خطبے

مضمون 10: مُکاشفہ(مُکاشفہ دی کتاب اُتے تفسیر)

[5-1باب] (مُکا شفہ۵:۱۔۱۴) یسو ع جیہڑا خُداباپ دےنمائندے وانگر تخت اُتےبیٹھااے

)مُکا شفہ۵:۱۔۱۴(
”تے جیہڑا تخت اُتّے بَیٹھا سی مَیں اوہدے سَجے ہتّھ وِچ اِک کتاب ویکھی۔ جیہڑی اندروں باہروں لِکھی ہوئی تے سَتّ مُہراں نال بند کِیتی ہوئی سی۔فیر مَیں اِک زوراور فرِشتے نُوں اُچّی اُچّی ایہہ منادی کر دیاں ویکھیا پئی کیہڑا ایس کتاب نُوں کھولن تے اوہدیاں مُہراں توڑن دے لائق اے؟تے کوئی جَنا اسمان اُتّے یا زمین اُتّے یا زمین دے ہیٹھاں اوس کتاب نُوں کھول نا سکیا تے نا اوہدے اُتّے نظر کر سکیا۔تے مَیں ایس گلّ اُتّے بڑا رویا۔ پئی کوئی ایس کتاب دے کھولن یا اوہدے اُتّے نظر کرن دے لائق نا نِکلیا۔فیر اوہناں بزُرگاں وِچوں اِکّی مَینُوں آکھیا نا رو۔ ویکھ یہُوداہ دے گھرانے دا اوہ شیر ببّر جیہڑا داؤد دی نسل اے۔ اوس کتاب تے اوہدیاں ستّاں مُہراں توڑن وِچ غالب آیا۔تے مَیں اوس تخت تے چَوہاں جانداراں تے اوہناں بزُرگاں دے وِچکار جیویں حلال کِیتا ہویا لیلا کھلوتا ہوندا اے ویکھیا اوہدے سَتّ سِنگ تے سَتّ اَکھّیاں سن ایہہ خُدا دِیاں سَتّ رُوحاں نیں۔ جیہڑیاں ساری زمین اُتّے گھلّیاں ہویاں نیں۔اوس آ کے تخت اُتّے بَیٹھے ہوئے دے سَجے ہتھّوں اوس کتاب نُوں لے لیا۔جد اوس کتاب لے لئی تے اوہ چارے جاندار تے چوّی بزُرگ اوس لیلے دے سامھنے ڈِگّ پئے تے ہر اِک دے ہتّھ وِچ بربط تے دُھوف نال بھرے ہوئے سونے دے پیالے سن۔ ایہہ پاک لوکاں دِیاں دُعاواں نیں۔تے اوہ نواں گِیت گاؤن لگّے پئی تُوں ای اوس کتاب دے لین تے اوہدیاں مُہراں توڑن دے لائق ایں۔کیوں جو تُوں ہلال ہو کے اپنے خُون توں ساریاں گھرانیاں تے زبان والیاں تے اُمّتاں تے قوماں وِچوں خُدا دے لئی لوکاں نُوں مُل لیا۔تے اوہناں نُوں ساڈے خُدا دے لئی اِک بادشاہی تے کاہِن بنا دِتّا۔تے اوہ زمین اُتّے بادشاہی کر دے نیں۔تے جد مَیں دھیان کِیتا۔ تے اوس تخت تے اوہناں جانداراں تے بزُرگاں دے آلے دوالے کِنے سارے فرِشتیاں دی اواز سُنی۔ جِنہاں دی گنتری لَکّھاں تے کروڑاں تِیکر سی۔تے اوہ اُچّی اواز نال آکھدے سن پئی ذِبح کِیتا ہویا لیلا ای قُدرت دَولت تے حِکمت تے طاقت تے عِزّت تے جلال تے وڈیائی دے لائق اے۔فیر مَیں اسمان تے زمین تے زمین دے ہیٹھلی تے سمُندر دی ساری مخلُوقات نُوں یعنی سارِیاں شیواں نُوں جیہڑیاں اوہناں دے وِچ نیں ایہہ آکھدیاں سُنیا۔ پئی جیہڑا تخت اُتّے بَیٹھا ہویا اے اوہدی تے لیلے دی وڈیائی تے عِزّت تے جلال تے سلطنت سدا تِیکر رہے۔ تے چَوہاں جانداراں آکھیا۔ آمِین۔ تے بزُرگاں ڈِگّ کے سجدہ کِیتا۔“
 
 
تشریح
 
آیت ۱:”تے جیہڑا تخت اُتّے بَیٹھا سی مَیں اوہدے سَجے ہتّھ وِچ اِک کتاب ویکھی۔ جیہڑی اندروں باہروں لِکھی ہوئی تے سَتّ مُہراں نال بند کِیتی ہوئی سی۔ “
ایتھےا یہہ دسیا گیا اے پئی خُدا باپ دے سجے ہتھ وچ اک کتاب سی جیہدے اُتے ست مہراں لگیاں ہوئیاں سن ۔ساڈے خُداوند یسوع نے ایس کتاب نوں باپ دے سجے ہتھوں لے لیا ، ایہدا مطلب ایہہ ہیگا اے پئی یسوع نوں اسمان دا سارا اختیار دتا گیا سی ۔
 
