوہناں دے پاپاں  توں  مکتی  دیندیاں ہوئیاں
اوہناں نوں اپنے لوک بنا لیا ۔
ایس لئی خُدا چنگا ایّالی تے ترس کھان والا خُداوند اے ۔ تے ایس لئی ، ایس ترس کھان والے چنگے ایّالی لئی ،اسیں کجھ نئیں کر سکدے سگوں سانوں اپنے پُتر بناؤن دی وڈیائی لئی اوہدی تعریف کر سکدے آں ۔ اسیں ایس طرح ایس دھرتی اُتے رہندیاں ہوئیاں اوہدے فضل تے برکتاں لئی اپنے سچے دلوں خُداوند دی وڈیائی کردے آں ، تے جدوں اسیں اوہدی بادشاہی وچ وڑاں گے تاں اسیں اوہدی قدرت تے جلال لئی اوہدی وڈیائی کردے رہواں گے ۔ ساڈی اپنی اواز نال خُداوند دی بھگتی تے وڈیائی وچ رَلنا اک بوہت وڈی برکت اے ،  ایس لئی پئی صرف اوہو ای  لوک جیہڑے پانی تے رُوح دی خوشخبری اُتے ایمان رکھدے نیں اوہ خُداوند دی وڈیائی کر سکدے نیں ۔ سانوں ایہہ خاص برکت  صرف اوہناں لوکاں نوں دتی گئی اے جیہڑے پانی تے رُوح دی خوشخبری اُتے ایمان رکھدے نیں۔ سانوں ایہہ کدی وی نئیں بھلنا چاہی دا پئی اسیں بوہت  وڈی شان والے خُدا دے لوک تے اوہدے خادم بن گئے آں  ۔
کجھ لوک آکھدے نیں پئی یسوع خُدا دا پُتر اے ، پر اوہ آپ خُدا نئیں ہیگا ۔ پر جویں بندے بندیاں نوں جم دے نیں تے ڈنگر ڈنگراں نوں جم دے نیں ، خُدا دا پُتر خُدا اے ۔ جویں بندہ کتے نوں نئیں جم سکدا ، ایسے طرح خُدا تعالیٰ دا پُتر وی بندہ نئیں بن سکدا جیہڑا ، صرف اوہدی اک مخلوق  اے ۔ اوہ لوک جیہڑے ایہہ نہیں من  دے پئی یسوع ای خُدا اے اوہو ای لوک نیں جیہڑے نئیں جان دے پئی اوہنے سانوں اپنے پانی تے رُوح نال بچایا اے ۔
سانوں لازمی ایہہ ایمان رکھنا چاہی دا اے پئی یسوع خُدا اے (یوحنا ۱: ۱)۔جدوں خُدا باپ نے یسوع مسیح لئی اک تخت بنایا تے اپنی ساری طاقت اوسے دے حوالے کر دتی تاں  ،  یسوع جیہڑا ہیگا سی ،تے جیہڑ ہیگا اے ،تے جیہڑا انصاف والے دیہاڑے لئی آؤن والا اے ، تے ہمیش لئی رہوے گاخُدا دی قدرت نال ساریاں اُتے را ج کر ن لئی  بناؤن والے خُدا دی وڈیائی تے جلال ، مکتی تے انصاف نال اپنے تخت اُتے بیٹھا سی ۔ایس لئی پئی اسیں خُداوند اُتے ایمان رکھ کے اوہدے لوک بن گئے آں، ایس لئی اسیں اوہدی بادشاہی وچ وڑاں گے تے ہمیش لئی جیوندے رہواں گے ۔ یسوع جیہدے اُتے اسیں ایمان رکھدے آں اوہو ای خُدا اے ، تے اسیں اوہو ای لوک آں جیہڑے اوہدے کولوں اپنی مکتی پاؤن دے سبب خُدا دے پُتر بن گئے آں ۔
پاک لوک ، خُدا دے کم کرن والے ،تے خُدا دے خادم ، جیہڑے نویں سریوں جمے نیں ، اوہناں
نوں فخر ہونا چاہی دا اے ۔ بھاویں ایس جگ وچ اسیں بوہت گھٹ پیسےدھیلے رکھدے آں ، سانوں خُدا دے پُتراں وانگر بادشاہواں وانگر فخر ہونا چاہی دا اے جیہڑے سارے سنسار اُتے راج کرن گے ۔ میَں خُدا تعالیٰ دا شکر ادا کرداآں پئی اوہ سانوں جگ دے پاپاں توں مکتی دیندا تے سانوں اپنے پُتر بناؤندا اے !
