[11-1] សេចក្តីសង្រ្គោះ របស់មនុស្សមានបាប ដែលត្រូវបានបើកសម្តែងនៅក្នុងរោងឧបោសថ (និក្ខមនំ ២៧:៩-២១)

តើអ្នកធ្លាប់បានមើលឃើញគំរូនៃរោងឧបោសថនៅក្នុងរូបភាព ឬគំនូរណាមួយដែរទេ? បើសិននិយាយជាទូទៅ រោងឧបោសថត្រូវបានបែងចែកជាទីលាន និងរោងឧបោសថ ដែលជាតំណាក់របស់ព្រះ។ នៅខាងក្នុងតំណាក់របស់ព្រះនេះ មានកន្លែងតូចមួយ ដែលហៅថា ទីបរិសុទ្ធ។ ទីបរិសុទ្ធមានគម្របបួនផ្សេងៗពីគ្នា៖ គម្របធ្វើពីសំពត់ខ្លូតទេសវេញយ៉ាងខ្មាញ់ និងអំបោះពណ៌ផ្ទៃមេឃ ពណ៌ស្វាយ និងពណ៌ក្រហម គម្របធ្វើពីរោមពពែ គម្របធ្វើពីស្បែកចៀមឈ្មោលជ្រលក់ពណ៌ក្រហម  និងគម្របធ្វើពីស្បែកផ្សោត។ 
នៅខាងកើតទីលានរោងឧបោសថ មានទ្វាររបស់វា ដែលត្រូវបានត្បាញជាមួយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់។ នៅពេលយើងចូលទៅតាមទ្វារនេះ យើងនឹងបានមើលឃើញអាសនាតង្វាយដុត។ ហើយបើសិនយើងឆ្លងកាត់ចានក្លាំ យើងនឹងបានមើលឃើញរោងឧបោសថផ្ទាល់ហើយ។ រោងឧបោសថត្រូវបានបែងចែកជាទីបរិសុទ្ធ និងទីបរិសុទ្ធបំផុត ដែលមានហិបសញ្ញារបស់ព្រះនៅទីនោះ។ របងទីលានរោងឧបោសថត្រូវបានសាងសង់ ដោយសសរចំនួន៦០ ដែលមានរនាំងធ្វើពីសំពត់ខ្លូតទេសពណ៌ស។ ម៉្យាងវិញទៀត រោងឧបោសថផ្ទាល់ត្រូវបានសាងសង់ ដោយក្តារចំនួន៤៨និងសសរចំនួន៩។ យ៉ាងហោចណាស់ យើងត្រូវមានគំនិតទូទៅនៃ លក្ខណៈខាងក្រៅនៃរោងឧបោសថ ដើម្បីឲ្យយើងអាចយល់ពីអ្វីដែលព្រះកំពុងតែមានបន្ទូលកាន់យើង តាមរយៈទ្រង់ទ្រាយរបស់វា។ 
ព្រះបានគង់នៅក្នុងរោងឧបោសថ ដែលត្រូវបានសាងសង់ឡើង ដោយក្តារចំនួន៤៨។ ព្រះបានបើកសម្តែងព្រះវត្តមានទ្រង់ទៅកាន់បណ្តាជនអ៊ីស្រាអែល តាមរយៈសសរពពកនៅពេលថ្ងៃ និងដោយសសរភ្លើងនៅពេលយប់ ដែលពួកគេមើលឃើញវានៅពីលើរោងឧបោសថ។ ហើយមានសិរីល្អនៃព្រះពេញនៅខាងក្នុងទីបរិសុទ្ធ ដែលព្រះទ្រង់ផ្ទាល់គង់នៅ។ នៅខាងក្នុងទីបរិសុទ្ធ មានតុតាំងនំប៉័ង ជើងចង្កៀង និងអាសនាគ្រឿងក្រអូប ហើយនៅក្នុងទីបរិសុទ្ធបំផុត មានហិបសញ្ញា និងទីសណ្តោសប្រោស។ យោងតាមព្រះព័ន្ធថ្វាយយញ្ញបូជា បណ្តាជនអ៊ីស្រាអែលធម្មតាត្រូវបានហាមប្រាមមិនឲ្យចូលមកក្នុងកន្លែងទាំងនេះទេ គឺមានតែពួកសង្ឃ និងសម្តេចសង្ឃប៉ុណ្ណោះ ដែលអាចចូលទៅទីបរិសុទ្ធទាំងនេះបាន។ ហេព្រើរ ៩:៦-៧ សរសេរថា «កាលរបស់ទាំងនោះបានរៀបជាស្រេចហើយ នោះពួកសង្ឃក៏ចូលទភ សំរេចការងារក្នុងរោងឧបោសថផ្នែកខាងមុខជានិច្ច តែផ្នែកខាងក្នុង នោះមានតែសំដេចសង្ឃតែឯងប៉ុណ្ណោះ ដែលចូលទៅបា ក្នុង១ឆ្នាំ១ដង ក៏មិនមែនឥតយកឈាម ដែលលោកថ្វាយដោយព្រោះខ្លួនលោក នឹងអំពើបាបដែលប្រជាជនប្រព្រឹត្ត ដោយឥតដឹងនោះដែរ»។ នេះប្រាប់យើងថា នៅសម័យបច្ចុប្បន្ន មានតែអ្នកដែលមានសេចក្តីជំនឿនៃមាស ដែលជឿតាមដំណឹងល្អអំពីទឹក និងព្រះវិញ្ញាណប៉ុណ្ណោះ ទើបអាចរស់នៅជាមួយព្រះ និងបម្រើព្រះបាន។ 