آیتاں ۲ ۔۴:” فیر مَیں اِک زوراور فرِشتے نُوں اُچّی اُچّی ایہہ منادی کر دیاں ویکھیا پئی کیہڑا ایس کتاب نُوں کھولن تے اوہدیاں مُہراں توڑن دے لائق اے؟تے کوئی جَنا اسمان اُتّے یا زمین اُتّے یا زمین دے ہیٹھاں اوس کتاب نُوں کھول نا سکیا تے نا اوہدے اُتّے نظر کر سکیا۔ تے مَیں ایس گلّ اُتّے بڑا رویا۔ پئی کوئی ایس کتاب دے کھولن یا اوہدے اُتّے نظر کرن دے لائق نا نِکلیا۔ “
کوئی نئیں ہیگا سی ، سوائے یسوع دے ، جیہڑا جگ دا انصاف کرسکدا سی ، نواں اسمان تے دھرتی پیدا کر سکدا سی ، تے ایہدے وچ خُدا باپ دے نمائندے وانگر پاک لوکاں نال رہ سکدا سی ۔
 
آیت ۵:”فیر اوہناں بزُرگاں وِچوں اِکّی مَینُوں آکھیا نا رو۔ ویکھ یہُوداہ دے گھرانے دا اوہ شیر ببّر جیہڑا داؤد دی نسل اے۔ اوس کتاب تے اوہدیاں ستّاں مُہراں توڑن وِچ غالب
آیا۔“
ایتھے ، ” یہُوداہ دے گھرانے دا اوہ شیر ببّر جیہڑا داؤد دی نسل اے۔ “دے فقرے نیں ایس سچیائی نوں ودھایا اے پئی یسوع مسیح قادرِ مطلق خُدا تے بادشاہواں دا بادشاہ اے جیہڑا باپ دے ارادے نوں کامل طریقے نال پورا کرن لائق تے قابل اے ۔ یسوع مسیح آپ خُدا اے تے خُدا دا نمائندہ اےجیہڑا باپ دے ارادے نوں پورا کرے گا ۔
 
آیت ۶:”تے مَیں اوس تخت تے چَوہاں جانداراں تے اوہناں بزُرگاں دے وِچکار جیویں حلال کِیتا ہویا لیلا کھلوتا ہوندا اے ویکھیا اوہدے سَتّ سِنگ تے سَتّ اَکھّیاں سن ایہہ خُدا دِیاں سَتّ رُوحاں نیں۔ جیہڑیاں ساری زمین اُتّے گھلّیاں ہویاں نیں۔ “
یسوع مسیح خُدا باپ کولوں اسمان تے دھرتی دے سارے اختیار لین دے بعدوں ، اوہ قادرِ مطلق خُدا اے جنہے ساریاں شیواں پیدا کیتیاں ۔ اوہو ای اے جیہڑا بندے دے بدن وچ ایس دھرتی اُتے آیا ، جگ دے سارے پاپاں نوں جریا ،تے سانوں ساڈے سارے پاپاں توں مکتی دین لئی اوہناں پاپاں لئی مرگیا ۔
 
آیت ۷:”اوس آ کے تخت اُتّے بَیٹھے ہوئے دے سَجے ہتھّوں اوس کتاب نُوں لے لیا۔ “
ایس لئی پئی یسوع مسیح خُدا وانگر لائق سی، اوہ باپ کولوں کتاب لے سکدا سی ، ایہدا مطلب ایہہ ہیگا اے اوس ویلے توں، ساڈا خُداوند خُدا دے سارے کم پورے کرے گا ۔
 
آیت ۸:”جد اوس کتاب لے لئی تے اوہ چارے جاندار تے چوّی بزُرگ اوس لیلے دے سامھنے ڈِگّ پئے تے ہر اِک دے ہتّھ وِچ بربط تے دُھوف نال بھرے ہوئے سونے دے پیالے سن۔ ایہہ پاک لوکاں دِیاں دُعاواں نیں۔ “
ایہدا مطلب ایہہ ہیگا اے پئی یسوع مسیح باپ دے طریقے اُتے خُدا وانگر کم کرے گا ، جیہدا پہلاں کم ۲۴ بزرگاں تے چاراں جانداراں دے سبب پیش کیتیاں گئیاں پا ک لوکاں دیاں دعاواں نوں
سُننااے ۔
 