اسمان اُتے چویاں بزرگاں نیں خُدالئی جیہڑی وڈیائی کیتی  اوہ ایہدے لئی سی جیہڑا اوہ ایس دھرتی اُتے کر چُکیا سی ۔ اوہناں دی وڈیائی  ایہہ سی پئی خُدا سا را جلال ، عزت تے  طاقت پاؤن دے لائق اے ، ایس لئی پئی سارا کجھ اوہدے سبب پیدا کیتا گیا اے تےاوہ اوسے دی مرضی مطابق  ہیگے نیں ۔
سانوں سچ مُچ ایتھے جو محسو س  کرنا چاہی دا اے اوہ ایہہ ہیگا اے پئی جیہڑا تخت اُتے بیٹھا اے یسوع مسیح اے ،تے ایہہ پئی اوہ خُدا اے ۔ ایہہ یسوع مسیح جیہدے اُتے اسیں ایمان رکھدے آں اوہو ای اصل خُدا اے جنہے سانوں بچایا اے ۔ اسمان دی بادشاہی وچ ، ساری طاقت یسوع مسیح ساڈے خُدا کول اے ۔ اخیری عدالت وی یسوع مسیح ساڈے مکتی داتا خُدا دے راہیں دتی گئی اے ۔ جدوں مسیح اپنے تخت توں ساڈا انصاف کرے گا تاں ، اوہ لوک جنہاں دے ناں زندگی دی کتاب وچ لکھے گئے نیں اوہو ای نویں اسمان تے زمین وچ وڑن گے ، تے جنہاں لوکاں دے ناں ایس کتاب وچ نئیں لبھن گے اوہ اگ وچ سُٹے جان گے ۔
ایس لئی ، یسوع اُتے ایمان نا رکھنا خُدا اُتے ایمان نا رکھن وانگر اے ، تے خُدا اُتے ایمان نارکھنا خُدا دے خلاف کھلون وانگر اے ۔ ایس لئی پئی جیہڑے لوک ایہہ  نئیں من دے پئی یسوع خُدا اے ، اوہ مکتی داتا اے ، تے اوہ اسمان دا بادشاہ اے ، خُدا دے اگے ڈاہڈی سزا پاؤن گے ۔
خُدا اُتے ایمان رکھن والیاں وچوں ، ایہہ جماعت یہوواہ دے گواہ (یہوواہ وِیٹنس) اکھواندا اے ، جیہڑے غلطی کر کے ایہہ من دے نیں پئی یسوع ، بھاویں اوہ خُدا دا پُتر ا ے ، آپ خُدا نئیں ہیگا ۔ پر جے یسوع خُدا نئیں سی تاں ، اوہ سانوں ساڈے پاپاں توں مکتی نئیں دے سکدا سی ، ایس لئی پئی صرف اوہو ای جیہڑا کامل اے اوہ سانوں کامل مکتی وی دے سکدا اے ۔
اسیں بوہتے ماڑے ہیگے آں پئی بدل دے ہوئے حالات نال ساڈے دل اسانی نال بدل جاند ے نیں ۔ ساڈیاں کمیاں دے ہوندیاں ہوئیاں اسیں یسوع مسیح ساڈے خُدا دی ہمیش لئی وڈیائی کرسکدے آں ایہدا سبب ایہہ ہیگا اے پئی یسوع ، اوہ جیہڑا ہمیش تیکر جیوندا رہندا اے تے ہمیش لئی کامل اے ، پاپیاں دا مکتی داتا بن گیا اے  ۔ صرف اوہو ای لوک جیہڑے یسوع مسیح  دے راہیں مکتی پا چکے نیں ، کامل خُدا جنہے سارے پاپاں نوں مکا دتا اے ، خُداوند دی وڈیائی کر سکدے نیں ۔ یسوع مسیح اُتے ساڈا ایمان ، ساڈے خیالاں تے دلاں وچ ، کدی وی جگ دے دیناں وانگر نئیں ہونا چاہی دا۔ جدوں اسیں یسوع نوں خُداوانگر جان دے تے سمجھدے آں تے اوہدے اُتے ساڈا ایمان جائز اے تاں ، اسیں اصل خُدا دا تجربہ کر سکدے آں ۔
سانوں اپنے ایمان وچ جیوندے رہنا چاہی دا اے جیہڑا یسوع مسیح نوں ساڈے مکتی داتا وانگر من دا اے ، تے ایسے ایمان نال اسیں اپنے ویریاں نال لڑ سکدے آں تے اوہناں توں جِت سکدے آں ۔ دوجے اکھراں وچ ، جدوں اسیں یسوع اپنے خُدا اُتے ایمان رکھدے آں تاں،  ایس ایمان دے ڈر توں شیطان کمب جاوے گا ، تےایس طرح ایہہ سانوں ڈٹ کے رہن تے اخیری ویلیاں دیاں ازمائشاں تے دکھ جرن اُتے فتح پاؤن دے لائق بناوے گا۔ جے ، دوجے پاسے ، اسیں یسوع نو ں اپنا خُدا نئیں من دے تاں ، شیطان ساڈا مذاق کرے گا تے سانوں ساڈے ایمان توں اُکھاڑ کے  سُٹ دیوے گا ۔
خُدا باپ کولوں اپنے تخت لین دے بعدوں ،یسوع ساڈے خُدا وانگر اوس تخت اُتے بیٹھا اے ۔ مُکاشفہ دے کلام دے راہیں ، اسیں ایہہ محسوس کر سکدے آں پئی یسوع ای قدرت والا خُدا اے جیہڑا سارے سنسار دی ہر شے اُتے راج کردا اے ،ایس لئی پئی اوہنے باپ ولوں خُدا دے سارے راج تے طاقت نوں پایا اے ۔
ایس سچیائی اُتے تہاڈا ایمان تہانوں شیطان اُتے بہادری نال فتح پاؤن دیوے گا ۔ ایس لئی پئی اسیں خُدا دے پُتر ہون وانگر اپنے نال اوہدی وڈی قدرت والی طاقت  رکھدے آں، ایس لئی کوئی وی ساڈی کنڈ نئیں لا سکدا ، تے اسیں سارے اخیری ویلیاں اُتے یقین نال تے ڈٹ کے فتح پا سکدے آں ۔ میَں ہر شے لئی خُدا دا شکریہ  ادا کرداآں تے اوہدی وڈیائی کردا آں جو کجھ اوہنے ساڈے لئی کیتا اے !.