តើអ្វីគឺជាអត្ថន័យនៃនំប៉័ងដែលគេដាក់នៅលើតតាំងនំប៉័ង? វាមានន័យថា ព្រះបន្ទូលព្រះ។ ហើយតើអាសនាគ្រឿងក្រអូបមានន័យយ៉ាងដូចម្តេច? វាប្រាប់យើងអំពីការអធិស្ឋាន។ នៅខាងក្នុងទីបរិសុទ្ធបំផុត មានហិបសញ្ញា ហើយទីសណ្តោសប្រោស ដែលត្រូវបានធ្វើពីមាសសុទ្ធ ត្រូវបានគេដាក់ពីលើហិបសញ្ញា។ ចេរូប៊ីនស្រដាងស្លាបទល់មុខគ្នា គ្របពីលើទីសណ្តោសប្រោស។ នេះគឺជាទីសណ្តោសប្រោស ដែលជាកន្លែងព្រះប្រទានសេចក្តីមេត្តាករុណរបស់ទ្រង់។ នៅខាងក្នុងហិបសញ្ញា មានបន្ទះថ្មពីរ ដែលគេបានឆា្លក់ក្រិត្យវិន័យទាំងដប់ ដំបងដែលប៉ិចឡើងរបស់លោកអើរ៉ុន និងក្រឡមួយដែលមានពេញដោយនំម៉ាន៉ា។ គម្របមាស (ទីសណ្តោសប្រោស) បានគ្របពីលើហិបសញ្ញា ហើយនៅពីលើវា មានចេរ៉ូប៊ីនកំពុងតែសម្លឹងមើលទីសណ្តោសប្រោស។ 

តើគេបានប្រើសម្ភារៈអ្វីខ្លះសម្រាប់ធ្វើទ្វារចូលទីលាន រោងឧបោសថ?

សម្ភារៈដែលគេប្រើសម្រាប់ទ្វារចូលទីលានរោងឧបោសថគឺ អំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់។ ទ្វារនេះមានកម្ពស់ ២.២៥ ម៉ែត្រ និងទទឹង ៩ ម៉ែត្រ។ វាគឺជាផ្ទាំងសំពត់ ដែលគេត្បាញជាមួយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ ហើយព្យួរនៅលើសសរបួន។ ដូច្នេះ កាលណាមនុស្សម្នាក់បានព្យាយាមចូលទៅទីលានរោងឧបោសថ គាត់អាចមើលឃើញទ្វារបានយ៉ាងងាយស្រួល។ 
អំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ ដែលគេបានប្រើសម្រាប់ទ្វារចូលទីលានរោងឧបោសថ បើកសម្តែងថា ព្រះនឹងសង្រ្គោះយើងចេញពីអំពើបាបទាំងអស់របស់យើង តាមរយៈព្រះរាជកិច្ចទាំងបួនរបស់ព្រះរាជបុត្រាយេស៊ូវរបស់ទ្រង់។ គ្រប់ទាំងសសរឈើ៦០ និងសំពត់ខ្លូតទេសសម្រាប់របងទីលានរោងឧបោសថក៏សុទ្ធតែបើកសម្តែងយ៉ាងច្បាស់លាស់ផងដែរ អំពីរបៀបដែលព្រះនឹងសង្រ្គោះអ្នក និងខ្ញុំចេញពីអំពើបាបរបស់យើង តាមរយៈព្រះរាជបុត្រាយេស៊ូវរបស់ទ្រង់។ 
នៅក្នុងន័យផ្សេង តាមរយៈទ្វារចូលទីលានរោងឧបោសថ ព្រះកំពុងតែបើកសម្តែងយ៉ាងច្បាស់លាស់ ពីសេចក្តីអាថ៌កំបាំងនៃសេចក្តីសង្រ្គោះមកកាន់យើង។ ចូរយើងត្រឡប់ទៅឯសម្ភារៈដែលគេបានប្រើសម្រាប់ទ្វារចូលទីលានរោងឧបោសថម្តងទៀត៖ អំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់។ អំបោះទាំងបួននេះមានសារៈសំខាន់យ៉ាងខ្លាំងសម្រាប់សេចក្តីសង្រ្គោះរបស់យើង តាមរយៈសេចក្តីជំនឿលើព្រះយេស៊ូវ។ បើសិនសម្ភារៈទាំងនេះមិនសំខាន់ទេ ព្រះគម្ពីរក៏មិនបានកត់ត្រាអំពីសម្ភារៈទាំងនេះយ៉ាងលម្អិតបែបនេះដែរ។ 
សម្ភារៈទាំងអស់ ដែលគេបានប្រើសម្រាប់ទ្វារចូលទីលានរោងឧបោសថ ពិតជាមានភាពចាំបាច់សម្រាប់ព្រះ ក្នុងការសង្រ្គោះអ្នក និងខ្ញុំ។ ទោះបីជាយ៉ាងណា ការពិតថា គេត្រូវតែត្បាញទ្វារចូលទីលានរោងឧបោសថជាមួយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ មានសារៈសំខាន់ខ្លាំងបំផុតសម្រាប់ព្រះ ក្នុងការសង្រ្គោះមនុស្សមានបាប ពីព្រោះអំបោះទាំងបួននេះគឺជាការបើកសម្តែងពីសេចក្តីសង្រ្គោះដ៏គ្រប់លក្ខណ៍របស់ព្រះ។ នេះគឺជារបៀបដែលព្រះបានកំណត់វា។ នេះគឺជាមូលហេតុដែលព្រះបានបង្ហាញគំរូនៃរោងឧបោសថទៅដល់លោកម៉ូសេនៅលើភ្នំស៊ីណាយ ហើយបានបង្គាប់គាត់ឲ្យធ្វើទ្វារចូលទីលានរោងឧបោសថតាមផែនការនេះទាំងស្រុង។ 

តើអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ មានអត្ថន័យយ៉ាងដូចម្តេច?