آیت ۹:”تے اوہ نواں گِیت گاؤن لگّے پئی تُوں ای اوس کتاب دے لین تے اوہدیاں مُہراں توڑن دے لائق ایں۔ کیوں جو تُوں ہلال ہو کے اپنے خُون توں ساریاں گھرانیاں تے زبان والیاں تے اُمّتاں تے قوماں وِچوں خُدا دے لئی لوکاں نُوں مُل لیا۔“
ایتھے ، خُدا دا نمائندہ بنن دے بعدوں اسمان دے سیواکرن والیاں نیں یسوع مسیح دی وڈیائی کیتی ۔ اسمان دے سیوا کرن والیاں نیں ایس دھرتی اُتے پاپیاں نوں جگ دے پاپاں توں بچاؤن اُتے یسوع مسیح دی وڈیائی کیتی ۔ ایس دھرتی اُتے رہندے ہوئیاں ،یسوع نے یوحنا دے راہیں بپتسمہ لیا تے پاپیاں نوں جگ دے سارے پاپاں توں بچاؤن لئی سولی اُتے مرگیا ، تے اوہنے اپنی ای لہو نال پاپ دا مُل دے کے باپ نوں اوہناں پاپیاں دا فدیہ دتا سی ۔ ایس لئی اسمانی سیوا کرن والے اوہدے راستباز کماں دی وڈیائی کردے پئے نیں جیہڑا اوہناں دا خُدا بن گیا اے ۔
 
آیت ۱۰:”تے اوہناں نُوں ساڈے خُدا دے لئی اِک بادشاہی تے کاہِن بنا دِتّا۔ تے اوہ زمین اُتّے بادشاہی کر دے نیں۔“
یسوع مسیح ، جیہڑا خُدا باپ دا نمائندہ بن گیا ، اوہنے پاک لوکاں نوں خُدا دی بادشاہی دے لوک تے کاہن بنادتا ، تے اوہناں نوں ،ایہدے اُتے بادشاہ بنا دتا ۔ ایس طرح اوہ ایہدے توں وی بوہتا لائق سی پئی اسمانی سیوا کرن والیاں ولوں ساری حمد تے وڈیائی پاوے ۔
 
آیتاں۱۱۔۱۲:”تے جد مَیں دھیان کِیتا۔ تے اوس تخت تے اوہناں جانداراں تے بزُرگاں دے آلے دوالے کِنے سارے فرِشتیاں دی اواز سُنی۔ جِنہاں دی گنتری لَکّھاں تے کروڑاں تِیکر سی۔ تے اوہ اُچّی اواز نال آکھدے سن پئی ذِبح کِیتا ہویا لیلا ای قُدرت دَولت تے حِکمت تے طاقت تے عِزّت تے جلال تے وڈیائی دے لائق اے۔“
ایس لئی پئی یسوع نے یوحنا دے راہیں بپتسمہ لے کے جگ دے سارے پاپ اپنے پِنڈے اُتے چُک لَئے سن ، ایس لئی اوہ سولی اُتے لہو وگا سکدا سی ، تے ایہدے لئی اوہ باپ دے نمائندے وانگر اسمان اُتے ساری مخلوقات توں ساری قُدرت تے دولت تے حکمت تے طاقت تے عزت تے تمجید تے حمد نوں لین دے لائق سی ۔ اسمانی سیوا کرن والیاں تے اوہدے فرشتیاں نال گھرے ہوئے ، اوہ اوہناں دیاں ساریاں وڈیائیاں تے بھگتیاں قبول کردا اے ۔ ہیلیلویاہ ! خُداوند دی وڈیائی ہووے ! خُدا دے تخت دے چارے پاسےچار جاندار تے ۲۴ بزرگ سن ، اوہناں نیں خُدا دی حمد کیتی جنہے سارے لوکاں نوں پاپاں توں مکتی دتی ، ایس لئی پئی اوہدی وڈیائی نا مکن والی اے ۔
 
آیتاں ۱۳ ۔۱۴:” فیر مَیں اسمان تے زمین تے زمین دے ہیٹھلی تے سمُندر دی ساری مخلُوقات نُوں یعنی سارِیاں شیواں نُوں جیہڑیاں اوہناں دے وِچ نیں ایہہ آکھدیاں سُنیا۔ پئی جیہڑا تخت اُتّے بَیٹھا ہویا اے اوہدی تے لیلے دی وڈیائی تے عِزّت تے جلال تے سلطنت سدا تِیکر رہے۔ تے چَوہاں جانداراں آکھیا۔ آمِین۔ تے بزُرگاں ڈِگّ کے سجدہ کِیتا۔“
اخیریں ، یسوع مسیح جیہڑا خُدا دا نمائندہ بن گیا ، اوہو ای اسمان دے سیوا کرن والیاں توں ساری وڈیائی تے بھگتی پاؤن دے لائق اُچا کیتاگیا ۔ اسمان دے سارے سیوا کرن والیاں نیں اوہنوں ہمیش ہمیش لئی حمد ، عزت تے وڈیائی دتی ، ایس لئی پئی خُدا ای ایس سارے توں حیران کرن والا تے شکرگزاری دے لائق سی ۔ دونویں اسمان تے دھرتی دے سارے پاک لوکاں نوں چاہی دا اے پئی اوہ اوہدی عزت تے وڈیائی کرن جیہڑا خُدا باپ دے نمائندے وانگر تخت اُتے بیٹھا اے ۔ *