ទ្វារចូលទៅកាន់ទីបរិសុទ្ធត្រូវបានធ្វើពីវាំងននដែលត្បាញ ដោយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ ហើយវាំងនននៅចន្លោះរវាងទីបរិសុទ្ធ និងទីបរិសុទ្ធបំផុតក៏ត្រូវបានត្បាញដោយអំបោះទាំងបួននេះផងដែរ។ លើសពីនេះ អេផូឌ និងប្រដាប់បាំងទ្រូងរបស់សម្តេចសង្ឃក៏ត្រូវបានត្បាញ ដោយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ទាំងនេះផងដែរ។ ដូច្នេះ តើអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ទាំងនេះប្រាប់យើងអំពីអ្វី? យើងត្រូវតែធ្វើឲ្យប្រាកដថា យើងនឹងពិនិត្យមើលបញ្ហានេះយ៉ាងយកចិត្តទុកដាក់។
ជាដំបូង អំបោះពណ៌ផ្ទៃមេឃប្រាប់យើងអំពីបុណ្យជ្រមុជរបស់ព្រះយេស៊ូវគ្រីស្ទ។ អ្នកដែលមិនស្គាល់ពីសារៈសំខាន់នៃបុណ្យជ្រមុជ មិនដឹងថា អំបោះពណ៌ផ្ទៃមេឃនេះសំដៅទៅលើបុណ្យជ្រមុជរបស់ព្រះយេស៊ូវ         គ្រីស្ទឡើយ។ ដូច្នេះ ជាទូទៅ អ្នកដែលមិនបានកើតជាថ្មីអះអាងថា អត្ថន័យនៃអំបោះពណ៌ផ្ទៃមេឃនេះគឺ «ព្រះយេស៊ូវគ្រីស្ទគឺជាព្រះទ្រង់ផ្ទាល់ ហើយទ្រង់បានយាងមកផែនដីនេះ ក្នុងនាមជាមនុស្សម្នាក់»។ ហើយអ្នកមួយចំនួនទៀតអះអាងថា «អំបោះពណ៌ផ្ទៃមេឃគ្រាន់តែមានន័យថា ព្រះបន្ទូលប៉ុណ្ណោះ»។ ទោះបីជាយ៉ាងណា ព្រះគម្ពីរប្រាប់យើងថា អំបោះពណ៌ផ្ទៃមេឃមានន័យថា «បុណ្យជ្រមុជរបស់ព្រះយេស៊ូវ ដែលទ្រង់បានទទួលយកអំពើបាបរបស់លោកិយនេះដាក់លើអង្គទ្រង់ បន្ទាប់ពីបានយាងមកផែនដីនេះ»។ បទគម្ពីរបង្ហាញប្រាប់យើងយ៉ាងច្បាស់លាស់ថា អំបោះពណ៌ផ្ទៃមេឃសំដៅទៅលើបុណ្យជ្រមុជ ដែលព្រះយេស៊ូវបានទទួលពីលោកយ៉ូហាន-បាទ្ទីស។ នោពេលអានព្រះបន្ទូលអំពីរោងឧបោសថ ខ្ញុំបានយល់ថា «ព្រះចង់បង្ហាញប្រាប់យើងអំពីសារៈសំខាន់នៃសេចក្តីជំនឿរបស់យើងលើបុណ្យជ្រមុជរបស់ព្រះយេស៊ូវ»។ 
អាវដែលសម្តេចសង្ឃពាក់នៅពេលថ្វាយតង្វាយ ក៏ត្រូវបានប៉ាក់ដោយអំបោះពណ៌ផ្ទៃមេឃផងដែរ។ ស្លាកមាសុទ្ធដែលសម្តេចសង្ឃពាក់នៅលើក្បាល និងខ្សែចងស្លាកមាសសុទ្ធជាមួយឈ្នួតក៏មានពណ៌ខៀវផងដែរ។ ហើយនៅលើស្លាកមាសសុទ្ធ.មានឆ្លាក់ថា «បរិសុទ្ធដល់ព្រះ យេហូវ៉ា!។ យើងអាចមើលឃើញថា ខ្សែពណ៌ផ្ទៃមេឃ ដែលចងស្លាកមាសនៅលើឈ្នួតរបស់សម្តេចសង្ឃ បើកសម្តែងពីបុណ្យជ្រមុជរបស់ព្រះយេស៊ូវ ដែលផ្តល់ភាពបរិសុទ្ធដល់ព្រះអម្ចាស់។ 
តាមរបៀបនេះ តាមរយៈខ្សែពណ៌ផ្ទៃមេឃ ដែលចងស្លាកមាសជាមួយនឹងឈ្នួល ព្រះមានបន្ទូលមកកាន់យើងអំពីសេចក្តីសង្រ្គោះដ៏ពិតរបស់យើង។ នៅក្នុងន័យផ្សេង  ខ្សែស្លាកមាសដែលផ្តល់ភាពបរិសុទ្ធដល់យើង មានពណ៌ខៀវ ហើយនេះគឺជាបុណ្យជ្រមុជរបស់ព្រះយេស៊ូវ។ ទោះបីជាទូទៅ ពណ៌ផ្ទៃមេឃរំឮកយើងពីមេឃពណ៌ខៀវក៏ដោយ ក៏ពណ៌ផ្ទៃមេឃនេះមិនគ្រាន់តែសំដៅទៅលើព្រះប៉ុណ្ណោះដែរ។ ក្នុងចំណោមអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ អំបោះផ្ទៃមេឃពិតជាមានន័យថា បុណ្យជ្រមុជរបស់ព្រះយេស៊ូវគ្រីស្ទប្រាកដមែន។ នៅក្នុងន័យផ្សេង អំបោះផ្ទៃមេឃប្រាប់យើងថា ព្រះយេស៊ូវគ្រីស្ទបានទទួលយកអំពើបាបរបស់មនុស្សមានបាបទាំងអស់ ដោយការទទួលបុណ្យជ្រមុជ (ម៉ាថាយ ៣:១៥)។ បើសិនព្រះយេស៊ូវមិនបានទទួលយកអំពើបាបរបស់មនុស្សម្នាក់ៗ ដោយការទទួលបុណ្យជ្រមុជទេ នោះយើងដែលជាអ្នកជឿ មិនអាចថ្វាយ «ភាពបរិសុទ្ធដល់ព្រះអម្ចាស់» បានឡើយ។ ហើយបើសិនមិនមានបុណ្យជ្រមុជ ដែលព្រះយេស៊ូវបានទទួលទេ នោះយើងមិនអាចមានភាពបរិសុទ្ធនៅចំពោះព្រះបានឡើយ។ 
តើអ្នកយល់ពីអត្ថន័យខាងវិញ្ញាណនៃសេចក្តីបង្គាប់របស់ព្រះ ដែលឲ្យត្បាញទ្វារចូលទីលានរោងឧបោសថ ជាមួយអំបោះពណ៌ផ្ទៃមេឃ តាមគំរូដែលទ្រង់បានបង្ហាញដល់លោកម៉ូសេដែរទេ? ទ្វារចូលទីលានរោងឧបោសថ ដែលព្រះគង់នៅ សំដៅទៅលើព្រះយេស៊ូវគ្រីស្ទ។ គ្មានអ្នកណាអាចចូលទៅនគរស្ថានសួគ៌បានឡើយ ក្រៅពីព្រះយេស៊ូវគ្រីស្ទ។ ទ្វារទីលាន ដែលសំដៅទៅលើព្រះយេស៊ូវ ត្រូវបានត្បាញ ដោយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ ពីព្រោះព្រះចង់បើកសម្តែងសេចក្តីពិត ដែលដឹកនាំយើងទៅដល់សេចក្តីសង្រ្គោះរបស់យើង។ អំបោះពណ៌ស្វាយសំដៅទៅលើព្រះវិញ្ញាណបរិសុទ្ធ ដែលប្រាប់យើងថា «ព្រះយេស៊ូវគឺជាស្តេចលើសអស់ទាំងស្តេច»។ អំបោះពណ៌ក្រហមសំដៅទៅលើព្រះលោហិត ដែលព្រះយេស៊ូវបានសម្រក់នៅលើឈើឆ្កាង។ ហើយអំបោះពណ៌ផ្ទៃមេឃសំដៅទៅលើបុណ្យជ្រមុជដែលព្រះយេស៊ូវបានទទួលពីលោកយ៉ូហាន-បាទ្ទីស។ 
ដូច្នេះ អំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ប្រាប់យើងអំពីបុណ្យជ្រមុជរបស់ព្រះយេស៊ូវ ការប្រសូតជាមនុស្សរបស់ព្រះ និងការសុគតរបស់ទ្រង់នៅលើឈើឆ្កាង។ ព្រះរាជកិច្ចរបស់ព្រះយេស៊ូវ ដែលត្រូវបានបើកសម្តែងនៅអំបោះទាំងបីនេះ ផ្តល់ឲ្យយើងនូវសេចក្តីជំនឿ ដែលជួយឲ្យយើងអាចចូលទៅចំពោះព្រះយេហូវ៉ានៅភាពបរិសុទ្ធបាន។ ព្រះយេស៊ូវដ៏ជាព្រះអង្គទ្រង់ផ្ទាល់ បានយាងមកផែនដីនេះ ក្នុងនាមជាមនុស្សម្នាក់ បានទទួលយកអំពើរំលឹងរបស់មនុស្សមានបាបដាក់លើអង្គទ្រង់ តាមរយៈការទទួលបុណ្យជ្រមុជ ហើយបានទទួលយកទោសនៃអំពើបាប និងបណ្តាសាជំនួសយើង ដោយការសម្រក់ព្រះលោហិតរបស់ទ្រង់។ នេះហើយគឺជាសេចក្តីអាថ៌កំបាំងនៃអំបោះពណ៌ផ្ទៃមេឃ ពណ៌ស្វាយ និងពណ៌ក្រហម។ 
ប្រហែលជាកន្លងមក អ្នកគ្រាន់តែបានចាត់ទុកអំបោះពណ៌ផ្ទៃមេឃជាព្រះ ឬព្រះបន្ទូលទ្រង់ប៉ុណ្ណោះ។ ប៉ុន្តែឥឡូវនេះ អ្នកត្រូវតែយល់យ៉ាងច្បាស់លាស់ថា អំបោះពណ៌ផ្ទៃមេឃពិតជាសំដៅទៅលើបុណ្យជ្រមុជរបស់ព្រះយេស៊ូវគ្រីស្ទប្រាកដមែន។ បុណ្យជ្រមុជរបស់ព្រះយេស៊ូវ ដែលបានទទួលយកអំពើបាបទាំងអស់របស់យើងដាក់លើអង្គទ្រង់ គឺពិតជាមានភាពចាំបាច់ ហើយមិនអាចត្រូវបានដកចេញពីព្រះរាជកិច្ចរបស់ទ្រង់បានឡើយ។ ដូច្នេះហើយបានជាចេញពីរោងឧបោសថនៅក្នុងព្រះគម្ពីរសញ្ញាចាស់ ព្រះកំពុងតែប្រាប់យើងអំពីសារៈសំខាន់របស់វា។ 

យើងទទួលបានភាពបរិសុទ្ធ តាមរយៈជំនឿលើ អំបោះពណ៌ផ្ទៃមេឃ

នៅក្នុងទីបរិសុទ្ធបំផុត ចេរូប៊ីនពីតដែលត្រដាបស្លាប បានសម្លឹងចុះពីលើគម្របហិបសញ្ញា។ ទីទំនេររវាងចេរូប៊ីនទាំងពីរត្រូវបានហៅថា ទី សណ្តោសប្រោស។ ទីសណ្តោសប្រោសគឺជាកន្លែងដែលព្រះប្រទានព្រះគុណរបស់ទ្រង់ដល់យើង។ គម្របហិបសញ្ញាណបានប្រឡាក់ឈាម ពីព្រោះសម្តេចសង្ឃបានប្រោសឈាមតង្វាយយញ្ញបូជា ទៅលើទី សណ្តោសប្រោសនេះប្រាំពីរដងសម្រាប់បណ្តាជនអ៊ីស្រាអែល។ ដូច្នេះ ព្រះបានយាងចុះមកលើទីសណ្តោសប្រោសនេះ ហើយបានប្រទានសេចក្តីមេត្តាករុណារបស់ទ្រង់ដល់បណ្តាជនអ៊ីស្រាអែល។ អ្នកដែលជឿតាមការពិតនេះ នឹងទទួលបានព្រះពរ ការការពារ និងការដឹកនាំរបស់ព្រះ។ ចាប់ពីពេលនោះតទៅ ពួកគេបានធ្វើជារាស្ត្រពិតប្រាកដរបស់ព្រះ ហើយមានសិទ្ធិចូលទៅក្នុងទីបរិសុទ្ធ។ 
ក្នុងចំណោមគ្រីស្ទបរិស័ទជាច្រើននៅក្នុងលោកិយនេះ មនុស្សមួយចំនួនមានសេចក្តីជំនឿ ដែលបានអនុញ្ញាតឲ្យពួកគេចូលទៅក្នុងទីបរិសុទ្ធ ប៉ុន្តែមនុស្សមួយចំនួនទៀតមិនមានសេចក្តីជំនឿ ដែលនាំពួកគេចូលទៅក្នុងទីបរិសុទ្ធឡើង។ តើអ្នកមានសេចក្តីជំនឿប្រភេទណា? យើងត្រូវការសេចក្តីជំនឿ ដែលអាចគូសបន្ទាត់នៃសេចក្តីសង្រ្គោះនេះ ហើយចូលទៅក្នុងទីបរិសុទ្ធរបស់ព្រះបាន ពីព្រោះមានតែតាមរបៀបនេះប៉ុណ្ណោះ ដែលយើងអាចទទួលបានព្រះពរយ៉ាងអស្ចារ្យពីព្រះបាន។ 
ប៉ុន្តែយើងមិនងាយនឹងមានសេចក្តីជំនឿបែបនេះទេ។ ដោយសារសាតាំងស្អប់ នៅពេលមនុស្សគូសបន្ទាត់បែងចែកសេចក្តីសង្រ្គោះ វាតែងតែប៉ុនប៉ងលុបបន្ទាត់នេះចោល។ «អ្នកមិនចាំបាច់ជឿតាមរបៀបនេះ ឡើយ។ មិនមែនគ្រប់គ្នា សុទ្ធតែជឿតាមរបៀបនេះឡើយ។ ហេតុអ្វីអ្នក ផ្តល់សារៈសំខាន់ដល់វាខ្លាំងយ៉ាងនេះ? ចូរជឿតាមសម្រួលចុះ»។ តាម រយៈពាក្យសម្តីទាំងនេះ សាតាំងព្យាយាមលុបបន្ទាត់បែងចែកសេចក្តីសង្រ្គោះនេះចោល។ ហើយសាតាំងបើកបង្ហាញពីភាពខ្សោយខាងសាច់ឈាមរបស់យើង ហើយព្យាយាមប្រែក្លាយវាទៅជាបញ្ហា។ តើអ្នកនឹងជាអ្នកដែលស្តាប់តាមពាក្យសម្តីបោកបញ្ឆោតរបស់សាតាំង ដែលព្យាយាមបំបែកយើងចេញពីព្រះឬ? តើអ្នកនឹងរស់នៅក្នុងជីវិត ដោយរំឮកខ្លួនអ្នកពីសេចក្តីសង្រ្គោះរបស់អ្នកជារៀងរាល់ថ្ងៃ រួបរួមជាមួយពួកជំនុំ ដើតាមព្រះបន្ទូលព្រះ មានជីវិតដែលអធិស្ឋាន និងទទួលបានព្រះគុណដែលព្រះប្រទានឲ្យអ្នកដែរទេ?
តាមពិតទៅ អ្នកដែលបានទទួលការអត់ទោសបាប ចូលចិត្តសញ្ជឹងគិតអំពីសេចក្តីសង្រ្គោះរបស់ពួកគេជារឿយៗ។ ពួកគេចូលចិត្តសញ្ជឹងគិតអំពីដំណឹងល្អអំពីទឹក និងព្រះវិញ្ញាណម្តងហើយម្តងទៀត។ ការសញ្ជឹងគិតអំពីដំណឹងល្អគឺល្អ និងចាំបាច់សម្រាប់អ្នក។ តើអ្នកមិនធ្វើដូច្នេះទេឬ? «តើនេះមិនមែនជារឿងដដែលទៀតហើយទេឬ នៅពេលយើងបានសង្រ្គោះ? សម្ភារៈរឿង និងដំណើររឿងអាចខុសគ្នាបាន ប៉ុន្តែវានៅតែជារឿងតែមួយដដែល។ ខ្ញុំធុញទ្រាន់នឹងរឿងនេះហើយ។»
តើមានអ្នកណាម្នាក់ ដែលអាចនិយាយដូច្នេះដែរទេ? ខ្ញុំសូមទោស បើសិនខ្ញុំប្រាប់ពីរឿងផ្ទាល់ខ្លួនជារៀងរាល់ថ្ងៃ ប៉ុន្តែនៅពេលព្រះគម្ពីរប្រាប់យើងថា យើងគួរតែសញ្ជឹងគិតលើសេចក្តីសង្រ្គោះរបស់យើងជារៀងរាល់ថ្ងៃ តើខ្ញុំត្រូវធ្វើដូចម្តេចទៅ? នៅពេលទាំងព្រះគម្ពីរសញ្ញាចាស់ និងទាំងសញ្ញាថ្មីនិយាយមកកាន់យើងអំពីដំណឹងល្អអំពីទឹក និងព្រះវិញ្ញាណ នោះអ្វីដែលអាក្រក់នៅចំពោះព្រះគឺថា មនុស្សប្រកាសអ្វីផ្សេងក្រៅពីដំណឹងល្អនេះ។ ព្រះបន្ទូលទាំងអស់នៅក្នុងព្រះគម្ពីរ សុទ្ធតែនិយាយអំពីដំណឹងល្អអំពីទឹក និងព្រះវិញ្ញាណ។ «សេចក្តីសង្រ្គោះ ជីវិតនៃសេចក្តីជំនឿ សេចក្តីជំនឿ ការរស់នៅខាងវិញ្ញាណ ការតយុទ្ធជាមួយសាតាំង ស្ថានសួគ៌ សិរីល្អ ព្រះគុណ ព្រះពរ ការរស់ពីស្លាប់ឡើងវិញ និងព្រះវិញ្ញាណបរិសុទ្ធ»។ ទាំងនេះគឺជាគំនិតគន្លឹះរបស់ពួកបរិសុទ្ធ ដែលមានទំនាក់ទំនងជាមួយដំណឹងល្អពិតនេះ។ ការនិយាយអំពីអ្វីមួយផ្សេងពីគំនិតទាំងនេះគឺពិតជាជំនឿខុសឆ្គង និងសេចក្តីបង្រៀនខុសឆ្គងទាំងអស់។ អ្វីដែលស្រដៀងគ្នា ប៉ុន្តែមានខ្លឹមសារខុសគ្មា គឺជាសេចក្តីបង្រៀនខុសឆ្គង។ ដំណឹងល្អទាំងឡាយដែលស្រដៀងគ្នាផ្នែកខាងក្រៅ ប៉ុន្តែខុសគ្នាផ្នែកខាងក្នុងពីដំណឹងល្អអំពីទឹក និងព្រះវិញ្ញាណ គឺគ្រាន់តែដំណឹងល្អរបស់នៃសាសនាក្លែងក្លាយប៉ុណ្ណោះ។ 
វាគឺជាការអស្ចារ្យខ្លាំងណាស់ បើសិនពួកជំនុំរបស់ព្រះប្រកាសព្រះបន្ទូលព្រះជារៀងរាល់ថ្ងៃ មិនមែនពាក្យបោកបញ្ឆោតរបស់សាសនាក្លែងក្លាយ។ ហើយវាគឺជាព្រះពរមួយ ដែលយើងបានរួបរួមជាមួយពួកជំនុំរបស់ព្រះ ស្តាប់ឮ និងជឿតាមព្រះបន្ទូលបរិសុទ្ធរបស់ព្រះ។ ដោយតែងតែប្រកាសដំណឹងល្អអំពីទឹក និងព្រះវិញ្ញាណជានិច្ច ពួកជំនុំរបស់ព្រះជួយឲ្យពួកបរិសុទ្ធអាចគិតអំពីព្រះគុណរបស់ព្រះជារៀងរាល់ថ្ងៃ អធិស្ឋានទៅកាន់ទ្រង់ ហើយកោតខ្លាចទ្រង់ ហើយរស់នៅក្នុងជីវិតដែលមិនដើរតាមការអាក្រក់។ តើអ្នកមិនសប្បាយចិត្តទេឬ ដែលអ្នកបានស្តាប់ឮម្តងទៀត ហើយបានជឿតាមព្រះបន្ទូលនៃសេចក្តីពិត ដែលអនុញ្ញាតឲ្យអ្នកទទួលបានការអត់ទោសបាប? ខ្ញុំពិតជាសប្បាយចិត្តខ្លាំងណាស់។ 
បើសិនគេបង្ខំឲ្យខ្ញុំអធិប្បាយអ្វីផ្សេងក្រៅពីដំណឹងល្អអំពីទឹក និងព្រះវិញ្ញាណនេះ ខ្ញុំសុខចិត្តរងទុក្ខយ៉ាងខ្លាំងវិញ។ ហើយបើសិនគេបង្ខំឲ្យខ្ញុំប្រកាសព្រះបន្ទូលនៃសេចក្តីសង្រ្គោះ ប៉ុន្តែសេចក្តីបង្រៀនដែលមនុស្សបង្កើតឡើងវិញ ខ្ញុំសុខចិត្តគេចចេញ។ តាមការពិត វាមិនដោយសារខ្ញុំគ្មានអ្វីផ្សេងដែលត្រូវនិយាយនោះទេ។ មានបញ្ហារបស់មនុស្សយ៉ាងច្រើន ដែលខ្ញុំអាចនិយាយបាន ប៉ុន្តែវាសុទ្ធតែគ្មានភាពចាំបាច់ និងគ្រាន់តែជាសេចក្តីបង្រៀនពីដំបែរស្អុយប៉ុណ្ណោះ សម្រាប់យើងដែលបានកើតជាថ្មី។ 
មានតែដំណឹងល្អអំពីទឹក និងព្រះវិញ្ញាណ ដែលព្រះយេស៊ូវដ៏ជាព្រះបានសង្រ្គោះយើងប៉ុណ្ណោះ ទើបជាព្រះបន្ទូលដ៏មានតម្លៃរបស់ព្រះ ដែល ផ្តល់រសជាតិផ្អែម នៅពេលយើងស្តាប់ឮម្តងហើយទៀត។ មានរឿងជាច្រើនទៀត ដែលខ្ញុំអាចប្រាប់ថា ប៉ុន្តែខ្ញុំពេញចិត្តបំផុត នៅពេលខ្ញុំកំពុងតែនិយាយអំពីដំណឹងល្អអំពីទឹក និងព្រះវិញ្ញាណ ដែលសង្រ្គោះយើង។ ដូច្នេះ ខ្ញុំមានអំណរយ៉ាងខ្លាំង។ ខ្ញុំគឺជាមនុស្សដែលមានអំណរបំផុត នៅពេលខ្ញុំកំពុងតែនិយាយអំពីសេចក្តីសង្រ្គោះនេះ ពីព្រោះវាគឺជាពេលដែលខ្ញុំអាចរំឮកពីអនុស្សាវរីយ៍ចាស់ៗ របៀបដែលព្រះអម្ចាស់បានសង្រ្គោះខ្ញុំ អរព្រះគុណដល់ទ្រង់ម្តងទៀត និងបរិភោគនំប៉័ងនៃសេចក្តីសង្រ្គោះម្តងទៀតបាន។ 
ខ្ញុំប្រាកដច្បាស់ថា អ្នកក៏ចូលចិត្តបំផុតផងដែរ នៅពេលអ្នកស្តាប់ឮព្រះបន្ទូលនៃសេចក្តីសង្រ្គោះនេះ។ ប្រហែលជាអ្នកអាចត្អូញត្អែរថា វាគឺជារឿងដដែលៗជារៀងរាល់ថ្ងៃ ប៉ុន្តែនៅក្នុងជម្រៅចិត្តរបស់អ្នក អ្នកគិតថា «ឥឡូវនេះ ខ្ញុំបានស្តាប់ឮព្រះបន្ទូលនេះម្តងទៀត ហើយវាមានអំណាចព្រះចេ្តសាជាងមុន។ ពីដំបូង វាមិនសូវអស្ចារ្យដូច្នេះទេ ប៉ុន្តែនៅពេលខ្ញុំបន្តស្តាប់ ខ្ញុំអាចដឹងថា គ្មានរឿងអ្វីផ្សេងក្រៅពីរឿងនេះ ដែលគួរឲ្យចង់ ស្តាប់ឡើយ។ ខ្ញុំបានគិតថា រឿងនៅថ្ងៃនេះមានលក្ខណៈពិសេស ប៉ុន្តែការសន្និដ្ឋានប្រាប់ខ្ញុំថា វាគឺជារឿងដដែល។ ប៉ុន្តែខ្ញុំនៅតែមានអំណរ»។ ខ្ញុំប្រាកដច្បាស់ថា នេះគឺជាអារម្មណ៍ចេញពីចិត្តរបស់អ្នក។ 
ឱបងប្អូនប្រុសស្រីអើយ អ្វីដែលខ្ញុំកំពុងតែអធិប្បាយនៅទីនេះ គឺជាព្រះបន្ទូលរបស់ព្រះយេស៊ូវ។ គ្រូអធិប្បាយត្រូវតែអធិប្បាយព្រះបន្ទូលរបស់ព្រះយេស៊ូវ។ អ្វីដែលពួកជំនុំរបស់ព្រះត្រូវធ្វើ គឺអធិប្បាយអ្វីដែលព្រះយេស៊ូវបានធ្វើ តាមរយៈព្រះបន្ទូលអំពីទឹក និងព្រះវិញ្ញាណនៅក្នុងព្រះ គម្ពីរ។ ឥឡូវនេះ យើងកំពុងតែមានជីវិតនៃសេចក្តីជំនឿរបស់យើងនៅក្នុងពួកជំនុំ។ ការចូលទៅក្នុងទីបរិសុទ្ធ ការទទួលពន្លឺនៅក្រោមជើងចង្កៀងដែលមានមែកចំនួនប្រាំពីរ ការបរិភោគនំប៉័ងនៅក្នុងតំណាក់មាសសុទ្ធ ការអធិស្ឋាននៅឯអាសនាគ្រឿងក្រអូប ការទៅវិហារនៃព្រះ ការថ្វាយបង្គំទ្រង់ និងការរស់នៅក្នុង តំណាក់មាសនេះ គឺពិតជាជីវិតនៃសេចក្តីជំនឿរបស់យើងហើយ។ 
ឥឡូវនេះ អ្នក និងខ្ញុំកំពុងតែមានជីវិតនៃជំនឿ ដែលព្រះបានប្រទានឲ្យហើយ។ ការទទួលបានការអត់ទោសបាប និងការមានជីវិតនៃជំនឿត្រឹមត្រូវគឺជាជីវិតនៅក្នុងតំណាក់មាសរបស់ព្រះហើយ។ «ទោះបើមនុស្សខាងក្រៅរបស់យើង កំពុងតែពុករលួយទៅក៏ពិតមែន តែនៅខាងក្នុងកំពុងតែកែប្រែជាថ្មីឡើងរាល់ថ្ងៃជានិច្ចវិញ» (កូរិនថូស ៤:១៦)។ តាមរយៈជំនឿរបស់យើងលើអំបោះ និងសំពត់ខ្លូតទេសវេញយ៉ាងខ្មាញ់ពណ៌ផ្ទៃមេឃ ពណ៌ស្វាយ និងពណ៌ក្រហម ដែលមាននៅក្នុងរោងឧបោសថ ព្រលឹងរបស់យើងកំពុងតែរស់នៅក្នុងតំណាក់នៃព្រះ ដែលបញ្ចេញពន្លឺពណ៌មាស។ 
ខ្ញុំសូមអរព្រះគុណដល់ព្រះជារៀងរហូត សម្រាប់ការសង្រ្គោះយើងចេញពីអំពើបាបទាំងអស់របស់យើង និងទោស។ ហាលេលូយ៉ា!